السبت، يناير 16، 2010

امشوا ورايا و رزقنا على الله

بما انى نكدت عليكم البوست اللى فات كان لازم البوست ده ارجعلكم بمشروع يفيدنا كلنا

من كام يوم قبضواعلى عصابه للمتسولين فى الازبكيه كانوا 25

شخص من ستات و رجاله و اطفال و الست منى الشاذلى الله يكرمها جابت فى البرنامج

كراسه الحسابات بتاعه البيج بوس بتاعهم

الكراسه مليانه حسابات و ارقام اقل بنت من الشحاتين بتجيب فى اليوم 200 جنيه

واخدين بالكم انتوا و غيروا و لا تحسدوا حضاراتكم

فيه بنات فى اليوم الواحد بيجيبوا 900 جنيه و الف جنيه

الباشا كان بيحط فلوس الشحاته فى مكاتب البريد و كل يوم فى مكتب عشان

محدش يكشفه و لا يشك فيه و حسابه فى فرع واحد بس 400 الف جنيه

ده غير باقى الفروع

فى اليوم الواحد كان بيحط فى حسابه 4000 جنيه بعد خصم الاكل و الشرب

و تمن ادوات التنكر و ايجار الكراسى المتحركه من الاخر مشرووووووووووووع

مربح جدا

و من هذا المنطلق انا قررت اقفل الصيدليه و افتح مركز شحاته معتبر

و حاضم فيه النوابغ من مختلف التخصصات عشان منبقاش محتاجين حد من بره

و بوجه ندااااااااااااء لكل طبيب و صيدلى و مهندس و كل واحد حب و لا طالشى

قصدى اتعلم و لا اشتغلشى او اشتغل و مخدشى انه ينضم للفريق بتاعى

و متخافوش حدلعكوا على الاخر يعنى الاكل من التابعى او جاد يعنى معتبر

على الاخر اصل لو جبتلكم من كنتاكى حنلفت الانظار و حنثير شكوك احنا فى غنى عنها

على الاقل فى المرحله الاولى

و على كل من يرغب فى الانضمام يجى و يسجل اسمه و مقاس الهدوم و الشوز

اماااااااال عشان يونيفورم الشحاته يبقى مظبوط

انا احب اللى يشتغل معايا يبقى على سنجه عشره و متنسوش لو اتمسكنا حتبقوا فى وشى

و محبش حد انا ياكل وشى و يعايرنى بموظفينى

مستنيه تملوا الابلكيشن و تنضموا

ملحوظه:سعر الابلكيشن 100 جنيه و الانترفيو هيعمله معاكم العميد ميكليتو طبعا

من منطلق ادى العيش لخباااااااااااازه

و رزقى و رزقكم على الله

هناك 43 تعليقًا:

ghada mOhsen يقول...

انا اول مره ادخل مدونتك ... بس دايما اشوف اسمك فى اكتر المدونات ..
وعاجبنى اسمك اوى ولما قريت الوصف اللى انتى كاتباه فهمت ليه طالعه نازله .. ربنا يوفقك يااااااارب

انا قريت البوست اللى قبل ده ... وبجد بتمنى ان ربنا يكون طمن قلبك وعقلك
وربنا يخليلك عيالك يااااااارب ويحفظهم من كل شر ويحفظك انتى كمان اللهم امين ...

.............
اما البوست ده ..
احنا وراكى يامعلمه هههههههههههههههههههه
انا مجالى اعلام ... انفع ولا ماانفعش .. وشوفى بقى راح تمسكينى ايش فى الشغلانه دى ...
دى لقطه على الاخر ... وياختى بلاصحافه بلا وجع قلب راح استقيل من بكره

بس صحيح ميه جنيه كتيييير .. راح اجيبهالك بالتقسيط اذا مافى مانع
هههههههههههههههههههههههه

بجد والله طول ماحنا عايشين ياما راح نشوووووووف عجااااااايب ...
بجد تسلمى على هالبوست
وراح انط من حين لاخر على كلماتك

تقبلى مرورى ...
... ;) ,,, ;) ...

ستيتة يقول...

خلاص
انا معاك
بلا شروط
الحمد لله مش ها أذاكر تاني
الحمد لله ها تتنغنغ وتعيش وتنتعش

400 الف جنيه؟
في فرع واحد بس؟
والله بلاش يا علم
ليه كده تجيبي لي تتح على بليل
عاااااااااااااااااااااااااااا

لــــ زهــــــراء ــــولا يقول...

انا معاكى طبعا وممكن تستفيدى منى فى حالة لو حصل كبسه " طبعا مش اقصد الكبسه اللى هى ارز ولحمه " لا قدر الله يعنى لو حصل كبسه انتى عارفه اختك محاميه وتنفعك اوى
ويا ستى عندى ناس كتير اوى ممكن تنضم لنا اطمنى ههههههههههههههه
بجد خير احزننى ياترى الدنيا رايحه بينا فينا
انا منتظره مكان الاختبار بس ياترى يا هل ترى انفع او مش انفع
ضحكتينى والله ربنا يفرح قلبك ويسعد ايامك
اضحك الله سنك

زهراء

غير معرف يقول...

سكره جات ياام شاااااادن
ياختى بنادى من بدرى انا عاوزه ابلكيشن حالا وحياتك ومقاساتى كلها xxxxxxxxll
يعنى المقاس اللى يعجبك
وبعدين انا عاوزه حساب مع عمو دا
هههههههههههههههههه

adel يقول...

ههههههههههه
كتاب بلال فضل (السكان الاصلين لمصر) بيحكي عن الناس اللي بياجروا لبس الكناسين في الشارع و يقولوا كل سنة و انت طيب
بياجروا من الكناسين و بيكسبوا دهب
القصة دي حقيقة
و معظمهم طلابة جامعة و مؤهلات كمان

Mahmoud البطراوى يقول...

انا وراكى يا بوس :D

Zouka's يقول...

انا جوزك وابو عيالك اتمنى انك تاخدينى معاكى من غير انترفيو
يعنى بالوسطه
وعلى فكره بلاش حسد
الناس دى موجوده من زمان ولن تنتهى مهما ان قبضوا عليهم
وفيه كذا فيلم جميل فى ليهم
وياما شحاتين ماتوا ولقوا وراهم كنوز بعد موتهم
وحسابهم عند الله شديد
سيقع لحم وجههم يوم القيامه
والله اعلم

صيدلانيه طالعه نازله يقول...

ghada mOhsen:ميرسى يا جميله على الامنيات الحلوه اللى انتى كاتباها دى بس مدرسه القرع المباشر دى مش حتنفع انها تكون وسيلتك فى الانضمام للمنتخب بتاعنا
الفيصل هو امكانياتك و قدرتك على الخلق و الابداع
طريقتك دى تنفع تشتغلى بيها فى الحكومه اما هنا فنوووووووووووو
هههههههههههههههههه
و بعدين انتى بتشتغلى فى الصحافه و جايه تندسى فى وسطينا طب و الله لاسلطهم عليكى شحات و شحاته و شوفى بقى حتفلتى ازاى
نورتينى و دايما اشوفك هنا

صيدلانيه طالعه نازله يقول...

ستيته حسب الله الحمش:على فكره التتح بالليل احسن من الصبح بكتيييييير اولا العيال حيكونوا ناموا و مش حتشكلى خطر عليهم و انتى بحالتك دى
ههههههههههههه
طب بذمتك مش احنا من ينطبق عليهم انا من ضيع فى العلم نظره
سلام يا قمر

صيدلانيه طالعه نازله يقول...

لولا وزهراء :ممممممممممممم
محاميه طب و الله فعلا ليكى فايده مهمه يا زيزى بس برضه مينفعش تبقى محاميه بس لازم تنضمى للفريق الاصلى و محاميه دى تخليها للطوارىء
فكرى و ردى عليا بسرعه عشان الابلكيشنز قربت تخلص

صيدلانيه طالعه نازله يقول...

سكره هانم:ده انتى جبااااانه قوى بقى عشان خايفه لاحسن تتكشفى داخله غير معرف
حنبدا المعيله من اولنا ده انتى مممكن تعترفى علينا من اول قلم من الباشا الظابط
على العموم املى الابلكيشن و ادفعى ال100 جنيه بس انا حتبقى ليا عليكى شويه تحفظاااااااات
صباح الملبس باللوز يا شيكولاته

صيدلانيه طالعه نازله يقول...

adel :طب انت اهو رحت الجامعه و رجعت من الجامعه و انا قبلك عملنا ايه
ادينا بنحاول نحصل الشحاتين و رضينا بيهم و هما مش راضيين بينا

صيدلانيه طالعه نازله يقول...

بطوط حبوب:و لا اعرفك الفيصل بيننا ال100 جنيه و الانترفيو يا باشا
احنا هنا معندناش خيار و فاقوس
قال احنا وراكى قال

صيدلانيه طالعه نازله يقول...

Ashraf :حنبدأ الشحاته من اولها
هههههههههههههههههه
جوزى ده فى البيت مش فى البيزنس
يعنى فى الغدا فى العشا فى غسيل الشرابات
هنا لن يكون الا ذوى الكفاءه و الموهبه
و برضه ذوى ال100 جنيه
اشوفك على الغدا حضرتك

لــــ زهــــــراء ــــولا يقول...

معااااااااااااااااااااااااكى
اطمنى يا بيج بوس
اقصد يا دكتوره

زهراء

ghada mOhsen يقول...

هههههههههههههههههههههه
لالالالالالالالالالا حرام عليكى ...
ده انا كده ممكن اتستر عليكم ... واعمل تمويه
هههههههههههههههههههههه
فكرى
... ;) ,,, ;) ...

Tamer Nabil Moussa يقول...

انا معاكى فى المشروع هههههه


بجد تعرفى فى ناس من غلبها وتقفيل البابان قدامها مش بتجد غير الشحاتة مكسب مربح ليها

لو نوايا معاكى شريك هههه

مع خالص تحياتى

غير معرف يقول...

ظابط مين ياشابه هو انا يهمنى ظابط ولاعسكور حتى
هههههههههههههههههه
دا انا سكره المفتريه وبعدين انتى من اولها هتعملى بيج بوس ولاايه
وادى ياستى ال100 جنيه وانشاالله ماحد حوش
هاخدهم من وراكى م الشغل الف موش ميه
ههههههههههههههههه
وابقى شوفى هتعرفى ازاى
وش بيطلع لسانه
وبعدين تعالى هنا تحفظات ايه وبتاع بتنجان انا ماحدش يجيبلى اى محفوظات عشان خلاص بطلت تعليم وهاشتغل شحاته هانم
هههههههههههههههه
الفلوس اهه عشان بس موش تقولى انى مدفعتش



http://t0.gstatic.com/images?q=tbn:Ivvgb0LZzAJNTM%3Ahttp://3.bp.blogspot.com/_cEZQCVlZSLs/SriOxaGXvnI/AAAAAAAABHU/6OXPiNFCuYw/s400/egypt34.jpg

الجواز و سنينه يقول...

بصى يا جميل
انا طبعا معاكى و انتى عارفه كده
خصوصا ان فيها ارشنات حلوين
و خصوصا انى فى طابور العاطلين
يعنى الايدى الناعمه

أحمد عبد الحميد يقول...

على فكرة أنا عملت موضوع عن التسول فى مدونتى إسمه طفل صغيلا ولكن وكمان

أنا حطيت السؤال ده فى مدونتى . يا ريت تشرفنا بتعليقك يا فندم :)

لو ممكن تغير حاجة .... هى إيه؟

micheal يقول...

عالم الشحاتة ده ياما الواحد بيسمع فيه أرقام غريبة بس فكرتك جديدة لاستغلال الموقف..عموما حشاور عقلي لأني اعتزلت مووضع الانترفيوهات ده من فترة طويلة
:)
تحياتي

Tamer Moghazy يقول...

والله انا قلبي حاسس ان انت ها تبتديها نصب من اولها..
عشان حكاية الـ 100 جنيه بتاعت الابلكيشن دي (';')

Tamer Moghazy يقول...

يلا...رزقي على الله وها ابتدي معاكوا...
الا صحيح..بتقبلوا مهندسين ولا اطباء بس..؟؟ :)

ذكرى رحيل قلم يقول...

السلام عليكم
اول مرة ازورك وان شاء الله مش الاخيرة
يا بلاش مين فيهم هيفكر يشتغل وياخد ملاليم
كفاية عليهم الملايين
دمتي

دعاء عويضه يقول...

انا معاكي يا دكتورة
ده حتى احنا ممكن نكسب اكتر منهم
امال ماهو العلم بيفيد برده

بس عايزاكو تشوفوا الاول بدل ما اجي المشوار و بعدين ترفضوني

انا خريجة علوم رياضه و اشتغلت بعد التخرج على طول عن طريق الواسطة ب143 جنيه في الشهر لمدة 3 سنين
و من كم شهر بس فجاه رفعوا المرتب ل 427 جنيه داخله في جمعيه بنص المرتب

أنفع و لا ايه ؟؟؟

و عندي كمان فكرة
احنا لو شحتنا بشكلنا كده برده القيامه باينه علينا و التعليم واضح
ممكن بئا نشتغل بطريقة شحته
ارحموا عزيز قوم زل

كده ممكن نكسب اكتر و لا انتى رايك ايه ؟؟

دعاء عويضه يقول...

اه نسيت اقولك
انا بشتغل موظفه في الجامعه

شغلانه مالهاش اي علاقه بدراستى نوهاااائي
و اللي يفجر بئا

ان معايا ناس شغاليين بالدبلوم و الفرق بيني و بينهم 20 جنيه في المرتب

ابوس ايديكو تاخدوني معاكو بدل ما اتشل لوحدي

dr.lecter يقول...

يمكن علشان يحسنوا الدخل ولهم وظيفه تانيه غير التسول

مش احسن مايروحوا يرقصوا في شارع الهرم ولا يسرقوا

!!! عارفة ... مش عارف ليه يقول...

بالنسبة للبوست اللي قبل ده

أرمي حمولك على الله ومتقلقيش من حاجة

ربنا أدرى بعبيده وإن شاء الله هتجوزيهم وتفرحي باولادهم بإذن الله

---------------

وبالنسبة للبوست الحالي افتكر إن البوست اللي قبله بيفسره

وهو إنك بقى عايزة تأمني مستقبلك

وتعملي لك قرشين للزمن الاغبر اللي احنا عايشين فيه

وفي عندي اقتراح لو المشروع مشي حاله وبقى تمام التمام

ممكن يعني نفتح فرع هنا في الكويت وأحوشلك الإيراد في حسابي :$

شيرين يقول...

انا هقفل الصيدلية اللي ليسه مفتحتهاش وهاجي اشحت معاكم بس اوعوا تبدأوا من غيري

شيرين يقول...

انا هقفل الصيدلية اللي ليسه مفتحتهاش وهاجي اشحت معاكم بس اوعوا تبدأوا من غيري

صيدلانيه طالعه نازله يقول...

لولا وزهراء :خلاص اتفقنا عدى بقى خدى اليونيفورم

صيدلانيه طالعه نازله يقول...

ghada mOhsen :خلينا وراكى يا ستى و ربنا يستر و ما اشوفش صورتى منوره فى مانشيت كبيييييييير فى صفحه الحوادث

صيدلانيه طالعه نازله يقول...

Tamer Nabil:لا بصراحه انا مش عايزه شركاء
ههههههههههههههه
انا عايزه شحاتين عاجبك عجبك مش عاجبك
الشحاتين على قفا من يشيل

صيدلانيه طالعه نازله يقول...

سكره الشهيره باللهو الخفى بقالها كام يوم:


حتضحكى عليا بصوره الميه جنيه انا عايزاه شيك تاريخه حواله على مكتب البريد
لكن صوووره لا خليهالك يا ستى
و خدى بالك التحفظات عماله تزيد و صفحتك تزداد سوادا
ههههههههههههههههههههههههههههه

صيدلانيه طالعه نازله يقول...

الجواز و سنينه :تعاطفك وحده مووووووووو كفايه ابعتى ال100 جنيه لو سمحتى

صيدلانيه طالعه نازله يقول...

أبو حميد :علم و ينفذ يا فندم
نورتنا الشويه الصغيرين دول

صيدلانيه طالعه نازله يقول...

micheal :لا شاور نفسك لانى اتدبست و قلت انك المطرب يوووووه قصدى انت الممتحن فى الانترفيوهات و كده حاضرب
يرضيك يعنى
نورتنى

صيدلانيه طالعه نازله يقول...

Timo..:هااااااا رجعت ليه مش قلت ان شكلى نصابه
و لا حسبتها لقيتها كسبانه كسبانه
يلا اكسب فيك ثواب
ينفعنا يوم الحساب

صيدلانيه طالعه نازله يقول...

dodoo :علم ايه يا دودو اللى انتى جايه تقولى عليه
العلم فى الراس مش فى الكراس
و بعدين احمدى ربنا انهم بقوا 400 جنيه و بقيتى مشاركه فى جمعيه و امنتى مستقبلك
حنفترى بقى
على العموم تعالى احنا بنشجع الكوادر الشابه

صيدلانيه طالعه نازله يقول...

ذكري رحيل قلم :و الله كلامك صح
يعنى معانا ان شاء الله

صيدلانيه طالعه نازله يقول...

dr.lecter :قصدك احسن من الانحراف؟؟؟؟
اكيد احسن
معرفتش برضه انت معانا و لا علينا؟؟؟؟

صيدلانيه طالعه نازله يقول...

!! عارفة ... مش عارف ليه:

ميرسى يا وليد على اهتمامك و سؤالك
ربنا يبارك فيك و تفرح بمهند ان شاء الله

كويت ايه اللى عايز تعمل فيها فرع هو هناك فيه شحاتين اصلااااااا
انت اللى ترجع و بلاها غربه و شحططه و ان شاء الله البليه حتلعب و الامور حتمشى
شحاته هنا و لا شحططه هناك
نورتنى

صيدلانيه طالعه نازله يقول...

الشموع السوداء :صيدليه ايه بلا هم يعنى اللى فتحوها عملوا ايه؟؟؟؟؟؟
اهم حيقفلوها و يشحتوا
هههههههههههههههههههه
ابعى تعالى سلمى المصارى و استلمى لبس الشغل

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .