السبت، مارس 20، 2010

ربيه بدل ما تسيبيه








النهارده يا جماعه كلامنا حريمى شويه كتييييييير

بس برضه الرجاله ممكن يأنسونا و يتفضلوا معانا

البنوتات الامورااااااااات اللى معانا هنا

الكلام النهارده ليكم انتوا اكتر



لو حضرتك بتحبى وواقعه فى الحب لشوشتك

و اللى حضرتك بتحبيه

بيحبك ........اه

بيموت فيكى...................اكييييييييييييد

بيعشق التراب اللى حضرتك بتمشى عليه..........................و ماااااااااااله

طول النهار بيشعر فيكى و هاريكى قصايد من الغزل العفيف و الغير عفيف........................و ايه يعنى


بس رغم كل ده الباشا عينيه زايغه

يعنى تبققى بتبصى على فستان فى فاترينه و تلاقى عينيه لفت على اول سنيوره معديه قدامه

لما تدخلوا مع بعض اى مكان تلاقى نظراته ماشيه مع الفساتين اللى معديه


طب ايييييييييييه بقى؟؟؟؟؟؟؟؟؟؟؟؟؟؟

يا ترى حتتعاملى معاه ازااااااااااااااااى؟؟؟؟؟؟؟؟؟؟؟؟؟؟؟

حتعملى نفسك مش واخده بالك و تطنشى خاااااالص حفاظا عى كرامتك


و لا حتمسكى فى رقبته كل ما تلاقيه بيبص على واحده و تعمليله جرسه و فضيحه كل شويه

و تتمنى لو معاكى مسمار عشره سنتى تدبيه فى عينيه الاتنين


انا عن نفسى باحس ان الراجل اللى زى ده راجل غلبان آخر حاجه

و يا حرااااااااااام مكشووووووووف على الاخر فى كل تصرفاته

طب بذمتكم لو هو من النوع الخبيث مش كان يعرف يدارى تصرفاته

بالعكس دى كل حركاته و تصرفاته واضحه و على عينك يا تاجر

ومن وجهه نظرى المتواضعه ان الراجل اللى زى ده بقى كده

عشان ملقاش ست تحتويه و تحبه بطريقه مختلفه و متميزه

تخليه ينسى الدنيا كلها و يبقى معاها هيا و بس




طب يا ترى الحل اييييييييييه؟؟؟؟؟؟؟؟؟؟؟؟

معتقدش انك حتغمى عينيه بايشارب و تمشى فى الشارع جاراه من ايده عشان ميبصش لحد

الحل انك لازم تتكتكى و تفكرى و تدبرى كويييييييس قوى

ازاى تلفتى نظره ناحيتك انتى و بس بكل طريقه و اى طريقه ممكنه و مستحيله كمااااااااااااااان

و طبعا الطريقه حتختلف من راجل لتانى و كل واحد حسب شخصيته و اهتماماته

يعنى بيحب الاغانى احفظى يا ستى الاغااااااااااانى كلها و افضلى غنيله طول النهار

بس ابعدى و النبى عن اغانى شعبوله عشاااااااان العكوساااااااااات

بيحب السفر و الرحلات و الخروج سافرى و اخرجى و اجرى معاااااااااااه لغايه ما تقعى انتى

و هو من طولكم من التعب

بيحبك هاديه و ساكته و ماااااااااااااله اسكتى

بس السكوت اللى من دهب مش السكوت السلبى العبيط اللى يخنق و يغيظ

لكن اهم حاجه لا تراجع و لا استسلاااااام


لازم تتعبى عشان تحافظى على حبك يا بت انتى و هيا

مش عيب ان عينيه زايغه

مش عيب انه شقى و بيحب التغيير

العيب انك تستسلمى و تسيبى اللى بتحبيه عشان عيب بسيط زى ده


طب تصدقوا بالله انا باحس ان العيشه مع راجل زى ده حتبقى لذيذه قوى

لان الست اللى حتعيش معاه حتبقى عينيها فى وسط راسها

و على طول مهتمه بنفسها و بتدور ورااااااااااااه و بتلف معااااااااااااه

عشان مش يبص كده و لا كده



و ساعتها لا حتحس بفراغ و للا ملل

بالعكس حتبقى حياتها


تشويق و اثاره و متعه

هناك 80 تعليقًا:

آيوشة يقول...

والله يادكتورة فيه بعض العيوب فى الرجالة مش بتتغير يعنى اللى عينه زيغة بيفضل فى الاغلب كده
بس طبعا زى ما حضرتك قولتى الست هى اللى بايديها تغير منه كتير وبذكائها تغير منه بالتدريج
هو يجى وانا مستعدة اغيره 360 درجة
بس ييييييييييجى :))

adel يقول...

عينه زايغة

تعرفي انا لو ماشي مع ملكة جمال ابو اتتاه
ولقيت واحدة عينها حلوة او شعر حلو
تلقائيا ببوص عليها
مش معاكسة
بس هو ربنا خلق الجمنال ليه ؟
مش عشان نستمتعبيه و نشوفه
اكيد البصة مش معناه اني عاوزة اضرب معاها ورقة عرفي
دي بصة !!!!!
بس الممنوع مرغوب
يعني لو واحدة عمالالي فيها شارلوك هولمز و فاكرة نفسها مش هتخليني ابص
وربنا اجيب البنت دي تقعد معانا :):)

غير معرف يقول...

طيب انا بحب واحدومش عارفه افهمه انى بحبه ازاى
تقدرى تقولى عليا خيبتها فى الموضوع ده

عاشقه الرومانسيه يقول...

وانا ايه اللى يخلينى اتجوز واحد يخيلنى رايح جاى يبص على دى ودى
هو انا ببص لغيره؟
يبقى هو كمان يحترم نفسه
وعموما كده كده من ضمن جهازى فى ساطور حلو كبير كده واكياس سودا
وهاجيب نسخه من فيلم المراه والساطور افرجه عليها ليله الدخله
هيمشى بعدها مستقيم اللى باقى من حياته
بزمتك مش فكره؟

إيمان يقول...

هههههههههه يالهوووى يادكتورة انا لو فى الموقف
وخطيبى مستقبليا عنيه زايغه
من الاول هافركش
بس لو اتكشفت ده بعد الزواج
هابص معاه واشوفه بيبص على ايه ههههههههههههه ونتشارك فى الاراء واحاول احلل له العقده دى ...بس مش هاعقدها يعنى الجمال مخلوق وابداع ربنا فائق فعادى نتفرج هههههههههههههه بس هاغيظه واقوله شوف الواد الموز ده ههههههههههههه
وعلى راى المثل اللى خدته القرعه تخده ام الشعور ههههههههههههه
عملت فيها خالتك ام حسن اهوه
لاء بجد زى ماقولتى ومتفقه معاكى ان اللى عينه فضحاه غلبان ..بوست جامد جدا وبيحصل انا باشوف خلافات وفى الشارع بسبب الموضوع ده
مع خالص حبى وحبى

سمع هوص (Abo 3li) يقول...

لالالالا يدكتورة علا... انا معترض علي اسم البوست.. "ربيه"؟؟؟ هوا احنا ناقصين تربية ولامؤخذة ولا ايه؟؟... لع.. احنا صعايدة زي بعض.. ومنقبلش الكلام ده...
ممكن تغيري الاسم وتخليه "علميه الادب بدل متسيبيه"... هههههههههههههه..

نروح للجد..
عارفة يادكتور .. المشكلة الاكبر بتكون ساعات في ثقة الست في نفسها.. يعني ساعات الراجل مبيكونش بيبص علي حد.. مجرد عينه جت منغير قصد علي حد قدامه... وممكن ميخدش باله اصلا الحد المعدي قدامه ده راجل ولا ست... بس تلاقي الست ال معاه عملت من الحبة قبة.. وكأنها ظبطتو بيخونها في عش الزوجية..

ثم بصراحة برضو.. مهما كانت الست حلوة ومتجددة.. برضو الواحد بيحب ياخد فكرة ايه اخر تطورات الجنس الناعم..

تحياتي

لــــ زهــــــراء ــــولا يقول...

علااااااااااا
-*-*-*-*-*-

الاغنيه تحفه بجد وبامووووووووت فيها

اما بقى البوست ربنا يستر ومش يغير وجهة نظرك فيا بعد الكلام اللى هاقوله ....
لو حبيت بجد وهو كمان حبنى اوى كل عيوبه هتكون بالنسبه ليا مزايا وعمرى ما هاشوف فيه اى عيب ...

ايه المشكله انى اهتم به شويه زياده وبكل حاجه بيحبها نوع فيلم الكاتورن اللى بيحبه , نوع الشيبسى اللى بيحبه , اى حاجه تقربه منى وتقربنى منه .....
بصراحه لو عيونه زايغه اكتر من اللازم وعامل زى التييييت يبقى مالهوش حل معايا غير انى اخلعه وانتى عارفه انى اعرف محاميين كتييير يقدروا يساعدونى فى موضوع الخلع ....
بصى على فكره انا انثى برج الجوزاء يعنى فيا كذا شخصيه صعب اوى اللى يحبنى يبص بره معلش بقى تقولى غرور او ثقه زياده هو ده حالى واللى مش عاجبه يشرب من البحر على فكره البحر بينى وبينه 7 دقايق يعنى ممكن اوصله لهناك وارميه فيه كمااااااااااان...

زهراء

لــــ زهــــــراء ــــولا يقول...

ازيك يا لولو يا احلى صيدلانيه فى الدنيا
بالنسبه ليا انا صعب احب حد مش شايفنى وشايف حد غيرى ما ينفعش مش ممكن اقبلها على كرامتى
اما يحبنى انا ويشوفنى فى عيونه احلى واحده فى الدنيا او ما يلزمنيش
ما ينفعش انى ما اشوفش غيره فى عيونى وهو يشوف واحد غيرى

واللى يبص فى مره لبره خاين بعنيه

لـــولا

sony2000 يقول...

طب تصدقي بأه ان عندك حق
ودا يندرج تحت المثل القائل بأن رب ضااااره نافعه
ههههههههههه
تقبلي مروري وتحياتي

الزهرة البرية (Joudy) يقول...

نصيحة حلووووة موت يادكتورة هو فعلا الراجل فى الغالب بيبقى عايز يكون معاه حد فاهمه فاهم بيحب ايه وكلامك صح عايز حد يحتوية ده اللى هو كده زى ما قولتى مش خبيث يعنى حركاته مكشوفة ممكن تتعالج

تسلمى على النصايح يا دكتورة

دمتى بكل الخير والسعادة

ahmed_k يقول...

ربنا يوعدنا ههههه

كلامك جميل يا دكتوره ورأي من عقل ناضج فعلا

تقبلي تحياتي

Che يقول...

حرام عليكى يا دكتور ... هتبقو انتو و الزمن علينا .... و بعدين لو لقته بيبص تسيبه بيبص ... المهم اخر الليل بيروح مع مين البيت عشان يغسل المواعين

صيدلانيه طالعه نازله يقول...

آيوشة

ايوه طبعا الست هيا اللى بايديها تغير من الراجل
اقولك ازاااى

يعنى لو كان ماشى جنبها و لقيته بيبص لواحده جنبهم تروح زاغداه فى كتفه
لو حيعدى قدامها و لقيه بيتلفت لحد تانى تحط رجلها قدامه و هو حيكون طبعا مش شايفها حيروح مقلوب على وشه
ههههههههههههههههه

مش بقولك الست بايدها تغيره

و متخافيش يا اختى حييجى حيييييييجى بس العبره بالخواتيم يا اختى

صيدلانيه طالعه نازله يقول...

adel

تجيب البت تقعد معاااااكم فييين بالضبط

و كمان حتجيب لبنتى ضره من قبل حتى ما تلبسها دبله

ماااااااشى يا عاادل

بانت لبتك بعد ما دااااااابت قشرتك

سواحة يقول...

:-)) بما انى مش خبيرة
يبقى ايه
يبقى اجى انط افتى
بقال زمن مريحة المدونة ديه من شقاوتى
و لقياها مترتبة كده و نظيفة
لازم و لابد اذا ان انكشها شويتين و انعكشها و اقلبها :-)))
مش كده و لا ايه؟؟

اولا كل سنة و انت و ولادك و جوزك كمان طيبين (اصلك من المصتحقين بالتهنيئات :-)) و عليه امضى لو سمحتى هنا انك استلمت التهنئة
و دلوقتى ندور بقى
الراجل ابو عنين زيغة ماشى مقبول النصيحة
طيب الراجل الى عنيه غمزات نعمل فيه ايه ؟؟؟ نأخذه لدكتور عيون يلزقهمله ؟؟؟

بصى يا لولة
اعتقد الست نمرة واحد
تتأكد ان الباشا بتاعها بيحبها مش بيمثل :-( اصل لو مبيحبهاش بجد حيفضل يدور مش بس بعنية و بدماغه و احساسه
لانه حيطلع فيها من جواه كل القطط الفاطسة و يقول انه طول حياته بياكلها الزلط و هو اصلا بياكل زبيب

ثم هى تعمل ايه ؟ تحبه بسيطه
الى بيحب بياخذ باله من حبيبه بيحب ايه؟ و بيكره ايه ؟
بيتكلم امتى و بيسكت امتى ؟
و عليه هى لو عايزة تريحه حتريحه و لو عايزة تطنشة حتطنشة و لو عايزة تنكشه :-) حتعرف تنكشة
و حيبقوا فى حالة حياة
و جوازهم فى حالة سكينة مش سكون

بس كفاية كده
دماغى بتوجعنى من الفتى ده كله

اه صحيح :-)) فكرتينى
نسيتى جزء اعمليه بوست جديد او تحديث
لما الراجل يتعاكس و هو ماشى مع المدام هى تتصرف ازى :-))؟

بجد و الله
انا اخويا و هو ماشى معايا قبل الجواز (و بذات فى حالات الوجه المحلوق و اللبس المهندم ) بيتعاكس و انا كنت بطنش :-)) و الاقى الحلوات الصيعات بيبصولى بدهشة انى ساكتة

بس بعد ما اتجوز اخذى هو و مراته للسنيما و كانوا ماشين قدامى و بيتفرجوا على محل جزم و لاقيت بنات بتعاكسه كالمعتاد بس هو خذ عليها نغزة قوية فى جنبابه :-) و انا قعدت اتفرج على خناقة
المدام زغلانه و هو بيضحك لانه مش عارف غلط فى ايه ؟ و هى زعلانة انه بيضحك ؟ اعتقد كانت عايزه يشخط فى البنات :-))

المهم حاليا شكله من الشغل و الطاحونة ميتبصش فى وشه اساسا :-( فاعتقد استريحت و هديت اخيرا :-؟ اعتقد

صيدلانيه طالعه نازله يقول...

غير معرف

ههههههههههههه
طيب يا خيبتها
حاولى تفهميه بالنظرات باللفتات
بس بلاااش و النبى الصمت الرهيييب

المهم وصلى المعلومه باقل خساير ممكنه

صيدلانيه طالعه نازله يقول...

عاشقه الرومانسيه

دودو اعتقد انك دخلتى بوست غلط يا حبيبتى

انا عنوان البوست بتاعى ربيه بدل ما تسيبيه

مش ادبحيه و ارميه للكلاااااب
ههههههههههههههههههههه

بلاش يا دودو الغل و الحقد ده فى التعامل

خليكى رومانتيك

وش مطلع لسااااانه
ههههههههههههههههههه

صيدلانيه طالعه نازله يقول...

emymony

احب انا البنت اللى تفكر كده يعنى لا تراجع و لا استسلام
و زى ما بيغيظك غيظيه

و كويس انك معايا فى ان الشخصيه اللى زى دى بتبقى طيبه و غلبانه قوى

منورانى

صيدلانيه طالعه نازله يقول...

سمع هوص (Abo 3li)

لا و الله عينه جت على حد تاااانى من غير قصد
يا حرااااااااااام
تصدق دموعى نزلت

و بعدين رجعت تقول الواحد يحب ياخد فكره على اخر التطورات فى الجنس اللطيف
البوست حيتغير لادبحيه و كيسسيه و سيبيه لصاحب نصيبه

عاجبك و لا مش عاجبك

صيدلانيه طالعه نازله يقول...

لولا وزهراء

زهراااااااء

تبعنا يا فندم جوزائيين زى بعض يعنى كذا شخصيه مع بعض فى نفس الوقت
ههههههههههههههههه
يعنى امرأه متجدده و متنوعه

فعلا اللى تحب حد بتحاول تلم بكل ابعاد شخصيته و تسأله عن اللى بيحبه و بيكرهه و اسأل اصحابه عن الحاجات اللى معرفتش اوصلها

بس بعد كده لو برضه فضل زى ما هو لا البحر ساعتها حيكون قليل عليه
المحيط حيفيده اكتر

حيث اسماك القرش و الاخطبوط و الحوت الازرق
ههههههههههههههههههههههه

عجبك كده دخلتينا فى عالم البحار

سمع هوص (Abo 3li) يقول...

عاجبني طبعا يفندم وانا اقدر اتكلم ... برحتك... ادبحيه.. كيسيه.. ارميه للقطط.. انتي حرة يادكتورة في النصيحة ال بتقدميها للستات.. وذنب الرجالة ال هيتكيسو في رقبتك.... اهم حاجة ال هتجوزها مش هخليها تيجي تقرا البوست... ههههههه...

صباح الفل يادكتورة علا

صيدلانيه طالعه نازله يقول...

لولا



واللى يبص فى مره لبره خاين بعنيه

سيبك انتى الجمله دى انا باموووووت فيها
تحسيها حكم و الله
بس هو مش بيبص بمعنى بيدور على حد غيرك
هو بيبص عشان عينيه بتتلفت لوحدها
هههههههههههههههههه

يبقى بشويه اهتمام اكتر منك حيبقى فله شمعه منوره و الله

و بعدين استنى عليه مع اول بيبى نفسه حتتسد عن الدنيا كلها و حتبقى اخر اهتماماته البامبرز و البيبى اويل

هههههههههههههههههه

صيدلانيه طالعه نازله يقول...

sony2000

رب ضاره نافعه !!!!

ازاااااى يعنى؟؟؟؟؟

صيدلانيه طالعه نازله يقول...

الزهرة البرية

جودى يا جميله
هو فعلا حد طيب و لو خبيث مكنش حيبقى مكشوف قوى كده

شويه اهتمام زياده و حيبقى اخر جمال

منورانى

صيدلانيه طالعه نازله يقول...

ahmed_k

يوعدك بأييه بالضبط
باللى تبص عليها؟؟؟؟

عندك كتييييييييير فى الغردقه

و الا اللى تفهمك و تحتويك؟؟؟؟؟

حدد كلامك و خليه وااااضح و محدد

منورنى

صيدلانيه طالعه نازله يقول...

Che

اذا كان حيغسل المواعين يبقى خلاص مفيش مشكله

يبص برااااحته

تحياتى

صيدلانيه طالعه نازله يقول...

Wanda

ازيك يا واندتى يا جميله
واحشاانى و الله

اللى عينيه غمازات مش محتاج نلزقهم محتاج نخلعهم و نرتاااااااااااح

و بعدين مرات اخوكى كانت عايزاه ازاى يزعق للبنات
ده هو تلاقيه كان طااااااااااير انه بيتعاكس و عامل قدامها الواد الغلبان

و بعدين كويس انها زغدته فى جنبه بس

كان لازم يعنى يحلق دقنه و يلبس شيك
ماله يونيفورم عم سيد الزبال ماهو حلو و شغاااااااااااال

رجاله بتجيب الكلام لروحها

صباحك سكر

صيدلانيه طالعه نازله يقول...

سمع هوص (Abo 3li)

و لا يهمك انا حابعتلها البوست دليفرى مكان ما تكون

يا فندم انت حد طيب و احنا نخدمك بعنينا

عنوانها ايه بقى

سمع هوص (Abo 3li) يقول...

تسلم عنيكي .. لأ خدومة خدومة يعني..

عموما احنا قلبنا ميت ومبنخفش من الحريمات...
والعنوان: ورا محطة البنزين

adel يقول...

كل سنة و انتي طيبة ياحماتي
لا لا نمشيها ياماما النهاردة :)

خدي دي هدية مني
http://www.youtube.com/watch?v=Ki2LpPuorTA

فاتيما يقول...

خياااااااانة

البوست دا طلع امتى ؟؟


انتى كاتبه بتعليقاته كمان ؟؟

ماشى ماشى

هعديها عشان عيد الام بس و البوسة اللى خدتها ع الصبح دوختنى دى


اولا انا قريت اول سطرين لقيتك بتقولى يبص ع الفساتين اللى معدية؟؟؟


هوه فيه بنات بتلبس فساتين الأيام دى ؟؟؟

مبلاقيش خالص
و انا نفسى مرة اروح اشترى فستان كله بنطلولنات و جيبات و بس

كدا البوست اتنسف
و انتى بتظلمى الردالة الغلابة


ثانياً بقى انا مع عمرو che و الله جاب اللى فيها هوه و عادل

البصة مش مشكلة يا ستى
سيبيه يبص
المهم ف الىخر بيروح مع مين
نسيبله مساحة من الحرية برضو
غلابة و النبى

ثالثاً بت يا دودو

المرأة و الساطور ليلة الدخلة ؟!!
احنا عاوزين نشوف حل للبت دى يا علا
كدا مينفعش
ريا و سكينة متغلغلة فى نفسوياتها جامد و لا انا متستهيألى ؟!!
اسكندرية الماريا كارفة خالص
ابقى فكرينى لما ييجى ابن الحلال نشيل الساطور من الجهاز من غير ما هيا تاخد بالها


و معلش سامحى عادل دا غلبان و بوء ع الفاضى و الله و بعدين البنات هيا اللى بتعاكسه و هوه ملوش ذنب يعمل ايه فى نفسه و هوه امور و شبة احمد صلاح السعدنى و ابنى بقى و محدش يفتح بوقه ..هيه

و متخافيش
شادن هتعرفه ان الله حق
دى الغزالون يهبلون اللى هتاخدلنا حقنا كلنا يا امى


و بمناسبة امى

كل سنة و انتى حبيبتى و اختى و خالة يوسف و صديقتى الغالية اللى مخضوضة دايما عليا و مبطلتش تيأس منى

بحبك يا ست انتى قوووووووووى

richardCatheart يقول...

هههههههههههههههههههههههههههه

حلو البوست حقيقى وخفيف

بصى الحمد لله الحاج ريتشارد مابيعملهاش

مش لانى اجمد ست ولا لانه ملاك بس لانه مابيعجبوش العجب نوهااااااااااائى


وعادتا انا اللى بنكشه واقعد اقوله

الله بص الموزه دى احيييييه بص المكنه دى ههههههههههههههههه

وهو يفضل يضحك اه انا بحب الجمال وبحب اعلق عليه سواء على راجل اوست مابتفرقش وديما رده عليا ايه دا دى حلوة ههههههههههههه


بس مين اللى قالك ان الراجل اللى بيبص
ومابيداراش دا غلبان لالا طبعا دا بجح
وطبعا شوفنا من دا كتييييييييير
دى بجاحه مش همه وطبعا الست اللى بتتجوز النوع دا مهما عملت واخدت بالها من شكلها ولبسها مافيش فاديه
البصبصه فى الدم يا لالا زى البلازما
لازقه بغرا ومالهاش علاج ولاحل غير ربنا يهدهم او يهديهم هما ونصبهم بقى ههههههههه

ربنا يهدى الرجاله المضروبه دى لستتها
ومايوقعش البناويت اللى هاترطبت فى حد فيهم
تسلمى على البوست الجميل دا
تقبلى مرورى

ستيتة يقول...

والنبي انتوا ستات كوارك
فين ايام ستهم وأم السعد
الستات الكينج كونج مش خرونج

قال لو بص مش عارفة شوفي ايه واعمليله ايه وسوي له ايه
وجددي له نفسك
نوووووووووووووو
نووووووووووووووووووووو

يا عبد المعطي
ياااااااااااااا عبد المعطي

ده لازم يبص يا عبد المعطي
مش دي فطرته
يعني هو انتي ها تمشي معاه في الشارع صبح وضهر وليل؟
ويا سلام لو كنتي فنكي وبتقولي له "بص الموزة القمر اللي هناك دي يا بابا"
وانتي اشاسا عارفة انه نقرها من قبل ما تظهر على خريطة عينيكي
لأنها من نوع جاهزة يابا
يرد هو يقول مفيش موز غيرك يا دميل
تقولي له لأ هي موزة موزة مفيش كلام
بس انا بره المنافسة يا كوكو وانت عارف ومش محتاجة اقرار منك أو نفي

لكن ألف وراه
دوخة لما تدوخه
ما يلف ويلف
ها يروح فين يعني
على رأي مسلسل هو وهي
لازم يجيني تاني
ها يروح فين يا ولادي
برضه مسيره جي :)

وإيه أغيره دي إن شاء الله؟
ها أعيش أنا مع أختي في الرضاعة مثلا
مش راجل؟
يبقى يبص
ويلوم نفسه
ويستغفر ربنا
ويعرف ان الأولى ليه والتانية عليه
وتكون القصة بينه وبين ربنا وغض البصر ده هدف داخلي مش بسلاح الردع الستاتي القديم "المقشة" :)

كل سنة وانتي طيبة يا كميلة

خواطر شابة يقول...

انا اتفق مع الدكتورة ستيتة قالت اللي نفسي اقوله بجد
كل عيد ام وانت طيبة وبخير

E-commerce يقول...

انت ممكن تضع اعلانات على مدونتك وتربح منها الاموال كما انا افعل فى مدونتى ادخل مدونتى وسوف ترى الاعلانات ممكن انت كمان تضع اعلانات وتربح اموال http://international-e-commerce-e-commerce.blogspot.com/
وهذا اللينك اربح الاموال ووضع عداد عالمى فى مدونتك
http://friendfinder.com/go/g1214733
ولما تعمل اعلانات تخش على مدونتى وتضغط على الاعلانات واربح الاموال وانا ادخل على مدونتك واضغط على الاعلانات وتربح الاموال

Mahmoud البطراوى يقول...

اقولك على حاجه تانيه
فى ناس مش متجوزه ومش بتبص على اللى رايحه واللى جايه
ليه؟
لانه بيحس انه بيعمل حاجه حرام او على الاقل حاجه غلط
حاجه كويسه ان الستات يسمعوا كلامك فى اقتراحتك دى
بس الاقتراحات ناقصه انها تحط ايديها فى ايده ويقربوا اكتر لربنا

غير معرف يقول...

السلام عليكم
ازيك يادكتوره
انا عارف ان القعده بناتى شويه المره دي
بس ممكن اتشرف بالتعليق

طبعا انا معاكي جدا فى ان الست اللى جوزها عينه زايغه تحاول باقصى جهدها تساعده على انه يبطل العاده دي

يعنى ممكن عن طريق الاهتمام به
وبرضه تذكيره بغض البصر
وبرضه مفيش مانع من تنبيهه كل كام مره او مره ومره
اصل لو نبهتيه كل مره ممكن تقلب بخناقه
لا قدر الله

وان شاء الله حاله يتصلح
احييكي على فكره عدم الاستسلام
لانه ممكن يكون حالته محتاجه اهتمام شويه وخلاص
ومفيش حد مننا كامل
ربنا يسعد الجميع
ربنا يكرمك ويوفقك

غير معرف يقول...

هههههههههههههه

والله بينى بينك لو لسة موصلتش للمرحلة دى يعنى لسة اولى جامعة
مش عارفة لو عينه زايعة بس ممكن نقعد مع بعض كده بهدوء وببساطة من غير ما نخبط فى الحلل ونحكى فى الموضوع واقوله مثلا كذا بتعمله وبيضايقنى او بتعمله ليه واشوف رايه فيا فى ايه مقصره فى ايه ممكن اكون احسن وفى ازاى يحب يشوفنى بس برده بالمقابل انا هقوووووووووول راى فيه وفى تصرفاته بس بهدوء برده

ومرة اتنين نستحمل نصبر نحاول نحل المشكلة لو لاقيت بقى انه بيستهبل والموضوع اتطور وملوش حل
لاااااااااااااا كده بقى انا هاجى على نفسى و وقتها يبقى فى حل وموقف لازم اخده ونتفق لو رجع تانى للحركات المش مضبوطة دى يبقى كل واحد يروح لحاله
ده فى حالة عملت كل اللى عليا وهو زى ما هو
الا صحيح
هى الحالة دى هى بتاعة ديل الكلب عمره ما يتعدل

انا لو حد اد نصيحتى فى حاجة مؤكد هخرب بيته هههههههههههههه

Guevara يقول...

نايس بوست بس مش شايفه انك متجنيه على الراجل اللى بيبص

اهو بيبص

العيب على اللى ماشيه بضيق او قصير او ديكولتيه

انتى متصوره ان الراجل بيبص عشان عينه زايغه

ظلم ظلم ظلم


الراجل بيبص عشان بيحب حبيبته

غريبه ؟؟

هافسرلك زمان الشاعر عشان يتغزل فى حبيبته كان بيبص للطبيعه و يستوحى صوره و بلاغياته

دلوقتى مع تكدسنا و ازدحام المحروسه و اختفاء الأخضر و اليابس كمان

معدش فاضل من الطبيعه غير المزز .. قصدى البنات فبنبص عشان نعرف نتغزل فى اللى بنحبهم بنفس

و دمتم

أحمد عبد الحميد يقول...

حلو البوست يا دكتورة
أنا لازم أخلى مراتى تقراه علشان تسيبنى ابص براحتى ... يوووووه قصدى علشان تغبر من نفسها كل شوية

Lady E يقول...

عايزة اقولك ان تعليقك في مدونتي رفع معنوياتي وخلاها في السما

وده بيدل على انك انسانة جميلة ورائعه بجد يا أحلى د.علا لأن اللي بيشوف حد حلو فهو كده فعلا من جواه علشان كده شايف كل الناس زيه

نيجي بقى للبوست بالنسبة للحبيب اللي عينه زايغه لو لسه حبيب
او خطيب وبالطريقة دي فأنا أكيد أكيد هخلع وأقول يا فكيك لأني زي الفريك مبحبش يبقى لي شريك في حبيبي وبعدين يعني ايه ابقى مش شايفه غيره وهو عينه زايغه دي اكتر حاجه تطعن البنوتة أو المرأه عموما في أنوثتها
واللي بيص لبره فمره خاين بعينيه

اما بقى موضوع ان جوزي يكون كده فأنا مش متخيلة انه يبقى كده اساسا لأن اصون كرامتي من قبل حبي
عينه زايغه يبقى يروح ل اللي بيبصبص لهم وميتجوزش ويظلم زوجته معاه

Lady E يقول...

كل عيد أم وانتي بخير وصحة وسعادة

ربنا يسعدك ويكرمك ويفرح قلبك انتي وكل اللي بتحبيهم

عجبني تعليق دكتورة ستيتة بس مش عارفه مستقبليا هقدر أطبقه ولا لأ :)

!!! عارفة ... مش عارف ليه يقول...

أولاً
كل سنة وأنت طيبة

ثانياً

عندك حق فعلا

الحياة دي هتبقى

فري إنترررررررررررستنج :)

blue-wave يقول...

يا سلالالالالالالالالالالالالالام
وجون وجون وجون وجوووووووووون:))
اقولك خلاصة الكلام
مش مهم عنيه مع مين
المهم قلبه مع مين
تحياتى

Foxology يقول...

ده ايه النصايح الجامدة دى ؟؟ :))))

مش عارف ليه حاسس انها بداية ثورة منظمة علينا نحن معشر الرجال الغلابة :)

تحياتى

صيدلانيه طالعه نازله يقول...

adel

ميرسى يا عادل على الاغنيه
انا بحبها قوى
و كل سنه و كل الامهات طيبين

صيدلانيه طالعه نازله يقول...

فاتيما

ماشيها فساتين يا اختى
امال حاقول باديهاات و استريتشات
عيييييييييييب

على فكره بتغاظ من حكايه يعمل اللى على مزاجه المهم بالليل بيروح على فين

يعنى اسيبه صايع يعنى و ابقى فرحانه انه جه البيت فى الاخر
نوووووووووووووووووو
اوبجيكشن با تيما

مينفعش

صيدلانيه طالعه نازله يقول...

richardCatheart

ايه ده انا زيك افضل اقوله بص البنت دى لابسه ايه
بص عامله الايشارب ازاى
و نلاقى نفسنا بنعاكسها احنا الاتنين
طبعا يا اختى
بيدى لا بيد عمرو

صيدلانيه طالعه نازله يقول...

وتكون القصة بينه وبين ربنا وغض البصر ده هدف داخلي مش بسلاح الردع الستاتي القديم "المقشة" :)


انا رأيى انه هدف داخلى و ميمنعش من استخدام المقشه كوسيله مساعده و اهى احسن من الاستعانه بصديق
هههههههههههههههههههههه
منورانى

صيدلانيه طالعه نازله يقول...

خواطر شابة

و انا متفقه معاكم انتوا الاتنين

كل سنه و انتى طيبه يا نوجا
منورانى

صيدلانيه طالعه نازله يقول...

بطوط حبوب

كلامك حلو و عاقل قوى يا دكتور
الحل فعلا هو مراقبه الله فى تصرفاتنا

منورنى

صيدلانيه طالعه نازله يقول...

م/محمود فوزى

استسلاااااام
نوووووووووووووووو

انا ضد الانهزاميه و التسليم بالامر الواقع

يا تتصلح بالزوووووووق يا اما الساطور اللى فوق جاهز و مسنووووووون

ههههههههههههههه

تحياتى

صيدلانيه طالعه نازله يقول...

star in the sky

هههههههههههههههه
اكيد ديل الكلب عمره ما يتعدل ليها علاقه بالموضوع

بس ايه العلاقه

الله اعلم

حبقى اسأل و اقولك

عاقله و الله

و شكلك عايزه تعيشى
منورانى

صيدلانيه طالعه نازله يقول...

Guevara

مممممممممممممممم

وجهه نظر برضه

العوده الى الطبيعه بمختلف صورها

منكم نستفيد

صيدلانيه طالعه نازله يقول...

بو حميد

بقى تسيبك تبص

ماااااشى ماااااشى

شكلك من النوع اللى حنستعمل معاه المقشه

خد بالك بقى من قشر الموز و انت معدى الشااااارع

صيدلانيه طالعه نازله يقول...

Lady E

انوووس

لا هو انتى كنتى مستنيه كلامى عشان معنوياتك تبقى فى السما

لا يا امى انتى كويسه و قوى كمان و من غير كلامى

شكلك من النوع بتاع اصون كرامتى
و اللى زيك يا نوسه حيتعب قوى فى دنيته

عشان نفرح فى عيشتنا لازم نقدم شويه تنازلات
بس برضه كرامتنا فوق كل شيىء

منورانى و مشرفاااااانى

صيدلانيه طالعه نازله يقول...

!!! عارفة ... مش عارف ليه

ايييييييه يا عم وليد

انترييييييييييستنج من اى ناحيه بالضبط

بدأت اقلق انا

منورنى

و كل سنه و ام مهند طيبه

صيدلانيه طالعه نازله يقول...

blue-wave

انهى كلام اللى عجبك بالضبط و خلااااااك مبسوط قوى كده عشان اشيله بسرعه
هههههههههههههههههههههههه

و بعدين انا قايله النهارده البوست حريمى
صحيح انا متعاطفه معاكم يا رجاله و باحاول اصور الموضوع انه طيبه و هبل منكم

بس مش عشان هيا عارفه قلبه مع مين يبقى عينه تتفسح براحتها

و لا ايه حضرتك:))

منورنا

صيدلانيه طالعه نازله يقول...

Foxology

اخيراااااا
حد فهم القصد الاساسى من البوووست

اوعى تقولهم بقى
و سيبهم على عماهم

تحياتى

كيكى عوووووو يقول...

هى روتانا سينما بهتت عليكى
والله مليش رائ
لان لسة الواحد محصلوش الكلام دة
فااذا انا متنع عن الرد
بس يجئ عينه زيغه مش زيغة
بس هو يجئئئئئئئئئئئئ
اهى اهى
اديها قلبت كايرو دراما
عووووووووو

ghada mOhsen يقول...

اول شى كل سنه وانتى طيوبه وبصحه وسلامه يادكتوره .. وربنا يخليكى لاولادك يااااااارب ...

ايه البوست التحفه ده ... بجد ضحكتينى كتييييييير ...

والله الرجاله دل يطلعوا الضغط اساسا .. مع انى لسه ماارتبطتش ... بس بجد مش بيعجبهم العجب .. والبنات برضو عشان مانظلمش ...

بس البصه ارحم من انه يعمل حاجه تانيه والله ... ان اقر واعترف بده ...

بس بجد عجبنى عنوان البوست اووووووى تحفه ههههههه

تسلمى يادكتوره بجد
... ;) ,,, ;) ...

صيدلانيه طالعه نازله يقول...

كيكى عوووووو

حيجى يا اختى
بس ساعتها منعيطش و نقول نسيبه

و عيل اللى يرجع فى كلامه

و اديها قلبت بانوراما دراما على الاخر

صيدلانيه طالعه نازله يقول...

ghada mOhsen

و الله انتى بنت عاقله
و مش داخله على خراب

يعنى انتى رأيك يبص براحته بس ميعملش حاجه اكبر

مممممممممممممممممم
ايه بقى الاكبر ده

Remas يقول...

صباح الخير ياقمر

كل سنة وانت طيبة

البوست بئا عسول بجد اوى

هو في راجل مش بيبص ياتوتة ؟
كلهم بيبصو مهما عملتى ومهما جددتى وغيرتى

بس في واحد زى ما قلتى طيوب وغلبان وبيبان عليه او مش هامه يمكن

وفي واحد ليئم ومس بيبان عليه

انا عن نفسي حتى لو حسيت انه بيبص بعرفه انه فهمت بس مش هامننى وانه عادى ايه يعنى لما يبص
ويعرف انى فاهمة ومش علقت مش لانى مش مهتمة او عدم غيرة بس لانى مش بحب اخنقه
ولا اخليه يحس ان دا بينرفزنى

بس الراجل اللى بيبص لازم يعرف ان مراته او خطيبته او حبيبتة ايا كان يعنى هى كمان بيتبص عليها من راجل تانى زى ما هو بص وهى من ان لاخر لازم تفكره بدا

من الاخر يعنى مهما عملنا مش هايبطلو بص
هههههههههههه

وحشانى ياقمر موووووووووت

r يقول...

بدايه اغنيه شرين جميله جدا
تعرفى انا سمعت برنامج ابيض واسود كان طرح نفس الموضوع وكانت اراء الرجال
غريبه جدا اما السيدات فكانت مستسلمه انها اللى غلطانه انه بيبص لغيرها
وكأن العيب عندها
بصراحه انا شايفه ان المشكله فى الرجل
سواء زوجته خطيبته مقصره ام لا
دا طبع كما اعتقد زى الخيانه كدا
وربنا يهدى

شفـقــة و إحســــان يقول...

مش عارفة اقولك ايه
ده نفس الموضوع اللى لسه كنت كاتبة عنه شوية ولكن موضوع متطور حبيتين
متطور من النظرة للكلام والخروج والخيانة بجد
بس صدقينى يا دكتورة احساس مؤلم اوى انك تحسى ان اللى بتحبيه بيبص لغيرك
وساعتها بتشكى فى نفسك وتقعد تدورى فى نفسك على اى غلطة علشان تلتمسيله العذر
المصيبة بقى لو اللى بيبص ده تطور الموضوع معاه وراح اتجوز عليكى
ساعتها هتملى وقت فراغك اوى بحرقة الدم والسكر والضغط اللى هيجولك
هههههههههههههههه
موضوع حلو جدا واتمنى اسمع فيه كل الاراء

أنا - الريس يقول...

أنا عندي حل هوا صعب شوية بس ده في حالة لو كان دي عادة عنده ، غالبا ده بيبقي نقص وانصح بحجتين الأولي اعتقد يتوافق عليها بصعوبة ، والثانية يتوافق عليها باستحالة :
1- يزور طبيب نفسي انت وهوا لأنه غالبا هيرفض لأنه هأكد انه سليم والعيب من الآخر .
2- إنه يتجوز لو ده اصبح مشكله تأرق الزوجة ، وعدم وجود حل .

أنا متأكد ان اغلبكم هيرفض كلامي.
بس أنا قلت لو الحالة اصبحت مرضية .
وأنا موافق علي الحل الأول .

shirry يقول...

بوست جامد عل فكرة
وفيه فكرة جديدة ونظرة مختلفة
او بمعني تاني بيبص لنص الكباية المليان
وبيحاول يملا النص التاني

Rosie يقول...

لا لا مش تشويق و إثارة..برده لازم يبقى عنده دم..بس هى طبيعة واضح..و عامة فى كل الأحوال..
......الست لازم عينها تبقى فى وسط راسها..

micheal يقول...

خلاص طالما العيب ده موجود يبقى شيل ده من ده يرتاح ده عند ده
:)
يا إما حتغني زي لبلبة
خطفوا حبيبي
:)
تحياتي

Lady E يقول...

الكلام لما يكون من انسانة جميلة زيك انطباعها عني لازم يفرحني طبعا رسمي فهمي نظمي


اللي بيحبك صعب يجرحك الا في اضيق الحدود غصب عنه
ولما الاقي اللي يستاهل التنازل هتنازل بس برضه في الحدود اللي متمسش كرامتي

صيدلانيه طالعه نازله يقول...

reem

اخيرا يا ريييييييييم

نورتى التعليقات يا قمر

شكلك من الستات اللى مش سهله يا ريم

اعرفه انى خدت بالى من غير ما احس انى متنرفزه

سوسه سوووسه

بس تصدقى ده اللى بينفع فى الظروف دى

منورانى

صيدلانيه طالعه نازله يقول...

بسنت

هيا فعلا لو فكرنا حتلاقيها درجه من درجات الخيانه

انا رأيى انها مشكله مشتركه بين الطرفين

بس ساعات بصراحه مهما الست عملت بتبقى طبيععه عند الباشا اللى معاها و مبيبقاش فيه حل

منورانى يا زميله

صيدلانيه طالعه نازله يقول...

شفـقــة و إحســــان

لو اتطور الموضوع لخيانه حقيقيه او جواز اكيد حتبقى مصيبه
بس معقول كل واحده جوزها يعمل كده يبقى العيب فيها هيا
ساعات فعلا بيبقى فيه رجاله طبعهم كده

مهما الست عملت معاهم
و مش مستاهله يجيلك سكر و ضغط و الامراض كلها عشان خاطرهم
ساعتها حيبقى خساره فيهم حتى التفكير

صيدلانيه طالعه نازله يقول...

MR.PRESIDENT

صعب قوى الحل ده

اصل فكره انه يزور طبيب نفسى يبقى هو مقتنع من جواه ان عنده مشكله و ده صعب قوى فى مجتمعنا

الراجل ساعات بيبقى مشكلته صحيه ويكابر و يقولك دكتور لييييه هو انا عيان

تقوم تقوللى نفسى

انت متفاءل قوى

منورنى

صيدلانيه طالعه نازله يقول...

shirry

اصل حنعمل ايه بالنص الفاضى
نملاه احسن
التفاؤل ضرورى لححل اى مشكله

انا شخصيا باحاول ابقى كده

صيدلانيه طالعه نازله يقول...

Rosie

ايوه فعلا

بس ياريت ترسى انها تبقى فى وسط راسها
و متخرجش من راسها

صيدلانيه طالعه نازله يقول...

micheal

لا شيل ده من ده احسن

هو انا حاستنى لما اغنى خطفوا حبيبى

نووووووووووووووو

مش انا خالص

صيدلانيه طالعه نازله يقول...

Lady E

انوس معانا و تالت كومنت و نقول الووووووووو

محدش يقدر يجى جنب كرامتك و انا عايشه
هيا الدنيا باظت؟؟؟؟؟؟

احنا اما بنتنازل يا ايناس بنبقى بنتنازل عشان ناس بننحبها و منقدرش نستغنى عنها
ز صدقينى اللى يحب بجد عمره ما حيقول كرامتى و كرامتك

حيلاقى نفسه ماشى فى الدنيا بس عشان يسعد اللى بيحبه

حتى لو جحه شويه بيقدر يسامحه

بس لو الجرح كبيييير انا معاكى مينفعش التنازل

Asmaa mahaba يقول...

يا دك ان شاء الله دايمه كدا بتدينا نصايح بس ربك يعفينا يا رب من الحدوته دى
البقاء لله لانى سمعت انكم عندكم حاله وفاه اعذرينى ع التقصير فى حقك

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .