السبت، نوفمبر 22، 2008

انا و بسبس و بس


بصوا بقى يا جماعه حاحكى لكم حكايه و
عايزاكم تلاقولى حل ليها ربنا يخليكم
و ميوقعكمش فى زنقه ابدا قادر يا كريم
من كام يوم كده بعد الولاد ما ناموا خرجت
انا و جوزى نجيب شويه طلبات
و انا فى السوبر ماركت بعد ما اشتريت
طلباتى عينى لمحت تلاجه الايس كريم باضرب بعينى كده لمحت حبى الاول و الاخير نايم جواها اللى هوا طبعا
ايس كريم ميجا (طبعا ده اعلان لنستله على المتغطى كده و مش مشكله نتحاسب فى الاخر)هههههههههه
قلت يا بت دلعى جوزك و اهو سته جنيه مش خساره فيه رحت اشتريته و رحنا ناكله على الكورنيش
و اهى فرصه نحب فى بعض شويه بعيد عن اولادى اللى فى البيت
لسه باكل اول قطمه لقيت قطه ما اعرفش طلعت منين اقل ما يقال عليها انها قمر و تحسوا انها الاميره المسحوره
بتاعه حكايات زمان شعرها اصفر و عينيها تحفه وباين يا روحى كانت جعانه قوى
فضلت تلف حوالينا و تطلع لسانها و تتمسح فيا انا و جوزى بطريقه غريبه و انا طبعا قلبى رهيف مش يستحمل
رحت كسرت حته من شيكولاته الايس كريم اللى هوا مش اى ايس كريم و رميتها لها على الارض راحت جاريه
عليها و فضلت تلحس فيها و راحت واكلاها كلها و بدأت تتمسح فيا تانى طبعا جوزى و لا عبرها
كل اللى قدر يعمله انه صورها الصوره اللى فى اول البوست دى و كمل اكل تانى
انا بقى كلت شويه و سبت حته فى العصايه و رميتها لها كلت فيها شويه و بعدين كان فيه شباب معدى زى الغاره
كده راحت خافت منهم و جريت و اختفت دى كانت القصه
المشكله بقى من ساعه الحكايه دى و انا حاسه بحاجات غريبه بتحصل اولها ان فيه كلب فى الشارع عندنا كل
شويه
الاقيه داخل جوه الصيدليه يعنى ابقى برص دوا او بوضب حاجه اتلفت الاقيه فى وشى طبعا اول مره صرخت بس
بس بعد ما اتكرر بقيت اهشه بس و هوا يمشى يظهر حس ان اللى بيعمله غلط بقى ينام جنب باب الصيدليه
بالضبط ابقى باتكلم مع حد على الباب يروح قايم وواقف جنبى و بعد ما ادخل يرجع ينام مكانه
فى قطه بتدخل تنام فى جنينه المنور عندنا مبقتش تخاف منى خالص ابقى داخله العماره الاقيها داخله معايا
عادى كده بلا خوف او خشى و ساعات تستنى اما ادخل و تدخل ورايا و اما ابقى جايه متخافش
زى القطط التانيه و تفضل واقفه باصالى كده و لا تتحرك خطوه انا برضه اما الاقيها استناها تدخل و بعدين اقفل
الباب يعنى بقى بيننا احترام متبادل مبنى على تكافؤ الفرص
هههههههههههههههههههههههههههه
ايه رايكم بقى فى الحاجات اللى بتحصل دى واللى بدأت الاحظها اليومين دول كتير
اظاهر ان القطه بتاعه الميجا دعتلى و قالت الاهى و انت جاهى يحبب فيكى قططه و كلابه قادر يا كريم
و اظاهر برضه ان الدعوه رشقت

هناك 19 تعليقًا:

هـمـــــــــــسة يقول...

على فكرة انتى مسكرة ودمك خفيف جداااا ماشاء الله عليكى (مش تخافى انا عيونى مش مدورة )هههههه

اسلوبك حلو بجد وعلى فكرة انا عندى مشكلة فى موضوع القطط ده فى قطة مستقصدانى وانا للاسف بخاف منهم ومش بحب ألمسهم ومش عارفة ايه الحل بأكلها من بعيد لبعيد بس انك تحسى بحبهم دى حاجة جميلة

دى كانت اول زيارة لمدونتك الحقيقة سعدت بيها جدا وان شاء المولى الرحمن ليا عودة

غير معرف يقول...

ياريت تنضمى حضرتك الى جمعية الرفق بالحيوان وطبعا مش واخدين حقهم بالمثل

Empress appy يقول...

هههههههههه هى دعت لكى عادى يا حبيبتى صدفه والله والحيوانات عموما بتحس بحنيه الناس وواضح انك حنينه ممكن بقى استغل ده وتعزمينى على ميجا

blue-wave يقول...

هههههههههههههههههههههههههههه
والله دمك زى العسل
ويلا يا ستى
بقيتى حبيبت القطط والكلاب
الف مبروووووووووووووك:))

فاتيما يقول...

بسسسسسسس
دى منتقتى بقى و أنا اللى هفتيكى
الحيوانات عندها فراسة بخصوص الموضوع دا
هما جربوكى ف الاول
و لقوكى طيبة
قاموا كونوا صلة و ألفة بينك و بينهم
على فكرة يوسف إبنى كان كدا
و ياه لما كنا نمشى ف شارع ...يبقى فاضل نقعد على الرصيف نكلم القطط و الكلاب اللى رايحة و الللى جاية ...
كنت بقوله عشان أنت ولد طيب و قلبك كبير ربنا بعت الملايكة تهمس فى ودن القطط و الكلاب عشان يحبوك
همس فى ودنك أنت كمان يا جميل
الملايكة عملت شغلها
فاضل شغلك إنتى
لو عندك بقايا عضم الفراخ او أى بقايا حطيه للكلب دا على جنب مطرح ما بيقعد
و نصيحة كمان ...سميه بأسم و إندهيله بيه
هتاخدى ثواب جامد بسببه
و كمان هتلاقى صديق مخلص بلا مقابل
تحياتى يا ست الستات

رئـــــيسـة حزب الأحلام يقول...

هههههههههههههههههههههههه
بجد القطة دى جامدة اوى
وبجد ربنا يوقفلك القطط بنت الحلال
تحياتى لكى ياقمر

صيدلانيه طالعه نازله يقول...

نص doc:ربنا يسكرك يارب
ياريت ترسى على القطط و الكلاب وربنا يستر
نورتينى و نشوفك تانى
===================================
غير معرف:حاضر بس و الله البنى ادمين دلوقتى هما اللى محتاجين رفق
===================================
~*§¦§ Appy §¦§:و الله لو شفتك يا قمر و انشاء الله يبقى قريب حجيبلك كرتونه مش بس واحده
مش خساره فيك يا قمر
=================================
blue_wave:الله يبارك فيك عقبالك و نشوفك كده ماشى فى الشارع بزفه
ههههههههههههههههه
تحياتى
=================================
فاتيما:اول مره اسمع موضوع انى اسميه باسم دى بس حاضر يا قمر علم و ينفذ
و سبحان الله معظم الاطفال بتحب الحيوانات و الحيوانات بتحس بده فعلا و بتبدأ تلاعبهم بس الاولاد ساعتها بيخافوا شويه فبنضطر نهشهم
بس من كلامك حاسه انك احسن
ربنا يطمنا عليكى دايما
================================
رئيسه حزب الاحلام:امين يارب و يوقف لنا كلنا كلاب و قطط تحمينا مش تعضنا
نورتينى
==================================

السينيور يقول...

ياه فكرتيني بموقف حصل معايا الاسبوع اللى فات مشابه لموقفك بل واسوأ كمان
كنت في سان استيفانو في اسكندرية ساعة الغروب بتفرج على الشمس الجميلة وهي رايحة تنام في البحر
وكان معايا غدايا سندويتش برجر وشاورمة فراخ وكفته
سميت وبدات اكل واذا بقطتين واحدة صفرا شبه دي كده بالظبط اللى في الصورة وواحدة بنى
جايين على ريحة الشاورمة والكفته
ويبصولى ويتمسحو فيا
الصراحة صعبو عليا اوي
رميتلهم حته برجر في الاول
كلوها ورجعولى تانى
وبعدين بقي في المشكلة دي
نظرتهم مأثرة فيا اوي وصعبانين عليا
ارميلهم حته كمان
المشكلة بقي ان القطتين مبقوش يجرو على اللى برميه
لا دي قطة قدامى تاخد ناصيبها والتانية جنبي مستنية
قولت اعمل ناصح بقي
ارميلهم حته مخلل يشموها ويرفعوا راسهم في كبرياء
راسهم والف سيف لازم لحمة
طيب حته عيش برده ابدا
قطط شوارع ولاد زوات اوي
طيب دول متعودين على اكل الزبالة خلاص يعنى حبكت لحمة دلوقت
المهم لالمذبحة انتهت بانى اكلت نص سندويتش البرجر ونص الكفته وربع الشاورمة
ويا خسارة الفلوس
بس الصراحة رضيت لما مشيو وهما شبعانين بعد ما خلصوا على مدخراتى الشندويتشية
بس يارب ميحصليش زي ما حصلك ودعوتهم ترشق فيا
انا مليش مشاكل مع القطط لكن الكلاب بقي عندى بعض المشاكل الازلية معاهم
الحمد لله ان اللى جالي كان قطط مش كلاب
والا كنت سبتلهم كل السندويتشات ومشيت
رغاي اوي معلش
بس بوستك عجبنى وفكرنى بالموقف ده

تحياتى

سبهللة يقول...

انا بقى طلعت من البوست بحاجة تانية خالص
ان دمك شربات

Foxology يقول...

سبحان الله

على فكرة القطط بالذات بتحس بالحنية والأهتمام من الناس ومن افراد معينين :)

تحياتى :)

صيدلانيه طالعه نازله يقول...

شاب مصرى مفروس:انت اللى جبته لنفسك
واخد اكلك و قاعد فى سان ستيفانو
طبعا قطط هناك متعوده على مستويات سان ستيفانو مول و اللى بيخرج منه تقوم انت ترميلها عيش حاف ده كويس انها رسيت على نص سندويتش من كل نوع و ما اكلتكش انت شخصيا
نورتنى
==================================
سبهلله: ده انتى اللى سكره و جميله ربنا يخليكى
==================================
foxology:بصراحه يا فوكس انا مقصره معاك جدا بس و الله قله فضى و فين و فين اما امسك الكمبيوتر
نورتنى
===================================

Mafrousa يقول...

هههههههههههه
هوه يظهر كدع
بس انا عاوزه اقولك ان الحيوان اكثر احساسا بروح الانسان اللى قدامه
فهما استشفوا رقة قلبك

صيدلانيه طالعه نازله يقول...

مفروسه عندنا وانا بقول المدونه منوره
و بافكر افرش المدونه رز باللبن
ربنا يكتر حبايبنا من الحيوانات و البنى ادمين
يااااااااااارب

البت المشمشية حلوة بس شقية يقول...

بصى يابنت الحلال انا عندى فوبيا من القطط عشان كدة دخلت اقولك كل سنة وانتى طيبة

وابقى تعالى زورينى فى المدونة سلام يا سكر مع ان اسلوبك عجبنى هستنا الموضوع الجاى بس بلاش قطط

صيدلانيه طالعه نازله يقول...

مشمشه:يعنى تبقى مشمشه و تخافى من القطط برضه
المره الجايه تحبى اتكلك عن ايه تكونى مش بتخافى منه
هههههههههههههه
نورتينى

شفـقــة و إحســــان يقول...

ههههههههههههه
حلوة بجد القطة بتاعة الميجا
انتى شكلك كريمة اوى وبتحبى الحيوانات
لازم فعلا تنضمى لجمعية الرفق بالحيوان

فاتيما يقول...

أنا جاية اطمن عليكى
و أعيد
كل سنة و إنتى طيبة و كل احبابك و أسرتك الصغيرة بخير
تحياتى و حبى

ahmed_k يقول...

بصي بقا يا دكتوره
بالنسبه للقطط مفافيش منها خوف أبدا
أنا بحب القطط وأنها تكتر لأن وجودها بيقلل من وجود الفئران عدوي الأول فالقطط شيئ جميل مفيش مشكله منه
أما الكلاب فدي المشكله
أنا عارف معلومه ومتأكد منها ان الكلب المكان اللي ينطرد منه ميجيهوش تاني أبدا
يعني جربي كده وخللي حد يرمي عليه كام طوبه وهو عند مدخل الصيدليه أو أنتي خلي معاكي طوبتين صغيرين واول ما تحسي أنه داخل تدبيهم في وشه تأكدي مش حيرجع تاني
وآدي الوصفه السهله السحريه للتخلص من الكلاب

وقبل ما أمشي عايز أقول

رفع الحجيج أكفهم
يرجون رحمة ربهم
ورفعت كفي أدعوه
يجعل ثوابك مثلهم
وكل عام وأنتم بخير

قلب ينبض بالحب يقول...

انا هقولك ايه الي حصل يادكتور انا اكيد في قط كان شاهد عيان على هذه الحادثة واخد بصمة لريحتك ووزعها على بقيت القطط والدوجهات قوم ايه كل القطط بقوا عافينك وطمعنين في كرمك اسلوبك جميل ومسكر يادكتور ويالافوتك بعافية

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .