الأربعاء، ديسمبر 15، 2010

ايه المطلوب من الاخر؟؟؟












هى:يا ساتر يارب على ده راجل داخل مكشر و طالع مزعق 


طب ادخل قول سلامو عليكم الاول و لا اى كلمه حلوه بدل لويه الوش دى




هو:يا باااااااااى على دى ست طول النهار تزعق فى العيال و تتخانق مع دبان وشها


و منكوشه و حالها ملخبط و مفيش ابتسامه على وشها الا اذا كانت عايزه حاجه او طلب


هى:طول ما هو فى البيت مكتوم و ساكت و باصص فى الجرنان او اللاب توب او 


مشغل الهبابه الجزيره


و متنح فى اخبار البورصه تقولش الاسهم و المليارات ماليه الدولاب


و اول امانخرج ونقابل ناس تبقى ضحكته من الودن دى للودن دى


 و ميبطلش كلام و رغى و هزار


ابقى باصاله و متنحه كأنه واحد تانى غير اللى انا متجوزاه




هو:على طول فى المطبخ و اما بتطلع منه تروح تتكوم


 و تنام و لا كأنى راجل موجود معاها و ليه احتياجات و متطلبات


و تزعل اوووى لو عرفت انى بصيت بره 


طب و دينى لاتجوز عليها و اجيبلها ضره تكسر عينها



اييييييييييييييه يا بشر؟؟؟

مش ده كلامنا كلنا مع بعض فى جلسات النميمه سواء الحريمى او الرجالى

اوعوا واحده لمضه و لا واحد مفترى يقول محصلش

كدابيييييييييييين فى اصل وشكوا


اللى عايزه اقوله النهارده بقى بعد كل الخناقات اللى شغاله دى

احنا عايزين ايه من بعض؟؟؟

كل ست عايزه ايه بصراحه و بكل امانه من الراجل اللى معاها

كل راجل يتمنى ايه يكون موجود فى الست اللى بتمثل نصه التانى ايا كان حلو او حادق بقى


انا كواحده ست كل اللى اتمناه من الانسان اللى معايا حبه هدوء و بلاش عصبيه

احتواء شويه اكتر  و تفهم زياده ان انا بتعب زى ماهو بيتعب

بس كل واحد بطريقته و فى مجاله

كلمه حلوه ,ابتسامه جميله مش لازم تكون بسبب و لا تكون قبل طلب حيطلبه

يحاول يخليها ابتسامه لله فى لله

معظم الستات مالهاش طلبات كتير و لو رسيت على البقين الحلوين

 حتى لو كانوا نفاق بتبوس ايديها وش و ضهر  وتقول الحمد لله

كده رضا,كده رضا ,مش عايزه اكتر من كده

ده اللى كان نفسى اقوله 

عايزه كل واحده و كل واحد يفكر كويس و يقول هو نفسه فى ايه

سواء الحبيبه من حبيبها

او الخطيبه من خطيبها

و اخيرا الزوجه من زوجها

بصراااااااااحه تامه و من غير زواق و تلوين فى الكلام

ياريت بسرعه و النبى عشان ورانا اشغال

هناك 80 تعليقًا:

لــــ زهــــــراء ــــولا يقول...

لوله

*************

انتى عامله اشراف على التعليقات ليييييييييييييييه كنت عاوزه اعمل احتلااااااااااااااااال

زهراء

شمس النهار يقول...

لو كل زوجين قعدوا مع بعض وكل واحد طلع اللي عنده واتفاهموا بحب وبالراحه

هتتحل حاجات كتير جدا

لكن كل واحد بيشتكي ومابياخدش اي اكشن

لازم نقعد ونتكلم ونسمع بعض

العيشه مش ناقصه

كل سنه وانتي طيبه

لــــ زهــــــراء ــــولا يقول...

لوله

تقصدى بمين لمضه دى اكيد انا عااااااااااا

يا بنتى انا ولا باسمع الكلام ده خالص مالص
انا باسمع اكتر منه بكتيييييييييييير بلاش اقولك باسمع ايه هههههههههه

بصى بقى نويت كده انى احتل المدونه دى لان حضرتك وجهتى البوست ده للمخطوبين والمتجوزين وحضرتك الباقيين يعملوا ايه يولعوا فيكم يعنى

زهراء

Mona Hekal يقول...

هههههههههههههههه
هاضحك الاول و لما افكر في الكومنت هاكتبه
طبعا ده حوارنا كلنا لبعض انا بقي عندي مش بيجيب الجزيرة بيجيب mbc action :((

اما بقه اللي عاوزاه من سيادته شويه اهتمام الحياة مش شغل بس في بيت وولاد و انا راضيه اكون بعديهم بس شوية اهتمام
ايه رايك فيا صريحة اهه

Carmen يقول...

فكرة جميلة حبي
انا عن نفسي بتمني 3 حاجات
حب
هدوء وتفاهم
حنان واحتواء

لــــ زهــــــراء ــــولا يقول...

علا

اخر كومنت ونتكلم بجد والله

اتمنى ان زوج المستقبل ان شاء الله يتكلم يعبر عن نفسه مش يشيل فى قلبه حاجه يحكى معايا فى كل حاجه وعلى فكره بادعى ربنا انه يكون صديقى قبل ما يكون زوجى نفضفض لبعض وكمان مش مهم مين فينا يبدا انا او هو المهم حد ياخد اول خطوه يتكلم يحكى على فكره قديما قالوا تكلم حتى اعرفك
بصى بقى باقى الطلبات هاقولها بينى وبينك مش امام حشود الشعب الهائله انتى فاهمه يعنى دماغى ;)

زهراء

سندباد يقول...

موضوع جميل يادكتورة احييكي عليه
القصة كلها بتتلخص في حاجتين
اولا كل واحد يعرف ايه اللي عليه وايه اللي ليه الجواز او الخطوبة او الحب حقوق وواجبات اذا كل واحد عمل اللي عليه بقلب وبحب الطرف التاني هايعمل اللي عليه برضه
ثانياالاحساس اذا احسست بمن تحب ملكته للابد
ده طبعا بعد اننا نتقي الله في تعاملتنا مع الطرف التاني
اسف علي الاطالة
تقديري واحترامي

لــــ زهــــــراء ــــولا يقول...

عايزة من حبيبي .. اني احس معاه بالامان
احس بالاحتوء
احس من نظراته وكلامه اني انا بجد فتاة احلامه.

احب لما اعمل اي حاجة مهما كانت مش حلوة قوي تعجبه من كل قلبه عشان انا اللي عملتها .

احبه يقدرني يحسسني اني تعبي حد بيقدره بلمسة حانية بضحكة صافية بأبتسامة شكر بنظرة اعجاب.

كلمة بحبك احب اسمعها من ثغره واشوفها في اعماله والمسها بأديا.

عايزة لما اكون حاسة بالوحدة في بعده حضنه عالم يساعني فيه والدفى يكون معاه وحوليه.



ولحد ما يجي واشوفه والمسه بمشاعري بقوله بحبك ياترى انت كمان بتحبني؟
لولا

غير معرف يقول...
أزال المؤلف هذا التعليق.
غير معرف يقول...

بعد اذنك يا لولو

زهراااااااء
بتحلمى يا حبيبتى
فى الاول يفهمك انك صحبته وكل شىء وبعد الجواز كللللللللللللل حاجه بتتغير
مش عايزة اعقدك بكرا تجربى يا اوختى
ههههههههههههههههههه

Unknown يقول...

المطلوب هو اللي انت قلتيه بالظبط و يمكن أقل (احتواء) (كلمه طيبه) (ابتسامه لله في لله) (أي كلمه مشجعه) (أي كلمه تقدير لمجهود ما)
و شوية ورد بقى على هدايا صغيره كده ألماز و لا حاجه أنا مش طماعه:)

لــــ زهــــــراء ــــولا يقول...

لوله
بعد اذنك ارد على ايمى الحب الجميل

يا قمرايه انا مش رضيت اقول نتشارك مع بعض فى مناقشة افلام الكارتون اللى باحبها قولت بلاش اعقد الدنيا هههههههههههههه
انا عارفه انها احلام بس خلى الواحد يحلم شويه من نفسه يا ايمى
بصراحه مش عارفه اشكر كل حبايب قلبى المتجوزين ازاى قدموا لى خدمات كتيره اوى ونفسى اردها لهم بس للاسف مش عارفه

زهراء

غير معرف يقول...

هيييييييييييييييصه
التعليقات اتفحت يا جدعان
كل واحد يقول اللى فى نفسه ومن غير خجل
يلاااااااااااااااا

غير معرف يقول...

لو على الكارتون دى مقدور عليها
ههههههههههههههههههههههه

سيبك انتى تعاليلى بس وانا افهك الحياة الزوجيه الصح يا اوختى

ههههههههههههههههههههه

مش هتندمى خالص
لانك ساعتها سوف تتراجعى وترفعى الرايا البيضا معلنه الاستسلام
ههههههههههههههههههههه

يا خراااااااااااااابى
قال نفسنا فى ايه قال

غير معرف يقول...

يا محلها عيشة الحريه

عارفه نفسى فى ايه

فى كنز كولا

ههههههههههههههههههههههه

صيدلانيه طالعه نازله يقول...

الحب الجميل


حاسه ان البوست عامل زى الدبوس اللى شكوا بيه بالونه متعبيه عالاخر
هههههههههههههههههههههههههههههههههه
انا خايفه عليكى يا ايمى
الغضب حماقه يا اوختى
وش مطلع لسانه

غير معرف يقول...

دا شكل البلونه اللى عندك فرقعت ساعت مما كتبتى البوست دا
هههههههههههههههههههههههههههه

وش فطسان على نفسه من الضحك

يخرب عقلك بتنكشينى ليه
ما انا كنت ساكته

الله يحرق اللى نفسنا فيه يا شيخه

ماليش نفس فى حاااااااااااااااااجه

ههههههههههههههههههههه

Flutterby يقول...

موضوع جميل اوي ..
انا بس شايف ان العلاقة مابين اي زوجين هي علاقة تكافلية ..
يعني لازم طرف من الأطارف يبدأ بالعطاء علشان الطرف الثاني لو عنده اي ظرف من ظروف الخجل او الأعتداد بالنفس وده بيبقي عند ناس كتير يبدأ يعطي حتي لو علي سبيل ان هو مش يبقي مدان للطرف المعطاء .. بمعني ان محدش يبقي ليه عندي حاجة .. طبعا هو ده اقل حاجة ممكن تحصل ..
المفروض ان النقاش يبقي هو حل اي خلاف مابين اي طرفين .. في أوقات الكلام مش بيجيب اي نتيجة وده شئ طبيعي لأن بيبقي فيه طرف دايما شايف ان هو اللي بيعمله صح وان علي الطرف الثاني تقبل الوضع علي ما هو عليه ..
في ناس تانية اللي بتديه بيبقي قليل بس ده بيبقي اقصي ما عندها وده شئ لازم حد من الطرفين ياخد منه موقف يا اما طرف يتقبل يا أما طرف يبدأ يغير منه نفسه ويبقي معطاء اكتر ..
هي الموضوع كبير اوي وانا لو
طولت اكتر من كدا هالاقي الشباشب تأتي من اللا مكان ..

انا شايف دايما أكتر صفة الواحد ممكن يتمناها في شريك حياته ان هو او هي يبقي بيراعي ربنا فيه .. دي في حد ذاتها بتخلي اي باب تاني للصفات .

يا مراكبي يقول...

الرجل يريد المرأة
والمرأة تريد الرجل
ولأن كلاهما يريد شيئا مُختلفاً .. فلن يتفقا أبداً

:-))

فكرة من الزمن ده يقول...

انا عايزةانه يفهمني
ويتقبل نقدي له زي ما انا هاتقبل نقده ليا لان ده مايقللش مني ولا منه
وانه يكون صديق ليا زي ما انا هاكون صديقة ليه يحب يشاركني كل اهتماماتي زي ما انا هاكون سعيدة اني بااشاركه كل اهتماماته واخليها اهتماماتي
نتكلم في الكورة والسياسة والجزر والبطاطس والاطفال والورد والرومانسية والدين والحياة وكل حاجة
مع بعض
ونحب اصدقاء بعض ونخليهم اصدقائنا
بس كده
تحياتي

غير معرف يقول...

السلام عليكم
ازيك يادكتوره
معلش انا عارف انى مقصر ومش بازور المدونة بتاعتك من زمان
لكنها مشاغل كتيره
(معلش باه عامل فيها مهم)

بس بالنسبه لموضوع التدوينه المره دي فده كلام مهم جدا بصراحه
وده بيحصل فعلا فى يمكن اغلب البيوت

لكن ممكن اضيف ان الصراحه حلوه فى الاوقات اللى زي دي
طبعا بالاضافه الى الاحساس بالاخر زي ماقلتى

الصراحه بتحل حاجات كتير لان ممكن يكون الطرف التانى مش واخد باله
وده احسن بكتير من ان يحصل تراكمات بين الطرفين سببها الاصلى سوء تفاهم

ربنا يوفقك ويسعدك

(احمد سكر ) يقول...

بيقولها يا حبيبتى انا راجع من الشغل جعان

قالتله يا حبيبى عندك سندوتشات حب ف التلاجه

المشكله .....

هى فعلا بجد بقت مشكله

ان الست بقت مشغوله عن الراجل

والراجل مشغول عن الست

والدنيا مشغولله عنهم

لا حب نافع

ولا تقليدى شافع

كله بقى محصل بعضه

ودا لظروف حياتنا

الرجل بقى عامل زى التاكس مش بيقف لازم يلف طول اليوم علشان يجمع البنديره

واللى بيجيبه الرجل مش مكفى البيت ومتطلباااته

يوووه

اما امشى


البوست جميل يا دكتوره تسلم ايدك

بس يارب يوصل واكون فاكر باسورد مدونتى

سمكه واحده يقول...

والله ياستي اللي انا بكتشفه واكتشفته من حكاوي اصحابي واقريبي وناس كتير
ان الراجل ما هو اللي طفل كبير
يعني ينضحك عليه وفاكر نفسه اييييييييه العاقل الرزين المضحي
بس سيبك انتي
اعتقد يعني ان احنا نقدر نضحك عليهم بس هما يدونا الفرصه بس
انا عاوزه ايه؟
عاوزه ادلع
هههههههه

سمكه واحده يقول...

المطلوب من الاخر ان كل واحد من الطرفين يعامل الطرف التاني علي انه طفل صغير يرضيه شويه ويحايله شويه ويطنش علي عاميله شويتين تلاته يصبر عليه شوياات كتير ويطول باله
بس والله
وانا اكتشفت ان الرجل طفل كبير
يبقي نتعامل معاه علي انه طفل
بس طويل حبتين (:

سمكه واحده يقول...

اه عاوزه اقول
محالها عيشه الحريه بجد والله
بس اوعي تردي وتقولي
ده قصر ديل يا......
بلاش احراج بقي وتكسفونا

Zouka's يقول...

والله العظيم دى فكرتى واسالوها

وشكرا

أيـــــام يقول...

المطلوب ان الاتنين يفضفضوا مع بعض من غير خوف وقلق ولما يحصل زعل كل واحد يقول اللي ف قلبه واللى زعلان منه وبالراحه وبشويش من غير خناق وزعل

بيتقال كلام اكتر من دا بكتييييييير

وبشوف ان كدا خلاص معدش فيه تفاهم بينهم مدام مش بيتكلموا سوا وبيشكوا من بعض وكل واحد كاره التاني لكن أهي الحياه ماشيه والمركب لازم تعدي البحر

reemaas يقول...

انا ياستى عاوزاه يشيل المسؤليه كده احس ان ورايا رجال اعتمد عليه
حنين ومتفهم وبيسمع ويحترمنى

غير معرف يقول...

ضاع الحب ضاع

ما بين المطبخ وقناة الجزيره ضاع


صباح الفل

من كل بستان زهرة يقول...

ههههههههههههههههههه
يعني احنا لو قلنا ايه الي نفسنا في حيتحقق يا دكتوره
ولا بنتعب نفسنا على الفاضي
انا معنديش استعداد اتكلم على الفاضي
ييكون في حاجه عملي
يانسكت احسن ونكمل على الحال ده

وعلى رأي نانسي هانم
فى حاجات تتحس ومتتقلش وان جيت اطلبها انا مقدرش
ولو انت عملتها بعد ما انا اطلبها يبقى مينفعش

وافضل علطول تعبانه مابين طب اقولك ولا مقولكش
مقدرش اقولك غير كل طريقة حبك ليا
او غير عليا ولا فجأنى فى مرة وهاتلى هديه
ا
مقدرش اقولك حلى الدنيا فى عينى وغير فيا

اعرف لوحدك شكل حياتنا اللى انا عيزاها

لازم يعرف لوحده

Zouka's يقول...

طيب ليه مانعملش معاهدة سلام كل شهر او كل اسبوع
يعنى خروجه او سينما او مطعم فاخر....
بس
المهم التطبيق لان الكلام سهل والزعاق
والخناق سهل
طيب ليه ما نقرأش قران او نشغله فى البيت طول مالطرف التانى متواجد بدل النت والتليفزيون والاغانى
وفى النهايه
كلكم راع وكلكم مسئول عن رعيته المرأه راعيه فى بيت زوجها
واللهم صلى على سيدنا محمد

SHAPE YOUR LIFE (ABOALI) يقول...

جميل جدا طرح الموضوع ده بتلك الرؤية الثاقبة
لانه هذا بالفعل ما يحدث
المطلوب من الاخر
اننا نقرب شوية من بعضنا
ونقول لبعض ايه اللى محتاجينه
وكلنا اكيد عارف الطرف التانى محتاج ايه
بس هو احساس انه هايبقى شخص تانى لو ريح الطرف الثانى

علشان كده محتاجين نشم عبير ونسائم بعضنا الاول
قبل ما نشم الروائج الغير مرغوب فيها
ونكمل مسامات بعض فى حنان وتفاهم
ونقدر اننا كلنا لينا مسئوليات وحقوق
نساعد بعض ونعذر بعض
ان قصرنا فيها لبعض الوقت
فلا احد يدرى ماذا واجه الطرف الثانى فى حياته اليومية
وكلنا ندرك ان الحياه مثل البحر
فيه الياقوت والمرجان واللؤلؤ
وفيه اسماك القرش والثعابين والاخبطوط

فنعمل العمل ونلقيه لله
يقينا سيرد علينا فى نور وضياء لا ندرى من حيث اتى


تقديرى لموضوع مهم
معلش بقى تعليق قصير علشان عندى كوب شاى اشربه

Zouka's يقول...

اعتقد ان الواقعيه (مثل هذا البوست)

احلى واجمل بكتيير من الرومانسيه

الجميله اللى بتكتبيها فى المرات

السابقه

وعموما اسألى المعلقيين وقولى ايه

راييك وايه رايهم بصراحه ووضوح

وشفافيه

وشكرا

مدونة رحلة حياه يقول...

السلام عليكم

أمامة بنت الحارث الشيباني توصي ابنتها ليلة زفافها:

أي بنية: إن الوصية لو تركت لفضل أدب لتركت ذلك لكِ ، و لكنها تذكرة للغافل ومعونة للعاقل.. ولو أن امرأة استغنت عن الزوج لغنى أبويها وشدة حاجتهما إليها كنتِ أغنى الناس عنه، ولكن النساء للرجال خلقن ولهن خلق الرجال.

أي بنية : إنك فارقت الجو الذي منه خرجتِ ، وخلفتِ العش الذي فيه درجتِ إلى وكر لم تعرفيه ، وقرين لم تألفيه ، فأصبح بملكه عليكِ رقيبا ومليكا ، فكوني له أمة يكن لكِ عبداً وشيكا.. واحفظي له خصالاً عشراً يكن لك ذخراً..

أما الأولى والثانية:
فالخشوع له بالقناعة وحسن السمع له والطاعة.

وأما الثالثة والرابعة:
فالتفقد لموضع عينه وأذنه..
فلا تقع عينه منكِ على قبيح ولا يشم منكِ إلا أطيب ريح..

وأما الخامسة والسادسة:
فالتفقد لوقت منامه وطعامه.
فإن تواتر الجوع ملهبة ، وتنغيص النائم مغضبة..

وأما السابعة والثامنة:
فالاحتراس بماله والإرعاء على حشمه وعياله..
وملاك الأمر في المال حسن التقدير ، وفي العيال حسن التدبير..

وأما التاسعة والعاشرة:
فلا تعصين له أمراً ولا تفشين له سراً..
فإنك إن خالفت أمره أوغرت صدره وإن أفشيت سره لم تأمني غدره..

ثم إياك والفرح بين يديه إن كان مهتما والكآبة بين يديه إن كان فرحاً
انا حبيت اجيب من الاخر واقول لكم اننا لو كل بيت اتطبق فيه دا اعتقد مش هتلاقوا اللى بتشوفوه دلوقتى

همس الاحباب يقول...

ههههههههه ههههههههه
كلنا فى الهوا سوا
ايه الكبت والحكد الطبقى ده يا شعب
يا نهار ابيض الدنيا مولعة ومحتاجين طفايات حريق فى كل بيت ههههه
مع الاسف اتفقنا على عدم الاتفاق ده اسلوب كل رجل وست فى الحياة
مع ان الموضوع سهل وبسيط وقالوا فى الامثال زمااان الممنوع مرغوب
وبكرة النكد بكرة حياة بدون نكد لا تساوى شىء هههههههههههه
تحياتى

غير معرف يقول...

مابيحصلش والنعمه :)

عمري ما بتكلم على الراجل ابدااااا .... لأنه لسه في علم الغيب :))

بس اوعدك لما اتجوز اقول البقين دول في اول قعده نميمه :)

بس على فكره لو الست محتاجه احتواء وكلمتين مكنش حد غلب

الزمن ده مش كده خاااالص

تحياتي

صيدلانيه طالعه نازله يقول...

لـــولا وزهـــراء

اديكى احتليتى برضه
و لا يهمك
المدونه مدونتك استعمريها و احتليها زى ما تحبى

منوره يا زهزهه

صيدلانيه طالعه نازله يقول...

شمس النهار

المشكله يا شمس مبقاش فيه وقت للكلام و النقاش
الراجل شغال طول اليوم عشان يكفى بيته و الست مطحونه فى البيت
يبقى فين الوقت
دى المشكله فعلا

نورتينى

صيدلانيه طالعه نازله يقول...

لـــولا وزهـــراء

الله الله جايه مدونتى عشان تولعى فينا!!!!
نهارك ازرق يا قمر
بس اما اشوفك
ههههههههههههههههه

صيدلانيه طالعه نازله يقول...

Mona Abo - Elso3od

و الله انتى مفتريه
مالها mbc action
بذمتك يا شيخه مش احسن من الجزيره
عالم مفتريه صحيح

صيدلانيه طالعه نازله يقول...

karmen
ربنا يديلك اللى نفسك فيه
نورتييييينى

صيدلانيه طالعه نازله يقول...

لـــولا وزهـــراء

امنياتم فى الشخص اللى تتمنيه حلوه اوى و مش صعبه
تعتمد بس على حسن الاختيار ومدى استيعابكم لبعض
ربنا يحققلك كل اللى تتمنيه

نورتييييييينى

صيدلانيه طالعه نازله يقول...

سندباد

طبعا بعد اننا نتقي الله في تعاملتنا مع الطرف التاني

دى اهم نقطه فعلا و اذا توفرت كل اللى قلته قبلها حيحصل

نورتنى

صيدلانيه طالعه نازله يقول...

لولا

الله عليكى انتى يا رايقه
كلامك النهارده فى الجووووووووووون يا لولتى
كلنا نفسنا فى اللى قولتى عليه ده بس مش اوى كده يا لولا عشان الدنيا كده مش حتنفع حبيبتى
حبه واقعيه عشان منرجعش نزعل

بحبك يا احلى لولا

صيدلانيه طالعه نازله يقول...

الحب الجميل

هههههههههههههههههههه
و بعد ما يحطك على جنب
حيحصل اييييه
ما تنطقى يا هانم
هههههههههههههههههههه

صيدلانيه طالعه نازله يقول...

الحب الجميل

اتفق معاكى وبشده
كلنا خدنا احلى صابووووونه فى النقطه دى خصوووووووصا

هههههههههههههههههههههههههههههه

صيدلانيه طالعه نازله يقول...

شيرين سامى

شوية ورد بقى على هدايا صغيره كده ألماز و لا حاجه أنا مش طماعه:)

ايووووووووون كده تعجبينى يا شيرى
اتفق معاكى وبشده اوووى جدا خاااااااااالص

نورتينى يا سكره

صيدلانيه طالعه نازله يقول...

لـــولا وزهـــراء

ردى يا قمر
هو انتى صغيره
عايزه اشوف مين حيخلص عالتانى
ههههههههههههههههههههههههههههههههههههههه

اسماء عبدالعزيز يقول...

ههههههههههههههههه
لا البوست المرادى .............اووووه

يدخل من الباب وهى قاعدة قدام مهند وسمر

هو :حياتى أنا جيت
هي:طيب ياقلبي
هو :غمضي عيونك
هي بلا مبالاه :اهه
هو:فتحي
هي تفتح تلاقي بوكية ورد تبص له بمتعاضه
:ميرسي ياحياتى كلك زوق
هو: عجبك زوقي
هي: ثوانى بس
هو : ايه ياعمرى مش هتيجي معايا نتغدى عند ماما
هي بعصبيه: قول كدا بأه وعشان كدا جايب الورد بدل ماتعزمنى على الغدا بره اروح اقعد فوش الست والدتك ..
هو : بلاش ياقلبي أروح انا
هي :استنى هنا .. مش شايف الرجاله بتعمل ايه اعمل زيه
ماتسبنيش وانا بتحرق
هو: يعنى اعمل ايه .. اطلب المطافي ولا اروح احب مرات عمي
بس تفتكرى هي هتبقى زى سمر وتوافق احبها..
هي : راجل معندوش احساس
هو: مريضه
هي: طلقني
هو: موتي


طبعا تخاريف مش عارفه هتعجبك ولا
بس من وحي البوست الهايل بتاعك
كونى بخير ياقلبي

صيدلانيه طالعه نازله يقول...

الحب الجميل

شوفتى بقى مش حارماكم من حاجه

عيشوا بقى

صيدلانيه طالعه نازله يقول...

الحب الجميل

ايوه و النبى يا ايمى
وضحيلها الصوره لاحسن البت مخدوووووووعه اخر حاجه

صيدلانيه طالعه نازله يقول...

الحب الجميل
مااااااااااشى بقى انا فرقعت فى البةوست
براحتك خااااااالص
بس اما اشوفك يا هانم

صيدلانيه طالعه نازله يقول...

Flutterby
في ناس تانية اللي بتديه بيبقي قليل بس ده بيبقي اقصي ما عندها وده شئ لازم حد من الطرفين ياخد منه موقف يا اما طرف يتقبل يا أما طرف يبدأ يغير منه نفسه ويبقي معطاء اكتر

***********
طبيعى جدا عشان الناس فى عطاءها ليها طاقه و قدره
مش كلهم زى بعض
و لو فهمنا النقطه دى و اتعاملنا معاها صح اكيد المشاكل حتبقى اقل كتير

اشكرك على رأيك المميز

صيدلانيه طالعه نازله يقول...

يا مراكبي

يظهر فعلا كده يا باشمهندس
عمرهم ما حيتفقوا

نورتنى فى اول زياره

صيدلانيه طالعه نازله يقول...

فكرة من الزمن ده

الله عليكى وعلى افكارك يا فكره يا جميله
هوووه ده الكلام الصح

ربنا يحققلك اللى نفسك فيه و اكتر شويه كمان

منورانى

صيدلانيه طالعه نازله يقول...

م/محمود فوزى

اهلا بحضرتك فى اى وقت

كلام حضرتك صح جدا المصارحه والمكاشفه
مبدا مهم جدا فى اى علاقه انسانيه مش فى الجواز بس

نورتنى

صيدلانيه طالعه نازله يقول...

(احمد سكر )

حلوه سندوتشات الحب دى
متعرفش بتتباع فين
حضرتك عندك حق
الدنيا بقت واخده الكل
الراجل فى وادى و الست فى واااادى تانى خااااااالص
ربنا يهدينا كلنا و يروق حالنا و يهدى بالنا

نورتنى

صيدلانيه طالعه نازله يقول...

سمكه واحده
هو فعلا طفل
بس طفل مدلل اووووى
و بصراحه الواحده مننا بعد ما بتجيب اولاد مش بتبقى عارفه تدلل مين ولا ميييييييين
و بتنسى نفسها خااااالص
بالنسبالك بقى
و عندك واحد دلع لسمووووووووكه و صلحه
تمام كده؟؟

صيدلانيه طالعه نازله يقول...

سمكه واحده

اخيييييييييرا اكتشفتى ان محلاها عيشه الحريه
ما قلنا كده من زمان محدش صدقنا
بنات عايزه الضرب صحييييح
هههههههههههههههههه

نورتينى يا سموكه

صيدلانيه طالعه نازله يقول...

Zouka's


ماشى يا سيدى
ربع جنيه على كل كومنت
مرضى يا سيدى و لا ايه النوظااااااااام؟؟؟؟؟

صيدلانيه طالعه نازله يقول...

أيـــــام

كلامك صح اووى

وواقعى جدا

ده اللى بيحصل فعلا
بنسكت عشان المركب تمشى

نورتينى

صيدلانيه طالعه نازله يقول...

reemaas

الى الاستاذ مجهول الهويه
ريماااس عايزاك تشيل المسئوليه و اما تتسند عليك متبقاش حيطه مايله

مبسووطه يا قمر؟؟
نورتينى

صيدلانيه طالعه نازله يقول...

مصري جدا

نفسى النايل سات ياخد خطوه جريئه و يشيل قناه الجزيره دى وكفايه صداع بقى

نورتنى

صيدلانيه طالعه نازله يقول...

من كل بستان زهرة

من الاخر الاغنيه دى قالت كل حاجه
كل الستات حست انها بتتكلم عليهم
و اعتبروها اغنيه مناااااسبه جدا نلقح بيها كلام على الرجاله
و خصوووووصا نقطه الهديه دى
ازيك بجااااااااا

نورتينى

صيدلانيه طالعه نازله يقول...

Zouka's

مواااافقه جدا على موضوع السينما والعشا ده
ايه رأيك نبدأ من النهارده؟
بس على حسابك
اتفقنا؟؟

صيدلانيه طالعه نازله يقول...

SHAPE YOUR LIFE (ABOALI)

علشان كده محتاجين نشم عبير ونسائم بعضنا الاول
قبل ما نشم الروائج الغير مرغوب فيها
ونكمل مسامات بعض فى حنان وتفاهم
ونقدر اننا كلنا لينا مسئوليات وحقوق
*************
محتاجين فعلا نشوف الايجابيات في بعضنا قبل ما ننكش وندور على السلبيات
محتاجين فعلا نطبطب على بعض و نحتوى بعض اوووى

كلام حضرتك كالعاده متفهم وواعى
و اسفين اننا عطلناك عن كوبايه الشاى

نورتنى

صيدلانيه طالعه نازله يقول...

Zouka's

ماشى يا سيدى
انت تؤمر

صيدلانيه طالعه نازله يقول...

مدونة رحلة حياه

الكلام ده هو دستور الحياه اللى كل ام المفروض تفهمه لبنتها المقبله على الجواز
لو الكلام ده اتطبق اكيد مش حتبقى فيه مشاكل خالص

نورتنى

صيدلانيه طالعه نازله يقول...

همس الاحباب

و الله انت دماااااااااغ و جبت من الاخر
الحياه من غير نكد ملهاش طعم فعلاااااااااااااااا

نورتنى

صيدلانيه طالعه نازله يقول...

فتاه من الصعيد

اوماااال الزمن ده ايه بقى
ما تقولى يا ست هانم
عايزه رد تفصيلى

صيدلانيه طالعه نازله يقول...

اسماء عبدالعزيز

ههههههههههههههههههههههههههههههههههههههههههههههههههههههههههههههههههههههههه

عجبنى طبعا
اصل هو ده التطور الطبيعى لاى نقاش اسرى يبدا بالورد
الست تقولك اكيد عامل عمله و جاى يعمل مقدمات قبل ما يعترف
يا اما عايز يطلب حاجه و جاى جايب رشوه
سيبك انت
محدش راضى بحاااااااااااااااله

نورتينى يا سمسمه

غير معرف يقول...

و الله انا بحاول اشوف الشيء الجميل و اغض البصر على غير ذلك و هي كمان بتبص لنصف الكباية المليان و و كل ده الحمد لله بتوفيق من ربنا و الحياة ماشية كويس و الحمد لله
أما اللي بيتصيدوا لبعض الأخطاء ربنا يهديهم و يتولاهم

Cute Kitty **sookra يقول...

اولا وحشانى جدا جدا يالولا
اخبارك ايه واخبار الدنيا معاكى
ثانيا حلو الموضوع دا
انا بقى بما انى عروسه جديده فطبعا مدلعه على الاخر ولسه ماشوفتش التكشيرات والحاجات دى
بس لو حصل
انا والحمدلله محضره سكاكين واكياس سودا كتير جدا
اصل انا موش بطيق الراجل المكشر دا
سلام ياقمر

Foxology يقول...

تعليقى هو تعليق شمس النهار :)

المصارحة بتبقى افيد من اى حاجة تانية مهما كان تأثيرها

تحياتى

Maha Shahen يقول...

يمكن الحكايه محتاجه اننا نعامل بعض زى ما بنعامل الضيوف نتحملهم مهما عملو نيجى على نفسنا شويه ونتعب شويه واكيد هنلاقى الطرف الاخر بيحاول بالمثل حتى لو معملش نحاول احنا اكتر على قد ما نقدر يمكن نوصل للحياه اللى بنتمناها
لأن كل شخصيه مختلفه ومتطلباتها مختلفه برضو بس يمكن معظمنا بيطلب يحس بالأمان واكتر منه التقدير والاهتمام واخير بيحلم بالحب اللى بيشمل كل المعانى والاحاسيس الجميله وبيخلى شعور التضحيه يزيد وبصدق مش رياء
واهم من كل دا يكون فى صراحه بينهم بزوق كل واحد يقول للتانى بأسلوب لطيف ايه مضايقه منه ولو حتى يلمح يعنى

صيدلانيه طالعه نازله يقول...

يوميات شحات

و الله انتوا عاقلين و زى الفل
ربنا يهدى الجميع و يبعد عننا المشاكل
امين يارب العالمين

صيدلانيه طالعه نازله يقول...

Cute Kitty **sookra

احب انا الستات اللى واخده حذرها دى
رغم الدلع و الرومانسيه الا ان السكاكين و الاكياس و السواطير موجوده و على اتم الاستعداااااااااااد

وحشتيييييييييينى جدا

صيدلانيه طالعه نازله يقول...

Foxology

هو فعلا الصراحه اول باول اهم و احسن حاجه فى كل العلاقات

نورتنى

صيدلانيه طالعه نازله يقول...

nour shahen

كلامك جميل وخليط بين الرومانسيه والعقلانيه
و لو تم تنفيذه اكيد الحياه حتبقى احسن كتير

نورتينى

Wise يقول...

كان ناقص تقولى فى اخر البوست
كنتم مع فاصل لاغلب البيوت المصرية
او مش المصريه بس
بوست دمه خفيف
دمتى بخير

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .