الخميس، مايو 28، 2009

و انت يا عريس.......رأيك اييييييييه؟


بصراحه النهارده انا حاتكلم عن موضوع غايظنى من فتره و نفسى اتكلم فيه بس كنت مأجلاه شويه
كل لما اخرج اشترى هدوم ليا من المحلات مش بعرف اشترى لان اللبس بقى شكله عجيب خالص
و للاسف مش مناسب لكل الناس ربما مش مناسب لحد خالص
بس انا لاحظت ان المحلات اللى بتعرض اللبس ده فاتحه و مستمره و بتكتر ده معناه ان ليها زباين و ناجحه
البنات كمان شكلها بقى عجيييييييب خالص يعنى ساعات اوصل ابنى المدرسه الصبح يعنى سبع و نص كده
لاقى بنات لابسه حاجات عجييييييييبه و مش مناسبه لانها تكون رايحه بيها الجامعه او الشغل لانها مش معقول تكون
رايحه فرح الساعه سبعه الصبح
اللى منرفزنى بقى فى الموضوع ده البنات دى مفيش عندها ام تلاحظها و تقولها ايه اللى انتى لابساه ده
و لا ايه اللى حاطاه فى وشك و ليه و امتى و ازاى يعنى الاسئله اللى بتسألها الامهات دى عشان تنكد بيها على عيالها
لان فعلا فيه بنات كتير بتلبس حاجات مش مناسبه ليها خالص
باحكى مع اصحابى فى الموضوع ده قالولى عادى يعنى عايزين يتجوزوا !!!!!!! و مفيش جواز اليومين دول و الكلام الغريب ده
طيب يعنى عشان البنت تتجوز لازم تعمل اراجوز و تلبس العجب العجاب عشان تعجب الباشا!!!!!!!!
طيب ماتيجوا نسأل البشوات العرسان اللى عليهم العين ياترى سيادتك ترضى انك تتجوز واحده بالعقليه دى ؟
يعنى تبقى ماشى فى الشارع كده و تفاجأ بالقمر معدى جنبك تقوم تجرى وراها لغايه البيت و هوب تطلب ايدها
و لا بتدور على البنت اللى ليها عقليه متفتحه و شيك و فى نفس الوقت مثقفه و لبقه
انا فعلا محتاجه فى الموضوع ده رأيكم كلكم سواء العرايس او العرسان و اللى عايز يقول رأيه من مرحله فوق السن
اهلا و سهلا بيه طبعا

هناك 31 تعليقًا:

Ashraf يقول...

نحن ياساده فى زمن التيك اواى-
حتى فى الجواز ايضا
والدليل على كده
كثرة حالات الطلاق المبكر
وطبعا العيب مش عليهم
دى مسئوليه مشتركه مع الاب والام -لو وجدوا
اشرف

غير معرف يقول...

في الحقيقه ده موضوع جميل لاني بقيت بحس ان مفيش وسط في مجتمعنا،والواحد بيشوف اللي بيلبسوا اسدال واما اللي بيلبسوا ملابس ملهاش علاقه بالاسلام.مع اننا بنشوف الفنانات المعتزلات مش بيعملوا في نفسهم كدا بيلبسوا حشم وشيك في نفس الوقت .
عموما اناسني 35سنه يعني فوق السن اللي بتتكلموا عليه ،وعندي بنتين.
انا ضد هذا الفكر العريان.
نوجه
او
بنت النيل

mayada يقول...

انا عاوزه ا سال بس يعني اي ه غريب يادكتورة الغريب عندك مش غريب عند حد تاني يعني انت ثقف الغريب عندك فين عشان ارجع ارد
كمان مش شرط بتعمل كده عشان الجواز ع فكره في بنات وخداها زكاه عن صحتها وعافيتها هههههه

الشعب لابد له من حكومه تشكمه يقول...

بصى بما ان عيلتى تقريبا كلهم شباب فانا بقولك ان كل شاب يقولك انا عاوز واحده محترمه الخ الخ واول ميجى يخطب فعلا بيخطب اللى انتى بتتكلمى عليم دول ويقولك بعد الخطوبه اظبطها واخليها تلبس كويس..
تعرفى بجد كره فى الشغل عندى حصله مناقشه لقيت واحد عنده 23 سنه والله والله بيقولى بالحرف الواحد الخطوبه مفيش اسهل منها انا انزل الجامعه او حتى الشارع والبنت اللى تعجبنى اوى(وطبعا فاهمه انتى مقاييس الاعجاب) امشى وراها واعرف بيتها وبعدين اسال عليها واخطبها..لما استغربت جدا ازاى بيفكر كده اتصدمت ان كل اللى اكانو سامعين كلامه من الشباب كان موافق على كلامه...

Appy يقول...

بيلبسوا بربرق يعنى على راي منى زكي هههههههه
فيه ناس بتلبس لمجرد اللبس وبس ومش فاهمه ايه اللى بيليق وايه لا
محلات المحجبات كتير يا لولو وهتلاقى فيها المناسب يا حبيبى
اما الجواز فيمكن تكون افكارهم كده ليه لا مبقتش استغرب

مسعدة يقول...

السلام عليكم
شوفى اللى حاصل دة عادى جدا وياريت نعرف الشباب بيفكروا ازاى انا شايفة ان اغلب الاهتمام بالمظهر وبالشكل وان الشاب دلوقت بيتقدم عشان الشكل ودة اللى خلى الملابس عاملة زى ماانتى شايفة
ولما البنات يشوفوا اللى هيفا اللى اتجوزت وطبعا البنات كلها عايزة تتجوز فكلهم بالتأكيد عايزين بيقوا زى هيفا يتجوزوا
والهيفا اتجوزت

ايوشة يقول...

للاسف دول اللى سوقهم ماشى فى الزمن ده العريس هياخد واحدة مثقفة ولا عقلية متفتحة يعمل بيها ايه يقرف نفسه بيها وتنكد عليه ايامه وكل خناقة تقوله تفاهم بالمنطق ههههههه
ربنا يصلح احوال الناس كلها
وبصراحة انا معرفش فى بلدنا بلد متخصص فى اللبس المحترم كله بقى زفت :((

غير معرف يقول...

يا بنتي سيبي الشباب يعيش يعني لا في البيت ولا برة
وبعد كده بلاش نبقى أعداء النجاح و بعد كده ده اللي ماشي اليومين دول
يا باشا عيش و خلي الناس تعيش
KNighT of HoNour
MeDo

د. ياسر عمر عبد الفتاح يقول...

فعلاً لبس البنات بقي عحيب
دايماً أختي تنزل تشتري لبس وترجع نتخانق

وتحلفلي إن اللبس ده أحسن لبس في المحلات
تحسي إنه اتجاه قومي لتضيق وتقصير وبهرجة لبس البنات ..!!

أما موضوع الجواز
فكل واحد ومزاجه بقي

أحمد سعيد بسيوني يقول...

ده لو هاتجوزهم ببلاش

مش هوافق برضه

انا بابني بيت و أسرة

معقولة .. اجيب واحدة رقاصة

http://ana-elbahr.blogspot.com/2009/05/blog-post.html

دمتم بخير

ويكا يقول...

يا دكتره
العيب مش عليهم ، العيب والله على الشنبات اللى سيباهم يخرجوا كده.
انا مع احترامى الشديد على اقل الدرجات للراجل اللى تبصى تلاقيه ياعينى مستغرب اوى من تصرفات مراته او بنته او اخته بالذات فى لبسها ، ويقولك ، البنات دلوقتى دماغهم غريبه ، ومش عارف بيقلدوا مين.....الخ
عيب عليهم اوى ، هو المطلوب هيه من نفسها تربى نفسها ان ده عيب وخيبه.

عيب عليهم اوى والله ، فين الرجوله والنخوه ، فين الغيره والحريه .

ايام زمان تلاقيهم يقولوا على البنت او الراجل اللى ما يحبش الغلط ، واد او بنت حره ، كان مقياس الحريه هو الشهامه والاخلاق ومعرفة الصح والغلط بدون اى ضغط او الحاح.

فيه كلمه كده كنت بسمعها من اصحابى ايام زمان تريقه :
"احنا عيالنا مايله"
عموما

ااعدوا بالعافيه

امممممممه

MaNoOoSh يقول...

نسبة99% من الشباب يتكلم عن مواصفات الزوجة الملتزمة المتدينة اللى على خلق ولا تخلو من الجمال..

ووقت الجواز والاختيار فعلا عايزها هيفاء بيضاء عوجاء ممشوقة القوام ومنغنشة ودلوعة ولبسها شيك وزى القمر ومهتمة بنفسها.. بس أهم حاجة اهم حاجة تكون محجبة وبتصلي.

والحقيقة المواصفات دول هم اللى بيتجوزوا بسرعة.. بس لا بيعرفوا يربوا عيال ولا بيرضوا بحياتهم ابدا.

المعلم محمد صاحب المطعم - طعمية سخنة يقول...

انا عن نفسي محبش مراتي تبقي بلياتشو
و هو ده الوصف الصحيح ... و بس مفيش كلام يتقال ..... يمكن ملهمش اهل

omario282001 يقول...

انا معنديش غير تفسير واحد


ان لم تستحى فافعل ما شئت


و شكراً

الجواز و سنينه يقول...

ههههههههههه
فكرتينى بآخر شات كان بنا
كنا بنتكلم على نفس الموضوع
ان مافيش لبس محترم نشتريه
و دى مشكله حاسسها ناس كتير
و فعلا اغلب المحلات تحسيها عارضه حاجات عيب تتخرج بيها
المشكله مش مشكله جواز و لا ان البنات عايزه تتجوز
المشكله ان الولاد مش لاقيه فلوس تتجوز
و البنات اللى بيروحلها ما بتصدق و تعصره مطالب
فالنتيجه ان كله مقضيها عرفى

نعكشة يقول...

حضرتك اتكلمتي في كذا حتة

1- نجيب لبس منين
انزلي اشتري قماش و خيطيه بتفصيلة حلوة من أي مجلة عند خياطة حلوة بسعر كويس

2- البنات بتلبس كدة لية
تدني في الذوق
معرفش
بس بيبقى شكلهم عجيب صراحة

3- الأمهات مبتعترضش

انا وانا في محل شوفت أم بتقول لبنتها ماتقلعي هنا مانتي لابسة الهدوم
المهم يعني
البنت كانت لابسة بتاع كدة ماسك قوي بطريقة بشعة على الجسم
و البنت محجبة
عارفة نظام البلوزات الطويل على البنطلونات الضيقة
هيا عاملة كدة
بالأضافة إلا انها تخينة مش رفيعة
يعني المنظر كان بشع
و امها قالتلها : حلو حلو يلا يا حبيبتي
وانا مزبهلة

4- الميك أب
طيب انا فيه سؤال بيطرح نفسة في دمناغي بقالو فترة
لما واحدة تبقى مبتحطش ميك اب خالص
و تبقي معترضة عليه
و فجأة تلاقيها بقت تحط ميك أب و تلبس ألوان عجيبة
دة بيعبر عن إية؟؟؟
هل بيعبر إنها بتقول يا عالم أنا كنت قافلة الباب و دلوقتي تقدروا تخبطوا انا ممكن اتجوز
ولا معناه إيه
مش عارفة

نظرية

يلا خير

5- الولاد عايزين إيه

عايزين يمشوا مع واحدة لابسة من اللبس العجيب دة
و يعاكسوا واحدة لابسة لبس عجيب برضو
و يتجوزوا واحدة محترمة

قمة التناقض
بس اقولك

اللي بيبقى وحش قبل الجواز ولما يجي يتجوز يقول انا هتجوز واحدة حلوة بقة
لا يا بابا لا

كما تدين تدان

...........

ععجبتني حتة قالها واحد علق عند حضرتك

ده لو هاتجوزهم ببلاش

مش هوافق برضه

:D

سلام عليكِ

سبهللة يقول...

انا لسه امبارح كنت رايحة عند مامتى وواقفة مستنية تاكسى
واذا بى الاقى بنيتن ماشيين فى الشارع بيتمايعوا ويدلعوا وال ايه لابسين حجاب
حجاب استرتش
بادى كارينا الله يخرب بيته وبيت اللى اخترعه
وبنطلونات استريتش اوى
وطبعا لما شافهم تلات شباب كان لازم يعاكسوهم
وبيقلك التحرش زاد
طيب طول ما فى المناظر جى من البنات
لازم التحرش يزيد
الطف بينا يارب

Foxology يقول...

عمر ما كان الجواز بالشكل ده واللى عقليتها كدة اكيد ربنا هيبعتلها الولد اللى برضه عقليته كدة :)

الطيور على اشكالها تقع

تحياتى :)

موناليزا يقول...

الغريب مش كده وبس الغريب ان ممكن تكون بنت ملتزمة فى لبسها ويجيلها عريس يقولها الكلام ده ماينفعش ولبسك ده مايمشيش معايا فتسمع كلامه برضه عشان تتجوز

قلب ارهقته الاحلام يقول...

كل حاجة بقت بمقاييس غريبه اساسا

وال بيدور علي واحدة كده عاوز يحطها ف فاترينه الناس تتفرج عليها:D

للعرض يعني من الاخر :)

كل حاجه بالمعقول بتبقي حلوة لكن لما تبقي الحاجة زيادة عن اللازم

بتبقي غلط ومضرة حتي الحلاوة يعععع بتموع النفس ^^

ربنا يهدي الجميع

تحياتي ,,,

تأثير الفراشة يقول...

السلام عليكم و رحمة الله و بركاته

أول مرة لى فى التعليق عند حضرتك و بإذن الله أكرر الزيارة، و أحيى حضرتك على تفكيرك و على طرحك للموضوع

بالنسبة للموضوع اللى حضرتك طرحتيه فللأسف إن الموضوع ده له جوانب و أسباب عديدة جداااا ، و فى التعليقات السابقة لقيت كلام كتير من اللى كان فى ذهنى فعلا، إنما أزيد عليه دلوقتى حاجتين

=بالنسبة للبنت أو أهلها و لو هى بتعمل كده فعلا علشان تتجوز زى ما بيقولو، فده دليل على عدم قوة توكلهم ،لأن اللى يتوكل على ربنا سبحانه و تعالى بجد ،هيعرف إنه يطيع و لا يقلق من النتيجة، و يعرفو إن الرسول صلى الله عليه و سلم قال " ما أصابك لم يكن ليخطأك ، و ما أخطأك لم يكن ليصيبك" صدق رسول الله صلى الله عليه و سلم

و حديث آخر -فى ما معناه-

" يا غلام إنى أعلمك كلمات، إذا سألت فاسأل الله، و إذا استعنت فاستعن بالله، و أعلم أن الأمة لو أجتمعت على أن ينفعوك بشىء، لن ينفعوك إلا بشىء قد كتبه الله لك، و إن اجتمعت الأمة على أن يضروك بشىء ، لن يضروك إلا بشىء قد كتبه الله عليك، رفعت الأقلام و جفت الصحف"

صدق رسول الله صلى الله عليه و سلم

فنصيبها اللى مكتوب لها هتاخده هتاخده فمافيش داعى إنها ترخص نفسها و تعصى ربها

=بالنسبة للشباب اللى بيختارو على أساس المظهر، فهمّ عارفين كويس و حافظين كمان الأحاديث بتقول إيه و الشرع بيقول إيه، فمش هقول غير، اسمعوا من تجارب الناس اللى اختارت على أساس الشكل فقط، و اسمعوا من تجارب الناس اللى اختارت على أساس الدين و الأخلاق و الأصل الطيب، و قارنو بنفسكم

طولت على حضرتك، و فى أول مرة تعليق
:)
جزاك الله خيرا يا دكتورة، تحياتى لحضرتك
و بالتوفيق لك دائما

kochia يقول...

مش عارفة اقولك ايه
ده بقي العاااااااااادي

يوميات شاب منوفى يقول...

اى شاب لمل يجى يتجوز بيدور على البنت المحترمة بنت ناس طيبين انما الى هيتجوز واحدة من الى بنشفهم فى الشوارع اليومين دول يبقى لامؤاخدة شاب سيكو سيكو مش بيدور على بنت تصونة وتقف جنبة لا بيدور على عروسة حلاوة

Che يقول...

البنات دى بتكون للخروج و الفرجه مش للجواز ... الجواز بتكون ليه هدوم تانيه

micheal يقول...

نعم..للأسف فكر بدا يسود وينتشر وهما كده ميعرفوش أن البنت بترخص نفسها جامد
تحياتي

غير معرف يقول...

إزيك يا دكتورة البنات دلوقتي بيغيروا من بعض و عشان كدة كل واحدة بتنزل علي سنجة عشرة بالاضافة لإنعدام الثقة بالنفس وعشان كدة بدور علي الإعجاب في نظرات الشباب ليها و شكرا

Heba يقول...

Allah yenawar 3aleeky, el-banat ba2et bete3mel keda 3ashan 3ayza tetgawez, ka2an mafeesh Rabena shayefha w 3alem bel-7al w en kol shee2 be2eedo

w law dah el-7al el-wa7eed 3ashan atgawez, yeb2a mesh 3ayza a3'deb Rabby w atgawez


sorry, i've no arabic keyboard

Bola 7elmi يقول...
أزال المؤلف هذا التعليق.
Bola 7elmi يقول...

محلات الهدوم مبقتش بتاع هدوم
اللبس بقى مأزعر يا أختي
مبقناش بنعرف نلبس والله
والمحلات عجيبه .. تدخلي المحل متلاقيش لبس نافع ..
انا فـ كتير بشوف تونيكات فـ المحلات م الاخر مينفاعش غير قميص نوووووووم << بجد .. والبنات بيلبسوه عااااااادي جدا

بالتالي طبعا مبنشتريش

غير البديهات .. اللبس اللي بيلبسوه الموديل بس .. يعني لما تكوني تخنانه شويه مش هتلبسي .. حاجه جميله خااالص
روحي خسي
الواحد فـ كل موسم والله بيتعقد .. وبفضل اقول لصاحبتي مش هنعرف نلبس الصيف دا .. مش هنعرف نلبس الشتا دا

اللبس زباااااااااااااااااااااله

على م بتشتري طقمين بتطلع عينك ..

وعن الجواز بقى ..... حبيبتي الجواز كمان بقى غريب جدا ..
سريع سريع .. هوب اتخطبنا .. هوب اتجوزنا .. هوب مختلفين وعاوزين نطلق
وكمان بقى .. بقو الشباب بيتجوزو فـ سن صغير يعني دا اللي شيفاه انا .. فـ العقليه اصلا مراهقه .. نظرتو للبنت مراهقه .. فـ الطلاق بيكون أسرع .

همسة يقول...

والله يا دكتورة لو البنات بتلبس بس لمجرد انها تتجوز فدا فى حد ذاتة كارثة بكل المقايس إزاى ترضى انو يبقى شريك حياتها مختارها بس عشان جميلة أو لابسة على الموضة بس البنت إللى تفكيرها كدا هيكون هو كمان بنفس سطحية الفكر دا والبيت دا مش بيعمر كتير.بس نرجع نقول الاساس على البيت وتربية البنت .وربنا يهدى جميع بنات المسلمين
تحياتى

سبهللة يقول...

دة الميل بتاعى
raniarachad@yahoo.com
ابعت لى الميل بتاعك وقولى فيه انك صيدلانية طالعة نازلة عشان ابعت لك دعوة لقراءة مدونتى لانها اتقفلت للعامة وبقت مفتوحة للى عندهم دعوات بس
سلام عليكم

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .