الثلاثاء، يناير 19، 2010

حتى انت يا نظيف!!!!!!!!!!!!!!!!!!!!!!

طالعتنا امبارح وسائل الاعلام المحليه و الدوليه المنوفيه منها و الدمياطيه

ان احمد نظيف كبير الوزراء عندنا حيكتب كتابه الشهر الجاى و الدعوه عامه و حتبقى لمه

مبرووووووووك يا سيدى و عقبال البكاااااااارى

لووووووووووووووووولى و الشربات عليا

اللى حارقنى فى الموضوع ان السنه اللى فاتت زى دلوقت تقريبا

كان فى لقاء فى التى فى و دموعه سالت انهااااااااارا على فراق المرحومه

اللى كانت زوجته و حبيبته و شريكته فى الكفاح

اللى شالته و استحملته ايام القفر الدقه لغايه ما بقى الباشا الكبير

يقووووم كل ده يروح فى سنه واحده لا و يعلن فى التلفزيون و الجرايد

و يجيب لعياله مرات اب تذلهم و تكسر نفسهم

طبعا الكلام ده بما انه انطبق على نظيف اكيد دى نظريه البشوات بتوعنا احنا كمان

كل واحد من الرجاله اللى تموت ستاتهم من تانى يوم يبدأ يحلم بمراته و هيا لابسه ابيض فى ابيض

و انها فى الجنه و نعيمها و بالتالى اما يشوفها فى المنام تبقى رؤيا على طول

يومين كمان و يبدأ يحكى انها جاتله فى المنام و سألته عامل ايه يا سبعى من بعدى

و مين بيأكلك انت و العيال و مين بيحميهم و مين بيفليهم

و مين بيحطلك القطره فى عينك قبل ما تنام

و انها مشيت من الحلم و الدمعه فاره من عينها

كام يوم تانى الفقيده تجيله فى المنام و جايبه معاها صوره لواحده اول حرف من اسمها عدلات

جارتهم اللى عينه منها من زمااااااااااااان و الحمد لله انزاحت الغمه دلوقتى و مبقاش فيه مشكله

طبعا كل يوم حلم و طبعا دى رؤيه و الرؤيه امر من فوووووووووق

على الاربعين يكون هو بقاله اسبوع متجوز و المدام جاتله برضه و قالتله بلاش تطلع عليا القرافه يا خويا و انا عندى كل حاجه

و خلى فلوسك لمراتك و عيالك

و خلااااااااااااااااااص اتنست الغلبانه و ربى يا خايبه للغايبه

بذمتكم مش ده السيناريو بتاعكم كلكم مش نظيف بس!!!!!!!!!!!!!!!!!

هناك 49 تعليقًا:

a7med-Mado يقول...

على فكرة أنا السيناريو بتاعى مختلف خاالص عن نظيف وكل الوزراء
أنا مش ناوى أصلا
المهم بطلى خايلة كدابة ومش تفضلى طالعة نازلة

اقصوصه يقول...

على الاربعين

تكون العروس الجديده حامل خلاص!

ايوه فعلا هو نفس السيناريو

يتكرر في كل زمان ومكان

مع اختلاف الابطال فقط!

sookra يقول...

والله عندك حق يادكتوره علا
انا بقول للباشا بتاعى الا لما اموت قبلك هتتجوز بعد اد ايه
فقالى ابدا ياحبيبتى موش ممكن اتجوز بعدك
بصتله شزرا كدا وقلتله اهى يانى منكم ومن عمايلكم
هههههههههههههه
نفس السيناريو بيتكرر كل يوم

غير معرف يقول...

السلام عليكم
هو ايه المشكلة انو يتجوز
الشعب دا عنده مشكلة غريبة
يدخل نفسه في خصوصيات مش بتاعته
وبعدين السيد احمد نظيف
ايه
مواطن موظف حكومي بدرجة رئيس وزراء
يعني لو خرج من الوزارة مع اي تعديل
من حقه انو يفكر في حياته


تامر

قلب ينبض بالحب يقول...

بصي يالولا انا بصراحة ربنا المعبود مع ان الراجل يتجوز بعد مراته ما تلاقي وجه رب كريم وده عندي احسن من انه يلعب بقصته يمين وشمال على ايه يا اختشي يتجوز احسن ما يعك كده ولاكده اصل الواحد منهم ميعرفشي يعيش من غير وظوظة كده في حياته قطيعة محدش بيعشها بالساهل

أم .. بوبه يقول...

عند حق ياختى والله كلامك صح

قال يا مامنه للرجال .. يامامنه للماية فى الغوربال

غير معرف يقول...

وبعدين يا دكتورة
ليه الحسبة دايما علي الراجل وكأن الأنثي ملاك ما تعكسيها
لو هو اللي مات
هي الأخلاص بيبقئ مقطع بعضه معاها
ما بتروح تتجوز عادي يعني
وتقلع الأحمر عليه علطول
وتقعد تقول يا بعلي وفي سرها
fuck you in hill


تامر

هي وظروفها يقول...

بصراحه مع اني مبكرهش حد في حياتي اد المعلم احمد اصله بالصلاه علي النبي رئيس اكبر تجمع ((للعصبه)) يعني اللمه عشان محدش يقولي انت علي طول لسان اهلك طويل علي الحكومه

انا معاه وموافق علي اللي هيعمله
لعده اسباب
انه كان ممكن يرافق زي ما اغلب الحلوين الطعمين العساسيل او يضرب ورقه عرفي

كان ممكن ميعلنش عن حاجه تخصه من اساسه

اذا كانو بيخبوا علينا اللي يخصنا هيقولو اللي يخصهم هما هنود ولا ايه

وبعدين يجوز ميجوزش دي حريه شخصيه

ومش هيوافقك علي كلامك الا البنات بوجه عام او الرجاله اللي عدوا السبعين بعقد كامل

انا عن نفسي لو اللي بحبها ماتت ومتضحكيش هتمنا كل لحظه اموت عشان اقابلها في الجنه بس ده محصلش والغاليه بعتني واجوزت فاذن ممكن اساس اجوز علي مراتي وهي عايشه لو في اموال ةايه المانع؟؟؟؟؟؟؟؟

adel يقول...

انا شايف انها حاجة عادية
مايتجوز عادي هو حر
ومش معني ان عيط علي المرحومة يبقي كان بيحبها يعني
واحنا منعرفش اصلا هي كانت من الستات اللي بتساعد و تستحمل اجوزها ولا لا

بس لو عايزة الكوميديا
يبقي احتمال يكون مزنوق في قرشين فقال يعمل فرح زي اللمبي و يلم النقطة
وتتطلع العروسة متأجرة
ههههههههههههههههههههههههههههههههههه

لولا وزهراء يقول...

مسا الفل يا دكتوره علا
-*-*-*-*-*--*-*-*-*-*-
يا ستى الزواج ده سن الحياه وبرضه الرجل يتجوز احسن ما يقع فى الغط وساعتها نقول ياريت اللى حصل ما كان
على فكره بقى انا شوفت فى حياتى نموذج واحد فقط لرجل فاضل توفيت زوجته وفضل هو قاعد يربى اولاده ووصل بهم لبر الامان وبعد ما كل واحد فيهم اتجوز وعمل بيت واسره هو كان عاوز يتجوز واحده تاخد بنفسه وبحسه مش اكتر واولاده وقفوا ضدوا بصراحه انا استغربت من موقفهم اوى
انا مش خياليه او متحامله على مين يتجوز ومين يطلق ولكن بما انها سنة الحياه يبقى شر ولابد منه
انا عاوز شربات وجاتوه مش انتى قولتى ان الشربات عليكى

ابو على يقول...

انا من رايى اقفلو التلفزيون واللى يتجوز يتجوز واللى يطلق يطلق واللى يموت يموت
وحطو همكو ف الطبيخ احسن ههههههههه

Ashraf يقول...

بالرغم من انى جوزك وابو عيالك لكن من حقى اعلق

الف مبروك وربنا يكفيك شر العين ياسيدى

والله انا لو مكانك ده كان اقل شئ اعمله
ثم هو حقك الشرعى والدستورى

الستات عندنا كل واحده متربيه وجوها كلكوعه متوراثه من الموضوع ده

ثم ان شعبيتك اكيد زادت لان شعبك سمع من اعلامنا وليس من الاشاعات او الصحافه الصفراء او الفضائيات المغرضه

وفى الخارج بيتعمدوا ذلك لاثبات شبابهم وصلاحيتهم للقياده-شباب متجدد-

و كمان احترامتنا شكرا ياسيدى الوزير

انا -كلام فى سركم تناقشت فى الموضوع ده لما كانت زوجتى العزيزه اللذيذه مريضه وخايفه على عمرها-
واهوه تجدد دم الشباب فى عروقى-

الحمد لله ربنا شفاها وعفاها وخلاها ليه
-قل اعوذ برب الفلق-عين الحسود فيها عود

وبرضك لما النفسيه بتبقى مرتاحه ربنا يريح قلب الجميع يبقى خير للجميع


مش كده ولا ايه........

صيدلانيه طالعه نازله يقول...

a7med-Mado :انت كده ارتحت و ريحت
و بعدين اما انت اتخيلت انا اعمل ايه
و ليه بقى خايله كدابه دى صادقه و حتروح الجنه كمان

صيدلانيه طالعه نازله يقول...

اقصوصه :و الله انتى عندك حق
ياتلرى السيناريو الجاى على مييييييييين
ربنا يستر

صيدلانيه طالعه نازله يقول...

sookra :بيعجبنى فيك يا سكره النظره المستقبليه المليئه بالتفاؤل الحذر
هههههههههههههههههه
كلاااااام كلاااااااام كلااااااام
مناخدش منهم غير كلام

صيدلانيه طالعه نازله يقول...

غير معرف اللى هو تامر:و الله انا ماليا دعوه بالباشا و لا جيت جنبه
انا بس باناقش اخلاص الرجاله
لكن يفضل يمشى يتجوز يطلق دى مشكلته
تمام يا فندم

صيدلانيه طالعه نازله يقول...

قلب ينبض بالحب :نستفيد من الكومنت بتاعك يا دودو انك من الحاقدين على قصه الباشا اللى نازله على وشه
ههههههههههههههههههههه
و بعدين الحكومه اما تحب تعك محدش يقدر يقولها حااااااجه حضرتك
اتلمى بقى و لايميها احسنلك

صيدلانيه طالعه نازله يقول...

أم .. بوبه:ايوه يا اختشى
قووووووولى و اقول وراااااااكى
كلامك حكم
ههههههههههههههههه
سلميلى على بوبه

صيدلانيه طالعه نازله يقول...

تاااامر تانى
:كل واحد على ما يزرع حيلاقى
زرع ابيض حتلبسله اسود
زرع اسود حتزغرد فى خارجته
ههههههههههههههه

صيدلانيه طالعه نازله يقول...

هي وظروفها :يا عم حقك طالما باعتك
اعمل اللى انت عايزه
و بعدين انا جايه اباركله و افرحله
هو انا قلت حاجه غير كده
شرفتنى

صيدلانيه طالعه نازله يقول...

adel :هههههههههههههههههه
حلوه حكايه العروسه الايجار دى
بس اكيد حتبقى غاليه قوى دى حتتجوز الحكومه كده و كده
و جايز الحكومه تاجرها ببلاش مش حكومه بقى و الحساب على النوته

صيدلانيه طالعه نازله يقول...

لولا وزهراء:اتفق معاكى فى موضوع ان الوفاء موجود بس يا اوختشى بقى ناااااادر قوى اليومين دول
يلا مش عايزه اعقدك و انتى لسه انننه
صغننه يعنى
و اتفضلى يا ستى الجاتوه اهو بس جاتوه سواريه لزوم الشياكه و الاناقه
ده احمد نظيف مش حد قليل

صيدلانيه طالعه نازله يقول...

ابو على:و انتوا انتخوا و كلوا و ربوا كرش
هى هى هى هى
نورتنا

صيدلانيه طالعه نازله يقول...

Ashraf :و الله مش عارفه اقولك ايه
احرجتنى بذوقك و عطفك و رقتك
وش مكسوووووووف و مبتسم


نرجع بقى للكلام التانى
دم ايه اللى عايز تجريه فى عروقك انا طالعه اهو انشفلك ريقك مش دمك
ههههههههههههههههههههه
اشوفك على العشا

Abo 3li يقول...

الف مبرووك للباشا... وعقبال ((البكاري))..
(لحسن بيقولو النت متراقب اليومين دول)





اولا: باعتباره راجل.. يبقي من حقه انه يتجوز مرة واتنين وتلاتة... واربعة كمان... وعلي التوازي.. مش لازم علي التوالي يعني..
انما بقي موضوع الاخلاص ده.. ممكن يبقي لسه موجود في القلب..

ثانيا: باعتباره رئيس العصابة... اقصد .. رئيس الوزارة.. ف اكيد الراجل وهوا وحداني كده ومشغول.. مش لاقي حد يعمله اكله.. ولا يغسله شرباته(ولامؤخذة).. فيعمل ايه.. لازم يشوف واحدة كدة بنت حلال تكون بتشتغل نائب رئيس هيئة تنمية تكنولوجيا المعلومات (((بوزارة الاتصالات)))... ..
وربنا يجعله عامر.... وعقبال باقي الوزرا ال ياحرام لسه مجهزووش نفسهم... عندكم مثلا فاروق حسني.. يدووب كمان شهريين هيستلم الشقة البيقسط فيها من سنين في العبور ......
عقبال الجميع

بطوط حبوب يقول...

طب وايه يزعل فى كده
انتى لا موافقه يتجوز وهى عايشه ولا وهى ميته

بجد بجد بجد انتى غريبه يا دكتوره :P

فاتيما يقول...

سيبيه يتجوز
يا لولاّ


احسن
يستاهل


بصراحة بقى
اللى دلع و مدلعش
يبقى حرام عليه!!!




الراجل برضك
طويل
و ليه هيبة
و أمور
و مهاود
و شغال رئيس وزرا
يعنى بيقبضله ييجى خمسة تلاف جنيه
مرتب ف الشهر و لا حاجة
دا غير البدلات و الحوافز
و الأنتقالات
و المكافأت
و منحة عيد العمال


يعنى م الآخر
فيه الطمع


ميتجوزش بعد كل هذوها
المميزات ليه؟!!!



بجد و بعيد عن الهزار
انا سخصياً شايفة
ان من حقه يتجوز تانى


زى ما الست من حقها
بعد الترمل
او الطلاق
إنها تتجوز تانى
و لو عندها فوق الستين



ايام الرسول عليه الصلاة والسلام
كان بعد الغزوات و الحروب
بيحث الصحابة
على التقدم للأرامل
بعد انتهاء القتال بمدة مش بعيدة
و لا سنين و لا حاجة
و مكنش عيب
و لا حرام
و لا حد يستنكر دا مجتمعياً
و إنسانياً




الجزئية اللى
هتفق معاكى فيها
و جدااااااا
هنا
ان غالبية الرجالة
ما زالت للأسف
بتحلل لروحها
ما تحرمه على ستاتها



يعنى لو واحد فيهم
ابوه مات
وامه قالت يا جواز
بعد خمس عشر سنين مثلاً
بيكون نهارها ملهوش ملامح


و اسمعى بقى تعليقات من عينة

دا جاى عاوز يسرقها
و يبهدلها
دى عاوزة تفرج علينا الناس
اللى قدك بيروحوا يحجوا
و يلعبوا مع احفادهم
كدا
لو اصرت على موقفها
يقاطعوها أو يهددوها
انهم هيحجروا عليها
و حاجات مشابهة



للأسف الناس بتبقى مثالية
لما تقول رأيها بس
لكن وقت الجد
و الحكاية تقرب من بيتهم
و أمهم ...
و زوجاتهم
هتشوفى كلام تانى خالص



بينما الأب
او هما شخصياً
لو قالوا يا جواز
بعد موت الزوجة


تسمعى حاجات فيها شبه من
العينات اللى اتقالت
ف التعلقات


مش احسن ما يمشى ف الحرام
مش احسن ما يضرب ورقة عرفى
دى حريته الشخصية
مش يمكن مراته الاولانية كانت نكدية
هوه الرجالة شياطين و انتو ملايكة
خليكو ف الطبيخ احسن ...
كدا


قصره
الجواز بعد وفاة
احد شريكى الحياة
مش عيب و لا حرام
بس يطبق على الطرفين
مش واحد حلال
و التانى المجتمع يحرم عليه عيشته


بس خلاث
و الف مبروك عليه
يمكن لما يتجوز
ربنا ينور بصيرته
و يقدم استقالته
و يريحنا

dodoo يقول...

هههههههههههههههههههههههههههههههههههههههههههههههههههههههههههههههههههههه

بجد ضحكتيني من قلبي يا دكتورة

هو ده بجد السيناريو اللي الرجاله حافظينه

شطار بس لما يتجوز يقول لمراته انتى مافيش بعدك ولا في ست تملا عيني بعدك و لو جرالك حاجه ده لو ربنا ماخلاش يومي قبل يومك
يبئا هقعد اعيط بقيت عمري عليكي


بجد بوست تحفه تحفه تحفه بجد

تمنياتي ليكي بالتوفيق

mostafa rayan يقول...

طب هو ايه المشكله يعنى ؟ الست ماتت خلاص وشبعت موت المفروض ان الراجل يعيش حياته بقى مايفضلش مترهبن عليها
وبعدين يا ستى ماتزعليش ماهو بردو هيفتكرها وهيدعلها بالرحمه كل شويه
تحياتى لك يا دكتورة ودمتى بالخير

mostafa rayan يقول...

فاتيما
لا والله يا فاتيما مش كل الاولاد كده اعرف ناس رحبو بجواز امهم بعد وفاه ولدهم بمده بسيطه لم تتجاوز ال 7شهور
مش كل الناس النموذج ده يعنى
لك كل التحيا يا فاتيما العزيزة

ستيته حسب الله الحمش يقول...

عجبني جدا تصرفه
وشايفة ان تصرف مصطفى بكري واستجوابه هطل حيثي
سعيدة انه انسان صح وها يعيش الدنيا بكل معناها
مراته ماتت
بعد مرض سنين طويلة
وعاشرها بالمعروف
وماتت وزعلان عليها
ومش عاوز يعجز ويبقى لوحده
ومؤكد ولاده كبار وكل واحد فيهم له حياته
ايه المشكلة؟
ليه الوفاء معناه اننا نحرم ما احله الله
انا شخصيا سعيدة جدا بإعلان نظيف انه بيحب وها يتجوز
ومش في السر ولا كأنه عامل عملة
ومفيش شيء اسمه سيناريو اجوازنا
كل واحد مخلص ومحترم ووفي من حقه يعيش
ومفيش شيء اسمه يمسك سبحه ويضرب عباية ويعيش بقية ايامه جدو يستنى العيال وولادهم يسقوه شربة مية في فراش الإحتضار
مبروك لنظيف النقطة النظيفة اللي ها يعملها دي

Muhammad Saber Abdou يقول...

هو يعني هايتجوزها بربع جنيه في قسم شرطه

مش جواز على سنة الله ورسوله

سيبوا الراجل يعيش شبابه بقا دا لسه ورده مفتحه


انا مستغرب بجد الاعلام اللي تناول الموضوع بطريقة غريبه .. هو مش راجل ومن حقه يتجوز ويعف نفسه افرضي انه مش قادر يعيش من غير واحده ست هيعمل ايه يعني يتفرج على ميلودي ؟؟

ربنا يبارك له

الشعب لابد له من حكومه تشكمه يقول...

متسيبوه يتجوز .
بالنسبه لمناقشه الفكره من حيتث الراجل والمبدأ.
مفييييييييييش راجل راته بتموت غير ويتجوز بعد الاربعين دا حتى لو استنى الاربعين يباه مخلص اوى بصراحه ومزودها وبيحبها شويتين:)

صيدلانيه طالعه نازله يقول...

Abo 3li :و الله انا كمان فرحتله و كويس انه اعلن عن الجواز فى خطوه يتشبه فيها بالغرب اللى بيعلنوا عن اى حاجه تخصهم سواء صحيه او عائليه من غير خجل او كسوف
و يباركله يا عم

صيدلانيه طالعه نازله يقول...

فاتيما :احسن يستاهل اللى يجراله
حد تجيله حريته لغايه عنده و يضيعها من ايده
هبل بعيد عنك
الجد بقى حقه طبعا انه يتجوز انا هنا باناقش بعض الرجاله اللى يبقوا حيموتوا يتجوزوا تانى و ده حقهم بس يفضلوا يعملوا حركات زى جواز ايه و انا اتجوز بعد المرحومه و بعد كده الكلام يتغير خلال اسبوع من تاريخه

صيدلانيه طالعه نازله يقول...

بطوط حبوب :ايه حكايه غريبه اللى بتتقاللى كتير اليومين دول
انا معا انه يتجوز يا عم
هو كان ابويا و لا جوز امى
الف مبروك ليه و عقباااااااااالك

صيدلانيه طالعه نازله يقول...

dodoo :و الله يا دودو انتى اللى فاهمانى او انتى من القله القليله اللى فهمتنى فى البوست ده
انا قصدى منه اناقش حركات الرجاله و عمايلهم السوده
بسسسسسسسسسسس

صيدلانيه طالعه نازله يقول...

mostafa rayan :اكيد حيفتكرها طبعا بس بعد الجواز خلااااااص بح ممنوع حتى انه يفكر فيها بامر الحكومه الجديده
و لو سمحت عايزه ضريبه ارسال رسايل لناس تانيه عبر المدونه و شوف انت مين الناس دى فاتيما السكره
ههههههههههههههههههه
نورتنى يا مصطفى

صيدلانيه طالعه نازله يقول...

ستيته حسب الله الحمش :كلام جميل كلام معقوووووووول مقدرش اقول حاجه عنه
الشفافيه و الوضوح احلى ما فى هذا الموضوع
نورتينى يا قمره

صيدلانيه طالعه نازله يقول...

Muhammad Saber Abdou :ههههههههه
حلوه يشوف ميلودى
ماله وديع ده فله شمعه منوره سيادتك
مبروك ليه و مبروك لمصر كلها يا عم

صيدلانيه طالعه نازله يقول...

الشعب لابد له من حكومه تشكمه :
شيمو ازيك حمد الله على السلامه من حاله الهه
انتى صح محدش بيستنى لغايه الاربعين من غير تفكير فى الموضوع لكن التنفيذ ممكن ياخد وقت شويه
نورتينى بجد بعد غياب

reem يقول...

ازيك ياقمر وحشانى جدا

بصي انا بصراحة لاول مره يعجبنى موقف حد لانه كان واصح وصريح واعلن في النور

لكن من ناحية ان الرجالة مش بيتنو كتير بعد موت زوجاتهم دا فعلا حقيقي ومش بننكر عليهم حقهم في انهم يحاولو يعملو حياة جديدة ويستقرو
لكن في المقابل ليه المجتمع بينكر هذا الحق على المرأة
يعنى لو واحدة هاتتجوز بعد سنة من وفاة جوزها تلاقي كل الناس تقول انها ست مش مخلصة ولحقت تنسى جوزها
حتى اهلها غالبا مش بيوافقو
يعنى لما ندى الحق دا للرجل لازم نديه للمرأة كمان

هاتيجى اللقاء يتاع يوم 29 ؟
يارب تيجى يارب نفسي اشوفك بجد

Bondoka يقول...

ياشيخه حرام
مانتى عارفه الراجل طالع عينه فى الشغل طول اليوم
ولازم واحده تغسله هدومه تعمله اكل
دى الرجاله غلابه خالص
ربنا يهديهم يارب

مهو طبعا هو الواحد فيهم لما بيتجوز بيخسر حاجه؟؟ ده بيرتاح على الاخر واكل شارب نايم لابس نظيف قاعد فى مكان نظيف بعد ال.... اللى كان قاعد فيها ايام العزوبيه
يبقى مايتجوزش تانى ليه
غلبان غلبان يابنتى

الجواز و سنينه يقول...

و الله يا علا كنك بتقرى افكرى
يا سبحان لله
ايه الافكار المتطابقه دى
اللى بنعمله فى الناس هايطلع علينا

ضحكتينى جدااااااااااا
حصوصا سيناريوا المرحومه اللى بتييجى فى المنام
امال ليه لو المرحوم جه فى المنام
و مشى بنفس السيناريوا الناس تجرسها
جورسه الدنيا
و الست اتجننت و العيال كأنهم مش نفس العيال يا سبحان الله
هيه عجينه واحده يا اختى و ربنا يستر

كيــــــــــــارا يقول...

يابنتي الوفاء مش هتلاقيه الا مع قلة قليلة

صيدلانيه طالعه نازله يقول...

reemكبيعيبوا على الست انها تتجوز عشان متدخلش راجل غريب على ولادها
و ده فى المجتمع الشرقى عييييييييب قوى
لكن الراجل من يوم الجنازه يبدأ اهله يسألوه مش حتشوف نفسك يا بنى
الحى ابقى من الميت
بالنسبه للتجمع طبعا كان نفسى اجى بس عندى امتحانات من يوم 30 يناير
بس معاكم بقلبى

صيدلانيه طالعه نازله يقول...

Bondoka :و انتى كمان يا بندقتى طلعتى من الناس اللى فاهماااااااااااااانى صح
غلااااااااااااااابه غلااااااااااابه
الصراحه
ههههههههههههههههههه

صيدلانيه طالعه نازله يقول...

الجواز و سنينه :و ادى واحده تانيه مؤيده لى و للفكره
هههههههههههههههههههههههه
وبعدين ايه اللى بنعمله احنا فى الناس
عشان يطلع علينا
ده احنا غلااااااااااابه مووووووووت

صيدلانيه طالعه نازله يقول...

كيــــــــــــارا :اولا بارحب بيكى لاول مره عندى
و فعلا الاوفياء بقوا القله المندسه وسط الجماهير
نورتينى يا جميله

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .