على طول الحياه.........بنقابل ناس
و نعرف ناس..........و نرتاح ويا ناس عن ناس
عبد الحليم قالها زمان
و بصراحه هيا فعلا حقيقه
كتير قوى نقابل ناس لاول مره فى حياتنا
و من اول مقابله بينا و بينهم بتحصل كيميا ايجابيه
ايجابيه دى معناها اننا نحس ان الناس دى نعرفها من زمان
و نلاقى الكلام بيننا و بينهم بقى كلام من القلب
من غير نفاق و لا زواق و لا مجامله
كلام طبيعى مش متظبط و لا متنظم
نحس انهم حد قريب قوى
مع انهم كانوا اغراب من دقايق قليله
و خلال فتره قليله قوى بيبقوا قريبين مننا جدا
و غاليين عندنا و عزاز علينا
و نحس بغربه ووحشه اما منلاقيهمش جنبنا
و ندور عليهم فى وقت شدتنا
و طبعا بنلاقيهم دايما قريبين مننا وواقفين جنبنا
اكتر من اهلنا و ناسنا
و ساعات بقى العكس هو اللى بيحصل
نقابل ناس تحصل بينا و بينهم كيميا سلبيه
يعنى بمجرد ما نقابلهم بتحصل قفله
يعنى بالعربى كده بيحصل تنافر و تباعد
من غير مبرر او سبب واضح
و مهما حاولوا و حاولنا نقرب و نتكلم
مش بنلاقى فايده خاااااالص
قفله بمعنى قفله
الحالتين ممكن يحصلوا لاى حد و مع اى حد
بدون مبرر او سبب
يعنى مش عيب فيا او فيك
و لا ميزه فى حد و مش موجوده فى التانى
هيا بس
مجرد كيميا
المشاركات
هناك 69 تعليقًا:
الطيور على اشكالها تقع
عندك حق يا دوك فعلا إحنا كلنا كده ناس نحس من كلامنا معاهم إننا نعرفهم من زمان أووى ونحس بألفة بينا وبين بعض لدرجة إننا بنكلمهم على حاجات قديمة جدا وتحسى بتفاعل منهم كأنهم عاشوا معاكى تفصيلتها مش مجاملة بس حقيقى ده بيحصل وعلى النقيض ناس بمجرد ما بتلمحهم عينك مش بتقدر تتقبليهم نهائى وفى الجزئية دى ممكن يتغير الحكم ده بمجرد الكلام وأوقات تانية لايمكن يتغير هى فعلا كميا حياتية
تسلمى بجد على كلامك ده بحييكى عليه
دمتى بكل الخير والحب والسعادة
الكيميا غدارة وعشان كده الاحياء هي اللي ماشية
ما فيش ليك هنا كنت عملت علامة ليك الف مرة على البوست دة لانها فعلا كدة وحصلت معايه كتير انى من اول مرة ما ارتحش لحد ودة بيخلينى اقفش منه من أول مقابلة وبيطلع احساسي صح بنسبة تسعين فى المائة والعكس
ازيك يا علا ..
-----*******-----
يا قمر الصيادله
ايه الموضوع الجميل ده ...
فى ناس تقابليهم ترتاحى لهم وناس تشوفيهم تستغربى على احوالهم ..
هى فعلا كيميا يا علااا ...
لـــــولا
كلام مظووووووووط
دكتوره علا
--***--***--**
ايه الحكايه فى اشراف على التعليقات لييييه حاجه غريبه عجيبه بجد يمكن اول مره اشوفها هنا ...
اول ما شوفت عنوان البوست اتخضيت افتكرت الكيمياء بتاعة ثانويه عامه وكنت اكرهها اوى اوى ...
المهم لما دخلت شوفت الاغنيه قولت يا عينى على الكيميا ....
ياريت الكيميا كلها كده ....
نيجى بقى للبوست تحفه بجد الموضوع حلو اوى بشكل تحفه ...
فيه جمله بتقول هناك احياء تموت القلوب برؤياهم واموات تحيا القلوب بذكراهم ...
يعنى فى ناس اول ما تشوفيها ترتاحى لهم من غير جدل او نقاش او اى كلام
ربنا سبحانه وتعالى ما خلقش حد مكروه لكن احنا بيحصل بينا كيميا من طريقة كلام الناس معنا يعنى طريقة كلام كل واحد هى اللى بتحدد ده هيكون ايه فى حياتنا ....
المهم قبل الكيميا والاحياء والفيزيا وسلميلى على ثانويه عامه علمى هههههه
اهم حاجه القدر ان ربنا يوقعنا فى ناس ولاد حلال مش ناس تيييييييييت
انتى عارفه فى ناس بمجرد انهم يتعرفوا عليكى يبقوا شبه شوال الدقيق المدلوق
حاجه ظريفه اوى
يلا كفايه رغى علشان اقوم انام
سلامووووووووووز
زهراء
كلام مظبوط
اوقات ناس بنقابلها ومش بترتاح معانا وممكن يكونوا قرايبنا
واوقات تانيه بنقابل ناس نحبها ونرتاح ليهم
بالرغم انهم ممكن يكونوا غرب عننا
هى كيميا
ومش يعرفها الا القلب
سامحينى على زياراتى المتقطعه بس ظروف الدراسه
تحياتى و حبى
لسه مخلصة الشغل دلوقتى يا علا
تصورى ؟؟
انا اكتشفت انى سيئة جدا
و بطيئة ف كتابةالإنجليزى جدا جدا
و بياخد منى وقت رهيب
و صداع
و سدة نفس
و حاجات اتمسحت منى بغباوة
و اضطريت اكتبها تانى
و يوم غريب عجيب النهاردة
يا ريت متكونيش زعلانة منى
بوسيلى العيال
و سلامى لدكتور اشرف
موضوع البوست
عاوز تعليق مختلف
لما اكون رايقاله هرجع تانى
اصلى مش هكتب اى كلام و خلاص
لمجرد التواجد
و انا دلوقتى مليش نفس اكتب اى حاجة
يمكن لما ادخل انام دلوقتى
و ربنا يحينى لبكرة
يكون المود بقى احسن
تصبحى على خير يا لولاّ
و وحشتينى
الارواح جنود مجنه ما تآلف منها ااتلف و ما تنافر منها اختلف
فى حديث للرسول مش فاكراه كويس
بس معناه انه الارواح فى منها بيرتاح للتانى وفى منها بيحس بالتنافر
زى ما قلتى
فعلا بتحصل كتيييرة اوووى
وفيه ناس طباعهم وشخصيتهم فيها عوامل حفازة بتسرع التفاعل الايجابي ده.. وبتحبب ال بيعرفوهم فيهم بسرعة...
يمكن بتكون هبة من عند ربنا..
دا كأنه بيتكلم عني
كتيييييير اوي بيحصلي كدا
اني بقابل ناس معرفاشي وكأني اعرفهم من مده
ليه؟؟؟؟؟؟؟؟الله اعلم
بجد بوست رائع وشكرا ليكي
تقبلي مروري وتحياتي
{الأرواح جنود مجندة؛ ما تعارف منها ائتلف، وما تناكر منها اختلف
الكلام ده صح ميه بالميه ...
بجد في ناس مهما عملتي .. مش هاتتفقي معاهم خالص ...
وفي ناس حتى لو كان طبعهم يختلف عنك بسبب الكيميا بتلاقي أن الموضوع طبيعي جدا ...
تسلمي على هالبوست ...
دمتي دائما بخير وسعاده ...
... ;) ,,, ;) ...
الرسول عليه الصلاة والسلام قالها في الحديث الشريف:
(الأرواح جنود مجندة فما تعارف منها ائتلف وما تنافر منها اختلف)
صدق رسول الله صلي الله عليه وسلم...
تحياتي يا دكتورة...
الكلام دا صحيح بس يبحصل ليه بقا
او الكميا دى تفاعل ايه مع ايه
حد فاهم حاجة
عندك حق
بصراحة عندك حق هى فعلا كيميا .. بس ساعات بسأل نفسى يا ترى كيميا الأحساس غير كيميا العين .. بمعنى أنى حسيت بمدونين كثير و بحبهم جداا لكن يا ترى لو شفتهم كلهم حيكون أنطباعى أيه حنفضل نحس ببعض و لا ممكن رؤيتنا لبعض تكون لعيونا كيميا مختلفه و على فكره مش شرط خالص الجمال او الشكل او المظهر بس برضه ممكن يكون لأنطباع العين أحساس أخر و لا رأيك أيه ..
:)
جميله أوى أغنية عبد الحليم دى .. بحبها أوى ..:)
تحياتى لكى
عندك كل الحق فى الكلام ده
أنا أول ما إشتغلت قابلت زميل لأول مرة وفى نفس اليوم روحنا مع بعض وتانى يوم خرجنا وبقينا أصحاب جدا جدا جدا من 12 سنة
انا اول مرة اعلق هنا بس مش
اول مرة ادخل هنا وكمان عاوزاة اقولك
حاجة يمكن تستغربيها ياعلا
ان انا رغم عدم معرفتى بيكى الا عن
طريق مدونتك بتربطنى بيكى كيميا من المحبة
او والله كده وبدون نفاق
معرفش السبب لكطن زى مابتقولى هى كيميا فعلا
على جمب كده احنا بلديات على فكرة
رغم انى اسكندرية المولد ولكن الاب
والجدود والاصل كله اسيوطى وليا الشرف
ياعلا
تحياتى ليكى ولزوجك واولادك
:-))
لولة
انت و انا و الصيدلة ادرى طبعا
اصلنا درسان كل انواع الكيمياء :-)))
اشى حيوية و عضوية و غير حضوية و صيدلانية و نباتية
و روحية :-)))
اقولك ساعات التوالف بيجى من اول لحظة و ساعات بياخذ وقت لحد ميبداء
زى اى معادلة كيميائية :-)
بتعتمد على االطاقة و التركيز و الظروف المهيئة
فيه علاقات بتسحب الطاقة من الانسان
و فيه علاقات بتشع طاقة
endo thermic and exo thermic
فيه علاقات محتاجة محفز و درجة حرارة عالية
و فيه علاقات بتتكسر من الحرارة العالية
ياهههههه
حتخلينى افتح فى الكمياء :-)))
المهم
ربنا يحبب فيكى خلقة و منفرش منك حد
و يحببك فى الخيار الحلوين الطيبين زى فطوم :-))))
Ashraf
هو انت على طول كده المختصر المفيد
الزهرة البرية
اه فعلا ده اللى بيحصل بدون اسباب و لا مبررات
منورانى
adel
ده رأى هنيدى حضرتك
انما الحقيقه غير كده خااااااالص
رئيس جمهوريه نفسى
كتير بتصادف ان الاحساس صح و اكتر مش بندى فرصه لنفسنا نتأكد
بناخد الانطباع و نسكت
حلم بيعافر
طب الحمد لله
لولا وزهراء
لولا
انتى قولتى الخلاصه و الله
منورانى يا قمر
زهراء
شكل الكيميا و الفزيا معقدينك على الاخر
ربنايوقعنا دايما فى ولاد الحلال و يبعد عنا كل شر
تحياتى:)
emymony
هيا فعلا بتبقى حاجه من القلب من غير معنى و لا مبرر
و بعدين انتى تنورى فى اى وقت
و مفيش بينا تكليف
فاتيما
الظاهر انتى لسه نايمه لدلوقتى
فينك يا تيما مختفيه ليه
لعل المانع خير
مبدئياً كدة الأغنية جت في وقتها وأثارت بي الكثير من الشجون والحزن
بالنسبة للموضوع عندك حق فعلا كيما
الأرواح جند مجندة من تلاقي منها ائتلف ومن تنافي منها أختلف
موضوع جميل ومميز بس انا ديماً الإنطباعات الأولي عندي مش قوي ف العادة الناس اللي برتحلها في الأول بغير رأي فيها والناس اللي مش بطيقها اول ما شوفها بنبقي صحاب قوي قوي
بالعكس عندي :))
الجواز و سنينه
كلامك جد يا دودو يا قمر
star in the sky
الحديث موجود فى الكومنت اللى فوقيكى
و فعلا بتحصل كتير قوى
منورانى
سمع هوص (Abo 3li)
هيا فعلا ساعات بتبقى هبه من عند ربنا
و يا بخته اللى يبقى كده
نورتنى
sony2000
انا معاكى لان انا كده رضه
بتحصل معايا كتير
تحياتى
احاسيس آيوشه
صح الصح
نورتينى يا يويو
ghada mOhsen
اولا كل سنه و انتى طيبه
انتى برضه حاسه لو اتقابلنا حيكون التفاعل ايجابى و سريع
ههههههههههههههههه
منورانى يا سكره
البنفسج الحزين
صدق رسول الله صلى الله عليه و سلم
العيسوى الصغير
بتحصل من القبول اللى بيجى من عند ربنا
sweet angel
منا عارفه
تحياتى:)
rovy
تخيلى يا روفى انا برضه ساعات بأسال نفس السؤال
بس فعلا ساعات قبول العين بيختلف
بس فى ساعات قليله قوى
ربنا يكرمنا جميعا بكل انواع القبول و الكيميا
منورانى:))))
أبو حميد
ربنا يديم المحبه بينكم
و بين كل خلقه
امين يارب العالمين
أم مالك
سلام مخصوص لاول تعليق عندنا
هههههههههههههههه
و كمان تلات سلامات تانى عشان بلديات
ربنا يديم المحبه و يديم الكيميا الايجابيه بيننا
تحياتى
Wanda
ايوه كده وريهم الكيميا اللى على حق ربنا
عقديهم يا دوك
ربنا يديم المحبه بيننا كلنا ييا واندتى و يردك لينا بالسلامه
بحبك
ميرا ( وومن )
ايييييييييه ده يعنى انتى مكنتيش طايقانى زماااااااااان
بما اننا بقينا اصحاب قوى دلوقتى
ردى يا بت
بس مش مهم العبره بالخواتيم
كلام سليم وكلام معقول مقدرش أقول حاجه عنه :)
زي بالضبط لما واحد يتقدم لواحده وفيه مميزات كتير تتمناها أي بنت ومع ذلك مفيش كيميا
فعلا الأرواح جنود مجندة وغالبا الانطباع الأول بيدوم حتى لو اتغير بعد كده
هكذا الدنيا
أيام تدور بنا نري ونتعلم ونعلم
ولا يبقي لنا في نهاية المطاف إلا
أعز الناس
سعدت بمروري الأول هنا
ليتك تتقبليه
السلام عليكم ورحمة الله
عزيزتى الدكتورة علا
اولا وحشتينى جدا
ثانيا كلامك مظبوط وعلى فكرة مش لازم نقابل الناس اللى ممكن كميتنا تتلاقى معاهم ممكن جدا نقرا كلام كاتبينة او حتى نشوف لوحة رسمينها تخلى التلاقى الروحى والوجدانى دة يحصل زى ما حصل معايا كدة مع سيادتك الحكاية مش مجرد مدونة وبوست وتعليق لا واللة دى اكبر من كدة بكتير بشكل انا مستغرباة ربنا يسعدك
تحياتى
انا معاكى لكن فين التعايش
فين حكمة التعامل
تحياتى
فعلااااااااااااا هي كميا ياعلا
بوست تحفه اوووووووووووي وفي وقته المظبوط
والله يا لولى انتى قلتى المفيد
هى مجرد كيميا
مش عارفة اقول كلام بعد كلامك يا جميلة
دمتى بسيطة ورائعة
Lady E
قولينا كلام مقولناهوش بقى
حد جاب سيره عرسان دلوقتى يا بت انتى
انتى بقى اللى بتتلككى و عايزه تفتحى مواضيع
هههههههههههههههههههههه
كلامك صح يا انوس
هيا برضه بتنطبق فى موضوع العرسان
من حيث القبول والرفض
منورانى
أحمد الصعيدي
فعلا لايبقى الا اعز الناس
كلام جميل بجد
مننورنى و يارب تتكرر الزياره
Single Mummy
ربنا يخليكى و يكرمك
الكلام ده ااكبر من انه يكون ليا
بس فعلا الكيميا بتتوافق كتير قوى مع ناس حلوه اتعرفت عليهم هنا لا يربطنا غير كتاباتنا و تعليقاتنا
انتى حد جميل و من الناس اللى اثروا فيا فى الفتره الاخيره
ربنا يكرمك و يقويكى
كلام على بلاطة
التعايش و حكمه التعامل بتبقى مع اهلنا و قرايبنا اللى مجبرين على التعامل معاهم
لكن الكيميا اللى بتكلم عليها هى اللى بتربط مصيرنا مع ناس مكناش نعرفها و عرفناها عن طريق الصدفه
ده كان قصدى
تحياتى
كيــــــــــــارا
يارب دايما كل حاجه تبقى فى وقتها
تحياتى
мαησηα
اهلا بالناس اللى بتهل علينا زى هلال العيد
و بتقول كلام احلى من السكر
مبسوطه ان الكلام عجبك
منورانى
صحيح هى الهرمونات بتتفاعل مع بعضها ولا ايه بالظبط
ولا يمكن دي كيمياء عضوية مش حيوية
بما انك صيدلانية هاتيلنا انتى بقي الخبر المفيد
تحيتى القلبية
فعلا كميا يا لولو يا قمر :)
وحشااااااني موت بجد جدا اوي خالص
وواحشني الرغي معاك يا حبي
انا فعلا ساعات كميتي بتتظبط مع ناس
وساعات بتكن كميا نووية .. وانفجر في وشهم
اخباراتك ايه؟؟
طبعااااااااااا كميا وفزيا واحياء
فى حد كل الناس يقوللك عليه شعر لكن اول ماتشوفيه او تتكلمى معه بتلاقى لاء مافيش اللى اتقال
وفى حد الناس تحذرك منه وبردو لما تشوفيه ماتلاقيش اللى اتقال
كل واحد بيمل للانسان اللى بيلاقى فيه ولو جزء من نفسه او جزء بيكمله
والقلوب بين اصابع الرحمن يقلبها كيفما يشاء
فى ناس كتير عرفتهم وتخيلت اننا كميا واحد وتركيبه واحده لكن مع الوقت بتكتشفى اختلاف كبير
فعلا زى ماقولتى مش عيب فيهم ولا فيا
لاء كميا ماركبتش نتيجه ردود افعال او مواقف معينه بانت مع الوقت
معنى كده ان مش ديما الكميا الاولى او الانطباع الاول يدوم
انما الكميا الاولى هى اللى بتخلى الانسان عنده استعداد يعرف الشخصيه دى ولا لاء بس مش شرط نفس الكميا تدوم
بيحصل اختلاف فى التفاعلات ووجه النظر بتتغير او بتستمر الكميا بنجااااااااااح
وعلى راى حليم
على طول الحياه هانقابل ناس
ونعرف ناس ونرتاح لناس عن ناس
هده هى الحياه
تسلمى على البوست يالالا
تقبلى مرورى
بس عايزة اعرف منك يالالا ليه الرقابه على المصنفات دى
دى معذبنا عند ست الستات
وكتير بتضيع للناس تعليقتها
فكرى وراجعى نفسك يمكن تشيليها بدل ماتشلنا هى
ههههههه
انا اول كيميا حصلتلى
كانت مع ابو طارق
بتاع الكشرى
لمة افتكر الكيميا السلبية هقولك عليها
؟؟
عووووووو
وحشتينى
اسفه والله للتأخير لظروف النت
كلامك صح وسليم واتفق معاكى
هههههههههههههه بقى كده
هما العرسان دول مش بشر ولا ايه :)
صباح الورد
الأرواح جنود مجنده ما تجاذب منها أئتلف وما تنافر منها أختلف
فتلك هي أسرار الروح البشريه ولكن قد نأخذ إنطباعا أوليا عن أناس ويخيب الظن لاحقا ولكن الأولى والأعم هو أن الإنطباعات الأولى غالبا تدوم
جميل تحليلك يا دكتوره كعادة كل ما تكتبين
دمتي متألقة دوما
في أمان الله
أتفق..أنا فعلا فيه حد معين ممكن أحكيله أي حاجة رغم أني مشفتش طوال حياتي 10 مرات على بعض بعكس ناس قدامي أغلب الوقت وبرضه مش أقدر أتكلم معاهم براحتي
تحياتي
انتى فعلا من الزمن الجميل يس الحياه حتغيرك وقابلينى بعد خمس سنين (واحد اكبر منك بكتير9 لو بتحبى عبد الحليم اسمعى فاتت جنبنا بس اسمعيهابروحك مش بودنك
انتى فعلا من الزمن الجميل بس الزمن ده مش موجود الوقت سمعتى عبد الحليم في فاتت جنبنا بعدها غنى قدر احمق الخطى عموما يارب تفضل دنيتك وردىو شكرا على تحملك رزالتى
إرسال تعليق