الأربعاء، ديسمبر 22، 2010

حاجه تقرف



اما اتعرض فيلم 678 الدنيا قامت ومقعدتش ان الفيلم اوفر و القصه مش عارف ايه

و اللى انتقدوا حسسونا ان اللى بيحصل فيه مش موجود فى واقعنا نهااااااااااااائى

و كاننا فى مجتمع ملائكى مفيهوش غلطه  او هفوه

بس اللى حصل فى المنيا يوم الاتنين بصراحه فاق كل التوقعات و الخيالات

اللى حصل بقى ان شويه شباب سافل و بصراحه ملهومش وصف غير كده

تتبعوا بنت رايحه مدرستهاو تعقبوها حتى دخلت مدرستها

و فضلوا واقفين قدام باب المدرسه و قاموا بتهديدها كمان

البنت اتصلت بوالدها و قالتله اللى حصل و جه و معاه مجموعه من اولياء الامور

و قام باطلاق بعض طلقات من مسدسه فى الهوا فالشباب دول خافوا و طلعوا يجروا

********************************************************

ده كان الخبر اللى اتنشر فى جريده الشروق امبارح و الحادثه كانت يوم الاتنين

الاسئله اللى جت فى دماغى اول ما قريت الخبر ده هيا

1-ازاى الشباب ده وصلت بيه السفاله و الوقاحه و قله الادب انه مش يمشى ورا البنت و بس

لا دول كمان وقفوا وهددوها على بابا المدرسه


2-ازاى مفيش بنى ادم من اللى ماشيين فى الشارع خد باله ان فيه بنت فى خطر

  و ان الاولاد قربوا يدخلوا وراها المدرسه


3-اداره المدرسه فين من كل ده؟؟؟مفيش بواب ؟؟؟؟؟مفيش مدرسين يشرفوا على دخول الطالبات؟؟

انا حسيت انها وكاله من غير بواب و محدش حاسس بحد بدليل ان البنت استنجدت بوالدها اللى فى البيت

مش مدرسين المدرسه


4-لو والد البنت اتأخر شويه و مجاش فى الوقت المناسب كان ايه اللى ممكن يحصل للبنت؟؟؟




انا عارفه ان كل واحد حيقرا الموضوع تساؤلاته حتبقى مختلفه بس دى اسئلتى انا شخصيا

مش لاقيه كلام اكتر من اللى قلته

بس بجد بقت حاجه تقرف

اه نسيت اقولكم اهم حاجه

ان البنت فى تانيه اعدادى و لابسه يونيفورم المدرسه

يعنى تقريبا لسه طفله مش ذات جسم مغرى و لا لابسه لبس خليع

ياريت تكون الصوره وضحت تماما

و لتالت مره 


حاااااااااااااااااااااااااااااااااجه تقرف




هناك 35 تعليقًا:

لــــ زهــــــراء ــــولا يقول...

علا

اول تعليق واعلنها احتلااااااااااال
اوعى تقولى حاجه تقرف

زهراء

لــــ زهــــــراء ــــولا يقول...

اكشن تانى تعليق

بالذمه حاجه تقرف حطى معها صوره تقرف بجد بلاش علامات الاستفام دى كلها هههههههههههه

عاوزه حاجه قبل ما اكلم احتلال قولى كل اللى نفسك هاهاهاهاها

زهراء

سندباد يقول...

كل يوم بنفقد حاجة حلوة في بلدنا ماكناش نتخيل انها تحصل عندنا حتي لما كنا بنسمع حاجة في بحري كنا بنقول الصعيد لسه بخيره لكن للاسف وصلنا لمستوي متدني في الاخلاق والمبادئ وبصراحة القادم اسوء لاننا انفلتنا اخلاقيا
وربنا يرحمنا

لــــ زهــــــراء ــــولا يقول...

علاااااااااا

المره دى اضم صوتى الى صوتك ان بجد بقيت مليون حاجه تقرف مش حاجه واحده بس احنا انتشر عندنا سياسة الانا ماليه يعنى كل واحد بيقول يلا نفسى

البنت استنجدت بوالدها لان ماحدش فى الشارع هيتحرك غير لو كان حد شهم بجد وانتى عارفه ان الشهامه بقيت عمله منقرضه واحنا كنا طالبين كميه نستوردها بس للاسف ماحدش عنده كفايه عشان نستورد منه ...

اللى بيعاكس مش بيعرف يفرق بين بنت او مدام او سيده كبيره فى السن او واحده حامل او معها اطفال اللى بيعكاس بيشوف انها انثى فيها تاء التانيث وبس

لما اتكلمتى عن ادارة المدرسه احب اقولك ان دلوقتى مابقاش فيه لا تربيه ولا تعليم صلى على النبى فى قلبك وبلاش تقولى حاجه تقرف لان الوضع كله بقى حاجه فله شمعه منوره

كفايه احتلال كده

زهراء

Maram يقول...

هي حاجة تقرف فعلاً..وخصوصا أن مبقاش في رجالة في الشارع يحموا البنات من العقول والنفوس المريضة !! بجد إحنا فقدنا حاجات كتير في مجتمعنا !!

reemaas يقول...

لا هو انا عندى تساؤل واحد ياعلا واحب اقول الاول مبسوطة انى عرفت اسمك

سؤالى بقى مين اللى قدر وجاتله الجرءة انه يقول ان دى حاجات اوفر والفيلم مش واقعى؟
ليه مابيمشيش فى الشارع؟
مابشوفش ان المحجبه والمنتقبه واللى بشعرها واللى مزوداها كل ماشى مش مامن على نفسه؟
اللى عنده القدرة انه يقول ده احب اقوله حضرتك نايم وياريت تصحى بقى

أنا - الريس يقول...

معلش يا صيدلانية
مش عايز اسب الحكومة
ولا الشرطة
ولا المدرسين
ولا أولياء الأمور بتوع العيال
أنا أسف
كبقية المجتمع
انا مليش دعوا ..
حكومة بنت ........

sony2000 يقول...

صلي علي النبي
دا اولا
ثانيا
اعرف ان بيحصل اكتر من كدا
بكتييير فأوي
وفأبتدائي
طب دا يتقال عليه أيه؟؟
نو كومنت بجد

SHAPE YOUR LIFE (ABOALI) يقول...

انسياب عقد الاخلاق حبة حبة
لابد ان يؤدى الى السفور وعدم الاكترات بمن فى المجتمع والتفاخر بالمعاصى
وده يسمى الفجور
علشان كده حالة الفوضى الاخلاقية
لابد ان يكون النهايات الطبيعة لها ما يحدث الان

الغريب هو ان يكون هذا فى الصعيد
الذى كان فى السابق يشتهر الغيرة وحماية بعضهم البعض

وده دليل ان السوس ودود انعدام الخلق
وصل الى المنبع حيث افتخار الرجولة والاصل والكرم

الحل بقى اننا نضم الصعيد بكل اللى فيه
الى جنوب السوادن
لانه جلب لينا العااااااااااار

هذا والله اعلم

لــــ زهــــــراء ــــولا يقول...

بجد احنا بقينا في حالة يرثى لها ..معرفش ازاي قدرنا نوصل للمرحلة دي؟
والفيلم واقعي واقعي


شكراً على طرحك لتلك الظاهرة

لولا

Kiara يقول...

والله ما بقت تفرق معاهم محترمة مش من محترمة دلوقتي بيعاكسو اللي خارجة من الجامع وكانها واقفه في شارع الهرم

ولا بقي يهمهم دين ولا نخوة ولا اي شئ اصلا

وكل اللي يرد عليكي لما تقولي معاكسة وقرف

يقولك سطر واحد محفوظ هي اللي خلتهم عملو كدا بلبسها
ولو لابسه نقاب يقولك اصلها بصتله والبصه خلته يعمل كدا

حاجه تقرف

Mona Hekal يقول...

حاجة تقرف كلمة قليلة قوي علي الوضع ده
ايه القرف ده فين الرجالة واضح انهم انقرضوا فعلا
الواحد مش عارف يقول ايه و الله
ربنا يهدي

خواطر شابة يقول...

عزيزتي الموضوع اصبح ظاهرة وليس حالات فردية لذا لابد من تحليل الاسباب والدوافع والبحث عن سبل للعلاج هذا من جانب ومن جانب اخر لابد من ايجاد عقوبات زجرية رادعة تحد من الظاهرة.
كفانا من توجيه التهمة للبنت دوما لانه عزيزتي حتى لو كانت ترتدي ملابس غير محتشمة ( لاحظي انك انت هنا حرصت على التأكيد انها بزي المدرسة) عزيزتي هي حتى لو كانت غير محتشمة فهذا لا يعطي لاحد الحق ليتحرش بها
دمت بكل الود عزيزتي ووقانا الله واياك من شرار خلقه

Unknown يقول...

موضوع يحير و يقرف فعلاً ازاي جوا المدرسه كده و في عز الضهر
طبعاً عندنا في شوارع القاهره التحرش حدث و لاحرج للأسف موضوع يوجع القلب
مفيش حل غير ان كل بنت يبقى معاها سلاح صغير تاخد حقها بنفسها
تحياتي ليكي

مدونة رحلة حياه يقول...

السلام عليكم
تفتكروا السبب فى مين او العي من مين
فرد اسرة مجتمع
فى حاجات كتير انهارت
وكل حاجة بتقع بتشد معها حاجات تانية اكتر
ربنا يطلعنا منها على خير

Foxology يقول...

يا دكتورة السوس ضرب فى كل حتة فى البلد والمشكلة مشكلة اخلاق فى المقام الأول مع انعدام شهامة فى المقام الثانى مهو انا لو شفت كدة هفكر مليون مرة قبل ما اعترض لأن زى ماهو معروف هتقطع ومش بعيد اتقتل مهى بلطجة ودمى هيروح هدر طبعا لأنها هتبقى بالكتير قضية ضرب افضى الى موت يعنى 3 سنين سجن للقاتل - لو اتمسك - وشكرا على كدة !!!!!
عرفتى ليه محدش بأة بيعترض ؟؟ مهو من شهر تقريبا شاب اتقتل بالسكاكين فى الشارع فى المطرية يعنى منطقة شعبية زحمة جدااااا وفى عز الضهر ومحدش حاش عنه بسبب انه كان شهم وحاول يحذر مواطنة من انها هتتسرق من واحد حرامى فى الاتوبيس نزل وراه ومعاه 2 تانيين وقطعوه فى وسط الشارع ومحدش فكر يهوب ناحيتهم !!!!

احنا ركبنا الزحليقةو اللى كان كان

zikooooo يقول...

هي فعلا والله حاجه تقرف
مبدئيا اعتقد مجرد اعتقاد خفيف انك قصدك في الاول فيلم حين ميسره صح؟

القرف الفعلي ان ممكن الشاب يعمل كده مع واحده بنت ناس
وميقبلهاش علي اخته طب ازاي دي؟
ربنا يستر

zikooooo يقول...

ههههههههههههههههه ي لهوي معلش انا اسف
فيلم حين ميسره ايه؟
انا نسيت انك كتبتي اسم الفيلم خااااااااالص
بس هو ده اول فيلم جه في بالي
شكلي بايخ اووووووووووووي
يريت تمسحي التعليق اللي فوق

Zouka's يقول...

ياساده هذه ليست بنهايه للانحدار

ولكن بدايه لسقوط كبير لم نتخيله او

نتوقعه

الحل ببساطه الرجوع الى الدين

والضمير والاسس العادات السليمه

والقديمه

ارحمنا يالله وسامحنا على ماقترفنا

ولا تؤاخذنا بما فعل السفهاء منا

واستر علينا وعلى ابناءنا واجيالنا

اللى جايه

مصطفى سيف الدين يقول...

فعلا حاجة تقرف

جهل وقلة ادب وقلة تربية

بصراحة مش عارف البلد رايحة لحد فين

شمس النهار يقول...

الاخلااااق

هو لسه في اخلاق

دي بقت موضه قديمة خاااالص

حسبي الله ونعم الوكيل


مابقاش حد عامل حساب انه هيقابل ربنا
وهيتحاسب
ولاعامل حساب (ولاتقربوا) الزنا
وحطتها بين قوسين
تقربوا يعني ماتعملوش اي شئ حتي لو متناهي الصغر علشان هو ده مدخل الشيطان للوقوع في الزنا
الدنيا مابقاش فيها امان
بعدنا عن عاداتنا وتقاليدنا وعرفنا واصولنا والدين
يبقا هنستني ايه بقا
عليه العوض ومنه العوض
وفعلا زي ماقلتي ايه القرف ده ه ه ه

اسماء عبدالعزيز يقول...

معلش ياقلبي يمكن البنت كانت حاطه احمر وشوية أخضر
ولاّ يحرام اليونيفورم بتاع الدرسة فوق الركبه

ولاّ ماشيه بكعب كباية تتدلع في الشارع

شوفي انتِ بتدني في مااااااااااااااالطه
واى تحرش يحصل
يولوا العيب على البنت

ماسمعتيش قبل كدا منى الشازلى في العاشرة مساء كانت جايبه طفله عندها 11 والده طفل صغير
من واحد قذر
طفله
فاهمه
11
واصبحت ام

فين الامان
نييييييييفر
فين الديـــــــــــن
غاااااااااااااب

مين المسؤول
؟
؟

كونى بخير

هبة فاروق يقول...

بجد مفيش لا ادب ولا احترام والناس اصبحت بلا مبالاة لانخوة ولا رجولة كل واحد ماشى دلوقتى جنب الحيط
حاجة تقرف بجد يعنى لو اختك او مراتك
مش حتجرى وتساعدها
مشكورة حبيبتى تقبلى مرورى

قلم رصاص يقول...

بالفعل حاجة تقرف والله جدا يادكتوره

مشكلتنا اننا بنعاني أزمة أخلاقيات شامله
عندك انا مثلا اعتبر ان ظاهرة التحرش في الشوارع دي ماهي الا شيئ طارئ على المجتمع المصري.سرعان ما اتى وسرعان ماسيزول ان شاء الله.

لكن اللي بجد محيرني جدا ، هل اختفاء النخوه والشهامه والرجوله من الشارع المصري أصبح ظاهره هو الاخر مثله مثل التحرش؟

ان كان هناك متحرشون..فأين الرجال واصحاب الشهامه على الجانب الاخر في نفس الشارع؟

فاكره زمااااااااان لما كان حد يبص لبنت مجرد بصه او يكلمها كلمه كان يهب كل شباب الحاره للدفاع والزود عنها وكانوا بيبقوا عاوزين ياكلوا اللي بيعمل كدا اكل؟!

بجد احنا ادام ظاهره محتاجه وقفه مع النفس لتدارك اسبابها الحقيقيه ووضع حلول جذريه ولو بشكل تدريجي لها.

ربنا يهدي الجميع يارب

شكرا يادكتور على البوست

عاشقة القمر يقول...

سلام عليكم
مفيش حاجه قول لها غير ربنا يهدية امه الاسلاميه جميعا ويحفظنا ويحفظه بنات امه الاسلاميه
يارب

Carmen يقول...

المشكلة الاولي والاخيرة غياب الدين
ربنا يهديهم وربنا يحفظ كل البنات من اي سوء
خالص احترامي لفكرك الرائع

دعاء عويضه يقول...

و الله عندك حق
بجد حاجه تقرف
و تقرف اوي اوي كمان

طيب كمان قولي البنت دي كانت ماشيه لوحدها
امال تقولي ايه على حادثة البنت اللي ماشيه مع خطيبها الظابط في الشارع !!!!!!!

و الكلام ده كان من فترة طويله اوي و حادثة كتير شفوها عندنا في الزقازيق
يعني ايامها ماكانشي الحوار ده منتشر زي دلوقتي
بس افتكرت الحادثه لما قريت البوست بتاعك

ضربوا خطيبها و تحرشوا بيها في وسط الشارع و الناس رايحه جايه عليهم و في شارع زحمة جدا كمان بس علشان المطاوي كله بعد و قال انا مالي

بجد حسبنا الله و نعم الوكيل
لانها بجد حاجه تقرف

من كل بستان زهرة يقول...

عادي عادي
ده الطبيعي خلاص لو يوم نزلت من البيت ومحصليش كده اتخض احس اني فيه حاجه غلط

وبعدين ناس مين الي يلحقوا البنت هو في حد دلوقتي بيبص وبيهتم
ده لو بنت بتدبح في الشارع ولا كأن في حاجه

احلى حاجه عجبتني انه الأب هو الي يجي يخلص بنته وكمان
و قام باطلاق بعض طلقات من مسدسه فى الهوا فالشباب دول خافوا و طلعوا يجروا

فين الشرطه الي كانت بتبقى على بوابات المدارس ايامنا
فين مدير او مديره المدرسه ايه البنت مقالتلهمش ولا قالت وخافوا هما كمان
اسئلة كتييييير
بس المهم فين الأجابات

غير معرف يقول...

حاجه تقرف فعلا

والمدرسه للاسف دورها سلبي .... بيخافوا ..

كان المفروض انهم يبلغوا البوليس .... لان البنت اتهددت وهي داخل المدرسه حتى لو الشباب بره

لكن للاسف محدش بيعمل اللي واجب عليه

اما الاهالي والحديث عن الشهامه ... فده ضاع نهائي

تحياتي

غير معرف يقول...

ربنا يتوب علينا

غير معرف يقول...

السلام عليكم
ازيك يادكتوره

فعلا حاجه تقرف
واللى يقرف برضه موقف الناس فى الشارع
المفروض الناس تتدخل لكن فيه ناس كتير باه عندها سلبيه رهيبه
رغم انه لو كل واحد قال انا مالى فللاسف انه معرض ان يبقى حد عزيز عليه –لاقدر الله – هو اللى بيتعرض لنفس الموقف

انا شخصيا لو حصل ولقيت معاكسه باتدخل
وموضوع بنت الاعدادى ده فكرنى مره كنت فى مشوار ولقيت مكروباس ماشى بسرعه ومساعد السواق بينادى على الطريق
ولقى بنت شكلها فى اعدادى فعاكسها والمكروباص ماشي
بصراحه ملقتش غير انى اشتمه وبصوت عالى عشان يسمع
وفعلا سمع ووقف المكروباص ونزلوا لى
وكاد الامر ينقلب لخناقه بالايدي بعد الالسنه
وتدخل ناس ومشى الميكروباص

اما اللى بيعمل كده فهو فعلا سافل لكن المشكله هنا انه بيتم محاربه اى حد عايز يصلح الناس
والاعلام عندنا بيشجع على كده

انا بصراحه مشفتش الفيلم ده ومش عايز اشوفه لانى متوقع اللى بيكون فيه
اكيد فيه طرق كثير لتوضيح الكارثه افضل من الطرق المعتاده اللى بيعملوا بيها الافلام اللى زي دي
ربنا يرحمنا
معلش طولت عليكي
ربنا يكرمك ويوفقك

هراء لا داعى له ..... يقول...

هو بغض النظر عن إن الأفلام رغم إنها أحيانا بتعرض قضايا

بس هى برضه من الحاجات إللى بتساعد على نشر الفتنة و الفساد فى الأرض بالممثلين و الممثلات و المغنيين و الرقاصين و الطبالين و كدابين الزفة إللى بنسميهم فنانين و هما مجرد مستفيدين و كمان طبعا مفسدين و جزء كبير من الكبت إللى ولد التحرش فى المجتمع اللذيذ بتاعنا دا هو الممثلين و ثقافة الأفلام




بس دا ميمنعش إننا مجتمع بيعشق إنه يشتغل نفسه و يخبى وشه و ميعترفش بالمشاكل

لحد ما تتضخم و تكبر

لإننا بنتربى على عدم الصراحة حتى مع نفسنا


يعنى المجتمع دا كله كبت و ضغط و فقر و جهل و أمراض نفسية و إجتماعية

و رغم ذلك عادى يعنى

إللى يشوفنا من بره كدا يفتكرنا بنى أدمين D:

richardCatheart يقول...

ازيك يا لالا وحشتينى جدااااااااااااااااااا


اه سمعت الموضوع واسترجلت ابوها اوى اوى ولاونى كان نفسى رصاصه تصيب بس يلا


لاء طبعا مافيش مدير للمدرسه ومافيش بواب ولا مدرسين

هو الولد اللى اضرب من زميله الصايع
فى مدرسه عندنا فى النزه بالمطوه وفى اثناء اليوم الدراسى كانت فين هيئه التدريس

للاسف تحسى ان النخوه والجدعنه والاحساس بالمسئوليه قلت فى المجتمع كا كل مش بس فى المدارس

حاجه تقرف فعلا والله
ربنا يرحمنا برحمته

Humman being يقول...

يا ريت صوتك يوصل للجماعة اللى عاملين شعار ورسمينه فى دائرة وكاتبين فيه (احترمى نفسك) .. وبيقولوا ان البنت هيه السبب فى قلة الأدب وهيه اللى عايزة الولاد يعكسوها

ربنا يرحمنا

محمد شلتوت يقول...

تحياتى ....هذا اول مرور بمدونتك
اما عن الفيلم فهو رائع وهو صرخة متاخرة علنا ننتبه ..... اما الواقع فهو اكثر ظلمة وانحطاط .
على جملة ما سافرت لم ارى مثيلا لما تتعرض له الفتاة والمراة المصرية من
تحرش وخدش للحياء وسفالة سواء فى الطريق او وسيلة المواصلات او العمل كل هذا ونحن ندعى التدين ...اقلها ان نزجر هؤلاء او نظهر غضبنا ولكن....خلاص الكل بقى مطنش ومكبر دماغه ....حاجة تقرف .

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .