الاثنين، ديسمبر 27، 2010

دموع







من كام يوم كده كنت مع جوزى فى العربيه و ماشيين لفت نظرى حاجه غريبه اووووى

عدت جنبنا عربيه انا فاكراها كويس كانت ماتركس كحلى و كان راكب فيها راجل شيك جدا

واضح من لبسه و منظر العربيه ان ظروفه كويسه 

ببص تانى كده لقيت الراجل ملامحه هاديه جدا و باين انه مش منفعل و لا حاجه و لا حتى متعصب

بس لقيت دموعه منسابه على وشه بغزاره و مستسلم ليها لدرجه خلته مياخدش باله ان فيه حد مراقبه و شايفه

كمان كان فارد ايده على مسند الكرسى اللى جنبه كأنه حاضن الكرسى و محتويه مع ان الكرسى كان فاضى

ادانى احساس كأنه شايف حد موجود على الكرسى و هو حاضن الشخص  زى ما يكون شايفه تماما

رغم انى شفت الدموع واضحه و صريحه الا انى برضه شكيت انى شفت غلط

بس اتأكدت اما لقيته سحب منديل ينشف بيه دموعه ساعتها بس صدقت

الراجل ده زى ما يكون بيعيط على حد واحشه مفتقده ضاع منه

لانه كان مستسلم تماما  و فى حاله حزن عمييييييييقه اوى

المشهد ده من ساعه ما شفته و انا بفكر و جوايا اسأله كتير اوى مش عارفه اجاوب عليها


ايه اللى يخلى الانسان يبكى كده؟؟؟ايه اللى يوصله للحاله دى من الاستسلام للدموع بالطريقه دى

ليه انا استغربت اما شفته بيعيط؟؟؟عشان راجل يعنى؟؟؟؟و هو مش من حق الراجل انه يعيط 

زيه زى الست بالضبط ؟؟؟

ماهو بنى ادم فى الاول و فى الاخر و عنده نفس المشاعر و الاحاسيس

ياترى ايه اللى حصل معاه خلاه فى الحاله دى؟؟

ياترى مراته وحشته بعد ما سابوا بعض؟؟

حاسس بالحنين لحبيبه ضاعت او اختفت من حياته؟؟

عنده مشكله كبيره و مش لاقيلها حل و مبقاش قدامه غير الدموع عشان ينفس عن اللى جواه

كل دى اسئله جت فى بالى اول اما شفته بالحاله دى


بس اللى اعرفه انا شخصيا و عن تجربه ان الدموع نعمه ربنا اهداها لينا عشان نفرج بيها عن همنا

وحزننا بدل ما نكتم جوانا و تحصل حاجات مش كويسه الطب نفسه اثبتها بالعلم و المنطق

انا شخصيا الدموع بالنسبالى افضل صديق بتريحنى دايما و بحس انها صديقتى فى شدتى و اصعب اوقاتى

و مش بتكسف انى اظهرها قدام اى حد سواء فرحانه او زعلانه


يارب فرج كرب كل مكروب و ريح بال كل مهموم

و خلى دموعنا دايما فى الفرح مش فى الحزن

اللهم امييييييييييين


هناك 67 تعليقًا:

لــــ زهــــــراء ــــولا يقول...

علاااااااااااااا

صباح الخير يا ستى
على الصبح كده دموع
على فكره التعليق ده باصبح فيه وبس ليا عوده ان شاء الله
زهراء

سندباد يقول...

المفروض ان الدموع مبتفرقش بين راجل وست لان المشاعر والاحاسيس موجودة في الراجل والست علي السواء
واحيانا القهر او الحنين او الذكريات او الظروف زي ما انتي قلتي بتبقي اقوي من احتمالنا وصبرنا وفعلا منلقيش الا الدموع هي اللي تريح وتهدي
كلنا بتجيلنا اللحظات دي لحظات الاستسلام للدموع
ربنا يفرج عننا وعن الجميع
تحياتي وقديري

Unknown يقول...

للأسف ان مش كل الناس بتقدر أهمية البكاء الرجاله بيتكسفوا يبكوا و بيستهونوا بدموع الأنثى و ساعات كمان بيسموها دموع التماسيح على أساس ان كثرة الدموع تجعلها أرخص
لكن مفكروش انها طريقه ربنا خلقهالنا عشان ننفث عن آلامنا و مشاعرنا و ان الدموع بتميز الانسان الحساس عن غيره
ربنا يفرج هم الجميع
تحياتي ليكي و كل سنه و انت بألف خير

فاتيما يقول...

احيانا الهموم بتكون من تقلها
اصعب من ان تحتمل يا علا
و اوقات كمان
ميبقاش فيه مكان يسمح بالضعف
غير وسط الغرباء وف الشارع
وف توقيت ميتآخرش


البكا ملوش دعوة براجل او ست
المفروض يعنى
حتى الانبياء كانوا يبكون



سلميلى ع العيال ودكتور اشرف
وكل سنة وانتى طيبة

خواطر شابة يقول...

الدموع تغسل القلب وتخفف التوتر ده عموما يعني أما بالنسبة للراجل اللي انت شوفتيه الله وحده العالم بالسرائر وبسبب دموعه لانه كونه لابس شيك وفي عربية كويسة مش ضمان ابدا على انه سعيد السعادة ليها مقاييس ثانية مختلفة
كما ان الطبائع الانسانية مختلفة فما قد يبكي شخص حساس مثلا قد يكون عادي ومحتمل بالنسبة لشخص اخر.
اضم صوتي لصوتك وارفع كفي بالدعاء ان يفرج الله هم كل مكروب
دمت بكل الود عزيزتي

Carmen يقول...

اللهم امين
ربنا يريح قلوب الجميع ويطمنهم ويثبتهم
تحياتي لفكرك الرائع حبيبتي

لــــ زهــــــراء ــــولا يقول...

علا

****

الاول كده عاوزه افهم حكاية ان الدموع اقرب صديقه لكى وانا رحت فين ؟؟؟ قولت لك لسه شويه على ما اختفى وابعد بعيييييييد والى ان يحين الميعاد يبقى خلى الدموع مش تبقى صديقتك وكفايه اناااااا

بصى يا لوله احنا اتعودنا فى المجتمع الشرقى ان الرجل عواطفه ومشاعره اقوى من المراه يعنى هى ممكن تتأثر بأى كلمه او موقف او حتى مشهد فى السنيما لكن الرجل لا .. عشان التربيه الغلط اللى اتربها الرجل من وهو صغير لما نلاقى طفل يبكى يعنى قولى تلات او اربع سنوات نقوله له لا انت راجل وعيب الراجل يعيط ومن هنا بقى بتتكون عند الرجل حاجه جواه تخليه مش يعيط ابدا ابدا لكن ممكن يبكى فى بعض اللحظات بمفرده ولاسباب كتيييييييييره اوى ...

على فكره انا باحترم دموع الرجل ويمكن لما باتعرف على صديق جديد بيكون من اول اسئلة التعارف انت دموعك قريبه او لا وما اقدرش انكر ان السؤال بيكون صدمه لاى رجل ...

المهم الرجل اللى كان راكب العربيه يجوز تذكر حبيب رحل وهو مفتقده وده الاحتمال الارجح لانك قولتى انه كان محتوى الكرسى ....

عاوزه اقولك انى بصفه شخصيه ساعات باحاول انى دموعى مش تبان ورغم انها بتكون حاجه صعبه اوى وكمان لان دموعى قريبه جدا جدا لكن بصراحه باخاف احيانا انها تنزل امام بعض البشر عارفه ان ده غلط وكمان غلط اوى لكن اعمل ايه بقى !!! 

ربنا يفرج هموم كل البشر
يارب فى ايام العام القادم تتاتى السعاده والفرح الى كل الناااااس

زهراء

Ramy يقول...

الدموع و البكاء

أحد أسلحتنا لمقاومة الحياة و مواقفها

هى قلت الكلام اللى جى دة فى بوست عندى من فترة

أن البكاء ان كان حُزن أو فرح هى مشاعر لم يستطيع الجسد تحملها

فبتظهر كدموع

منقولة عن أحد حوارات فيلم مدينة الملائكة

غير معرف يقول...

كما يقال دائما دموع الرجل غالية..
لذلك عندما تتساقط فلابد ان تكون سراً
فلايراها احد ..ولا يشعر بحرقتها الا صاحبها
........
عندنا في اسيوط من الصعب جدا ان يبكي الرجل...والاصعب ان يري الآخرون دموعه

أنا - الريس يقول...

الله يكون في عون كل محتاج عون
ويارب فك كرب المكروبين
قادر يا كريم .

مش عارف ليه حسيت إنه بيبكي علي حد عزيز مات له .

Zouka's يقول...

يا بخته بيعرف يعيط او حتى ينفس عن نفسه بدلا من ان يجيله الضغط او السكر او سكته قلبيه او يطق من جنابه او جلطه او تتفقع مرارته

استر يارب و ما يكونش مروح البيت زيى و خايف من مراته او حماته
وعجبلى

همس الاحباب يقول...

الحمد لله على نعمه التى لا تعد ولا تحصى
بس احيان دموع تظل حبيسة وتأبى النزول
ويحل محلها دموع القلب
واحيانا يكون اصعب امواع البكاء من غير دموع
تحياتى

غير معرف يقول...

والله كويس

أنه عرف يعيط

والأكوس أنه لقى كلينكس

مصطفى سيف الدين يقول...

الدموع هي وسيلة للتفريج عن ضغط نفسي وكبت مشحون من الحزن لو مخرجش في صورة دموع ممكن يوصل للانفجار او علي الاقل الجنون والانهيار العصبي وفي حالة الرجل مش بيدمع غير لما يكون سبب الالم كبير اوي وفقد شيء غالي عليه جدا
واصعب مشهد يدعو للشفقة هي دموع الرجل لان معناها ان المصيبة كبيرة اوي
تحياتي

شمس النهار يقول...

ان رجل مع وجود مفهوم ان الرجل لايبكي
ان يوصل لمرحلة البكاء فاده يعني انه عجز ان ينال مايقهر لدرجة البكاء

وفي رأي ده الموت

علشان لو زعلان علي فراق حبيبته او مراته مش هيعجز عن انه يراضيها ويرجع لها
الرجال مش بيغلبوا في ده
لو عايز هيعرف يرجعها
الا لو الموت اخدها منه

الست لو حست بصدق الرجل في مشاعرة مع صدق الافعال عمرها ماهترده

الرجل ده الموت خد منه عزيز غالي
علشان الرجل اللي يبكي كده اكيد قلبه رقيق رحيم
عمره ما يقدر لايخون ولا يزعل حبيبته او مراته او اي حد
لسه كاتبه بوست عندي عن الموضوع ده

:)

كل سنه وانتي طيبه
:)

المصوراتي يقول...

دموع نزلت علي خدودنا

ما بين مجروح و بين حيران

دليل صادق علي وجدنا

في صوره اسمها الانسان

و لما الدمع ينزل شوف

ما هوش ضعف استكان فينا و لا طبعا بشاير خوف لكن كنت دموع سايله

صحيح يمكن تكون حايره و بتحاول تشق طريق عشان نخرج من الدايره

و تنزل لجل ما تنزل معاها كتييير

و تاخد من الهموم ألوفات من العمر اللي عدي عدي و فااااااااااااات

من الاشجان آآآآه من الحرمان اللي صار موجود

و قسوه طبعها غالب
ظروف صعبه علي قلوبنا بتتكالب , و مين كاره و مين حابب , و مين يا دنيا راح يعذر

انا كتير دمعي كتيثر دمعي منا عارف

عشان العقل بيفكر و طول ما بشوف حياره كتير يجوز دمعي يزيد اكتر

دمووووووووووووووووووووع


بس هي دي الدموع

من كل بستان زهرة يقول...

الدموع شكل من أشكال التعبير عن المشاعر

بس الغريب ان دموعه نزله منه قدام الناس ومش قادر يسيطر على نفسه
اكيد الدموع دي على شئ غالي اوي
لأن المعروف ان الراجل وخصوصا الشرقي
من الصعب عليه اوي البكاء
وخصوصا امام الناس
بيعتبر ده انكسار
بس اكيد الوجع في قلبه كان اكبر

الدموع دي احلى صديق ليه
ونعمه كبيره فعلا
ربنا يريح قلبه ويزيل همه
ويريح قلوبنا جميعا

أحمد عبد الحميد يقول...

دايما دموع... دموع ... دمووووووع

هبة فاروق يقول...

دموع الرجل ليست ضعف كما يقولون بل رقة فى المشاعر وطيبة قلب وحنان
ويارب تفك كربة اى انسان
وكل سنة وانتى طيبة وعائلتك بخير وتبقى سنة سعيدة علينا يارب

مدونة رحلة حياه يقول...

السلام عليكم
الدموع رحمة من عند ربنا غسيل للعين وللهموم وللاحزان واحيانا تعبير عن الفرح والسرور
دومتى بخير

غير معرف يقول...

السلام عليكم
ازيك يادكتوره

احيانا بيكون الشكل الخارجي مش معبر ابدا عن اللى جوه الشخص
فممكن تلاقى الشخص بيضحك ويهزر وهو جواه متضايق جدا ولكن مش عايز يضايق اللى حواليه
ولكن لما يختلى بنفسه بيفرغ همومه مع نفسه
سواء بالبكاء او حتى انه يكلم نفسه
وفى كل الاحوال اللجوء لله افضل حل

الراجل ممكن يبكي فعلا لانه بشر ولكنه عاده مش بيحب حد يشوفه كده
حتى ولو كان اقرب الناس اليه
فبيكون بكاؤه لوحده

ربنا يفك كرب كل مهموم
ربنا يكرمك ويوفقك

محب روفائيل يقول...

فى مرة واحدة بس لقيت أبويا بيبكى
كان علشان واحد قريبنا فى القاهرة متوفى ، كان ولد عمه وطبعا أنا مشفتش الراجل ده غير مرة واحدة
بس لما قعدوا يحكوا عنه بعدين حسيت انه المفروض يتعمله تمثال
أبويا لما شفته وهو كده قاللى بره لو سمحت :)

Zouka's يقول...

اصدق ما يكون الرجل عن\ما يبكى

اسماء عبدالعزيز يقول...

حبيبة قلبي ازيك ياقمر
طبعا اكيد من احساسه بالحنين لحد عزيز عليه فقدة ومش عارف يعيش من غيرة
عشان كده ماخدش باله ان حد مراقبه
اكي الرجل بيبكي لكن مش في كل وقت واى مكان
الله يفرج همه
دمت بكل الحب

;كارولين فاروق يقول...

اللهم أمين
اول مره ازور مدونتك
وبالرغم انك تتكلمين
بالعاميه الا اني شعرت
بكل كلمه تقوليها
وتخيلنا هذا الرجل وهو
يبكي وتعاطفنا معه
وفكرنا ماهي اسباب
بكاءه
ولانك امرأه فانك تحملين
صفات الحنوه التي تجعلنا
نقف بافكارنا امام كل باكي
نفكر باسبابها
والبكاء يا سيدتي نعمه
ورحمه وتفريغ وتنفيس

ربنااعوذ بك من عين لا تدمع

reemaas يقول...

الدموع تعبير مشروع عن الحزن
والحزن احساس طبيعى للانسان مابيفرقش بين رجل وامراءة ده احساس بس لان الحزن بيبقى مصاحب ديما لحاله من الضعف ولان الرجل بيرفض انه يضعف امام حد على الاقل فغريب انك تشوفى رجل بيبكى

اعتقد لو كانت ست ماكنش نفس الاسئلة انطرحت

ربنا يفرج كل كرب يارب

FAW يقول...

حاجه طبيعيه وأصلا المفروض منستغربش نشوفها ولا نتكسف منها

رحلتنا في الحياة يقول...

ياااه يادكتورة فعلا الدموع دى نعمة كبيرة انا كان هيجرالى حاجة من اكتر من كام يوم هموت واعيط لغاية مابجد كان هيجيلى انهيار عصبى مرتحتش بجد الا لما عيطت كتير اوى :(
ربنا يكرمنا بدموع فرح باستمرار يااااااارب

غير معرف يقول...

الدموع دي نعمة كبيرة
ياريت اعرف ابكي و دموعي قريبة زي بعض الناس

الدموع بتغسل العين و القلب
الدموع شيء مريح

صيدلانيه طالعه نازله يقول...

لـــولا وزهـــراء

صباح الهنا و السرور
انا بارد عليكى تانى يوم الصبح برضه

منورانى

صيدلانيه طالعه نازله يقول...

سندباد

كلنا بتجيلنا اللحظات دي لحظات الاستسلام للدموع

**********************
اتفق معاك و بشده
اللححظات دى بتطلع الشحنه اللى جوانا
و بنبقى بعدها هاديين نوعا ما عن قبلها

نورتنى

صيدلانيه طالعه نازله يقول...

شيرين سامي

الرجاله بتتربى من طفولتها ان العياط مش للرجاله
فتلاقى الراجل حتى اما يعيط ياخدله ساتر عشان محدش يشوفه

اما موضوع دموع التماسيح ده فحتلاقيه كتيييير اوى
و على فكره مش الستات بس اللى يتقال على دموعها دموع تماسيح
فيه رجاله كتير ينطبق عليهم و بصدق
و الدنيا مليانه

نورتينى يا زميله

صيدلانيه طالعه نازله يقول...

فاتيما

انا اما قلت راجل يعيط مكانش ده تفكيرى انا تحديدا
كان كلام نابع من موروثات توارثناها من زمااااااااااان
و مع كده انا اما شفت الراجل ده احترمته
انه بيخرج شحنه غضبه او حزنه بعيد عن المقربين ليه
على الاقل عشان مش ينكد عليهم او يرجعلهم رايق شويه عن الحاله اللى هو فيها

المدونه نورت على فكره
:)

صيدلانيه طالعه نازله يقول...

خواطر شابة

اتفق معاكى ان الدموع تغسل الروح و النفس
انا كان قصدى من الوصف للراجل انى اوضح ان اكيد اللى قاهره كده مش مشاكل ماديه خالص اكيد مشكله نفسيه جواه

ربنا يبعد عننا كلنا الهم و الغم يااااااارب

صيدلانيه طالعه نازله يقول...

carmen

آآآآآمين يارب العالمين
ميرسى يا كارمن على كلامك الجميل

نورتينى

صيدلانيه طالعه نازله يقول...

لـــولا وزهـــراء

بعد الشر عليكى حبيبتى من الغياب والاختفاء

فعلا تربيه الاولاد فى المجتمع الشرقى بتقوم اساسا على فكره كبت المشاعر و التحكم فى ظهورها
مع ان الدموع لن تنتقص من كرامه الرجل او تقلل منه

ربنا يبعد عنك دموع الحزن دايما و يرزقك الفرح الضاحك مش المبكى
امين يارب العالمين

صيدلانيه طالعه نازله يقول...

Ramy

انا حافظه حوار فيلم مدينه الملائكه من اوله لاخره

فعلا البكاء نعمه و ظهورها وقت الفرح او الحزن اكيد حاجه كويسه

ربنا يسعدك يارب

صيدلانيه طالعه نازله يقول...

ماشى بنور الله

كما يقال دائما دموع الرجل غالية..
لذلك عندما تتساقط فلابد ان تكون سراً

**********************
ليه سر بقى؟؟
لا هيا عيب و لا حرام
بجد فيه اوقات لو الدموع دى منزلتش الانسان ممكن تجراله حاجه

نورتنى

صيدلانيه طالعه نازله يقول...

MR.PRESIDENT

انا حسيت انها دموع فقد فى العموم
سواء بالموت او بالفراق بينه و بين حد غالى عليه اوووى

ميرسى على الدعاء الجميل فى اول الكلام
ربنا يتقبل

نورتنى

صيدلانيه طالعه نازله يقول...

Zouka's

كوووووول ده شايله فى قلبك وساكت
يا قلبك الاسود يا اخى

صيدلانيه طالعه نازله يقول...

همس الاحباب

دموع اقلب دى بتبقى اصعب انواع الحزن
ربنا ما يكتبها على حد

نورتنى

صيدلانيه طالعه نازله يقول...

مصري جدا

يعنى ماتركس
و الشياكه دى
و حيمسح وشه فى كمه
اكيد معاه كلينكس

نورتنى

صيدلانيه طالعه نازله يقول...

مصطفى سيف

اتفق مع كلامك جدا
الراجل مش بيعيط فى المجتمع الشرقى
الا اذا كان الحادث جلل

نورتنى

صيدلانيه طالعه نازله يقول...

شمس النهار

الرجل ده الموت خد منه عزيز غالي
علشان الرجل اللي يبكي كده اكيد قلبه رقيق رحيم
عمره ما يقدر لايخون ولا يزعل حبيبته او مراته او اي حد

*******************

كنت بتكلم مع واحده صاحبتى وانا بكتب البوست و قالت نفس كلامك
الموت هو اللى قهر الراجل ده و خلاه بالحاله دى

ربنا يسعدك يا شمس و يفرحك دايما

صيدلانيه طالعه نازله يقول...

المصوراتي

حلوووووووووووه اوى الكلمات
تسلم ايدك عليها

نورتنى

صيدلانيه طالعه نازله يقول...

من كل بستان زهرة

اتفق مع كلامك جدا
اكيد حاجه غاليه اوى ضاعت منه
الدموع فعلا اقرب صديق لناس كتير
الناس اللى بتحس طبعا
:)

نورتينى يا سكره و كل سنه و انتى طيبه

صيدلانيه طالعه نازله يقول...

أبو حميد

و معانا اتصال من حماده هلال
و نقول الوووووووووو

نورتنى يا فندم

صيدلانيه طالعه نازله يقول...

هبة فاروق

هيا فعلا طيبه و رقه مشاعر و حنيه جادمه كمان

سنه سعيده عليكى يا قمر

صيدلانيه طالعه نازله يقول...

مدونة رحلة حياه

هيا فعلا رحمه من ربنا

نورتنى

صيدلانيه طالعه نازله يقول...

م/محمود فوزى

دايما فعلا الانسان المرح اوووى مع الناس بيبقى جواه حزن الدنيا كلها
بس بيحاول مش يضايق اللى حواليه دى حاجه
كمان بيحاول يضيع حزنه وسط الناس عشان ينسى شويه

نورتنى

صيدلانيه طالعه نازله يقول...

الكاتب محب روفائيل

و ياترى والدك اما قالك بره لو سمحت كان بهدوء كده و لا زقك بره الاوضه و رزع الباب و لا كان فيه حاجات طايره فى الهوا

:))))

نورتنى و كل سنه و حضرتك طيب

صيدلانيه طالعه نازله يقول...

Zouka's

ماشاء الله
ايه المعلومات الفظيعه دى
اعتبر ده وعد؟؟

صيدلانيه طالعه نازله يقول...

اسماء عبدالعزيز
هو كده فعلا يا سمسم احساس بالحنين و الاشتياق لانسان فقده و كان غالى عليه

ربنا يفك كربه و كرب كل مكروب

ان شاء الله

نورتينى

صيدلانيه طالعه نازله يقول...

كارولين فاروق

اشكرك على الكلام الجميل
الذى لا يصدر الا من شخصيه مميزه

نورتينى فى اول زياره و ان شاء الله

متكونش الاخيره

صيدلانيه طالعه نازله يقول...

reemaas

فعلا حبيبتى
لو الست مكانش حيبقى فيه موضوع من اصله
اصلها مش غريبه علينا اصلا

نورتينى يا دوك

صيدلانيه طالعه نازله يقول...

FAW

كلامك صح جدا و اتفق معاه

نورتنى

صيدلانيه طالعه نازله يقول...

احاسيس آيوشه

ليه بس حبيبتى كده
قلقتينى عليكى
مفيش حاجه تستاهل انك تكتمى فى نفسك و تحزنى الحزن ده كله

ربنا يريح بالك و يفرج كربك ان شاء الله

صيدلانيه طالعه نازله يقول...

يوميات شحات

يعنى ايه بقى بعض الناااااس
شكل حضرتك بتلقح كلام
:)

فعلا الدموع نعمه و راحه

نورتنى

غير معرف يقول...

وايه المشكله لما ر اجل
يحزن ويبكى
مفيش مشكله
ولا هو ضعف منه بالعكس
فيه رجاله عندها
قدرة على تحمل الاحزان والصعاب ويكتموا الدمعه فى عيونهم
وفيه اللى معندهمش قدرة على كدا


نفس الحكايه فى الستات فيه اللى دموعه قريبه
وبتكون ضعيفه ادام اى حزن يقابلها وفيه والست القويه اللى مش من الساهل تبكى

وانا بقرأ البوست كل اللى وجع قلبى الراجل دا وهو ماشى يارب يكون وصل بيته بالسلامه

البكاء راحه ونعمه من الله سبحانه وتعالى

يارب فرج كرب كل مكروب و ريح بال كل مهموم
و خلى دموعنا دايما فى الفرح مش فى الحزن
اللهم امييييييييييين

قبلات حااااااااااااارة يا لولتى
كل سنة وانتى طيبه
والسنه الجديده احلى واحلى

*****

arab video يقول...

فيه رجالة كتير دموعهم قريبة و فيه بنات كتير دموعم متحجرة
مش شرط يعني

غير معرف يقول...

ربنا يفرج هم الجميع يا رب :)

انا بتاثر جدا برضو ببكاء الرجال :(

تحياتي

صيدلانيه طالعه نازله يقول...

الحــب الجميـــل

يارب يا ايمى يكون وصل بيته بالسلامه ان شاء الله
ربنا يريح كل مكروب و مهموم

و كل سنه و انتى طيبه و كميله و زى السكر

صيدلانيه طالعه نازله يقول...

arab video

و مين قال انه شرط
مش شرط خااااااااالص

نورتنى

صيدلانيه طالعه نازله يقول...

فتاه من الصعيد

اييييه ده
كل الناس بتتاثر بدموع الرجاله
طبعا عشان قليله
لكن الستات عشان طول النهار تسح محدش بيعبرها و لا يسأل فيها
هههههههههههه


نورتينى

الغاردينيا يقول...

مثلما قلتي حاله مقرفة

والقصة مش مساله جسم مغري او اى شئ

القصة اصبحت مرض اخلاقي !

الله يستر علينا بس

تحية ,

الغاردينيا يقول...

اممممممم اعتقد اني علقت غلط هههههههه
فكتبت التعليق اللى مفروض يكتب في بوست حاجة تقرف هنا !
هههههههه واللى مفروض يكتب في بوست دموع كنت بكتبه بحاجه تقرف بس انتبهت الان ه سوري بجد بس علشان انا فاتحة اكثر من صفحه هذا كل شئ هههههه

اوك الموقف دا جميل بجد و تاثرت به وعلى فكره خذي بالك انه مش عارف انك شفتيه ومش عارف بمدى تاثير دموعه عليكي وعلينا ودا خلاني اقول الان سبحان الله :)

تحية واعذريني على اللخطبة في تعليقي هههه

❤ soso ❤ يقول...

كلن منا له هموم تثقل كواهلنا وتستنزف دموعنا ...

كل سنة وانت بصحة وسعادة

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .