الخميس، ديسمبر 17، 2009

الهوانم بقى رأيهم ايه؟؟؟؟؟؟؟؟؟


امبارح و انا باتصفح المدونات لفت نظرى موضوع كاتباه الدكتوره ستيته كان اسمه مذكرات حبيبه زوج

اللى يدخل ياريت يقراه الاول و بعدين يرجع تانى عشان نسأل سؤالنا بقى للهوانم

لو حضرتك و لا حضرتك مشغوله و عندك طموحاتك العلميه و المعمليه المستفزه و طبعا ده كله كان على حساب جوزك

و طبعا هو كان معترض و متذمر على اهمالك ليه و دايما فى خناقات و مشاكل و فجأه لقيتيه اتحول و بقى سعيد و مبسوط

و مقدر تعبك و مجهودك و كبر دماغه على الاخر مع ان الظروف هيه هيه و مفيش حاجه اتغيرت من ناحيتك

طبعا انتى مسكتيش و سألتى و عرفتى انه على علاقه بواحده تانيه و ان الواحده التانيه دى هيا سبب تحوله للاحسن

من ناحيتك و انه فى طريقه للجواز منها مع احتفاظه بيكى عشان العشره ,عشان الولاد المهم انه مصر انك تفضلى معاه

يا ترى رأى حضرتك حيبقى ايه ساعتها؟؟؟؟؟؟؟؟؟؟؟؟؟؟؟؟؟

ياترى حتثورى و تقلبى الدنيا و تهديها على دماغه و دماغها و تقولى انا و من بعدى الطوفان و انى زى الفريك ما احبش شريك

مع العلم ان اهمالك و انانيتك هما اللى ادوا لكده

و لا حتسكتى و تقولى و فيها ايه مادام بقى هادى و مبسوط معايا و الخناقات قلت يبقى يا اهلا بها و مادام قايم

بالبيت و العيال و مطالبنا يبقى مفيش مشكله خااااااااااااااالص

الموضوع ده خاص بالستات اه بس برضه مسموح برأى الرجاله لأن كل وجهات النظر مطلووووووووووووبه

الموضوع بجد عجبنى قوى و كان لازم نشوف كل وجهات النظر و ده المطلوب دلوقتى

هناك 60 تعليقًا:

sookra يقول...

انا بصراحه ممكن فى الاول اثور واغير طبعا لانى ست
لكن بعد كدا هااهدى وافكر بعقلى ومادام انا هارتاح وهو كمان يبقى ايه المانع
المهم انها موش تعيش معايا
ويقدر يعدل بينا وانا كدا اقدر احقق طموحاتى
مسكى شيكولاته

sookra يقول...

انا اول تعليق
من زمان ماكنتش اول تعليق
هاتيلى شيكولاته بقى ماليش دعوه

blue-wave يقول...

والله اغلب الجوازات التانيه بتكون بسبب اهمال الزوجه لزوجها وانشغالها بحاجات تانيه غيرة
وكونها بقى تاخد بالها انه اتغير او ماتاخدش مش فارقه
ما خلاص كل حاجه بتكون انتهت

Ashraf يقول...

طبعا مفيش واحده مدام هيعجبها راى واحد راجل والعكس -دى طبيعة البشر سبحان الله-
بس اللى اقدر اقوله:

اول حاجه: لا يصح الا الصحيح وماببنى على خطا فهو زائل وباطل

ثانى شئ: كل ست بتفكر ازاى تقرف جوزها وتجيب له الضغط والسكر والمراره والقولون العصبى .....ولاتفكر الا نادرا فى رضاه
حتى تستشعر الخطر الداهم وتكون خلاص الفاس وقعت فى الراس

ثالثا : الدين مثنى وثلاث ورباع ده شرع ربنا ولاخلاف عليه مهما كان الزمن

رابعا : اللى متجوز ليه راى واللى مش متجوز له راى ثان

خامسا :عاداتنا وتقاليدنا مش عارف هتكون مع مين ؟؟؟؟؟

ولا عزاء للسيدات

صيدلانيه طالعه نازله يقول...

سكره:طب كويس ده انتى طلعتى من الستات المستأنسه خااالص
بس حتقدرى تكملى كده للنهايه و لا ده كلام بس و انتى على البر
بس كويس برده انك معندكيش النزعه الانانيه
الشيكولاته انا بعتها فى الايميل وصلت و لا لسه
نورتينى

صيدلانيه طالعه نازله يقول...

blue-wave:هو فعلا مبتفرقش ان الواحده تاخد بالها بعد فوات الاوان الشاطره اللى تنتبه بدرى و تلحق الامور قبل ما تبوظ
شرفتنى يا دكتور

صيدلانيه طالعه نازله يقول...

Ashraf:العادات و التقاليد دايما بتاخد ناحيه الطرف الاضعف و الله اعلم هو مين
و بعدين محدش بيبقى قاصد ينكد على نفسه و الا يبقى مش طبيعى
و بعدين موضوع مثنى و ثلاث و رباع ده فى حاله المقدره و القدره هلى العدل و لو مش متوفرين يبقى مينفعش
نورتنى فى المدونه و فى البيت
هههههههههههههههههه

ذو الوجه المبتسم يقول...

السلام عليكم

الموضوع فعلا لابد ان يكون محل اهتمام
مش للستات بس
ولكن للرجال كمان
لان اللى بيحصل للست هو نفسه بيحصل للرجل
وممكن اهمال الزوج لزوجته واهتماماته بالعمل والبزنيس او غيرها بيوصل الست لحالة غير متوقعة

اعتقد الحل هو
فهم الطرفين لمعنى الاحتواء الحقيقي للحياة الزوجية

الموضوع يحتاج لكلام كتير بجد
لان الفترة اللى احنا فيها دي بجد خطيرة جدا

تقبلى تحياتى

واحدة مفروسة يقول...

انا جيت
و سعولى بقا كده كلكم
بصي يا علا
ده التعليق اللى كتبته عند ستيتة
و متهيالى برضه فيه اجابة على سؤالك
@@@@
بصي يا ست ستيتة حسب الله الحمش
شكلك كده انتى بتهوني على نفسك بالكلمتين دول
ههههههههههههه
شكل جوزك عملها و اتجوز عليكي
ههههههههههههههههه
عادى بتحصل فى احسن العائلات

بس انا مش مع ابدا ان الزوج او الزوجة تترك لمشاعرها العنان فى ان تحب رجل غير زوجها و لا هو يحب ست غير مراته

و ان كانت ريحة البصل و الاهمال اللى بنكون فيه لاننا مش ملاحقين اصلا على طلبات المحروس
تكون جزاتها انه يروح يتجوز ولا يحب على مراتةيبقى يا أهلا بالسواطير و الأكياس

بصي يا أخت ستيتة هيه الست يعنى بتهمل فى نفسها مثلا..ولا مش بيبقى فيه حديث داير بينها و بين جوزها..ولا على طول خناق ليه؟؟؟
ماهو علشان المحروس و عيالة
يا بنتى الست بتبقى هلكانة طول اليوم ما بين تنضيف الشقةو عمل الأكل و تربية العيال و الغسيل و المذاكرةيالهوىىىىىىىىىىىىىىى
موال(صحيح الحمد لله انى مش عندى اولاد...بس و حياتك...جوزى بفصل اولى اول بحالة)


يعنىالمحروس لو هننها و جابلها حد يطبخ و حد ينضف و حد يربي العيال و هيه تشرف بس عليهم
اتحداكي ان الراجل يبص لحد تاني
و حتبقا الغيرة مالية قلبه على مراته لانها واخده بالها من نفسها
بتروح للكوافور و الجيم و على سنجة عشرة

انا مش مع حبيبة الزوج خاااالص

تصدقى بقاانا اتفرست من البوست ده جدااااااا
مووووت خااالص
و تصدقى بقاانا حقوم البس و انزل مع جوزي...
رجلى على رجله من هنا و رايح

سلام حاجة تفرس


@@@@@@@@

صيدلانيه طالعه نازله يقول...

ذو الوجه المبتسم:كلام حضرتك فعلا صح لازم التواصل الدائم بين الطرفين ساعتها بس لو حصل اى تغير فى اى طرف الطرف التانى حيحس بيه بسرعه و يقدر يشوف الغلط فين
نورتنى لاول مره و ياريت دايما

صيدلانيه طالعه نازله يقول...

مفروستى الحبيبه:و الله يا بنتى انتى اللى فيهم لمستى كبد الحقيقه و الطحال و المخ كمان
مهو مش معقول الطلبات دى كلها من الفجر لغايه نص الليل و عايز ترجع تلاقيها متلمعه و مبتسمه
بس انا كان قصدى برده على الست اللى طموحها اكبر من انها تشوف جوزها وصل لفين
و مع مين لان اهمالها هو فعلا الخطر
و عايزه اعرف نجحت ان اخلى فرستك تزيد و لا لأ
ههههههههههههههه

م/محمود فوزى يقول...

السلام عليكم
معلش ياست الدكتوره ممكن اعلق
فى الاول يعنى عايز اقول
حمدا لله على السلامه
من ساعه العيد وانتى مش موجوده فى المدونه

عارف عارف من كتر الشغل والادويه اللى متباعه
والفلوس اللى عماله تدخل جيبك
ههههههههههههههههه
على فكره ده مش حسد متخفيش ده حقد
هههههههههههههههههه

اما الموضوع فانا فعلا قراته عندها وعجبنى جدا وقلت انه ينفع للرجاله والستات فى نفس الوقت

وللعلم اليومين دول اصلا الراجل ما بيصدق يلاقى واحده كويسه ويتجوزها
فمش ملاحق على الشغل عشان يبص لبره
ودى فرصه حلوه للستات انها باقل مجهود ممكن تخليه ميبصش بره

وده اصلا فى مصلحتها انها تحاول تسعده لانه برضه لما يلاقيها بتحاول ترضيه
فالبعيد -باذن الله - يكون عنده دم ويقابل الامر بانه يقيد صوابعه العشره شمع ليها
(واضح ان اللى حط المثل ده يمكن كان عامل حساب ان الكهربا هاتغلى)

المهم
انها تحاول تقدم السبت وهاتلاقى باقى ايام الاسبوع
وطبعا هو كمان
لازم يكون يحاول يخلى البيت سعيد والراجل مش بصوته
اصل انا عارف ان فيه رجاله فاكره الرجوله صوت ولازم اول مايرجع البيت يبقى باقى الحى يعرفوا انه رجع

عارف ان فيه رجاله معندهاش دم
بس فى الاغلب اللى ملاحظه اليومين دول الناس بقت مهدوده من كتر مشاغل الحياه
فنحاول نريح بعض
ماهو ميبقاش غم فى الشغل وفى البيت

معلش انا تدخلت فى الموضوع رغم ان انتى عامله العنوان للهوانم مش للبهوات امثالى

اشكرك مره تانيه
ربنا يكرمك ويسعدك

صيدلانيه طالعه نازله يقول...

م/محمد فوزى:نسيت حضرتك كمان انفلونزا الخنازير و قلق الناس و كل الناس عماله تبلع دوا على الفاضى و المليان و اهو كله مصلحه
هههههههههههههههه
بالنسبه لموضوعنا انت رأيك انه من زرع سوف يحصد انا متفقه معاك فى الموضوع ده فعلا
بس برضه الست زى ما بقى فيه منهم المشغوله و المهتمه بعملها ففيه الراجل اللى كل همه الشغل و يرجع البيت يبقى ياكل و ينام و يصحى ياكل و ينام تانى او ينزل شغله و يرجع ينكد عليهم
و من كتر انشغال الطرفين محدش بقى عنده وقت يلاحظ اى تغير فى سلوك الطرف التانى سواء بالايجاب او السلب
التغير فى الزوج بالايجاب ده فى حد ذاته قمه الخطرو شيىء يدعو للقلق
منورنى و نتقبل اراء كل البهوات

حسن ارابيسك يقول...

الحقيقة أول مالفت نظري هنا تعليقك الذي وضعتيه أعلى لوحة مدونتك
فتحت الصيدليه وقلت ارتحت خلاص بس للاسف فى نفس البيت ولقيت اللى فوق عايزنى واللى تحت محتاجين لى وبقيت كده طالعه نازله
بصراحة لم أتمالك نفسي من الضحك وتخيلت المشهد حقيقي وحسيت بالبهدله فعلاً الله يعينك ده علاوة على عدم تغيير الجو

المهم قرأت موضوعك اللي طرحتيه وأنا قلت أدخل في النسبه القليلة التي خصصتيها للرجال
الحقيقة مش عارف ليه على طول وضعتوا الاحتمالالأول على طول صد رد انه يكون هناك واحدة تانيه وبناءً عليه إتبنت كل التساؤلات والاتحتمالات التبعية له
غريب بالطبع الم يكن هناك احتمال أن الرجل زهق وتعب من المناهدة ومل من تكرار المشهد اليومي لتلك الحالة التي رأها مستعصية وفكر بعلاج لها أن يكبر دماغه حتى لايجد نفسه في يوم من الأيام مراته قاعده بتاخد عزاه
تحياتي
حسن أرابيسك

غير معرف يقول...

السلام عليكم
حبيبة زوج واحدة وقعت تحت مؤثر طاغي عليها ممكن اوي قلبها
مش قالت هي متجوزة ولا لأ بس عندها استعداد انها حتي تكون صديقة
بتصور ان القرار هنا هو قراره
افرضي متجوزة
مش فكرت في اي حاجة لا بيت ولا اولاد ولا اسرة اندفعت علطول من قلبها
افرضي انو رد بالموافقة
افتكر هيتنقل الموضوع لعقلها وهتفكر في كل حاجة
عند اللحظة دي ممكن الموضوع نفسه يكون انتهي
ولو رد بالرفض
هي هتكون في نفس الأندفاع

لعبة بين العقل والقلب


تامر

غير معرف يقول...

بس اقولك
من حياتي انا
ومن مواقف شفتها ومش اقدر حتي اتكلم عنها وفي علاقات ابعد ما تكون ان يكون فيها حاجة
صدقيني
بيبقئ الموضوع اكبر من ان واحدة تهتم او حتي تفكر في بيت او زوج
يعني
بتبقئ فيه علاقات مش محكومة بأي منطق
وبعيد اوي عن العقل والمفروض


تامر

mahasen saber يقول...

طب الواحده تتصرف ازاى
الواحده تعمل ايه تصدئى مش عارفه بس ااقلك اعتقد تحاول تغير من نفسها وتعيد عوامل الجذب الليى فقدتها
وتحاول تستدرج جوزها لبيتها وليها تانى
ده لو لسه بسلامته مغرقش فى درجات الهوى والارتباط بالاخرى

وفى الغالب اعتقد انها لن تفلح لان طبيعى هتكون الفاس وقعت على دماغ الراس
وطبيعى اغلب الرجال تميل للتغير وبالذات اذا هيأت الظروف لهم ذلك

وكل واحده تخلى بالها من جزئية الانسياق وراء طموحها وتاخد بالها من متابعة ما يحدث لزوجها من تغيرات

طبعا مش عايزه حد يقول انظر من يتكلم

tarek momen يقول...

طيب فرضا يعني انه بعد ما اتجوز عليها طلعت الجديدة ليها طموحات هي كمان
مش شرط طموحات علمية ممكن بيزنس او اجتماعيات و بقت مش فاضية هي كمان
يعمل ايه يدور علي واحدة تالتة
وهلم جرا
ملحوظة
المدام تبعي معاها دكتوراه بس للأمانة مش مقصرة معايا
تحياتي

micheal يقول...

الخيانة صعب ألاقيلها مبرر
وبالتالي تغيره للأحسن ده لازم هي ترفضه طالما سببه خيانة
تحياتي

عاشقه وغلبانه يقول...

لا انا فريك فريك يعني مش اي كلام وعمري ماقبل في حبيبي اي شريك
لو في يوم اختار يتجوز ويبقي ليه علاقه تانيه
سواء كنت بغبائي واهمالي السبب او لان هو عايز كده فوقتها انا هانسحب ف هدوء
مش موضوع كرامه وانا ومن بعدي الطوفان بس لاني عمري ماقبل في شريك حياتي اي شريكه وجودها يعبر عن نقص فيا سواء في اهتمامي بيه او في حي ليه او في قدرتي علي اسعاده بيكمله بوجودها واللي في يوم من الايام يشوف ست غيري تقدر تسعده يبقي سهل عليه يبعد عني ووقتها هابقي انا كمان قادره ابعد عنه
فريك وعمري ماقبل شريك

ahmed_k يقول...

عندما حلل ربنا تعدد الزوجات للرجل شرعه لحكم عديده وليست في حالات إهمال الزوجه لزوجها بسبب عملها فقط رغم أنه قد يكون سببا من ضمن الأسباب العديده
لذلك مادام الرجل لم يأتي بحرام وسيعدل بين زوجاته ولديه القدره على الجمع بين أكثر من زوجه فما المانع
طبعا المرأه بطبيعتها تثور من هذا الفعل ومشاركة إمرأة أخرى في زوجها
ولكنها يجب أن تحكم عقلها وتعلم أن الزواج الثاني لزوجها حلال عند الله وتقبل بهذه الزيجه حتى لا تكون سببا في إتعاس نفسها وإتعاس زوجها وأطفالها

قيس بن الملووووح يقول...

شاركونا الراي والخبره في جمعية مقاومة الطلاق

ويكا يقول...

بصى يا دكتره

ابسولتلتلى انا معاكى.
ومعاها.
ومع كل الناس الحلوه اللى شرفتنا الليله ... وطبعا مع الريس حسنى مبارك امد ربه له فى الملك احدى عشر عاما اخرين.

المهم
نرجع للموضوع بتاعنا.

بصى ، " لا آذان تسمع ولا عيون ترى ولا عقول تعقل ، مهما هتقولى ،
"مفيش فايده" سعد زغلول.

بس عموما ، جميل جدا بجد ان مثل هذه المواضيع تثار الان من لدن المرأه نفسها. ده مبشر جيد.
وانا متفائل ان اولاد احفادنا ممكن يعيشوا حياه طبيعيه.

واعدواااا بالعافيه

صيدلانيه طالعه نازله يقول...

حسن ارابيسك:انا قلت ان الست سألت و عرفت انه على علاقه باخرى و انه فى طريقه للزواج منها فعلا
و بعدين هو فعلا زهق و يئس بدليل علاقته الجديده
منجيلكش فى حاجه وحشه

صيدلانيه طالعه نازله يقول...

تامر:زى ما ستيته ردت على صاحبه حبيبه زوج ان الست المتجوزه اما بتفكر فى علاقه مع راجل تانى بتبقى زى الفراشه اللى بتحوم حوالين نار و طبعا النتيجه المحتومه انها حتتحرق و العلاقه دى طبعا مرفوضه من الاخر من الناس كلها
و بعدين فى واحده ست عاقله تسيب جوزها اللى هو راجل عشان واحد تانى اللى هو راجل برضه طب تبقى عملت ايه جديد
لا يلدغ المؤمن من جحر مرتين
هههههههههههههههههههه
نورتنى

صيدلانيه طالعه نازله يقول...

mahasen saber:مين يقدر يقول كده ده انتى خير من يتكلم و خير من يمثلنا تحت قبه البرلمان
و بعدين مش معنى انك فشلتى فى علاقه انك مينفعش تنصحى بالعكس انتى نصيحتك من انسانه جربت و حست بمشكله و خرجت منها الحمد لله باقل خساير و ياريت البعض زيك يقدر يفيد الكل
نورتينى ياهانم من ضمن الهوانم
هههههههههههههههههههه

صيدلانيه طالعه نازله يقول...

tarek momen:و الله لو طلعت بنفس الطموحات يبقى فقرى بالفطره و مفيش حل لمشكلته خالص و انصحه ساعتها انه يتوب عن الصنف خااااااالص
نورتينى و تحياتى للمدام

صيدلانيه طالعه نازله يقول...

Micheal:و الله يا مايكل انت كلامك فعلا صح مينفعش ان اى ست ترضى بالتحسن عن طريق الارتباط بست تانيه دى تبقى بتضحك على نفسها
نورتنى يا مايكل

صيدلانيه طالعه نازله يقول...

عاشقه و غلبانه:ازيك يا قمر
انتى فعلا صح الصح مينفعش الواحده ترضى براجل شرك و لو كان ملاك من السما و المفروض تسيبه للتانيه تشربه بقى بالهنا و الشفا و ساعتها حيرجع لطبعه مع الاولى

صيدلانيه طالعه نازله يقول...

ahmed-k:يا استاذ احمد احنا مش بنناقش الحلال و الحرام لان الزواج التانى اكيد حلال
احنا بنقول ان هل لو طبع الراجل اتحسن مع مراته و طلع السبب انه على علاقه بواحده تانيه هل ترضى بالتحسن و العلاقه التانيه و لا ترفضه و ترفض جوزها و تنسحب فى هدوء بس
عايزه بقى رأيك انت

صيدلانيه طالعه نازله يقول...

قيس بن الملوح:حاضر حاروح اشوف و ارد هناك

صيدلانيه طالعه نازله يقول...

ويكا:ممممممممممممم انا بازووووووووووم
قصدك ايه بقى ان المرأه بدأت تثير الموضوع ده
قصدك انها كانت مبتفهمش و بدأت تفهم
شامه ريحه تريقه
بس ولا يهمنى المهم انها بدأت تفهم و خلاص و ربنا يسهل لاحفاد الاحفاد ان شاء الله

!!! عارفة ... مش عارف ليه يقول...

والله أنا شايف إنه غلطان من الأول

لو كان دبح لها القطة من بدري

مكنش ده بقى حاله

قاااااال يعني بقى في رجالة بتدبح القطة

عااااااااااااا

ماعلينا المهم

بصراحه يعني أنا مش مع الجواز التاني ده

لأنه مش حل بالنسبة للراجل لأن الزوجة التانية دي بعد شهر العسل

هيبدأ الموقف يختلف وأكيد مش هيكون هو الشخص صافي الذهن اللي كان موجود لأنه هيكون مشتت بين البيتين

وأفتكر ان الضحية في الموضوع ده كله مش الزوجة الأولى ولا التانية

الضحية هو الزوج اللي ودى نفسه في داهية

المهم مطولش عليكي قولي طول

الست اللي بالشكل ده تزهق بصراحة

وأكيد للصبر حدود

وأفتكر إن الحل في ايدها لأن في الأصل الاساس هو بيتها مش اي حاجة تانية يعني هيسعدها مستقبلها العلمي والأدبي لما يكون جوزها عايش في بيت تاني وحد من ولادها منحرف ولا حاجة

أكيد مستقبلها العلمي والأدبي ده هيتأثر من مركزها الاجتماعي اللي بقى فاشل

معلش على التطويل إنما الموضوع هو السبب


تحياتي
وليد

م/محمود فوزى يقول...

السلام عليكم
ازيك يادكتوره
كويس انك لقيتي وقت تردي علي الناس من كتر الدوا المتباع والفلوس الداخله
ههههههههههههههههههه

انا متفق معاكي فى كلامك
ضغط الحياه ممكن يخلى الراجل والست مشغولين عن بعض
وهنا لازم الاتنين يفكروا بعض بانهم متجوزين
يعنى مره هديه صغيره
خروجه فى جوهادى
كلمتين حلوين
يعنى المهم انهم يكسروا الروتين اليومي
وممكن تكون حاجات بسيطه كل شويه تنسي هموم الدنيا باذن الله

انا شايف ان دى مسئوليه الاتنين وان كنت باقول انها تكون المسئوليه على الراجل اكتر شويه لان الست ممكن تكون ملخومه اكتر فى العيال وشغل البيت او الشغل بره كمان لو هى شغاله

ربنا يكرمك ويسعدك دايما
وكل سنه وانتى طيبه

صيدلانيه طالعه نازله يقول...

عارفه مش عارف ليه:و مين قال يا وليد انه فيه قطط اصلا عشان الراجل يدبحها
الستات عدوا و خلصوا على كل القطط اللى فى الشوارع اماااااال ايييييه احنا فى زمن عزت فيه القطط و الكلاب خلااااااااااص
بالنسبه لموضوعنا بقى انا شايفه ان الاتنين يستاهلوا اللى يجرالهم لانهم نسيوا انهم كيان واحد و كل واحد بقى ماشى فى الدنيا بدماغه
نورتنى يا وليد و كل سنه و انت طيب

صيدلانيه طالعه نازله يقول...

م/محمد فوزى معظم الاسر المصريه تقع فى نطاق المستوى المادى المتوسط و حكايه الهدايا و عزومات العشا دى تعتبر بالنسبه لاسر كتير من الرفاهيات
بالنسبه للسينما انا بقالى شهووووووووور حاموت و ادخل سينما و جوزى يقولى بلاش عشان انفلونزا الخنازير و الاماكن المغلقه و انا اللى كنت باروح سينما مرتين فى الاسبوع عاااااااااااااااا
اتحسدت من الناس الحاقده
انت فعلا كلامك صح الصح الموضوع فى ايد الطرفين بس برضه المبادره لازم تبقى من البيه مش الهانم
امااااااااااال قواموووووون ازاااااااااى
كل سنه و حضرتك بالصحه و السلامه

ماما يقول...

انا قرأت الموضوع واستفزنى
واول مره اعلق عندك
وندخل فى الموضوع علطول

هو يعنى ماكنش يعرف لما اتجوز الست هانم انها ليها مكانتها وكيانها العلمى والاجتماعى
مش برضه خادها من بيت اهلها واتشرف بيها قدام الناس؟؟؟؟؟؟؟؟؟؟؟؟!!!!!!!!!!
وبعدين ماهو داق العسل من ايدها لما كانت فاضيه
دلوقتى لما انشغلت شويه بمستقبلها العلمى (((وخدى بالك دا برضه ليه ولولاده)))
مش قادر سيادته يساعدها ويتحمل شويه معاها
وهى يعنى هاتفضل طول عمرها مشغوله
رجاله مابتقدرش صحيح

طيب ولو هو بقا اللى انشغل بمستقبله
مش برضه هى هاتستحمل وتساعده وتسانده
ولا هاتبص لمين يعوضها والكلام الفاضى ده

ونيجى بقا لان الرتجل ممكن يتجوز اكتر من واحده
الكلام ده بيقوله الرجاله الضعيفه اللىمالهاش امان
لكن لو راجل عارف قيمة زوجته ومقدرها وفاهم انها تساويه فى القيمه والمنزله وان ماتفعله سيعود له ولااولاده مضاعفا كان اول واحد يقف معاها ويدافع عن حياته وحياتها بل يقدم لها كل الشكر انها غير مستكينه وغير جاهله بمتطلبات الحياه الصعبه اللى ولادهم طالعين فى وسطها
((ومافيش حلاوه من غير نار))
والا كان من الاول اتجوز واحده من بتوع النوادى وصرف عليها كم قلبه
وبرضه مش هايلاقيها الا فى الحفلات والنوادى
وساعتها كان هايبص لانسانه ناجحه فى حياتها ويتحسر ويقول هى دى الستات ولا بلاش
فاكر الموضوع بالساهل
هو كدا الرجاله ميملاش عينهم حاجه ابدا
وصاحبتك دى
ان ماكنش جوزها يعرف قيمتها
يبقى الحمد لله هى عارفه قيمة نفسها
وبكره يرجعلها ويبوس رجلها تصفح عنه
وهى بقا وحريتها
وان كنت انا مع الصفح الجميل ويارب يلم شملهم على خير
طولت عليكى ....انا اسفه

م/محمود فوزى يقول...

انا مش قصدى عشا يعنى فى فندق 9 نجوم
انا اقصد مره فى الشهر عشا فى مكان متوسط ولو مش هاينفع
تبقى خروجه
على فكره ممكن تكون فسحه فى اى مكان هادي ومش هاتتكلف كتير
الناس بس هى اللى بتتخض من انها فسحه
اهم حاجه فى الفسحه ان الناس تخرج من الروتين اليومي
ومش لازم صرف فلوس كتير

ورغم انى عارف ان رجاله كتير ممكن يزعلوا منى الا ان فعلا محاوله كسر الروتين اليومي من الطرفين والراجل اولى انه هو اللى يبدأ

اشكرك مره تانيه

صيدلانيه طالعه نازله يقول...

ماما:اول حد يعلق فى الموضوع ده و احس انه بيعلق بقلب فعلا
للاسف كلامك صح و المجتمع اما الايه بتتعكس بيطالب الست انها تضحى و تستحمل عشان جوزها ينجح لكن اما الموضوع يتعلق بمستقبلها هيا بيبقى برضه المفروض انها تضحى عشان استقرار بيتها و مستقبل ولادها يعنى خسرانه فى الناحيتين
مع ان الاولاد فعلا بيبقوا احسن اما تبقى الام مثقفه و مستواها العلمى راقى
كلامك يدل على عقليه متفتحه
و ياريت الزياره تتكرر
نورتينى

صيدلانيه طالعه نازله يقول...

م/محمد فوزى:انا فاهمه انها مجرد فسحه و الله لورسيت على سندوتش طعميه و لا دره مشوى على الكورنيش يبقى رضا و الله
بس المهم البهوات ياخدوا المبادره

Appy يقول...

لما اكبر هقولك هههههههههه
انا فاهمه بس ممتنعه عن الرد لان ردى مش هيعجب ناس كير من الجنسين يا اوختشى وانتى بالذات اصلى عرفاكى يا لولو منكن تعضينى من مناخيرى

dr.lecter يقول...

والله المفروض هي تتقبل الموضوع علشان بيتها مايتخربش وتعتبرها انها نزوه

الجواز و سنينه يقول...

بصى يا قطه
انتى عارفه ريى طبعا فى الموضوع ده
بس انا عن نفسى هاثور و اثور و اثور
و إذا كان ممنوع عنى انى اشوف راحتى لو هو مضايقنى و احاول جاهده و بكل تفانى انى اصل لمنطقه وسط
و انتى مش اشوف حد يدينى احتياجاتى و اعيش مبسوطه معاه
و علشان محدش يفهم غلط بس
يعنى لو واحده جوزها مش بيقول كلام حلو

تسمع من بره و تشبع الجزء الناقص فى سبيل انها كده بتشبع رغباتها و بتكون معاه احسن ؟؟؟؟؟
ماحدش يقولى اصل مسموحله انه يتجوز اربعه
انا ماقولتش انها هاتعمل علاقه
انا بقول بس هاتسمع كلام حلو
مافيش راجل هايرضى بكده
و عليه انا مش بسمح للطرفين بالبصبصه

و لو هو عايز يبقى يطلق و يعيش حياته
و هيه اكيد اكيد هاتلاقى اللى يعوضها عنه
بس انها تستكين و تقبل بالامر الواقع علشان تاكل و تشرب فمعلش هيه مش بهيمه

و لا هو يرضى نواقصها بره و لا هيه تسد احتياجاتها بره

الجواز و سنينه يقول...

صحيح هيه ليه الرجاله فاكره ان زوجاتهم ماحدش ممكن يبصلهم غيرهم

اى واحده مهما كان شكلها هناك صائد متربص بها
و زى مافيه ستات قاعده كده للرجاله فيه رجاله قاعده كده للتسات
ماتفتكروش ان زوجاتكم ماحدش بيبصله
بس هيه انسانه عفيفه حتى مش عايزه تشوف ان حد بصلها
علشان مش تشوف نظره مش عايزه تشوفها من حد غير زوجها
فمن حقها هيه كمان انها تحس ان زواجها و استقرارها فى امان
زى ما هيه امنتله بيته و زواجه

مش عارفه ليه حاسه انى بتخانق
نرفزتينى يا صيدلانيه
فرستينى انا و مفروسه

صيدلانيه طالعه نازله يقول...

ِAppy:خليكى شجاعه و قولى رأيك و متخافيش

حجيبلك مناخير جديده هديه الفرح

متقلقيش من الناحيه دى خااااالص

صيدلانيه طالعه نازله يقول...

dr.lecter:ممممممممممم نزوه
و المفروض انها تصبر على على النزوه يا ترحل يا تفضل
وجهه نظر برضه

صيدلانيه طالعه نازله يقول...

الجواز و سنينه:حاسه انك بتقدمى اثبات رياضى بما ان الرجاله ترفض ان ستاتها تكون لها علاقات اذن ممنوع العلاقات للطرفين
و هو المطلوب اثباته يا فندم

ahmed_k يقول...
أزال المؤلف هذا التعليق.
ahmed_k يقول...

طبعا تقبل
وأنا كنت تكلمت في تعليقي السابق عن مبرر قبولها
والذي يجب أن تحدث به المرأة نفسها ,
وكونه تحسن وأصبح حسن العشره ولو متزوجا بأخرى أفضل من أن يكون نكديا وعبوسا فتتحول الحياه إلى تعاسه ويكون زوجا لها وحدها ,
لكن هناك شرط أن تكون علاقته بأخرى زواجا وليس نزوه
فلو كانت نزوه وعلاقه غير شرعيه فعليها أن ترفض بكل تأكيد,
فالحياة السعيده أفضل مهما كان ثمنها
فنحن لن نحيا في الدنيا إلا حياتنا هذه فقط أما حياتنا الأخرى فيلزمها البحث عن الحلال والحرام حتى نظفر بالسعادة فيها هي الأخرى
تقبلي خالص تحياتي

سومه...مجنونه فى بلد عاقل يقول...

حقول طظظظظظظظظظظظظ فى الشغل
ومن الاول لو شغلى على حساب اولادى وبيتى حتى لو انا عبقريه وزويل وواخده جوايز برضو طظ
لان مهمه الست الاولى بيتها واحنا اصلا بنبقى كويسين عشان ولادنا وبيتنا وعشان نسعد الناس
ازاى اسعد الناس واسيب بيتى يضرب يقلب
...............
التصرف السليم انى اتغير وابدا اشده ناحيتى تانى لحد ما يجد انه مفيش لزمه للانسانه الاخرى
ومدام هو شخص خايف ع العشره ومراعيها يبقى هو بيتقى الله مش واطى ولا ندل
يعنى طيب وعنده قابليه انه يرجع تانى زى زمان فليه مديهوش فرصه تانيه

سومه...مجنونه فى بلد عاقل يقول...

ليا رد زغنن على دكتور بلوو
احيانا الزواجات التانيه بتتم مش لانشغال الزوجه لا عشان الزوج لا مؤاخذه عينه فارغه

صيدلانيه طالعه نازله يقول...

ِAhmed-k:فعلا الانسان قبل ما يدور على سعادته فى الدنيا لازم يطمئن على سعادته فى الاخره و ده عن طريق حسن سلوكه فى الدنيا

صيدلانيه طالعه نازله يقول...

سومه:كلامك جميل يا سومه مينفعش اسعد الناس و حياتى مدمره او فى طريقها للدمار فاقد الشيىء لا يعطيه و فعلا مش كل حالات الخيانه اساسها اهمال الستات فى كمان طفاسه الرجاله
ههههههههههههه
نورتينى

فتافيت يقول...

حبيبي :)

بصي يا جميلة.. زمان لما كنت مخطوبة... وحسيت انه بيغير من طموحي.. وواقف زي اللقمة في الزور قصاد مستقبلي
قررت البعد.. وفعلا عملت كده
يمكن اكون غلط.. يمكن اكون صح
بس في النهاية.. الشخص اللي قصادك هو اللي بيحدد هو يستاهل تضحي عشانه.. ولا تضحي بيه اوفر وافيد
وبوسة يا قمر

صيدلانيه طالعه نازله يقول...

فتفوته يا قمر اخبارك ايه و مبروك رجوعك التدوين تانى ايوه كده هو ده بيتك يا بنتى
فعلا التضحيه لازم بالشخص الانانى اللى مبيفكرش غير فى نفسه و بيغير من نجاح شريكه
الواحد دايما يحاول يزق اللى معاه قدام مش يزيحه لورا

Sharm يقول...

هل هو ذنب الزوج ؟؟
لماذا ذائما يتحمل الرجل ذنوب الانثى ؟؟

انا اوافق بلو ويف و كتبت موضوع عن هذا الشأن من قبل

ستيته حسب الله الحمش يقول...

طرحك للموضوع اكثر من رائع وخاصة خلال المناقشات
بس خدي بالك
الحالة اللي انا ناقشتها في حبيبة زوج
لرجل متزوج ست بيت عادية جدا
بنت ناس جدا
مخلفة ليه أورطة عيال جدا جدا
عاوزاه يعيش أب بس لحد ما ربنا ياخده جدا
هو مكتئب ومريض جدا
والبت صاحبتي ها تبلعه بكوباية مية جدا جدا
وده مختلف خالص عن قصة طموح الزوجة
وعلي الطلاق اللي يقف قدام طموحي اشوطه فورا
يعني ايه اضحي بطموحي علشان البيت؟
إيه التابوهات المقدسة دي يا جودعان؟
انا بني أدم
وانت بني أدم تاني
واللي ردوا بني أدم تالت ورابع وخامس وعشرين
مفيش فينا حد شبه حد ولا حتى يقترب منه في التكوين
لا يا ستي
طموحي والبيت والكوافير والعيال والحمام المغربي والرز بالخلطة وكلو كلو كلو
ولو ممكن اضحي اضحي بعم حسين البواب :)

والله تستاهلي تصقيفة كبيرة لأن مناقشتك بصراحة اجمل من الموضوع نفسه
وسلامنا لأشرف بيه
ويارب دايما منورك في البيت وفي المدونة
بالمناسبة رده عندي كان ضبااااااااابي ومش عاجبني خالص
اتصرفي
انا جاية اهدي النفوس :)

Timo.. يقول...

اذا كان راحة ليها وله وفي نفس الوقت مش ها يظلمها وها يكفيها بالكلمة الحلوة والمشاعر..اعتقد انه من حقة وده حل ابسط من حلول تانية كتير ممكن يوصلولها من غير ما يفكروا في بعض..

lostlove يقول...

السلام عليكم
انا بقي علي الحياد
حاجه كده في النص
هي قصرت
ليه انته موجهتهاش
طيب
انتي ليه قصرتي وصلتليه لكده
حكايه ملغبطه
بس هو لو اتجوز معاه حق
بس بردو لزم يقول ليها قبل ما يعمل كده
ولو اننتي عرفتي انو بيخونك
لا تصوري ولا تغضبي
العند بيولد العند
يعني من الاخر انتي الخصارنه
وابتدي بقي جري ناعم
وارجعي ارجوكي وحده ست
ههههههههههههههه
بلاش جو خلتي نبويه الي الستات بتعملو بعد الجواز
معاكي يا ستي
العيال الطبيخ المكوه الغسيل
اكيد يعني في وقت في اليوم تلاقي فيه نفسك
خفي طلبات
خفي من الامراض الي بتجبيها لجواز من كتر الطلبات
وحضرتك بردو
مش تلاقيها طالع عنها في المطبخ وانته بتتفرج ع التي في
مش هتنقص حاجه خالص لو قمت حضرت السفره معها
ولا مسكت ضناك نيمتو
حجات بسيطه تسعدها بيها
بس نقول لمين
ههههههههههههههه
لا الستات بتسمع
ولا الرجاله بتحسبها كده
ولو حصل انفصال
الاطفال الي بيتظلمو
انا رغيت كتير
معلشي بقي
بس بجد بشوف حجات تحرق الدم
هههههههههههههههه
تحياتي ليكي
اتمني التوفيق

shrshr يقول...

والله اللي تسيب جوزها لواحدة تانيه بالسهوله دي تبقا هي اللي تستاهل مهو من حقها برده تحقق نفسها بس طبعا تراعي جوزها وبيتها ولازم هو كمان يراعيها يعني مش لازم النظرة الذكورية للرجل دي مش اول ما تقصر يروح يتجوز يعني هو كمان بيراعيها اوي
واحب احيكي على هذا الموضوع

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .