السبت، فبراير 12، 2011

شفت كتييييييير






بعد غياب طويييييييل هو مكانش طويل بالفتره الزمنيه الحقيقه بس كان طويل بأحداثه حاساه كأنه سنه و اكتر

من امبارح مش مصدقه انه اخيرا حصل كنت عارفه انه هيحصل بس امتى بقى هو ده السؤال اللى كلنا زهقنا من كتر ما قلناه

فرحتنا كلنا كانت فوق الوصف و التقدير و التخيل

انا اول ما سمعت بيان اللواء عمر سليمان بقيت بصرخ و اعيط و اتنطط و حلجلا كتييير اوووى مينفعش تتقال هنا الحقيقه

الحمد لله اننا حققنا اللى عايزينه لأول مره فى حياتنا و الشعب اختار بارادته اللى عايزه و حققه

طايره من الفرحه باحترام العالم لينا و انبهاره بينا و باللى حققناه

حسيت من ارتفاع سعر البترول و انهيار البورصات و ارتفاع سعر الدهب اننا ناس مهمه و لينا صوت بيسمعه العالم كله


شوفت حقيقتنا  بعينى اللى حاولوا الخونه فى يوم من الايام يشككونا فيها بسياسه فرق تسد

قالوا علينا عندنا فتنه طائفيه و اننا مش طايقين بعض مسلمين و مسيحين

و مع ذلك يوم جمعه الغضب شفت المسلمين بيصلوا فوق كوبرى سته اكتوبر

 و اللى بيرشهم بخراطيم الحريق ضباط شرطه مسلمين زيهم و كأنهم اعداء ليهم مش من حقهم يمارسوا شعائر دينهم فى حريه

اعدى اعداءنا لو كنا فى حرب معاه مش هيعمل فينا كده

بعدها بأيام لما استقر المتظاهرين فى التحرير شفتهم بيروحوا يصلوا و المسيحين محاوطينهم بيحموهم

و مستعدين يفدوهم بروحهم و عينيهم كمان

فين بقى الفتنه الطائفيه يا دعاه الفتنه

اوباما امبارح فى خطابه ركز على الجزئيه دى اووووى ان ابناء الشعب مسلمين و مسيحين كانوا ايد واحده

رغم كل اللى كان بيتقال علينا فى الاعلام الغربى

شفت المسيحين و لاول مره يخالفوا رأى البابا بعدم التظاهر و ينزلوا يتظاهروا فى التحرير

و كمان يقيموا صلوات و قداس على ارواح الشهداء


شفت الخيانه العظمى بابشع صورها

اما الناس اللى المفروض يحمونا و مهما حصل منا 

لان ده واجبهم ووظيفتهم 

خانونا و هربوا و اختفوا و طلقوا علينا المجرمين و الحراميه من السجون

عشان يرهبونا ويخوفونا

بس فى نفس الوقت شفت شبابنا اللى زى الورد نزل الشوارع 

و عمل لجان شعبيه تحمى البيوت و الشوارع و تنظم المرور

و ده اللى خلا ناس كتير تقول اهى الدنيا ماشيه من غير شرطه

مش عايزنهم هما كمان



شفت فنانين و اعلاميين و مطربين كنا نفتكرهم فافى و بسكوتات مالهومش فى التور و لا فى الطحين

لقيناهم رجاله جامدين خشنين سواء ستات  او رجاله

شفنى منى زكى بتتخانق مع رجال الشرطه يوم جمعه الغضب و جيهان فاضل و بسمه وعمرو واكد

و خاد الصاوى و خالد النبوى و عمار الشريعى و غيرهم كتييييير اوووووى


شفت العكس كمان ناس كنا بنحبهم او ليهم شعبيه اختفوا تماما او قالوا كلام مش حلو على شباب الثوره

زى طلعت زكريا الشهير بحاحا و تامر حسنى و سماح انور و عادل امام اللى خاول يلحق نفسه

و يركب الموجه بس بعد فوات الاوان


شفت شباب زى الوورد رمى روحه وجسمه تحت رجلين العسكر عشان ليهم هدف و مبدأ هو ان الوطن ده يتولد من جديد

شفت صورهم قلبى وجعنى اووووى و دعيت من كل قلبى ان ربنا يوجع قلب اللى عمل فيهم كده

شفت شباب من كل المستويات و الاعمار بيتسابق عشان يخدم زمايله و ينضف ميدان معركته كل يوم

عشان تانى يوم يبقى الميدان فل ورايق

شفت دكاتره سابوا شغلهم و راحوا متطوعين عشان يسعفوا زمايلهم المصابين اللى بس يعرفوهم من اول الثوره

شفت شعب جميل كان كل يوم بينزل التحرير عشان يجيب للمتظاهرين اكل و ميه و بطاطين



كمان شفت كلاب هربوا بفلوسهم بره اول ما حسوا ان البلد بتغرق

و عايزه اقولهم دلوقت خليكم عندكم مش عايزينكم عيشوا بره بقى زى الخونه الهربانين و مش هتجنوا غير الاحتقار


شفت نظام كان مستعد يضحى بتمانين مليون بنى ادم فى سبيل انه يعيش و يستمر و طز فى الشعب الحبيب


شفت ناس بتركب الموجه وبتحاول تخطف الثوره و توظفها حسب طموحتها و اهواءها الشخصيه و اطماعها فى الحكم


شفت ناس كتييييير قلبها على البلد و الشباب و مستعده تعمل اى حاجه عشان تنقذ البلد من الفوضى اللى كنا قربنا منها جدا

حاجات كتير اوووى حصلت الفتره اللى فاتت و مش لازم تمر مرور الكرام

لازم ناخد منها درس و عبره و نستفيد منها كويس جدااااااااااااا


شفتنا كلنا فى شكل جديد و روح جديده و حماس جااااااامد اووووى


ياريت بقى نستفيد منها و نستغل حاله النقاء و الحماس و الطيبه الزياده اللى بقينا فيها و نبنى بقى اللى اتهدم الفتره اللى فاتت

و نزود اللى موجود من الاصل و نطوره و ننميه


اهم مطلب لينا كلنا بقى ان الانتخابات تبقى ببطاقه الرقم القومى عشان ترحمونا من اقسام الشرطه و اللى بيحصل فيها


ياريت كلنا بقى نفوق و نصحى و نروح كلنا ننتخب رئيسنا القادم و نمارس حقنا بقى و نعيش حياتنا






هناك 31 تعليقًا:

من كل بستان زهرة يقول...

مبروووووووووووووووووووووك
مبروووووووووووووووووووووك
مبروووووووووووووووووووووك

الحريه والكرامه والعزه
مبرووووووووووووك علينا شبابنا
مبرووووووووووووووك بلدنا رجعت لينا

يوميات شاب منوفى يقول...

مبرررررررررررررروك

الشعب اسقط
الكلب والان وقت البناء

غير معرف يقول...

يا دكتور
اسف وقت الكلام خلاص خلص
الان وقت تانى خالص

MR.PRESIDENT يقول...

حرَّيَّةٌ آي الكتاب وسؤددٌ * وعزيمةٌ وكرامةٌ وإباءُ

ناديتُ قومي لا أخصّص مسلماً * أبناء يعرب في الخطوب سواءُ

يومٌ بداجية الزَّمان ضياءُ * وبَهاؤه للخافقيْن بهاءُ

يُزجي النسيمَ به هجيرٌ لا فحٌ * عجباً وتبسط ظلّه الصحراءُ

وإذا من الفوضى نظام معجز * وقيادة وسيادة ودهاءُ

وإذا الخيام قصور أملاك الورى * وإذا القفار دمشق والزوراءُ

إن الكتابَ شريعةُ استقلالكم * فتدَّبروه وأنتم الخلفاءُ

Foxology يقول...

شفنا معاكى وفرحانين كمان كلنا باللى قدرنا نحققه

اللهم احفظنا واحفظ بلدنا من كل سوء

تحياتى

eng_semsem يقول...

اولا الف مبروك علينا رجوع مصر لينا
ثانيا بان معدن اهل مصر بجميع فئاتها بكل الاعمار
ثالثا وده المهم كلنا كنا متاكدين ان مفيش حاجه اسمها فتنه طائفيه غير اللي بتولعها الدوله
وطول عمرنا عايشين جنب بعض وبنخاف على بعض ونحافظ على بعض
اهم حاجه الكلمتين بتوعك في الاخر لازم نقوم نبني ونعمر واحنا كلنا حماس ان مصر ترجع ام الدنيا من تاني ويرجع من تاني شبابها

همس الاحباب يقول...

الف مليون مبروك
وصباح الثورة والكرامة

ماجد القاضي يقول...

السلام عليكم

اللهم لك الحمد ....

85 مليون مبروك لكل مصري

و350 مليون مبروك لكل عربي شاركنا الفرحة على مستوى العالم...

مبروك علينا جميعا أختي صيدلانية...

تحياتي..

شهر زاد يقول...

وبعد كل دا يا لولا
بعد كل الكلام الجميل الي قلتيه
ليه الناس بتسألني انا ليه بموت في مصر رغم اني مش مصرية
انت جوبتي بكلامك
عرفت ليه انا بعشق تراب مصر وبتمنى اني اموت على ضفاف نيسلها
دي هي مصر الي بتحكي لولا عنها
ودول هما ناسها
تسلمي لي يا لولا
وتسلم لي مصر ام الدنيا
والف مبروك
تحياتي

صيدلانيه طالعه نازله يقول...

من كل بستان زهرة

مبرووووووووووك علينا فرحتنا
ربنا يباركلنا فيها

صيدلانيه طالعه نازله يقول...

يوميات شاب منوفى


الف مبروك عليك وعلينا

نورتنى

صيدلانيه طالعه نازله يقول...

غير معرف

كلامك يؤخذ به و لا يعمل به

صيدلانيه طالعه نازله يقول...

MR.PRESIDENT

مفيش تعليق بعد كلام حضرتك
الف مبروك رجوع بلدنا

صيدلانيه طالعه نازله يقول...

Foxology

اللهم امين

نورتنى

صيدلانيه طالعه نازله يقول...

eng_semsem

اهم حاجه الباء و تعويض ما ضاع
و الانتخابات
لازم نتعلم نختار و نختار صح

تحياتى

صيدلانيه طالعه نازله يقول...

همس الاحباب

صباح العزه و النصر

نورتنى

صيدلانيه طالعه نازله يقول...

ماجد القاضي

الف مبرووووووك لكل من سعد معنا و لنا

تحياتى

صيدلانيه طالعه نازله يقول...

شهر زاد

كلامك يا شهروزه ده شرف لينا
و يسعدنا دايما
انا اكتر حد عارف قد ايه انتى بتحبى مصر

نورتينى يا قمر و ميرسى لفرحتك و سعادتك عشاننا

تحياتى

هبة فاروق يقول...

مبرووووووووووووووك الف مليون مبروك يا دكتورة
مبروك لشعب مصر العظيم الجميل
مبروك الحرية
مبروك النصر
الف الف مبروووووووووك

ابو فارس يقول...

مبروووووووووووووك
لمصر

والحمد لله على السلامة

تحياتي

ذو الوجه المبتسم يقول...

الف مبروك علينا مصر

الف مبروك لمصر عودة ابنائها المخلصين


ان شاء الله هننتخب رئيسنا المرة دي صح وبوعى فكرى سليم

أع ـقل مـ ج ـنـونــة يقول...

18يوم شفنا فيهم كل حاجة
هي دي مصر
هي دي ام الدنيا
:)

حمدالله ع سلامتك يادكتورة

:)

مدونة رحلة حياه يقول...

السلام عليكم
اللهم لك الحمد على منتك ونسالك ان تتم علينا نعمتك
اللهم ارزقنا الشكر فى الحزن والفرح
يارب احفظ مصر امنا وامانا

Silver Eyes يقول...

الحمد لله
ومبروك علينا كلنا مصر يا دوك :)
..
قبل كدا كان فى كتير مش بينزل يدلى بصوته فى الانتخابات عشان مكنش بيتسمع
بس دلوقتى مصر اتغيرت
ورئيسنا الجاى هيبقى باختيارنا احنا وبس
..
ربنا يحمى البلد دى دايما
:)

نبع الغرام يقول...

الحمدلله على كل حال


:)

ويارب اللى جاى يكون احسن من اللى راح

تحياتى
ايناس

ميرام يقول...

البوست بينقل احاسيس بجد مش كلام
(:
تحيتي ياجميله

شيرين سامي يقول...

انت مسيبتيش حاجه قلتي كل اللي حسينا بيه الفتره اللي فاتت وصفتيه بأقل و أنسب الكلمات و الحمد لله الفرحه كانت كبيره أويييي
مبرووووك مصر خلاص بقت حره و لازم نبنيها من تاني بس على أساس سليم
تحياتي لأجمل لولا

ghada mOhsen يقول...

لولتي الحلوه

أنا مبسوووووطه أوي

ألف مبرووووووووك

قلبي طاير من الفرحه

وفخورة أوي إني عشت الايام دي وحستها

يااااااااه هو ف كده

ألف حمد وشكر لربنا

وألف حمه على كل واحد ضحى بروحوا عشان يحرر 80 مليون

أنا فخووره أوي
^_^

سمكه واحده يقول...

الف مبررررررررررروك علينا كلنا
صباح حريه وجمال وكرامه وعزه
دلوقتي مش عاوزين نكلم
دلوقتي عاوزين نفعل
يعني نعمل ونغير بقي بجد وبداء نفكر وكل واحد يقدر يعمل حاجه يعملها ونرتقي بالبلد دي ونوصلها لبر الامان
اول يوم في حياتي احس ان البلد دي بتعتي وبتعتنا كلنا مش بتاعه حد تاني
لازم نوصل بيها لبر الامان
متهيقلي ده حاجه سهله علينا ومش بعيده بعد اللي حصل ان شاء الله

carmen يقول...

فعلا كانت فترة صعبة اوي الحمدلله عدت علي خير

الفراغ يقول...

تسلم ايدكاللى كتبت
وينور عقلك وعنيك اللى شافت وعكست الصورة على صفحة المدونة
وانا معاكى لازم يكون الانتخاب بالبطاقه وانا هاروح ولاول مرة فى حياتى انتخب رئيسى واعضاء البرلمان
وتعيشى يا مصر

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .