الأربعاء، أبريل 21، 2010

حاحب نفسى



حبى نفسك شويه يا علا و كفايه اهمال ليها

هيا تستاهل انك تحبيها شويه اكتر



الكلام ده سمعته اليومين اللى فاتوا كتير

اصل انا بقى مشكلتى انى باهتم باللى حواليا قوى

و اما يكون حد من اصحابى فى مشكله

سواء كان من القريبين قوى او البعاد شويه

تلاقونى فضلت افكر فى المشكله دى و اسبابها

و ازاى ممكن اساعد فى حلها

الموضوع ده بيجى على اعصابى قوى

و خصوصا لو مقدرتش اوصل مع صاحب المشكله لحل

ساعتها باحس بالعجز و الفشل و انى متضايقه و مخنوقه

بس لو ربنا وفقنى لحل ببقى فى حاله غير الحاله

ببقى مبسوطه و فرحانه و طايره



المصيبه بقى اما تساعد حد فى حل مشكلته

و تتعب معاه لغايه ما تحلوها

و فى الاخر تلاقيه هو نفسه مش حاسس انه فى مشكله 

قد ما انت حاسس عشانه

و تلاقيه بيكرر نفس الغلط بنفس الخطوات

بنفس الطريقه  لا و ايه عاااااااااادى جدا

و لا كأنه بيغلط

ساعتها بقى باحس بالغيظ و انى ضيعت وقتى مع حد

ميستاهلش المساعده و لا العون


بيتعبنى كمان ان فيه صنف من البشر

اول ما تخلص حاجته ليك و احتياجه ليك

يقلبك و يطنشك و لا كأنه يعرفك

من الاخر ميعرفنيش غير عشان مصلحته

بس برضه عشان مبقاش ظالمه

فين ناس بمجرد انك تفكر فيهم 

و تهتم بيهم و تحاول تساعدهم

بيشيلوهالك جميله 

و يحاولوا يردوا جميلك فى اى مناسبه

سعيده كانت او حزينه

سعيده كانت او حزينه


انا بقى تعبت فعلا و بجد

و حاحاول اهتم بنفسى شويه اكتر

و احبها اكتر

و حاحاول احب نفسى شوي
زى ما قالولى بس مش معنى كده انى حابقى انانيه

لا انا بس حاهتم بنفسى شويه اكتر من اهتمامى بيكم

حاهتم انى اريح اعصابى و ابعد عن اى توتر

انا و الله بحبكم كلكم 

بس فعلا علا محتاجه منى شويه حب اكتر

هناك 50 تعليقًا:

ايوشة يقول...

ربنا يكرمك دايما يادكتورةيارب بجد حضرتك قلبك طيب جدا واى انسان هيشوفك لازم يحبك ويحترمك
كويس اننا نهتم بالناس من حوالينا ونساعدهم بس مش على حساب نفسنا
ربنا يسعدك دايما ويريح بالك

ابو على يقول...

فهمتى متأخر

سمع هوص (Abo 3li) يقول...

ايوة كده...
عاوزين علا تهتم بعلا شوية...
ومش معني كده انك هتبقي انانية...

يعني لما علا تبقي تعبانة ... تستريح..

لما تبقي زعلانة ... تبعد عن المشاكل ال ممكن تزعلها اكتر..

هيا فعلا تستاهل منك كده..

يــوم جــديد يقول...

انا بس حاهتم بنفسى شويه اكتر من اهتمامى بيكم

بيكم دي عايدة على مين بقى عشان أبقى فاهمة بس

الكلام اللي بتقوليه ده بالحرف الواحد كنت بناقشه مع ندى الياسمين من فترة قريبة
المشكلة فينا وفيهم
فينا عشان بناخد الأمور على أعصابنا ونشيلها فوق دماغنا ونلف بيها

وفيهم عشان مش بيراعوا شعور غيرهم ويحملوه هم عارفين إنه هيشغله وهم مش فارق معاهم


لما تحلي لحد مشكلة حليها عشان انتي بتقضي له حاجة مش عشان هو هيسأل ولا هيقدر ولا لأ
ساعات بجد الحياة بتشغل مش بيكون معناها إنه بتاع مصلحته كل الحكاية إنه مشغول في حاجات كتير بيحاول يعملها ولما حاجة منهم فكرته بيكي اتعشم إنه يطلبها منك
مش ندالة يعني

حبيكي يا لولي :)
وحبي حبايبك
بس بعد كده ابقي هاتي أعصاب من التوكيل بلاش استرخاص :)

غير معرف يقول...

اكييييييد
علا تستاهل انك تحبيها وانك تهتمى بيها

سلمى لى عليها وقولى لها انتى بجد جميلة اوووى ربنا يخليكى لكل اللى حواليكى وقولى لها خليكى زى ما انتى انتى مش غلط انتى صح والعيب مش فيكى العيب فى شوية من الناس بس فى ناس كتيرة اوى تستاهل وجودك فى حياتها

ستيتة يقول...

حق كل مواطن انه يهتم بنفسه
الرسول صلى الله عليه وسلم قال
"حب لأخيك ما تحب لنفسك"
مش اكتر من نفسك
لأن الفطرة تمنع أي حد منا يحب حد أكتر من نفسه

على رأي أبو الليف
بتحبني أشك
مين دول اللي على الفيس بؤ :)

أنا - الريس يقول...

يا دكتوره
صدقيني كل الناس باللي بتعمله بتفتكرك حتي لو اظهروش ليكي .. ربما يكونوا لشعورهم بالعجز ولا يريدوا الاعتراف بيه .
ربما غيره ..
بس تأكدي أنهم بهتمواااااااااا ، واللي بيغلط مرة تانية وسعدتيه هيحس هنا منك بشعور نبيل .
انت تصنعي ما عليكي ولا يهمك رأي انسان فيكي ما دمت بتأمني باللي انتي بتعمليه

ahmed_k يقول...

بالعكس الإهتمام بالآخرين ومساعدتهم بقدر الإمكان على حل مشكلاتهم يعد إهتماما بالنفس أيضا
فأنتي حينما تفعلين ذلك تفعليه إبتغاء وجه الله وطبعا تنالين من رب العالمين الأجر والثواب الذي يكون الإنسان في أمس الحاجة إليه يوم العرض على رب العباد
فإنك يومها ستلاقين جزاء ما قدمتي من خير لغيرك فلا تعتقدي أنه هناك شيئ يضيع هباء
فكل ما نقدمه سنجد له فوائد تفيد ذواتنا بأكثر مما يكون فيه إفادة لغيرنا او لمن تقدم لهم يد المساعده

دمتي بخير

هوبتي يقول...

والله انا كمان محتاجه احب نفسي شويه
لاني هبله وعبيطه وبلبس العمه كتير وبتعب نفسي علي ناس ما يستهلوش

صيدلانيه طالعه نازله يقول...

ايوشة

ربنا يخليكى يا يويو
انتى بس عنيكى حلوه فبتشوفينى كده
و بصراحه انا حاسه انى جيت على نفسى شويتين
و محتاجه استراحه محارب

منورانى

صيدلانيه طالعه نازله يقول...

ابو على

مفيش حاجه فى الدنيا متأخره
كل حاجه باوان و ميعاد

منورنى

صيدلانيه طالعه نازله يقول...

سمع هوص (Abo 3li)

شكلى تاعباكم كلكم يظهر
على العموم حاضر حاسمع الكلام و احاول انفذ

تحياتى

صيدلانيه طالعه نازله يقول...

يــوم جــديد

العيب فينا اكتر عشان بنحمل نفسنا فوق طاقتنا
احنا نقدر نتحكم فى روحنا لكن صعب نسيطر على اللى حوالينا

انا و الله ما قصدى ان اللى ساعدناهم يشكرونا
انا بس قصدى ان اما الدنيا تلف و تحتاجيهم تلاقيهم

احتياج انسانى من حقى الاقيه اما اعوزه
و متخافيش انا دايما بشترى من التوكيل


هههههههههههههه
منورانى يا سسكر

mohamed يقول...

اقولك على حاجة وبصراحة ..

المشكلة الحقيقة مش أنك مش بتحبي أو بتهتمي بنفسك

أنما مش لاقيه حد يقدر قيمتك ويحبك ويدكي الاهتمام اللي أنتي في حاجة ليه
وعشان كدا بتعوضيه بانك تنسي نفسك وتهتمي بالناس أكتر

لحد أما وصلتي لدرجة أنك خلاص مش قادرة ..

لو ليكي اصدقاء وحاسة أنهم اصدقاء بجد متتردديش انك تطلبي منهم اللي انتي محتاجاه ساعتها هتعرفي قيمتك عندهم بجد

صيدلانيه طالعه نازله يقول...

star in the sky

ربنا يخليكى يا قمر
انا مستاهلش و الله الكلام ده كله

بس كلامك ده بيخلينى احس انى مش باحفر فى الميا
و ان لسه فيه امل

منورانى

صيدلانيه طالعه نازله يقول...

ستيتة حسب الله الحمش

احبك انا يا توته و انتى مشهيصانى و مخرجانى من المود

انتى عندك حق و الرسول عليه الصلاه و السلام اكيد صح الصح

نورتينى

صيدلانيه طالعه نازله يقول...

MR.PRESIDENT


ده اللى بعمله
باعمل الخير و ارميه البحر
بس ساعات باحس ان اعصابى تعبت من كتر تفكيرى للناس و عشانهم

منورنى

صيدلانيه طالعه نازله يقول...

ahmed_k

و الله انا عارفه و مش بنكر
بس انا فعلا باعيش فى المشكله بكل ابعادها و ده بيوترنى و بيتعب اعصابى
كل اللى محتاجاه اجازه من المشاكل
و اللى يعرفنى اليومين دول بلاش يشكيلى

برنامج ماذا تفعل لو كنت مكانى متوقف لمده اسبوع

صيدلانيه طالعه نازله يقول...

هبة الحياة

طب تعالى جنبى يا قمره
و الفطار و العشا عندى
هههههههههههههههههههه

منورانى

Mahmoud Ahmed يقول...

طبعا مفيش مانع اكيد يعني انك تهتمي بنفسك
بس متبطليش تساعدي الناس

قال رسول الله صلي الله عليه وسلم ((من فرج عن مسلم كربة من كرب الدنيا فرج الله عنه كربة من كرب يوم القيامه ))

فاتيما يقول...

انا موافقة جداااااااااا
ع الكلام المكتوب اعلاه

لولاّ تستاهل تتدلع
و تنحب اكتر من كدا


و تستاهل تخاف على روحها
اكتر من كدا


و تستاهل تاخد بالها
من نفسوياتها اكتر من كدا


و تستاهل تغربل اللى حواليها
اكتر من كدا


و تستاهل تحس بقيمة الموجود
عندها اكتر من كدا


فتلاقى روحها ف النهاية
زى ما حنا شايفنها تمام


حد جميل
و طيب
و مشكلته انه على اعصابه طول الوقت
و المشكلة تكمن فى انها بنى آدم
زى الشامبو كدا ؟؟

اتنين ف واحد

جوزائة و مجننا روحها
و مجنينانا اوقات معاها



بوست مؤلم يندرج تحت بند التباريح اللى عند اختك الأيام دى
لكن ضرورى ينكتب و ينقال

بوسات و حضونات

mayada يقول...

ايه يادكتور الكلام الكبير ده
معاكي انا بس مؤخرا ابويا علمني حاجه حلوة قوي
لما لاقاني بتنكد عشان الحركات النص كم وقله الاصل دي مقولكيش علي الشيطان لما يلعب بدماغك الكورة خاصه وخصوصا لما تقفي جنب حد ويجي الدور اللي عليكي تحتاجي حد يقف جنبك ماعلينا
(الا وهي ) الحاجه اللي علمهالي ابويا ماتصحصحي يادكتور
انت تزعلي لو انت اللي وحشه انما انت زعلانه ان انت حد كويس وفي حديث في معناها ياستي ان ربنا مش هيقبل مننا العبادات (صوم وصلي وذكاه الخ) الا لو احسن معاملة الناس فانت بتعملي ربنا وخلاص واللي عند ربنا مش بيضيع

ميرا ( وومن ) يقول...

شوفي يا علا اجمل مثل سمعتة في حياتي عن حكاية اننا نحب نفسنا دي

كانت من دكتور محمدأوز في برنامج أوبرا

الراجل دة حكاية والله

كان بيقول ان الستات بشكل عام بتركز قوي مع اللي حواليها لدرجة انها بتنسي روحها ودة بيأثر عليها بالسلب وضرب مثل رائع

قال ان القلب قبل ما بيضخ الدم لباقي الجسم بيذود نفسة بإحتيجاتة الأول

ودي مش انانية من القلب بالعكس لو مكنش مذود بالتقنية دي كان توقف

شوفي بقي عظمة ربنا في خلقة

وقال ان الستات لازم تتعامل مع نفسها بالطريقة دي لازم تحب نفسها الأول وتهتم بيها وتخصصلها وقت ويكون عندها خصوصية
ودي مش انانية بالعكس كدة هاتقدر تدي اكتر

موضوعك هايل بجد وسعيدة ان في حياتي إنسانة جميلة زيك

richardCatheart يقول...

طبعااااااااااا ولو ماكيش خير فى نفسك مش هايبقالك خير فى حبيبك
لازم تحبى نفسك اوى كمان وتعرفى هى بترتاح ازاى والا شحنك هايخلص ويجيلك اوقات طويله مش حاسه بطعم حاجه خالص

بس لما تقبلى حد ساعدتيه ولقيته مايستهلش وبيكرر نفس الغلط لالالالا ماتزعليش انك ضيعتى وقتك لان اللى عند ربنا مابيروحش كله بيتشال لوقت يرجعلك تانى من اشخاص تانيه

اما اصحاب معرفه للمصلحه دول ويسالو علشان يطئسو وعلشان يسالو مليون سؤال
دول بقى بهرشهم بدرى وبفكنى منهم

انت محتاجه راحه وشويه حب كتير قبل الاكل وبعده ان شاء الله هاتبقى زى الفل
وخدى بالك من نفسك دلعيها شويتين وماتفكريش كتير حاولى تطفى اللمبه
احنا كمان بنحبك وهانستناكى مهما غبتى بس المهم ترتاحى

تقبلى مرورى

عاشقه الرومانسيه يقول...

علا تستحق انك تحبيها مش عيب ولا حرام
بس اللى بيعيش للناس قوى كده صعب يعيش لنفسه
ربنا يقدرك وتسعدي علا اكتر من كده
(:

قلم رصاص يقول...

خصله طيبه جدا ورائعه جدا ان الانسان بيحب يساعد اخوه الانسان
بس في نفس الوقت دا ميكونش على حساب نفسه.. فكل نفس ليها حق على صاحبها ^_^

احييكِ يادكتوره على البوست

تقبلي مروري وتحيتي

لــــ زهــــــراء ــــولا يقول...

دكتوره علا

-*-*-*-
من وراء الكتب والمراجع والكراسات :((
قولت اشوف موضوع الدكتوره علا حاحب نفسى انتى عارفه انه ممكن يكون اسم فيلم ....
فاكره اغتية ايهاب توفيق انا ليه ما كونش ع الجراح قادر
قال فيها جزء تحفه
هادور يمكن الملم روحى ....
ياريت كل واحد فينا فعلا يحب نفسه بجد ويخاف عليها اوى اوى عارفه لما تحبى نفسك اوى مش هترضى لاى حد يجرحها او يزعلها او حتى يبص لها بصه مش تمام
بالنسبه بقى انك تقفى جنب الناس وتساعديهم يا بنتى اسمعى النصيحه اللى بتقول افعل الخير فى اهله وفى غير اهله فان لم يكن اهلا له فانت اهل له
لا تنتظرى الخير من اى حد انسان اللى عند ربنا مش بيروووووح هتلاقى الخير راجع اضعاف مضاعفه ومن ناس عمرك ما كنتى تتخيلى انهم جنبك

ده كومنت فى السريع ارجع للمذاكره دعواتك احسن خلااااص باشد شعرى ~x(

زهراء

saragebaly يقول...

طبعا لازم تحبيكي .. مش شوية بس

لأ كتيييييير

واديكي حقك ووقتك شوية

ومش انك هتحبي نفسك شوية انك تبقى أنانية

لا خالص

دة حق نفسك عليكي

ربنا يسعد ايامك بكل خير

تحياتي لكـِ
سارة

صيدلانيه طالعه نازله يقول...

سبايدرمان يقول

انا مقلتش حبطل اساعد الناس
لا طبعا بس حاخد اجازه شويه
ماهو انا محتاجه اساعد نفسى برضه
فاقد الشيىء لا يعطيه
و لا ايه يا عم سبايدر

تحياتى

صيدلانيه طالعه نازله يقول...

فاتيما

اولا وحشتينى
ثانيا ده كلامك ليا فى اخر ايميل بيننا
و اللى فضلت افكر فيه و حسيت بصراحه انه صح
بس المشكله يا اوختى فى الدلع ده طب مين حيدلعنى
انا باوجه نداء لشركائى فى المنزل
لوسمحتوا دلعونى شويه

مش انا اللى بقول
دى فاتيما اللى بتقول و الله

اموووووووووووه

صيدلانيه طالعه نازله يقول...

mayada

انتى كلامك صح يا مادى
اللى عند ربنا فعلا مش بيضيع

وحشانى يا بنوته انتى و الله

صيدلانيه طالعه نازله يقول...

ميرا ( وومن )

كلام الباشا على عينى و راسى
بس مين يا مرمر اللى يقدر ينفذ الكلام الجميييل ده

ربنا يخليكى ليا يا مراميرو

blue-wave يقول...

هاحب نفسى
الللللله قمة الإيثار والتضحيه:)))
بجد بقى
علا اصلا اكتر واحدة محتاجالك الفترة دى
ولكن
ناس كتير كمان محتاجينلك
ف متخليش حاجه تيجى على حساب حاجه
تحياتى

خواطر شابة يقول...

معك كل الحق عزيزتي في كل ما ذكرت تعرفي والله كأنك بتوصفي قريبة لي دائما ما انصحها بنفس ما خلصت انت اليه هي لو أحد عنده مشكلة هي لاتنام تظل الليل كله تتقلب في فراشها وتعيد وتزيد في المشكل وتبحث عن حلول وكل هذا على حساب اعصابها ووقتها وعلى حساب زوجها واولادها والاهم على حساب صحتها لذا انا معك قلبا وقالبا فيما قررتيه خلي بالك من علا مش معنى كده ان قلبك حتموتيه او انك سينعدم احساسك بالاخرين لكن وازني بين الامرين بحيث لايطغى احدهما ابدا على الاخر
دمت بكل الود والمحبة

صيدلانيه طالعه نازله يقول...

richardCatheart

ايوه انا حدلع نفسى و اطفى اللمبه
انا بحب انام فى الضلمه اصلا

انا فعلا حاسه و الله انى شحنى خلص و محتاجه اعاده شحن فعلا
بس يارب اقدر ابعد فعلا

منورانى يا قمر

صيدلانيه طالعه نازله يقول...

عاشقه الرومانسيه

و الله انا بحبها
بس حاحاول اهتم بيها اكتر
عشان خاطرك انتى بس و الله

منورانى يا دودو

كيكى عوووووو يقول...

مممممممممممممم
مش شايفة ان فى مشكلة انك تعملى الاتنين لان اكيد فى ناس بيحبوكى هيستنوا العامل النفسى دة انا عارفة انك مش هتتخلى عن حد
بس زقطقى وفرفشى
واحب اهديلك اغنية
لو مكنتش انت تدلعنى مين هيدلعنى
عوووووووووو

صيدلانيه طالعه نازله يقول...

قلم رصاص

وده اللى عايزه اقوله فعلا
منورنى

صيدلانيه طالعه نازله يقول...

لولا وزهراء

و الله يا زهرا انتى سكر خالص
و كلامك الجميل ده بيريحنى بجد

شدى حيلك بكره بقى

صيدلانيه طالعه نازله يقول...

saragebaly

كويس انك من الناس المؤيده ليا
انا فعلا تعبانه و عايزه استريح

منورانى

صيدلانيه طالعه نازله يقول...

blue-wave

لا حول و لا قوه الا بالله
انت مين يا عم
انت نيو و لا ويف

و بعدين طبعا قمه التضحيه و الايثار
عندك شك انت

مين بقى الناس الكتير اللى محتاجينى دول

الناس دى اما تساعدها و تقف جنبها و يرجعوا يغلطوا تانى يبقى ايه ساعتها يتقال

يبقى انا بضيع وقتى على الفاضى
يبقى علا اولى بالوقت
صح و لا انت عندك راى تانى

صيدلانيه طالعه نازله يقول...

خواطر شابة

انتى يا نوجا بتوصفى حالى بالضبط و الله
و الموضوع ده تعبنى جدا

و محتاجه شويه هدوء

تحياتى

صيدلانيه طالعه نازله يقول...

كيكى عوووووو

و الله يا كيكى انا توقعت ردك حتكون فيه الاغنيه دى
و قد كان

مصيبه انتى و الله

إيمان يقول...

احسن حل
اوقات كتير بنندم اننا بنشيل هموم حد وفى نفس الوقت هو عايش حياته وركبنا الهم
بس اقولك ربنا يوفقك وعلى فكرة دا مش غلط انك تهتمى بعلا شويه وشويتين كمان
وبقلبك الطيب وخوفى على غيرك ربنا هيكرمك
تحياتى وحبى

sony2000 يقول...

طب تصدقي بالله
انتي عمله ذيي ووقعه انا فنفس الموضوع ده
بجد حالتي دلوقتي قبل يوم من عيد ميلادي فظيعه بسبب مشكله اهو لوحده اعرفهاو
وحاصل نفس اللي انتي قيلاه لدرجه اني حسه كأنك بتكتبي عني
ربنا يعديها علي خير:)

صيدلانيه طالعه نازله يقول...

emymony

مش كده كمان
انت بعد مع تحلى المشكله
بتفضل رواسب منها جواكى و تتخزن
و تلاقى نفسك مهمومه من غير سبب

صيدلانيه طالعه نازله يقول...

sony2000

مش انا و انتى بس
ده ناس كتير زينا
و بيتعبوا عشان غيرهم


تحياتى

Unknown يقول...

معلش أعملى الخير
وأرميه فى البحر
وصدقينى حيترد اليكِ
ولو بعد حين وبرضه
ما تنسيش نفسك اوى
خليكِ ماسكة العصاية
من النص(على قدر الأمكان طبعاً)

غير معرف يقول...

خدي بالك من نفسك اكتر ... لانكبكده هتكوني احسن وتقدري تساعدي اكتر ... وتحكمي على الامور افضل

تحياتي

غير معرف يقول...

السلام عليكم
ازيك يادكتوره

على فكره كويس ان فيه ناس لسه بتخاف على غيرها وبتحاول تساعدهم
وده شئ جميل جدا
وثوابه كبير عند ربنا باذن الله

احساس جمييييييييييييل لما تحسى انك ساعدتى حد وساعدتيه فى حل مشكله ورسم ابتسامه على وشه

حتى ولو فيه ناس بتعرفنا عشان مصلحتها بس
واكتشفنا ده بعد ماساعدناهم
فاحنا برضه استفدنا اننا اخدنا ثواب وبرضه اننا اتعلمنا

طبعا مش معناه اننا نهمل نفسنا فى سبيل الاخرين
لكن برضه نشوف نفسنا ونهتم بالناس

ربنا يجازيكي خير عن اللى بتعمليه
ربنا يكرمك ويسعدك

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .