الثلاثاء، مايو 04، 2010

يا ترى حترمى ايه؟؟؟





يوم الخميس اللى فات اتقدمت الساعه حسب التوقيت الصيفى 


ساعه بحالها

و بكده يبقى ضاعت مننا و من عمرنا ساعه كامله للاسف مش 


حترجع تانى

يدخل حد لمض انا عارفاه كويس و يقوللى عاااااااااااادى يا ما 


ضيعنا و حنضيع

اقوله انا بقى لااااااااااااا يا سى لمض تفرق قوى

اما احنا نضيع بمزاجنا مااااااااااشى لكن الساعه تتسرق مننا 


عينى عينك كده

اهو ده اللى لا يونكن ابداااااااااااااااااااا

الساعه دى كان ممكن لو شويه ستات مع بعضها كانوا نقوا فيها 


رز للصبح

و لو شويه رجاله كانوا قضوها شيشه تفاح فى القهوه و رجعوا 


بيوتهم اخر مزاااااااااااج

و لو شويه عيال كانوا طحنوا بعض فى البلايستيشن و بلاها مذاكره و قرف

بذمتكم مش الساعه دى ضاعت من غير فايده اهو

انا بقى بعد الساعه دى ما اتحذفت من عمرنا فكرت فى فكره كده

يا ترى حد منكم وقت الساعه دى ما ضاعت من عمره فكر كده و 


قال

ياترى ايه اللى نفسى احذفه من حياتى و يروح مع الساعه اللى 


راحت

اكيد كلنا عندنا حاجات مضايقانا من نفسنا قوى

عيوب.........عادات سيئه.............مشاكل

حاجات و حاجات وحاجات

لو تخيلنا ان عندنا باسكت كبير و حنرمى فيه حاجه من عندنا

من جوانا يعنى

يا ترى يا هل ترى حتكون ايه؟؟؟و ليه؟؟؟

انا حبدأ بنفسى

انا اول حاجه حرميها و بسرعه صراحتى الزايده عن الحد

اللى الباشا جوزى بيسميها هبل و عبط

و بصراحه ساعات كتير بوافقه على كلامه

بس برضه مش بقدر ابطل الصراحه دى

ياترى انتوا بقى حترموا ايه فى الباسكت؟؟؟؟؟؟؟؟؟؟؟؟؟؟

هناك 82 تعليقًا:

رحله البحث يقول...

حلو البوست اوى يا دكتور
وجاى فى وقته
انا هارمى صراحتى الى حد الوقاحه
وهارمى التردد والقلق
وهارمى افتراض حسن النيه طول الخط
وبعد كده ممكن ارمى نفسى بقى من البلكونه
تحباتى
وبجد بوست رائع

آيوشة يقول...

يووووو دانا بقى هروحى حاجات كتير جدا
والتشاؤم واليأس والاحباط وهرمى النضارة وارمى الموبايل والكمبيوتر
ومش بعيد ارمى نفسى فى النيل ساعتها لو ربنا كتب لى عمر جديد هقدر كل لحظة ضاعت من حياتى فى كلام فارغ

صيدلانيه طالعه نازله يقول...

رحله البحث

انت تبعى فى فريق الصراحه

الموضوع ده متعب قوى فعلا

بس التردد و القلق لازم يترموا فعلا

و بعدين ما نرمى البلكونه احسن بدل ما ترمى نفسك منها

هههههههههههههههه

منورنى

صيدلانيه طالعه نازله يقول...

آيوشة

انتى اول واحده المفروض ترمى التشاؤم
و لو مكنتيش رمتيه كنت رمتهولك انا

الموبايل و الكمبيوتر هاتيهم اشوفلك فيهم بيعه كويسه

انتى اولى بتمنه برضه

منورانى يا قمر

ماما أمولة يقول...

بوست هايل بجد

أقولك أنا أرمي إيه ولا بلاش

أنا عايزة أرمي الطيبة وحسن النية

نفسي ابقى قاسية ومش بعرف

تفتكري الباسكت هايكفي طيبتي ولا نستورد من الصين

هههههههههههههههه

تسلمي حبيبتي يارب
دمت بود

صيدلانيه طالعه نازله يقول...

ماما أمولة

كلامك مليان طيبه و رقه و حنيه
زياده عن الحد
بس عايزه ترميهم ليه
خليهم معاكى ينفعوا ولادك
ينفعوا حد محروم حنان تكونى انتى حضن دافى ليه

اللى ربنا يديله نعمه و يرميها ده اسمه بطر

و اموله حبيبتى عمرها ما كانت كده

منورانى

MR.PRESIDENT يقول...

أمنيتي أرمي الكسل ..
انا بكسل افتح الباب ..
بكسل انام عشان شوية النت بيكون حلو بعد الفجر ..
بس الساعة يا دكتور ما ضعتش .. ولا حاجة .. هي حاجة عمله زي مثال .. لو انتي صحيتي في يوم ولقتي حجمك الصيدلية كبرت بنفس نسبة الحجم مثلا للحقنة بنفس نسبة العربية مش هتحسي ان فيه حاجة اتغيرت ..
عيب تغير الساعة ميزة ليا لان سعاة النوم قلت رغم ان الليل بيطول في الصيف ..
انا شكلي بهلوس ..
المهم
انا هرمي اي حد مش طايقني ....... من الدور الخامس ,,,
بوستك فيه مشاعر حلوووووو وخصوصا الردود

ahmed_k يقول...

فعلا ضياع ساعه من العمر أمر محزن جدا
ده لو كانت ضاعت
فالعمر لا يقاس بعقارب الساعه بل بأنفاسنا ودقات قلوبنا التي لا تقدم أو تأخر بقرار حكومي
ولو كان بإمكاني ان القي من ساعات عمري فسأجد انني بحاجه لسلال وسلال للقي فيها اشياء ربما لم تعود علي بالنفع
ولكن أكبر شيئ سألقيه ثقة زائده أوليتها يوما لشخص وخان تلك الثقه
ولم يكن كما كنت ارجوه فيه

تقبلي تحياتي يا دكتوره

أسمعنى شكراَ يقول...

موضوع جميل جدا

أنا عايز أرمى حاجة ممكن

غباوتى

سبهللة يقول...

يعنى هى جت على الساعة دى اللى اتسرقت مننا
ما كل حاجة مسروقة مننا يا لولا

وحشتييييينى اوى اوى

محمد فؤاد (صاحب عمود النور) يقول...

نفسى ارمى الحاجات اللى اكتسبتها من الحياه واللى خلتنى دايما باخد كل حاجه على اعصابى
نفسى اريح اعصابى وابقى اهدى من كدا بكتيييييير

لولا وزهراء يقول...

علا
قبل ما اقولك هارمى اوعى اكون انا العيل اللمض اللى بتلحقى عليه الكلام

هارمى ذكريات سيئه لو افتكرتها ممكن تدمرنى
انتى عارفه كنت عاوزه ارمى صراحتى بس قولت بلاش خلينا احنا اصدقاء انا وهى
ممكن ارمى دموعى لانها قريبه اوى وممكن تنزل على اى حاجه واى حد

حلو الموضوع فلسفى كده
باقولك يا دكتوره هو انتى كنتى ادبى ممكن برضه صح

زهراء

sony2000 يقول...

ياااااااااااه دا انا هرمي حجات
الصراحه فعلا,القلق,حب اللي حوليا بذياده اكتر من نفسي جداااااااا,وهرمي حسن النيه,وحجات تانيه وانا وراهم:)

ميرا ( وومن ) يقول...

سؤال مهم جداً شوفي بقي انا مش هانقي انا هامري دماغي كلها كدة شروة واحدة وحلال علي اللي هايخدها

بصراحة انا دماغي دي تعبتني قوي وانا ماشية عكس الإتجاه كدة

وخلاص بقي اعصابي مش مستحملة بجد انا لا عارفة اعيش مرتاحة و أريح اللي حواليا

زهق مني قوي علي فكرة

أبو حميد يقول...

إزيك يا دكتورة.. سلميلى على دكتور أشرف
أنا أول حاجة حرميها لو ينفع 15 كيلو زيادة من وزنى وأرجع خفيف زى زماااااان وبعد كده وأنا مروح على طول أجرى أشترى...
...
...
...
بوكيه ورد
نياهاهاهاهاهاها

مهموهـــــــة يقول...

اذا كان عليا انا فانا نفسي ارمي حاجات كتيرة اوي
يمكن حتى الباسكت ما يكفيش
ههههههههههههههههه

نفسي ارمي صراحتي فعلا بردو
نفسي ارمي عصبيتي لاني بتعصب بسرعة
اي حاجة و لو قد النملة ممكن تنرفزني بسرعة

ارمي حبي الزيادة للناس اللي ما بلاقيش منهم مقابل من الحب ده

ارمي ايه و لا ايه بس ؟؟؟
قلبي وجعني و الله من التفكير

بوست جميل اوي يا لولة يا عسولة

دمتي متالقة و متميزة بمواضيعك الجميلة

خالص حبي و تقديري

فاتيما يقول...

يا لهوتينى يا لولاّ

ايه السؤال المرعب دا
ع الصبح يا ست انتى


لاااااااااا
من ناحية ارمى ايه
دنا عاوزة مكب نفايات بحاله يا امى

حلوة مكب دى ؟؟

انا بقيت برطن بالنحوى
كتير الايام دى معرفش ليه ؟؟

غالبا أعراض شيخوخة مبكرة

المهم

هرمى ايه؟؟

بصى هوه طباع عاملالى مشاكل
مظنش هرميها
لأنها جزء من شخصيتى الحالية
و نوعا ما انا مبسوطة بيها كدا
يعنى لو قولت عاوزة ارمى حسن الظن الدااااائم بالناس و ابقى واعية كدا و حريصة ...
طبعا دا صح ..و جدا



بس مقابل ذلك هتغير
و ابقى فاتيما تانية
غير اللى أعرفها
و حبيتها
و ما صدقت تفاهمت معها
و بقينا تمام قوى
و الحمدلله


قوم ارمى دا ليه على طول دراعى
و ارجع من اول و جديد
الخبط كيانى ؟؟؟



قيسى كدا على كل الصفات اللى ممكن متكونش حلوة قوى فيا
بس كلها مع الكويس ..
بيكونوا البنى آدمة دى ..
هذا بالنوسبة للطبع و الأخلاق



اما بقى عن الاحداث
فيالهوووووووووووووووووووووووووووووتى

خدى عندك


عاوزة ارمى يوم فى طفولتى المشردة
و طبعا يوم جوزاى يا امى
و يوم كتب الكتاب من قبله
يوم ما مضيت الورقة المشئومة دى
و الورقة التانية ام 95 زفت
و يوم ما فسخت خطوبتى الاولانية
و يوم تانى برضو انتى عارفه يا لولاّ
و يوم ما خرجت من بيتى انا و يوسف و مرجعناش غير بعد ست سنين
و أكيد سيد هذه الأيام هوه
يوم يوسف ما خرج من حضنى
و مرجعلوش

هييييه
ايام كتيييييييييير يا لهوى
هقول ايه و لا إيه ؟؟

ليه البوستات الصعبة دى
اللى بتقلب المواجع ع الصبح بس



كله م التوقيت الصيفى
و توابعه و اللى عامله فينا
اللهى يخرب بيوتهم
و البيوت اللى جنب بيوتهم
هه



بحبك
و بوسات و حضونات

قوليلى صحيح
سيف خلص و لا لسه ؟؟
و بوسيلى شادن
و خلى الغزالون تبوسك نيابة عنى

ويكا يقول...

يا دكتور

اوعى تنسى ان حكومتن العادله والحقانيه واللى ما تضيعشى لا وقتنا ولا اعصابنا فى اى شئ ، بترجعهالنا تانى بعدين فى نفس السنه برده.

يعنى تقدرى تقولى هما بيخدوها يحوشوهالنا كده شويه وبعد كده يرجعوها تانى فى الشتاء.

زى الفلوس ، والدخل القومى ، واللى مش قومى .... وكل الكلام ده ، برده هما بيحوشوهولنا ، بس الناس هيه اللى مستعجله ومش قادره تفهم الحكومه.

بس هو الموضوع طول بس شويه ، والرصيد تقل وبقى الريس الله (يعينه) مش قادر يشيل الامانه دى كلها ، راخر الراجل بدأ يتعب اهه .


عموما.

اوعى ترمى حاجه ، لان اللى فات ده كله هو الدكتوره علا اللى جايه.

تحياتى

ودمتى بخير.

richardCatheart يقول...

صباح الفل ياجميل حلو اللعبه دى

ههههههههههه
ياخرااااابى ماتتصوريش بكره حركه تغير الساعه دى اد ايه
وبدعى على المش مهندس اللى عملها
ماعرفش ايه الافتكاسات دى والله
بس اهى جت بفايده وهاينفع نرمى فيها حاجه


ياعنى لو ماقررتش ارمى نفسى بذات نفسها

هارمى عصبيتى وابقى بااااااااااارده

وحمقتى اصل اختك حمقيه اوى وابطل دمى الحماى

لانى اكتشفت مع الوقت انه مهما عملت مافيش فايده
وانا بس اللى بتعب طيب على ايه

هرمى الناس اللى وجعونى وتعبونى

هارمى لخظه وفاه ابويا الله يرحمه

واحاول ارمى حته من لسانى الطويل
ولاونه بينفعنى فى اوقات كتير هههههههههه
ممكن افكر فيه دا لالالا خليه ينفع

تسلمى يالالا على البوست

samy يقول...

بوست جميل وجديد

انا بقى ابتديت ارمى
بس من قبل الساعة بكام يوم

شكرا على البوست الجميل

هبة الحياة يقول...

السلام عليكم
ازيك يا دكتوره عامله ايه؟ ليكي وحشه والله
انا الحمد لله زاي الفل شمعه منوره

عن نفسي انا هارمي في الساعه دي احساسي اتجاه عبد الفتاح الي عمال يزيد والطيبه الزياده عن اللزوم الي جوايه الي بتخليني اصدق اي حد ومش بقدر اميز بين الكذاب والصادق وهارمي كل ذكري وحشه في حياتي

فتاه من الصعيد يقول...

هرمي كل البشر اللي تعبوني في حياتي في الزباله وهولع فيهم

اه انا غلاويه وقلبي اسود ...موش طيبه زيك :)

عموما الساعه هترجعلك تاني في رمضان ماتخافيش

هما صحيح هيخدوها تاني على العيد...لكن هيرجعوهالك تاني برضو

شفتي الفزوره

تحياتي

د.أحمد عثمان يقول...

بصراحة يا دكتورة
لو ينفع ألم القمامة اللي ملت القاهرة
( المادية )
و كذلك المعنوية اللي تمثلت في الألفاظ البذيئة

يبقى حققت حلم من احلام حياتي

عايزين نفكر نضيف ايه لحياتنا
لما يرجعوا الساعة المسلوبة مؤقتا
في الشتاء القادم
--------
لك عزومة عندي في البوست
أو للصيادلة بشكل عام
تحياتي

ستيتة حسب الله الحمش يقول...

مش ها ارمي اي شيء خااااااااااااالص

اولا لأني كبرت وها يبقى محض نصب اني اقول ان اللي مضايقني ها اغيره

ثانيا لأني بحبني ومتوافقة معايا وميت فل
وطالما لا أضر فأنا زي الفل

ثالثا اغلب الصفات السيئة من وجهة نظر شخص هي ميزة من وجهة نظر شخص تاني
وانا عادة لا امشي حسب وجهة نظر بني ادم
يبقى انا ايه؟
فلة ياروحي


يعني اللي عاوز يرمي الكسل دي صفة نجتمع كلنا على انها سيئة
اللي عاوز يرمي النميمة والغيبة
مش ها يقدر علشان دي بيئة ولا تتغير بتغير البيئة
اللي عاوز يبطل يأذي جيرانه
ها نقول كلنا دي صفة بشعة

لكن لما حد يقول عاوز ارمي طيبتي
أمال ها تدخل الجنة بإيه
مش ها يدخلها غير الطيبين
ربنا يحشرنا في زمرتهم

هو احنا ها نعمل زي الفنانين
"انا عيبي اني صريحة قوي .. مخلصة قوي .. بريئة قوي .. امينة قوي .. رزق قوي قوي قوي"
بالله عليكي اقول ايه؟
يعني هي دي عيوب؟
ولا عاوزة تقول لنا ملقتوش في الورد عيب قولوا بقى يا احمر الخدين :))

samy يقول...

انا بتفق مع ستيتة جدا

رايها دة صحيح

ومنطقى

شكرا

star in the sky يقول...

هرمى نفسى

صيدلانيه طالعه نازله يقول...

MR.PRESIDENT

كويس الكسل حاجه تستاهل انك ترميها
بس يعنى مش حرام ترمى اللى مش طايقينك من الخامس
دى نفس ما هو الحب مش بالعافيه حضرتك
ههههههههههههههههه

منورنى

صيدلانيه طالعه نازله يقول...

ahmed_k

ولكن أكبر شيئ سألقيه ثقة زائده أوليتها يوما لشخص وخان تلك الثقه

احلى كلام و الله العظيم لو ثقتنا دى حتجرحنا يبقى نرميها احسن

كلام جميل و مش غريب على حضرتك

منورنى

صيدلانيه طالعه نازله يقول...

سمعنى شكراَ

لا اتفضل ارمى براحتك
محدش ماسكك

منورنى

صيدلانيه طالعه نازله يقول...

سبهللة

على رايك و الله
انتى كمان وحشانى جدا و الله

انتى قفلتى المدونه ليه بعد ما بدأتى فى موضوع 30 تدوينه
ياريت تطمنينى عليكى
لانى قلقانه عليكى و الله

صيدلانيه طالعه نازله يقول...

محمد فؤاد (صاحب عمود النور)

و انا كمان عايزه اعمل زيك

لانى بقيت على طول على اعصابى

صيدلانيه طالعه نازله يقول...

لولا وزهراء

لا مش انتى لوحدك العيل اللمض
فيه اتنين تانى معاكى الصراحه و عارفين نفسهم
ترمى صراحتك و دموعك ليه دول هما طيبتك و براءتك

ذكرياتك برضه مينفعش ترميها
انسان من غير ذكريات يبقى مش انسان

خواطر شابة يقول...

بس هي ازاي الساعة ضاعت الزمن اللي بنعيشه هو هو لم يتغير التغيير في دماغنا بس يعني حسابنا للوقت هو اللي اتغير اما الزمن فثابث
بس لو انا فكرت ارمي حأرمي كلمة سوف اللي مجناني عشان لما اقرر اعمل حاجة اعملها فعلا
دمت بكل الود دكتورة

قلم رصاص يقول...

انا مش هرمي الصراحه رغم انها تعباني شويه مع الاخرين .. لكن دي مبادئ والمبادي لايونكن تتجزأ

انا بقى هرمي بدون تردد ، الحساسيه المفرطه .. والتسرع في إصدار الأحكام

بصراحه الحاجتين دول عاوز أحذفهم بشفت ديليت .. ف الشارع يعني ههههه

بجد البوست ممتاز

احييكي عليه يادكتوره

تقبلي مروري وتحيتي

بوبو يقول...

وحشتيني يا لولي.. اعمل ايه انا دلوقتي؟ يعني لما تدخلي قلبي وتشاغليني كدة مش عيب؟ الست الوالدة عندكم في الصعيد الجواني اليومين دول.. اتجنن في عقلي واتحجج قال ايه وحشتني واطب عليكي يعني ولا اعمل ايه؟
السؤال الصعب اللي بتقوليه دا بيقلب المواجع صحيح.. انا مثلا عاوزة ارمي في الباسكت دي المديرة بتاعتي.. ايوة انتي قريتي صح.. ارمي المديرة نفسها كلها على بعضها.. ومعاها الناظر ورئيس القسم وكام مدرس على مدرسة كدة.. ايه رايك؟ واضح طبعا ان حبايبي كتييييييييير في الشغل.. وهرمي كمان كل لحظة عدت عليا قبل وليد لان كلها كانت لحظات وجع وبعده معرفتش الوجع.. اااااااااااه.. ما علينا يا ستي
بوسيلي شادن وسيف

صيدلانيه طالعه نازله يقول...

sony2000

انتى شبهى كتير
صراحه و حب زياده للى حواليكى
تعالى جنبى تعالى

صيدلانيه طالعه نازله يقول...

ميرا ( وومن ) يقول

انتى اللى عامله فى نفسك كده
و مش بترضى تريحى نفسك

يبقى تستاهلى التعب
اللى يعرف تعبه من ايه يعرف يريح نفسه
و لا ايه يا ست مرمر

صيدلانيه طالعه نازله يقول...

أبو حميد

بقى كده بتغيظنى انت بموضوع الورد
و لا يهمنى
اشرف مش حيخطى البيت بقى غير ببوكيه ورد و يوميا
ايه رايك بقى

صيدلانيه طالعه نازله يقول...

مهموهـــــــة

ليه ترمى صراحتك دى حاجه كويسه
عصبيتك ممكن ترميها و ممكن لا

سلامه قلبك من الوجع يا قمر

منورانى

سمع هوص (Abo 3li) يقول...

اولا الساعة دي مرحتش... ابسلوتلي... وش بيطلع لسانه..

لانهم بيرجعوهالنا تاني لما بيرجعو للتوقيت الشتوي... نيهاهاهاها...

بالنوسبة بقي للعاوز ارميه في الباسكت اييييااااه... ممممممممممممممممم....
ممكن ارمي التفاؤل العبيط...

صيدلانيه طالعه نازله يقول...

فاتيما

طباعك لو اتغيرت يا تيما مش حتبقى تيما اللى اعرفها و بحبها
انت على بعضك كده بسلبياتك و ايجابياتك بنحبك و نموت فيكى

بالنسبه للاحداث ارمى براحتك
اللى يزعلك ارميه و اللى يبسطك امسكى فيه
المهم تبقى متصالحه مع نفسك و خلاص

سيف لسه مخلصش
حيخلص 18 مايو
ربنا مع الكل

انتى وحشتينى موت من يوم الجمعه
و لو سمحتى طمنينى فى الميل
و ابعتى لبوبو نمره الموبايل

بوسه بقى
اموووووووووووووه

صيدلانيه طالعه نازله يقول...

ويكا

بيحوشوا اليوم و يستثمروه و لا ايه
يعن اليوم يرجع يوم و نص
طب ماهما كويسين اهم و بيكترولنا الحاجه
احنا بس اللى شعب ميملاش عينه غير التراب

منورنى

صيدلانيه طالعه نازله يقول...

richardCatheart

كل اللى عندك فل يا روحى
اوعى ترمى حاجه و خصوصا لسانك
هو ده اللى بينفع يا امى
خناقه
مناقشه حاميه الوطيس تنتهى بخناقه برضه
هههههههههههههههه
الامر ميسلمش يا اختى

منورانى يا قمر

صيدلانيه طالعه نازله يقول...

samy

رميت ايه بالضبط
وضح و قول
و مش حاقول لحد

منورنى

samy يقول...

لا صدقينى المدونة منورة بصحابها

على العموم انا كان فيا صفات

وحشة واتخلصت منها

ماعدا العصبية

بالرغم اة واللة بالرغم ههههههه


اللى يشفنى هادى جدا


ومتتصورش ابدا انى عصبى

عاوز ابقى بارد مش هادى

عارفين الجو لوحدة يعصب

بس انا هادى هادى هادى

هههههه
ادعولى ارمى العصبية قريب

شكرا

صيدلانيه طالعه نازله يقول...

هبة الحياة

اولا مخاصماكى عشان قولتى جايه الجمعه و مش جيتى

ارمى الذكريات الوحشه بس
لكن الباقى اتفظى بيه لانه بجد كويس و حرام تضيعيه من ايدك

منورانى

صيدلانيه طالعه نازله يقول...

فتاه من الصعيد

فزوره الساعه دى عرفتها يا اوختى بس مفهمتهاش

و بعدين كويس ان فيه حد صعيدى قلبه اسود
مش كلهم هبل زى حالاتى

صيدلانيه طالعه نازله يقول...

د.أحمد عثمان

احلى حاجه انك فكرت للمصلحه العامه
يعنى مش زينا كلنا فكرنا فى نفسنا و بس

و ان شاء الله اشوف البوست بس حضر انت الجاتوه و العصير

صيدلانيه طالعه نازله يقول...

ستيتة حسب الله الحمش

الله عليكى يا ستوتتى
مفيش مره جيتى هنا الا و اتعلمت منك حاجه
كلامك صح و خلانى افكر من اول وجديد و اعيد حساباتى

و فعلا يا اوختى ملقيوش فى الورد حاجه
حاعتبر ان قصدك بالورد عليااااااااااا

و ش احمر و مكسوف
انا و لا لا اعترفى

صيدلانيه طالعه نازله يقول...

samy

و انا كمان متفقه معاها
و مش حارمى حاجه

Wanda يقول...

كل الرمى ده من تغير الساعة
امال لما الساعة هنا اتغيرت محصلش حاجة لية و خصوصا البشرية المرفهة هنا غاوية ترمى نفسها من الشبابيك و المبانى :-)

انت عايزة ترمى صراحتك :-)
انا عايزة ارمى الورق :-)
بجد كان نفسى كده لما اخلص اقف فى الشبالك و اطير اوراق الابحاث الى قراتها و الى حسبت فيها النتايج و مسودات الكتابة

انا لما خلصت الماجستير احتفظت بالورق ده سنة و بعدها قبل ما اسافر رحت قعدت اقطع فيه بكل غل السنين و مليت بيه 3 اكياس زبالة من النوع الكبير :-) تخيلى
كان نفسى اطيرهم بس -- مينفعش ازبل المنطقة بتاعتى لمجرد انى خلصت
:-) ممكن ارمى ادبى ده ؟؟؟؟؟ عايزنى متشردة كده و بلطجية :-)

قلــ"بـــلال"ــــــب فارس يقول...

وانا كمان زيك كده
بس مش زوجى دا امى واصحابى
_________________________-
ارجوا المشاركه فى الصالون الفكرى حضرتك وجميع زوارك الكرام
على مدونتى
http://qalbfars.blogspot.com/2010/05/blog-post.html

momken يقول...

موضوعك جميل جدا يا دكتور

دايما افكارك طازة وجديده لانج

اول حد اصدفه بيكتب فى الحكايه دى

بالنسبه للساعه دى والى ممكن يتعمل فيها ياستى
اعتقد والله اعلم انها بتجيى نص الليل وبيكون الناس خلصوا كل الحجات

واكتر واحد نشيط تلاقيه قام بيظبط سعات الحائط فى بيته
لانه بيكون متغلبط هيقدم ولا هياخر
بمعنى اتناشر نخليها حداشر ولا نخليها واحده

وده غلباً بيكون الفلحوس الى فكل بيت

اما عن الحجات الى هتخلص منها فى اللحظه الكريمه دى
فهتكون كل الحجات الى مكملتها وسيبتها متعلقه نص نص او بين بين زى اخوانا المثقفين ما بيقولوا

لانها ببساطه لو كانت اشياء مهمه اكيد كنت هاهتم انجزها واخلصها بسرعه وفى وقت قياسى
لكن واضح انى ضيعتى وقتى فيها


موضوعاتك جميله وطريقتك فى الكتابه هايله

تتسلم ايدك


تحياتى

صيدلانيه طالعه نازله يقول...

star in the sky

بعد الشر عليكى يا قمر

حنين القلب يقول...

بصى يا ستى
انا هرمى طيبتى اللى ساعات بتقلب لهبل وعصبيتى اللى ساعات بتقلب لجنان
وملوخيتى اللى ساعات بتقلب لبتنجان
هههههههههههههههههه

بوست حلو اوى يا علا

علالالالالالالالالالالالالالالالالالا

هتيجى اسكندريه فى اللقاء الجاى ؟؟؟

NeVeN يقول...

السلام عليكم

حلوة اوى الفكرة
بصى انا هرمى ايه بقا ياستى
اول حاجة هرميها
الوسواس اللى بيخلينى احس ان فى حاجات بتحصل من ورايا
و تانى حاجة
هكتف الوحدة وارميها غصب عنها
وهرمى كمان كل الارقام عشان زهقت منها اوى

واخر حاجة هرميها
ريموت التليفزيون للابد بكل انواعه اللى بنتى مجننانى بيه
وكقاية كدة اوى لانى
لو فكرت شوية كمان مش بعيد ارمى نفسى
:)

صباحك كراميل

صيدلانيه طالعه نازله يقول...

خواطر شابة

انتى عارفه كلمه سوف دى بتخلينا ساعات نكسل اننا نعمل الحاجه اللى عايزين نعملها فعلا
و اكيد الزمن متغيرش
بس فى وقت تغيير الساعه غى ساعه جريت من عمرنا من غير ما نستفيد منها

منورانى

صيدلانيه طالعه نازله يقول...

قلم رصاص

التسرع فى اصدار الاحكام ممكن نرميه
لكن الحساسيه المفرطه احيانا بيبقى ليها فايده ممكن تحتفظ بيها و خليها كده على جنب

مبسوطه ان البوست عجبك
و انى باشوفك هنا كتير

منورنى

صيدلانيه طالعه نازله يقول...

بوبو

انتى كمان دخلتى قلبى من يوم ما اتقابلنا متنسيش خدى نمرتى من فاتيما
فى الايميل
و بعدين ماما تبقى عندنا و متجيش معاها؟؟؟؟؟؟؟؟؟؟تعالى يا امى و من غير حجج قولى لوليد رايحه لعلا

موضوع الرمى بقى
انا من رايى انك ترمى المدرسه كلها باللى فيها و بعدين على رواقه كده
نقى الكويسين و طلعيهم تانى من الباسكت
ههههههههههههههههههههه

وحشتينى
و منورانى

صيدلانيه طالعه نازله يقول...

سمع هوص (Abo 3li)

ايه ده و انا مكنتش اعرف انهم حيرجعوها تانى مش تقول طمنتنى الله يطمنك

مش عارفه من غيرك كنت حاعمل ايه

التفاؤل العبيط ده حاجه حلوه لانه بيخلينا عندنا امل فى بكره حتى لو امل ضعيف
و ده بيدينا حافظ على الحياه و العطاء

منورنى

صيدلانيه طالعه نازله يقول...

samy

و الله لو لسه فيه مكان فى الباسكت ارمى العصبيه
بس لو مفيش
فى كيس كده و ارميها فى اى حته تانيه
هههههههههههههههههههه

منورنى

صيدلانيه طالعه نازله يقول...

Wanda

ارمى يا اختى براحتك
بس خدى بالك بره مش بيهذروا يعنى

ممكن يخدوكى تحرى و يدلعوكى بتهمه تلويث الشوارع

و بعدين عايزه ترمى ادبك و ذوقك ارمى
و تعالى نعمل اللى قلتلك عليه امبارح
ايه رايك

هههههههههههههههههههههه

صيدلانيه طالعه نازله يقول...

قلب

اللى انتى شايفاه صح اعمليه
من غير ما يبقى لحد و عشان حد

منورانى

صيدلانيه طالعه نازله يقول...

momken

حلوه حكايه الفلحوس اللى فى البيت ده
اصله فعلا موجود و ده اللى بيعمله دايما

و فعلا الحاجات اللى دايما بناجلها دى الحاجات اللى مش مهمه قوى عندنا
يبقى فعلا سهل اننا نستغنى عنها

كلامك جميل كالعاده فى كل تعليقاتك

تحياتى

صيدلانيه طالعه نازله يقول...

حنين القلب

اولا منورانى يا قمر
اخبار عمر باشا الصغنون ايه
مطلع عينك اكيد

و بعدين الجنان و عرفناه
لكن ملوخيه تبقى بتنجان
ده الجديد الصراحه مع ان البتنجان مش بيتقرطف و لا يتخرط يا اوختى
ههههههههههههههههههههه

مش عارفه موضوع اسكندريه ده حيبقى ظروفه ايه
يا مسهل انا كده كده حاروح لماما لانها عندكم فى اسكندريه

دعواتك

صيدلانيه طالعه نازله يقول...

NeVeN

انا موافقاكى فى كل اللى بتقوليه
بس اؤيدك و بشده فى موضوع الريموت ده لانى باعانى منه نفس المعاناه فى البيت
هههههههههههههههههههههههه

منورانى

Atef Shahin يقول...

حأرمي العادة اللي مش عارف أتخلص منها : إحترام المواعيد في زمن لايحنرم الوقت
بوست جميل
تحياتي

م/محمود فوزى يقول...

السلام عليكم
ازيك يادكتوره

طبعا الوقت مهم جدا
لكن معلش هاكون لمض اكثر من اللى كلمك
الساعه هاترجع تانى ان شاء الله فى اخر التوقيت الصيفى

الصراحه كويسه طبعا
بس طبعا بيكون احيانا فيه تقدير للموقف
احيانا ممكن تاجيل الكلام فى موضوع معين
فالصراحه محتاجه جنبها شويه حكمه

اما انا هارمى ايه
فانا فعلا عايز ارمى حاجات كثيره
منها فعلا احيانا التسرع فى الحكم على الناس
للاسف احيانا كتير باتغر فى الناس او باتكلم معاهم بحسن نيه زياده عن اللزوم

طبعا انا مش ملاك لانى برضه لما باحاسب نفسي الاقى انى فيه مواقف كنت متهور واحيانا متكبر وكده
وباندم بعد كده
ربنا يسامحنا
ربنا يكرمك ويسعدك

همس الاحباب يقول...

اممممممممم
على الصبح كده رمى وباسكت
بالعند فيكم انا هحتفظ بكل حاجة ومش هرمى حاجة لان الانسان عبارة عن صفات ومواقف منها ما يعجب البعض ومنها ما لا يعجبه فالتنوع سر الوجود والاختلاف نعمة بين البشر
علشان كده خلى كل حاجة فى الصندرة هنحتاجها فى مواقف كثير
يلا هى جاءت على تغيير الساعة عقبال ما كل حاجة تتغير بس للاحسن ان شاء الله
تحياتى

صيدلانيه طالعه نازله يقول...

Atef Shahin

لا طبعا احترام المواعيد عاده جميله حرام تضيعها

منورنى

صيدلانيه طالعه نازله يقول...

م/محمود فوزى

التسرع فى الحكم على الناس بيدل على حد طيب لدرجه تخليه يثق فى ناس متستحقش الثقه و طبعا ده بيسبب مشاكل بعد كده
ربنا يبعدنا عن المشاكل و عن الناس التى لا تستحق الثقه

تحياتى

صيدلانيه طالعه نازله يقول...

همس الاحباب

اللى حتركنه فى الصندره ياريت تاخد بالك منه و تبص عليه كل شويه عشان الفيران مبتسيبش حاجه فى حالها
هههههههههههههههههه

منورنى

Foxology يقول...

الحاجات كتيرة اوى اللى ممكن الواحد يرميها

انا عن نفسى هرمى جورنال الاهرام اللى والدى بيصمم انه يشتريه مع انه مليان كذب وغش وخداع وهو نفسه معترف بكدة :)

تحياتى

ELMOSTAFZ يقول...

ارمي كل اللحظات اللي اتحرجت فيها أو كرهت فيها نفسي....للعلم ربنا خلق في عقلنا باسكت ذاتي ، لو هنلاحظ هنلاقي ان الذكريات السيئة بننساها لا شعوريا مع الوقت و نادرا لو استرجعناها...إنما لو هرمي خصلة من خصالي هرمي الخجل الزائد...
تحياتي...

أع ـقل مـ ج ـنـونــة يقول...

بوووووووووست هايل بجد بجدين تلاتة وفكرة في الجووووووووووووون

انا كان نفسي يضيع مع الساعة دي بقايا قلبي :D

اتمني التواصل دائما ياقمر

حمدى جعوان يقول...

انا هرمى نفسى واخلص خاااااااااااالص

رنا عبد المنعم يقول...

أنا بقى قررت أرمي رنا وأجيب واحده جديده
يلا التغيير حلو برضو :))
وبعدين الساعه دي علشان الحكومه توفر كهربه ... بتعترضي على تصرفات الحكومه !!! أشتكيكي يعني :))
حلو البوست بتاعتك يا صيدلانيه .. ودمو خفيف بجد
تحياتي ليكي

MONTY يقول...

فكره جديده اوى

احييكى عليها ومن حيث ان اننا هنرمى انا عن نفسى عايزه ارمى ناس كده مفيرسه الجو ف حياتى ووالله مالها لازمه
واكيد هرمى شوية عيوووب ومشاااااكل
بس ياريت والله دا يتحقق.


رائع البوست جداااا



دومتى بالخير

باحث عن حب يقول...

انا هرمى نفسى فى الباسك الكبير
ده
بجد
انا تعبت منى ولازم اشترى واحد جديد من السوق
يكون كده على زوئى ولا ايه؟؟

الحب الجميل يقول...
أزال المؤلف هذا التعليق.
عاشقه الرومانسيه يقول...

قلبى ياعلا
هارمى قلبى

غير معرف يقول...

يبدو جيدا ، وأحب قراءة بلوق ، أضفته إلى المفضلة ؛)

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .