الجمعة، فبراير 12، 2010

المتجوزين بيشجعوا كيت كات ....وانا مش معاهم







الاغنيه اللى فوق دى باهديها لكل الشباب و الشابات المرصوصين

على الكبارى فى مصر المحروسه من اسوان لاسكندريه

و اللى فى الوقت ده من كل سنه بيخلوا مصر حمرااااااااااااااااااااااا

من كتر الورد الاحمر و الدباديب و القلوب اللى بيشتروها

و اقولهم كل سنه و انتوا طيبين بمناسبه عيد الحب

ممكن كمان اهديها للمخطوبين و العرسان الجداد لغايه ما يشرف اول بيبى

بعد كده حيدخلوا فى مرحله غير دى خااااااااااالص

هههههههههههههههههههههههههه

اما المتجوزين القدام اللى زى حالاتى و حالات كتير من المدونين الشرفاء

فاهديلهم مشهد من فيلم احلى الاوقات بيجمع بين هند صبرى و خالد صالح

و اللى فيه بيتناقشوا حول جدوى بوكيه الورد و الفرق بينه و بين كيلو الكباب

اظن بقى المشهد ده هو التطور الطبيعى للرومانسيه المصريه الحقه

و بصراحه الراجل فى اخر الفيلم بيشترى الورد و الكباب مع بعض

و ده برضه انتصار للمرأه و لقضيتها المعاصره

خلاص خلصنا اهداءات


امبارح بقى و انا قاعده مع جوزى كده و راسمه ابتساااااامه عريضه على وشى

بقوله بكل رقه و هدوء و رومانسيه حتجيبلى ايه بمناسبه الفلانتين يا جمييييييييل

قاللى اولا الفلانتين ده بدعه

طبعا تعبير وشى اتقلب فى ثانيه و رجعت لحالتى الطبيعيه

طبعا هو استشعر الخطر المحدق به.......حلوه المحدق به دى

و قاللى حجيبلك شيكولاته كادبورى من الكبيييييييييره قوى و الفها بورق احمر شيك و فيونكه

و سكت شويه كده و قاللى لا خليها كيت كات من الكبيره و كده كده هيا ورقتها حمرا و نوفر اللفه والفيونكه

و نقسمها كل واحد مننا ياخد بار منها و بالهنا و الشفا يا عمرى

طبعا انا اللى خلانى سكت انه قال يا عمرى و دى مش بتتقال كتير الصراحه


ايه ؟؟؟؟؟؟؟؟؟سامعه حد بيضحك ياريت تمنعوا الضحك

لان الموقف ميضحكش خااااااااالص الصراحه



مره تانيه بقولكم

كل سنه و احنا كلنا بنحب بعض

هناك 82 تعليقًا:

Zouka's يقول...

كل سنه وانت طيبه يا عمرى

زوجك

صيدلانيه طالعه نازله يقول...

وش مكسوووووووووف و احمر
ميرسى على الرقه دى ويارب دايما
مع بعض

Mahmoud البطراوى يقول...

افتكرت بوستى اللى كتبته السنه اللى فاتت

الانتوسيد احلى هديه فى الفالنتين
:P :P :P :P

فاتيما يقول...

الله

اللى احلى من البوست

اول تعليقين

الله اكبر عليكم و ربنا يخليكم لبعض
يا رب

ايوه كدا افتحوا نفسى

و كمان الغنوة دى تحفة يا علا
و بقالى زمن مسمعتهاش
و كنت بحبها جدااااا

شكرا لأنك فكرتينى بيها
و ربنا يا حبيبتى يسعد كل الناس

بوسة و حضونااااااات
و هابى فالنتين داى عليكم يا لولاّ

صيدلانيه طالعه نازله يقول...

بطوط حبوب

ايوه انا فاكره انى ساعتها قلتلك و الستربتوكين نهديه فى عيد الفلاح
كل سنه و انت طيب و السنه الجايه نقولك جيبت ايه للعروسه

نورتنى

Pink Dreams يقول...

كل عيد حب وانتوا مع بعض يا قمر

وياستى مالها يعنى الشيكولاته حلوه

ههههههههههههه

ربنا يخليكوا لبعض يا رب

صيدلانيه طالعه نازله يقول...

فاتيما

ربنا يخليكى يا تيما
احرجتونى و كسفتونى يا جماعه
كل سنه و كلنا يارب مع نصنا اللى بيكملنا و يحبنا بجد

بمناسبه الاغنيه دى انا باموت فيها و من زمان نفسى احطها يوم عيد الحب

اصل نجاه دى حكايه وحدها

و بعدين مغيرتيش المسائل اللى قلتلك عليها ليه
بتقل عليكى انا معلش بقى

نورتينى يا طمطم

صيدلانيه طالعه نازله يقول...

Pink Dreams

هو انا اقدر اعترض برضه
انا اصلا باموت فى الشيكولاته
كل سنه و انتى حبوبه و محبوبه يا بينكى

Cute Kitty **sookra يقول...

هابى فالنتين داى ليكم ياقمر
ويارب عقبال كدا مانقوك هابى فالنتين داى وانتى عندك تشيليون سنه وبتقولى بت ياشكره
ههههههههههههههههه
ربنا يخليهولك وبعدين انتى هتنهبى ولاايه يعنى الراجل كتر خيره هايجيبلك كيت كات وابقى ابعتيلى بار اختك مزنوقه فى هديه
هههههههههههههههههه
انا بقى الراجل جوزى هيجننى
هههههههههههههههه
هابى فالنتين داى

ستيتة يقول...

مش بحب الفلانتين ده خالص يا قوم
بس مفيش مانع من الكيت كات والحمد لله دي بحصل عليها كتير
معروف عني اني اتسجد واسكت وانسى اي موضوع مهم بشيكولاتاية كيت كات او توبليرون
العيب مش انه بيجيب الشيكولاتة
نو .. ابسلوتلي
العيب اني عرفته نقاط ضعفي الإستراتيجية

يارب دايما طيبين وعسولين وربنا يخلي سيف وشادن
وربنا يهني كل واحد ويديه اللي بيتمناه واكتر كمان

غير معرف يقول...

كل عيد حب وانتو مع بعض يارب
ربنا ما يحرمكوا من بعض ابدا
وبعدين الراجل مقصرش اهو كويس انه هيجيب حاجه برده

هههههههههههههههه

عاشقه الرومانسيه يقول...

ههههههههههههه
شيكولاتايه؟؟!!
هى دى اخرتها؟
تؤتؤتؤتؤ
مالوش حق
بصراحه طمنتينى على مستقبلى
:-S
واهو لقى ان كلمه ياعمرى عجبتك
كتبهالك على المدونه علشان تقريها كتير
ههههههههههههههههه


ربنا يسعدكم يالولو
جوز عصافير يااخواتى؟؟؟



عيد حب سعيد عليكى وعلى حبيبك يارب

لــــ زهــــــراء ــــولا يقول...

دكتوره علا
-*-*-*-*-
يااااااااااارب كل ايامك مليئه بالحب والسعاده والخير والهنا
ربنا يسعد قلبك مع زوجك ويفرح ايامك
وتشوفى كل الحب فى حياتك ياااااااااااااارب
واكبر باقة ورد حمرا فى العالم ومعها دبدوب كبيييييييير احمر
كمان باكو شيكولاته من الكبيييييييييييير
الهدايا دى برضه مش كفايه
كل لحظه وانتى بخير


زهراء

Mano يقول...

كل سنة وانتو دايما متجمعين ويخليكو لبعض
وبتحبوا بعض سواء في الفلانتين او اي يوم تاني
انا بقي اللي عاوز الشيكولاته عالدعوتين اللي فوق دول
وبحييكي علي الاغنية
واتمني تزوريني في مدونتي الجديدة وتقولي رأيك في اول بوست
http://samtelghrob.blogspot.com
تحياتي

Mahmoud Ahmed يقول...

السلام عليكم
طمنتينا على حالنا بعد الجواز ^_^
بس انا بنتهزها فرصه و احي جوزك
فعلا العيد ده حرام و بدعه ^_^
تحيه كبيره جدا مني ليه
و بلغيه سلامي ^_^

إيمان يقول...

كل سنه وانتى طيبه يارب
وعقبال مليوون سنه وانتم دايما مع بعض
مع خالص حبى وحبى

Mahmoud Ahmed يقول...

انا بعلق عاده الاول
و بعدين بقي التعليقات
تحيه كبيره ليك يا استاذ اشرف و الله ^_^
و حلو التعليق الاول جدا جدا
ربنا يخليكوا لبعض ^_^ يارب

سمع هوص (Abo 3li) يقول...

كل سنة وانتي طيبة يادكتورة علا...
وربنا يخليكم لبعض ...
واقولك علي سر... مش هيجبلك كيت كات . ولا حاجة..
وهيجبلك هدية بجد..... وهتيجي تقولي ابوعلي قال...



ههههههههههه
كل عيد حب وانتو بخير

أحمد عبد الحميد يقول...

أنا بقى على طول بجيب لمراتى كيت كات من الكبيرة (وخصوصا بعد ما رخصت وبقت ب3جنيه) وكمان بجيب ورد من غير زلانطين
أما رأيى فى موضوع الزلانطين أنا كاتبه فى بوست إمبارح

سواحة يقول...

طيب انا عايزة اضحك الله
:-))) ياعمره و عقبال تطلعوا العمرة سوا و تعمروا العمر كله سوا

يارب

و اتفضلى طبق من الدستة الى فضلت مليانة ام اند ام :-))) قزقزوها سوا مع العيال

أميرة الرومانسية يقول...

كل سنة وانت طيبة وزوجتك واولادك بكل خير
عارف يا دكتورة اه في ناس بتقول انها ضد عيد الحب بس بصراحة انا بشوفه انه مناسبة عشان نفتكر بعض علي الاقل ونقول لبعض كل سنة وانت طيبة
نفتكر بعض في وسط زحمة الدنيا ومشاغلها
كل سنة وانت بألف حب

Single Mummy يقول...

مالها الشيكولاتة وحشة ولا حاجة؟ كفاية انها من قلب معركة الزواج التى لاتسفر غالبا عن مثل هذةالاشياء الرقيقةكل عيد حب وانتو احسن ومع بعض دايما
تحياتى

د. شلافييط يقول...

يا ريت ترسى على كيت كات
حترسى على باكو لبان من عند سعاد البقّالة
او طبق فول من عند عم محمد حسُّوبة جنب بيت ابوكي وفالآخر تبقى حقيقة واحد وهي انه فعلا بدعة.
ولا يبقى الا التواد والتراحم.

هي وظروفها يقول...

اولا بسبب هذه المناسبه

او ان اتقدم لشخصكم والدكتور اشرف باسمي ايات وباقات وشيكولاتات عيد الحب

جعل الله ايامكم حب ولحاظتكم سعاده


ايه ده ان نسيت دي مدونه اختنا مش مدونه سوزان تبارك

بجد بقي كل سنه وانتم اقرب لبعض من اللي قبلها

بس خليه يوسعها شويه مش لازم شيكولاتيه

خليه يجيب شيكولتين جالكسي جميله وشيك ومش غاليه

هابي فالنتين وبلاش نفسنه علي شباب الكورنيش ماشي

sony2000 يقول...

انا اول مره اتشرف بالتعليق علي مدونه حضرتك وبجد سعيده ومبسوطه بكدا
يارب يخليكو لبعض ديما ونسمه عنك اخبار حلوه
هابي فلانتين داي
تقبلي مروري وتحياتي

Baskouta يقول...

Happy Valentine's day my lovely Ola...How are you sweetie and How are the little kids ? I miss all of you keteeeeer.
I like chocolate and it is the best at valentine's time.
Wish you and your husband all the very best ...May Allah bless both of you with an everlasting love that enlighten your way all life long....Kiss the kids for me ...I really hope we can get together soon InshaAllah
Your Baskouta
I love you

صيدلانيه طالعه نازله يقول...

sookra
انا لو منك اجننه قبل ما يجننى يا حبيبتى
هو العقل ده ببلاش و لا لاقيينه

و يا ستى انا ابعتلك علبه بحالها
و لا يهمك

كل سنه و انتوا مع بعض

صيدلانيه طالعه نازله يقول...

ستيته حسب الله الحمش

هههههههههههههههه
حلوه نقاط ضعفى الاستراتيجيه دى
و بعدين يا حبيبتى اصلا الفلانتين ده مش للشريحه الكادحه اللى انا و انتى منها خاااااالص
انا قلت انها لواقفى الكوبرى
الكلام واضح و صريح

صيدلانيه طالعه نازله يقول...

7annen

ايه ده يا ست هانم انتى معايا و لا معاه

شكلك معاه و لا يهمنى و لا كأنى سمعت حاجه

هههههههههههه
نورتينى يا نونه

صيدلانيه طالعه نازله يقول...

عاشقه الرومانسيه

ايوه دى اخرتها شفتى يا دودو
بس ياللا شيكولاته فى الايد احسن من عربيه على الشجر

نورتينى

صيدلانيه طالعه نازله يقول...

لولا وزهراء

كل هدايا عشانى
شايف يا كابتن
ربنا يخلينى ليكى يا زهرا و تبزعقى فلوسك عليا دايما

نورتينى

صيدلانيه طالعه نازله يقول...

Mano
يا فندم علبه شيكولاته بحالها
و مبروك المدونه الجديده

كل سنه و انت طيب

صيدلانيه طالعه نازله يقول...

سبايدرمان spiderman
هو عشان قال انه حرام و بدعه بقيتوا اصحاب
عالم غريبه و الله الناس متتجمعش غير عشان تغيظ بعضيها
طب مش حاسلم عليه
هههههههه
نورتنا

صيدلانيه طالعه نازله يقول...

emymony

ميرسى يا ايمى ربنا يخليكى
كل سنه و انت محبوبه

صيدلانيه طالعه نازله يقول...

سبايدرمان spiderman
ايه بتصلح ما افسدته فى التعليق الاول
ماشى و انا كمان مسامحه

كل عيد و انت طيب

صيدلانيه طالعه نازله يقول...

سمع هوص (Abo 3li)

و الله لو ده حصل انا اللى حجيبلك هديه
ههههههههههههههه

نورتنى يا متفائل

صيدلانيه طالعه نازله يقول...

أبو حميد
انت بقى جاى تهدى النفوس شكلك
بس و لا يهمنى
يجيب شيكولاته ميجيبش
يجيب ورد و لا كباب

برضه انا راضيه
نورتنى

صيدلانيه طالعه نازله يقول...

Wanda

ايه ده كسرتى الدستتين يا مفتريه

و لا يهمك فداكى
و ربنا يخليكى ليا و تهادينى دايما ام اند امز اصل انا بحبه جدا

نورتينى يا قمره

صيدلانيه طالعه نازله يقول...

أميرة الرومانسية
فعلا لو على الحب المفروض يكون طول السنه
بس فعلا عيد الحب بيبقى فرصه لتجديد المشاعر و التذكير بيها مش اكتر

اهلا بيكى يا مرمر

صيدلانيه طالعه نازله يقول...

Single Mummy

تصدقى انتى من اكتر الناس اللى بحس انها فاهمه كلامى و مقدراه و باستنى تعليقك
لانى حاسه ان اللى مريتى بيه خلاكى اعقل اكتر و فاهم اكتر بغض النظر عن عمرك

انا بحبك قوى

صيدلانيه طالعه نازله يقول...

د. شلافييط

قول يا دكتور يامن
كل كلامك حكم

سلامنا لعاليا و مريم و امهم

صيدلانيه طالعه نازله يقول...

هي وظروفها

شباب الكورنييييييييش انا شكلى جيت على الجرح

ياعم اى حاجه يجيبها حتبقى فله و الله

تحياتنا للنص الجميل
نورتنى

صيدلانيه طالعه نازله يقول...

sony2000

ده شرف ليا انا
و هابى فالانتين

صيدلانيه طالعه نازله يقول...

Baskouta

بسكوته يا جميله معلش بقى حارد عربى
انتى كمان وحشتينى كتير من السبت اللى فات
انتى حد جميل و لذيذ و كنت مبسوطه قوى و انا معاكى
عيد حب سعيد علينا و عليكى
و ان شاء الله نتقابل قريب
مين عارف؟؟؟؟
كل الحب ليكى يا بسكوتى

شمس النهار يقول...

كل سنة وانتي جميلة وطيبه
وبخير وصحة وسعادة

::))

سلامي

moha يقول...

كل و انت طيبة يا جميلة و دايما مبسوطين مع بعض إن شاء الله
أنا بس عايزة أقول أن الحب مش بدعة والإسلام هو أكتر الديانات اللي اتكلمت عن الحب و الرومانسية عامة و اعتبرت أن الرومانسية بين الأزواج عمل صالح يثاب عليه المسلم طالما مع أهل بيته و مراته و ياريت كل الأزواج و هم بيحتفلوا بعيد الحب أو أي اتنين بيحبوا بعض أصحاب إخوات أي حاجة يجددوا النية و يعملوها بنية إطاعة ربنا و رسوله عشان يأخدوا الأجر إن شاء الله و كل سنة و انتوا حبيبة

adel يقول...

حماتي و حمايا لاعزاء
هل ممكن نخرج انا و خطيبتي في الظالنتين :$:$:$:$
و اوعدكم مش هاجيب دباديب ولا ارانيب :)
هو بوكية ورد و شوكولاتات و مثاثات :):)

Remas يقول...

كل سنة وانتى طيبة

وهابي فالنتين داى

ربنا يخليكو لبعض يارب وتبئا ايامكو كلها فالنتين دايز وكيت كات

انا بئا جوزى ملتزم الصمت تماما

لما نشوف هايجيب ايه

انا صحيح مش بعترف اوى بالفالنتين داى بس لازم بردو يجيب

كيكى عوووووو يقول...

لاتعليق بجد لانى فرحت اوى لمة كان هجيب كابرى كبيررررررررررررررررة وياريت لو سادة
شكلها هترسى على لبن ام مرسى!!

وصف الاحساس يقول...

ههههههههههههه
بقي فرحانه انه قالك يا عمري وهيجيبلك شيكولاته
بقي هي دي اقصي طموحاتك انتي وهو
والله الله يطمنك
بس معلش في السؤال
انتو وصلتو للحاله دي بعد كام سنة جواز
عشان بس الواحد يبقي عامل حسابه ويتابع انواع الشيكولاته ويعرف يختار
عموما ربنا يهنيكو ويسعدكو
وكل سنة وانتو حبايب
تحياتي

ghada mOhsen يقول...

اول شى وحشاااااااانى
يادكتور كتير ...

وانا عرفت انك روحتى معرض الكتاب
ياريتنى كنت معاكم عشان اشوفك والله ..
........

كل سنه وانتى طيبه يارب
وربنا يخليكى لجوزك ويخليه ليكى
يااااااااااااارب

بجد الحب عمروا ماكان بالكلام الحب شعور واحساس وافعال

والكيت كات لذيذ برضو بالهنا والشفا

ربنا يهنيكوا يااااارب

... ;) ,,, ;) ...

الشاعر الفنان أحمد فتحى فؤاد يقول...

أنا أنا أنا .... من اللى قلتى عليهم ... بتوع هند صبرى و خالد صالح
هاهاهاهاها
طبعا مش قوى كده ... ده حتى أنا شاعر و معتمد كمان ... لكن يعنى ... هاعمل على الأقل زى ماعمل جوزك ربنا يخليهولك ومع الشيكولاته الكادبورى ... بس أنا هاخلليها جالاكسى عشان أبقى مختلف
و كل عام و إنتى و زوجك الجميل بألف خير و سعادة

Unknown يقول...

خلاص بلاش ضحك

انا بسمع انكم بتحبوا الشكولاته يعنى

يارب احتفل به المرة الجايه

Unknown يقول...

كل دا عشان تقولى
هابى فلانتين داى ؟؟

كل سنة وانتى طيبة
يا قمر ودايما منورة ودايما محبة يارب

صيدلانيه طالعه نازله يقول...

شمس النهار

و انتى طيبه يا شموسه يا قمر
عيد حب جميل على الجميع

صيدلانيه طالعه نازله يقول...

moha

مها يا جميله دايما فاكرانى و مش ناسيانى
مفتقداكى جدا و نفسى الاجازه تيجى عشان ترجعوا من امريكا اللعينه دى اللى اخدتكم منا بس اللى مصبرنى انكم مبسوطين

ربنا يخليكى سباقه دايما بالخير و سلامى لنودى

صيدلانيه طالعه نازله يقول...

adel

بص يا عادل يا ابنى انا مش عايزه اكلفك
كفايه الشيكولاتات و المثاثات و اهو تشيل عن حماك شويه و من قدم شيىء لحماه التقاااااااااه :)))

صيدلانيه طالعه نازله يقول...

reem

يا خوفى لا يفضل صامت كتير يا حبيبتى
انا جوزى من بعد ما كتبت البوست
رجع التزم الصمت تانى
و شكلى اتضحك عليا
عااااااااااااا

صيدلانيه طالعه نازله يقول...

كيكى عوووووو

انتى على طول كاسره نفسى كده
ياريت يا اختى ترسى على لبن ام مرسى
حابوس ايدى برضه وش و ضهر

صيدلانيه طالعه نازله يقول...

wasf_elahsas

اه افرح ما افرحش ليه كل اللى يجيبه ربنا كويس
الحاله دى حضرتك بعد 11 سنه و داخلين فى ال12 يعنى ايا كان لسه بدرى عليكى قوى
تكون شيكولاتات اتولدت و شيكولاتات ماتت
ههههههههههههههههه
كل حب و انتى طيبه

صيدلانيه طالعه نازله يقول...

ghada mOhsen

انتى كمان واحشانى يا دودو قوى
و ياريت فعلا كنتى جيتى عشان اشوفك

فعلا يا غاده الحب مش بالهدايا و لا الكلام
الحب افعال و مشاعر تتحس

بس بينى و بينك ساعات حاجه بسيطه بتفرق قوى معانا

نورتينى يا دودو

صيدلانيه طالعه نازله يقول...

لشاعر الفنان أحمد فتحى فؤاد

ايه ده هو انت طلعت منهم
يا خساااره و انا اقول الشعراء حساسين و فيهم رقه و رومانسيه
بس الحمد لله ربنا بعتنا ليك عشان نفيدك و نكسب فيك ثواب
ههههههههههههههههه
كل سنه و انت طيب

صيدلانيه طالعه نازله يقول...

العيسوى الصغير
مين هما اللى بيحبوا؟؟؟؟الستات يعنى؟؟؟؟
اه بنحبها ناكلها بس لكن نشتريها لا

ربنا يستجيب لدعاك و تحتفل بيه السنه الجايه

صيدلانيه طالعه نازله يقول...

نهر الحب

و انتى الصادقه يا انوس
كل ده عشان اللى معايا يحس و يجيبلى هديه
ههههههههههههههه

نورتينى يا قمره

فاتيما يقول...

ايه دااااااا


ماشاء الله

ايه النوظام ؟؟

انا اتركنت ع الرف خلاص و خدتوا الواد عادل فى حجركوا من دلوقتى

المواعيد بتتاخد و انا فى الطراوة كدا و معرفش حاجة ؟؟؟

هوه صحيح الغزالون يهبلون تلحس العقل

انما يعنى احنا برضو لسه ملبسناش دبل و عملتلى فيه حماة و خدت وضعى و برستيجى شوية

كدا يا لولاّ دنا قولت هنتشضامن اكمننا ستات زى بعضشينا ؟!!!
ماااااااشى

اما اشوف عادل بس
هتصرف معاه

الا لو شافنى بشكولاتية و لا حاجة
ساعتها ممكن أتفهم موقفه
و اعدى الليلة


هابى فالنتين ع الكل
و انا يا فندم مستنية اوشارة البدء و انا ابتدى تكسير علطول

Foxology يقول...

طيب والمتجوزين طازة زى حالاتى كدة يعملو ايه ؟؟ :))))))

تحياتى وربنا يديم السعادة على بيتكم وبيوتنا كلنا :)

مجرد حلم صغنتوت يقول...

:D
مالها الكيت كات بس
زي الفل :)
ربنا يسعدك ويهنيكي يا رب دايماً
وكل عيد حب وكل اللي بتحبيهم معاكي :)

غير معرف يقول...

حلو اووى البوست وفعلا احلى حاجة
اول تعليقين
ربنا يخليكم لبعض

يا سلااااام شيكولاته واحمر

كفاية بس يرن وانا ابقى اتصل بيه من رصيدى هههههههههههههه بس الاقيه الاول

هاببى فالانتين يا جميل

اللى موش عارف يتغير يقول...

اهداء جميل
وكل سنة والجميع بخير

richardCatheart يقول...

ههههههههههههههههه يا صباح الورد والحب والنادى الاهلى بما اننا بقول الحياه بقى لونها احمررررررررررررررر من كده مافيش

كل سنه وانت بالف خير وصحه وتحتفلى بالظلانطين وانت وسط اولادك وازوجهم وزوجتهم ان شاء الله والكيت كات هايكون موجود بردو هههههههههه

على فكره المشهد دا اكتر من رائع لدرجه ساعات بقعد اقوله انا وجوزى ونضحك
اه طبعا هو دا اللى بيحصل بس صراحه مش طول السنه ههههههههههههه

ممكن فى الفسحه ورده او شويه ورد على بعضه حسب التساهيل

بس للاسف يوم الظلاطين عندنا طول عمره مش فسحه من ايام الحب العزرى وهو ماسكلى بدعه بدعه هههههههههههههههه

فاحمدى ربنا انك لقيتى الكيت كات
احسن من مافيش
واحلى من الشرف مافيش ياه ياه

واخيرا وليس باخر ماعرفش هما بيكتبوها ليه الجمله دى


كل سنه وانت بالف حب وسعاده وربنا يخليكو لبعض ويهريكى كيت كات وكل زوارك بالف حب

!!! عارفة ... مش عارف ليه يقول...

كل ما اشوف الفيلم ده كمان استناها لما تنده على ابراهيم وهو ميت من الجوع وهي بتقوله

يا ابراهيم هات لنا معاك جبنة تلاجة :)))))))))))

وهابي فلانتين
لكل المدونين الشرفاااااااااء

Lady E يقول...

يا سلام :) بجد فكرة مبتكرة شوكولاته كيت كات ام غلاف احمر :)

والاغنية بحبها جداا بجد يسلم ذوقك

ربنا يجعل كل ايامنا حب ومودة

صيدلانيه طالعه نازله يقول...

فاتيما
لا يا تيما مالكيش حق خالص
الواد يعنى رايد البنت و انتى حتعملى حماه من دلوقتى
مكنتش اتخيلك كده ابدا يا تيما

صيدلانيه طالعه نازله يقول...

Foxology

العريس عندنا يا مرحبا يا مرحبا
انت بقى متهيألى براءه من الفلانتين السنه دى دى لسه نار الفرح و الشقه مبردتش
ههههههههههههههه

نورتنى و سلامى للعروسه

صيدلانيه طالعه نازله يقول...

مجرد حلم صغنتوت

هو انا اتكلمت دى الكيت كات دى فله
بس تيجى المهم

نورتنى:))

صيدلانيه طالعه نازله يقول...

star in the sky

يا قمرده انتى اللى احلى
ان شاء الله تلاقيه و يرن عليكى و يكلمك كمان

عيد حب سعيد

صيدلانيه طالعه نازله يقول...

اللى موش عارف يتغير

و حضرتك بالصحه و السعاده

صيدلانيه طالعه نازله يقول...

richardCatheart

هههههههههههههههه
من ايام الحب العذرى و هو بيقول بدعه بدعه
الصنف الصريح من الاول ده متخافيش منه
الخوف من اللى يعملك البحر طحينه و بعدين يغرقك فيه

كل حب و انتى طيبه

صيدلانيه طالعه نازله يقول...

!!! عارفة ... مش عارف ليه

اولا احب اعرفك اننا افتقدناك و جبنا سيرتك بالخير يوم توقيع كتاب سحر غريب

ثانيا مشاهد ابراهيم و يسريه فى الفيلم كانت احلى مشاهد الصراحه

كل سنه و انت من الشرفاااااااااااااء

نورتنى :))))

صيدلانيه طالعه نازله يقول...

Lady E

ايه رايك فى الافكار بقى:))

اى خدعه يا فندم بس متقوليلوش عليها دى تنفعك انتى لو حتجيبى هديه
انما هو نوووووووووو

هابى فلانتين يا قمر

FOrty يقول...

كل سنه و انتم طيبين
البوست ده فكرنى بحكايه كده كان فى واحد بيجيب لمراته ورد احمر فى الفلنتين اول سنه فرحت قوى السنه التانيه برضه فرحت بس مش قوى تالت سنه قالته و بعدين بقى انت كل سنه تضحك على بشويه ورد انا عايزه هديه كويسه
فيها شبه بحكايه الكباب و الورد بس الستات مش عاوزه كيلو كباب عاوز كيلو دهب
تحياتى

Medicine Break يقول...

كل مابتكلم مع حد يقوللى الفالنتين ده كلام فارغ وساعة لما يلضم ف موضوع يبقى اهم مناسبة ف العالم

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .