الخميس، ديسمبر 18، 2008

يوم تحفه


اولا كل سنه و انتم جميعا بخير و لو انها متأخره قوى بس و الله الكمبيوتر كان فيه حاجه مش مضبوطه



بس الحمد لله اتصلح النهارده حاحكى لكم عن يوم تحفه قضيته فى العيد فى القاهره



طلعت فى دماغى انا و جوزى اننا نعزم اخواته معانا على رحله للقاهره فى العيد و الحمد لله ان الموضوع



اتظبط بسرعه و سافرنا تانى يوم العيد بالليل و يوم الخميس قررنا نروح دريم بارك



بالصراحه الجو فى اليوم ده كان تحفه و انا اول مره اروح هناك فكنت مستمتعه من قبل حتى ما اشوف



اى حاجه المهم دخلنا و اول حاجه دخلناها قطار الظلام و بعد ما وقفنا فى الطابور فوجئنا بامه لا اله الا الله



منتظره دورها و فجأه بدأ تخلف الشعب المصرى و لقينا شويه شباب و بنات بينطوا الاسوار



علشان يركبوا الاول طبعا بدأ الناس يعترضوا و ظهر الشهم اللى بدأ يشتمهم و انطلق سيل الشتائم



و هما عادى عادى و بيضحكوا الى ان قال لهم يا فلاحين و هنا انفجر البركان و هاتك ياضرب و دم و



ستات بتصوت و مسخره و فين و فييييييييييييييييين لما جه الامن و خدوهم بره بعد حوالى 10 دقايق شتيمه



و ضرب المهم ركبنا و المشرف نزل بنتى الصغيره و قال مش ينفع قال و انا كنت زعلانه



و بدأ القطر و عينك ما تشوف الا النور ناس تصرخ و ناس تصوت الست اللى جنبى دخلت القطر محجبه



طلعت بشعرها مش عارفه المعجزه دى حصلت ازااااااااااااااى هههههههههههههههه



المهم خرجنا و بنات اخت جوزى قرروا يركبوا الصاروخ وفضلوا يقنعونى اروح معاهم



قلت ابدا انا عندى عيال عايزه اربيهم يمكن انجح و لكنى اشك بصراحه منظر الصاروخ يوجع القلب



المهم ركبوا و نزلوا مبسوطين و فضلنا نتمشى ووصلنا لديسكفرى و دى عباره عن دايره مثبته فى عامود



و العامود بيتحرك على الجانبين بالاضافه لدوران الدايره واتهفيت فى دماغى و قطعت تذكره معاهم



و فضلنا مستنيين و الزحمه كتيره يمكن ساعه راح جوزى صارخ فيا انه زهق و يلا اطلعى المهم عملت



مؤدبه و خرجت و اتمشينا شويه و بعدين رجعنا تانى كان دورنا لسه برضه مجاش المهم اتحايلنا



على عمو اللى بيدخل الناس لغايه ما دخلنى و ياريتنى ما دخلت اللعبه بدأت و لقيت نفسى كأنى فى الخلاط



اه و الله العظيم ده اقل وصف للى حصل الدنيا كلها بدأت تلف و اللى كان فوق بدأ يبقى تحت و الحركه

بدأت تبقى سريعه قوى و الدنيا مش برد لا تللللللج فضلنا كدا يمكن 5 دقايق و انا بقى غمضت عينى

و سبت اللى يحصل يحصل فى الاخر الحمد لله لمست الارض تانى و جوزى بيحكى ان شوزات الناس

كانت بتطيربره المكان خالص و الناس نزلت تدور عليها ههههههههههههههه

نزلنا بنتطوح و بنضحك و مش حاسين باى حاجه و البلاهه مرسومه على وشوشنا

اليوم كان خلص و روحنا و بدأنا نفكر حناكل ايه المهم طلعنا على اول الصحراوى و اتغدينا

و حجزنا سينما و كان فيلم الداده دودى لياسمين عبد العزيز هو ظريف و خفيف يعنى فيلم عيد يبسط الناس

المهم الفيلم خلص و احنا خلاص هلكانين من اليوم الطويل ببص ادامى الاقى القمر طلع فجأه فى وسط

السينما و بصراحه من زمان و السينما المصريه مالهاش غير قمر وااااااحد حسين فهمى تخيلوا بقى

اشوفه بعينى و بينى و بينه مفيش تلاته متر المهم ماكانش حد واخد باله و اول اما قلت الناس سمعونى

و جرى عليه وهاتك يا صور و انا من صدمتى كل اللى قدرت اعمله انى عملتله بااااااااااى راح ابتسم

بشقاوه شاب فى العشرينات و عمللى بااااااى و الناس اتلمت و اتصوروا و عقبال ما قررت اتصور

كان قرر يمشى هوا و لقاء سويدان المدام الجديده له هى حلوه بس هوا على الرغم من انه قرابه السبعين

بس كله حيويه و نشاط و شباب اكتر من المدام و الله و بصراحه ده كان احلى ختام لاحلى رحله

عملتها فى حياتى بصراحه اليوم كله كان تحفه و كلنا ابسطتنا بس لو كنت اتصورت مع سحس كان التاريخ

بالنسبه ليا بدأ يتكتب من جديد و جايز كان ممكن يكتشفنى كموهبه فذه مستفذه

بس حنقول اييييييييييييه بقى ارزااااااااااااااااااااااااااااااق

عاااااااااااااااااااااااااااااااااااااااااااااااااااااا

هناك 12 تعليقًا:

Salah يقول...

كل سنة وانتي طيبة

blue-wave يقول...

ماشى يا عم:))
كل سنه وانتوا طيبين كلكم

نعكشة يقول...

D:
كل سنة وانتي طيبة ياق مر

اهم حاجة انك متصورتيش مع سحس و إلا كان زوجك عمللنا مشكلة

انا عايزة اتمرجح في المراجييح :(

يلا خير
سلام عليكِ

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب
-----------------

م/ الحسيني لزومي يقول...

بعد ان تركت تعليقي السابق عرفت من ملف التعريف انكي من اسيوط ونحن في اسيوط بصدد انشاء اتحاد مدوني اسيوط الذي سوف يكون نواة لاتحاد مدوني الصعيد
ادوعوكي لزيارة مدونتي للتعرف علي فكرة الاتحاد كما آمل ان تقومي بدعوة اي مدون او مدونه من اسيوط للتعرف علي هذه الفكرة
في حالة موافقتك علي الفكرة رجاء ارسال موافقتك علي مدونتي لكي نضمك الي اتحاد مدوني اسيوط تحت التاسيس

غير معرف يقول...

كل سنه ورحله وأنت طيبه
الحلو ان الواحد لايتكبر ويقول مشاعره ويكون صادق مع نفسه
وعقبال ماتروحى والت ديزنى
اشرف

doaa يقول...

أنا عايزة أقولك إن أكتر حاجة ندمت عليها في دريم بارك
إني ركبت الصاروخ
بجد شعور وحش يزعل مش ممتع خالص
أنا بحب اللعب جدا بس بجد أثر في نفسيتي يومها وأنا في السماء والراجل مش راضي ينزلنا ...
بس قطر الموت عجبني قوي
المهم إنكم اتبسطتم والحمد لله
كل سنة وانتي طيبة

ahmed_k يقول...

يوم بجد ظريف كل عيد وأنتم طيبين
بس إلا حكاية الصاروح
أنا بقه لايمكن بتاتا أركب الصاروخ ده
ده رعب يا دكتوره
بس الحمد لله جات سليمه هههههه


تحياتي

قلب ينبض بالحب يقول...

كل سنة وانتي طيبة ولو انها جاية متاخرة خالص مالص بالص الا انها كل سنة وانتي طيبة وبصحة وسلامة وويارب ينعاد عليك وعلى اهل بيتك بكل خير

أميرة الجنة يقول...

الحمد لله انك طلعتى بعد كل العناء ده مبسوطة ومفرفشة وكده تمام

ادم المصرى يقول...

كل سنه والامه كلها بخير وسعاده ونصر اتى اتى اتى ان شاء الله اتمنى السنه القادمه ان نرفع فيها رايه الاسلام لكل العالم واتمنى زيارتكم

Foxology يقول...

ااااااااااه دريم بارك :))

فكرتينى يا دوك باليوم المشهور لما روحت انا واينو جماعتى وركبنا قطر الموت

قطر الموت ده تجربة حية لا تستحق المشاهدة لكيفية تدمير الأعصاب :))

تحياتى وربنا يجعل كل الأيام سعيدة حتى لو من غير سحس :))

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .