السبت، يناير 17، 2009

سرقوا العيل يا محمد لكن بزازته معاااااااااااايا

مش عارفه اقول ايه و الله غير انها فعلا مصيبه مصيبه بكل ما للكلمه من معنى
صحيح اننا اخيرا نجحنا نصدر لامريكا حاجه بس للاسف صدرنا عيال مسروقه ومتهربه

الحكايه ان النائب العام احال 11 طبيب مصرى و ممرضتين و شويه زباله تانيين منهم محاسب كبير فى

بنك مشهور للنيابه و اغلق مستشفى فى جسر السويس بتهمه بيع الاطفال لاشخاص حاصلين على جنسيه

امريكيه سواء بالاقامه و بالزواج من امريكى و تم القبض على سيده امريكيه فى المطار ومعاها ولد

وبنت و ادعت انها انجبتهم فى مصر و مع الضغط اعترفت انها اشترتهم عن طريق وسطاء

فى المستشفى الفلانى و انها اشترتهم حسب تسعيره متفق عليها و هى البنت8 الاف جنيه و الولد 14 الف

و تصل الى 25 الف مش عارفه بتتحدد بايه؟؟؟؟؟؟؟؟؟؟؟؟يظهر حسب العنين سواء خضره و لا زرقه و

الشعر اسود و لا اصفر شفتوا المسخره و شفتوا احنا رخااااااااااااااااص اد ايه

الست اعترفت ان الموضوع ده متفق عليه من خلالوسطاءموجودين برضه فى امريكا و كندا و بياخدوا

عمولات و سمسره و ان الاطباء بياخدوا الستات الحوامل سفاحا و الفقرا اللى مش قادرين يصرفوا على

ولادهم و بيعتنوا بيهم و بيولدوهم و بياخدوا العيال فريش منهم عشان الموضوع يبقى مسبوك

و ساعات بيكون الاتفاق على الست من اول الحمل وواخده دفعه حجز و دفعه استلام و دفعه تأكيد حجز و

كده يعنى زيها زى الشقق التمليك بالضبط

المصيبه ان السفاره الامريكيه اول من ابلغ عن هذا الموضوع و هى اللى بسببها قامت التحريات

الى ان تم الايقاع بالعصابه

طبعا مش عايزين يوسخوا الشعب بتاعه بالغبا المصرى و العربى المعتبر و اللى مفيش منه اتنين

و وزاره الصحه هنا طبعا مش فاضيه ليها اهتمامات اخرى

الموضوع من اوله لاخره فضيحه و حاجه تكسف بس الحمد لله اهوا تصدير برضه ميفرقش اذا كان

رز و عسل و لا كلاوى و قلوب و عيون و عيال فوق البيعه نحمد ربنا برضه انهم بيربوا لنا عيالنا

و رضيوا بيهم على علتهم

المصيبه انى سمعت الموضوع ده فى الاذاعه فى برنامج هنا القاهره و الضيف لافض فوه مستغرب

من تغير السلوك و العادات عند المصرين و مستغراااااااااااااااب ان المصريين وصلوا لمرحله بيع الاطفال

الا صحيح ليه هما بيبيعوا عيالهم؟؟؟؟؟؟؟؟؟؟؟!!!!!!!!!!!!!!لانهم باعوا قبلها كلوتهم و جزء من كبدهم و

باعوا دمهم و هدومهم و مافضلش غير عيالهم قالوا و ايه يعنى بالمره يعنى جت على دى

و الله من امبارح و الموضوع ده مش عارفه استوعبه و لا افهمه

وطبعا الحكايه قبل ما تتكشف فلت منها كتييييييييييير نجحت معاهم الصفقه...............

مش عارفه اقول ايه غير حسبى الله و نعم الوكيل



هناك 28 تعليقًا:

Che يقول...

قلتى و وفيتى بكلمه حسبى الله و نعم الوكيل .. بس فعلا جديده اننا بنصدر العيال دلوقتى .. انا كنت فاكر اننا بنستورد اجانب من بره على سبيل تحسين النسل انما الحمدلله ربنا كرمنا و انتقلنا لمرحله التصدير .. و طبعا السفاره الامريكيه هى اللى بلغت .. و اراهنك انه كان فى ناس زعلانين ان السفارة خدت بالها .. اهو العمليه منها تجاره و مكسب و منها ان البلد تخف و تروق و تحلى شويه
ربنا يرحمنا برجمته

blue-wave يقول...

والله انا رأيى ان دا افضل للعيال
هايتربوا فى بيئه انضف من بيئتهم ومجتمعهم اللى هايفضل محملهم ذنب انهم جم سفاح طول عمرهم

غير معرف يقول...

ياما لسه في الجيراب ياحاوي

غير معرف يقول...

البيع للاطفال احسن من رميهم فى الملاجئ او توربينى جديد او خنقهم ورميهم فى صناديق الزباله او حمامات المستشفيات
ياساده اعتقدان هذا سيستمر ويسؤا
لان من علامات القيامه
ان تلد الامة ربتها
اشرف

صيدلانيه طالعه نازله يقول...

che:التجاره شطاره و دارى على شمعتك تقيد طبعا زعلانين ان الموضوع اتنظر
بس حياخد وقت زى حكايه اولاد الشوارع وبعدين حيتنسى
و بعدين احنا فى ديك الساعه لما نبقى اغلبيه فى امريكا
نورتنى
==================================
blue-wave:افضل لو حيتربوا صح و يعيشوا فى بيئه سليمه لكن ايش ضمنك انهم ميشتغلوش دعاره و لا مخدرات و لا تجاره مناخير و صوابع و كلاوى
لربنا يستر
==================================
mayada:ازيك يا مادى واحشانى جدا و ازى القمر اللى فى الصوره ده
ايه رأيك اهى مصر تفوقت اخيرا اهو و بتصدر بنستورد قمح و نصدر عيال
=================================

صيدلانيه طالعه نازله يقول...

غير معرف:ممكن يكون خير و ممكن يكون شر حسب الاشخاص اللى حتربى

الجواز و سنينه يقول...

اولا عايزه اقولك عنوان الموضوع رائع
و ثانيا
حسبى الله و نعم الوكيل
لانى بجد زهقت نفسى حاجه تفرح مافيش؟؟

هانى زينهم يقول...
أزال المؤلف هذا التعليق.
هانى زينهم يقول...

اولا سعيد بالتعرف على المدونة لاول مرة . ثانيا حضرتك طلعتى بلديات لانى اساسا من البدارى فى اسيوط . ثالثا بقى مراتى بقالها اسبوع بتحذرنى انزل بنتى تشترى حاجة من الشارع عشان الموضوع ده وانا ما كنتش متابع لغاية ما قريت التفاصيل هنا . بس تفتكرى حضرتك ناس بالاخلاق دى لازم يكونوا متفقين مع الاب والام ؟ يعنى لو لقوا عيل صغير ماشى لوحده وشكله ابن ناس مش هيخطفوه ؟
حسبنا الله ونعم الوكيل وربنا يدوقهم حرقة قلب الاهل على عيالهم عشان يعرفوا هم بنى ادمين ولا حيوانات . وان كنت اشك ان الحيوانات ممكن تعمل كدة .

أحــوال الهـوي يقول...

الحقونا
باعوا ارضنا و عرضنا وولدنا

انه الفساد يا عزيزتي ادي ان الكل اصبح فاسد
اكل فاسد ذمم فاسدة
و المستشفي اللي بتبيع لحم الغلابه و كليتهم

انا معاك في كل اللي قلتيه بس ليه تحفظ علي هذه الجمله
مش عايزين يوسخوا الشعب بتاعه بالغبا المصرى و العربى المعتبر و اللى مفيش منه
انا اتعامل مع جنسيات مختلفه من جميع انحاء العالم نحن نملك ميزات كثيرة عنهم و ينقصنا النظام و تقديس العمل

صيدلي قديييييييييييييم
تحياتي

Desert cat يقول...

طيب خدى شوى الخارجية الامريكية بتقول علينا ايه النهارده

الخارجية الأمريكية: مصر بلد مصدرة لتجارة الأطفال
http://www.youm7.com/News.asp?NewsID=651...

Unknown يقول...

حسبنا الله ونعم الوكيل
وصلت للعيال
العنوان شدني جدا
ربنا يكرمك ويوفقك
تحيتي

صيدلانيه طالعه نازله يقول...

الجواز و سنينه : اكيد فى حاجات تفرح كتير بس احنا نظرنا ضعيف مش و اخدين بالنا و لا ايه اكييييييييد العيب فينا مش فى الحاجات
نورتينى بعد غياب
=================================
هانى زينهم:يشرفنى اننا بلديات
اما بالنسبه للبنت فانا مع والدتها انها متخرجش تشترى حاجه لوحدها لان الدنيا مبقتش امان انا ساعات بابعت ابنى يشترى حاجه ابقى باصه من البلكونه
و اتصل بالمحل لو اتاخر
ربنا يستر عليهم و يحميهم
شرفتنى بالزياره
================================
احوال الهوى: حضره الزميل القدييييييييم:انا فى الجمله محل اعتراضك كنت باسخر منهم انهم سبب المشكله و كمان بيعترضوا
اما عن الفساد فنحن متفقون على وجوده
===================================
desert cat:من زمان مجتيش
بالنسبه للتقرير ده فعادى جدا كل شيىء متوقع من الامريكان دائما عندهم سياسه قلب الحقائق و للاسف هما برضه بيقولوا كلام شبه حقيقى لان يبدو موضوع تهريب الاطفال ده من زمان قوى و اتكشف متأخر قوى بعد كام الف طفل تم بيعهم
==================================
كاتب مصرى:شكرا للزياره
ظروف البلد خلت الطبقه المعدمه مستعده تبيع اى شيىء حتى ولادها
ربنا يرحم

إيمان يقول...

أنا شايفه إنه خساره إن الموضوع إتكشف ...أصل الموضوع ده كان خطه لتهجير العرب لأمريكا زى ما عملوا اليهود فى فلسطين...وكل شيئ كان ماشى تبع خطه مرسومه ...أمال تفتكرى ليه السفاره الأمريكيه وقفت للموضوع

احساس لسه حى يقول...

عزيزتى

دخولك عند قطة اذى للمقاومة

وشوفى موضوعتها خلال الحرب على غزه

وده لنك عاوز رائيك فيه

http://smraa.blogspot.com/

وياريت ما نحطش صور ونزور ناس بتهاجم المقاومة والشهداء

سلام

Migo Mishmish يقول...

الاخت صيدلانيه
بذمتك مش تلات ارباع الشباب نفسهم يبقو لقطاء؟ دا الباسبور الامريكانى له مفعول السحر ..وبعدين انتى زعلانه ليه ؟ ماهى مصر بلد مصدرة لكل حاجه مش بدل ماتزعلى ان مصر بلد مستورده؟
الناس دول عملو خدمه فى مصر : _ ممكن العيال دول لما يكبرو يمسكو الحكم فى امريكا وساعتها بقى نعاير امريكا بان الى ماسكها واحد لقيط ..ونعمل زى عماد حمدى ونقول لرئيس امريكا : انت لقيط فاهم يعنى ايه لقيط ..فيقوم هو ينكسف على دمه عشان عارفين حقيقته فيبطل يحابى لاسرائيل وكل مايعمل حاجه نقوم زاغرينله فيفتكر الوضع ويسكت ..يعنى باختصار احنا هنتحكم فى مصير امريكا والعالم كله ..اراهنك ان المخابرات هى الى عامله كدا عشان خطط مستقبليه .. بس لو الخطه مش مانفعتش ....الشعب المصر هايبقى لقيط وهايتنفخ
من مدونه البلكونه امام سنترال الحدايق
ميجوووووووو

القلم السكندري يقول...

اه والله حسبنا الله ونعم الوكيل

ولعنة الله علي من كان السبب في الانحدار الاخلاقي لهذا الحد وفي الانحدار المادي بل والانساني

دي حتي الحيوانات متفرطش ف عيالها

م/ الحسيني لزومي يقول...

ارجو ان لا اكون ضيفا ثقيلا فلقد طلبت طلبا بخصوص اتحاد مدوني اسيوط ولكن عندما زرت مدونتك مرة اخري لم اجد اي تعليق علي هذا الطلب او علي الدعوات الاخري.. ففهمت انكي ترفضين الانضمام الي مثل هذه الاتحادات...لكن لا اعتقد انكي ترفضين المساعدة في إنشاءهذا الاتحاد.. كلي امل ان تدلينا علي اسماء مدونات من اسيوط او الصعيد وذلك لان حركة التدوين في الصعيد ضعيفة كما الخدمات التي تقدم للمواطنين فنحن حتي الأن لا نتعدي تسع مدونيين ...نسعي لعمل هذا الاتحاد.
مرة ثانية ارجوا ان لا اكون ضيفا ثقيلا

ريكو يقول...

حسبنا اللة ونعم الوكيل
فاضل اية لسة ما اتعملش فيكى يا بلد
يا ترى فعلا كانوا عايزين الاطفال دى علشان يربوها وبعدين ياخدوا أعضائها ببلاش
يعنى نكون لهم خدم ومستهلكين ومستهدفين وكمان قطع غيار؟
حقيقى حسبى اللة ونعم الوكيل

صيدلانيه طالعه نازله يقول...

ايمان:فكرك كده و انا اقول امريكا محروقه ليه من الموضوع ده
ياسلام بقى لو حد يديهم وعد زى بلفور كده
اعتقد ان رئيس فنزويلا ممكن يدينا الوعد ده و انا اكون اول واحده تلم شنطتها و عدل على هناك و حاحتل تكساس و اطرد بوش من مزرعته و احوله للاجىء
ههههههههههههههههه
=================================
احساس لسه حى:كل واحد من حقه يقول رأيه حتى لو اختلف مع توجهاتنا و مش من حق حد انه يقرر مين صح و مين غلط
تحياتى
==================================
Migo mishmish:الشعب كد كده منفوخ سواء منفوخ فخرا او بفعل فاعل
اما امريكا فحتى اللقطاء بتبرمجهم و تظبطهم
و فى الاخر ياريتنا كلنا لقطاااااااااااااااااااااااء
==================================
القلم السكندرى:النحدار الاخلاقى ده نتيجه طبيعيه للظروف السيئه اللى البلد بتمر بيها و اللى ربنا لوحده بس هو اللى يعرف امتى حتنتهى
نورتنى
================================
م/ الحسينى لزومى:كل الحكايه انى مكنتش فاضيه خالص و تانى حاجه موضوع الاتحادات ده مليش فيه و انا علاقاتى مش كتيره مع مدونين اسيوط و بالتالى مش اعرف كتير كان فيه كام واحد بس مكملوش تدوين
تحياتى
=================================
ريكو:الله اعلم بالنوايا المخبأه بس مين عارف مش جايز يكون احسن من انهم يبقوا اطفال شوارع
ميييييين عارف جااااااااااااااااايز
تحياتى

Soooo يقول...

على فكرة الموضوع ده كان زمان منتشر في تايلاند قوي
لكن لأن الاطفال بتوع تايلاند بيبقو شكلهم أسيوي .. وبالتالي لو اسره امريكيه قوقازية هيبان انه مش ابنهم او بنتهم .. لجأو للدول اللي فيها عرق قوقازي
وبالرغم برضه من ان مش كل شعب مصر شبه العرق السائد في الشعب الأمريكي .. لكن شوية ديكور ويبقى الواحد شبههم

بجد بجد ربنا يستر .. الواحد مش عارف احنا رايحين فين كده


ملحوظه

انا كنت لسه باعدل في الموضوع بتاع مدونة أوباما .. واضفت اني تخيلت انه عمل كتاب فعلا .. وفوجئت بيكي بتعلقي بعد كده في نفس التخيل اللي جه في بالي ؟؟ انتي بتراقبيني ولا ايه؟؟؟؟

بس هم بجد بيزودو عالكتب خمسه جنيه تبرع ؟؟؟



سلامووووووووووز

Foxology يقول...

خلاص مفيش ضمير

وان لم تستح .. فاصنع ما شئت

ربنا يرحمنا برحمته

تحياتى :)

koketa يقول...

حسبى الله ونعم الوكيل للدرجة دى وصل بينا عدم الرحمة والاستهتار

موناليزا يقول...

لا حول ولا قوة الا بالله

ahmed_k يقول...

ياريت يا دكتوره تيجي لحد
بيع الطفال وبس
ده المصيبه أن في مافيا روسيه شغاله في مصر دلوقتي بتبعت سواح وبيقوموا بعمليات خطف وقتل لأطفال او كبار حسب ما يتاح لهم لسرقة اجزاء من أجسامهم
يعني مافيا أعضاء بشريه
والأمن مشغول بتأمينهم وعدم التعرض ليهم بحجة حماية السياحه

الرابطة وبناء الأمة يقول...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

أحمد سعيد بسيوني يقول...

فعلا

حسبنا الله ونعم الوكيل

لكي الله يا مصر

حسام غانم يقول...

على رأيك

فاضل ايه في البلد دي ماتباعش

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .