الأحد، أبريل 12، 2009

لاااااااااااااااا تعليق


بقالى كام يوم عايزه اكتب حاجه جديده و لاول مره من فتره يبقى عندى كذا موضوع حيرانه بينهم
و الحمد لله قدرت احسم امرى لصالح الموضوع بتاع الصوره دى بس موضوع النهارده
مش على الصوره دى بالضبط يعنى لكن عن المدارس برضه
معتز الدمرداش فى تسعين دقيقه من كام يوم عرض كليب تووووووووووووووووحفه
لكل عشاق النوادر و العجائب يلحقوا يحجزوه عشان معتز خلاص قرر يسلم باسبقيه الحجز
الكليب بدأ بحلقه كبيييييييييره قوى ولاد و بنات و اييييييييه لمه كبيره و يظهر انه احتفال او مناسبه
سعيده لشخص ما و تأتى المفاجأه ان اللى بترقص فى النص طالبه لابسه الزى المدرسه
و طبعا الكاميرا تجولت فى المنطشقه عشان توضح لنا ان الكارثه و المسخره دى بتحصل فى حوش
المدرسه وورانا علم مصر مازال يرفرف خفاقا على ارض مصر الحره
طبعا دلوقتى المعقدين منكم بيقولوا رقص فى المدرسه و قلبتوا حواجبكم و احوليتم و بقكم طلع نار
زى التنين المفترس من عندى انا بلاش انفعال عشان مش كويس علشانكم
فجأه بقى اخ فاضل من زملاء الاخت الفاضله برضه اللى بترقص اتبرع و شال الكوفيه بتاعته ووطى
عشان يحزم زميلته ماهو مدام رقصت تبقى ترقص صح و احسبها صح تعيشها صح
كل ده بيحصل و مفيش ناموسه جت قالتلهم بتعملوا ايه
المشهد التانى فصل و سبوره و مدرسه محترمه بتكتب عنوان درس و مالا يقل عن 5 بنات ماسكين
شعر بعض و ضرب و عض و شلاليت اه و الله بنات بتضرب بعض بالشلاليت و المدرسه
مستمره فى كتابه العنوان على السبوره ولا كأن فيه حاجه خالص
شويه واحد اتصلت بمعتز و كانت وليه امر بنت فى المدرسه و قالت ان الكليب ده حصل فعلا
و مع كل الناس فى المدرسه و ان المدرسه دى كلها تسيب و معظم المدرسين غايبين
و التلاميذ مش بياخدوا حصص خالص و من الاخر الدنيا بايظه طب يا ستى سايبه بنت فيها ليه
قالت اصلها قريبه مننا حسيت ان كلامها خايب و عبيط
شويه و ابله الناظره اتصلت و انكرت تماما ان المهذله دى حصلت عندها
و فضلت تقول لو ده حصل و انا معرفش يبقى ماليش لزمه فى المدرسه المهم كل واحده اتمسكت بكلامها
المهم معتز سأل الناظره تعرفى المدرسه دى قالتله الصوره مش واضحه مع انها كانت واضحه جدا لكن
وليه الامر قالت دى مدرسه لغه عربيه و مرضيتش تقول اسمها.
اه نسيت اقوللكم ان المدرسه دى مدرسه تجريبيه فى مدينه نصر اسمها عباس العقاد تقريبا
و النهايه تبقى المهزله على ماهى عليه و ادى حال التعليم المتطور جداااااااااااااااااااا فى بلدنا
و لا حول و لا قوه الا بالله

هناك 29 تعليقًا:

kochia يقول...

بس الصورة حلوة ومختلفة
بنات بتنط من السور
جديدة

حاجات جوايا يقول...

والله منا عارفة اقولك ايه
انا شفت الحلقة يومها وقعدت احمد ربنا انى مشتغلتش
قمة التسيب والفوضى واللااخلاقية
وولية الامر دى مش عارفة سايبه بنتها فى مدرسة بالشكل ده ليه
خصوصا انها قالت ان الولاد بيقعدوا عالسلالم يعاكسوا البنات اللى طالعين ونازلين

مش المشكلة بس ان المدرسة تتحول لساحة رقص يجمع بنات واولاد
المشكلة الاكبر ان المدرس معدش له قيمة فى المدرسة والطلبة بقوا بيستهزءوا بيه
و بناء على كده يبقى طبيعى جدا ان البنات يجروا ورا بعض فى الفصل والمدرسة واقفة لا حول لها ولا قوة
وطبيعى جدا ان حوش المدرسة يتحول لساحة رقص مختلط

العيب فى مين ؟؟
اكيد مش فى البنات بس
العيب فى المنظومة التعليمية والتربوية من اولها لآخرها
ابتداءا بالاسرة وبوزير التعليم

لو صلح حال الوزير .. صلحت حال الادارة التعليمية والمدرسة والمدرسين
ولو صلحت حال الاسرة .. صلح حال ابنائهم وبناتهم

حالص ودى
سالى

blue-wave يقول...

والله بجد مش عارف اقول ايه
بس يعنى جت على دى؟
ما البلد كلها بايظه

الجواز و سنينه يقول...

http://www.youtube.com/watch?v=_kvZTSNb2BA


ده لنك الفيديو اللى عرضه معتز
و لا تعليق

غير معرف يقول...

انما الامم الاخلاق ما بقيت فان هى ذهبت اخلاقهم ذهبوا
ولاحول ولا قوة الا بالله االعلى العظيم
برجاء لا عتاب على بعض من كل
لان هذا هو الواقع المتدهور الااخلاقى اللادينى المرير فى كل شئ ربنا يستر على ولايانا
استر يارب
حوش ياستار العيوب

Unknown يقول...

عادي جدا جدا جدا
خليني اقولك انا بقي ايه اللي بيحصل في مدارس البنين ابتدائي و اعدادي و ثانوي
اولا الابتدائي : المدرس يضرب طفل بالقلم و يقولك مش انا لا لشئ ان الطفل معرفش يجاوب

ثانيا الاعدادي : الفصل يضرب يقلب و عادي جدا

المدرس يقولك عادي هو احنا في حضانة؟

و التزويغ علي ودنه لحد ما المدرسين مبقوش عارفين يجروا ورا العيال اللي بتنط من علي السور

ثالثا الثانوي : طبعا محدش بيحضر اساسا و الطلبة مفيش مدرسين و لو ولعوا في بعض عادي

كمان طبعا العلاقة بتطور بين المدرسين و الطلبة

يعني مثلا مفيش مانع طالب يعزم علي مدرس بسيجارة و المدرس يساعده علي التزويغ و يمسكله الشنطة كمان

و تتدخل التكنولوجيا و الطلبة تزور تصريح الخروج علي الوورد



و في النهاية بطلب بانهم يعلوا السور و البوكس يقف تحت السور اشمعني الاولاد بس احنا عاوزين مساواة سور امور قصير زي ده و مفيش بوكس ولا حاجة

د. ياسر عمر عبد الفتاح يقول...

لما كنا فى ثانوي كنا بنعمل مهازل فى الفصل
مرة هدينا الحيطة اللى بينا وبين الفصل اللى جنبنا
مش هديناها هديناها يعني .. لكن فتحنا فيه فتحة كبيرة جداً
وكمان كسرنا الباركيه اللى كان في الأرض
وكنا بنط من على السور كل يوم
الناس اللى اكنت بتنط دى كلها دلوقت فى طب وصيدلة وهندسة وحاسبات
يعني كانت الناس المحترمة فى المدرسة المحترمة.
فمدقرش أقول بقى المدارس الغير محترمة بيحصل فيها إيه
لكن مكنتش أعرف إن الموضوع ده وصل لمدارس البنات

MǿиY El-Shreef يقول...

يعني جات ع دول

حاجه تنقط وتجيب الضغط

بالذات الي حصل ف المدرسه ده

ودي مدرسه تجريبيه كمان المفروض تبقى مستواها عالي شويه

حرقه دم والله

ربنا يهدي

مسدس صغير يقول...

سياسة اتعلم بفلوس وانت تدوس.
العلم كالماء والهواء وبما ان الماء بقى غالى جدا والهواء كذلك فالعلم لابد ان يكون كالماء والهواء.

Mafrousa يقول...

ازيك يا قمرة
مرسي على مرورك
التورتاية جاهزة فى اي وقت و انتى عارفة
ربنا يخليلنا العم هايبر
هههههههههههههههههههههههه
اما بالنسبة للصورة وموضوع معتز و المدارس
يعنى اشمعنى الطلبة ولا المدرسين حيكونوا عدلين
ما همه جزء من المجتمع اللى لازم نترحم عليه و نسأل الله ان يهديه و ياخد بإيده علشان خلاص
انا مفروسة بما في الكفاية و مفروسة من كل حاجة بزيادة
سلام
اه ما تنسيش تخرجي العيال من المدارس و تسرحيهم بشرايط اسبرين فى الاشارة
هههههههههههههههه

غير معرف يقول...

السلام عليكم.انا مصريه مقيمه في الخليج.ومن كثره سماعي والاسره لاخبار معتز اصابني وبناتي الاكتئاب حتى انهم كرهوا مصر ومش عيزين يرجعوا ليها ابدا.
ربنا يرحمنا الواحد مش عارف يلاحق على الفساد اللي هنا ولا هناك اصبح كل حاجه في مصر غلط في غلط والواحد مش عارف الاصلاح يبتدي من فين او الحل ايه؟
وهل اللي احنا بنعمله من كتابه وشجب واعتراض كافي للحل !!!!!
ولا احنا بنعمل زي ام البنت اللي اتصلت وقالت ان بنتها في المدرسه وهي عرفه كل الفساد اللي بيحصل في المدرسه برضوا سيبه بنتها فيها!!!!!
وعجبي........
بنت النيل
أو
نوجه

JustMe يقول...

هو ده بقى العادى خالص وزى تقريبا كل الى علق قال فى نص كلامه ياعنى هى هتيجى على دى بس بامانه معتز ده ظلمة الى خلاه يقدم برنامج

koketa يقول...

أذا لم تستحى فافعل ما شئت
والله ما عندى تعليق على الكلام ده
فى مواقف بيبقى السكوت فيها ابلغ من الكلام

غير معرف يقول...

عادي ياحبيبتي انا مش مستغربه حاجه
لان ده بيحصل كتير في مدرستي بنت ضربت
الابله بالقلم علي وشها قدام الفصل كله
ووزاره التربيه والتعليم اكتفت انها نقلتها من مدرستنا لمدرسه تانيه
وفي تلت ولاد في مدرسه البنين ضربوا المدرس
بالاحزمه في الفصل
وطلاب في الثانويه العسكريه قطعوا زميلهم بالسكاكين في حوش المدرسه
عااااااااااااااااااادي

همس الاحباب يقول...

هههههههه
ولسه
يا ما نشوف
مهازل وربنا
يرحم ايام زماااان
خلاص بقى مفيش تعليم
تحياتى

Asmaa mahaba يقول...

هههههه الصوره دى فكرتنى بمدرستى ايام ثانويه عامه البنات اللى نطيت من فوق السور عاملين حساب للبواب احنا بقى البنات عندنا كانوا بيكسروا البوابه ويخرجوا بلطجه

dr.lecter يقول...

الطمي يانشرراح علي اللي راح


كان زمانه جبر قال تعليم قال

في الاصل اسمه تربيه ثم تعليم
وبما ان المهم التعليم يبقي عوضنا علي الله في التربيه

صيدلانيه طالعه نازله يقول...

Kochia:الصوره لقيتها على النت و انا عماله ادور على صوره للبوست و حسيت انها معبره عن الموضوع
================================
حاجات جوايا:اللى غاظنى اكتر وليه الامر اللى بنتها فى المدرسه و فيها كل الكوارث دى و لسه مخلياها فيها
و فعلا المنظومه من اولها غلط و بالتالى الباقى كله غلط
==================================
blue-wave:عندك حق بس لو دخلت على اللينك حتشوف العجب
================================
الجواز و سنينه:كان نفسى احط اللينك ده عندى من الاول فى البوست بس معرفتش اجيبه
شكرا يا ديدى انك بعتيه
=================================
غير معرف:بعد اللى اتعرض ده الوضع انهار مش اتدهور بس
ربنا يستر فعلا
=============================
طعميه سخنه:المشكله ان المدرسين مبقاش تفكيرهم الفصل بقى تفكيرهم الدروس الخصوصيه اللى بيدوها عشان يقدروا يعيشوا فى ظل الوضع المالى المنيل بستين نيله و التلاميذ مش عارفه بقوا ممروعين كده ليه و مالهمش كبير يظهر الاهالى مبقيتش فاضيه تربى عيالها
==================================
د/ياسر عمر عبد الفتاح:ههههههههههه
حلوه هديتوا الحيطه دى
كلنا و الله ايام المدرسه عملنا كوارث و كلنا الحمد لله بعدها كنا متفوقين
لكن متقنعنيش ان الاشكال اللى ظهرت فى الكليب دى حتفلح فى سنتها
=================================
mony:ما هو اللى صدمنى انها طلعت مدرسه تجريبيه يعنى المفروض مستواها راقى شويه
فعلا حاجه تحرق الدم
==================================
مسدس صغير:و الله بالمنظر ده العلم خد بالجزم و الشلوت كمان
ربنا يستر
=================================

صيدلانيه طالعه نازله يقول...

مفروستى:و الله فكره حكايه اسبرين فى الاشاره دى ايه الافكار النوره دى بس
يعنى انا مفيش حاجه بكتبها الا و تفرسك كده حتزعلينى من نفسى
بس الموضوع ده يقهر مش يفرس بس
و لا ايييه
بالنوسبه للتورته انا مش عايزاها من هايبر لابواااااااااار لو سمحتى
هههههههههههههههههههههه
================================
نوجه:فيه حد عاقل تجيله فرصه يخلع و يفكر يرجع تانى برضه
بناتك طبعا لانهم عاشوا شويه كبيره فى مصر و بعدين سافروا حسوا بالفرق طبعا
بس و الله التعليم نوعا ما ارقى فى مصر باستثناء بعد البلدان القليله
نورتينى
=============================
justMe:ان متفقه معاكى ان معتز ده خنيق حتى و هوا بيناقش فى الموضوعات المهمه بزهق منه خالص
بس الموضوع فعلا مسخره
==================================
koketa:و عشان كده انا سميت البوست لا تعليق
لان مهما اتقال كلام مش حيوفيهم حقهم بصراحه
==================================
mayada:كل اللى بتقوليه ده مكناش نتخيل انه يحصل حتى فى افلام الرعب مش فى الحقيقه
دلوقتى بقى عااااااااادى و بيتكتب فى الجرايد يوميا بدل الحادثه اتنين و تلاته
================================
همس الاحباب:اللى يعيش ياما يشوف فعلا و ان لم تستح فاصنع ما شئت
==================================
سومه:ههههههههههههههه
و كمان كنتى بتنطى من على السور
دلوقتى بيدوا البواب فلوس عشان يسيب لهم الباب موارب و يعملنفسه مش شايفهم و هما بيزوغوا
==================================
dr.lecter:اصلا انشراح مش فاضيه بتلطم على حاجه تانيه
اصلا دلوقتى و لا تربيه و لا تعليم و لا اى حااااااااجه خااااااالص
نورتنى
==============================

الشموع البيضاء يقول...

صوره بجد مهزله
والفيديو مشفتوش بس مهزله بردو
التعليم ده هباااااب فمصر وكمان تجريبيه يا ماشاء الله
صحيح الواحد كان ممكن يشاغب يتشاقى شويه لكن ده كده انحدار رهيب فى كل حاجه هو لما يروحو الجامعه هيعملوا ايه بقا ؟؟
ونرجع نقول الشباب والعرفى والادمان والتحرش و و و و
بجد امتى مجتمعنا ده هنبتدى ننعالجه كل البرامج عماله تجيب السلبيات والمسئولين ودن من طين وودن من عجين واخر طناش طيب واخرتها اييييه؟؟
ربنا يصلح لنا احوالنا يارب
معلش انا انفعلت شويه لانى قريت كام حاجه ورا بعض مبقاش ملاحق من ايه ولا ايه
تحياتى ليكى ومدونتك الحميله جدا

شاب كــ طخين ـــــا يقول...

انا شوفت حلقه 90 دقيقه الاكان فيها الفيديو
وسمعت رد الابله الناظرة طويله العمر والتيله
عماله تنكر وشكلها بايخ اوى عايزة تتطلع معتز فى الاخير بيشوهه سمعه بنات المدرسه
بس ايه البنات المفتريه الابتقدر تنط السور دى صحه بغباء ههههههههه

دمت بكل خير
سلام

احساس لسه حى يقول...

عزيزتى

المشكلة عندنا ان كل مشاكلنا مش بندورها على حل


وتلاقى من 50 سنه نفس المشكلة

واكيد المدوسة مش السبب بس

الاهل اللى مش بيربوا كويس سبب

وربنا يستر على بناتنا واولادنا

تحياتى

سلام

Unknown يقول...

هههههههههههه
اقولك ممروعين ليه
شوفي رمضان مبروك ابو العلمين حمودة
طالما الاستاذ اكل الكيك خلاص !

r يقول...

الصراحه انا مش مستغربه ولا مستنكره
لان دا الطبيعى فى وزاره اسمها بس التعليم مش التربيه والتعليم
واذا كنا بنعايب على المدارس فطبيعى فاقد الشئ لا يعطيه
بدايه من المسئول الاكبر
بجانب ان اولياء الامور نفسهم فى المدارس دى مش مربين اولادهم اللى مش متربين وفى وجود مدرسين ضعاف الشخصيه اسلوبهم لا تعليم سوى فى الدروس والمجموعات الخصوصيه واللى بيدفع اكتر ممكن ياخد درس اخص فى بيته
فطبيعى الطالب حاسس انه اشترى المدرس بفلوسه وبيجى لبيته
باختصار المنظومه كلها بايظه
وكله بيدارى على بعض
وتحيا الحكومه

قلب ينبض بالحب يقول...

عارفة أنا اتفرجت برضه عل البرنامج ده وكنت قاعدة سناني هتتكسر من الغيظ من موقف الناظرة مش غلط اننا نغلط بس اننا نقاوح ونصر على اننا مش غلطانين دي كارثة واساسا فكرة مدرسة مختلطة في سن حرج زي ده امر مرفوض وياترى الجاي ايه

نعكشة يقول...

يانهار بتاع

هههههههههههههه

بس المسخرة ان المدرسة واقفة و لسة بتشرح

بجد
احيي فيها ثباتها

هههههههه

انا المدرسة بتاعتي كانت بتقول زمان كنت شغالة في عباس العقاد دية

و العيال فيها بيشربوا مخدرات في الحمام

يخربيت التسيب

ايام مدرستي انا فاكرة كان فية بنات بتنط من فوق السور
و بنات بتركب عربيات

انا فاكرة المرة الوحيدة اللي خططنا فيها انا و العيال صحابي نخرج من المدرسة او بمعني اصح نزوغ

خرجنا من باب المدرسة لااعدادي اللي جمبنا

و بعد ما خرجنا بسلام و خلاص مفروض نروح

نفسي أنبتني

و رجعت تاني المدرسة بعد ما نجح المخطط

طب عملتوا ليه من الاول
متعرفيش
المهم يعني

التسيب من زمان قوي

بس انهم يتخانقوا قدام المدرسة
او يرقصوا جواااااااا المدرسة

دة قمة المسخرة

يلا خير

ربنا يستر على ولادنا ( اللي لسة مجوش)

سلام عليكِ

Esraa Hamed يقول...

مااااااااعلينا

صيدلانيه طالعه نازله يقول...

الشموع البيضاء:اذا كان اللى ماسكين مقدرات المجتمع و تشريع القوانين بيقتلوا و يسلطوا على القتل لمجرد انه حب و لا طالش يبقى متوقع من الشعب نفسه ايه اللى شايفينه دلوقتى مجرد بدايه لنهايه مروعه جايه بسرعه قوى فى الطريق
=================================
امبارح كان عمرى عشرين:فعلا انا اكتر حاجه غاظتنى حكايه تشويه سمعه بنات المدرسه دى
حاجه تفرس
==================================
احساس لسه حى:بص من الاخر مبقاش فيه اهالى بتربى و تراقب و تنصح اصلا هما سافروا و هما معاهم فى نفس البيت
و تلاقى كل اوضه فيها تلفزيون و تليفون و دش كمان يبقى يقعدوا مع بعض ليه و بمناسبه ايه
=================================
طعميه سخنه:هههههههههههههه
يبقى اكيد العيب فى الكيك ايه رايك نخليه باتيه بالجبنه
==================================
بسنت: خلينا نتفق بقى ان الاهالى و التربيه دى بقت موضه قديمه و عقد او خيال علمى مش بيحصل و بالتالى كل واحد بقى ماشى بدماغه و مش هامه حد
==================================
قلب ينبض بالحب: سلامه سنانك يا سكره
زعلانه ليه بقى ده يا بنتى بقى حال مجتمعنا كله مش المدارس بس نغلط و نقاوح و نكابر
عاااااااااااااااااااادى
=================================
نعكشه:اولا واحشانى جدا من زمان مش نورتينى
حلوه حكايه بعد ما زوغت ضميرى انبنى دى
اصل انتى عندك براعم تربيه كويسه بس مستخبيه و نقحت عليكى طبعا بعد نط السور
بس عملوا فيكى ايه بعد ما رجعتى تانى
==================================
ُEsraa Hamed:عارفه احلى حاجه فيكى ايه؟؟؟؟؟
مااااااااااااااعليناااااااا
===================================

همسة يقول...

ربنا يستر على العيال
اللى ذنبهم الاول فى رقبت كل الكبار

مدونتك جميلة

تحياتى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .