الأحد، يناير 02، 2011

اين انتى يا لووووووووولى






البوست ده اتنشر السنه اللى فاتت و حسيت ان وقته جه تانى عشان اعيد نشره






لولى ده اسم الدلع بتاع ليليان 

طبعا حينط حد منكم و يسألنى تطلع مين ليليان دى؟؟؟؟

ليليان دى صديقه عزيزه عليا جدا من صديقات الطفوله

طبعا من اسمها باين انها مسيحيه اتعرفت عليها و انا فى اولى اعدادى و استمرت

صداقتنا لغايه ما خلصنا كليه صيدله هيا سقطت سنه و انا كملت على طول

طول الفتره دى و احنا اصدقاء قوى و قريبين جدا من بعض

ايام الاعياد سواء عيد الميلاد او القيامه كنا بنغيب زيها من غير ما تبقى اجازه رسمى

و ايام اعيادنا كانت بتشترى هدوم جديده و شوز جديده و تخرج معانا

كل ايام العيد و كانها واحده مننا بتعيد زينا بالضبط

ماكناش نعرف مين مسلم و مين مسيحى غير من شويه براويز على الحيطان

اللى عنده صور يبقى مسيحى و اللى عنده قرآن يبقى مسلم

فاكره قوى لغايه دلوقتى ساعه حفله المدرسه و كنا مع بعض فى المسرحيه

و خدتنامعاها البيت و طلعت رنجه من التلاجه و قعدنا نشويها على البوتجاز

و اكلنا مع بعض و رجعنا المدرسه و طبعا الرنجه اشتغلت و بدأ النوم و التناحه

تحل علينا كلنا و الاستجابه بتاعتنا بقت صفر

و كل اللى يسألها عملتى فيهم ايه تضحك و نضحك كلنا معاها بس ضحك ببلاهه كده

كلنا طبعا عارفينه

دخلنا الكليه مع بعض و فى المدينه الجامعيه عرفنا يعنى ايه اديان مختلفه

اما لاقينا اداره المدينه بتخلى المسيحين منفصلين عن المسلمين ليه مش عارفه

بس فضلنا اصحاب و نتقابل و احنا نازلين و احنا راجعين

فى وقت الاكل و طبعا فى اوقات السفر كنا بنبقى عصابه كبييييييييييره

فيه اللى بيسبقنا من القاهره و المنيا و اللى بيركب من اسيوط و اللى بيحصلنا من قنا

ايااااااااااااااام فعلا تحفه و مش حتتكرر

مفتقداكى يا لوووووووووولى جدا

آخر حاجه عرفتها عنك انك اتجوزتى الولد اللى كان بيحبك من ايام ثانوى

و كنتى قارفانا بانك مش طايقاه رزل و الله غلس هو فاااااااااكر نفسه مين

و فى الاخر طلعتى مقرطسانا كلنا و اتجوزتيه و معرفتش طبعا اخلص تارى

منك لغايه دلوقتى لانى ببساطه مش لاقياكى و لا عارفه اوصلك

وحشتنى جدا و مش عارفه الاقى زيها تانى

و مش قادره اقول غير الله يرحم الاب و الام و يجازى الاب و الام بالخير

اللى قدروا يطلعوا ولادهم كده

الحكايه دى موجهه للى بيقول علينا قال ايه بنكره بعض

كل سنه و احنا كلنا طيبين و مع بعض

هناك 47 تعليقًا:

سندباد يقول...

لله الامر من قبل ومن بعد
ربنا يعفو عنا ويرحمنا ويبعد عننا السوء القادم بقوة سواء كان من الداخل او من الخارج

اعقل مجنونه يقول...

والله الجهل تهمه لازم تكون عقوبتها الإعدام حسبنا الله ونعم الوكيل

من كل بستان زهرة يقول...

ناس مريضه الي بتفرق حسب الدين
ومش عارفه بينصبه نفسهم ليه حكام على دين الله
في عاقل يقول اننا نتعامل مع بعض على اساس الدين
امال الأخلاق والأحترام والصدق والطيبه والذوق كل ده نعمل بيه ايه
نرميه لمجرد ان الشخص ده مش من ديني
والله يا دكتوره الواحد بيغلي من جواه ومش عارف يعمل ايه
وبعدين طالما كلنا زعلانين على الي حصل
مين الي بيعمل كده ومصلحته ايه
حسبي الله ونعمه الوكيل

لـــولا وزهـــراء يقول...

كل سنه و احنا كلنا طيبين و مع بعض
" يارب كل سنة واحنا اخوات واصدقاء ونطلع لسانا للعدو التالت اللي داخل ما بنا "
لولا

ahmed_k يقول...

الشعب عمره مكان بيكره بعضوا
ومظاهر الترابط الشعبي أكثر بكثير من أن تحصى
ولكن سامح الله القيادات التي أوصلت الإحتقان لهذا الشكل
زمان كان في رئيس وزراء مسيحي في مصر
والنواب النصارى كانوا كثر في دوائر غالبيتها مسلمه
فهل ممكن يحدث ذلك الآن ؟؟؟؟؟؟؟؟

مصطفى سيف يقول...

احنا كده من زمان يا دكتورة مفيش فرق بين مسلم ومسيحي
انا عن نفسي لما كنت في كلية الصيدلة اتدربت في صيدلية دكتور مسيحي و افخر اني اتعلمت منه حاجات كتير
وجارنا دكتور مسيحي في بيننا من زمان علاقات مودة واحترام دايما بيزورنا ونزوره ونهادي بعض في الاعياد
المشكلة مش فينا المشكلة بس ان في بعض المتعصبين من ينفخون في النار وبيصطادوا في الماء العكر
ربنا يسترها ونرجع زي ما كنا مسلمين ومسيحيين اخوات واصدقاء

شيرين سامي يقول...

طول عمرنا اخوات و أصحاب ربنا يجازي اللي ليه مصلحه في تفرقتنا و يرحمنا من اللي احنا فيه و يخفف عنهم يا رب

Hu-man يقول...

كل واحد فينا عنده قصص مشابهه وده طبيعي جدا لأننا عايشين في مجتمع واحد...فيه أفكار بدأت تغزو بلدنا جايه من بلاد أصلاً مافيهاش التنوع اللي عندها....بلاد منغلقة الفكر ..للأسف وفي كتير مقنعين بيها

يوميات شحات يقول...

ربنا ينتقم منه اللي نكد على الشعب كله

zikooooo يقول...

السلام عليكم ورحمه الله وبركاته

ذكرياتك جميله وكتير مننا عندنا قصص شبهها جداااااا
ربنا يحفظنا من الجهل ومن
الفتاوي الجديده من شيوخ فاكرين نفسيهم انبياء

MTMA89 يقول...

حسبنا الله و نعم الوكيل

ربنا يشملنا جميعا برحمته


محمد

الحــب الجميـــل يقول...

حسبنا الله ونعم الوكيل

ربنا ينتقم من اللى كان السبب فى افتعال هذا الشىء

ان شاء الله صحبتك تكون بخير يا علا
ويارب عن قريب تعرفى اخبارها وتتلاقوا

SHAPE YOUR LIFE (ABOALI) يقول...

يااااااااااااه
على النسيج
عندما تتجمع الاوصال ونعرف اننا مخلوق واحد يجتمع على طينة ارض واحدة نتغذى منها وتتحاور انفسنا
يقينا سنجد حلاوة الحياه وحر مذاقها
واتساق معانيها
وهذا ماكان يا سيدتى فى تلك السطور التى قراءتها وعبرت عن التحام كنا فيه
فى غير كلفة او تزايد بدون مصالح
جمعنا الحب والالفة بغض النظر عن ما يعتنقه بنى الانسان

فهناك رب يحاسب وهو المطلع
لكم المنا ذلك الانحراف عن المسار
وتغلل البعض فى التبارى فى المزايدات الكلامية
ونسوا اسس التعاملات وارتفاع القيم

ادعوا معك سيدتى البحث عن لولى

ربنا يهبك الخير ويقربك من الحياه الاسعد والالفة الطيبة
كل التقدير لقلم معبر فى سمو

الاحلام يقول...

لو كان الجهل رجلا لقتلته تاثرت جدا من الاحداث التى تحدث ببلدنا وتاثرت اكثر بكلماتك . اللهم استرها معنا دنيا واخره ، كل سنه وانتى طيبه وان شاء الله تكون سنه جميله عليكى وتحققى جميع احلامك اتشرفت بوجودى بمدونتك وان شاء الله اتشرف بيكى يعمنى رايك تقبلى تحياتى الاحـــــــــــلام

عمرو يسرى يقول...

منهم لله اللى بيحبوا يصنعوا الفتن
طول عمرنا عايشين مع بعض اصدقاء واخوه
ربنا ينتقم منهم وينكد عليهم زى مانكدوا علينا

مدونة رحلة حياه يقول...

السلام عليكم
ينشرون الفتنة بين الناس ثم يسألون لما العصبية
ستر الله مصر وجعلها أمنة مطمئنة وسائر البلاد اللهم امين
تقبلى مرورى

!!! عارفة ... مش عارف ليه يقول...

أنا فاكر البوست ده

وفاكر تعليقي عليه

بالشكل اللي إحنا عليه ده ممكن

أشوفه منشور هنا للمرة التالتة

ربنا يلطف بنا

reemaas يقول...

عاوزة اقولك ياعلى ان حتى المدينة الجامعيه عندى ماكناش بنفترق كنا فى مبنى واحد

واحب اقول وجهه نظرى البسيطة جدا

ان مش شايفه الحداث بين مسلمين ومسيحين
ده حادث زى حادث تفجيرات الحسين

ايامها ماقلناش مسيحى
والنهاردة مش هقول مسلم
الهدف تدميرنا كلنا

الكاتب محب روفائيل يقول...

طبعا واحنا كلنا كده

وخصوصا لو كنا بلديات

لان أنا من أسيوط

المهم بقى : -

حملة أنا ضد الارهاب على مدونتى الخاصة

http://elkatebrofail.blogspot.com/

نود تشريفكم ومساندتكم

سمكه واحده يقول...

اولا
انتي كمان وحشتيني اوي اوي
انتي عامله ايه ؟
احنا بقي هنا عاملين ايه؟
اقلك زعلانين ومضايقين وبجد مش عارفه ايه اللي حصل غير ربنا يجازي اللي كان السبب بجد وربنا يسترها علينا بعد كده مش عارفه هيحصل لنا ايه اكتر من اللي احنا فيه
بمناسبه انها كان واحد بيحبها من الثانوي ومش طيقاه انا عندي واحده صحبتي كده وكان جارها وكان بيموت فيها من الابتدائي كمان وفضل وراه لحد ما وقعت وقعت بعد ما كانت بتشتم فيه وتقول ايه الرخامه دي ومعندوش دم وووو اتجوزت ومعاها ولدين دلوقتي
والواد جارها انتصر في الاخر بردو
حط حاجه في دماغه
كل سنه وانت واحنا بخير يارب

هديل يقول...

لا حول و لا قوة الا بالله .. الله ينتقم من كل اللي بحاول يفرق بين الاخوة اللي عمر الدين ما كان سبب في زعل بينهم !

صيدلانيه طالعه نازله يقول...

سندباد

يارب يا سندباد
ربنا يتقبل دعاك

نورتنى

صيدلانيه طالعه نازله يقول...

اعقل مجنونه

كلامك صح
لان الجهل ده ساعات بيخرب الدنيا
ربنا يرحمنا برحمته

تحياتى

صيدلانيه طالعه نازله يقول...

من كل بستان زهرة

اللى بيعمل كده معروف و معروفه كمان مصلحته كويس قوى
الدور و الباقى على ضعاف النفوس اللى بينقادوا ورا الكلام ده

ربنا يستر بقى

صيدلانيه طالعه نازله يقول...

لـــولا وزهـــراء

ياااااااااااااااااارب يا لولا
ربنا قادر يحافظ علينا
بس المعم نشغل عقلنا شويه

نورتينى

صيدلانيه طالعه نازله يقول...

ahmed_k

اما كنت بتفرج على مسلسل الملك فاروق
و شفت التفاف الناس حول مكرم عبيد و علاقته القويه بمصطفى النحاس
زعلت قوووى على الحال اللى وصلنا ليه

ربنا يهدى الحال و النفوس بأمره ان شاء الله

نورتنى

صيدلانيه طالعه نازله يقول...

مصطفى سيف

انا كمان اشتغلت فى صيدليه دكتور مسيحى 3 سنين كانوا من اجمل سنين حياتى
كان انسان متفتح و مثقف و محايد و كانت اما تحصل حاجه زى دى نتناقش كتير و مكانش حد بيزعل او ياخد موقف من حد
ربنا يرحمنا و يعديها على خير

صيدلانيه طالعه نازله يقول...

شيرين سامي

ربنا يعديها على خير يا شيرين

دعواتك

صيدلانيه طالعه نازله يقول...

Hu-man

الثقافه الوهابيه للاسف غزت فكر
كل الناس اللى بتسافر هناك الا ما ندر

و اللى بياخدها بينفزها حرفيا من غير تفكير

نورتنى

صيدلانيه طالعه نازله يقول...

يوميات شحات

ياااااااارب
ويرد كيدهم الى نحورهم

نورتنى

صيدلانيه طالعه نازله يقول...

zikooooo

ايوه هما الشيوخ من عندنا
و القساوسه المتعصبين من عندهم
بيسخنوا الناس جامد و بيستغلوا ان الناس مصدقاهم و بتحترمهم

دى حقيقه للاسف

صيدلانيه طالعه نازله يقول...

MTMA89

يااااااااااارب

صيدلانيه طالعه نازله يقول...

الحــب الجميـــل

ربنا يسترها ان شاء الله
و يجمع شملنا مع بعض كلنا

نورتينى

هبة فاروق يقول...

اسفة على التاخير حاولت اكثر من مرة الدخول وكانت صفحتك بتتقفل والمشكلة كانت عندى وحلتها
طبعا مشاعر جميلة ومفيش فرق بين مسلم ومسيحى والصداقة ختفضل بينا وبينهم مهما حصل
ربنا يهدى الحال ونرجع احسن مما كنا
تحياتى لكى يا دكتورة

bombona يقول...

يا ستى هم نفس السيناريو بس بيتحكى بطريقه مختلفه ماحنا كلنا عمرنا ماحسينا بفرق بس هو فى ناس كده غاويه تسيب المهم وتتكلم فى الهايفه زى مثلا الناس اللى بتعلق على اننما واضعين الخلال مع الصليب على بروفايلتنا وكانن خلاص هانستنصر ناس افقها ضيق عايزه جنازة وتشبع فيها لطم ولو ان اللى يقرأسورة المائده الايه 82 ممكن يعرف مين اللى عملها

صيدلانيه طالعه نازله يقول...

SHAPE YOUR LIFE (ABOALI)

فهناك رب يحاسب وهو المطلع
*******************************
لو كل اللى قابل الموضوع ده بالشماته
لو كل اللى غضب لمت حدث فكر كده
مكانش كل اللى حصل حصل من اصله
و كان الكل فكر ان فيه طرف تالت مستفيد من كل اللى بيحصل ده

تحياتى لقلم مميز

صيدلانيه طالعه نازله يقول...

الاحلام

ربنا يتقبل دعاك ودعائنا معاك
اللهم امين

نورتنى

صيدلانيه طالعه نازله يقول...

عمرو يسرى

ربنا ينكد على اللى ينكد
ربنا يشتت شملهم و يفرق جمعهم
باذنه

تحياتى

صيدلانيه طالعه نازله يقول...

مدونة رحلة حياه

ربنا يستر جميع بلاد العرب و يبعد عننا شر المكائد

نورتنى

صيدلانيه طالعه نازله يقول...

!!! عارفة ... مش عارف ليه

ربنا يستر وان شاء الله تكون المره التانيه و الاخيره
دعوااااااتك معانا

نورتنى

صيدلانيه طالعه نازله يقول...

reemaas

هما مش كانوا بيفرقونا فى المبانى
كانوا بيفرقونا فى الحجرات

هو فعلا حادث ارهابى
مش فتنه طائفيه
و الفرق فى المعنى كبير وواسع

ربنا يسترها على البلد و الامور تهدى بقى


نورتينى

صيدلانيه طالعه نازله يقول...

الكاتب محب روفائيل

اهلا بحضرتك
و نورت المدونه وكل سنه و حضرتك طيب وبخير

ان شاء الله حنفضل دايما اخوه فى وطن واحد

و ان شاء الله حزور المدونه عند حضرتك

نورتنى

صيدلانيه طالعه نازله يقول...

سمكه واحده

سمووووووووووووووكه
حمد الله على سلامتك يا قمر
نورتى التدوين و الشعب البلوجرى كله
متغيبيش تانى لو سمحتى

بجد فعلا ربنا يسترها على البلد وعليكم
هناك انتوا كمان
و على كل مصر لاحسن الدنيا مولعه فى كل البلد مش اليكس بس

بالنسبه للولى مش حسيح لها تانى زمان البت شرقت وماتت من الشرقه من كل الناس دى اللى جابت سيرتها


نورتينى يا حبى

صيدلانيه طالعه نازله يقول...

هديل

يارب حبيبتى

نورتينى

صيدلانيه طالعه نازله يقول...

هبة فاروق

ولا يهمك حبيبتى
متحسبيهاش تاخير ولا حاجه
انتى تنورى فى اى وقت

انا عجبنى البوست عندك اوى
القصه كانت حلوه اوى
و النقاش اللى دار بينك وبين احد المدونين كان راقى وجميل و عقلانى جدا

ربنا يحمى البلد من كل الفتن يارب

نورتينى

صيدلانيه طالعه نازله يقول...

bombona

كلنا حبيبتى عارفين مين اللى عملها
موضوع الهلال و الصليب ده موضوعه موضوع
كان عليه خناقات كتيره و طويله
وزى ما قلتى سيبنا المهم و جينا فى الهايفه و اتصدرنا

نورتينى فى اول زياره و يارب دايما هنا ومنورانى

faroukfahmy58 يقول...

الى الست الدكتورة الصيدلانية . انا بشفق من طلوعك ونزولك ياريت يبقى بفايدة والا للاسف تعملى ما تعملى لااللى فوق شافوكى ولا اللى تحت سمعوكى الحقيقة مفيش حاجة اسمها مسلم ومسيحى انا شايف ان ديانة المسيحية اوجدها الله فى وقت كان محتاج اليها ثم ظهر الاسلام فى وقت ايضا كان محتاج اليه بالتالى فهى مراحل سابقة ومراحل تالية وظهور الاسلام لكى يتمم الديانات يهودية ومسيحيةربنا يكمل علينا مخنا ونعقل بأه وشكرا ثانيا على وطنيتك واجتهادك الدينى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .