الأحد، أكتوبر 24، 2010

يا ترى ايييييه



مش عارفه فاضل ايه فى البلد دى مبقاش يخضع لقانون اللى تغلب به العب به

كل حاجه بقت كده و الواحد بقى حاسس انه منصوب عليه فى كل حاجه و اى حاجه

حتى الميه و الهوا اللى بنشربهم و نتنفسهم

محدش فينا مش بيغسل هدومه سواء فى غساله اوتوماتيك او عاديه

تقوم شركات المساحيق المنظفه تعمل اييييييييه بقى؟؟؟

تطلع لنا بافتكاسه المساحيق المركزه و اللى معاها بنستعمل 3/4 المكيال بدل مكيال كامل

و بكده نبقى وفرنا كتير فى الكميه

بس اللى مقالوهوش ان السعر بقى تضااااااااااااااعف جدا و التلاته كيلو بقوا فى حدود 45 جنيه

يعنى التغيير بقى للاسوأ وفرنا الكميه المستعمله و السعر غلى اووووى

يا فرحتى زغرطى ياللى انتى مش غرماااانه

طب ايه رايكم بقى انى و انا بتمشى فى مول من المولات لقيت مسحوق اوتوماتيك

منتج تبع الشركه اللى فاتحه الماركت اللى فى المول و مركز برضه

بيتباع بكام يا اخواننا ؟؟؟

الاربعه كيلو بعشرين جنيه و كل الناس بيشتروه عادى جدا و فيه ناس اشترته قبل كده و رايحه تجيبه تانى

معنى كده انهم جربوه و طلع كويس و جم يشروه تانى

طب انا عملت بنت ناس و لا و نووووووووو اكيد مش حلو و الكلام الفاضى ده

عقبال ما قررت اشتريه روحت تانى يوم لقيته خلص



اللى انا عايزه اعرفه دلوقت اييييه الفرق بين الاتنين؟؟؟؟؟؟؟؟؟؟

هل الرخيص فيه خطر على صحه الغساله؟؟؟؟؟

و لا الغالى بيطبطب عليها و بيحكيلها كل يوم حدوته قبل النوم

و لا انا اصلا اما بشترى المسحوق الغالى بدفع تمن الماركه مش اكتر

لكن المسحوق اللى جوا الكيس هوه هوا

ده السؤال اللى انا جايه اساله النهارده


يا ترى اييييييييييييييييييييييه؟؟؟؟؟؟؟؟؟

هناك 49 تعليقًا:

Ramy يقول...

فى الغالب

بتدفعى تمن الماركة يا دكتورة

مش عارف احنا زى ما انت بتقولى كدة

مضحوك عالينا

و هوا ايه فى البلد مغليش

دة حتى سندوتش الفول و الطعمية غلى

مفيش حاجة بترخص غيرنا

بس لو فى حاجة رخيصة ممكن تجربيها فى الأول لقتيها تفى الغرض خلاص اوك لقيتى لأ خلاص مخسرناش كتير دى نصيحة يعنى

momken يقول...

بصى يادكتور

الموضوع بيخضع لاكثر من بعد

اولا سياسه الشركه المنتجه فى استقطاب مستوى معين من المستهلكين
وبعدين تحاول تاخد -شير- من المستويات الاخرى

فى فئه من المستهلكين مؤمنين بان الغالى هو الكويس والرخيص اكيد مضروب

وى ناس على اد حلها زى حلاتنا بتقول اجيب الى على اد ايدى
بس لو النتجيه طلعت سيئه مش هنجيبه تانى ونرجع للغالى وامرنا لله

بالنسبه للمنتجات الى بتنتج باسم الهايبرات الكبيره غالبا بتكون الشركه المنتجه مش مشهور وكمان مش انت ناشيونال...وبيكون المنتج متواضع
ودى بتكون وسيله ترويج للمكان مش للمنتج
كمان المنتج مش هيكون دايم بمعنى انه هينقطع بعد البروموشن او عند اول خلاف بين الشركه المنتجه والهايبر

فى الاخر لولا اختلاف الازواق لبارت السلع

موضوع مهم فى ظل ازمه الاسعار الطاحنه

ممكن تكلمينا اكثر عن الطماطم


تحياتى

Ramy يقول...

بس مش عارف حاسس ان انتى و بتكتبى البوست كنتى مغلولة قوى

أنا - الريس يقول...

بعد السلام والتحية
أما بعد
من رئيس الجمهورية


أنا عندي اقتراح
انتي متغسليس وتتحرق الشركات اللي قاعدة تتحكم

أظرف حاجة رايح اشتري المسحوق تقريبا ال 8 كيلو لقيته تقريبا ب 100 جنية ومكتوب ان ده عرض لان سعره 114 جنيه

ومتفضليش فلوس عشان اجيب اندومي :(

تحياتي ليكي يا دك
انت وشعب مصر .

صيدلانيه طالعه نازله يقول...

Ramy

بلاش نفتح موضوع الفول و الطعميه يا رامى
اصل انا من الجيل اللى حصل السندويتش 15 قرش
دلوقتى السندويتش الاى كلام ب75 قرش و كمان بجنيه و كله حسب موقع المحل اللى فاتح
عااااااااااااااا

انا عقبال ما خدت قرار انى اجرب المسحوق كان خلص اصلا
يعنى مكسبتش حتى شرف محاوله التجريب

نورتنى يا رامى

صيدلانيه طالعه نازله يقول...

momken

انا اتفق معاك ان فيه ناس غاويه تجيب الغالى وخلاص حتى لو الرخيص كويس
منظره بقى و لا ايه مش عارفه

هو غالبا كان عرض فعلا و خلص و مكنش موجود منه تانى

كلامك بيدل على خبره جامده فى مجال التسويق و العرض والطلب

و بالتالى انت خير من يحلل لنا ويشرح و و باستفاضه الازمه الحاليه للطماطم

تحس انك اتدبست مش كده؟؟؟

ياللا بقى بالشفااااا

نورتنى

صيدلانيه طالعه نازله يقول...

Ramy

و اى غل يا رامى
اصل انا لسه جايبه مسحوق من الغالى
و ده كان الحافز ليا ان اكتب فى الموضوع ده

استحملونى بقى

صيدلانيه طالعه نازله يقول...

MR.PRESIDENT

اندومى ايه بس يا ريس
الجرايد و البرامج لسانها ورم من كتر الكلام على مخاطر الاندومى و انه مسرطن و انت زعلان ان مش معاك باقى تجيب بيه اندومى
لا احسن انه مش معاك

اما بالنسبه لموضوع اننا منغسلش ده
ياريت تبدأ بيه انت الاول و تقولنا بقى فى بوست عندك
ايه الاخبار بعد ما بطلتوا غسييييييييييل

تحياتى

Unknown يقول...

واضح بجد إنك مفقوعة قوي...

واللي في حالتك ما ينفعش الواحد يواسيها..

أحسن له يسمع ويخليكي تفضفضي..

المهم يعرف إن فيه حد سامعه، وإن الهم اللي طايله طايل الكل.. (طبعا أنا لا أشعر بهذه الأمور، زوجتي هي اللي بتتفقع هذه الفقعات "إن جاز التعبير")..

بالمناسبة واضح إن غسيلك زي الفل أهه.. أمال زعلانة ليه..؟ :)
تحياتي أختي الكريمة..

Zouka's يقول...

يا جماعه زعلانين ليه؟؟؟؟؟؟؟؟

انتوا ناسيين

اخنا بلد عندنا قوانين وجمعيات جماية المتسهلك

مش كده و لا ايه؟؟؟؟؟؟؟

لــــ زهــــــراء ــــولا يقول...

عــــلا

-*-*-*

هههههههههههههههههههه اسمحى لى ان اطلق ضحكه سكندريه ذات صوت عالى

يا علا احنا فى زمن مظاهر مسحوق غساله ايه اللى ايه تحكى عليه ومركز ومش مركز احب اقولك انهم كلهم فى النهايه شبه بعض المستورد شبه المحلى شبه كله مافيش حاجه بتشيل البقع ومافيش حاجه ريحتها حلوه ...

انتى اتكملتى على مساحيق الغسيل لكن احب اقولك ان كله بقى كده
لما اخدت كورس الدعايه عرفت ان فى حاجه اسمها عوامل جذب يعنى تخلى المنتج بتاعك اللى مش يساوى 3 ملاليم يبقى نمره واحده بشوية حاجات مبهره وبما اننا شعب بيحب المنظره وتلاقى كل واحد بيقول انا جايب حاجه ماركة كذا وهو اصلا مش فاهم الماركه دى تعنى ايه يعنى السوق المصرى شغااااااااال الله ينور بيشفط اى حاجه وتتباع هوا وكل حاجه ولها الزبون بتاعها
اكرر احنا شعب منظره بيحب يجيب من الماركات بس لازال فى شريحه مش لاقيه حتى تجيب هدوم عشان تغسلها دول بقى ربنا يرحمهم ويرحمنا معاهم
باقولك يا دكتوره بما انك شكلك كده حاجه خلاصه لاصه فى موضوع الشراء والبيع شوفت تلاجه ب 17 الف جنيه كنت عاوزه اسالك ياترى عليها كيس مسحوق هديه ههههههههههههههههههههههههههههههه

والله انتى سكره وفله

زهراء

صيدلانيه طالعه نازله يقول...

ماجد القاضي

ايه يا جماعه مالكم؟؟؟
محسسينى انى مقطعه روحى من العياط
ده جزائى انى بعرفكم اللى بيحصل فى الدنيا
ماااااشى ماااااااشى
و بعدين يا استاذ ماجد ماهى الفقعات اللى المدام بتدفعها دى
ماهى اكيد بتمويل من سعادتك
و لا ايييييييه

نورتنى

صيدلانيه طالعه نازله يقول...

Zouka's

يعنى نعمل ايه بقى
و نشتكى لحمايه المستهلك على اساس ايه و نقول ايه
محدش نصب علينا و لا حاجه
الغالى موجود و الرخيص موجود و محدش بيضرب حد على ايده عشان يشترى ده او ده

نورتنى

صيدلانيه طالعه نازله يقول...

لـــولا وزهـــراء

حتقوليلى يا زهرا على الدعايه
انا جوزى بيشتغل فى مجال الدعايه بس للادويه يا حبيبتى
و صدقينى و الله و الله مش يفرق كتييييير
هههههههههههههههههههههههه
بصى
غيرى الكلام لاحسن نضرب
هى دى فنون الدعايه
ازاى تخلقى من الفسيخ شربات
و ان كان عندى الفسيخ احلى بكتير من الشربات

بالنسبه للتلاجه بقى دى عليها 3 كيلو طماطم هديه يا ناصحه
دى تلااااااااااجه مش اى كلام
يعنى الهديه بتاعتها لازم تكون حاجه قيمه

نورتينى يا قمرايه

حلم بيعافر يقول...

ابقوا احكوا الكلام ده تحت القبة

ادينا عملنالكم كوتة

غير معرف يقول...

انتخابات بئا يا باش مهندزه

واللي بيدفع قرش بيلمه عشره جنيه

همسات وبحــ الحياه ــر يقول...

سؤال بيطرح نفسه
وبم انك قولتى زغرطى ياللى انت مش غرمانه فانا من مزنقى هذا هزغرط ههههه

وبعدين تعالى هنا يعنى انت سبتى كل حااااااجة غليت وبتتكلمى فى المسحوق
بصى دى بتبقى سياسه
اصل بتوع الاعلانات دول ولاد ابلسه
بيعملوا الاعلان يخليك وانت مغمض تروح تشترى المسحوق

ومعايا عرض جديد من الحاجة لهلوبه
واللى بعد تجارب وصلت الينا بالمسحوق الجديد بأعجوبه

مسحوقنا ولا فى الاحلام
بيطلع البقعه من غير كلام
مع مسحوق عجيبه
هتشوفى نتيجته فى دقيقه
والسعر حقيقه مش خيال
بجنيه ونص الكيس مش كلام عيال
يالا يام احمد اشترى
يالا يام فاروق صدقينى هتندمى
ههههههههههه

وابقى عدى وسلمى عليا
:):)

adel يقول...

مفيش فرق في الغالب هتلاقي الارخص افضل
دي مش بتبقي خاضعة غير لاسم المنتج
يعني مثلا بيبسي وكوكاكولا اللي في مصر اسوء انواعهم عالميا ولو حصل ودوقت اي شئ مستورد منهم او حتي سعودي هتعرف الفرق تماما
وكذلك كنتاكي وماك وغيرهم
الفرق في الاسم
يعني انا مثلا بموت في اكل عم حسني وشايفة انضف مليون مرة من كنتاكي اللي مش باكل منه ابدا
مع ان عم حسني ارخص وممكن ناس تقرف منه عشا بس مصري مع ان المصري اللي بدأ من الشارع عنده سلسلة محلات انضف و اطعم كتير من اللي اخترعوا الاكلات دي
بس عقدة الخواجة بقي
واللي هي خليتك تشتري الماركة :)

غير معرف يقول...

زغرطى يالى منتش غرمانة
لوووووووووووووووووووووووولى
ههههههههههههههه
يا ستى شدى الغسالة العادية بتاعة ستك وستى وابعتى جيبى باكو اريل ولا برسيل بجنية وابعتى واغسلى وادعيلى مش تدعى عليا من قطمة الوسط
هههههههههههههههههه
هههههههههههههههههههههه
كل حاجة غلت يا ماما واحنا بقينا رخااااااااااص اوى عند اصحابها

ربنا معااااااااانا

Zouka's يقول...

fفعلا الشركات دى بتحقق مكاسب خياليه

واعتقد ان فيه غساله يابانى بتستعمل مسحوق عادى

فيه حاجه غلط

ياحنا يا هما

بنت بتحلم يقول...

اكيد بتدفعى تمن الاسم بتاع المنتج

السؤال سهل والاجابه اسهل باجماع الاراء
(:

BNT ELISLAM يقول...

احلى ماقولتى اننا هنفضل كده انا وحضرتك
وهو وهى وكلهما وحنا كلنا حابين نبقى ساكتين بنشوف السرقه بعيونا ومبنتكلم


اما بنسبه للمسحوق انا لسه معرفش فى الشراء وكده
وربنا يكرم واكن مستقله بيبتى واتخم برحتى

ويكا يقول...

ماله الصابون المبشور بتاع ستى وستك؟

والزهره والتلوينه ..... احلى كلام

ولا الطشت ابو رغوه .....

دا الست نانسى بجلالة قدرها .... غسلت لبسها ولبس جوزها والمزاعيد عيالها فى الطشت ده ، وبكل ثقه عملت الكلام ده على الشاشه وكان تعليقها اكثر ثقه (اه ونص ) ، على فكره هى كانت تقصد اه بغسل فى الطشت ونص

قلم رصاص يقول...

اتفق مع رأي عادل

^_^

غير معرف يقول...

بتدفعى تمن الماركة دى حاجة

وبرده بتدفعى تمن المستوى الاجتماعى يعنى مثلا الهدوم اللى تبقى فى محلات مشهورة هى هى اللى بتبقى فى المحلات العادية بس الللى مستوى اجتماعى ومركز بقى مش ينفع يروح للمحلات العادية وبرده الاكل نفس النظام

و كمان بتدفعى تمن الاعلانات اللى صبح ليل شغالة عشان تقنعك ان ده احسن وانه هينفظف اكيد مش هتحاجى تشترى مسحوق جديد وتجريبه ويا نفع يا منفعش يا بوظ الهدم يا نظفها
وزى ما بنقول الغالى تمنه فيه

الناس دى بتحسبها كويس مش بيدفعوا فلوسهم ع الاعلانات كده وخلاص

Noha Saleh يقول...

فعلا بندفع تمن الماركة
المسحوق اللى بتقولى عليه ده انا جربته هو فعلا مسحوق حلو وزى المساحيق التانية مفيش فرق خالص غير فى السعر بس
وفى سوبر ماركت كتير بقت تتجه نفس الاتجاه وتعمل مساحيق بإسمها

Carmen يقول...

عجبني اوي الجزء بتاع بيحكيلها حدوتة وينيمها دي ^_^
انت بتشتري اسم ماركة
اكيد شركة كبيرة مش زي مسحوق سايب جاي في شوال
بتدفعي تمن الدعاية والاعلانات والعبوة المتكلفة وغيره
لفت نظر هايل تسلم ايدك

من كل بستان زهرة يقول...

في ايه يا دكتوره
مالك قلبه على البلد كده ليه
الله انتوا الي مش معاكوا فلوس ليه

وبعدين كان لازم بنت الناس تظهر دلوقتي لقيتي حاجه رخصيه اجري هاتيها
اوعي يا دكتوره تكوني بتعملي كده لما تشوفي طماطم رخيصه

والله كله زي بعضه برسيل اريال .....
كلهم شركه واحده

معلش تعيشي وتدفعي فلوس أكتر
مع تحياتنا لكي بحياة غاليه
الحكومه

شمس النهار يقول...

شوفي ياستي
الفرق في المواد المستعمله
وانتي ست العارفين

يعني هنا مستعملين مواد رخيصه بتغير علي المدي لون الملابس
والغالي مواد اغلي بتحافظ علي النسيج واللون بتاع الملابس

اما الغساله بده او بده
لازم كل فتره تعملي لها دورة مياه مضاف لها زجاجة خل
وتختاري دوره قصرة وطبعا الغساله فاضيه
بتزيل اي ترسيبات علي الغساله من جوه وبتطيل من عمرها

اي خدمة ياجميل

:))

صيدلانيه طالعه نازله يقول...

حلم بيعافر

و انت بقى اللى عملت الكوته و لا ايه
وضح بس عشان اعرف ارد عليك

نورتنى

صيدلانيه طالعه نازله يقول...

مصري جدا

ممممممممممم
تفتكر؟؟؟
ده كان عرض فى هايبر ماركت كبير
ماله و مال الانتخابات
بس برضه احتمال
كل شيىء حاليا بقى وارد

نورتنى

صيدلانيه طالعه نازله يقول...

همسات وبحــ الحياه ــر

هههههههههههههه
و الله انتى سكر
بس هو ده فعلا اللى بيحصل
كل المساحيق زى بعضها بس التلميع و الورنيش الاعلانى بيعمل شغل

كمان عايزه اعتذرلك عن الكلام اللى علقت بيه البوست اللى فات
افتكرتك سكره عشان كده سالتك عن البيبى

تقبلى اعتذارى
نورتينى

صيدلانيه طالعه نازله يقول...

adel

اى حاجه فعلا من ااى ماركه تصنيعها بره
غير عندنا نهائى
كل اللى سافر قال كده
انا كمان اتفق معاك ان بعض المطاعم المحليه احلى بكتيييييير من كمنتاكى وماك وامثاله
و عندى راى
ان كل وقت بيبقى ليه الاكل المفضل فيه

نورتنى يا عادل

صيدلانيه طالعه نازله يقول...

الحب الجميل

زغرطى يا اختى زغرطى انتى شكلك عايزه تموتينى
غساله يدوى ايه بس
اللى عايزانى اشغلها يا ايمان
شكلك ناويه عليا
هههههههههههههههههه

نورتينى

صيدلانيه طالعه نازله يقول...

Zouka's

فيه غساله نزلت بقى
مش بتستعمل مسحوق خالص
ازيك بجااااااا

صيدلانيه طالعه نازله يقول...

بنت بتحلم

و كمان بالاجماع
اذن موافقه
هههههههههههههه

منورانى يا قمر

صيدلانيه طالعه نازله يقول...

BNT ELISLAM

مين قال متكلمتش
ما انا بتكلم اهه امال كل ده ايه بس

انا صوتى اتنبح من الخناق

مستنياكى بعد ما تنزلى لمعترك الحياه و نشوفك بقى حتعملى ايه

صيدلانيه طالعه نازله يقول...

قلم رصاص

و انا كمان متفقه مع عادل

نورتنى

صيدلانيه طالعه نازله يقول...

star in the sky

انا اتمنظر اذن انا موجود
كلامك صح جداااااااااااا
هو ده اللى حصل و بيحصل دايما

صيدلانيه طالعه نازله يقول...

Noha Saleh

هو فعلا بقى اتجاه معظم الماركت الكبيره

ميرسى لمرورك الكريم

صيدلانيه طالعه نازله يقول...

karmen

دى حقيقه عروفه
زى الخضار اللى تشتريه من عربيه يد مش زى اللى بتشتريه من محل
المحل بيكون اغلى

نورتينى

صيدلانيه طالعه نازله يقول...

من كل بستان زهرة

هو فعلا انا اللى غلطانه و استاهل الضرب كمان
انا محقوقالكم كلكم و للبلد كمان

ها مبسوطه كده
ارتحتى يا ستى
هههههههههههههههه

صيدلانيه طالعه نازله يقول...

شمس النهار

اتفق معاكى ان المسحوق الغالى بيراعى الانسجه


بس معلومه الخل فى دوره الغسيل دى جديده عليا
انا كنت بعملها بميه بس
و اشغل التسخين

منكم نستفيد
ربنا يباركلى فيكى حبيببتى
نورتينى

Foxology يقول...

اللى حضرتك مش واخدة بالك منه ان كل الماركات تقريبا تبع نفس الشركة !!!

ايريال - تايد - وغيرهم ماعدا برسيل تبع هنكل بورسعيد !!!

ولا عزاء للمكسب النظيف

تحياتى

صيدلانيه طالعه نازله يقول...

ويكا

ممممممممممممم
تفتكر نانسى كان قصدها كده فعلا
بس انا مش نانسى يا عم

k,vjkn

Alaasalim2 يقول...

السلام عليكم

بصراحه الموضوع عايز تجربه
يعني لازم تجربي النوع الأرخص دا وتشوفي النتيجه
لو فعلاً زي بعض يبقى إحنا فعلا بنشتري إسم الماركه مش المسحوق نفسه

بس المهم تعرفينا النتيجه في الآخر
:)

richardCatheart يقول...

ازيك يا لالاوحشانى والله
ونفسى اخبط فيكى معلش الامتحانات اليومين دول عمله قفله معايا

الاجابه على السؤال تونس

طبعا هو ابو عشرين مش بنفس جوده ابو 45

بسش بردو الفرق مش كبير علشان السعر يفرق كده
قولى لو ابو عشرين هايتباع بره ممكن يوصل ل 30 مش اكتر
انما اللى حاصل انت قولتيه فرق السعر لفرق الماركه وفى الاخر كل بينضف
زى ماتروحى تشترى شميز من محل جنبك واخوه من محل علامه فى البلد تلاقى فرق السعر بيوص للضعف علشان اسم المحل
وكله على قفى الزبون
نصحتى جربى ابو عشرين انا جربته وطبعا زى كل الناس جربت ابو 45
وكله شغااااااااااال يونيفرسل

تحياتى ليكى وربنا يسهل ونتقبال فى اى حته ان شاله تحت بير السلم

إيمان يقول...

هههههههههههههههههه
عسل كلامك اوى يادكتورة لولو
وحشتنى والله مواضيعك
لووووووولوى زغرطى ياللى ماانتيش غرمانه
كلنا هنصوت لاننا كلنا غرمانين
بوست جميل اوى
تقبلى مرورى

صيدلانيه طالعه نازله يقول...

Foxology

يبدو ذلك فعلا

المعلومه دى اتكررت كتير

نورتنى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .