قاهره الموبايلات

بقالى كتير مكتبتش حاجه و لا اتكلمت معاكم و لا حكيت و رغيت

اصلى بصراحه بقيت بحكى اكتر عالفون

طبعااااااااااااااااا و متكلمش ليه مهو المكالمه بقت حاجه ببلاش كده

الساعه تقريبا بقت بحوالى اقل من الجنيه بشويه

و كل ما تشحن تاخد دقايق مجانيه و رسايل مجانيه برضه

و النتيجه ان الواحد بقى طول النهار و الليل حاطط التليفون على ودنه

انا قربت انام و انا حاطه الفون على ودنى عشان احلم بحلم ناطق

ههههههههههههههههههههههههه

و طبعا اكيد كل الحاجات دى تكون ليها خساير تانيه غير تمن المكالمه

اول خسايرها انى حرقت شاشه موبايلى الجديد اللى مش كمل تلات اسابيع

و اما كشفوا عليه فى الصيانه قالوا انهم لقيوا جواه سوائل

طبعا السوائل دى هيا العرق اللى بيلمس التليفون من وشى نتيجه الحر و الكلام الكتير

و بسبب السوائل دى التليفون اتصلح على حسابى مع انه  لسه فى الضمان

و دفعت مبلغ و قدره

اللى فهمته بعد تفكير عميق فى الموضوع ده

ان التليفونات دى متصنعه عشان الناس تتكلم فيها بالكتير خمس دقايق و تقفل

لكن بعد العروض الكتيره االلى بقت موجوده و اللى وصلت لسعر الدقيقه انه يكون 

اقل من خمس قروش بقت الناس بتحكى براحتها و مش يهمها حاجه

فين ايام ما كانت الدقيقه باتنين جنيه و كان الواحد يتكلم كل الدقيقه و هو باصص على العداد

لاحسن يدخل فى الدقيقه اللى بعدها

بس ايامها لا كان فيه تليفونات بتبوظ و لا حد بيجيله مشاكل فى ودانه و لا حاجه ابداااااااااا

و دلوقتى بقى احب اوجه نداء لشركات المحمول

ارفعوا اسعار المكالمات تانى  الله يكرمكم