السبت، ديسمبر 04، 2010

زهايمر










احساس بشع انك تصحى من النوم الصبح تلاقى كل اللى حواليك بيحاولوا يقنعوك انك مريض و من زمان


لا و يفضلوا يقنعوك ان حالتك متاخره و لازم تخضع للعلاج و المراقبه و حاجات تانيه كتير تحد من حريتك


و الابشع بقى انك من كتر ثقتك فيهم تصدقهم و تستسلم لفكره المرض و تتعايش معاها


و بعد ما تبدأ تصدق الكدبه


تلاقى حاجه تحصل تهد ده من اساسه و تكتشف انك واقع تحت رحمه عصابه


بتستغلك و بتسمم جسمك بأدويه  عشان تخليك مريض فعلا و مش اى مرض ده زهايمر


و كل ده عشان الطمع مش اكتر و لا اقل


و اللى يوجع بقى و يحسسك ان حياتك ضاعت هدر و ان اللى زرعته كله مات و مش حيثمر ابدا غير شر


انك تكتشف ان اقرب من ليك و هما ولادك هما اللى بيعملوا فيك كده عشان طمعانين فيك وفى فلوسك


احسااااااااااااااااس فظيع جدا 


مش كده؟؟؟؟


دى كانت قصه فيلم زهايمر لعادل امام و احمد رزق و فتحى عبد الوهاب ونيللى كريم


الفكره بقى اللى عايزه اتكلم فيها 


معقول الطمع يوصل ولادى انهم يعملوا فيا كده مع انى عمرى ما حرمتهم من حاجه


و تعبت و شقيت عشان اوفرلهم حياه كريمه و مستوى اجتماعى لائق


معقول بعد ما ضيعت عمرى عليهم الاقيهم فى الاخر بيدسولى السم فى اكلى و شربى عشان ابقى مريضه و يقدروا يحجروا عليا؟؟؟؟


لمجرد انهم يستولوا على فلوسى اللى هما كده كده لو صبروا شويه حيورثوها منى يعنى هيا رايحالهم رايحالهم


قد كده الدنيا بقت وحشه و غروره لدرجه توصل الابن انه يقتل ابوه و امه


حاسه انى عماله اعيد و ازيد فى نفس الكلام


بس من ساعه ما شفت الفيلم و انا متلخبطه جدا و عماله افكر فى القصه دى و محتاجه رأيكم


يا ترى الراجل ده غلط فى ايه عشان ولاده يطلعوا كده


و ياترى المفروض نعمل ايه عشان ولادنا ميبقوش كده


و نتجنب تكرار المأساه دى معانا














هناك 35 تعليقًا:

Zouka's يقول...

اول تعليق

دى مشكلة جيل وليس مشكلة تربيه

Zouka's يقول...

هو فيلم رائع

من روائع عادل امام

نشكره على هذا الفيلم

وايضا اسمحى لى اسالك

اين القيم ياسيدتى

اين المبادئ

اين الدين

اين الضمير

اين بر الوالدين

انه حقا زمن الانترنت

زمن التليفزيون

الالفيه الثالثه

فليرحمنا الله

غير معرف يقول...

الكلام ده موجود في الواقع لكن بتفاوت
يعني في أهون من كده و فيه أفظع من كده بكتير

فشكووول يقول...

السلام عليكم يا دكتوره
تحياتى
ولا تعملى حاجه اصل المكتوب ما منوش هروب والأولاد رزق .. يا أما ربنا يرزقك برزق طيب .. يا اما ربنا يرزقك برزق نص نص .. يا ما مش طيب .. ودا مش شطاره ولا فهلوه ولا حاجه .. لكن فيه اساسيات ممكن نعملها
اللى عملته مع ابويا ولادى حيعملوه معايا
كمان مع امى برضه ولادى حيعملوه معايا
والحكايه دى لازم ربنا يقتص من الانسان فى حياته .. وكما تدين تدان
تحياتى

لــــ زهــــــراء ــــولا يقول...

لوله

****

انتى عارفه ان اغنية ذكرياتك مييح من اجمل الاغانى اللى باعشقها فى الفتره الاخيره وبالتحديد من اول يوم العيد سيبك ان حماقى هو اللى بيغنيها بس بجد الاغنيه تعبر عن حاله صعبه اوى ...
انا لسه مش شوفت الفيلم بس ان شاء الله اشوفه فى القريب العاجل

المشكله بقيت مشكلة جيل مش اتربى كويس وبالتالى مش قادر يربى اولاده صح
المشكله انان اصبحنا ابعد ما يكون عن روح الدين الاسلام والموضوع اصبح مظهر فقط مش جوهر المشكله اننا بنحفظ مش بنفهم ...
سلسله من المشاكل كلها فوق بعضها ربما تؤدى الى كارثه فى نهاية الامر ...
عارفه لو بالنسيان احنا عيانين اكيد احسن لنا عشان مش نتصدم بالواقع وما يحدث فيه وما يحدث لنا

الطمع ممكن يعمل اكتر من كده ..
ارجع واقولك طريقة التربيه من الاصل هى اللى بتخلى النبته تكون غير صالحه ..

اتعلمت ان اللى بيزرع خير لابد ان يجنى خير لكن مافيش مانع انه يجنى فى بعض الاحيان غير كده بس اللى عند ربنا مش بيروح

ربنا يبارك لك فى ابنائك ويحفظهم ربنا ويقر عيونك بهم

باقولك انا معزومه على الفيلم تيجى معايا هههههههههه
زهراء

FAW يقول...

بغض النظر عن إن الفيلم موضحش أصلا علاقة الأب بولاده قبل أحداث الفيلم
بس أكيد هو اللي وصلهم لكده , مش بتصرفاته معاهم . . بفشله في تربيتهم
الفيلم فعلا مؤثر جدا ولولا المعالجه السيئه للقصه كان هيبقي فيلم عالمي
وعجبتني قوي أغنية حماقي .
تحياتي . .

Mona Hekal يقول...

شكرا يا علا علي الموضوع المهم ده
انا قلتلك راي قبل كده بس هاقوله تاني
اكيد رباهم غلط اكيد ما زرعش فيهم الحنان ، ما علمهمش يعني ايه في ناس مش لاقيه و ان الحمد لله علي كل حال . اكيد معرفهمش ربنا و ان فيه ثواب و عقاب حاجات كتير اوي اكيد معملهاش . ولادنا مش هيحترمونا علشان بنجبلهم كل اللي هما عايزينه من غير ما يفهموا انه مش في كل وقت هايلاقوا اللي هما عايزينه لان مش دايما في فلوس لكل حاجة
حتي لو فيه فلوس في حاجات مالهاش لازمة و نقدر نستغني عنها .......
الفلوس الكتير بتعمي اصحابها

لــــ زهــــــراء ــــولا يقول...

معقول الطمع يوصل ولادى انهم يعملوا فيا كده مع انى عمرى ما حرمتهم من حاجه

" هااااااااااااااااايا يا قمر فكرة البوست ... اولا يا لولة انتي حرقتي الفيلم ربنا يعوض عليك يا منتج ....هههههههههههه

ثانياً اللي يوصل الاولاد لكدة اكيد تربية غلط ومقدرش يحميهم ولو بنسبه من تأثير المجتمع السلبي عليهم "

سيبك انتي
من كل ده
انتي عاملة ايه (:
لولا

باحث عن حب يقول...

العيال رحموه
علشان مقتلهوش
من الاول
يا صيدلانيه
انا شوفت الفليم
فليم
فظيع
وقصته
مخيفه

-_- يقول...

اغنية رهيبة

MTMA89 يقول...

كلامك صح يا دكتورة
ان في حالات كده كتير
و في افظع من كده كتير

الاصعب لما يحصل العكس
ان الابناء يسيبوا آبائهم عشان مش معاهم فلوس
و بتكون مأساة فعلا زيادة على مأساة الفقر


أما الأسباب ايه
فهي بين عاملين الاتنين
اما التربية و اما نظرة المجتمع

و للأسف بقت المادة هي اللي تحكم كل حاجة

ربنا يرحمنا برحمته


تحياتي

محمد:)

reemaas يقول...

اولا يابختك انك شفتيه ده ار على فكرة
هههههههههه
ثانيا اه الطمع طالما احتل قلب البنى ادم على الله العوض فيه ووقتها مابيفرقش بين اب ولا ام ولا قريب ولا غريب لانه ببساطة بيبقى عنده هدف اكبر من الكلام السطحى ده
الفلوووووووووس,احلامه,طموحه,اطماعه واللى فيه عقبه واقفه فى سبيل تحقيقه ليهم وفى وقت قياسى فلازم العقبه تتزلل

يعنى وقتها ويوم ما الحقد والطمع يملى القلب هيبقى القريب مجرد عقبة

نمنع ده بايه؟
باننا نغرس فى ولدنا فضيلة الرضا من اولها

هبة فاروق يقول...

انا شوفت الفيلم وعجبتنى القصة

شكرا لطرح هذا الموضوع وربنا يكفينا
شر اولادنا
مشكورة واسمحيلى بمتابعتك وفى انتظار متبعتك

حاجات جوايا يقول...

صعب جدا فعلا
احساس مرعب
بس معتقدش ولادنا يعملوا معانا كده
طالما اننا بنعاملهم كويس وبنربيهم صح وبنبر والدينا مش ممكن يكونوا كده

وهل جزاء الاحسان الا الاحسان

ربنا يعدى ايامنا على خير ويصلح حال ولادنا يارب

Carmen يقول...

شئ بشع بجد اما تحولنا الفلوس لوحوش كدابة وخادعة
بوست روعة ولفت نظر اروع
تقبلي مروري

Tamer Nabil Moussa يقول...

فى احنا زمن

الوحش فية اكتر من الحلو

وممكن نتوقع حدوث كل شىء غريب وغير منطقى


ربنا يرحمنا برحمتة


مع خالص تحياتى

شمس النهار يقول...

التربيه اهم حاجه التربيه

اللي ولاده هيعملوا فيه كده
اكيد هيكون عمل حاجات كتير غلط في تربيتهم
وفقد مصداقيته معاهم

اللي بيزرع بيحصد اللي زرعه

Zouka's يقول...

ربنا يكفينا شر المرض

-طبعا ان كان مرض مش مؤامره-

فين ايام وزارة التربيه والتعليم

صيدلانيه طالعه نازله يقول...

Zouka's

فعلا كلنا بقينا بنفضل نفضل فى البيت قدام الدش و الانترنت عن اننا نخرج نزور قرايبنا و معرفنا
ربنا يستر على الاجيال اللى جايه

منورنى يا باشا

صيدلانيه طالعه نازله يقول...

يوميات شحات

اتفق معاك ان الواقه فى اسوأ من كده و احسن من كده
دى حقيقه فعلا
نورتنى

صيدلانيه طالعه نازله يقول...

فشكووول

هو فعلا كما تدين تدان
بس و الله ساعات زى ما حضرتك قلت فى الاول تبقى كل حاجه فى الوالدين كويسه
و يطلع الاولاد مش كويسين
ساعتها ممكن تعتبر ده ابتلاء من ربنا للوالدين

تحياتى لحضرتك

صيدلانيه طالعه نازله يقول...

لـــولا وزهـــراء

ساعات فعلا يبقى المرض احسن بكتير من اننا نتصدم فى ولادنا و اقرب من لينا فى الحياه
اتفق معاكى كمان ان الاغنيه روووووعه

نورتينى يا قمر

صيدلانيه طالعه نازله يقول...

FAW

انا حاسه ان الفيلم جميل و معالجته كويسه
و الفكره جامده جدا و كل اللى دخل الفيلم فى السينما اتاثر بيه قوى خصوصا الابهات و الامهات

نورتنى

صيدلانيه طالعه نازله يقول...

لولا

الفيلم يا ستى متهكر من زمان و مرمى على النت بقاله فتره
متجيبلناش تهمه يا ست هانم
انا بقى تمام و زى الفل و لا ينقصنى سوى رؤيه شخصكم الكريم

نورتينى يا سكر

صيدلانيه طالعه نازله يقول...

محمود(باحث عن حب)
هيا فعلا قصه فظيعه بس بمثابه ناقوس خطر عشان العلاقات الاسريه اللى اتدهورت اوى الايام دى

نورتنى

صيدلانيه طالعه نازله يقول...

Sharm

هيا فعلا حلوه جدا و معانيها قويه بس اللى يفهم و يقدر

تحياتى

صيدلانيه طالعه نازله يقول...

MTMA89

للاسف الماده فعلا بقت الفيصل اللى بيحكم كتير من العلاقات الانسانيه فى زمن ظروف الناس كلها او معظمها يعنى بقت صعبه اوى بسب الغلاء الفاحش و الازمه الاقتصاديه اللى العالم كله بيمر بيها مش مصر بس

نورتنى

صيدلانيه طالعه نازله يقول...

reemaas

الرضا بالمقسوم فعلا عباده

نورتينى حبيبتى

صيدلانيه طالعه نازله يقول...

هبة فاروق

ربنا يكفينا شر المستخبى كله

شرف ليا انك تنورينى يا قمر و ان شاء الله حكون عندك دايما

نورتينى

صيدلانيه طالعه نازله يقول...

حاجات جوايا

ربنا يهديهم و يسترها معانا و معاهم
آمين يارب العالمين

صيدلانيه طالعه نازله يقول...

karmen

هو شيىء بشع و مؤلم و كل حاجه وحشه

نورتينى

صيدلانيه طالعه نازله يقول...

Mohamed Amer

نورتنى

صيدلانيه طالعه نازله يقول...

Tamer Nabil

للاسف كلامك صح و حقيقى
ربنا يهدينا جميعا

صيدلانيه طالعه نازله يقول...

شمس النهار

هو فعلا التربيه اهم حاجه
و كما تدين يا فتى تدان

نورتينى حبيبتى

صيدلانيه طالعه نازله يقول...

Zouka's

وزاره التربيه و التعليم بقوا متفرغين فى النكد على المدرسين و بس
نورتنى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .