الأحد، أبريل 18، 2010

يا براكينك يا ايسلندا






كلنا طبعا سمعنا و شفنا موضوع بركان ايسلندا

و عرفنا موضوع الرماد اللى ملا الجو هناك 

و عطل حركه الملاحه الجويه من العالم كله لبريطانيا و العكس

و اللى اضطر انجيلا ميركل مستشاره المانيا للهبوط بالطياره بتاعتها 

فى البرتغال و اكمال الرحله لالمانيا بالقطار لنفس السبب



الموضوع ده اما فكرت فيه حسيت انه حيبقى ليه تأثير بيئى حيمتد 

اثره و يوصلنا ان اجلا او عاجلا

دلوقتى البركان ده مكانه فى وسط التلج اللى فى القطب الشمالى

طيب اما درجه حراره الارض اللى تحت التلج دى حترتفع 

نتيجه انفجار البركان

التلج طبعا حينصهر و بدرجه كبيره و بمعدل سريع

طبعا ده حيؤدى الى ارتفاع منسوب المياه فى المحيطات

و البحار ..............جميل

و طبعا ده حيؤدى الى ارتفاع معدل النحر فى الاراضى المطله على البحار و المحيطات 

دى

و بالتالى نقص الرقعه الارضيه فى العالم

و اللى المفروض كان ليها معدل ثابت و مدروس وفقا لاحصائيات

و دراسات قديمه بس بالنظر اللى حاصل دلوقتى المعدل حيبقى اسرع


و طبعا عندنا فى مصر حنتضرر من الموضوع ده جامد جدا

فى اسكندريه و منطقه الدلتا اللى هما من الاول مصدر القلق المصرى 

من ظاهره النحر فى الكام سنه اللى فاتت


انا كل كلامى اللى كتبته ده نتيجه تفكيرى الخاص و البسيط

معرفش اذا كان صح و لا غلط

و لو حد عنده معلومات عكس كلامى يتفضل يقولها

او يضيف حاجه تؤيد كلامى

اهلا و سهلا بيه

هناك 52 تعليقًا:

غير معرف يقول...

كلامك صح شوية شوية هههههههههه

اقولك
يعنى كنا بناد فى المدرسة ايام زمان بقى

ان لما ثانى اكسيد الكربون بيزيد واللى عمال يزيد دلوقتى هتفضل درجة الحرارة ترتفع لغاية اما الجليد يدوب وبالتالى هيرتفع منسوب مياه البحار والمحيطات وبكده اصلا المناطق اللى جنب البحار والمحيطات هتخرق اصلا
والدخان والبراكين تقريبا بتساعد على كده برده

انما حتة نقص الرقعة الزراعية فبيتهيالى انها اصلا بتزيد لوحدها ده غير انها فى الاصل حتى لو زادت مش هتاثر عل العالم كله انما على الدول اللى بتعتمد على الزراعة فى اكلها وكاقتصاد لها
يعنى فى الدول المتقدمة والغنية مش بيعتمدوا عليها حاجة اساسية فمش هيتاثروا كتير وهيقدرو يوجدوا بدايل انما احنا بقى ربنا يستر علينا من اى حاجة حالة البلد صعبة هههههههههههههههههه

احلى حاجة فى الشعب المصرى واللى انا منه طبعا انه بيفتى فى كل حاجة
ويارب مكونش عكيت ولخبطتك معايا
لو فهمتى حاجة قولى لى

لــــ زهــــــراء ــــولا يقول...

دكتوره علا

ما شاء الله انتى موسوعه على كده ايه الثقافه الجامده اخر حاجه دى :-P

اقولك الصراحه هذا الموضوع وهذه القراءات خارج دائرة اهتمامى رغم انى سكندريه زى ما انتى عارفه :D
وطبعا احنا اول ناس الموضوع ده هياثر علينا لكن برضه لازلت لا اقرأ فى هذه المواضيع وثقافتى وخبرتى فيها محدوده جدا جدا
بس اقدر اقولك من اللى اعرفه ان البركان ده مش قوى لكن تاثيرات قد تمتد الى بعض الوقت
ده لينك تفضل به احد اصدقائى وارسله ليا علشان اتثقف واقرا وافهم ايه اللى بيحصل

http://mosaabhilali.elaphblog.com/posts.aspx?U=1414&A=47030


من الاخر كده يا دكتوره ربنا يسترها علينا فى الايام القادمه ....

معلش انى مش قدرت افيدك بأى معلومه جديده

زهراء

richardCatheart يقول...

ياصباح الفل يالالا والله كلامك منطقى وكان اتقال انه هايحصل نتيجه الاحتباس الحرارى بس اؤدام شويه كل الحكايه ان حدوث البركان خلاه بدر شويتين معاده

وشكلنا هانغرق ونبقى the world of water

ربنا يستر انا حضرت كميه لا بأس بيها من الميوهات تحسبا للظروف الجايه

ادينا هانبقى كوكب تانى هههههههههههه مبسوطه يالالا
غير جو بقى برحتك

تقبلى مرورى

Mahmoud Ahmed يقول...

لا ما هو ده الى هيحصل فعلا
لآن فيه دراسه انا كنت قرتها من فتره حوالي سنيتن او ثلاثه
بتقولك ان كوكب الارض كله هيغرف بالمياه في خلال السنوات القادمه لأنصهار الجليد
نفس النظريه الى قلتيها دلوقتي

الكلام ده قبل البراكين و الحاجات دي

اما بعد البركان فأكيد ان الوقت اتسرع لغرق كوكب الارض

^_^

لازم نتعلم السباحه بقي
قبل ما تغلي دروس تعليم السبحاه
^_^

sony2000 يقول...

بجد موش هقدر اقول غير كلمتين:لله في خلقه شئون
وربنا يعدي ايامنا اللي جايه دي بخير
لان الغلط للاسف حاصل من الكل موش من دوله واحده
كله بيستخدم الغاذات ذي الفريون وغيرو وظاهره الاحباس الحراري من العوادم والتلوث
وكل ده ادي للنتيجه اللي هتأثر علي الكل تأثير سلبي
بجد ربنا يستر

WS يقول...

اسكتلندا؟
ايسلندا.

صيدلانيه طالعه نازله يقول...

Nesreen

و لا لخبطينى و لا حاجه

انا متلخبطه جاهزه ده انا كتبت البركان فى اسكتلندا
حاجه تكسف بس مش عارفه جت كده ازاى
هو فعلا الاحتباس الحرارى بيبقى نتيجه تزايد تصاعد ثانى اكسيد الكربون
بس طبعا السخونه المنبعثه من البركان و مكانها الحرج وسط الجليد
حيزود المشكله قوى و الله اعلمطط

صيدلانيه طالعه نازله يقول...

ميرسى على اللينك يا زهرا
و مين قال انك مش فدتينى
اديكى بعتى اللينك و حاشوفه ان شاء الله

تحياتى لاسكندريه و ناسها

صيدلانيه طالعه نازله يقول...

richardCatheart

ايوه فى الظروف دى اهم حاجه المايوهات و المراكب
و نعيش بقى
ربنا يسترها علينا و على الكل

منورانى

صيدلانيه طالعه نازله يقول...

سبايدرمان

ربنا يستر

انا اعرف مدرب سباحه كويس و متخافش اسعاره مش غاليه

تحياتى ليك

صيدلانيه طالعه نازله يقول...

sony2000

ربنا يستر على العالم كله
بس احنا اكتر لاننا اصلا ماشيين بالتساهيل

منورانى

صيدلانيه طالعه نازله يقول...

WS

اسفين يا فندم حصل لخبطه و تم تصحيح الخطأ
:)

بلال عادل رجب. يقول...

ربنا مع الشعب المصرى
ويارب يرحمنا برحمته

غير معرف يقول...

اه درجه حراره الارض بتزداد والنحر شغال وبيقولوا تلت الدلتا هيغرق ..

يعني كمان عشر سنين ونروح نصيف في طنطا :))

ربنا يرحمنا

تحياتي

فاروق سحير ( فاروق بن النيل ) يقول...

صيدلانية طالعة نازلة...
هذه أول مرةأدخل على مدونتك والحقيقة
أحب الصداقات وتبادل المعلومات والموضوع الذى تقولينه عن إرتفاع منسوب المياة بالكرة الأرضية من الناحية العلمية صحيح وممكن أن يؤدى إلى غرق بعض المدن المطلة على سواحل البحار والمحيطات وإيضا تآكل طبقة الأوزون صحيح ولن يمنع الأشعة الضارة من الشمس من الوصول إلى الكائنات الحية وأذيتها , ولكن ألستى معى أن نهر النيل كان منذ أكثر من خمسين عاما كان يفيض بالصيف
عندما تنهال الأمطار الغزيرة على هضبة الحبشة فيرتفع منسوب المياة بنهر النيل ويبدأ بالفيضان الذى كان يغرق البيوت والقرى ومنها قريتى الصغيرة " البريجات " مركز كوم حماده بحيرة والحقيقة كان منظرا مخيفا ولكنه بالنسبة للفلاحين وأيضا قدماء المصريين هو الخير كله فقد كنا نستفيد من الطمى النازل مع الفيضان فى زراعة البطيخ والشمام والخيار والأته والطماطم فوق الرمال المغطاه به بعد إنحساره وينحسر بسرعة خلال أيام قليلة وقد كان قدماء المصريين يحتفلون بفيضان النيل بأن يلقوا أجمل عروسة ( أجمل إنسانه يختارونها لكى يختارونها عروسا للنيل )
حسب معتقداتهم حتى يرضوا النهر المقدس عندهم وتبدأ الأر فى إمتصاص هذه لمياة والإستفادة منها أقول لكى الله سبحنه وتعالى خلق السماوات والأرض وجعل السحب تمطر ليشرب منها الإنسان والكائنات الحيه وأن هذه السحب تتكون من تصاعد البخار من البحار بالشمس المحرقه وتسير " فأحيينا به بلدا ميتا
فكذلك النشور " صدق الله العظيم الله وهى دورة متكاملة منظومة محكومة دقيقة
فإذا أراد الله هلاكنا فلايحتاج إلى ذوبات ثلوج أو تآكل طبة أوزون إنه يأمر ملائكته " جبرائيل وإسرافيل وميكائيل وعذرائيل " بأن يفعلو كذا وكذا فى لحظات ألم تسمعى عن تسونامى وخلال دقائق ماذا حدث لقرى وسفن وبيوت
دون أن يذوب الثلج لمجرد زلزال بسيط من إنفجار تحت الماء لبركان موجه لعدد محدد من الناس الذين كانوا يرتكبوا المعاصى ( زنا المحارم الأخت مع الأخ الأب مع إبنته ... إلخ) ولم يبقى بالقرية كلها إلا مسجد المدينة وقف شامخا يؤكد عظمة الخالق ويرسل للعالمين رسالته.
وشكرا لك زورينى بمدونتى
farouksam.blogspot.com( عصفور الجنة)

هي وظروفها يقول...

والله يا علا

انا بسبب ام البركان ده متبهدلبقالي 3 تيام وفيه ناس جايه من مدريد والطياره تكنسل او تعمل ديلايد

اتخنقت طب مال مدريد بشمال اوربا

ثم عم فرغلي جارنا الله يرحمه

كان كل يوم يعمل شليه نار في الشتا والطيارات كانت بتعدي عادي بيس وفل
معرفش بقي فيه ايه

بس انا كنت فاكر عم فرغلي ليه علاقه بالموساد وبيعمل للطيران المعادي كمين

طلعت مبفهمش وطلع كان بيدفي

سواحة يقول...

انت علمى علوم و لا رياضة :-))
اعتقد انت دخلتى صيدلة ادبى :-))

بصى بيا لولة من ساعة مؤتمر البيئة و انا اتجننت من العلماء
الى يقولك الارض حرارتها بترتفع
و الثلوج حتسيح
و الى بيقول بالعكس الارض حراتها بتنخفض و حندخل فى عصر جليدى

بصى البراكين ديه طبيعة
مش حسة منها بقلق
الى بيقلقنى اكثر تكرر التسونامى

بس اعتقد ده كله معناه ان الارض تضاريسها بتتغير و ده عدى من ملايين السنين
المهم نعمل حسابنا فى جنوب مصر نعرف نرجع لوراء لما البحر ياكل السواحل
او نستنسخلنا خياشيم و نعيش تحت المياة
و الله طراوة :-))

هوبتي يقول...

والله كلامك صح
لان اي حاجه بتحصل في اي مكان تاني بيتأسر بيه بقيت العالم .
يعني البركان الي حصل فعلا ها ياسر علينا في موضوع النحل ...لان الموضوع دا بناعني منه بدون شيء فما بالك بالتدخل الطبيعي دا

ahmed_k يقول...

دكتوره علا حياكي الله
أنا أتفق تماما مع فاروق بن النيل فيما قاله
فأثر البركان علينا لن يتعدى بإذن الله آثاره الإقتصاديه
فالبراكين ماهي إلا رحمة من رب العالمين لتخفيف الضغط الداخلي على قشرة الأرض
فالحرارة العاليه في مركز الكرة الأرضيه في إزدياد ولولا البراكين كانت الكرة الأرضيه إنفجرت تماما من الضغط الداخلي
فبإذن الله لن يحدث مكروه
والندع الله دوما بما علمنا إياه نبينا في مثل تلك المواقف
اللهم حوالينا لا علينا
اللهم حوالينا لا علينا

تقبلي خالص تحياتي

سمع هوص (Abo 3li) يقول...

بصي ياستي... انا معلوماتي علي قدي في الموضوع ده فياريت تتأكدي من كلامي ومتخدهوش ثقة...

افتكر ان البراكين بتسبب العكس... البراكين علي المدي البعيد بتذود اليابسة...
بمعني انها بتذود الرقعة الارض.. مش بتقللها... لان ال اعرفه ان القارات اتكونت بسبب البراكين... لما بتنفجر والححم والاحجار الجاية من بطن الارض بتبرد مع الوقت بتكون كثافتها اقل فتطفو علي البحر... والله اعلم..

واانا متفق مع واندا ان انفجار البراكين مش شئ مقلق اوي علي الارض... ده طبيعي الي حد ما...

وبالنسبة للاحتباس الحراري ف ده امر مفروغ منه... يعني ربنا يستر علي شمال مصر فعلا... لو توقعات العلماء طلعت صح.. والقطبين ساحووو....

Kiara يقول...

علي حسب معلوماتي فكلامك صح

بس الدكتورة كانت بتتوقع دا وقالت لينا بالفعل

وللاسف الموضوع ضرره كبير اكتر من نفعه

Zouka's يقول...

طبعا خايفه على اسكندريه وساكنيها

دعينى اذكرك
( كثر الفساد فى البر والبحر بما كسبت ايدى الناس)

والله اعلم

فاتيما يقول...

ايه دا ؟؟


انا حاسة انى دخلت فجأة
على حلقة م العلم و الأيمان
او عالم البحار


لأ

استنوا


دا فيه مايوهات و شماسى

و ناس هتصيف ف طنطا

و اسكندرية هتختفى

و اسوان هتتروق و هيبقى عليها العين

والقطبين هيسيحوا على بعض

و العلماء خلف خلاف بعض

و تسوناميات راحة جاية

و بركان ينقص فالميه تتزيد

و فى الآخر دا فساد البحر
بعد فساد البر



يا لهوتينى ؟؟؟




انا دوخت



خلاص قفلتوها
يا بشر



طب انا لا علمى
و لا فاهمة القصة
بس م الآخر هدلو بدلوى
و ابقوا حطولى فيه اى حاجة جدعنة


اصل و انا بجرى ما بين السطور
افتكرت فيلم 2012
و اللى شافه
هيعرف ماذا اقصد



و ربنا يستر
لأن كل شىء مقدر عنده
مفيش حاجة غير بميقات
و امر منه سبحانه يتقاله
كن فيكون ..
قوم احنا نتدبر
و نتفكر
و نحاول نفهم
و نسيب بكرة لربنا
يكرمنا فيه



البوست دا بعتبره
محاولة للتدبر
يا لولاّ


و جزاكى الله حيرا عليها




و اهم حاجة
اهم حاجة
اهم حاجة



اسكندرية تفضل مكانها
الا أنقهر انا



انا بعشق البلد دى
و لو لم اكن مصرية
لوددت ان اكون سكندرية



بس خلاص


وحشتينى
ووحشنى التعليق
عند كل الأحباب

بوسيلى الغزالون يهبلن و سيف
و سلامى لدكتور أشرف

همس الاحباب يقول...

كلامك مع الاسف مضبوط جدا
وبغض النظر عن البركان العالم معرض لغرق سواحله واختفاء مدن باكملها بسبب ذوبان الجليد الناتج عن ارتفاع درجة حرارة الارض
ربنا يسترها والعالم يفوق لان الخطر قادم لا محالة
تحياتى

ميرا ( وومن ) يقول...

يا مساء العلوم الطبيعية

بصي يا قمر اخر حاجة وصلتني عن موضوع الإحتباس الحراري ده ان مصر متوقعين ليها 3 سيناريوهات

1- الدلتا هاتختفي وهانغرق
2- منسوب المياة هايذيد وهايحصل فيضان
3- منسوب نهر النيل هاينخفض وهايحصل جفاف

وفي التلت حالات معندناش اي خطط مستقبلية ولا خطط بديلة والكلام عن الموضوع ده بيفكرني بأفلام الخيال العلمي اللي توقعت نهاية العالم

بس برضة مفيش كلام اكيد ولا شئ مضمون

وانا برضة مع الرأي اللي بيقول ان حدوث البراكين طبيعي وبيحصل من ملايين السنين

ربنا يستر

new-one يقول...

بيقولك فيه بركان فى اسيوط فى شارع الهلالى بس بركان صعيدى بيثور لتحت:))))

صيدلانيه طالعه نازله يقول...

قلــ"بـــلال"ــــــب فارس

اللهم امين يارب العالمين

صيدلانيه طالعه نازله يقول...

فتاه من الصعيد

طب و الله فكره
بذمتك مزهقتيش كل سنه اسكندريه
تغيير مره من نفسنا

منورانى

صيدلانيه طالعه نازله يقول...

فاروق بن النيل

اكيد اراده ربنا فوق كل شيىء
شكرا ليك على المعلومات القيمه

تحياتى

صيدلانيه طالعه نازله يقول...

هي وظروفها

شفت بقى قد ايه كنت ظالم عم فرغلى
ربنا يسامحك
ربنا يسامحك

صيدلانيه طالعه نازله يقول...

Wanda

انا علمى انتساب موجه يا حاجه

فكره الخياشيم دى فكره هايله
و فعلا طراوه الطراوه

منورانى

صيدلانيه طالعه نازله يقول...

هبة الحياة

اكيد بيأثر فى كل حاجه
بس حيأثر ازاى فى تربيه النحل؟؟؟

صيدلانيه طالعه نازله يقول...

ahmed_k

اللهم حوالينا لا علينا

امين يارب العالمين

صيدلانيه طالعه نازله يقول...

سمع هوص (Abo 3li)

انا برضه بدأت اقتنع برأى واندا
فى الموضوع ده
ربنا يستر على العالم كله

شمس النهار يقول...

ازيك يارب تكوني بخير

شوفي ربنا
من وقت للتاني يحب يقول للعبيد انا هنا اوعي قوتك تغرك
انت ممكن تقتل وتدمر وتشرد اخوك في الانسانيه
لكن ممكن وفي ثانيه اخسف بيك الارض

سبحانة وتعلي

سلامي

мαησηα يقول...

يعنى هنموت غرقانييييييييين

ههههههههه كويس انا بحب المية وحتى الجو داخل محرر كده ربنا يستر

ادى اللى بناخده من اوروبا وجع قلب واخرتها هنموت غرقانين

على فكرة انا حاولت افهم وربنا مافهمت حاجة كل اللى فهمته ده اننا هنغرق هنغرق

مع انى كنت علمى علوم مش علشان انتى مش عارفة تشرحيلى يا لولى لا

علشان انا باجى لحد علوم البيئة واتنح ههههههههههه بعيد عنك يا اوختى

قلم رصاص يقول...

طبعا كلامك صح جدا ومعنديش حاجة اقدر اضيفها للموضوع دا غير بس مسألة الاحتباس الحراري الناتج عن النشاط الصناعي للدول المتقدمه وكذلك وقود حرق الأفات والمخلفات الزراعيه وعوادم السيارات في الشوارع بما يؤدي الى تكون طبقه عازله من الغازات اللي بتأدي لارتفاع حرارة الأرض بمقدار لايقل عن نصف درجة سنويا

ودا هيؤدي لنفس النتيجه اللي حضرتك قولتي عليها بخصوص بركان أيسلندا ..أي ارتفاع درجات الحراره ومن ثم ذوبان الجليد ثم ارتفاع منسوب مياه المحيطات والبحار واكييييييييد دا هيكون له تأثير سلبي جدا على الشواطئ ودلتاوات العالم واللي يهمنا هنا دلتا مصر وشواطئها

ربنا يستر

اهو دا الانسان
مهما عمل ربنا قادر في غمضة عين يخليه يشرب اللبن وينام بدري..قصدي يعرف حجمه الطبيعي بالنسبه للخالق سبحانه وتعالى

أحييكي على البوست الرائع

تقبلي مروري

صيدلانيه طالعه نازله يقول...

كيــــــــــــارا

طبعا توافقينى
مش مامتك و لا كان كلام عيال

منورانى يا قمره

صيدلانيه طالعه نازله يقول...

Ashraf

طبعا اخاف على اسكندريه و اللى فيها هو انا عندى اغلى منهم

منورنى

صيدلانيه طالعه نازله يقول...

فاتيما

هل هلالك يا قمر
وحشتنى تعليقاتك المستفيضه

امبارح غيظت واندا انك علقتى عندى

كلامك صح يا تيما كل حاجه باذن الله و كل شيىء بميعاد

و مبسوطه ان البوست عجبك

و نورتى مصر

صيدلانيه طالعه نازله يقول...

همس الاحباب

معتقدش ان حد حيفوق لان الخطر بيهدد الكل اه لكن الكبار بيعرفوا يحموا نفسهم
الخوف بقى على الغلابه اللى زينا

منورنى يا ابو همس

صيدلانيه طالعه نازله يقول...

ميرا ( وومن )

مرمر يا قمر
السيناريوهات ككتيره فعلا
و المشكله ان فيها كتير عكس بعض
يعنى شويه الارض بتسخن و شويه يقولوا الارض بتبرد

مين الصح و مين الغلط
الله اعلم

صيدلانيه طالعه نازله يقول...

new-one

مممممممممم
بركان و فى اسيوط و فى شارع الهلالى

نورت يا بلدينا
و اهلا بيك فى وطنك

صيدلانيه طالعه نازله يقول...

شمس النهار

فعلا يا شموسه ربنا كل فتره بيبعت رسايل للبشر عشان يفوقهم و يعرفهم حجمهم الحقيقى
بس اللى يفهم و يتعظ

منورانى

صيدلانيه طالعه نازله يقول...

мαησηα

هيا اوربا كده
اللى يروحلها بالمراكب تغرقه و اللى يفضل فى مكانه تجيله لغايه عنده و تغرقه برضه

بس الحمداصل انا برضه مليش فى علوم البيئه خالص

صيدلانيه طالعه نازله يقول...

قلم رصاص

ربنا قادر انه يخسف بينا الارض
مش يرجعنا نشرب اللبن و ننام

بس يارب نفهم و نلحق نفسنا

من كل بستان زهرة يقول...

كلامك صحيح ....بس

المشكلة مش في الي هيحصل للأرض
ونسبة المياة ده بيكون أثرها على المدى الطويل

المشلكة في لو استمر الدخان في التصاعد من البركان هيوصل لسماء مصر

ودي المصيبه الكبيره
وبما أننا بلد متطور جدا مش هنلاقي للكارثة دي حل

ربنا يستر

كيكى عوووووو يقول...

شوفتى فيلم
2012
بيكلم على الحوار دة
دة احنا هنتشحور شحورة
تفتكرى فى كتافات تيجئ مقاسى

صيدلانيه طالعه نازله يقول...

من كل بستان زهرة

و لا تزعلى قالوا فى النشره
ان بكره الغبار بكره بكره بكره

و بعدين ما هى مصر عايشه متعايشه مع السحابه السوده و من سنين
حصل ايه يعنى
عاااااااادى جدا
احنا فى ديك الساعه اما يجيلنا غبار اوروبى

صيدلانيه طالعه نازله يقول...

كيكى عوووووو

و ان مكانش فيه كتافات نبعت نجبلك يا كيكى يا عسل
و لا يكون عندك فكر

غير معرف يقول...

السلام عليكم
ازيك يادكتوره
كلامك مهم طبعا
واصلا من غير موضوع البركان ده فالدلتا فيها كلام كبير قوى عن موضوع الغرق
وممكن تشوفوا مقال الاستاذ فهمي هويدي عن الموضوع ده
أجراس الخطر التي لا يسمعها أحد
http://fahmyhoweidy.blogspot.com/2009/09/blog-post.html

كلام مهم جدا وخطير
وممكن – باذن الله – نحاول نلحق نعمل كتير
وربنا يستر وممكن الامور متوصلش للدرجه دي

لكن طبعا عارفين ان المسئولين فى مصر هيعتبروا الكلام ده من الترف والخرافات

ربنا يستر

ملحوظه بس فى الاخر
سبحان الله ان البركان يكون موجود فى منطقه من ابرد دول العالم
سبحان الله
ربنا يصلح الاحوال
ربنا يكرمك ويوفقك

إيمان يقول...

تصدقى اه
فعلا نظريه وتفكير صحيح بجد
بس المشكله النحر فى اماكن حساسه عارفه لو لو فى الصحراء اللى مش متعمرة دى كنا قفلنا عقلنا ومش فكرتى التفكير ده
بس تفكير علمى بحث
اقنعتينى
تسلمى يااجمل لولو فى الدنيا
تحياتى وحبى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .