بصوا بقى انا معترفه انى حقوده و شريره و نفسيتى سوداااااااا على الاخر
انا النهارده جايه و الشماته ماليه قلبى على الاخر
امبارح ماسكه الجرنان ابص فيه و مش لاقيه غير الاعلانات الممله
باضرب بعينى الاقى عنوان راااااااااااااااائع
قال ايه كارلا برونى بتنفى ان ساركوزى خانها
لوووووووووووووووووووووووووولى
طالما نفت الموضوع يبقى حصل يا معلم و حتلعب يا حمااااااااااااااده
اخيرا شهر العسل بين كارلا هانم و ساركوزى باشا خلص
و ان شاء الله حنقعد جنب الحيطه و نسمع الزيطه
طبعا كل النشرات الاخباريه ووكالات الانباء جابوا الخبر
و غالبا شمتانين زيى و اكتر
و بيتسابقوا عشان يلتقوا بكارلا هانم و يشوفوها و هيا مكسوره و زعلانه
و المذيعه سألتها الا قوليلى يا اختى و احنا ستات زى بعضينا و متتكسفيش
الا صحيح سى الاوستاذ بتاعك بص بره و بيعاكس البت شفيقه بيئه الفرنساويه
انا يا اختى مشفتش حاااااااااااجه دى الناس هيا اللى بتقول و انتى عارفه بقى كلامهم كتيييييييير
راحت كارلا هانم بصتلها و رمت شويه الشعر لورا و العرق الايطالى نقح عليها
و قالتلها نوووووووووووووووووووووو
جوزى زى الخاتم فى صباعى و عمره ما يبص بره لانه مش ملاحق على اللى جوه
و بعدين احنا متفقين ان العصمه فى ايدى و اى غلطه بوكس و على الشارع
و الشقه من حق الزوجه
امال انا خدته مصر قبل كده ليييييييييييه عشان اتعلم منهم النصاحه الحريمى على اصولها
و بعدين انا طول عمرى مروضه رجال و عدى عليا اللى يضرب ساركوزى ده بالشوز الاولد
بس النفس بقى و العين اما تعمى
المذيعه ردت عليها بس المفروض يا اختى متاخذنيش يعنى تفكرى و تفهمى
اللى يسيب ام عياله بعد ما وقفت جنبه و كبرته و خلته رئيس لفرنسا
و يروح لحته بت معصعصه متزعليش منى بس دى الحقيقه يعنى
يتخاف منه و معروف انه مالوش امان
و لا ايييييييييييييييييييييييه؟؟؟؟؟؟؟؟؟؟؟؟
و بعدين يا اختى المفروض تكونى عرفتى مدام روحتى مصر
ان ديل الكلب عمره ما يتعدل و لو علقوا فيه قالب
و المفروض برضه تفضك من حكايه الازياء و الاغانى و المسخره اللى انتى فيها دى
و تهتمى بالاستاذ بدل ما يبص بره و تبقى جرسه و فضايح
انا يا اختى بانصحك و انتى و دماغك بقى
هههههههههههههههههههههههههه
ده كان الحديث التخيلى اللى تخيلته بعد ما قريت الخبر
و طبعا كان بالفرنصاااااااااااااوى و طلعت عينى عقبال ما ترجمته
انا اصل الست دى كانت غايظانى على الاخر تقولوا حقد تقولوا غيره
قولوا زى ما تقولوا
المهم انى فرحانه فيها
و شكلها حتنسى الغنا و الرقص و تتهد و تتجه للسياسه
زى صاحبتها هيلارى كلينتون
و بكره نشوفها وزيره خارجيه قد الدنيا
و مش بعيد تتحجب و تقعد فى البيت
كانت معكم لولا هانم الشريره من امام المجلس القومى لحقوق المرأه الفرنسي
المشاركات
هناك 66 تعليقًا:
اول تعليق
احتلااااااال
زهراء
ههههههههههههههههههههههههههه ياصباح اريد حلا ههههههههه
والله ياختشى مش عارفه ايه الراجل ساركوزى دا اللى شبه عبد السلام النابولسى امال لوكان حليوه كان عمل ايه كان عمل الافندى ازمات دوليه
هى كلمه المتغطيه بساركوزى عريانه والدنيا كاس وداير اللى تاخد وحده من بيته ومن مدامته تستاهل سمعتها تبقى على كل لسان زمان الستات الفرنساوى ماسكين فى فروتها وعمالين ييقولو عليها ما فى الخمرههههههههههههههه طفشت الراجل
ولا بتطبخله ومش عايزة تخلف علشان جسمها مايضربش يلا خليها تشيل القفه كلها
انت عارفه يمكن انت وانا وغيرنا منغاظين منها مش حقد ماعتقدتش بس علشان احنا متجوزين ولانه ساب مراته علشانها وقعد يقول مراتى هى اللى طلبه الطلاق وشغل حجج القطط دا وهو كان مربط معها اساسا
يلا الله يسهلهم ادينا بنفرج على رايك
تسلمى وتقبلى مرورى
دكتوره علا
-*-*-*-*
ايه العنوان الجامد ده على الصبح كده
بلاش موضوع العين اللى رشقت الله يكرمك كفايه اللى حصل معايا بسبب العين دى
:(( :(( :((
اول مره اقرا لكى حاجه باسلوب ساخر بس حلو الاسلوب
شكلك مذاكره قانون احوال شخصيه كويس ياترى تعرفى حد محامى شطور امور ;)
تصدقى يا علا تنفعى تبقى مراسله صحفيه لاى قناة تى فى كبيره ايه رايك اشوف لكى الموضوع ده بس خدى بالك وقتها استديو القناه مش هيكون تحت البيت ;;)
المهم الست كارلا لما جت مصر تقريبا كده اخدت كورس جامد اخر حاجه فى كيفية معاملة الازواج وانتى عارفه ان الكورسات دى عندنا جامده اخر حاجه ونحن الشعب الاول على مستوى العالم فى هذه النوعيه من الكورسات :))
بصى بقى كل فتره عاوزه انك تكتبى لنا حاجه ساخره كده لان عن جد روحك حلوه اوى فى الساخر
ربنا يكفينا شر العين يا لوله
وكفايه اللى جرى من العيون الوحشه
وياريت يا ستى كل لعيون زى عيونك ;)
زهراااااااااااء
و مش بعيد تتحجب و تقعد فى البيت
هههههههههههههههههههههههههههه
لا لا جامد الحوار ده بجد
رهيب والنعمة
ههههههههههههههه
يالهوووى على النفسنه
يابنتى دعى الخلق للخالق
سؤال بس (بس امانة خطيبتي متعرفش الكلام ده)
بذمتك الطليانية دي وحشة و معصعصة ؟؟
يالهوووووووووي
طب ياستي انا راضي بيها كده بس تيجي
ههههههههههه
و الله أنتى عسل بجد ..
بوست ظريف أوى و دمه خفيف مووووت :)
تحياتى يا قمر
ليه فرحانه فيها .....ده احنا ستات زي بعض :)
عموما هو شكله صايع ... موش يركز مع فرنسا بدل ماهو موش فاضي غير للستات
اخرته هتبقى فضيحه زي كلينتون :)
تحياتي
يا عينى
يا عينى
لا فض فوكى
و مات حاسدوكى
بت يا لولاّ
انا عاوزة استلف عويناتك دى
فى كام حد كدا عاوزة اجيبهم الأرض
الله يكرمك
ممكن؟؟
انا كمان توقعت حاجة زى دى
اصل شكله بصباص و خباص
و عينه تندب فيه رصاص
و لا يقولش أى حتى
واصل اللى ربى خير م اللى اشترى
و لما عمل كدا فى القديمة
هيطلع اصيل مع الجديدة
بلا وكسة
تعيش و تعلقلنا على الأحداث دايما
يا جميل
الأسلوب تحفة انا فطست من الضحك لما قلبتيها حريمى مصرى أصيل و سبحان الله الست فى كل بلاد الدنيا فى الآخر ست
و الراجل فى كل بلاد الدنيا
راجل برضو عينه زايغة
و عاوز ساطور واكياس
مفيش فايدة
ياللنفسنة D:
ديما كدة الستات ظالمة الرجالة هههههههههههههه
طبعا لازم تخبى وتتدافع عشان كرامتها قدام المجتمع الروبى هههه
مع خالص تحياتى
يااااااااااااه علي الستات... ديما بيطالبو بحقوقهم سوا... ويوم ماواحدة فيهم تقع.. الباقي يفرحوا فيها... هههههههههه..
حلو اوي يا دكتورة علا انك قلبتي الست كارلا بنت بلد ... بس كان ناقص تخليها تاخد حاجة من قطره وتروح لواحد دجال يعمله عمل... انه يتعمي عن كل الستات...
اخيرا.. انا بعمل كومنت بأعجوبة... لأن ال لينك بتاع "ارسال تعليق" مختفي تماما عندي في اخر بوستين... وتقريبا مش انا لوحدي ال عندي المشكلة دي... احتمال يكون القالب...
تحياتي يادكتورة.. ومتبقيش تغيبي علينا كده..
كل الغل ده على الست الاميره كارلا دى ميطلعش من بقها العيبه و لا يمكن علشان البت لونه حبتين و تمثل تهديد لكل الستات المتجوزه و بقولوا عليها خطافه رجاله
عموما النفسيات بانت و الغريب انك مركزتيش على الراجل ساركوزى اللى تندب فى عينه رصاصه و ميملهاش الا التراب
تحياتى
حرام حدايه تشمت فى اختها
حرام ماحدش ضامن راجله
المشكله ان اللى بيعايب بيبتلى
وربنا يسترها معانا ويكفينا شر فضيحة ساركوزى
وعجبى
ايييه كمية الحقد دى كلها
بس الحوار لذيذ حوار ستاتى اووى هههههههههههههههه
لأ يا علا
مش ممكننننننننننننننننننننننننننن
ايه الحوار ده؟
هههههههههههههههههههههههه
ده فعلا كل دودة ودودة قد الحنش
هههههههههههههههههههههههههه
كل اللي هامك انها ها تتهد
طيب يا اختي مش ها تتهد ولا ها تروح لضاكتور نفساوي
ده تاني يوم تخلعه ها تعرف بطل كمال أجسام
واد عشريني كده يهشكها ويبشتكها
انتي فاكرها موكوسة زي المصرييات
ها تقعد تبكي على الساركوزي المسكوب
فوقي يا امي
دول بتوع البيضة والحجر :)
لولاّ
ازيك يا حبيبتى
انا دخلت اشوف ايه الحكاية
لقيت مفيش حاجة
مفيش حل بقى غير انى انزلك التمبليت تانى من اول و جديد
الحكاية مش مشكلة غير فى حاجة واحدة بس
قايمة المدونات هتتمسح و تضطرى تعمليها من اول و جديد
طبعا الإختيار دى صعب و رزل
بس كدا كدا هتعمليها لأن مش معقول هتسيبى المدونة كدا علطول
شوفى ناوية على إيه و لو عاوزة تغيرى القالب خالص بحاجة جديدة قوليلى
و اختارى اللى يعجبك و انا احطه
بوسيلى العيال
مسألة الخيانة نسبية بيننا وبينهم. اشياء كثيرة عادية بالنسبة لهم تعتبر كارثية بالنسبة لنا
بس كارلا بروني منقدرش ننكر انها جميلة بشكل كبير وساركوزي هو الخسران لو الكلام ده صحيح
ههههههههههههههه
بجد عسوله اوى يادكتور ..
ده انتى طلعتى نشره اخبار بإستايل جديد...
وياما كماااااان هانشوف ياختى ...
تحياتى
... ;) ,,, ;) ...
هى الست الجدعة كدة .. علشان محدش يشمت فيها .. تدارى كدة بره .. وجوه البيت بقى يشوف إللى فيه القسمة والنصيب
طلعوا برده ستات إيطاليا ناصحين
السلام عليكم
عاجبنى البوست كله واسلوبك الرائع فى الجذب ولفت الانتباه
جوزى زى الخاتم فى صباعى و عمره ما يبص بره لانه مش ملاحق على اللى جوه
بس جوز مين اللى خاتم ده هههههههههههه
مش موافق على الحتة دي الا اذا كان فيه رجالة كده فعلا
بس قولى لى هو احنا مالنا ومال سراكوزى ده خلينا فى اللى عندنااحسن
تقبلى تحياتى
:::))
ضحكتيني اوي
بجد زي الفل
صباحك زي الفل علشان اتني جميلة
وعلشان البوست اللطيف ده
سلامي
لولة :-))
احب الناس الى بتقول على الى جواها كده على طول :-))))
و بعدين كارلا ياستى لو عايزة ترميه كانت رمته من زمان :-))) هى قابلة وراضية لحد متوقع ملياردير ثانى :-))
و بعدين ساركوزى :-)))
ده مش حيطلق الا لما تحلله مشكلة عويصة كده :-))
اقرى البوست ده
http://wanda-wanderer.blogspot.com/2010/01/blog-post_07.html
اصل ساركوزى ده ميقعش الا واقف :-)))
بس ديه طليانية يا لولالة يعنى فيها دماء البحر المتوسط
و لو خنها و مش بمزجها كانت شرشحتله :-)) و تعمل اغانى علىالموضوع ده و تكسب :-)))
المهم انك اعتفرت انه نظرها عين من ساعت ماكانت بتتفسح بفلوسنا فى شرم و الاقصر :-)))
بس عينك خيبة يا لولو كل ده عقبال ما بدات تجيب شوية مفعول :-)))
انا بقى مش حنقرها عين
فرحانة فى ساركوزى انه متجوزها اصله يستاهلها :-)) و عليه الموضوع حطول كمان سنة معاهم :-)
ههههههههههههههه
يلا احسن برضه
هههههههههههههههههه
هههههههههههههههههههه
خليتينى ابتسم فى ظل الظروف البيبى اللى انا فيها :((
بس فعلا ديل الكلب عمره ما يتعدل
عجبتنى حته فى اللقاء اووووووووووووى
:)
ربنا يهدى ساركوزى ويبطل سياسة:D
تحياتى
شاب فقرى
يا سااااااتر عليكم يا ستات
تشوفوا واحد سعيد ومتهنى مع القطة بتاعته تغيروا وتحسدوا وتقروا.. أشتاتا شلوووووووووووووت
يا ساتر على كهن الستات:)))
اخص عليكى يا دكتورة ..كدة برضة تشمتى ف كارلا..لا لا ملكيش حق دى مهمن كانت برضة ولية ومكسورة الجناح يا شيخة بدال ما تديها نصيحة كدة تهون عليها عمايل ساركوزى فيها
زعلتينى
لولا وزهراء
مبروك الاحتلال
ههههههههههه
richardCatheart
ايوووووووووووه يا اختشى ادينا بنتفرج
و اهى فرجه فرنساوى ببلااااااااش كده
منورانى
لولا وزهراء
ايوووووه هى العين اللى تفلق الحجر صابتهم فعلا بس مش عينى لوحدى دى عيون الشعب العربى كله من الحاقدين و الحاقدات
تحياتى يا زهراء
Mo7ammed
مش بعيد يا ابنى و الله
و ميقدر على كارلا الا ربنا
عاشقه الرومانسيه
كده يا دودو
ده انا قلت انتى اللى حتفهمينى و حتفهمى مشاعرى النبييييييله
ماعلينا
ربنا يسامحك
adel
كده يا عادل عند اول اختبار و محك حقيقى تبان على حقيقتك كده
خد يا عم مثاثاتك و هات البت
rovy
ميرسى يا روفى ده بس من ذوقك
منورانى
فتاه من الصعيد
على الاقل كلينتون كان حليوه و عليه العين
لكن ده لا شكل و لا منظر
مش عارفه ايه ده
منورانى
فاتيما
يا سلااااااااام ساطور و اكياس
تعجبنى انا رومانسيتك الزايده يا طمطم
ههههههههههههههه
منورااااااااااااانى
هراء لا داعى له .....
ايوه نفسنه
انا اعترفت من الاول و ما انكرتش التهمه خااااااالص
منورنى
Tamer Nabil
احنا برضه اللى ظالمينكم
ده انتوا تظلموا خريطه بحالها
منورنى
سمع هوص (Abo 3li)
انا مش شمتانه فيها
ده انا حاموووووت من الشماته
اصلها كانت طايره بيه و كانها جابت الديب من ديله
تشرب بقى
FOrty
هو انت مع مين بالضبط
طبعا مع كارلا
اصلها غلبانه و عايزه حد يطبطب عليها
Ashraf
اييييه يا كابتشن
ايه الظروووووووف بالضبط
الناس دى كلها حتروح و انا اللى فى وشك
يعنى من الاخر اشترى عمرك
star in the sky
طبعا ستاتى قوى جدا خالص
و خالى من الكوليسترووووووووول
منورانى
ستيتة حسب الله الحمش
حلوه تبكى على الساركوزى المسكوب دى
هههههههههههههههه
و مين الدوده و مين الحنش يا ست انتى
و مين قال ان المصريات موكوسات امال انا و انتى و فاتيما وواندا و امثالنا من المصريات المناكفات رحنا فييييييين
فاتيما
الحمد لله ربنا خد بيد المدونه لوحده و من غير حاجه
الحمد لله
خواطر شابة
ما هو العجيب انها قمرايه فعلا و فى الاخر برضه مكملوش سنه و كان لاعب بديله
يبقى العيب فييييييين
فى الصنف بوجه عاااااااااااااام
منورانى يا نوجه
ghada mOhsen
ميرسى يا دودو
و كويس انها حازت على اعجابك
منورانى
أم .. بوبه
يعنى ايه اللى فى القسمه و النصيب فى البيت
قصدك ابو ورده حيشتغل و لا اييييييييه
و بعدين ايطاليا من اسكندريه مش بعيد
ذو الوجه المبتسم
اما يبقى الراجل زى الخاتم فى صباعها دى ميزه فى الست مش عيب فى الراجل
انها قدرت تضحك عليه
منورنى
شمس النهار
ربنا يخليكى يا شموسه
ده انتى اللى عينيكى حلوه و بتشوفى كل اللى حواليكى حلو
منورانى
Wanda
طبعا يا واندا انا صريحه و قول فى الوش و لا تغش
الاتنين الطينه من ننفس العجينه و مينفعوش غير مع بعض
هيا انتهازيه و هو ندل
و بالشفا عليهم هما الاتنين
سبايدرمان spiderman
قصدك بالشفااااااااا
منورنى
شاب فقرى
يا عم اضحك و سيبها على الله
و اهم حاجه انى نجحت انى افك التكشيره اللى كانت على وشك
و عقبال الكل ما يرتاحوا و يبطلوا سياسه
أبو حميد
احنا برضه اللى بنحسد و نقر
و بعدين مين القطه دى كارلا
امال احنا اييييييييه بقى
مااااااااشى ماااااااشى
منورنى
blue-wave
كهن مييييين بقى
هه
ما تقول
حاعديها انا المره دى بس المره الجايه
مش حعديها ابداااااااااا
منورنى
Single Mummy
معلش بقى اصل انا وحشه و حقوده و شريره
و بعدين اما دى منكسره امال احنا
نبقى ايه يا حاجه
ههههههههههههههههه
منورانى
ههههههههههههههههههههههههههه
ده أريد حلا الفرنساوى ؟؟؟
تحياتى :)
لولاّ
صباح الخير يا حبيبتى
انا سمحت لنفسى كنوع من البلطجة انى أدخل و اعمل شوية تعديلات
الاول القالب اتعدل لوحده ازاى ؟؟؟
سبحان الله
انتى نيتك سليمة عموما
المهم
انا كبرت الخطوط بتاعة التعليقات شوية عشان العيال نظرها رايح
و كمان غمقت اللون عشان ميدعوش علينا من قلبهم
حطيت غنوة شيرين دى يا رب تعجبك و ابقى شيليها و قوليلى عاوزة تحطى ايه بدالها
ماشى؟
بوسيلى العيال
و وحشتينى قوى
ههههههههههههههههه
تصدقي بالله انتي عثل عثل
بجد رهيبة.
بس برضه الستات لبعضيها ياأوختشي
حقه كان واجب عليكِ تواسيها
بدل ما نقطع فيها
بس شكل ساركوزي هيتعمل له تظبيط
زوايا وردارات علشان لا يعرف
يبص يمين ولا شمال.
تسلمي
Foxology
اه و الله فعلا
بس هيا شكلها مرقداله
اصبر على جارك السو يا يرحل يا تجيله داهيه و تبقى هيا الرئيسه
تكتييييك يا ابنى
منورنى
فاتيما
بلطجه ايه بس ده انتى صاحبتها و صاحبه صاحبتها كمان
و بعدين سيبيها تتعدل يا تيما مره من نفسنا حتبقى كل حاجه معووجه يعنى
الاغنيه تحفه
انا عماله اسمعها و اضحك
احب انا الرسايل الموجهه دى
منى
هو فعلا محتاج تظبيط زوايا لان المسار اتعوج على الاخر
ربنا يستر بقى
منورانى
ده إيه النفسنة دي كلها
:))
كل شيء وارد..جايز نشوفها زي هيلاري..مين يعرف
عموما الخيانة بقت سيناريو مكرر لأغلب الرؤساء الفرنسيين تحديدا !
تحياتي
هههههههههههههههههههههه
فظيعة اوي بجد وتخيلاتك عالية
مدونة جميلة اوي
تقبلي مروري ^_^
بصى يا لولالة
اخر الاخبار عندى
اولا رسميا مفيش اخبار خالص
هس هس :-) و ده غريب
بس على المستوى البلوجرى و التوتيرى و الذى منه
امبارح جارتى بتورينى المكتوب عندها
ان الاثنين كل واحد ليه عشيق و عشيقة
كارلا ماشية مع مغنى اصغر منها (فى تلميحات انه لما كسب جايزة اجهزة الاعلام تجاهلته :-)) لخباثة معينة)
اما ساركوزى له عشيقة واحدم مسئولة عن وزارة التموين او موظفة كبيرة فيها
المهم اتفقوا على الانفصال الهادى بتحضر و رقى
بس اشك ساركوزى مش حيسيب كارلا الا لما تدفع الثمن الاول :-) ده مصيبة :-)
المهم شعبية الحزب بتاع جنابه نزلت فى الحضيض:-)
بس افتكرت فيلم اغمالادوس و الراجل بتاع البار الى كل دفاعه عن جريمة القتل : انه الحب فى باريس :-)) من يستطيع التحكم فيه ؟؟
بصى هو بصفه عامه و بصراحه
انا مش فاهم بتحقدى عليها ليه
المفروض تصعب عليكى و دا من وجهة نظر رجالى بحته
يعنى من المنظور الاخر احنا كشباب اللى المفروض نحقد على الخروف اللى اسمه ساركوزى
بقى كارلا القمره دى تقع فى الراجل المفقع دا ؟
دى حتة وينج لفت ملهاش حل يا أوختى يا صيدلانيه
تاخد المنيل دا ؟؟؟
كتنا نيله فحظنا الهباب و احنا تتحدف علينا العوجه ام كدش
مع انى كنت سامع ان كان متقدملها قبله سواق ميكروباص ملو هدومه
مشغل عربيته السيده عائشه أحمد فخرى و موقف العاشر
راجل كسيب يعنى لا مؤاخذه
بس خلينى اقولك حاجه رغم حقدك عليها
فى مصر لما الست تتخان لازم تعيط
انما هناك و مع كارلا دى لو انا اللى خنتها زى المتخلف دا
لازم انا اللى اضرب نفسى 100 جزمه قديمه على وشى .
و اسف لو كلامى هيزود غلك او حقدك عليها بس بنظره موضوعيه و مليئه بالمصداقيه بصى على الساحه الفنيه اللى المفروض انها اعلى نسبة جمال و أنوثه تتواجد فيها
و افرزى و نقى و هاتى المعطوب على جنب و طلعيلى واحده تشبه كارلا كده و لا حته منها .
إلى هنا انتهى حديثى و يا ريت نبطل حقد عالناس عشان ربنا يكرمنا فى حياتنا كده .. احنا كلنا على فيض الكريم .
اشوف فيك يوم يا ساركوزى يا ابن ام ساركوزى
إرسال تعليق