الثلاثاء، يناير 12، 2010

مخنوووووقه........بجد

مخنوقه و قلقانه جدا و طبعا عارفه ليه .......بس مش مهم السبب لانى مش هنا لمناقشته

لو الواحد فى اى وقت مات ده طبعا شيىء وارد و ممكن فى اى وقت الموت الحقيقه

الوحيده فى حياتنا بعد الميلاد و الانسان مش حيخلد فى الارض غير باعماله

طيب واحده زيى عندها اطفال صغيرين حتخاف من ايه؟؟؟؟؟؟؟؟؟؟؟

باخاف ولادى يصحوا من نومهم ينادوا عليا و ميلاقونيش

باخاف يبقوا عايزين يفطروا و ميلاقوش حد يفطرهم

باخاف بنتى تبقى عايزه تغير هدومها عشان تروح المدرسه

و تسرح شعرها و برضه تدور عليا و متلاقيش رد

باخاف تيجى الامتحانات عليهم و ميلاقوش حد يقولهم ذاكروا يا عيال

باخاف يبقى فى خطر من اصحاب وحشين ممكن يضروهم و ميلاقوش حد ينصحهم و يزعقلهم

و يضربهم كمان عشان مصلحتهم

بخاف حد يزعلهم و دموعهم تنزل و ميلاقوش حد يحضنهم و يمسح دموعهم

بخاف يبقى نفسهم فى حاجه و يتكسفوا يقولوا لحد عليها

بخاف اصحابهم فى اى وقت ميبقوش اصحابهم ..........ازاى يعنى مش عارفه

بخاف....بخاف .....بخاف

انا عارفه ان باباهم موجود ان شاء الله لو انا اختفيت

بس بصراحه الاب حاجه و الام حاجه تانيه خالص

انا مش خايفه من الموت و الله ..........انا بس خايفه عليهم من بعدى

هناك 32 تعليقًا:

الشموع السوداء يقول...

اولا ربنا يطول في عمرك ويخليكي لاولادك لان الام فعلا متتعوضش ولكن من رحمة ربنا اننا حتى لما نموت مش هنحس ولادنا بيجرى لهم ايه
ولازم تعرفي حاجه اننا مهما كنا حنينين على اولادنا فربنا احن عليهم مننا
وربنا يديكي الصحة

ENG./ELSAYED,PMP يقول...

بجد الف بعيد الشر عنك

كان فيه حكاية عن انسان جعلت ملك الموت يبكى ويضحك

بكى عندما ذهب لقبض روح أمه بينما لم يستنشق هذا الطفل نسيم الحياة بعد

وضحك عندما ذهب لقبض روحه بعدما تجاوز المائة وما زال يصنع طرفاً معدنياً لعكازه

تحياتى

ما شاء الله كان وما لم يشاء لم يكن

ابو على يقول...

وليخش الذين لو تركو من خلفهم ذرية ضعافا خافو عليهم فليتقو الله وليقولوا قولا سديدا

صدق الله العظيم

الايه واضحه وربنا بيقول اللى يخاف علي اولاده عليه ان يخاف الله اولا
يعنى الخوف على الدنيا زوال ويبقى وجه ربك ذو الجلال والاكرام

micheal يقول...

يعني نقدر نقول هو الخوف من بكره
:(
أنا كمان خايف من بكره بس مع إختلاف أوجه الخوف
أتمنى تقدري تستفيدي من كل لحظة في حياتك بالشكل اللي يسعدك ويسعد اللي حواليكي
تحياتي

adel يقول...

بصي بعيدا عن كلام المجاملات
انتي خايفة عليهم كل ده لانهم جزء منك
تفتكري بقي اللي خلقك و خلاقهم مش برضه بيحبهم و لو اي موقف عدي عليهم هيكون معاهم !!؟؟!!!
الخوف طبيعي بس ميبقاش هو المسيطر عليكي
لان ده هيأثر سلبيا
ربنا موجود متقلقيش

I'm The CraZy One يقول...

rabena isaaa yediki tooooooooolt 2l 3omer mat2oliish keda
w rabena ye7fazlek weladek

لولا وزهراء يقول...

بصى يا صيدلانيه
الخوف ده شعور انسانى وطبيعى ان اللى يحب يخاف
بس الخوف من المجهول او من بكره ليس له معنى
انا كنت زيك كده فى مرحله من مراحله عمرى كنت اقعد اتخيل لو فجاه رحلت عن الدنيا امى ممكن تعمل ايه واخويا الوحيد وفجاه سيطر الحزن على حياتى وظهر فى حياتى حد ربنا يكرمه بقى قال لى ان معنى انك تخافى من اللحظه الجايه وانتى مش عارفه فيها ايه ده معناه انك على وشك الامراض النفسيه تحتل جسدك وفكرك وكده بقى لو امك او اخوكى او الناس اللى بتحبيهم شافوكى فى الحاله دى هتكرهى نفسك خلى بكره لبكره لان ماحدش يعرف ربنا شايل لنا ايه
ومن يومها وانا اطبق النصيحه دى
والحمد لله تصالحت مع نفسى ومع الدنيا
ربنا يبارك فى عمرك ويحفظك لكى اولادك ويبارك فى عمرهم وتفرحى بهم يارب

هو ايه الحكايه ادخل مدونة قصتى انا الاقى ايهاب بيتكلم على الموت وهنا الاقيكى بتتكملى عن الخوف
ايه اليوم الجميل ده
ربنا يستر


زهراء

واحدة مفروسة يقول...

يااااااااااااااااااعلا
يااااااااااااااااااااااااااعلا
انتى يا بنتى تتخنقى و تفرسيني انا ليه؟؟
قولى اعوذ بالله من الشيطان الرجيم
و بعد الشر عنك و ربنا يحفظك لعيالك و يعافيكي
و الاعمار بيد الله

:)))))))))
بس انا عاوزة اطمنك يا اختى
ولادك فى ايد امينة
ماتخافيش عليهم خاااالص
و امينة ديه بقا الست اللى جوزك حيتجوزها من بعدك
هههههههههههههه
روحي يا شيخة ده احنا ستات نكدية بصحيح
بندور على حاجة تنكد علينا و خلاص
ربك موجود
قولى يارب

ستيته حسب الله الحمش يقول...

لما ربنا بيخلقنا بيكون لنا دور وهدف وفايدة لينا وللي حوالينا

لما بيدينا عمر محدد بيكون برضه دور وهدف وفايدة لينا وللي حوالينا

لما سبحانه وتعالى كتب قدر الموت بوقت لا يقدم ولا يأخر "حتى لو لم نفهم الحكمة الربانية" فالدور خلص والهدف فايدة حتى لو حد مش فاهمها وهي خير لينا وللي حوالينا

اللي خلق أولادك منان كريم رحمن رحيم لا تأخذه سنة ولا نوم
وبرضه ومن غير ما ادخل مناخيري
لا انا ولا انت نعرف ميعادنا حتى لو جه لبني ادم مقدمات او هواجس او اي شيء
فعيشي يومك بأحضان فعلية ومعنوية لولادك
ورب السموات والأرض كفيل بيكي وبيهم وربنا يبارك لهم في عمرك يارب
ويبارك لك في صحتك ولا يريكي شرا ابدا
ويارب ربنا يفاديكي ويحميكي ويتقبل مني
آمين

reem يقول...

الاول الف سلامة عليكى من الخنقة والزعل

وبعدين ايه اللى جاب التفكير دا

مع انى كتير بفكر كدا هايحصل ايه لبناتى لو مت بالذات بنتى الكبيرة اللى متعلقة بيا جدا

الصغيرة متعلقة بمامتى وممكن تعتبرها بديل
ودا تفكير بيجى لاى ام لانها بتكون خايفة على ولادها

ياتوتة ربنا يديكى العمر الطويل وتشوفي اولادهم واولاد اولادهم

ربنا يخليكى لاولادك ويخليهم لكى ويبارك لك فيهم يارب

moha يقول...

لا حول و لا قوة إلا بالله
يا بنتي استعيذي بالله من الشيطان الرجيم.

انا طبعا حاسة باللي كنت حاسه بيه و اكتر لأني مش بس خايفة على نادين من أنها متلاقينيش بس كمان هي مش حتلاقي كمان لااب لاإخوات يعني كدة حتبقى بطولها في الدنيا دي ، انت عارفة يا علا أن انا ما برضاش أقفل باب الشقة بالمفتاح بالليل لما نيجي ننام عشان خايفة لا يحصلي حاجة واحنا نايمين فقلت نادين تعرف تطلع أو حتى حد ممكن يطلعها وده كنت باعمله حتى و إحنا في مصر و ساكنين في عمارة حماي تخيلي درجة الخوف
و هنا علمتها ازاي تتصل ب911 و محفظاها نمر تليفونات اقرب اصحابي عشان تعرف تتصرف
و دايما بنفكر مع بعض في سيناريوهات ممكن تحصل عشان أعلمها إزاي تتصرف في أي موقف خطر
طبعا الأمان بالله و كل واحد ليه نصيب في حاجة حيشوفها بس أهو أي تصرفات الواحد بيعملها عشان تقلل الخوف جواه
و على فكرة ما تفتكريش ان أنا متشائمة او مش راضية بقضاء ربنا انا دايما بأفتكر ان ربنا أحن علينا من أمهاتنا و انه حكيم يعني أكيد و دايما بيختار لنا الأحسن بس إحنا اللي عاملين فيها عارفين كل حاجة
ودايما بأقول نفسي اللي صبرني كل السنين دي على فراق جوزي و حبيبي قادر يصبر أي حد على أي حاجة أصل انت يا علا ما شفتيناش و احنا مع بعض
و بعدين يا ستي كمان الواحد محتاج أمه حتى لو عنده 100 سنة
ارمي حمولك على ربنا و قولي دايما رب إني لما أنزلت إلي من خير فقير
و سلملي على سيف و شادن

شفـقــة و إحســــان يقول...

ربنا يخليكى ليهم ويديكى طولة العمر لحد ما تجوزيهم وتشوفوا ولادهم وتبقى تيتة عجوزة

تمر حنه يقول...

طيب ليه كدا
بلاش التفكير دا ربنا يديكى طوله العمر وتفرحى بيهم وبعيالهم كمان
طيب كدا بقى يبقى اريح انى موش اجيب اولاد عشان موش اشيل همهم لو مت
ههههههههههه
روقى بقى
تمر حنه هى برده سكره بس بشكل تانى
ام شادن انا كنت ناويه اجيب بنوته واسميها شادن خلاص بقى ياستى غيرت رأيى

الجواز و سنينه يقول...

عارفه يا علا
انتى لحقتى نفسك بالتليفون بتاعك
و إلا انتى عارفانى مجنونه و اروح اجيبك

بس انتى ايه فى النكد موز موز موز

و الله يا بنتى خلتينى اعيط

ما تنكديش تانى يا مستر هايلد

و إلا انتى عافانى عندى هايلد و اجدع من اللى عندك

أم .. بوبه يقول...

كلامك بجد قلب عليا المواجع وبيتهيألى مفيش أم فى الدنيا مش بتفكر التفكير ده وخصوصا إن اليومين دول بقى كل واحد فى حاله ومحدش فاضى لحد ولا لولاد حد وحتى أقرب الناس

بس مش هقدر أقولك غير إللى بقوله لنفسى

بسم الله الرحمن الرحيم

وليخش الذين لو تركو من خلفهم ذرية ضعافا خافو عليهم فليتقو الله وليقولوا قولا سديدا

أمل حمدي يقول...

لا إله إلا الله

سبحان الله

ربنا يبارك في عمرك ويخليكِ لهم

بطوط حبوب يقول...

العرب زمان كانت بتقول حكمه
الولد مجبنه مبخله
يعنى بيخلى ابوه وامه جبنا اكتر وبخلا اكتر

دا مش حاجه وحشه على فكره
الواحد بعد ما بيخلف بخاف على ولاده اوى ودا بيخليه جبان
وبيخاف هيعمله ايه من بعده فدا بخليه بخيل


مش عارف ليه افتكرت الحكمه دى وانا بقرا البوست
يمكن لانى حسيتها اوى
ربنا يمتعك بيهم ويمتعهم بيكى يارب

Ashraf يقول...

الحمد لله قدر الله وماشاء فعل
وما تدرى نفس ماذا تكسب غدا وما تدرى نفس باى ارض تموت
الموت علينا حق

غير معرف يقول...

السلام عليكم
انا في الحقيقة لما قررت اشارك لم يكم ذلك لكي اقول لك (ربنا يطول عمرك)ولا هقول لك(الموت علينا حق)
بس هقول اقرئي سورة الكهف بتدبر وبالاخص رحله سيدنا موسى عليه السلام مع سيدنا الخضر وما قام به سيدنا الخضر من بناء الجدار لليتيمين فقد كان السند والعون من الوالدين حتى وهم اموات والسر في صلاح الوالدين ياعزيزتي.
فمن منا لايحب ابناؤه ولا يخاف عليهم؟؟؟
ومهما قسونا اوضربنا اوقلنا اننا لانحبهم فنحن كاذبون.

فياريت تكوني ايجابيه وتجهزي لهم من الان حتى ينعموا بخيرك وصلاحك في حياتك وبعد عمر طويل...
ياعزيزتي انت في نعمه وسط العيله واللمه والاهل لأن الغربه بتخلي الحياه ليها طعم وشكل تاني...
والسلام عليكم
بنت النيل
او
نوجه

لجين أبو الدهب يقول...

حبيبتى ,,

دعى امورك لله عزوجل ..
ما تخليش الفكرة دى مسيطرة عليكى لانها ممكن تسلب منك كل لحظة حلوة بقلقك ..

ربنا يبارك بعمرك
ولو حصل شئ ..
فتأكدى انهم فى ايد اللى اعطف منك ومن باباهم ومن اى انسان ..

فى ايد الله عزوجل

احسنى تربيتهم وانتوى فيهم انهم يكونوا اولاد لله ودعى باقية الامور لله عزوجل

ربنا يبارك فى عمرك ويخليكى ليهم يارب

وتفرحى بيهم وباحفادهم ..

دمتِ بخير ..

Abo 3li يقول...

ليه بس الافكار دي يادكتورة
بع الشر عليكي
وربنا يخليكي ليهم
كل البني أدمين بيخافوا علي الهيسيبهم وراه ... بس دي سنة الحياة .. واكيد الانسان بتنجيه(بعد ربنا طبعا) فطرته.. يعني حتي الاطفال يقدرو يوجهووو العالم لوحدهم..
فسيبيها علي الله

وربنا يحفظك كمان مرة

م/محمود فوزى يقول...

السلام عليكم
ازيك يادكتوره

انتى تعملى اللى عليكي وتحاولى تربيهم كويس
وتتوكلى على الله فالله خير حافظا وهو ارحم الراحمين

التوكل على الله هنا اقصد بيه ان لا تقلقى باذن الله
وربنا يديكي الصحه
وانتى متعرفيش ايه اللى جاى
ماهو زي ما انتى خايفه انك تموتى وهم صغيرين
طيب ماهو ممكن تعيشوا انتو كلكم لحد ما تعجزوا

طبعا انا معاكي ان الاب له دور والام لها دور
لكن ده ميخليناش عندنا القلق الرهيب اكثر من اللازم
طبعا القلق لوحده شىئ مش وحش
بالعكس ده طبيعي
لكن المفروض ميزيدش عن حده
استعيني بالله وان شاء الله خير
ربنا يديكي الصحه ويبارك لك فى عمرك واسرتك

هي وظروفها يقول...

اول مره اعلق وادخل عندك

ربنا يخليكي لولادك الحل البسيط

بسم الله الرحمن الرحيم

((وليخش الذين لو تركو من بعدهم ذريه ضعافا خافوا عليهم فليتقوا الله وليقولو قولا سديدا))

التفكير ده من سببين
1/ في زحمه الحياه حالنا مع ربنا مش مظبط
او/2/ فكر جايبهولك الشيطان لنك حالك كويس مع ربنا وعاوز ينغص عليكي حياتك باي شكل وخلاص

ابعدي الفكار اللي بتهد دي عنك وفوقي منها وقولي اللي خلقني مش هينساني
وبعد عمر طويل ان شاء الله اللي خلقهم هيحميهم بس كل اللي عليكي

تراعيهم وتحافظوا عليهم وكل شيء في الول والأخر ملك ربنا

ربنا يخليكي ليهم ويخليهملك

z!zOoOo يقول...

السلام عليكم

يارب تكوني بخير

بجد أحاسيسك جميله قوي

ربنا يوهبك طول العمر

وتعيشي في طاعه الله وتشوفي أحفادك بيجروا حواليكي وانتي قاعده بتحكيلهم حكايات من حياتك

:)

وفعلا معاكي حق بس ده لو حصل يبقي أمرالله

رغم صعوبه الموقف إلا إن أكيد ربنا هيبقي شايف ومقدرالخير ليهم

وأكيد هيعوضهم بشيء يملا حياتهم

صحيح إنتي حتحسي إن مفيش حنان زي حنانك

لكن شوفي إنتي بقي عطايا الله فهو الرحيم والعاطي والحنان والمنان

ولن اقول لكي في النهايه سوي ماقاله النبي صلي الله عليه وسلم لإبي بكر في الغار

" لاتحزن إن الله معنا "

فمن مع الله كيف يحزن

ومن وجد الله فماذا فقد

ومن فقد الله فماذا وجد

وأخيرا وعسي أن تكرهوا شيئا وهو خير لكم

وبشروا ولا تنفروا

مبسوط بزياره مدونتك

وقريت الموضوع الي فات ومأيدك فيه وإن كلنا اخوه في الانسانيه

علي فكره انا من نفس بلدك

:)

وبتبسط قوي لما بشوف مشاركات وافكار ولاد بلدي


فرصه سعيده

:)

تحياتي الصعيديه

:)

momken يقول...

بصى طبيعى كلنا منحبش الموت لاسباب مختلفه

لكن متخفيش
وربنا بعتلك تعليق على البوست بتاعك

عاوزة تقرى تعليق ربنا؟؟؟

بسم الله الرحمن الرحيم
(وليخشى الذين لو تركوا من بعدهم ذريه ضعافاً خافوا عليهم فليتقوا الله وليقولوا قولاً سديدا)
صدق الله العظيم

وادى ياستى الرد والتعليق جالك من فوق سبع سموات

نيجى بقى لتعليق العبد لله الفقير والبسيط

الى اعرفه ان المسيح كان بدون اب واصبح رسول
وادم كان بدون ام واصبح نبى,,,
وحوا بدون ام واصبحت ام للبشر...
وابراهيم لم نسمع ابداً عن امه واصبح ابو الانبياء....
وموسى لم نسمع قط عن اباه واصبح نبى...
ومريم لم نسمع عن اباه واصبحت سيده نساء العالمين
وسيد الخلق اجمعين محمد صلى الله عليه وسلم لم يكون له اب ولا ام وكان خير البشر

سيدتى اعلم كم انت مؤمنه..واعلم انك تعلمين اننا لا نربى اولادنا ولمن يربيهم الله لنا كما وهبهم لنا ونحن فقط نستمتع بهم

البوست جميل وكلنا بنفكر كده لكن بنطمن
فمن خلقهم دون ان ندعوة قادر على حفظهم ونحن ندعوة


تحياتى

SAMS-1990 يقول...

لسه كنت بأتكلم فى الموضوع ده مع واحد ربنا يكرمه

رده كان إن ربنا سبحانه و تعالى مش بيعمل حاجه وحشه و كل أمره خير و بالتالى مافيش أى مبرر للقلق

ده رأيه و كلامه و هو طبعا صح

بس التنفيذ صعب إلا على اللى ربنا يسهل عليه

norahaty يقول...

ربنا يخليكِ لهم
ويخليهم لكِ
ربنا
يحرسك ويحرسهم لك
لكِ حق تخافى وتقلقى
علشانهم لكن اللى خلقك
وخالقم أرحم بهم منكِ.اسفة
أن كلامى جامد لكن دايماً وكلى
امرك الى الله وسيبيها عليه سبحانه
وأطمنى نفساً وقرى قلباً بهذا التوكل
فمن توكل على الله فهو حسبه.

Tamer Nabil يقول...

مالك يابنتى

ربنا يخليكم لبعض

صلى كدة ركتعين وادعى ربنا هتجدى نفسك فى احسن حال

ربنا يوفقك ويكرمك

مع خالص تحياتى

بسنت يقول...

اولا ربنا يفك كربتك ويفرج عنك
بس احب اقولك فكره الدنيا الوحشه وكل اللى بتفكرى فيه صحيح
بس فى الاصح ان ربنا ما بيسبش حد ابدا ودايما فى اولاد الحلال اللى بيقفوا حتى فى طريقك انتى شخصيا
ربنا يخليكى ليهم ولا يحرمكوا من بعض ابدا
تفكرنا السلبى بيأثر على حالتنا النفسيه
والعكس صحيح تفاءلى مين عارف ربنا كاتبللك ايه بكره
ان شاء الله كل الخير

صيدلانيه طالعه نازله يقول...

عايزه اشكركم كلكم على الكلام الحلو و الدعاء الصادق اللى دعيتوه ليا رغم ان معظمكم من الناس اللى اول مره تزورنى و تعلق عندى
كل مره بتحصل مشكله لحد من المدونين و اشوف تعاطفنا و تكاتفنا مع بعض ببقى مبسوطه قوى و رغم وجود بعدالحالات السلبيه بيننا الا انها صعب تخبى كم الايجابيه و التراحم بيننا
عايزه اطمنكم انى الحمد لله بقيت كويسه بفضل ربنا اولا و بفضل دعاكم ثانيا
باشكر برضه اللى اتصلوا بيا و اللى دخل المدونه و قرا و مشى برضه باشكره انه اهتم و قرا و اكيد دعالى فى سره
ربنا يخلينا لبعض ايما ان شاء الله

صباح الصباح يقول...

باذن اللة يكبروا ادامك وتفرحى بيهم وتفضلوا مع بعض طول العمر فى حب على طول

Sharm يقول...

لا حول ولا قوة الا بالله
اتخافي من الموت و لهم رب اسمه الله

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .