الأربعاء، سبتمبر 12، 2012

ايووووووه ......مش هنصر رسولى








من اكتر من 1500 سنه جه واحد مخه طاقق اسمه ابرهه الاشرم و قرر اذ فجأه انه يهد الكعبه

راح جايب جيش كبير وفيله كتير وشد رحاله ناحيه مكه ووجه  وجهه ناحيه الكعبه

جريوا الناس على عبد المطلب جد الرسول علشان يقوم يتحرك ويحميهم

الراجل بكل هدوء وتأنى قالهم  المال والعرض فنحن قادرون علي حمايته.....واما البيت فله رب يحميه

عبد المطلب ده كان كافر على فكره من اللى بيعبدوا الاصنام

 يعنى من الاخر من الوحشيين ومع ذلك كان عارف ان فيه حاجات كده فوق قدرتنا و مش من اختصاصنا

وهيا لوحدها تقدر تحمى نفسها بواسطه قوى عليا لم تدرك كليا فى هذا الوقت



من كام سنه فاتوا طلع علينا رسام دنماركى برسوم قالوا عليها مسيئه وقتها 

وطلعوا الاخوه والاخوات يهتفوا لاااااااااااااااااااااا للاهانه......................نووووووووووو للاساءه

وقاطعوا الجبنه الفلمنك الدينماركى....................قاطعوا الادويه الدينماركى........و بالمره قاطعوا كينتاكى وماكدونالدز وبيتزا هت

بس امانه عليكم  اشتروا من مؤمن  لتنصروا الله ورسوله



و روووووحى يا ايام وتعالى يا ايام على رأى ابله فضيله وقامت فى بلدنا ثوره

قام بيها الكفره العلمانيين واستخبى فى اولها المؤمنييين وبعد ما حسوا ان الدنيا بييييس خرجوا من جحورهم

وخلونا نصدق انهم مفجرى الثوره وحمله مشاعلها وحامييها فى موقعه الجمل والحمار والجحش

مع انهم هما  اول من مد ايده وضرب تعظيم سلام للعسكرى ابو بندقيه واتوشوش معاه فى الضلمه

واتفرجنا عليهم وهما بيأمنوا على كل تخاريف العسكرى و بيقولوا ..........حصل



وراحت ايام تانى وجت ايام تانى وخرج الشباب يعترض على سى جنزر اما جه

بس هما قالوا الجنزووورى ده عاااااااسل وفل الفل طالما سيدى قال 

واتسحلت البنات واتشدوا من شعرهم على الارض

واتعرت ست البنات واتضربت بالبياده فى صدرها وصورتها اتنقلت للعالم كله

وبقينا من الاخر فرجه ومسخره الدنيا كلها

وطلع علينا الاخوه والاخوات يقولوا  وهواييييييه اللى كان وداها هناك بس

البنت مالهاش الا بيتها  يا عالم واللى تخرج منه تستاهل ضرب البلغ والبيادات

وعدت الحكايه عاددددى جدا  ولا مليونيه خرجت منهم تشجب او تستنكر

بالعكس طلعت الست ام ايمن تؤكد ان البنات هما اللى كانوا سبب فى سحلهم وتعريتهم!!!!!



اصحى بقى من النوم النهارده الصبح على مشاهد تلفزيونيه كلها منقبات ودقون وهتافات قندهاريه بحته

تشجب وتستنكر الفيلم المسيىء الامريكى المسيىء للرسول

وتدعو الى مليونيه نصره الرسول يوم الجمعه الجايه!!!!!!

رسول مين اللى انتوا هتنصروه ده؟؟؟.......رسولنا اعماله وتاريخه هواللى هينصره

رسولنا نصرته مش بالمليونيات التغييبيه يا اخوات ويا اخوه

الرسول عمر ما فيلم يهينه او رسومات تسيىء اليه

رسولنا اعداءه قبل اصدقاءه شهدوا ليه ومعاه من قبل الزمان بزمان

رسولنا نصرته اننا نشتغل ونبقى دوله  عربيه مسلمه ترهب الناس وتخليهم يحترمونا ساعتها بس هيتعمل لنا الف حساب




كنتوا فين لما اللى جوه بلدكم احتاجوكم وطلبوا عونكم

دلوقتى بقى حلال ان الست تخرج للمظاهرات تهدف وتزعق؟؟؟

بس الحق لله العبايات كانت مش بكباسين



بحب رسولى وبحترمه ومؤمنه برسالته.........بس اسفه مش هنصره

هناك 7 تعليقات:

شمس النهار يقول...

وهو نصرة الرسول ماتنفعش غير اللي حصل امام السفارة
بعزقنا نفسنا امام العالم
انا مش ضد التظار امام السفارة لكن بتحضر
علشان نوري الناس دول انصار الرسول
متحضرين مش همج
وارد بالندوات
وارد بالاعلام الموجه
مافيش شيخ طلع قال كلمتين
بس فالحين رئيس الجمهورية ينصر فنانة
فين بيان الحكومة الاسلامية
فين رد الفعل الرسمي
مليون فين
الا الضرر بالرسول والاسلام

غير معرف يقول...

دول غير دولم غير دكهما :)

وخلينا ننصر رسولنا ونكمل احنا ... لان اصلا اللي يشتري بدينه ثمنا قليلا عمره ما هينصر الرسول ..

ربنا يهدي الحال

غير معرف يقول...

طبعا كلنا متفقين على نصرة الرسول
ولكن
كل واحد باسلوبه ورؤيته
ياريت نتعلم من اولاد عمنا اليهود لما بتيقى فيه اى قضيه ضدهم بيقوموا الدنيا ومش بيقعدوها باسلوب واداء جماعى
مش عيب نتعلم ابدا
زوجك اشرف

الازهرى يقول...

وقامت فى بلدنا ثوره ؟؟؟؟

إمتى ده ؟؟؟؟

لــــ زهــــــراء ــــولا يقول...


عبد المطلب ده كان كافر على فكره من اللى بيعبدوا الاصنام

يعنى من الاخر من الوحشيين ومع ذلك كان عارف ان فيه حاجات كده فوق قدرتنا و مش من اختصاصنا
..........................ز
علا اولاً ميصحش نقول على جد الرسول صلى الله عليه وسلم انه كان كافر ومن الوحشين !!!
ربنا سبحانه وتعالى نقى نسل الرسول واصطفاه من ذرية لذرية
وممكن يكون مؤمن بدين الخليل ابراهيم اي على ملة ابراهيم حنيفاً

ثانياً اللي كانوا عند السفارة مش ممن نصروا الرسول دول ممن اساءوا للاسلام صدقتِ

اول ما حدثت الاساءة تذكرة موقف عبد المطلب مع ابرهة مباشرتاً (:

وعلى فكرة الفيلم عرض في 2007 وتم دبلجته من شوية صغيرة يعني احنا المقصودين عشان الرسالة مكنتش وصلت لنا فدبلوجوهلنا
قالك لو ترجمناه محدش هياخد باله ويعبرنا لما ندبلجة بالمرة

لولا

فافى يقول...

مقال فى الجون طبعا
بس جملة مش هانصر رسولى دى وجعتنى شويه :)
احنا طبعا لازم ننصره بس برقى زى مانتى قلتى لكن مش بقتل النفس التى حرم الله قتلها الا بالحق ولا بالسباب وقلة الادب بتاعة وجدى غنيم
وربنا قال فى كتابه الكريم(انا كفيناك المستهزءين) ماقلشى خد حقك بإيدك وطلع عين اللى جابوهم يعنى :)
عموما تحياتى وملاحظه انك بقيتى تكتبى بوست كل كتير ليه ؟
عموما ياريت تبقى تزورينى
تحياتى :)

mahasen saber يقول...

عليه افضل الصلاه وازكى السلام
نصرة الرسول بالعمل باوامره واتباع سنته
عارفه يا علا لو اتبعنا سنته فعلا هنكون ارقى ارقى شعوب الارض وهنجبر كل الاممم على احترامنا وتقديرنا من غير ما نتكلف اى جهد

صلى الله عليه وسلم ..وهدانا الله لسنته وللعمل باوامره واوامر كتاب الله الكريم

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .