الثلاثاء، مارس 08، 2011

تعاونوا الصوره تطلع حلوه






بقالى كتير اوى مكتبتش حاجه و مش عارفه اكتب

طول الوقت قدام نشرات الاخبار و مواقع الاخبار فى النت

و الفيس بوك  و حاسه ان مفيش حاجه تتقال تانى فى الوقت ده

مازلت سعيده جدا بالتطورات اللى بتحصل كل يوم 

و حاسه اننا اخير بقى اصحاب بلدنا الحقيقيين و كلمتنا ماشيه فيها

يعنى طالبنا باسقاط حكومه شفيق رغم احترامى الشديد للراجل ده 

و ايمانى بالمقوله القائله انه الرجل الصح فى الوقت الغلط

و انه اتحمل ذنب انتمائه للنظام السابق

و الحمد لله الراجل استقال او اقيل مش ده المهم

المهم ان الطلب اتحقق و خلاص

المتظاهرين اثناء لقاءهم بقيادات الجيش 

طلبوا ان رئيس الوزاره يكون دكتور عصام شرف وزير النقل السابق

و تم الاستجابه لطلبهم فى اقل من يوم

طلبنا ان احمد ابو الغيط ومحمود وجدى يتشالوا و فعلا اتغيروا بناس تانيه








طلبنا من الدكتور عصام شرف انه يقسم قسم الولاء فى التحرير

و الراجل مكدبش خبر و كان تانى يوم هناك و ظهر على المنصه

 و قال انى استمد شرعيتى منكم و من ميدان التحرير

و مش كده و بس ده اعتذر على انه اضطر يصلى الجمعه

 فى مسجد عمر مكرم بناء على تعليمات الجيش

طب بذمتكم فيه احلى من كده 

عمرنا طلبنا حاجه من اى مسئول و اتحققت كده 

بكل اليسر والسهوله دى

لا طبعا محصلتش قبل كده

و امن الدوله تم اسقاطه برضه بايدين المتظاهرين الرجاله

متهيألى كده معظم الطلبات تم تنفيذها بحذافيرها

باقى بقى محاكمه رموز الفساد كلهم و متهيألى هيا بدات 

من اكبر كبير و الباقيه جايه فى السكه

مش كفايه بقى و نهدى شويه و نركز فى اللى جاى

كفايه اشاعات و بلاغات كيديه فى الناس و بعضها

كفايه مظاهرات فئويه و الله ما وقتها خالص

اما الدنيا هتمشى كل واحد هيجيله حقه لغايه عنده

من غير ما نوقف حال بلدنا و حال اقتصادها

ياريت بلدنا تصعب علينا شويه و كل اللى بينشر اشاعات

 يتلم شويه و يراعى ربنا فى بلده و اهلها

عايزين نتعاون مع بعض يا جماعه عشان نقوم من تانى و نعوض اللى ضاع 

و كمان عشان الصوره تطلع حلوه



هناك 43 تعليقًا:

SHAPE YOUR LIFE (ABOALI) يقول...

الله على الصورة الحلوة
والشعب اللى رسم طريقة بنفسه
واعاد تشكيل مراسم حريته
اصبح يختار من يتولى شئونه
االله فعلا
سبحان من جعل الازمان تتغير وهو لا يتغير

ده تعليق اولى
لاثبات التعليق الاول بعد الثورة

SHAPE YOUR LIFE (ABOALI) يقول...

ههههههههههههههههههههههه
فيه حفظ تعليق
هههههههههههههههههههههههههه

SHAPE YOUR LIFE (ABOALI) يقول...

حفظ التعليقات اكيد علشان الثورة المضادة

قصدى الصورة المضاده

ع العموم احنا محتاجين لحظة هدوء وصمت
نشتغل بس علشان ان الاوان بالفعل
اننا نعيد بوصلة حياتنا للافضل
لاننا نستحق ان نكون فى مرتبة بالفعل ارقى وافضل

الهمةوالاصرار ومذاق النجاح
اكيد هاتخلى حياتنا صورة لحياه كانت مرسومة فى الخيال وان الاوان ان تكون فى النور الحقيقى


لك بالفعل تحية على الاغنية والموضوع الذى تم كتابته باحاسيس راقية
قبل ان يتم ترجمته الى معانى تعيها العقول

لك بالفعل كل التحية

تقديرى

كلمات من نور يقول...

كلنا عايزين الصورة دي يا لولتي

سبحان الله كتبنا بوست أنا وانتي في نفس اليوم وبنطالب بنفس الشيء

مدونة رحلة حياه يقول...

السلام عليكم
حمداللع على سلامتك
لم نقرأ لك منذ وقت طويل
عندك حق بشاركك الرأى محتاجين شوية هدوء بس يا ترى مين يسمع

مصري جدا يقول...

العنوان دا حلو أوي

بيفكرني بالمثل القائل

اللي بيته من ازاز تطع البت لأمها

لـــولا وزهـــراء يقول...

عـــلا
------

عجبنى العنوان اوى اوى تعانوا ياريت فعلا نتعاون ونبقى كلنا ايد واحده مع بعض ونحاول نقف جنب بعض ونتغير بجد ...

عارفه يا لوله كمية الاشاعات اللى بتتقال بجد واحنا للاسف بنصدقها ونجرى ورا الاشاعات وبجد انا مرعوبه من كده كمية الاشاعات اللى كل يوم باسمعها تهدد بكارثه كبييييييييره ...

اتمنى اننا نشتغل ونفكر فى المستقبل ونحاول نهدأ و نقول لبعض ان ربنا مش خلق الدنيا فى لحظه وده ربنا يعنى قادر على كل شئ لكن احنا بشر بنحاول نغير ونتغير لكن ياريت شوية وقت نشتغل بقى بجد ونحاول نصلح كل الاخطاء اللى فى انفسنا .......

انا عن نفسى فى انتظار صوره حلوه تجمع كل المصريين وهما بيشتغلوا بجد وجهد ويحاولوا يوصولوا ببلدهم لفوووووووووق

حلوه الاغنيه وحاول الاختيار

زهـــــــراء

فاتيما يقول...

حلو العنوان يا لولاّ

بصى
حاجة غريبة حسيتها بعد ما خلصت البوست

الكلام المكتوب دا
ينقال لمين ؟

غالبا مش احنا
المدونين او القراء يعنى

غالبا كلنا فاهمين دا
ومقتنعين
وبنقول وراكى آمين

المشكلة الحقيقية
ان صناع الفوضى دماغهم حاجة غير
ومظنش هيقروا الكلام دا
ولا يعقلوه
يمكن دورنا نكلمهم ونتفاهم معاهم
بس تفتكرى فيه فايدة ؟

اتمنى

وحمدلله ع السلامة
بوسيلى العيال
وسلامى لدكتور اشرف
ويا رب تكونى بخير

:)

Zouka's يقول...

نشكر د.شفيق
نشكر الثوره
نشكر الشعب
حالنا فى الصعيد :
التجاره مشلوله
المعايش ما فيش
قطاع طرق وبلطجه كتير
لا يوجد امان
مطبات صناعيه كما وكيفا محرمه دوليا
الاحتجاجات كل يوم
باختصار
دى مش عيشه
ده عذاب الدنيا
اعوذ بالله

محمود(باحث عن حب) يقول...

بوست جميل يارب الافراح لاتنقطع ابدا علينا يااااااااااااااااااارب

أحمد الله يقول...

المشكلة يافندم طوول ما الوقت موجود والامل عندما المصرى .. بيكون عنده حلم ( او طمع ) فيما هو أفضل

كان بيتقال من فترة كفاية كده ... وماحدش سمع وكملنا وطلع اللى بعد كده حلو

ودلوقتى هنقول كفاية .. بردوو هيقولوا لا نكمل وهنعمل أحسن

المشكلة دلوقتى فى فمهنا احنا للوضع .... لازم نثق فى جهة معينة ونسيبلها ادارة البلد ( حتى لو اتخذت قرار عكس رغبتنا .. نعبر باحترام ونثق فى أفعالها

ربنا يستر فعلا

شمس النهار يقول...

ان شاء الله الصورة هتطلع حلوة

وان شاء الله رغم انف خفافيش الظلام

مصر هتبقا احلي جنة
وترجع الرياده تاني لها

واهلا برجعوك للكتابه هنا في بيت العيلة

reemaas يقول...

بس انا مش فرحانه يا علا لاسف انا قلقانة جدا
المطالب والطلبات من كتر مابتتحقق بقى مالهاش سقف ومابتخلصش ومش عارفه الحال هيفضل لحد امتى
شفيق مشى لمجرد ان مبارك جابه طب هو ده عدل

الصورة جميله بس انا خايفه تبوظ

مدونه ما كفايه بقى يقول...

السلام عليكم
بقالى كتير عايزه ادخل مدونتك بس بلاقى دايما صعوبات بس الحمد لله دخلت أخيرا

سعيده انى هكون صديقه لمدونتك اللى سمعت عنها كتير

بالنسبه للمطالب الحمد لله كله بيتحقق لكن فاضل طلب مهم وهما معتقلى الرأى فى السجون حتى الآن والطلب ده فيه بطء كبير فى تنفيذه يا رب يخرجوا على خير وعاجلا

تقبلينى صديقه لمدونتك

امل عبد الحميد شاهين

تحياتى لكى

سندباد يقول...

احسنتي يادكتورة كلام في منتهي العقل وفعلا عندك حق لازم يكون عندنا شوية صبر وتفهم ووعي للفترة اللي جاية وربنا انشالله يعطينا القدرة علي الصبر والتحمل وانا شخصيا متفاءل بان القادم افضل باذن الله
تقديري واحترامي

محمد محمود عمارة يقول...

" عايزين نتعاون علشان البلد دي تقوم تاني " كلمات جميلة ،
نفسي ، بس إمتى ، لو عرفتي قوليلي ؟! لأني بموت في اليوم عشرات المرات من الخوف على البلد دي ، ماتت بسمتي و ضحكتي و أنا الساخر ، و لاحظت أن كل الساخرين تاهت سخريتهم في سخونة الأحداث

elsha3er يقول...

السلام عليكم
انا بضم صوتى لصوت حضرتك ان كفاية اوى بقى كدة مظاهرات فردية ولازم نبص على بلدنا يقول الشيخ الشعراوى ان الثائر هو من يثور على الأستبداد ثم يهدأ ليصنع الامجاد اتمنى ان تكون تلك ثقافة الجميع

MTMA89 يقول...

كلام حلو جدا يا دكتورة
و لازم احنا االي نقوم ببلدنا
مش نستنى الوزراء الجدد هما اللي يدفعونا للعمل
لازم كل واحد يعرف انه من مكانه بيعمل لوطنه و لشعبه .. مش بيعمل لنفسه بس


تحياتي

محمد
:)

sony2000 يقول...

ربنا معانا بجد
لانهم مش ساكتين
ياااااارب

يوميات شحات يقول...

قال اشيخ الشعراوي رحمه الله : الثائر لا يظل ثائرا و إنما يثور ليهدم الفساد ثم يهدأ ليبني الأمجاد

Noha Saleh يقول...

وحشتينى
لازم كلنا نضحك علشان الصورة تطلع احلى واحلى
بعتذر عن غيابى

♥نبع الغرام♥♪≈ يقول...

بوست جميل حبيبتى

وعلينا بأصلاح النفس حتى نكمل المشواررررررررررررررر

صيدلانيه طالعه نازله يقول...

SHAPE YOUR LIFE (ABOALI)

ان الاوان فعلا ان نترجم صوره طالما رسمناها فى الخيال الى واقع ملموس
كل هذا لن يتحقق الا بالعمل و الاتقان فيه و قبل ذلك توفر عنصر الامن و الامان

تحياتى على التعليق المميز

صيدلانيه طالعه نازله يقول...

كلمات من نور

القلوب عند بعضها يا حبيبتى
ربنا يطمنا على بلدنا و نقدر نقوم بيها بسرعه
ان شاء الله

نورتينى

صيدلانيه طالعه نازله يقول...

مدونة رحلة حياه

ميرسى يا فندم
على ذوقك و اهتمامك
و الحمد لله على اتفاقنا فى الراى

نورتنى

صيدلانيه طالعه نازله يقول...

مصري جدا

ميرسى لمرورك
و كويس ان العنوان عجب حضرتك

نورتنى

صيدلانيه طالعه نازله يقول...

لـــولا وزهـــراء

كل ما هنفكر كويس يا زهرا
كل ما هنقدر نخرج من الازمه اسرع
كل ما هنقدر نقوم بسرعه
والصوره ساعتها هتبقى احلى واحلى
فقط المطلوب ان نعطى المسئولين فرصتهم عشان يقدروا يتصرفوا صح

نورتينى جدا بعد غياب

صيدلانيه طالعه نازله يقول...

فاتيما

و الله انتى طيبه و على نياتك اوووى
مين ده اللى مدونين و عاقلين و فاهمين
قلبك ابيض يا حاجه
لو بتدخلى الفيس كنتى شوفتى الخناقات اللى بتحصل و النقاشات اللى بتنتهى ان اعز اصدقاء يحذفوا بعض و يعملوا حظر لبعض
احنا حاليا فى وقت محدش فاهم حاجه و لا عارف حاجه
و الاشاعات ماليه الدنيا
و فيه ناس محترمه جداااااا
و مع ذلك وظيفتها الوحيده حاليا هى التحريض و زياده اشتعال الدنيا

ربنا يستر فعلا و يعديها على خير


نورتينى حبيبتى
:)

صيدلانيه طالعه نازله يقول...

Zouka's

اشرف باشا
شكلك من اعداء الثوره
مش هبلغ عنك و لا حاجه
انا بس هقولهم عنوانك و هما هيتصرفوا معاك
وش ملاك و بيضحك ضحكه شريره

صيدلانيه طالعه نازله يقول...

محمود(باحث عن حب)

يارب الافراح تدوم
بس يصاحبها عمل و انتاج حقيقى

تحياتى

صيدلانيه طالعه نازله يقول...

احمدالله

المشكلة دلوقتى فى فمهنا احنا للوضع .... لازم نثق فى جهة معينة ونسيبلها ادارة البلد ( حتى لو اتخذت قرار عكس رغبتنا .. نعبر باحترام ونثق فى أفعالها

*******************
حضرتك قلت الخلاصه
لازم بقى نسلم الرايه الى من يفهم عننا فى امور الاداره و تصريف الامور

زى ما قال جيفارا زمان
انا ثائر و لست سياسى

شكرا للثوار على ما قاموا بيه
و ربنا يقف بقى مع ولاه المور فيما هو ات


نورتنى

صيدلانيه طالعه نازله يقول...

شمس النهار

يارب يا شموسه
لاحسن الواحد تعب من الاحداث المتسارعه اللى حواليه
و للاسف كلها سلبيات

و نورتينى فى الفيس بوك يا قمرى

صيدلانيه طالعه نازله يقول...

reemaas

اتفق معاكى وبشده فى موضوع سقف الطلبات
زعلت جدا ان د.شفيق استقال و لسه بقول انه الرجل الصح فى التوقيت الغلط
سواء هو او اللواء عمر سليمان
مع ان من كام شهر كان اقصى طموح للناس ان شفيق يمسك الوزاره و عمر سليمان يبقى رئيس او نائب رئيس

الناس بقت ضد اى حد من ريحه النظام السابق مع ان كان فيهم ناس كتير محترمين

نورتينى يا نور

صيدلانيه طالعه نازله يقول...

مدونه ما كفايه بقى

اولا نورتينى كتير وسعيده انى اتعرفت على شخصيه محترمه و جميله زى حضرتك

املنا كبير ان كل المعتقلين السياسيين يطلق سراحهم
و الحمد لله بداوا يخرجوا شويه شويه
و ربنا يسهل

اتشرفت جدا بزيارتك حبيبتى وربنا يديم المحبه

نورتينى

صيدلانيه طالعه نازله يقول...

سندباد

يارب يكون تفاؤلنا ده كله بفايده و بقيمه
التغيير اللى حصل رائع بس لو ما صاحبهوش انجازات فى مجال العمل والانتاج يبقى ولا كاننا عملنا حاجه خالص

تحياتى

صيدلانيه طالعه نازله يقول...

محمد محمود عمارة

كلنا قلقانين و مرعوبين
اللى حصل و بيحصل فوق طاقتنا على التخيل
ربنا يعديها على خير يارب

صيدلانيه طالعه نازله يقول...

elsha3er

ياريت كلنا فعلا ننتهج نفس النهج و نفكر صح لصالح بلدنا

نورتنى

صيدلانيه طالعه نازله يقول...

MTMA89

ياريت الكل يفكر كده فعلا

نورتنى

صيدلانيه طالعه نازله يقول...

sony2000

اللهم امين

نورتينى

صيدلانيه طالعه نازله يقول...

يوميات شحات

يارب الناس كلها تفهم وتقدر

نورتنى

صيدلانيه طالعه نازله يقول...

Noha Saleh

كلنا لازم نشتغل كويس عشان نقدر نضحك عشان الصوره تطلع احلى واحلى

انتى كمان وحشتينى جدا يا نهى
متغيبيش تانى بقى

صيدلانيه طالعه نازله يقول...

♥نبع الغرام♥♪≈

ياريييييييييت

نورتينى

;كارولين فاروق يقول...

لازم نتعاون فعلا لمساعده
بلدنا علي قيامها واستقرارها
من جديد ولا نعطي اذننا لمن يريد
تضليلنا ونعطي فرصه للحكومه الجديده
ورسالتك مهمه ووصلت وكانت هادفه

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .