السبت، مارس 15، 2008

الاشكيف المخيف



امبارح كان الجمعه و زى كل جمعه نزلنا بعد صلاه الجمعه نشترى حاجات
الاسبوع


بعد ما خلصنا مشاويرنا و مروحين مرينا جنب السينما الكباره اللى عندنالقينا فيها

فيلم جديدالا و هوSAW4 و نظرا لادمانى انا وكل اسرتى للافلام الخويفه زى بنتى

بتسميها قصدها المرعبه بسرعه رحت حجزت التذاكر و دخلنا الفيلم

من اول الفيلم مابدأ و حسيت انى عايزه انزل تحت الكرسى من الفزع

يا جماعه ده مش فيلم رعب ده دم لمجرد الدم و اكتشفت ان GRUDGE 1&2

افلام كرتون جنبه الفيلم اوله ناس بتشرح واحد ميت و بيفتحوا بطنه كانهم بيفتحوا فرخه ينضفوها

ويطلعوا مخه يوزنوه و بالصدفه البحته يلاقوه بالع شريط كاسيت و مسجل عليه تعليمات لشخص بالصدفه

برضه يكون هو اللى بيشرحه............شفتوا كل حاجه مدروسه و متظبطه بالمللى

الفيلم مشى لغايه الاخر بنفس الدم و العنف مش الرعبو لقيت ولادى جنبى آخر انسجام

بصراحه اتضايقت من نفسى لانى خليت ولادى يشوفوا العنف ده كله بهذه الصوره المكثفه

واللى دفعت فلوس علشان يشوفوها

و للاسف هى دى الثقافه اللى الغرب بيصر انه يصدرها لنا دائما و اما بيحاول البعض

انه يطبقها بيقولوا عليه همجى و ارهابى و مختل مع انهم اللى معلمينه ده

و للاسف احنا اللى بنرفع الواطى و نخليه فوقنا دايما بانبهارنا به و تقليدنا الاعمى له

دون تفكير


خرجت من السينما عندى صداع و زهق اما ولادى كانوا مستمتعين و بيقارنوه باللى



شافوه قبل كده..........يمكن علشان انا كان اخرى الاشكيف و ابو رجل مسلوخه؟؟؟؟؟؟؟؟؟؟؟؟؟؟

هناك 24 تعليقًا:

فضفضة يقول...

دى اول زيارة ليا لمدونتك الجميلة

واحب اقولك ان الرعب فى الافلام الغربية بقى مبالغ فيه جدا

وده طبيعي لانه بيحاولوا انهم يتخطوا ما سبقهم من افلام الرعب

وده بيكون على حسابنا احنا

بس كمان خلى بالك صحيح الواحد مش عاوز يطلع اولاده خوافين

بس مش عايز يرعبهم برضو

احلا حاجة ان اولادك كانوا مبسوطين

اما انتى فربنا يستر عليك من الكوابيس

تحياااااااتى

Zouka's يقول...

سيدتى هذا بسبب الفراغ لعدم كفائة الافلام التجاريه العربيه وحتى عندما يكون فيلم هادف تطلع فيه القطط الفطسانه
نرجو التقدم والتوفيق للسينما المصريه وللبلد كلها
وشكرا
اشرف

رئـــــيسـة حزب الأحلام يقول...

السلام عليكم وليه افلام الرعب دى مابلاش منها

محاولة لكسر الصمت يقول...

اولا .ده اول تعليق ليا اتمنى تقبليني هنا..
وثانيا ..انا كمان معاكي في حكاية الفيلم دي..بصراحة سلسلة sawكلها بالمنظر ده..رعب المشهد اكتر منه رعب الموقف..يعني باستثناء الجزء الأول..حجات عجيبة بتتقطع ودم ومش عافر ايه..متهيالي مش هيه دي الافلام اللي ينفع تتسمى افلام رعب..

Desert cat يقول...

يا مامى
ده انا خوفت من الحكاية امال لو شوفت الفيلم هيغمن عليا
الا اخبار سوسو الصديقة ايه ؟؟؟

NOur يقول...

انا بصنف الافلام دى لنوعين

يا اما فيلم رعب
يا اما فيلم قرف
اعتقد دا م النوع التانى مع انى مشفتهوش بس من كلامكو

يعنى دم و كدا

الجواز و سنينه يقول...

حبيبتى علا
و الله وحشتينى جدا بس تقريبا بشوف النت صدفه
المهم احكيلك حكايه عن الفيلم ده
انا اصلا ما شوفتوش بس اتحكالى عنه علشان كده قررت انى ما اشوفهوش نظرا لانى قلبى قلب خسايه
و الدنيا مش ناقصه رعب علشان كمان افع فلوس و اروح اشتريه قصدى اتفرج عليه
تعيشى و تاخدى غيرها و اديكى عرفتى انك ما تهوبيش عند السينما تانى و الافلام دى موجوده علشان الاولاد هايضغطوا عليكى و فى الاخر تلاقيكى داخله اللى همه عايزينه

المـــفـــــــقــــــــوعـــــة مــرارتـهــا يقول...

انا بقالي مدة مادخلتش سينما .. انا والولاد
مش لاقيه حاجة تناسب سنهم آخر فيلم شفناه سوي كان الحب كدة لحمادة هلال
ورغم اني مش من عشاقه اوي بس حبيته في فيلم الحب كدة تحسي انه فيلم اتعمل مخصوص عشان ولادي .. اول مرة مايناموش في الفيلم

مروة الزارع يقول...

انا على فكرة بموت فى الام الرعب

اللى مش بتفرج على نصها

يعنى تلاقينى 3/4 الفيلم مغمية عينى وبصوت

مش عارفة بشوفة لية

تحياتى ليكى ولولادك ومتخلهومش يتفرجوا كتير

اول مرة عندك بس مش هتكون الاخيرة

Bongo يقول...

افلام saw كلها نفس النظام

دم و مناظر مقرفة طووول الفيلم متواصل بدون اي هدف او حبكة للفيلم خالص

يعني ممكن يبقي فيلم رعب بس رعب فعلا مش دم و قتل و خلاص ..

بس بصراحه افلام الرعب دي هواية :D

و ولادك ليهم حق يحبوها :D

بس بالنسبة للنوعية دي من الأفلام فأنا لو منك اخدهم و اقوم

مفيش حد يستحمل المناظر دي

ربنا يخليهملك :)

و ابقي دخليهم افلام كرتون المرة الجاية :D

الشموع البيضاء يقول...

اول مره ازورك وموضوعك حلو ومدونت كمان..انا كنت من هواة افلام الرعب بس بقالى مده بصراحه حسيت ان الموضوع فعلا استهلاكى بحت وكمان نصيحتى ليكى بلاش للاطفال خالص يشوفوه مش حلو خالص..وفعلا امريكا بتعرف تنتج واحنا نستعلك ونستقبل ثقافتهم وغسيل المخ وبس بكل اسف

سارة علي يقول...

عارفة انا بحس اننا غشان نهرب من التفكير فى اللى بيحصل حوالينا وعشان الاسعار اللى بقت نار بقينا ندور على اى حاجة تلهينا بجد اهو نخوف نغسنا وبعدها يمكن كل حاجة تتحل بس للاسف مفيش حاجة بتتحل من غير ما نتعب هى دى الحياة مدونتك جميلة اوى فى انتظار جديدك وربنا معاكى

موناليزا يقول...

الجيل الجديد اتعود على العنف والرعب ده كفاية نشرة الاخبار ولذلك اى مشهد مش بيأثر عليهم لانهم اتربوا على كده
بس بجد احييكى لمشاركتك اولادك فيما يشاهدوه
تقبلى مرورى

صيدلانيه طالعه نازله يقول...

الى فضفضه:انا بحب الافلام دى اكتر من ولادى و هما حبوها عن طريقى
وشكرا على زيارتى و الى حوارات جديده
""""""""""""""""""""""""""""""
الى اشرف:للاسف الافلام العربيه كلها بقت قصه واحده بمجرد تشوف اوله وكلمتين حوار تعرف الباقى
""""""""""""""""""""""""""""""""
الى الست رئيسه الحزب : الرعب انتى اللى حتشوفيه بمجرد اشهار الحزب
ابعد عن السياسه و غنيلها
هههههههههههههههه
نورتينى
""""""""""""""""""""""""""""""""
الى دواير :فعلا الفيلم كان دموى جدا
مش مين عبقرينو اللى الف الفيلم ده اكيد واحد سيكو
تقبلى تحياتى
""""""""""""""""""""""""""""""""
Desert cat:انا قلت محدش يقرى البلوج فى الضلمه شفتى اديكى خفتى
بالنسبه لسوسو عزلت من الشقه من نقكم
قعدتوا تنبروا فيها لغايه ما طفشت ...
انا غلطانه انى حكيت صدق اللى قال دارى على شمعتك تقيد
ههههههههههههههههه
سعدت بك و الى لقاء
"""""""""""""""""""""""""""""""""
الى د/نور الفيلم ده مش مقرف هو دموى
يعنى الدنيا حمرا طول الفيلم
شرفتينى
""""""""""""""""""""""""""""""""
الى الجوازوسنينه:انتى وحشتينى اكتر
بلاش بقى حكايه الخس و الجزر و الارنب الغضبان قولى انا خوافه وخلاص
اما بالنسبه للسينما انا عاشقه ليها كل الافلام اللى بتيجى فيها بشوفها ساعات بتصيب و ساعات بتخيب زى فيلمنا ده اللى للاسف انا اللى دفعت التذاكر
سلامى لكى
""""""""""""""""""""""""""""""""""
الى المفقوعه مرارتها:فيلم الحب كده كانوا عايزيين يشوفوه تانى
اما افلام الرعب دى مزاج سيادتك زى الشاى ابو لبن كده على غيار الريق
اولادى اساسا بيروحوا السينماعلشان يجيبوا فشار فى الاستراحهو شيكولاته
ده سر انا خصيتك بيه علشان غلاوتك عندى
ههههههههههههههسلامى لحماتك::
""""""""""""""""""""""""""""""""""
الى مروه زارع:ساعات باعمل زيك بس قليل بنتى اللى بتعمل كده مره النور قطع فى الصيدليهوكانت لوحدها جيت لقيتها قافله عينيهاو مربعه ايديها علشان متشوفش الاشباح
وهى شجاعه جدا وطالعه لماما...
احم..... احم
"""""""""""""""""""""""""""""""""
الى Bongo:فعلا هى هوايه
احنا عملنا زى ما قلت فى الاستراحه دخلنا الفيلم فى القاعه التانيه كان عربى بس ممل جدا و الاولاد زعلوا و رجعنا الفيلم المرعب تانى
نورت المدونه
""""""""""""""""""""""""""""""""
الشموع السوداء:فعلا فى افلام رعب بقت تجاريه بس زى الافلام العربى اللى كانوا بيسموها مقاولات زمان
شرفتينى و الى لقاء
"""""""""""""""""""""""""""""""""""
الى ساره على:فعلا الحياه احلى حاجه فيها التعب من اجل هدف مش الانشغال عنها
شرفتينى و الى لقاء
""""""""""""""""""""""""""""ط
موناليزا:فعلا اللى يشوف اخبار العالم يحس ان الافلام دى جنبها ولا حاجه لان الواقع ابشع بكتير
تقبلى تحياتى
"""""""""""""""""""""""""""""""""""

كريمة يقول...

السلام عليكم
انا ايضا احب افلام الرعب لكن على خفيف ماقدرش اشوف مناظر التشريح
لكن ممكن اشوف افلام الاشباح و غيرها لا تخيفني
يا ريت كان كل رعب الغرب هو انتاج سينيمائي ... الواقع اكبر بكثير من السينما و الافلام و العراق تشهد على ذلك
المهم الاطفال ممنووووع يشوفو هذه الافلام ارجوكي لا تخليهم يتعودوا على مناظر الرعب و الدم وتصبح عادية عندهم... خليهم يشوفوا افلام هادفة وفيها طبيعة و هدوء وسلامة فكر وسلمي لي عليهم بزاف بزاف ..يعني كثييير
بالنسبة لكود الاخبار انا حاولت اضعه لك هنا لكن تاتيني رسالة تقول لا يمكن قبول htmlخاصتك ساضعه لك في message box
وادا لم يعمل يا ريت تعطيني ايمايلك لابعثه لك
تحياتي لك


تحياتي ليك

صيدلانيه طالعه نازله يقول...

اشكرك يا شمس على اهتمامك و ردك السريع
My E.mail
olamohammedeg76@yahoo.com

arsenalwy يقول...

ماشى يادكتورة

حتى لو هما بيبعتوا الافلام الرعب دى ودة مش اللى بيحصل علشان موزعينا وشركتنا المصرية اللى بتجيب الافلام دى بس حتى لو هما اللى بيجيبوها

انتى مش مجبرة انك تدفعى وندخلى تورى اولادك اللى اكيد صغيرين المناظر دى

اعذرينى لانى اول ما بشوف فيلم رعب بيركبنى ميت عفريت


شكرا

goodman يقول...

على فكرة انا من مدممى افلام الرعب ايضا
لكنى افضل الرعب النفسى
مثل فيلم النصف المظلم او سايكو
شاهدتsaw قبل ذلك ولم يعجبنى

vanilla يقول...

على فكره انا كمان زيك بحب افلام الرعب جدا ..
انا شفت saw 3 فى السينما .. السنة اللى فاتت .. ساعتها كان عندى امتحان ثانوية بعد يومين تقريبا واخواتى كانوا عايزين يرفهوا عني .. وخير ماعملوا.. من اول الفيلم واحد عمال يقطع رجله وحجات تقرف.. فى ناس خرجت من اول مشهد ..اللى هو اصلا قبل التتر .. انا بقى فضلت طول الفيلم مغمضه عينيا .. ومفتحتهاش الا لما الفيلم خلص ..وطلعت عندي حالة من الاكتئاب والقرف .. بس اصلا كان مكتوب بره للكبار فقط .. مش عارفه ولاد جضرتك دخلوا ازاي؟!
عموما فعلا الكبار دلوقتى بيخافوا اكتر من الصغيرين .
بالتوفيق فى المدونة ان شاء الله

DayDreaming يقول...

والله فكرتيني بافلام الرعب بقالي كتير نتفرجتش على فيلم رعب
وبعدين مالها افلام الكرتون يعني:)

Empress appy يقول...

معاكى حق زى صناعه بن لادن مثلا ما هما اللى عملوه وبعدين بدئوا يطاردوه
فده مش جديد عليهم
انما حرام عليكى اطفال تأخديهم معاكى انا ضد الموضوع ده جدا

LOST يقول...

انا بطلت من زماااان اشوف افلام رعب خلااص اعصابي ما بقتش تستحمل و خصوصا ان فعلا معظمهم بقى يعتمد على الدم و القرف اكتر من الرعب و العفاريت و ابو رجل مسلوخه على رايك..

mostafa rayan يقول...

`دي اول زيارة واول بوست اقرأه بس ايه ياست الصيدلانيةهي ناقصة رعب ولاايه انا من اول سطرين قفلت وقلبت البوست شكلنا هنبدأ القلق من الأول ربنا يستر بقي

Unknown يقول...

بصى يا سيدتى
للاسف معظم افلام الغرب افلام دم وعنف لزرع تلك الفكرة فى رؤس الناس العنف للعنف

المهم يعنى انا مش بحب النوعية دى
احب الرعب ايوة لكن دم لالالا



مدونة حلوة وبالتوفيق يارب

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .