الخميس، يناير 06، 2011

اذا عرف السبب







كل شويه  يطلع علينا الباشا المسئول المختص و يتنحنح و يقول احم احم و بعد كده يقول

ايها الناس المجتمعون فى هذا الصوان من سالف العصر و الاوان

احب اعرفكم اننا مازلنا بنزيد و عددد السكان بقى زى الرز ومفيش فايده فيكم خالص

و خساره فيكم اعلانات حسنين و محمدين زينه الشباب الاتنين

و اعلانات اسره سعيده تساوى حياه افضل

و الاعلان الخالد بتاع الست شلبيه الله يمسيها بالخير

و يختم كلامه اللى بيوجه لينا بكلمته الخالده التى طالما تردد فى ان يقولها 

بس مقدرش يكتمها  اكتر من كده


جتكوا القرف مليتوا البلد

و من موقعى هذا بقى هشمر كمامى و اسن سنانى و اشرب كوبايه جنزبيل 

عشان صوتى يلعلع و يجلجل كده و اعرف ازعق كويس و ارقع بالصوت كمان

حد فلحوس يقوللى حتزعقى ليه احنا ناقصين دوشه وصداع

اه حزعق والم الناس كمان و اللى مش عاجبه يروح او ينام و يريحنا



الباشا اللى مقهور على ان المشكله السكانيه مش راضيه تتحل و الناس عماله تزيد

عايزه اساله سؤال برىء لطشيف ظريف

هيا مين الفئه اللى بيوجهولها الاعلانات بتاعت التوعيه عشان تنظيم الاسره؟؟؟

بلاش تتعب نفسك و تتكلم انا حتكلم بدالك و اقول لان المدونه بتاعتى انا مش بتاعت حد تانى و انا بقى اللى بس اتكلم فيها

طبعا الفئه المتوسطه و الفقيره اللى دخلها محدود و محتاجه فعلا تحدد نسلها و مع ذلك برضه بيزيدوا!!!!!!!

انا عن نفسى و بحكم شغلانتى اللى جابتلى الضغط  اعرف اهم سبب منهم و اعتقد انه سبب اساسى

و ياريت محدش يجيله ضغط و لا سكر من اللى حقوله

يا ساده يا كرام كل انواع اقراص منع الحمل الرخيصه اللى اسعارها تتراوح ما بين 65  قرش و اتنين جنيه وربع

مختفيه تمااااااااااااااااماا من السوق و من فتره طويله كمان

كل انواع الاقراص اللى بتستخدم لمنع الحمل فى الفتره الاولى بعدالولاده و اللى مش  ليها تاثير على الرضاعه برضه مختفيه

بقالها فتره مش قليله و اما بتنزل بتبقى بكميات محدوووووده جدا

طب الناس تعمل ايه بقى؟؟؟؟؟

مش عارفه و الله العظيم ما عارفه و لا عارفه اعرف

المفروض بلد بظروفنا المنيله دى تبقى الحاجات دى من الاساسيات فيها واللى متنفعش تنقص ابدا

تروح الست من دول للدكتور بتاع رعايه الام والطفل اللى بتبقى مجانا من غير فلوس تساله اعمل ايه مش لاقيه الاقراص

يرد بكل فزلكه و منظره و كانه جاب التايهه

اعتمدتى حضرتك على فترات الامان

ههههههههههههههههههههههههههههههههههههههههههههههههههههه

طب اذا كانت مفهمتش يعنى ايه  حضرتك حتفهم فترات الامان

اذا كانت مش بتعرف تقرا وتكتب حتعرف تحسب لنفسها كام يوم عدى و كام يوم فاضل

يا ساده يا كرام و يا اطباء يا افاضل خاطبوا الناس على قدر عقولهم

و اذا اردت ان تطاع فامر بما يستطاع

وفروا الادويه الاول قبل ما تقولوا للناس حددوا و لا نظموا النسل

انظروا انتم حولكم و لو مره واحده قبل ما تقولوا للناس انظروا حولكم و تعملولهم دوخه من كتر اللف و الدوران


بس خلاص

هناك 40 تعليقًا:

Ramy يقول...

هههههههههههههههههههههههههههههههههههههههههههههه

وفرلنا الكُلة

طبعاً دى مشكلة طبية

مليش دعوى بيها دلوقت (:

Ramy يقول...

كدة يا دكتورة تضحكينى


و انا عاوز اضحك (:

صيدلانيه طالعه نازله يقول...

Ramy

كالعاده رامى على باب المدونه
ربنا ما يقطعلك عاده ابدا

صيدلانيه طالعه نازله يقول...

Ramy

اضحك يا سيدى محدش واخد منها حاجه
كل سنه و انت طيب و ربنا يجعله عيد سعيد عليك
و يبقى احلى من كل الاعياد رغم الحزن و الوجع
بس والله كلنا موجوعين و متالمين مش انت بس
لان الجرح فعلا جرحنا كلنا

و الحمد لله انى قدرت اضحكك
كل سنه و انت طيب وبخير

Ramy يقول...

دا انا بس محظوظ دة انا كُنت ماشى خلاص

علشان اروح الكنيسة

(:

بس علشان مقطعش العادة بقى ابقى على باب المدونة (:

صيدلانيه طالعه نازله يقول...

Ramy

ربنا يجعلها ليله سعيده عليك و على كل اخواتك ان شاء الله

تحياتى

عمرو يسرى يقول...

ههههههههههههه
ماهما لو وفروا حبوب منع الحمل
هيقطعوا عيش حسنين ومحمدين والاسره السعيده والست شلبيه هتقعد فى بيتها
ودا برضوا ميرضيش الساده المسئوليين

zikooooo يقول...

السلام عليكم
ههههههههههههههههههه
حضرتك لازم تبقي عارفه انك قولتي سبب تزايد السكان لم يطرا له احد من قبل مسبقا يعني اولويه مطلقه
والله انا اول مره اعرف السبب ده
دمتي بكل خير

سندباد يقول...

موضوع في منتهي منتهي الاهمية وفي نفس الوقت موضوع في منتهي الفكاهه وشر البلية ما يضحك
كده يادكتور تضحكينا في البرد ده
تحياتي

صيدلانيه طالعه نازله يقول...

عمرو يسرى

ماهو حسانين و محمدين و بقيه الفريق
ممكن يشتغلوا على اعلانات الضرايب مصلحتك اولا
و اهى برضه سبوبه كويسه و بتكسب كويس

نورتنى

صيدلانيه طالعه نازله يقول...

zikooooo

انا طول عمرى سباقه كده و بجيب اسباب
محدش عرفها قبلى
عشان مبقاش حرماكم من حاجه ابدا

نورتنى

صيدلانيه طالعه نازله يقول...

سندباد

هو فعلا شر البليه ما يضحك
حاجات غريبه و محدش يتخيل انها ممكن تحصل
بس بتحصل حنعمل ايه بقى

تحياتى

عمرو يسرى يقول...

نظريه
بس ماهى اعلانات الضرائب مصحلتهم اولا بيعملوها ناس تانيه
محمدين وحسنين وباقى الفريق يقطع عليهم ليه ههههههههههههههههه

Zouka's يقول...

طيب يمكن عايزين يغلوها
او
عاوزين يحتكروها زى السكر والطماطم والقمح
او
القوى العظمى تريد نزود النسل على اساس الفتنه الطائفيه على الباب
والله اعلم بكره ايه تانى

لــــ زهــــــراء ــــولا يقول...

علاااااااااا

من موقعى هذا احب اقولك حبوب ايه اللى انتى بتتكلمى فيها يا دكتووووووره مش لما يوفروا الغذاء الاساسى يبقى يوفروا الحبوب اشد شعرى منك يعنى
ياينتى هى الناس لاقيه تاكل لما تشترى الحبوب دى ؟؟؟؟؟؟؟

طبعا انا مقدر ان المشكله طبيه بحته وطبعا انا ماليش فيها خالص مالص
على العموم خلى صوتك يوصل لما نشوف هيوفروا الحبوب او يلغوا الزواج اللى هى سبب المشكله الاكبر ها ها هاها

زهراء

FAW يقول...

هم يبكي و هم يضحك والله

مصطفى سيف الدين يقول...

هو يعني بس منع الحمل الناقص
ده النواقص في الصيدلية حاليا اكتر من الموجود ونواقص كلها مهمة والله يا دكتورة
نقابة الصيادلة ووزارة الصحة بصراحة سابوا كل حاجة وراهم وقالوا حددوا النسل
حضرتك التاميفلو اللي في المستشفيات صلاحيته انتهت واحنا في ازمة انفلونزا خنازير وحالات بتموت
معلش يا دكتورة علشان جالي الضغط زيك
ربنا يصبرنا
شكرا علي البوست الجميل

إنسان || Human يقول...

يعني هي جات على حبوب منع الحمل
ما كل حاجه ناقصة في البلد
وبعدين بقى في حاجات اهم دلوقتي من تنظيم الاسرة

Unknown يقول...

السبب ده جديد ,مش عارف بس الحاجات دي كانت متوفرة قبل كده ومع ذلك الناس كانت بتكتر , اعتقد ان المشكلة مش في كترتهم المشكلة في اللي متخيل انه هوه اللي بياكلهم

Noha Saleh يقول...

اشمعنى عندنا بنشتكى من زيادة السكان
دول كتير عندها زيادة السكان دى ثروة كبيرة لان الانتاج بيزيد
الموضوع كبير وعاوز كلام كتييييييييييييييييييير

Unknown يقول...

و يا ريت على أقراص منع الحمل, أدوية الكحه ناقصه و فوارات النقرس ناقصه و الانسولين محدود جداً...أنا مش عارفه طب الناس تعمل ايه
ده بدل ما يوزعوا عليهم الأقراص في وحدات الأسره و الطفل!!!

مدونة رحلة حياه يقول...

السلام عليكم
يعنى هما لما يوفروا الحاجات دية هيقفلوا مستشقياتهم المتخصصة فى الولادة وعيادتهم وكمان مصانع ملابس الاطفال عندهم ومصانع الالبان والبامبرز الخ
اذا عر السبب بطل العجب
المشكلة مش زيادة سكانية المشكلة عدم استغلالها والاستفادة منها ما هو اصل اللى بيفهم بيريح بس تعملى لهم ايه
تقبى مرورى

هبة فاروق يقول...

مش عارفة اذا كان تعليقى وصل ولا لا
بس حكتبة تانى
بجد ضحكت لسردك الجميل رغم ما تبض حروفة بالحزن الشديد على حالنا واوضعنا
فعلا معاكى حق يوفرو الدوا الاول وبعدين ينزلو اعلانات وتوعية
حال مقلوب وماشى بالعكس ربنا يعينا
تحياتى لكى ولقلمك الواعى

Carmen يقول...

والله ياحبيبتي فكرت في السبب اللذيذ ده قبل كده اصلي كنت بشتغل مع ماما في الصيدلية برضه ^_^
كنت كل مابسمع اعلانات الاف ام بقعد اضحك ضحك اما يقول
اسأل طبيبك عن _____
علي اساس ان في ناس كتييييير مايعرفوش سكة العيادات او المستشفيات الا ما تيجي تولد وكمان قيصري
بجد حاجة تضحك وتعيط في نفس الوقت
عندنا طبقات اجتماعية في بلدنا متأخرة جداااااا بشكل يخلينا نسأل بسخرية
فين الحكومة من كل ده؟

لــــ زهــــــراء ــــولا يقول...

ايه فترات الامان دي يا ست الداكتورة ؟
ثانياً الزنجبيل بيشرخ الصوت مش بيجلجله خليكِ في الينسون هههه سكر يا لولة


بلد خربانة خلاص هتقولي لمين ومبن من المسئولين فاضي يقرا ويبحث ويشوف... خليهم ف الغزومات والمؤتمرات
لولا

صيدلانيه طالعه نازله يقول...

عمرو يسرى

الساده المسئولين يهمهم يدفعوا اقل سعر
و حسنين ومحمدين قدام اوووى و اكيد سعرهم ارخص

صيدلانيه طالعه نازله يقول...

Zouka's

سيبك انت بتعجبنى افكارك المميزه
هههههههههههههههههههههههه
نورتنى

صيدلانيه طالعه نازله يقول...

لـــولا وزهـــراء

ايوووووووووووووووه هووووه ده
هما يلغوا الجواز ارخص و اوفر
بلا جواز بلا هم يا شيخه

نورتينى يا زهرا يا دماااااااغ

صيدلانيه طالعه نازله يقول...

FAW

اتفق معاك جدا


نورتنى

صيدلانيه طالعه نازله يقول...

مصطفى سيف

موضوع التاميفلو البايظ ده من السنه اللى فاتت للاسف
و مش عارفه ساكتين عليه ازاى
ربنا يرحم بجد

نورتنى

صيدلانيه طالعه نازله يقول...

Hu-man

ايوه فيه حاجات اهم بس هيا برضه مهمه
مش كده و لا ايه؟؟

همزة يقول...

المشكلة مش فى زيادة النسل
المشكلة الحقيقية فى السرقة والنهب
المشكلة الحقيقية ان مفيش تنمية
مفيش استغلال للقوة البشرية
مش هاتكلم عن الصين اللى عدد سكانها سدس العالم او اكتر
ومش هتكلم عن اليابان اللى تعدادها فوق ال 100 مليون ومعندهمش موارد طبيعية
جتهم الهم خربوا البلد

Casper يقول...

اتفق معكِ تماما
أن الدولة هي صاحبة المشكلة
وليس ورائها هم غير معاتبة السكان فقط

____________

خالص تقديري لفكرك وقلمك
تقبلي مروري

Casper

شمس النهار يقول...

ماهي دي الفهلوة بتاعت المصريين

المشكله وحلها والتعجيز في التنفيذ

ويروحوا ياخدوا الحقن اللي مبهدلاهم

ahmed_k يقول...

أنا بسمع أن هذه الأقراص متوفره في مراكز رعاية الأمومه والطفوله تقريبا
لكن برضو اللي أعرفه أن هذه الأدويه المدعمه سواء في مثل تلك المراكز أو في التأمين الصحي بتكون نسبة الماده الفعاله فيها تقريبا شبه متلاشيه،
بمعنى أن النصب وصل كمان للدواء
ربنا يرحم هذا الشعب اللي مش عارف يلاقيها من فين ولا من فين

sony2000 يقول...

طب هو ينفع كدا
قعدا بكلم صحيني أعزيها
الاقي البوست بتاعك فوشي؟
طب انا عامل ايييييه تيب
احرجت بجد:)

رحاب صالح يقول...

السلام عليكم ومساء الوروووود ومساء اقراص منع الحمل ....
دخلت مدونتك مرة من زمااان يجي السنة اللي فاتت كدة ...لاء ف 2009
دلوقت احنا ف 2011
بحب انا الارقام الفردية...
والله كلامك عين العقل بس للي يفهم بقي
تعرفي انا اختي بعد ما ولدت زياد علي طول اتفقت مع جوزها علي التنظيم ...ده حتي يمكن ميخلفوش تاني....هههه
بس المشكلة بقي ان حبوب منع الحمل اللي كتبتها الدكتورة لفينا عليها كفر الشيخ واسكندرية ملقيناهاش والنوع الرخيص مش نافع ...ومش عارفة اية مش موجود...واصلا النوع الرخيص ده بيسبب مشكلات كتيرة ...ده غير في مركز تنظيم الاسرة ولا هما هنا ولا بيفهموكي كلمة واحدة لاجل ربنا...
نفسي بجد المسؤلين يعملوا حاجة صح...وينسوا ان مصر فيها محافظات تانية غير القاهرة واسكندرية...ان في ناس تانية غير الدكاترة والمهندسين ..والمهن الحلوة دي...في صيادين وفلاحين وموظفين علي اد اد حالهم....
نفسي بلدنا تتغير بقي....
معلش طولت عليك....

غير معرف يقول...

هههههههههههههههههههههه
البوست تحفه وفى نفس الوقت يزعل

هو فعلا بس خلاص

يا ستى ياريت تيجى على اد كدا
وما خفيا كان اعظم

hasona يقول...

السلام عليكم

فعلا ومن الهموم ما يضحك فعلا

المشكلة لها اركان كثيرة كلها تقع في الخطأ

طبيب غير مهتم (متفزلك)-ومريض ولا علي باله - وعلاج غير متوفر - ومسئول نايم في العسل نوم-و بيوفر شماعة جاهزة لمعظم المشاكل

وأكيد هتلاقي أفكار عظيمة وخلاقة
يطحنوا الحبوب مع الدقيق اللي هيتعمل بيه العيش - ده علي أساس انه دقيق يعني

واللي يقف في الطابور ياما هيشوف

فشكووول يقول...

السلام عليكم
تحياتى
شوفى ياستى
لاهى المشكله فى كثرة النسل ولا فى زيادة السكان .. المشكله فى المسئول اللى انتى بتقولى عليه
الموضوع ان النظام والحكومه عايزين يفهموا الناس ان هما السبب فى المشكله الاقتصاديه المستعصيه عندنا عشان كدا بيرموا فشلهم على الحكايه دى وكمان عندك كدا كام عباره بيقولوها زى مثلا
( ان الموظف بيشتغل 27 دقيقه فى اليوم
( مثلا ان المصريين لم ينضجوا لكى تمنع لهمالديمقراطيه ..
هما بيقولوا حجج وخلاص عشان يبرروا فشلهم فى قيادة البلد
بس يا ستى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .