الثلاثاء، مارس 15، 2011

سكت دهرا ونطق كفرا











من ساعه ما سمعت كلامه و انا مش عارفه انام ولا افكر

كلامه صادم جدا ...........قدييييييييم اووووى.............متزمت خالص

حسيت انه جاى من عصر تانى وزمن تانى غير اللى عايشين فيه

حتى المتشددين دلوقت مبقوش  بيفكروا كده خالص

عن عبود الزمر اتحدث 

بعد تنويه عن الحلقه بتاعته اول امبارح

جاءت الحلقه امبارح صادمه ........قاسيه ..........عنيفه

الراجل كان صريييييييح جدا و لم يبذل اى مجهود لكى يتجمل

قال كل اللى عنده دفعه واحده و الحق يتقال

 الست منى الشاذلى كانت محاوره شاطره معاه وفى نفس الوقت نكشته كويس

عشان يخرج اللى عنده كله قدام الناس و قد كان

بعد ما شاهدت الحلقه استوقفتنى كذا نقطه هناقشهم هنا قدامكم



اول نقطه
**********
الجيش المصرى ووجود مسيحين فيه لجانب المسلمين

و قد قال السيد عبود الزمر لافض فوه مايلى

الضابط و العسكرى المسيحى على عينى وراسى لكن اذا قامت حرب مع جيش صليبى

لابد ان ينحوا جانبا لان ولاءهم مهما كان لابد ان يكون لابناء دينهم و ليس للوطن

و لذلك سنأخذهم وقتها من المواجهه الاماميه للصفوف الخلفيه

انا بصراحه فتحت بقى وتنحت زى منى الشاذلى بالضبط

يا عم الشيخ الجيش المصرى فى حرب اكتوبر كان فيه مسيحين كتير وحاربوا 

زيهم زى المسلمين و ماتوا زيهم بالضبط

قالها عشان الجيش اللى قدامهم يهودى مش مسيحى

يا سلااااااااااااااااااااااااااااام

يعنى لو السعوديه بقى حاربت مصر اجرى انا بقى

 الم المسلمين فى الجيش وارميهم ورا و احط المسيحين قدام؟؟؟؟؟؟

الراجل ده مش عارف ان ولاء الضابط او العسكرى او اى مواطن مصرى

بيبقى للوطن اولا واخيرا قبل ما يكون لابناء دينه؟؟؟؟؟؟؟



النقطه التانيه
***********

سالته المذيعه عن مقتل السادات و ليه لجاوا للقتل مع ان الاسلام دين لا يدعو للعنف

قالها خنقنا قيد حريتنا منعنا من ممارسه الدعوه 

بعتنا له رسايل من اجل ان يرتدع و رفض الاستجابه

الدول العربيه كانت رافضاه بعد معاهده السلام مع اسرائيل و اعتبروه خاين و عميل

و لذلك كان لابد من اذاحته بالقوه و العنف

و حضرتك لو تفتكرى الدول العربيه كلها اذاعت اغانى مبهجه يوم اغتياله

زى افرح يا قلبى لك نصيب


يا صلاه النبى زغرطى  ياللى انتى مش غرمانه

هيا الدول العربيه اما ترفض رئيس و تخونه 

يقوم ابناء بلده مموتينه عدل كده

من غير قيد و لا شرط و لا رادع

ازاى نكون الحكم و المحكمه و القاضى و الجلاد مع بعض فى وقت واحد؟؟؟؟


النقطه التالته
**********

الم يؤنبك ضميرك ولو للحظه بعد عمليه القتل؟؟؟

قاللها انا مش بنفذ من دماغى كده

انا ليا معلم او عالم بيفتيلى ويفتينى فى كل امورى ولو هو اصاب له ثوابين 

و لو اخطا يبقى عليه لوحده انا مش عليا اى وزر لانى فى الاول والاخر طالب علم

كنت و لازلت طالب علم


لا و الله يعنى يقولك روح اقتل عشان هو المعلم بتاعك و بعد كده اما يطلع رايه غلط 

تبقى انت براءه كده  عااااااادى خالص

الراجل ده بيكلم مين بالضبط

ده حتى لو قالوله انت هتطلع تتكلم قدام معاتيه مش هيقول كده خالص




الخلاصه ان الراجل مازال متجمد فى افكاره القديمه 

عايش فيها و معاها

مازال عنيفا جدااااااااااااااااااااا

مازال مصر على انه لم يخطىء و انه خدم البشريه خدمه جليله جدا




انا بقى اللى مستغربه منه هو موقف الاعلام المصرى من شخصيه زى دى

ليه التكالب عليه بالشكل الغريب ده

الراجل طلع من السجن من يومين عمل خلالهم و لا 4 لقاءات و لسه البقيه تاتى

الحريه يا اعلامنا المصون مش كده خاااااااااااااالص

انتوا اكيد فاهمينها غلط

لااااااااااااااااااااااااااااااااااااااا للقتله و المجرمين





هناك 20 تعليقًا:

عمدة كفر المظاليم يقول...

أختي الكريمة
السلام عليكم

أحييكي على هذا البوست أولا

أنا غير منزعج إطلاقا من هذه النماذج، لأن وجودها يعرف الناس الفرق بين ملتزم وآخر وبين تيارات ما يسمى بالإسلام السياسي.. فالإخوان غير السلفيين غير الجهاد غير الصوفية ... وهكذا.. أما الخلط المتهمد من النظام السابق والذي لعب وحيد حامد وعادل إمام جزء طبيرا منه في أفلامهم فلم يعد ينطلي على الناس وأصبحت الناس تفرق جيدا بين الأفكار

أحييكي مرة أخرى على هذا الطرح.. وبالتوفيق دائما

كلمات من نور يقول...

متنسيش هو طالع بنفس الدماغ وكمان حبيس سنين يعني أحقاد كتيره قوي ونفسيه عجيبه

ربي يبعدهم عننا ويبعد شرورهم يارب

Foxology يقول...

الرسالة من الاحتفاء به اعلاميا واضحة جداااا لو حد فكر فيها :)

لو الدولة غلب عليها الطابع الاسلامى أمثال الزمر هيبقو المتحكمين فى مصر وعلاقاتها ...

هى دى الرسالة المقصود تبليغها للشعب وللدول الأخرى :)

تحياتى

شهر زاد يقول...

غاليتي
احييك على وطنيتك العاالية
وعلى ادراكك العميق لما يجري خلف الستار
مشكورة على االبوست الهادف
تحياتي

Noha Saleh يقول...

الادهى والامر ان فى ناس عاوزينه رئيس جمهورية
انتى متخيلة الكارثة

على فكرة السادات مش انسان وحش انا قرات كتابه البحث عن الذات واكتشفته كويس

أحــوال الهـوي يقول...

رائع ما كتبتي
و لكن ما صاحب الافراج عنه من زفة لتحية البطل المغوار و تمجيده سقطه الي الهاويه للاخوان و صادق عليها هذا اللقاء الذي اوضح لماذا لم يفرج عنه قبل هذا لانه مازال يحمل افكار خطرة تدعوا الي العنف
يا دكتورة الفرق بين الجماعات المنبثقه عن الاخوان انها تحمل كل الافكار زائد فكرة واحده مختلفه ؟؟

تحياتي

لـــولا وزهـــراء يقول...

بصي يا لولة ده واحد عاش اكتر من نص عمره في السجن مختلطش بالعالم الخارجي متطورش لسة فكره زي ما هو التشدد بتاع زمان بتاع الموتسكيل والجنزير مبقاش له وجود عايزة ايه من راجل انعزل عن العالم فكرة يتغير !!!!
لو جبتي طبق فيه صلصة وحطتيه في التلاجة وقفلتي عليه بعد 4 ايام هتلاقية كاتشب!!! لازم يبقى صلصة زي ما هو....



بالنسبة للمسحيين والصلبين هو بيتكلم عن مين حضرتك !! صلبيين مين حضرتك... واحد جاي بيضرب في بلدي اقف معاه عشان دينه !!!




بالنسبة لنقطة قتل السادات هو لسة من ايام زمااان لما الدول العربية كرهت السادات!! هو الراجل ده محدش وصله ان الدول العربية وفلسطين بتتندم دلوقتي
انه عادوا السادات وهو كان صح ... هو فكره اتجمد في الفريزر من ساعتها مش بيتابع... الله يرحمك يا عرفات لما اتحزمت ورقصت لموت السادات فينك دلوقتي؟ قتلوك بالسم وبلدك لسة متبهدلة مكنتش سمعت الكلام

افتكر في فيلم ايام السادات ... لما احمد زكي قال للحلاق بتاعه وكان مجسد شخصية السادات تعمل ايه لو ناس بلطجية دخلوا محلك وسرقوه وانا جيت وحطتلك كرسي جوا المحل وقلتلك اقعد هنا قاله بكل بساطة انت رجعتلي جزء من محلي بشطارتي بقى احاول ارجع باقية ....


وايه حكاية ان صاب له اجر وان اخطأ له اجرين منهم اجر المحاولة !!!
هو احنا هنفسر السنة على مزاجنا ونفصل الاحاديث على كفنا !!!
ده بني ادم مش فرخة


لولا ياستي اللي دمها فار

مدونه ما كفايه بقى يقول...

انا متفقه مع عمده كفر المظاليم

تحياتى

محمد محمود عمارة يقول...

أختي الفاضلة
بالعكس أنا سعيد بهذا الحوار لأنه يكشف مثل هذه العقليات لبقية الشعب المعروف عنه الوسطية و الاعتدال في تدينه.
ثانياً أنا لا أستغرب أراؤه الفقهية لسببين : 1- إن هذا هو فكر جماعة الجهاد
2- إنه فكر في ظل سجن و ظروف غير طبيعية و بالتالي الميزان الفقهي للأمور مقلوب
3- نشوف المنبهرين به هيوصلوه لفين

لـــولا وزهـــراء يقول...

عـــــــلا

انا مش متضايقه من امثاله لسبب بسيط جدا وهو انى باشفق على الناس وهما فاكرين نفسهم ملائكه او رسل واحنا كفره يا ستى فى ايه فى القران الكريم بتقول " من قلت نفس بغير نفس او فساد فى الارض فكأنما قتل الناس جميعا " بس اعتقد ان فى ناس من اللى فكرين نفسهم مسلمين مش بياخدوا بالهم منها
يا لوله يا بنتى خلى اللى عاوز يتكلم يتكلم واللى عاوز يقول يقول خلى الناس تتفرج واللى عندها عقل تفكر واللى ماعندهاش عقل ربنا يتولاهم
اما بقى الاعلام نفسى اولع فيهم كلهم واقولهم اتنيلو على عين اهلكم من هذا الشخص اللى بقى مكرر فى القنوات " على فكره انا مش شوفت ولا اى حوار له هى ناقصه وجع دماغ "


معلش ان الفاظى بايخه مع انك عارفه انى مؤدبه خالص مالص


زهــــــراء

من كل بستان زهرة يقول...

الزمر هو الماده الخام للأرهاب
انا كنت خايفه وانا بتفرج عليه

اعوذ بالله اكبر غلطات الجيش انه سمح بخروج امثاله
ده من المفسدين في الأرض

ربنا يستر على بلدننا منه
ولو كان ناوي شر يرد كيده في نحره

fafy يقول...

ايه ده دى حاجه تنقط بجد هو لسه فى حد بيفكر كده ؟ده اصلا واقع منه قرن معذور

FAW يقول...

الناس فاهمة كويس مين ده ومعتقدش إن حد هيتأثر بيه
هو لسه أصلا عايش جوه الكهف بتاعه وملوش أي تأثير
ربنا يرحمنا من أنصاف العقول

اسيره الاحزان يقول...

يعنى عايزه ايه من واحد بقاله 30 سنه مشافش النور ... على قديمه زى ما بيقولوا ... يعنى ولا شاف موبايل ولا كمبيوتر ولا يعرف نت ولا يعنى ايه فيس بوك ...افكاره دى هى الافكار اللى اتحبس بيها هى هى لسه متغيرتش

sony2000 يقول...

مهو الاعلام المصر
فاكر انو بيعمل حاجه صح
ليمين اوي
لشماال اوي
ماعنهدمشي حاجه اسمها وسط

Zouka's يقول...

اولا: واخيرا من حقه يقول اللى عايزه من غير اى مشكله خصوصا بعد 25 يناير

ثانيا :ليه مايقولش اللى عاوزه وكل واحد يوافقه كليا اوجزئيا او العكس

ثالثا :هناك الاخوان والسلفيين والجماعات وكذلك المسيحين
ليه كل واحد مايقولش وما يعملش اللى هو عايزه

رابعا : مع صلاح الدين كان مسيحيين فى الجيش

خامسا :هل انت متفقهه فى الدين
اى جايز اللى بيقوله فى الدين واحنا مش عارفيين

سادسا : الناس دول والتنظيمات دى اقوى منى ومنك ومنظمه وهم الان من اقوى القوى فى المجتمع
من انت ونحن حتى ننتقدهم او نقومهم او نقيمهم
مش جايز هم صح و لا احنا اتلخبطنا ولا ايه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

reemaas يقول...

ااااااااااه ياعلا
جيتى على الوجع
الحلقه دى رفعتلى الضغط وخصوصا اسباب اهدار دم السادات من وجهه نظر جنابه ولا حكايه ان ما جندش مسيحيين دى
وربنا ماقدرت اكمل الحلقه

Zouka's يقول...

النهارده الكل مبسوط و فرحان رغم الزحام الشجيج

ليلي الشعينى يقول...

البوست جميل جدآ رغم انه الأخ الزمر ده والله معتقدش ان لسه عقله سليم عشان ينطق اصلا مش برضو هو اللي قتل السادات ودلوقتى بيطالب بتطبيق القصاص في الاسلام يبقي اذاى بقي يعنى هو كده هتطير رقبته اول واحد المفروض اصلا الزمر ماكانلوش خروج من السجن....بس العيب علينا أحنا اللي عملناله قيمة زى وائل غنيم المصريين هما اللي عملو الثورة والشكر والتحيه راحوله هو ايه العبط ده...معلهش ياجميلة دمى اساسا محروق بس بجد مدونتك روعة

منوعات يقول...

أحييكي على البوست
عندك حق في كل اللي قولتيه
الناس دي خنقتنا خلاص
ربنا يسترها على مصر في الايام الجايه

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .