السبت، يناير 22، 2011

المولد









ازيكم يا قوم البلوجرز الكرام

اخباراتكم ايه؟؟؟

يارب تكونوا كويسين و بخير

بقالى فتره كده زهقانه من المدونه و القرايه و التعليق

كنت فى الاول بتحجج بالامتحانات

بس الامتحانات خلصت من اسبوع اهه و برضه مش ليا نفس

مش عيب فى اللى الناس بتكتبه لاسمح الله

بس العيب فيا انا و فى تركيزى فى القرايه

فياريت الناس متبقاش زعلانه منى عشان مش بزورهم

و على راى المثل اللى معرفش مين قاله

معلش نستحمل بعض

فى وسط الزهق اللى انا فيه ده عجبتنى اوووى اغنيه سمعتها من يومين كده

احتمال كبير اووى اللى يسمع الاغنيه دى يقول عليا بقيت لوكال

بس لو ده مقياس اللوكال اه انا لوكال بقى واللى مش عاجباه  ميسمعهاش

بس انا من وجهه نظرى المتواضعه شايفه ان كلماتها حلوه اوووى

و اللحن بتاعها برضه جميل

و بصراحه الدنيا فعلا بقت هيصه اوووى و عامله زى المولد

ده اذا ماكانتش مولد فعلا

اسيبكم بقى مع الاغنيه و يارب تعجبكم


هناك 23 تعليقًا:

هبة فاروق يقول...

حلوة اوى انا بحب اوى احمد عدوية وابنة وبعشق الاغانى الشعبية
والدنيا بقت هيصة ومولد وسيرك كمان
تسلم ايدك يا قمر جميلة جداا

Mona Abo - Elso3od يقول...

اقولك انا رأي انت مش لوكال و لا حاجة
انا زيك بس بما اني علي طول هربانة من اللي حواليا وحاطة سماعات الموبايل في وداني و مشغله نجوم اف ام فبسمع الاغنية دي بقالي 10 ايام في الاول كنت اتنرفز منها اوي و احول الراديو بس مع الوقت لما ركزت في كلامها عجبتي و بقيت اسيبها و اسمعها اما اللحن فبعد ما الاستاذ اللي مش بحبه خالص احمد عدويه يخلص الموال اللي في الاول الموسيقي بتدخل دخلة كلها شجن و بتوجع لي قلبي اوي
الاغنية فعلا حلوة و الدنيا فعلا مولد
مساااااء الفل

شمس النهار يقول...

زهقانه وعايزة تضحكي تعالي اقري بوست التهييس الثوري عندي
والثورة اللي هيعملها وائل وتامر

هتطلعي من الزهق علي طووووووول

:))

صيدلانيه طالعه نازله يقول...

هبة فاروق

انا بحب محمد اووى بس عدويه الاب الحقيقه مليش فيه نوهاااائى

نورتينى يا قمرايا

صيدلانيه طالعه نازله يقول...

Mona Abo - Elso3od

يا ست انتى

متاكده انك مش قرينتى
هههههههههههههههههه
اصل انا برضه بستنى الموال بتاع عدويه الاب ما يخلص عشان اسمع الاغنيه
فعلا الموسيقى روعه و الكلمات تجنن
و خصوصا اما بيقول
ماشى بسبح رب الخلق وسط الخلق
بحس الجزء ده اوووى

نورتينى يا منمنه

صيدلانيه طالعه نازله يقول...

شمس النهار

دخلت يا قمر عندك قبل ما اكتب البوست
ابقى روحى شوفى ردى عليكى و دورى على مقال بلال فضل ده
اصل المقال ده مشهور جدا

نورتينى يا شمس
يارب تكونى احسن دلوقت

Ramy يقول...

دكتورة علا

حمد الله ع السلامة و لا يهمك يا دوك

انا الحمد لله مرحوم من قصة الأمتحانات (:

ربنا يكون فى عونكم بقى (:

الأغنية جميلة على فكرة لا لوكال و لا حاجة

على فكرة محمد عدوية أغانية أحلى من ابوه

على فكرة انا كنت عاوز اسمعها من فترة و انت شجعتينى

جميلة الأغية جداً

(:

adel يقول...

علي فكرة الاغنية ولا لوكال ولا شعبي اصلا حتي
ولو تالغنا الغناء الشعبي مش تهمة

الاغنية توزيعها ااقرب للشعبي بس لحنها وكلامها كلام اغنية عادية

بس هي متميزة وشريط عدوية فعلا حلو جدا بقالي كتير مسمعتش شريط حلو كده

محمد محمود عمارة يقول...

اسمحيلي ، أنا مش هعلق على البوست ، بس هعلق على المدونة لأن دي أول مرة أدخلها ، أحييك على خفة دمك ، و بالمناسبة معظم المدونات تتميز صاحباتها بخفة الدم زي مدونة الدكتورة ستيتة و بنت لاسعة و حضرتك و موناليزا أمة الله ، تقبلي تحياتي

أع ـقل مـ ج ـنـونــة يقول...

الاغنية روعة اصلا
كلماتها تتحس جداااااا

حمدالله ع السلامة يادكتورة ^^

سندباد يقول...

هي فعلا بقت مولد واللي تحت بقي فوق وعلي راي المثل القوالب نامت والانصاص قامت
انا في الاخر لن يصح الا الصحيح مجرد وقت وفترة وهاتعدي
وربنا عنده العفو

دعاء عويضه يقول...

حمد الله على سلامتك يا قمر
و نورتي مدونتك و النور وصل لكل البلوجرات كمان :)

و سلامتك من الزهق
نصيحة ابعدي عن نشرات الاخبار اليومين دول علشان الحالة ماتسوءش

و اسمعي اللي على مزاجك انتى شعبي او غيره المهم تعيشي الحالة و ترجعي المزاج العالي

ربنا معاكي يا قمر

reemaas يقول...

الالبوم ده كله يا علا حلو كتير
والاغنيه مش لوكل خالص
هو فعلا مولد بس يارب صاحبه يحضر

شيرين سامي يقول...

الصيدلانيه الجميله وحشتيني
بصراحه لسه مسمعتش الأغنيه بس قلت أسلم و أكيد مفيش حاجه اسمها لوكال في أغنيه حلوه أو وحشه حسب ذوق الناس المختلف جداً
متغيبيش علينا:)

sony2000 يقول...

هي اساشا اول مانزلت اتخطفت
وليها الحق فكدا
واللي هيقول لوكال
يبقي مش مصري
لان المصريين بيحبوا اللوكال
واحنا معاهم
واللي هيقول غير كدا............هيتغز سبع تمانيات ذي الكتاب مقاااااااااال

richardCatheart يقول...

ههههههههههه ليه بس لوكال

امال لو سمعو اللى بسمعو هايقولو ايه هههههههه

متشكرين اوى يا لالا انا بموت فى عدويه وبحب اينه وهاسمعها واتبسط
ههههههههههههه

صباحك فل

مصري جدا يقول...

مولد

طب فين الحلاوه؟

بلاش

فين المراجيح؟

من كل بستان زهرة يقول...

معلش حالة الملل دي حاجه عاديه لازم ولابد تعدي علينا

الولد ده صوته جميل ومميز
والأغنيه كلماتها روعه
بس مشكلتها ان احمد عدويه فيها
مش بحبه خااااااااااالص

Foxology يقول...

ربنا يوفقك فى الامتحانات وتطلع النتيجة على خير ان شاء الله

الأغنية فعلا جميلة وعدوية الابن فعلا فنان كويس وهيبقى حاجة كويسة لو استمر على نفس الخط اللى هو ماشى فيه

تحياتى

Zouka's يقول...

وياريت تعبك جه بفايده
هوه جيل مش بيقدر
الحمد لله قدر الله وماشاء فعل
معلهش وربنا يكرمكم فى التيرم التانى

;كارولين فاروق يقول...

المفروض محدش يزعل من حد
لان زي ما انت قولتي غير الامتحانات
في زهق والانسان ملول بطبعه مع الاشياء
الملزم بها
والاغنيه حلوه ومش لوكال
تحياتي

محمود(باحث عن حب) يقول...

لآ الدنيا
مش موووووووووووووووووووووووولد
الدنيا خربانه
بايظه
ربنا يكون
فى عون
ارض
مصر
وما تحمله من
هموم

محمود المصرى يقول...

جميلة الاغنية وبتشرف بمرورى على مدونتك الرائعة......تحياتى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .