الأربعاء، مايو 04، 2011

عيد ميلاد زى الناس




قامت الثوره ..........قلنا عايزينه يمشى.............................صحيح حجر شويه .................بس فى الاخر مشى

زعقنا تانى................و قلنا لازم يتحاكم زيه زى غيره........................و اهو بدا يتحقق معاه و اترزع 15 يوم

و اتجددوا قبل ما يخلصوا بييجى اسبوع.....................يعنى بقى كمان محبوس و سوابق اهه

من اول مايو ما بدا و الناس مستنيه يوم عيد ميلاده عشان تستمر مسيره الشتيمه و التشفى و الشماته

و زى ما توقعت بالضبط من امبارح و كل برامج تصفح الصحف بتقرا مقالات تريقه على عيد ميلاد مبارك

و استعراض كاريكاتيرات على نفس الموضوع و المشكله ان المقالات معظمها مكتوبه

من كتاب كانوا اقل ما يوصفوا بيه زمان انهم فيران

يعنى اما بلال فضل يكتب او ابراهيم عيسى او عبد الحليم قنديل  يبقى عااااااااااااااااااااادى

لكن اللى بيكتبوا دلوقتى مخلينى اقول فى سرى عجبت لك يا زمن القوالب نامت و الانصاص قامت

صحيح  مقهوره اوووووى ان اسامه سرايا اتشال من الاهرام

ادفع نص عمرى واشوف مقال ليه بهذه المناسبه يا ترى بعد الثوره كان هيكتب ايه بعد ما كتب 

فى 2008 انه اليوم الذى ولدت فيه مصر

و اللى كاتبين مانشيت طويل عريض ان حفيده هيجيب تورته و يحضر الاحتفال هو و جدته و مامته و مرات عمه

انتوا مالكم  سيبوووووووووه بقى وانسوه و شيلوه من دماغكم و خلونا نشوف اللى ورانا

و نعوض الخساير الكتيره اللى حصلت

اللى عايزه اقوله ان اللى كان بيحصل زمان كان اوفر اووووى و لاول مره مبارك هيحتفل بعيد ميلاده زى الناس

الناس العاديه يعنى اللى بيرسى على تورتايه متوسطه و كام كانز بيبسى على كام سندوتش كفته و دمتم

صحيح عيد ميلاده هيبقى مميز شويه ان التورته هتيجى من القريه السياحيه بتاعت حسين سالم يعنى تورته مش اى تورته يعنى

ييييييييييييييييييييييييييييه حتى انا اهه بقيت رغايه و بتتبع اخباره زى الناس اللى غايظنى

الاسلام يا جماعه عمره ما علمنا اننا نشمت و نتشفى فى غيرنا

و المسيحيه قالت احبوا اعدائكم

هو خلاص بقى مواطن عادى قاعد كل امله انه يموت عشان ميمرش بالايام السوده اللى جايه عليه

و حاليا بيننا و بينه القضاء

ان اصاب سيثاب

و ان اخطا سيعاقب

و غير كده معنديش كلام اقوله

بس مش طالبه منك يا باشا غير شريحه صغيره من التورته عشان اشوف بتاعت حسين سالم 

مختلفه و لا زيها زى التورتات العاديه

و ياللا حالا بالا بالا حيوا ابو الفساد

مش انا اللى بقول ده بلال فضل هو اللى بيقول

هناك 14 تعليقًا:

EL pRiNcEssA يقول...

هههههههههههههههههههههه
طب والله جامدة جدا

ممكن تبقي تبعتيلي حتة ادوق انا كمان
ياله قوليلي نورتي ياله

a7med-Mado يقول...

و ياللا حالا بالا بالا حيوا ابو الفساد

فعلا بلال فضل جاب من الأخر حلوة التدوينة بجد تسلم إيدك

اسكندرنيات3013 يقول...

كلام زى الفل اين العمل ياناس

حسن ارابيسك يقول...

كل التحية والتقديرة يادكتورة
هناك الأهم والأفضل للنظر إليه لمستقبل تلك الأرض الطيبة التي هانت على مرضى النفوس والمناصب
شكرا لكي مصريتك الجميلة
تحياتي
حسن أرابيسك

Ramy يقول...

ايه يا دكتورة

فينك


لعل الغياب لخير

طمنينا عليك يا دكتورة

Noha Saleh يقول...

انتى فين لعل المانع خير

طمنينا عليكى

ريري كربكه يقول...

والله انا شايفه اني عقابه في الاخرة هيكون احسن وكفايه الذل والانكسار اللي هو فيه وراء قفص الاتهام امام شعبه
سبحان الله يعز من يشاء ويذل من يشاء
سبحان الله له الملك
يعطي الملك لمن يشاء وينزع الملك ممن يشاء
علشان نعرف بس اني الدنيا مش دايمه لحد
وكل من عليه فان ويبقى وجهك ربك ذو الجلال والاكرام
مرسي يا قمر على المدونه الحلوة ديه وتقبلي مروري وصداقتي

حسن ارابيسك يقول...

انتي فييييييييين..؟

الجوكر يقول...

يااااااه اخيرا

كان نفسى من زمان اسمع صوت يتحدث بعقل

ولا يركب الموجه

بجد بجد

ارفع القبعة لهذا الحرف


لكِ تقديرى

الدرويش المرووش يقول...

ربنا يحسن خاتمتنا

غير معرف يقول...

ثقافة الهزيمة .. طيور الظلام

و نشرت جريدة اليوم السابع فى 26 يونيو 2011 .. وثيقة تثبت تورط عمرو موسى خلال توليه منصب وزير الخارجية، في الموافقة على إتمام صفقة تصدير الغاز إلى إسرائيل، وتشجيع وزارة البترول المصرية على سرعة إتمام الإجراءات الخاصة بها، الوثيقة عبارة عن خطاب موجه من عمرو موسى في نوفمبر 1993 إلى وزير البترول المصري آنذاك المهندس حمدي البنبي، يتضمن تأكيد موسى موافقته على تصدير الغاز إلى إسرائيل، كما يوضح الخطاب الدور الذي لعبه عمرو موسى في قضية تصدير الغاز إلى إسرائيل في إطار المشروعات الإقليمية في مجالات الغاز والبترول في المنطقة ضمن أجتماعات التعاون الأقتصادي الإقليمي التي عقدت في العاصمة الدنماركية كوبنهاجن في بدايات نوفمبر 1993. ونشرت صورة ضوئية من الخطاب تثبت ما سبق، ويحمل في نهايته توقيعه ....

لمزيد من التفاصيل أذهب إلى مجموعة مقالات ثقافة الهزيمة (بقلم غريب المنسى) بالرابط التالى www.ouregypt.us

و المقال يتحدث عن بطولات أحمد شفيق الوهمية و أجرام عمر سليمان.

Asmaa mahaba يقول...

لو تم القصاص العادل منه مكانشى حد حيشمت فيه الناس قلوبها بتغلى من اللى بيعمله القضاء فينا

faroukfahmy يقول...

حظيت بهذه الخاطرة التى جعلتنى اسخسخ من الضحك وعلى القفشات الجذابه صحيح لا شماته بس مش بطريقتهم اللى هبه لعبة الصحافة
لقطّتك من تدوينة محمد (ظلالى البيضاء) واسرعت ان اكون من متابعينك حتى تتواصل اعمالنا وارجو ان تشتركى بالمثل مع متابعينى وستجدينها آخر المدونه ومنتظر الزيارة المباركه
الفاروق

فافى يقول...

احلى حاجه فعلا ان الواحد يكبر دماغه ويسيبه فى حاله ونشوف اللى ورانا لكن تقولى لمين
تحياتى
وهامله مدونتك ليه ؟

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .