الخميس، فبراير 10، 2011

فى رقبه مين ذنبهم بقى؟؟؟؟







تحديث مهم


مدونه ثوره الغضب


تنقل بالصوت والصوره كل ما يحدث فى مصر الان


و فى كل يوم









من كام يوم كنت فى كايرو فى رحله سريعه كده و بما اننا مكناش ودينا الولاد الهرم قبل كده قررنا نروح الهرم

الحمد لله رحنا الهرم و اتفرجنا و اتصورنا و شرحنا  بعض المعلومات من اللى مخزنينه فى الذاكره من المعلومات القديمه

و عدت الزياره على خير وسلام و الدنيا كانت حلوه اووووى

و احنا مروحين بقى و خارجين من الهرم على طول

تقريبا المنطقه اللى بره دى اسمها نزله السمان على ما اعتقد

شايفه من بعيييييييييييييييييد كده مبنى صغير  يادوب 3 ادوار  دور ارضى وفوقيه دورين

اللى لفت نظرى من بعيد ان المبنى الصغير اووووى ده عليه  برجين من بتوع تقويه ارسال المحمول مش برج واحد

و استغربت جدا ان سكان العماره دى ازاى راضيين وساكتين كده اصل لو كانوا اعترضوا على الاولانى

مكنش التانى اتركب مش كده ولا ايييييييه؟؟؟

بعد ما قربنا بقى اكتر من المبنى  عرفت بقى السبب و طبعا اذا عرف السبب بطل العجب

المبنى الصغير ده طلع دار ايتام يعنى للاسف السكان اللى فيه مالهومش اهل و لا حد يخاف عليهم

و طبعا الدار ركبت الابراج دى و ضربت الفلوس فى جيبها  او فى جيب صاحب الجمعيه الخيريه اللى عملاه

و بما ان الاولاد اللى فى الدار معندهمش اهل يبقى ولا حد هيسأل و لا يخاف

بس اللى عايزه اعرفه بقى

دور الايتام دى مش بتبقى خاضعه لوزاره الشئون الاجتماعيه؟؟

طيب محدش منهم بيمر و يشوف اللى بيحصل فيها

محدش عدى و خد باله من المصيبتين دول و قلبه  وجعه على الاطفال دى

و لا يعنى عشان ملهومش اهل يتداسوا هما و صحتهم بالرجلين

كان نفسى اصور الدار دى بس للاسف ملحقتش و نسيت اسمها

بس اللى يعرف المنطقه دى اكيد هيعرفه 

و اكيد مفيش دور ايتام كتير فى المنطقه

اللهم بلغت اللهم فاشهد





هناك 20 تعليقًا:

Zouka's يقول...

اللى ما لهوش ظهر بينضرب على قفاه
حسبنا الله ونعم الوكيل

أنا - الريس يقول...

يا قاتِلَ الأَنفُسِ الحَرامِ وَيا * آكِلَ مالِ اليَتيمِ بِالسَّرَفِ

وَالحالِفَ الحانِثَ المُصِرَّ عَلى الحَنْ * ثِ عُتُوّا وَشاتم السُّلَفِ

مَن يَقتُلُ النَّاسَ إِن هَلَكت وَمَن * لِلخَيلِ وَالبيضِ وَالقنا القُطُفِ

ناشَدتُكَ اللَّهُ أَنْ تُطِلَّ دَمى * ما الحَظُّ في قَتلِ غَير مُنتَصِفِ

طُوبى لِمَن كانَ مِن أَبى خَلَف * في عَطَنٍ واسِعٍ وَفي كَنَفِ

--------
ولا حياة لمن تنادي

Ramy يقول...

مش عارف طبعاً أعلق

من حرقة الدم

بجد خلاص الناس ماتت ضمايرها

ربنا معاهم

سندباد يقول...

لا تندهشي يادكتور فانتي في جمهورية مصر العربية

لــــ زهــــــراء ــــولا يقول...

حسبي الله ونعم الوكيل ربنا يحمي ولادنا ويسلمهم من كل شر
لولا

♥نبع الغرام♥♪≈ يقول...

حبيبتى
وحشتينى اوووووووى
ازيك اناايناس مدونة الاحزان
يارب تكونى بخير

بجد احزنت لما سمعت منك

حسبى الله ونعمه الوكيل فعلا ذنبهم ايةةةةةةةةةةةةةةةةةةة

;كارولين فاروق يقول...

علي فكره البرجين دول
بياخذ عليهم صاحب المبني فلوس
كتيره غير طبعا ماطرحتيه من نهب
تحياتي لموضوعك

الشاب الصح يقول...

اكيد لها ضرر كبير جدا على الجهاز العصبى و المخ فقد ثبت بالدراسة أنها تؤثر علي التوصيلات العصبية والكهربائية وأنزيمات الدوبامين التي يفرزها المخ عند التعرض لفترات طويله تؤثر معنويا في هرمونات المناعة مثل الكورتيزول‏ والميلاتونين‏ وتؤدي إلي انخفاضها‏ انا اكيد مش عارف مهمه هذه الهرمونات لكن انا عارف انواع الهرمونات اللى بتؤثر عليها لكن بعد عده سنوات تقل هذه التأثيرات بزوال المؤثر سواء كان هاتفا محمولا أو محطات تقوية‏‏ وكلما انخفض العمر كلما زادت التأثيرات السلبية لمحطات التقوية‏‏ وهذا التأثير السلبي يزداد عند الرضع و الأطفال‏ والمراهقين‏ وكذلك البالغين‏ لكن المؤكد أن التأثير يشكل خطورة كبيره لو كان ارتفاع المحطه اقل من 6 امتار لكن حد الامان فوق 6 امتار ليه بقه ده موضوع كبير.....
اسف على الاطاله لكن ده تخصصى و حبيت اوضح لحضرتكم انا طالب بكليه الهندسه قسم اتصالات و الكترونيات جامعه الاسكندريه
و فى الاخر حسبنا الله و نعم الوكيل ده اطفال غلابه لو كان المقوى مش فى حدود الامان ممكن بسبب سرطان للاطفال
جزاكم الله خيرا
تحياتى لكم

فافى يقول...

عادى بقى

Unknown يقول...

حسبي الله و نعم الوكيل حاجه تحرق الدم هي الناس دي فقدت المشاعر و لا معندهومش أطفال و لا ايه؟
ربنا يستر

Carmen يقول...

الفلوووووووس
كل حاجة بتتكسر وتتهدم وتتباع بشوية فلوس
مبادئ قيم اخلاق انفس
ربنا يرحمنا برحمته
تحياتي لقلمك

reemaas يقول...

صاحب المبنى اكيد مبزنس معاهم يا علا والا ماكنش اداهم موافقه
وبالتالى الذنب ذنبه اكيد

من كل بستان زهرة يقول...

اااااااااااااااااااه
والله ما عارفه اكتب حاجه
من كتر الغضب الي انا فيه لما قرأت كلامك
كل الي هقوله
حراااااااااااااااااام
ياااااااااااارب

مدونة رحلة حياه يقول...

السلام عليكم
عارفة يا دكتورة المشكلة عندنا غياب الرقيب من جوانا قبل ما يكون من بره
نسينا ان كل نفس لها حق وكلنا هنتحاسب عنها
كل واحد همه اللى يحط فى جيبه ويدخل بطنه وناسى كل حاجة
شئون اجتماعية هما فاضيين اصلا يعملوا شغلهم
شكرا يا دكتورة

محطات ثقافية يقول...

اما م كلماتك لا املك الا ان اقول
حسبنا الله ونعم الوكيل
دوني طيبة

غير معرف يقول...

و أين ذلك من وصية الرسول صلى الله عليه وسلم بالأيتام، لكن للأسف شعار المرحلة لا صوت يعلو فوق صوت الجنية

ahmed_k يقول...

جائت الثوره لتكون لمثل تلك الحالات بلد وشعب يخشى عليهم ويبحث عنهم
وبإذن الله ستكون هناك القنوات الشرعيه التي يتم تقديم الشكاوى فيها وأخذها على محمل الجد
وعين الله لا تغفل ولا تنام

ALLELIO- موطنـــــــــــــــــــــــــــى(ma patrie) يقول...

مصر بلد القنبلة (السكانية ) مش النووية

الشعب الذى لاينجح

بلد العشوائيات

بلد الحضارة


الفراعنة و ابو الهول

مصطلحات كتير انهزامية عملوا على اقناع الشعب المصرى بها حتى يعطبوا قوة مصر عن التاثير على اى قرار امريكى غربى فى الارض العربية

وقد نجحوا فى جعل الشعب المصرى يعزف عن الاوضاع المحيطة ويهتم فقط بلقمة العيش

ربنا يعينا ويعينكم جميعا

د. ياسر عمر عبد الفتاح يقول...

الناس دي يجب أن ترحل مع مبارك
عاوزين نشيل القرف ده كله


ونبني على نضافة

Noha Saleh يقول...

ان شاء الله حد عنده ضمير يسأل عنهم ويحل المشكلة دى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .