الثلاثاء، يونيو 15، 2010

اللى متعوزش وشه بكره تتحوج لقفاه

لو عندك علبه شامبو فيها شويه صغيرين مش عارفه تخديهم من القزازه سيبيهم مترميهمش


مسيرك فى يوم تنسى تشترى شامبو او الراجل بتاع الدليفرى يتأخر عليكى


 و متلاقيش قدامك غير الشويه اللى فى قعر القزازه


كمان برضه علبه المسترده اللى بتتعصر دى عارفينها؟؟؟


اما تحسوا انها خلصت خالص اقلبوها على وشها و سيبوها كده فى التلاجه


مسيركم فى يوم تتزنقوا و تضطروا تستعملوها و اهى بتكون فكت زنقه ساعتها


صح كلامى و لا غلط؟؟؟





الكلام ده بينطبق على حاجات كتير قوى فى حياتنا


و ممكن كمان ينطبق على البشر فى حياتهم


يعنى  مثلا نبقى بنتعامل مع حد معين فى موضوع معين فى وقت معين من حياتنا


و بالتالى بتكون معانا نمر تليفوناته و عنوان بيته و كل المعلومات عنه


لكن بعد ما المصلحه مع الشخص ده بتخلص نلاقى بعض الناس حذفوا نمر تليفونه


و عنوانه و كل المعلومات اللى عنه


طب ليه يا جماعه ما تسيبوا النمر و العناوين ما انتوا ممكن تحتاجوها فى اى


وقت من الاوقات و ساعتها حتبذلوا مجهود عشان توصلوا لصاحبها تانى


انا فى حياتى بحس ان الدنيا مش مصالح و بمجرد ما تخلص تنتهى علاقتنا باصحابها


و نرميهم فى مزبله حياتنا زى ما بنرمى علب الشامبو الفاضيه فى سله المهملات


لا الحياه علاقات بين البشر و مصالح و ناس تبعد و ناس تقرب


لكن عمر اللى بعد ما يتنسى و لا يترمى بنسيبه فى مكانه معزز مكرم


لاننا اكيد و حتما و لابد حنحتاجه فى يوم من الايام



من الاخر كده اللى متعوزش وشه النهارده حضرتك ممكن بكره تتحوج لقفاه

هناك 63 تعليقًا:

blue-wave يقول...

يا ساتر
فعلا اسيوطيه:))
دانتوا غلبتوا المنايفه:)))))))))

فاتيما يقول...

يا مسااااااء تحديف الكلام


فيه ايه بس
يا ست انتى
مالك ؟؟

اللى ميعوزش وشك
اديله على قفاه يا لولاّ

مفيش حاجة تستاهل
انك تحرقى دمك يا حبيبتى
و لا تزعلى نفسك على حد
لا يستحق اهتمامك


خلى بالك من نفسك
بوسات و حضونات
يا لولتى

samy يقول...

دكتورة اخبارك اية مش باينة

بوست حلو جدا جدا

بالنسبة لموضوع الشامبو المستردة انا احيانا كتير بعمل كدة

اما الناس بقى

فبجد انا من الناس اللى تحب التواصل جدا جدا

مش بس مصالح حتى منغير

بس بحب الناس و بالذات لو كانوا الناس دى بأحترمها

على فكرة دة مش ان الواحد ملاك لا بس التواصل مع الناس يحسسنى انى لسه موجود (:(:

تسلم الأيادى والنصايح (:(:

richardCatheart يقول...

مسا الانوار

العمليه مش وش ولا قفا العمليه المفرود ود

بمعنى حتى لو كان فى مصلحه وخلصت ماكتر خير اللى عملها حتى لو هاحتاجه تانى الود حلو ومطلوب

مابحبش حسابات المصالح لانها فرغه
الحساب كله غلس صراحه

بس هى الدنيا كده فيها وفيها

sharm يقول...

اللي متحتاجش وشه بكره تحتاج قفاه

زهــــراء يقول...

دكتوره علا

-*-*-*-*

اخر شويه فى زجاجة الشامبو بيكون فيهم البهريز يعنى ههههههههههه

بصى هاتكلم عن نفسى وممكن تكون طريقتى غلط فى الحياه بس هى دى حياتى بكل ما فيها من متناقضات ممكن مثلا لو باخد كورس تلاقينا نتبادل ارقام الموبايلات ونتكلم مع بعض فى اثناء فترة الكورس وبعد ما يخلص ممكن برضه نفضل على صله ببعض لكن عن نفسى لو حد قطع معايا يبقى بالسلامه والقلب داعى لك ولا عاوزه وشه ولا قفاه على فكره انا ممكن افضل انا اللى اسال على حد وابعت واطمن لكن بعد فتره بازهق لازم زى ما اهتم بيك انت كمان تهتم بيا لكن لو طنشت يبقى باى باى بس فى نفس
الوقت الدنيا مصالح
وكمان الحمد لله احتفظ بكل الذكريات الجميله اللى تخلى اى حد اول ما يرجع لحياتى تانى يلاقينى كأننا لسه كنا مع بعض امبارح ....

المثل اللى بيقول اللى مش تحتاج لوشه النهارده بكره تحتاج لقفاه ممكن يكون صح وممكن يكون غلط ...

على فكره الصوره بتاعة البوست حلوه يارتى الشكره دفعت لك كام علشان تحطى اعلان المنتج بتاعهم ههههههه

MR.PRESIDENT يقول...

علي رأس المثل واحنا عيال
" خليك في كوزك عما نعوزك "
واخويا مثله بتاع المصلحنجي " عض قلبي ولا تعض رغيفي "
وكل يوم دا الحال
بس يمكن عشان الناس بقت المصلحة اللي تبرطهم مع بعض
يعني معدش حد بيتعامل بفطره
الكل بيتعامل " شيلني أشيلك - أبجني أبجك "
ولا داعي لذكر أمثلة .. فأنا أحيانا أحذف ولكن عندما أدرك أن من أتعامل معه شخص خسيس .

تحياتي

ضكـــــتور جدا يقول...

السلام عليكم
صحيح يا دكتورة عندك حق
...................
تقبلي تحياتي
ودي أول زيارة لي لمدونة حضرتك
وحقا مدونة رائعة
وان شاء الله مش هتكون الزيارة الاخيرة

حاجات جوايا يقول...

ازيك يا جميل اخبارك ايه ؟؟
حلو الموضوع ده

عن نفسى مش برمى تليفونات حد بصراحة
كله فى الدليل .. لو ضاع الدليل بقى تبقى مسوليته هو مش مسئوليتى انا هههههههههههه

على الجانب الاخر بعيدا عن المصالح

عندى تليفونات اصحاب قدام خدتنا الدنيا وتقريبا نسينا بعض
.. فيه اسماء لما بشوفها اقول مين دول ؟؟

واسماء تانية ببقى عايزة اكلمهم اوى ووحشونى بس مش بكلمهم
اخاف يكونوا نسيونى واحرج نفسى
:(

بس كده تشتغلينا
يعنى حاطة صورة جونسون واول سطرين بتقولى مترميهومش لو فضيوا .. ده انا قلت هيعدوا عالبيوت يستبدلوا الفاضى بجنيهات دهب ولا حاجة زى ايريال والشمعدان ههههههههههههههههههههههههههههههههههههههههههههههههههههههههههههههههههه

adel يقول...

يعني انا لو نفذت الموضوع ده
وعلاقتي مبقتش بيهم وقتية او مصلحة (وده بيحصل)
يبقي انا مصاحب قزايز شامبو و مستطردة ؟؟؟

ههههههههههههههههه
تصدقي فكرة ياحماتي
طيب اختاري ليكي بقي اي لوجو :)

الزهرة البرية يقول...

وسعى وشك كده يا دوك ثانية و رجعالك على ما أرد على الدوك اللى غاب وبيقول ان المنايفة اتغلبوا مين اللى اتغلبوا دول لعلمك احنا مش بنتغلب احنا بنستريح شوية وراجعين تانى هههههههههه


حقيقى يادكتورة كلامك صح فعلا إحنا ممكن نتبادل ارقام وتعارف مع ناس ممكن حتى تعرفيهم لمدة يوم واحد بس أحيانا كتييير بعد كده بتحتاجيهم مش علشان مجرد مصالح لا ممكن تبادل خدمات وساعات بتقلب لصداقة أنا معاكى فى الجزئية دى وعن تجربة فعلا

دمتى بكل الخير والحب والسعادة

لـــولا وزهـــراء يقول...

في الاول ضحكتيني من طرافة الموضوع بعد شوية نجحتي في صنع اسقاط ع الواقع اللي بنعيشه الحكاية مش حكاية حبة شامبو ولا بواقي المستردة ..الحكاية حكاية بشر من لحم ودم عملنالهم دليت من حياتنا وبعدين ابتدينا ندور عليهم لما افتكرناهم في الراسكل بن ..تحياتي لشخصك الجميل
لـــولا

Mark Hogan يقول...

واللهى يادكتورة انتى بتقولى حكم
اللى متعوزش وشه بكره تتحوج لقفاه
كلام جميل, بس اللى وشه زى قفاه, أعمل فيه إيه انا بقى؟ .. مشكلة
لكن المثل ده بيفكرنى بمثل شبيه وهو: اللى ماتطولش وشه, اديله على قفاه (مع التشديد على حرف الدال, والغل فى الإلقاء)
ماعلينا (تهريج رجالة, ماتخديش فى بالك) ندخل فى الموضوع

شوفى ياعزيزتى, الموضوع ده ثقافة شعب وأسلوب معيشة, يعنى إحنا كنا مستعمرين زمان من الإنجليز وكان عندنا ملك فاسد و.. و.. , الكلام اللى علموهلنا زمان ده, وعشان كده ضربنا الإنجليز والملك على وشهم, وطرضناهم برة, ونسينا حتى ناخد نمرة قفاهم, مين عارف, يمكن كنا احتجنالهم؟.
مش بس دول اللى خدوا على قفاهم, لا, دا كمان أعيان مصر وباكوتها وبشاوتها وكل من عنده حاجة تقول عليه غنى, حتى لو مصنع أو أرض فاتحة بيوت بنى آدمين, وقالوا على كل دول ظلمة ومفترين, ودى ثورة عمال وفلاحين, واحنا شعب عنده كرامة ودين.

تفتكرى لو بصيتى فى مصر بس حواليكى دلوقتى, وعرفتى ان الكلام اللى علمهولنا ده كله كدب وتزوير, هاتعملى إيه؟ وهاتروحى لمين؟

ياريت نفهم ان الحياه مش بس مستعمر وعدو وخاين وعميل, ولا مسلم ومسيحى وشيعى وبيعبد عزرائيل, ولا عربى واسرائيلى وغربى وشرقى, ولا اسود وابيض وصغير وكبير ... الحياه تواصل مع الغير ومصلحة مشتركة بين الطبيعة والبنى آدمين, ولو كافحنا ضد الفساد والظلم, لازم الأول نكون إحنا مش فاسدين.
فهمتى دلوقتى سؤالى الأولانى: اللى وشه زى قفاه, أعمل فيه إيه انا بقى؟ :)

إنتى طبعا صيدلانية .. على عينى وراسى, لكنى أنصح بكباية لامونادة بعد أى تعليق من تعليقاتى بالإضاف إلى حباية روآن-سين, وبكدة نبقى خالصين. :)

بايات كتيرات وإلى اللقائات

ندى الياسمين يقول...

ايه يا بت المباديء الميكيافيليه دي

هههههههههههههه

بصي انا ما باقولش العباره دي الا لو كان حد مضطره اتعامل معاه وهو حد رخم ومش طايقاه
اقوم اسيب علاقتى به اوبن لا هى وثيقه وهي قطيعه

اما فى حال الاشخاص العاديين الى هو يعنى مش مضايقه منهم

فحقيقى انا مؤمنه بان معرفة الناس الكويسه كنوز بصرف النظر عن كون هاحتاجله يوما او لا

يعنى ايه المانع يكون معايا تليفونات الدنيا كلها وعلاقتي بكل من صادفنى فى الحياه كويسه

انتى فين يا بت انتى
وحشااااااني

فاتيما يقول...

نظراً لأن المدونة بتاعتى بترخم
و البوستات الجديدة
مبتطلعش ف الريدر
فلو سمحت تقرى البوست دا
و لو تقدر تساعد متتاخرش
و شكرااااا مقدما
من قلبى

http://nonoymm.blogspot.com/2010/06/blog-post_16.html

أحــوال الهـوي يقول...

اول زيارة لحضرتك

كلام جميل و كلام و معقول
بس الاسقاطات جبار
بواقي شامبو و مسترده
و بعدين وش و قفا
انا لاحظت ان الكل جاتله حساسيه
من الموضوع
بس لاننا نقابة واحده لازم اعملك تدعيم

و دايما يكون الواحد بيتعامل مع الناس بحياديه
مش حب و كره

تحياتي

Sharm يقول...

يا سلام ؟؟
انا اعلق و تعليقي يتاخد اسم الموضوع و جملة فيه كمان !! طب حتى قولي ان شارم هو اللى فكرك بالجملة دي ..

اخر مرة اعلق هنا !

خواطر شابة يقول...

كلامك حكم والله والربط اللي عملتيه خلى المعنى يوصل واضح ونحس بيه
تحياتي وودي

صيدلانيه طالعه نازله يقول...

blue-wave

يارب سامحه مش انا اللى قلت ده هو اللى بيقول

صيدلانيه طالعه نازله يقول...

فاتيما

لا يا تيما مش عادتك
اول مره تفهمينى غلط
انا مش قصدى حد بعينه
انا بتكلم فى العموم ياحبيبتى
و بعدين انتى فى رأيك فيه حد ميعوزش وشى
ده كلام برضه تقوليه يا طماطم و انتى اللى عمرك ما العيبه تطلع منك

منورانى يا قمر

صيدلانيه طالعه نازله يقول...

samy

كويس انك من الناس اللى مش بتحب تخسر حد و مش بتتعامل على اساس المصلحه و بس
و ياريت الناس كلها تبقى كده

منورنى

صيدلانيه طالعه نازله يقول...

richardCatheart

اهلا اهلا
فينك يا هانم مختفيه ليه
و لا هو كل اللى يعمل مدونه يتقل على الناس كده
فعلا يا قمر هيا حكايه ود و علاقات انسانيه
بس فعلا فيه ناس بتتعامل على اساس مصلحى بحت
للاسف الدنيا فعلا فيها و فيها

منورانى
و اسفه انى مش باجى عندك كتير
لان الدنيا زحمه قوى عندى اليومين دول

صيدلانيه طالعه نازله يقول...

sharm

البوست من الاول عنوانه كده
يعنى مخدتوش من تعليقك و لا حاجه

منورنى

صيدلانيه طالعه نازله يقول...

زهــــراء

انا زيك بافضل ادور و اسأل و اشوف الناس فين
بس حتى بعد ما بزهق منهم مبيجيليش قلب امسح نمر حد
ده طبع و صعب يتغير
انا كده و على فكره ده بيجى على اعصابى قوى


منورانى

صيدلانيه طالعه نازله يقول...

MR.PRESIDENT

ماشى لو طلع خسيس مفيش مشكله يستاهل
بس لو شخص كويس ليه ننساه و نحذفه طالما مصلحته خلصت معانا دى بقى تبقى خسه مننا احنا

منورنى

صيدلانيه طالعه نازله يقول...

ضكـــــتور جدا

شرفتنى بزيارتك
و كويس ان الكلام متوافق مع افكارك

منورنى

صيدلانيه طالعه نازله يقول...

حاجات جوايا

سالى ازيك يا قمر
فينك من زمان
وحشتنى تعليقاتك و كلامك الحلو
انتى زيى بقى بتحتفظى بالنمر و بذكرياتك مع الاشخاص
و ده شيىء جميل

بس بالنسبه للشامبو متقلقيش المسابقه جايه جايه و حلمهم منكم و اخد انا الجايزه
ندله قوى انا فى الحاجات دى

متغيبيش تانى بقى

منورانى

صيدلانيه طالعه نازله يقول...

adel

هو انت كده على طول هزار يا عادل
مفيش عندك جد خالص

ياريت تبقى لينا فايده زى الشامبو مش بينفع برضه
بينفع و لا لاء

فين المثاثات مجتش ليه
ده اخر تحذير

منورنى

صيدلانيه طالعه نازله يقول...

الزهرة البرية

و الله يا جودى مش عارفه اقولك ايه
الدكتور عنده مدونه روحى كسريها و ارتاحى و ريحينا معاكى

و فعلا يا قمر ساعات بنتعرف على ناس لوقت قصير بس بيسيبوا فينا اثر و حتى لما بنبعد بنحاول نتواصل معاهم دايما
حتى لو خلصت مصلحتنا

منورانى

صيدلانيه طالعه نازله يقول...

لـــولا وزهـــراء

لولا
انتى اكتر حد فهمنى و فهم قصدى من اللى كتبته

هو ده اللى كنت عايزه اقوله بالضبط

منورانى يا سكر

صيدلانيه طالعه نازله يقول...

Mark Hogan


ياريت نفهم ان الحياه مش بس مستعمر

وعدو وخاين وعميل, ولا مسلم ومسيحى وشيعى وبيعبد عزرائيل, ولا عربى واسرائيلى وغربى وشرقى, ولا اسود وابيض وصغير وكبير ... الحياه تواصل مع الغير ومصلحة مشتركة بين الطبيعة والبنى آدمين, ولو كافحنا ضد الفساد والظلم, لازم الأول نكون إحنا مش فاسدين.


الكلام جميل قوى
فعلا عشان نتواصل لازم نصفى نفوسنا و نضفها من جواها

منورنى و تحياتى لنهر الدانوب

صيدلانيه طالعه نازله يقول...

ندى الياسمين

برضه يا ندى انتى زيى مبتحبيش تخسرى حد
و بتراعى الناس كلها
و ده مش غريب عليكى يا قمر

انتى كمان واحشانى مووووووووووت
بس ده عيب الاجازه
مش المدارس كانت احسن برضه؟

منورانى

صيدلانيه طالعه نازله يقول...

فاتيما

علم و ينفذ يا تيما

صيدلانيه طالعه نازله يقول...

أحــوال الهـوي

منورنى يا زميل النقابه
و فعلا مش كل اللى قرا الموضوع فهمه صح

و انت كلامك فعلا صح

نورتنى يا دكتور

صيدلانيه طالعه نازله يقول...

خواطر شابة

عارفه يا نجوى
كل ما امسك قزازه شامبو فى اخرها و اجى ارميها
تيجى فى دماغى الفكره دى
و كنت عايزه اركز بس عشان اوصلها صح و الحمد لله
وصلت و مبسوطه انها عجبتك و فهمتينى

منورانى دايما

مهموهـــــــة يقول...

حبيبة قلبي يا لولة يا غالية
واحشاني واحشاني واحشاني واحشاني اوي اوي اوي اوي يا روحي
بجد انا مقصرة معاكي اوي اوي اوي
بس اتمنى تعذريني يا قلبي

ربنا يخليكي ويسعدك يا رب و يهنيكي دايما

خالص حبي وتقديري واشواقي

صيدلانيه طالعه نازله يقول...

مهموهـــــــة

و انتى كمان يا سكر واحشانى مووووووووووت

اخبار شغلك الجديد ايه
يارب تكونى مبسوطه

momken يقول...

بصى انا شخصيا مبحبش الكراكيب وبعتبر الحجات الى خلصت كراكيب

وبتزحم الدنيا

كمان الارقام الى محتجنهاش لفتره طويله
ولا اصحبها بيتصلوا بيزحموا التلفون مع اننا مش شيلنهم على راسنا بس برضو عملين زحمه


حتى الناس

فى ناس مالهمش اى لزمه مع انهم شغلين حيز من الفراغ انا بفضل اتخلص منهم

ده بتكون الحياه اروق

انتى ايه مسمعتين اعلان جرافينا بتاع زمان
امسك تخلص من حمامك القديم

وبعديم خالى بتوع البكيا ياكلوا عيش




تحياتى

أم الخــلـود يقول...

جزاك الله خير الجزاء ..



أرجوا المساهمة في دعم الحملة لو تكرمتم

(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي أعقل مجنونة في الوجود .. ويكتبون فوقها ..

(حملة الجـسد الواحـد)

رابط المدونة

http://dndanh111.blogspot.com/2010/06/blog-post_14.html

جعله الله في ميزان حسانتكم .. آمين

mrmr يقول...

اللى ما تحتجش وشه انهارده بكره تحتاج لقفاه
ده مثل شائع جدا من زماااان

انا عن نفسى احب اعيش بمحبه هى الطريقه الوحيده اللى الانسان يتعامل بيها مش علشان محتاجه اليه اوده واحترمه والجى اليه

reem يقول...

توتة

الاول انا فضلت اضحك على موضوع الشامبو دا اوى يا لولا

اتكلم بجد بئا

انا شايفه ان في ناس بجد يا علا بنعرفهم وفعلا مش بيكون لهم لازمة من اول معرفتنا بيهم مش بيكونو مؤثرين خالص ولا بسيبو بصمة ودول الحقيقة مش بنحتاج وشهم ولا قفاهم اكيد لانهم اصلا بيتنسو ولو حتى فضلت ارقامهم وعنوانيهم معانا مش بنبص عليها

وفي ناس تانية مهما بعدنا بيفضلو في قلبي وذاكرتى وارقامهم في موبايلى حتى لو عارفه انى مش هاشوفهم ولا هاحتاج منهم حاجة

تصبحى على خير ياتوتة

ELMOSTAFZ يقول...

تصدقي واحد صاحبي قالي كده من سنتين و مفهمتش قصده ايه ، يعني المعفن عارفني عشان احتمال ورود المصلحة ، نهاره مش فايت....

Single Mummy يقول...

عزيزتى
كلامك مظبوط واللة وف الجون
بس سؤال لو قزازة كاتشب اعمل معاها كدة برضو؟؟
تحياتى وقبلاتى

Foxology يقول...

كلامك مظبوط يا دكتورة والله واسوأ حاجة اننا نتعامل مع الناس وقت المصلحة واول لما تخلص ننسى الناس دى تماما كأننا مشوفناش حد منهم ولا نعرفه

شكرا على الموضوع المهم

همس الاحباب يقول...

متفق مع وجهة نظرك جدا
فعلا الدنيا مش مجرد مصالح وبعدين معرفة الناس كنوز
اه الدنيا بتاخدنا وتنسينا حاجات كتير
بس بتيجى علينا لحظات نسترجع حاجات من زمن بعيد
تحياتى

أبو حميد يقول...

فعلا اللى ماتحتجش وشه بكره تحتاج لقفاه
والقفه ده شىء مهم جدا للإنسان وبيستحمل كتير اليومين دول

حلو الموضوع يا دكتورة

maxbeta3zaman يقول...

لماذا يحتل القفا هذه المساحة عندك ؟
انا برضه لما لقيت دعوات عماله تجينى ان اضم ناس على قائمة الفيس بوك بتاعتى - رغم اننى ماليش فيس بوك - قلت لهم لا.. انا عاوز اعمل نظام تانى اسمه "القفا بوك" أى كتاب القفيان بالعربى حيث يضع المشتركين معايا صورهم وهم قاعدين على كرسى الحلاق ...قوم ماحدش يعاكس حد
فهى دعوة.. اظنها ستلقى رواجا ولو بعد حين

فتاه من الصعيد يقول...

ههههههههه

انا بضحك على كومنت د. عمرو :))))

اكيد بنحتاج للناس دايما ... بس الاهم انه مايكنش ده اساس علاقتنا ببعض :)..

تحياتي

اقصوصه يقول...

فعلا معاج حق

انا معاج بهالكلام

وعن نفسي اؤمن بهالمبدأ

صيدلانيه طالعه نازله يقول...

momken

انت ايه حكايتك بقى
المره اللى فاتت متعاطف مع المخدماتى و المره دى مع بتاع البيكيا
انت ايه ظروفك بالضبط

ارقام ايه بقى اللى بتزحم التليفون؟؟
على اساس ان الارقام ليها وزن و كده يعنى
كمان مين قال ان فيه بشر مالهاش لازمه و شاغله حيز من الفراغ و بس!!!!

مفيش حاجه و لا حد فى الدنيا الا و ليه لازمه و ليه فايده و سبب و لا مكنش ربنا جابه الدنيا و سابه فيها

المره دى اختلفنا
عادى ماهو مش كل مره حنتفق يعنى
بالنسبه للحمام القديم حاضر حنسفه و اهو ننفع بتوع السيراميك
ايه تعرف حد فيهم هما كمان؟؟؟

منورنى:)))

صيدلانيه طالعه نازله يقول...

أم الخــلـود

ربنا يخليكى

و نورتينى

صيدلانيه طالعه نازله يقول...

mrmr

بالضبط يا مرمر الحب و الود لازم يكون دستور حياتنا

منورانى يا سوهاجيه يا قمر

صيدلانيه طالعه نازله يقول...

reem

دايما رأيك بيعجبنلى يا قمرايا
بس يا ترى انا من انهى مجموعه فيهم
وش بيغمز

منورانى

صيدلانيه طالعه نازله يقول...

ELMOSTAFZ

و بكده نكون احنا هدينا النفوس خااااالص
بينك و بين صاحبك

منورنى

سمكه واحده يقول...

ده انا عندي اصحاب من ايام الابتدائي وارقام تليفوناتهم كمان برغم ان زمان اتنسيت وانا كمان مش فاكراهم بس والله موجوده ولا عمري فكرت اتصل طبعا مينفعش لان كل العلاقات انقطت بس تسأليني محتفظه بيها ليه
اقلك بحب احتفظ بذكرياتي وعمري وناس كتير كل فتره تطفو علي الذاكره افتكر ليهم موقف او حاجه حصلت الاقيني ممكن ابتسم وانا قاعده لوحدي
اي انسان يمر في حياتك لازم واكيد هتستفادي منه وهتتعلمي حاجه جديده ولو بسيطه ولو انتي متعلمتيش او استفدتي اكيد هو هيكون اتعلم وفي تلك الحالتين بتوجد الاستفاده
وليه لاء محدش عارف بكره في ايه
لازم الباب يفضل موارب متقفليش الباب خالص
محدش عارف الزمن مخبي ايه
كل خير ان شاء الله
بس الحجات دي تعتبر ذكريات وحياه كامله ولو حد وحش اكيد عمل حاجه كويسه نفتكر الحلو ونحتفظ بيه يمكن نحتاج ليه
سيبك انتي
انتي اخبارك ايه عليكي شويه افكار انما ايه تحفه
تحياتي

صيدلانيه طالعه نازله يقول...

Single Mummy

كلامى طول عمره فى الجوووون
تأثرا بكاس العالم طبعا
ههههههههههههههه
الكاتشاب بقى اكفى القزازه على فمها يطلع الكاتشاب منها
هههههههههههههههه


منوراااانى

صيدلانيه طالعه نازله يقول...

Foxology

طبعا اسوأ حاجه نظام المصلحاتى ده و انا بصراحه مبكرهش قد الاسلوب ده


منورنى

صيدلانيه طالعه نازله يقول...

همس الاحباب

ايوووووه
انت جبت التايهه
معرفه الناس كنوووووز

منورنى يا ابوهمس

صيدلانيه طالعه نازله يقول...

أبو حميد

يووووووووووه
انت حتقولى على قيمه القفا و فايدته فى حياه الانسان
ادخل اى قسم شرطه و انت تعرف فايدته ايه و بيستعمل فى ايييييييه بالضبط


منورنى و ابقى كتر الورد

صيدلانيه طالعه نازله يقول...

maxbeta3zaman

القفا بوك
ممممممممممممم
و ده يبقى المنافس العربى للفيس بوك الامريكى
و طبعا العرب خير من يقصون اقاصيص و حواديت عن القفا و تأثيره فى حياه الشعوب

صيدلانيه طالعه نازله يقول...

فتاه من الصعيد

يااااادى عمرو اللى مجرسنا وسط الناس
ههههههههههههه

منورانى

صيدلانيه طالعه نازله يقول...

اقصوصه

اذن انت من المؤيدين لى و لحكومتى
ههههههههههههههه

منورانى

صيدلانيه طالعه نازله يقول...

سمكه واحده

انتى زيى ذكرياتك و حياتك القديمه مهمه عندك قوى و بتحبيها و بتحبى الناس اللى شاركوكى فيها حتى لو كنتوا اتفرقتوا و بعدتوا

انتى بقى اخبارك ايه
طمنينى عليكى كنتى قافله المدونه ليه كام يوم
كمان انا سيبتلك رساله فى الفيس بوك و انتى مش رديتى عليها

منورانى يا قمرايه
و متغيبيش عننا تانى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .