السبت، يونيو 20، 2009

تلات تيجان و البقيه تأتى

اولا ازيكم جميعا انشاء الله و بحمد الله و اخيرا حاجاوب على التاج اللى هو 3 فى 1

و كانوا اتبعتولى من كوكيتا و يوميات شاب منوفى و طعميه سخنه

من انت و ما الذى تفعله هنا؟

انا واحده عاديه جدا و مش محتاجه اعرفكم اسمى لان معظمكم عارفه و اللى مش

يعرفه يستعين بصديق و موجوده هنا عشان ايه؟؟؟؟؟ده بيتى و اعمل فيه اللى يعجبنى

اكتب ,اشخبط ,ازعق براااااااااحتى مش بيتى و انا حره فيه

بس انا هنا باجى عشان افش غلى من حاجات كتير مضايقانى او اسجل اعجابى بحاجه

كويسه شوفتها و ببقى مبسوطه قوى اما اشوف رأيكم فى افكارى

اسرائيل تقصف كل جنوب ممكن بحثا عنك اى شمال ستقصد؟

طبعا اسكندريه اولا لان ماما و بابا هناك و فرصه اقعد معاهم

ثانيا لانى باعشق اسكندريه و هواها و بحرها و ناسها وكل حاجه فيها لانها رائعه بكل ما

فيها خصوصا السمك و الارز باللبن بالايس كريم و الفطير

طبعا حسيتوا من كلامى انى باحب الاكل ايوه باحبه بس يكون فى اسكندريه

اى مكان تانى مالوش طعم فعلا

انت مكلف بحذف حرف من حروف اللغه العربيه اى حرف ستختاره و لماذا؟

اولا لغتنا حلوه و جميله و نبقى بنظلمها لو حذفنا منها اى حرف و ياريت نتمسك

بيها لانها هويتنا و تاريخنا و بلاش نبقى زى القرع و نتمنظر بكام كلمه انجليزى

و لا فرنساوى عارفينهم

لو قدر لك ان تدخل السجن فما هى القضيه التى تتمنى ان تدخل بها اليه؟

قضيه فك شفرات القنوات المشفره و خصوصا الرياضيه عشان الذل اللى الناس بتتذله

مع كل بطوله دوليه سواء للقدم او التنس او اى بلا ازرق

او قضيه طبع الكتب الغاليه و بيعها باسعار زهيده عشان الناس تقرا و تستفيد

مع الاعتذار لحقوق الملكيه الفكريه

بالمناسبه مت اكتشفت نفسك؟

اكتشفت نفسى و انا بجهز الصيدليه لان جوزى دايما مشغول فانا اللى عملت الورق و

و الضرايب و السجل و التصريحات و كل المشاوير الكتيره اللى كانت محتاجاها

و بعد كده تعبت قوى لغايه ما بقى فى ناس بتيجى مخصوص لينا مع العلم ان حواليا

صيدليات كتير ساعتها حسيت انى قويه و اقدر اسد فى المواقف الصعبه

عشان كده انا باعتبر الصيدليه دى بنتى لانى تعبت قوى فيها و هيا اللى عرفتنى

الطاقه الكامنه اللى جوايا

على مفترق الطريق لافتتان واحده تقول(الى حلمك) و الثانيه تقول(الى ما لم يحلم بيه بشر)

طبعا حاختار حلمى لانى من غيره تبقى عيشتى و حياتى بلا معنى او هدف

بجمله واحده فقط اكتب تعريف لكل كلمه من الكلمات الاتيه

الوطن:اى مكان بالاقى راحتى فيه حتى لو كان اوضه صغيره اكيد هو ده وطنى

الام:انكار الذات و التفانى فى خدمه الغير و التضحيه دى صفات الام اللى انا اعرفها

الليل:الهدوووووووووووء و السكينه و السهر مع الصحبه الحلوه وده طبعا مش دايما

و مش على طول

الحب:عمله نادره اللى يلاقيها يبقى لقى خاتم سليمان اللى هوا اصلا خيال بس

مش علمى

امريكا:الساحره الشريره و العجوز الشمطاء و اللى بتتزوق دلوقتى عشان تحاول تقنعنا

انها بقت الساحره الطيبه و على العموم افلح ان صدق

المرأه:نص الدنيا و سر الحياه و من غيرها الرجاله ميسووش بصله( تعصب بقى)

الصمت :زمان قالوا الكلام من فضه و السكوت من ذهب بس يبقى سكوت للتفكير

و التركيز مش سلبيه و خوف و جبن

الانترنت:هو كلمه السر زى افتح يا سمسم كده اللى خلتنا نعرف كل غريب و عجيب و

جديد اثناء حدوثه و محدش اتعود عليه يقدر يستغنى عنه

من الاخر ادمان العصر الحديث

اختر منصب و اتخذ قرار

نفسى ابقى رئيس جمهوريه نفسى ليوم واحد بس و القرار اللى حاخده

انى اخد اجازه من اللى حواليا لمده يوم واحد برضه و لو انهم حيوحشونى

و حارجع قبل اليوم ما يخلص

قيس ،عنتره،جميل هم الذين يقولون شعرا و ليلى و عبله و عزه (صموت)

لماذا هذا التغييب للمرأه؟؟؟؟

لان قيس باشا و عنتره بيه و جميل افندى عشان يقولوا شعر عايزين ياكلوا

ملوخيه و فراخ و يحلو بكريم كراميل و يحبسوا بشاى و ليلى و عبله و عزه

يا عينى فى المطبخ معكوكين بيعملوا الاكل يبقى حيفضوا امتى يكتبوا شعر

ان تكون مطلوبا لارتكابك جريمه خير من الا تكون مطلوبا على الاطلاق

هل تتفق مع هذه العباره ؟؟علل؟؟

اتفق ماتفقش ليه الصيت و لا الغنى بس متبقاش القضيه مبيدات مسرطنه و لا عباره

و لا قتل زوزان تميم يعنى من الاخر الاعدام مش تخصصى بعد كده كله عادى

الى اين تمضى كلمات الحب بعد ان نقولها؟

الى ودن واحد من اتنين اما واحد يسمعها و تأثر فيه و يعملها فيديو كليب

او واحد بياكل و مش فاضى و بالتالى تدخل من هنا و تطلع من هناااااااااك

و ياريت دايما نلاقى اللى يقدر كلامنا

هل تجد علاقه بين المرأه و قطاع الطريق؟؟؟

وراء كل حرامى قاطع طريق امرأه طمااااااااااااااعه

هذا فراق بينى و بينك متى و لمن تقولها؟

اقولها لكل اللى ميقدرش تعبى و مجهودى عشانه و يستخف بمشاعرى ساعتها اقوله

بالسلااااااااااااااااامه

كيف هو الغد؟

على حسب يعنى لو تعبنا علشانه اكيد حيبقى احلى بكتيييير من امبارح و النهارده

لكن لو نمنا و كسلنا حيبقى منيل بستين نيله

انا اتأخرت قوى فى حل التاج ده عشان كده اعتقد انه مر على ناس كتير بل مر على كل

الناس و اللى معداش عليه يتفضل يجى ياخده و بالهنا و الشفا

هناك 11 تعليقًا:

الجواز و سنينه يقول...

حلو برضوا انهم 3 علشان تعرفى تغيرى فيهم لما تزهقى
ههههههههههههههه
اجاباتك عسل زيك
ز ماتنسينيش فى طبق رز بلبن كده و كام فطيره
اختك برضوا مش هاتنساكى
عندنا احلى فراخ ممكن تاكليها
فيومى يا بيه

رحلتنا في الحياة يقول...

هههههه تلاتة فى واحد على فكرة التاج ده متوحش بجد جالى بتاع عشرين مرة هههههه بس انتى حليته بجدارة يعنى ماشاء الله

د/على خميس يقول...

السلام عليكم
قرأت اجابات كتير للتاج ده بس فعلا اجابات حضرتك مميزة ...جديدة يعنى متجيش على بال حد ..
حلوة بتاعة قيس و بتاعة المرأة و قطاع الطريق

بارك الله فيك
تقبلى تحياتى

عاشقه الرومانسيه يقول...

اجمل مافى الموضوع انك طلعتى بلدياتى
خلاص لما تيجى زياره لماما وبابا لازم اشوفك
وهنعملوا معاكى الواجب وزياده
وهوديكى عند الشيخ وفيق وناكلوكى رز باللبن بالايس كريم
عارفهه انك بتحبيه زيى
(:

أم أحمد المصرية يقول...

طول عمري بحب اقرأ تيجان الاصدقاء لأن ده بيعرفني اكتر علي الشخصية
و هاأنا قد عرفتك أكثر و وجدتك دماغ بس دمك خفيف عجبني قوي ردك علي سؤال اختيار منصب و سؤال تغييب المرأة عن قول الشعر
ان شاء الله تواصل دائم

Unknown يقول...

اوبا بقي الرجالة ميسووش بصلة من غير الستات !؟

طيب دوري علي كل مصيبة هتلاقي ست وراها

مسمعتيش خالص فتش عن المراة

انا مرضتش اغلط و في التاج كتبت ....... :D

لكن واضح فعلا ان الستات صنف نمرود ميجيش الا بالعين الحمرا :P:P:P:P

Zouka's يقول...

اسمع كلامك اصدقك-
اشوفك استعجب

Zouka's يقول...

اسمع كلامك اصدقك-
اشوفك استعجب

Foxology يقول...

جميل التاج خصوصا نقطة انى اكون مطلوب ف جريمة برضه وجهة نظر :)

تحياتى :)

د. ياسر عمر عبد الفتاح يقول...

مع إني مليش نفس اقرأ أي نوع من أنواع الأسؤلة
حتي إني كرهت علامت الإستفهام المنفوخة دي

بس الإجابات كانت جميلة
(ياريت كنت عرفت أجاوب نصها في امتحان امبارح)

يوميات شاب منوفى يقول...

اخيرررررررررررررررا جاوبتى انا كنت نسيت بس نايس اجوبه وانا اعلن تضامنى معك فى فك شفرات القنوات الفضائية
طب لية بقي الرجالة ميسووش بصلة من غير الستات ما كنتى ماشية حلو

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .