الأحد، يناير 02، 2011

اين انتى يا لووووووووولى










البوست ده اتنشر السنه اللى فاتت و حسيت ان وقته جه تانى عشان اعيد نشره






لولى ده اسم الدلع بتاع ليليان
طبعا حينط حد منكم و يسألنى تطلع مين ليليان دى؟؟؟؟

ليليان دى صديقه عزيزه عليا جدا من صديقات الطفوله

طبعا من اسمها باين انها مسيحيه اتعرفت عليها و انا فى اولى اعدادى و استمرت

صداقتنا لغايه ما خلصنا كليه صيدله هيا سقطت سنه و انا كملت على طول

طول الفتره دى و احنا اصدقاء قوى و قريبين جدا من بعض

ايام الاعياد سواء عيد الميلاد او القيامه كنا بنغيب زيها من غير ما تبقى اجازه رسمى

و ايام اعيادنا كانت بتشترى هدوم جديده و شوز جديده و تخرج معانا

كل ايام العيد و كانها واحده مننا بتعيد زينا بالضبط

ماكناش نعرف مين مسلم و مين مسيحى غير من شويه براويز على الحيطان

اللى عنده صور يبقى مسيحى و اللى عنده قرآن يبقى مسلم

فاكره قوى لغايه دلوقتى ساعه حفله المدرسه و كنا مع بعض فى المسرحيه

و خدتنامعاها البيت و طلعت رنجه من التلاجه و قعدنا نشويها على البوتجاز

و اكلنا مع بعض و رجعنا المدرسه و طبعا الرنجه اشتغلت و بدأ النوم و التناحه

تحل علينا كلنا و الاستجابه بتاعتنا بقت صفر

و كل اللى يسألها عملتى فيهم ايه تضحك و نضحك كلنا معاها بس ضحك ببلاهه كده

كلنا طبعا عارفينه

دخلنا الكليه مع بعض و فى المدينه الجامعيه عرفنا يعنى ايه اديان مختلفه

اما لاقينا اداره المدينه بتخلى المسيحين منفصلين عن المسلمين ليه مش عارفه

بس فضلنا اصحاب و نتقابل و احنا نازلين و احنا راجعين

فى وقت الاكل و طبعا فى اوقات السفر كنا بنبقى عصابه كبييييييييييره

فيه اللى بيسبقنا من القاهره و المنيا و اللى بيركب من اسيوط و اللى بيحصلنا من قنا

ايااااااااااااااام فعلا تحفه و مش حتتكرر

مفتقداكى يا لوووووووووولى جدا

آخر حاجه عرفتها عنك انك اتجوزتى الولد اللى كان بيحبك من ايام ثانوى

و كنتى قارفانا بانك مش طايقاه رزل و الله غلس هو فاااااااااكر نفسه مين

و فى الاخر طلعتى مقرطسانا كلنا و اتجوزتيه و معرفتش طبعا اخلص تارى

منك لغايه دلوقتى لانى ببساطه مش لاقياكى و لا عارفه اوصلك

وحشتنى جدا و مش عارفه الاقى زيها تانى

و مش قادره اقول غير الله يرحم الاب و الام و يجازى الاب و الام بالخير

اللى قدروا يطلعوا ولادهم كده

الحكايه دى موجهه للى بيقول علينا قال ايه بنكره بعض

كل سنه و احنا كلنا طيبين و مع بعض

هناك 35 تعليقًا:

MǿиY El-Shreef يقول...

:)

:)

:)

اعز صحابي حاليا

مسيحي

عاشقه الرومانسيه يقول...

كل سنه وانتى وليليان وكل المصريين مسلمين ومسيحين بخير ياااااااارب

صيدلانيه طالعه نازله يقول...

MǿиY El-Shreef: زمان بقى و الله ما كنا نعرف الفرق فعلا غير من حصه الدين ن
اس بتمشى و ناس تقعد لكن دلوقتى بنتى تسألنى هيا ليلى علوى مسيحيه؟
اقولها ليه تقوللى عشان مش لابسه طرحه على شعرها
دى فعلا مشكله ان الطفل يفهم الحاجات دى من السن ده
نورتينى يا مونى و ليكى وحشه

صيدلانيه طالعه نازله يقول...

عاشقه الرومانسيه :امييييين يارب العالمين

adel يقول...

ربنا يجمعك بصحابتك تاني

في بلدكم
وتحت نفس السما و مشئية ربنا الواحد اللي مؤمنين بيه مسلمين و مسيحين

صيدلانيه طالعه نازله يقول...

adel:ربنا يسمع منك و مننا كلنا دعانا اننا نفضل مع بعض تحت نفس السما
الدعاء اللى انت قلته ده احلى كلام ممكن يتقال فى ظروف زى دى
كل سنه و انت طيب

Ashraf يقول...

وانا بقراء قشعريره انتابت جسمى كله
مش عارف ليه
يمكن لانك ذكرتينى بايام الابتدائى وكنت فى مدرسة السلام (الامريكان سابقا) واحلى اصحاب واحلى صداقه واحلى ذكريات
ثم فى الكليه وكانت صيدلة اسيوط(نفس كليتك) وكان تضم الطلبه من كل الجمهوريه وكان اغلبية الطلبه مسيحين وكانت احلى صداقات سواء اولاد او بنات (احلى شقاوه ايضا بتاعة زمان)
الله يرحم زمان واصحاب زمان

صيدلانيه طالعه نازله يقول...

Ashraf:فعلا ايام زمان احلى ايام بجد و ده اتفق معاك عليه
و صعب اننا نلاقى الصحبه الحلوه دى دلوقتى خالص

همس الاحباب يقول...

كل سنة وانتم بخير
كل سنة ومصر بسعادة وحب ووئام
تحياتى

Tamer Nabil يقول...

كلنا مصريين سواء مسلم مسيحى وحكاية الكراهية دى مش موجودة يوجد بعض المشاكل تحدث عادى بين الافراد لكن لم تكون بين مسلم ومسيحى فى ناس بتولعها وتلعب بدماغ البسطاء باسم الدين ودول موجودين كتير من الطرفين

ان شاء الله تتجمعى مع صاحبتك تانى والف مبرروك ليها

مع خالص تحياتى

أم .. بوبه يقول...

انا معاكى فى الموضوع ده وانتى عندك حق وكلامك جميل

وعادى إن العالم يكون مختلط مسلمين ومسيحين وكمان جميل إننا نتقابل فى المناسبات العامة ونزور بعض ومش وحش خالص ولا مضر للصحة إن يكون للمسلمين أصحاب مسيحين والعكس

بس بصراحة أنا ضد محاولة خلط العقائد علشان نرضى بعض ونكون فاكرين إن ده إللى هيخلى صورتنا حلوةويعيشنا فى سلام

لأن الدين ده منهج حياة وعقيدة وأسس لازم يكون صاحب الدين ده مؤمن بيها ومصدقها كلها مش نص ونص ومفيش حاجة إسمها واحد متدين وواحد مش متدين وخااااصة لما تكون حاجة بتمس العقيدة وأساسيات الدين ... فبصراحة انا ضد التظاهر من بعض الناس أو الإعلام بالرضى والقناعة عن بعض الأشياء إللى عكس عقيدتنا تماما وكأن دى الطريقة الوحيدة إللى هتصلح بينا وهتخلينا نعيش فى سلام وده مبيكونش غير أخطاء فادحة بنقع فيها لا ترضى المسلمين ولا بترضى المسيحين ولا بيقتنعوا بيها

ومتفهميش كلامى غلط بالنسبة للعيش مع بعض شئ عادى انا إتولدت فى بيت أصحابه مسيحيين وكانوا بيحضروا أعياد ميلادى أنا وأخويا وكمان كنت بحضر معاهم أعياد ميلادهم .. وكنا فى حضانة ومدرسة واحدة وكنت بزورهم فى بيتهم وبيزرونا بإستمرار وباكل من أكلهم وهما بياكلوا من أكلنا..

وأكتر مدرسة كنت بحبها فى ابتدائى كانت مسيحية ومازلت بذكرها بالخير

إنما بجد أنا ضد إننا نخلط الأمور دى فى الأعياد المتعلقة بالدين وإللى بيكون وراها مناسبات تمس عقيدة الآخر سواء كنا مسلمين أو مسيحين لأنها مهما حصلت فهى عبارة عن مظاهر كاذبة .. وإن كانت مظاهر صادقة فده معناه مصيبة أكبر ومحدش واخد باله منها

واحدة مفروسة يقول...

انتى فين يا قمرة؟؟؟؟
استنيت تليفونك ولا عبرتيني
رحتى فين؟؟؟؟
و لا الاولاد مش سابوكي؟؟؟
ربنا يعملك الخير
و تلاقي ليليان
عمرنا ما حسينا انه فيه فرق ابدااا
منهم لله اللى خلقوا الفروق دبه
تحياتى ليكي يا قمرة

GHARAM يقول...

انا زيك كده اتولدت في بيت محدش مسلم فيه الا عيلتي ،،وكمان في حي يسكنه الأقباط وعمري ماحسيت بالتعصب ده بينا ،،،أكيد فيه ناس بتعلب علشان تفرقنا وتضعف مصرنا الحبيبة،وللأسف ضيق العقل تسيد تلك المرحلة في تاريخ بلدنا

I'm The CraZy One يقول...

hya dii 2l sadaka 2lii bgd :D :D


ta7eyatii

ستيته حسب الله الحمش يقول...

لسه كنت بحكي عند عادل قصة شبيهه
وقلتها كتير
وهي قصة فرحي اللي نصه كان في بيتنا
ونصه في بيت مراد جارنا
ربنا ياخد اللي بيأذوا الشباب على رأي محمد هنيدي
الا بالمناسبة
ليه لازم نقول اننا بنحب بعض وبيننا سلام اجتماعي؟
ماهو بينا فعلا
وليه لازم تتواجد جرايد مغرضه زي اليوم السابع معمولة بس علشان تهد بنيتنا الإجتماعية؟
ياترى مين له هدف يهدنا كده؟
ياترى هو بره فعلا ولا جوا منا فينا؟

بطوط حبوب يقول...

لما كلنا بنفكر كده اللى بيعملوا المشاكل منين
:-S
انا تهت ومش عارف افكر

صيدلانيه طالعه نازله يقول...

همس الاحباب :و انت بالصحه و السلامه و بلدنا بالامن و الامان

صيدلانيه طالعه نازله يقول...

Tamer Nabil :هيا المفروض بين افراد زى اى مشكله تانيه بس فيه اللى بيلمعها و يبلورها و يصدرها للكاميرا و يقولهم شوفوا فيه فتنه طائفيه فى مصر
و ساعات من كتر الزن بشك ان فيه فتنه و انا اللى نظرى ضعيف مش شايفاها
بس بعد كده بافوق و اشوف علاقتنا فى المدونات و الواحد عمره ما سأل مين مسلم و مين مسيحى الا اما بيعرف بالصدفه
ربنا يسترها على بلدنا

صيدلانيه طالعه نازله يقول...

أم .. بوبه : انا فاهماكى و الله و عارفه انتى قصدك ايه
انا طبعا ضد التنازل عن اساسيات الدين من اجل ارضاء الطرف الاخر
بس انا عايزه اوضح العلاقات كانت ازاى زمان و لغايه دلوقتى
انا امبارح بعد ما كتبت البوست ده رحنا زرنا ناس اصلا من نجع حمادى يعنى من معقل الازمه و متتخيليش الزياره كانت حلوه ازاى و مبطلناش ضحك و كلام حقيقى و مش مصطنع و لا متكلف من الاخر جاى من القلب عدل
نورتينى يا جميله

صيدلانيه طالعه نازله يقول...

واحدة مفروسة : روووووسه يا جميله افتحى الاوفلاين حتلاقى القصه و ما فيها
يا بنتى هايبر من غيرك و الله مالوش طعم
ههههههههههههههههههههه
زى ما انتى قولتى طول عمرنا فعلا ما خدنا بالنا مين ايه و مين ليه
مش عارفه ليه دلوقتى الناس شايطه فى بعض كده ليه

صيدلانيه طالعه نازله يقول...

GHARAM :سيبك انت انا مش عايزه اقول اشكر الازمه دى اللى خلتك تيجى عندى بس ادينى قلتها
المصيبه انه كل ما نقول الدنيا هديت ترجع تولع تانى و مش عارفه بس الدنيا حتوصل لفين و ازاى لاننا كبلد بظروفنا الحاليه مش حنستحمل اى فوره غضب زياده
بس الحمد لله انك رجعتيلنا تانى و انا مبسوطه و الله انك هنا
حمد الله على سلامتك و ربنا يرجعك لينا قريب معافاه ان شاء الله

صيدلانيه طالعه نازله يقول...

I'm The CraZy One:ميرسى على الكلمات الجميله
و نورتنى

صيدلانيه طالعه نازله يقول...

ستيته حسب الله الحمش:بصى يا توته مش حكايه اننا طول ما احنا قاعدين نقول اننا بنحب بعض لا
بس الواحد فى خضم المصايب اللى هو فيها و كتر الزن على ودانه من اللى حواليه بيحاول بجد يفكر نفسه و يذكرها انه مش زى الناس دى و انه لا تاريخه و لا تربيته و لا معتقداته تخليه يضرب اصدقاءه و احباب اصدقاءه
و بعدين مش جريده بس اللى ممكن تعمل كده لا دى طريقه تربيه من الاهل اتغيرت و للاسف للاسوأ
انا بنتى فى مدرسه مسيحيه و اخوها من قبلها و جت مره تحكيلى ان واحده صاحبتها بتقولها هو انتى مسلمه و لا مسيحيه راحت بنتى قالتلها مسلمه راحت قالتلها انا ماما قالتلى متلعبيش مع مسلمين بس انا حالعب معاكى و مش حأقولها
شوفتى المصيبه بدأت منين من طفله عمرها 5 سنين فى كى جى 2
طب انتى متوقعه من البنت دى اما تكبر تبقى ايه؟؟؟؟؟؟؟؟؟؟؟؟
انا بنتى اما تحط الكلام ده فى دماغها طيب مش تفكيرها اكيد مع الوقت حيتغير
المؤثرات كتيره يا ستيته بس بتيجى متباعده عشان كده مش بناخد بالنا منها غير متأخر

صيدلانيه طالعه نازله يقول...

بطوط حبوب :و الله و انا كمان و كلنا حسين بنفس التوهه و الغيظه و الغضب و مش عارفه الحاله دى حتخلص امتى

غير معرف يقول...

السلام عليكم
انا في مدرستي اكثر من نصف اللي فيها مسيحيات وكلهم لي بيهم علاقة طيبه
وبعد الغربه لسه في جزء منهم بيتواصلوا معايا لحد دلوقتي
بس انا مش هتكلم عليهم لان الكل اتكلم عنهم بما فيه الكفايه
بس في جزء منهم مش كدا خاالص وكذلك مننا كمسلمين
ودول مايستحقوش الكلام عليهم اصلا
لان في حاجات اهم من كل ده وهي:
ايه اللي وصلنا لكدا؟
وايه اللي افقد المسلمين التسامح مع الاديان الاخرى؟
ومين اللي زرع الفرقه مابينا؟
ومين اللي ديما بيشحن النفوس علشان تفضل ديما مليانه بحاجات وحشه اتجاه الاخر؟
والاكثر أهميه
مين المستفيد من كل ده؟
ياريت نفكر ونجاوب بموضوعيه ونحل بجد.
والسلام ختام
نوجه
او
بنت النيل

!!! عارفة ... مش عارف ليه يقول...

كل سنة وأنت وليليان بخير

ومفتكرش إن في حاجة ممكن تأثر علينا بإذن الله

لأن مصر مش مجرد وطن عادي

مصر حالة إستثنائية في التاريخ بمواطنيها مسلميها ومسيحيها

إحنا زي الأرابيسك عاشق ومعشوق

------
في بوست عند سووو أفتكر أنه هيعجبك

http://soooo-30.blogspot.com/2010/01/blog-post.html

وكل سنة وأنت وليليان
طيبين إن شاء الله مرة تانية

لولا وزهراء يقول...

اول زياره لنا
تشرفنا بزياتك وان شاء الله تتكرر الزيارات
على فكره داخلى اعتقاد ان المصريين كلهم اخوه مافيش فرق بين مسيحى ومسلم
ربنا يديم بينا الحب والاخوه
ده احنا لكنا بنشرب من نهر النيل
تصدقى بقى ان احلى كحك اكله فى حياتى كلها من عندا صديقات ماما الاقباط بيكون تحفه بجد

تسلم الايادى على الموضوع التحفه

زهراء

فشكووول يقول...

السلام عليكم

تصدقى يا صيدليه انك بنت محترمه

المشكله فى الادمغه المقفوله .. هنا وهناك

انا مثلك تمام لى اصدقاء مش عايز اقول اقباط .. الحقيقه مش مفروض نقول الكلمه دى خالص ولا كلمة مسيحى خالص .. لنا اصدقاء مصريين يدينون بالديانه المسيحيه .. واعز اصدقائى حتى الان منهم .. بس منه لله اللى عامل المشكلات دى كلها.

هما لهم مطالب مشروعه واحنا لناعندهم عتابات مشروعه .. بس لو نبطل نبوس فى بعض فى الاحتفالات ونواجه بعض بالحقائق كل حاجه تخلص ونرجع تانى نسيج واحد واحنا ما زلنا نسيج واحد بس اعتقد انه قد دخلنا فى مالا تحمد عقباه

تحياتى

نهر الحب يقول...

علاقة المسحيين بالمسلمين
علاقة فى الاصل حسمها سماحة الدين المسيحى
والاسلامى على حد سواء
هم دينهم يدعو للمحبة
ونحن نؤمن ان لكلا منا دينه
ولا اكراه فى الدين وان علينا حسن معامله اخواننا اهل الكتاب
كمان اننا تبرينا فى وطن واحد بل فى اسر كثيرة فى بيت واحد

الله يبعد عننا الفتن ما ظهر منها وما بطن
تحياتى وحبى لك

نهر الحب يقول...

صحيح هتشاركى معايا فى التدوينة السوداء ولا اية ؟؟

صيدلانيه طالعه نازله يقول...

غير معرف ;اللى وصلنا لكده مع بعض اللى عمال يقنع الناسفى العالم كله انه مع الاقليات و انهم دميقراطيه تدعم الشعوب المضطهده
بس دعمهم ده بيعتمد على وجود البترول و الدهب و غيره فى البلاد دى لو مش موجود بقى يدعكوا فى بعض براحتهم

صيدلانيه طالعه نازله يقول...

عارفة ... مش عارف ليه:حلو قوى مصطلح احنا زى الارابيسك دهفعلا احنا كده و اكتر
انا بقى باشوف اننا زى السجاد العجمى الغالى اللى عقده كتيره و متشابك جدا و احنا من كتر تشابكنا بيفكرنى بيه فعلا
نورتنى و كل سنه و انت طيب

صيدلانيه طالعه نازله يقول...

لولا وزهراء :ايه ده انا كمان باحب اعيد عليهم طبعا عشان اصحابى بس فيه سبب خفى و هو الكحك برضه
ههههههههههههههه
شكلنا حنتفق و حنبقى اصحاب
نورتونى و اشوفكم بعد كده كتير

صيدلانيه طالعه نازله يقول...

:فشكووول:المفروض فعلا نبطل حركات البوس و الاحضان قدام الكاميرات لانها حركات قديمه و مفقوسه الصراحه
و بعدين لازم نقعد مع بعض مش اجتماع مكبر و لا حاجه لا كل واحد عنده اصحاب و يتناقشوا فى اللى حصل و بيحصل عشان كل واحد يفضى نفسه و ينقيها و ميبقاش فيه رواسب سوده جواها
نورتنى و مبسوطه بجد ان حضرتك هنا

صيدلانيه طالعه نازله يقول...

نهر الحب:فعلا كلنا اتربينا فى عمارات شقه المسلم جنب المسيحى و ياما لعبنا مع بعض و احنا صغيرين و مينفعش اما نكبر نعض فى بعض
بخصوص موضوع التدوينه انا باختلف معاكى و رايى ان الجدار الفولاذى ده لازم فى الظروف الحاليه لان مخطط اسرايل فعلا يهدف الى تكسير سيناء و الاستيلاء عليها على مراحل و ضمها لغزه
و بصراحه ده فعلا بدأ من فتره بدليل الخرايط المغلوطه اللى كل شويه تظهر وتبين حدود مش صح للاراضى المصريه

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .