السبت، نوفمبر 21، 2009

مش معقول

بعد كل اللى عرفناه من شهود العيان بعد مهزله السودان و كم البلطجيه اللى كانوا موجودين

عايزه اعرف حاجه واحده بس الناس اللى راحت دى معظمها مخطاش ماتش كوره قبل كده

و لا يعرفوا يشجعوا و لا نيله يبقى ايه لازمتهم هناك وايه كمان رايحيين ببلاش يعنى فسحه

الجزائر كانت باعته ناس تاكل الحديد و تاكلنا و بالمره تشجع و باعتاهم ببلاش و احنا بنلم 2500

من اللى عايز يشجع عشان يبقى تشجيع و سبوبه فى نفس الوقت

الناس اللى سافرت مع الحزب الوطنى ابو بلاش يعنى كلهم ناس شيك حاطه بارفان و مانيكير و فورمه الشعر آخر حاجه

طبيعى اى حد يقول للناس دى بخ حتجرى فما بالكم بالسنج و المطاوى

على رأى سعد الصغير هما باعتين ناس بومبونى و رقه على الاخر لو كانوا بعتوا الالتراس

و ولاد البلد كانوا كلوهم و قطعوهم

خالد الغندور قالها فى دريم اللى المفروض ان البلد تبعت المشجعين الحقيقيين اللى بيشجعوا كوره من 20 سنه كده

مش الناس المتلمعه اللى بدأت تعرف الاستاد و التشجيع فى امم افريقيا القاهره 2006 بتوع الزمامير

و الطراطير و التشيرتات الحمرا

ده مش ذم فى الناس دى ولا حاجه بس الناس التانيه بتشجع بجد و مستعده تاكل اللى قدامها عشان فريق

بلدها يفوز يبقى هما اللى يستاهلوا السفر

اخواننا التانيين عايزيين يسافروا يبقوا يسافروا على حسابهم و من حر مالهم

ده من ضمن اسباب المصيبه اللى حصلتلنا هناك مش السبب الاساسى

الناس دول خدونا على خوانه و بهدلونا و عملوا اللى نفسهم فيه و زياده

المطلوب دلوقتى اننا ناخد حقنا و بسرعه

لان كل يوم بيعدى بيقلل من اهميه الحدث

عايزيييييييييييييييييين رد رادع

هناك 23 تعليقًا:

يوميات شاب منوفى يقول...

نفسى اعرف لية بتوع الالتراس مسفروش بقى على اخر الزمن بعتين شوية ناس نايتى يشجعونا اية القرف دة بقى سعد الرقاص ولا ايهاب توفيق ولا نهال عنبر ولا دل الناس السيس دى يشجعوا مصر دى عمرو زكى كان بيلطم فى الملعب ويقولهم شجعوا ولا حياة لمن تنادى
ياخوفى لنطلع نطلع وننزل على مافيش

Foxology يقول...

مهو الناس دى سافرت على اساس ان لو فزنا يبقى وشهم حلو علينا والحزن الوطنى قام بالواجب وزيادة وتبقى دعاية حلوة لانتخابات 2011 بس طلع نقبهم على شونة لأن الفلوس اللى سافرو بيها من دمنا احنا الشعب اللى كان نفسه يفرح لمجرد الفرحة مش علشان انتخابات

يمهل ولا يهمل

تحياتى

د. ياسر عمر عبد الفتاح يقول...

هيه دي المشكلة
الناس عندنا كانوا رايحين يحتفلوا
مش رايحين يشجعوا

لكن الجزائريين وزي ما قالت جريدة الظلام الجزائرية أو النهار سابقاً
يوم الثأر من آل فرعون

كانوا رايحيني يتخانقوا بجد
الناس دي أغلبها محضرش الماتش من اساسه
رايحين ياخدوا بتار ناس فهموهم إننا قتلناهم ,, ومع ذلك كانوا بيشجعوا في الإستاد

الشعب الجزائري عصبي جداً
ومشجعوا الكورة بتوعهم همجيين جداً
دول مات منهم 18 واحد في الإحتفالات
ده غير طبعاً المصابين

يبقي اللي علموه كان أقل واجب

حلم بيعافر يقول...

ماتخذ رادع قوى ولا يزال لدينا اوراق

همس الاحباب يقول...

مع الاسف دى حقيقة ومن اسباب تفاقم الازمة واحساسنا بالعجز والهوان
كان المفروض نتحرك وناخذ حذرنا لان كل البوادر تشير الى ان هناك مذبحة بالفعل ستحدث
قدر الله وماشاء فعل
تحياتى

Cute Kitty **sookra يقول...

والله دا حرام
اقولك حاجه لاحكومتنا هتعمل حاجه ولاترجعلنا حقنا ولاشكلنا ولاكرامتنا
ولااحنا هنعمل حاجه
هنطلع نطلع وننزل على مفيش لان ماعندناش حكومه تحمينا
هى بس تعرف تخوفنا احنا وتخلينا فران لكن تخوف حد تانى بره لاطبعا
تحياتى وكفايه كدا عشان هاروح مشوار لغايه ورا الشمس وراجعه

منــار فايد يقول...

عايزين رد رادع ونص
فعلا معاكي حق الموضوضع كل ماقدم فقد اهميته وقرب يتلاشى
هو احنا بنعمل اغلاط كتيره معاكي
بس ربنا اللي بيسترها
لاننا ماشيين بالبركه والفهلوه
اشكال ناس زي اللي اتكلمتي عنهم رايحين يتفسحوا
ومن منطلق المثل
(اللي يجي من الصعايده فايده)

نفسي بقى في خلال الاسبوع ده أشوف اللي يبرد ناري

غير معرف يقول...

معاكى حق

عاوزين رد رادع

بس مين يفهم وينفذ

Zouka's يقول...

رب ضارة نافعه-طيب ربنا اراد خيرا بالغلابه اللى ماسافروش
و اكيد الناس المهمه اللى اتبهدلت مالهاش ذنب
واعتقد ده جرس خطر على هوية مصر
وجائز ربنا اراد بنا ان نتوحد مهما كان سبب ذلك التوحد
كمان المهم الا ننسى الغلابه اللى شغالين فى الجزائر-ربنا معاهم ويطمننا عليهم ويرجعوا سالمين-
رب ضارة نافعه...........

Mafrousa يقول...

ايوووووون هوه الرد الرادع ابن ال......... اللى كنت مستنياه فى الخطبة بتاعة النهاردة
بس يا خسارة مش سمعت الرد الرادع
ولا سمعت اي حاجة تبرد ناري

انا عاوزة اروح الجزاير يا علا...اشد شعر البنات اللى هناك
نعملها خناقة حريمي يا أوختي..و نعلم على وشوش الستات هناك
حاجة تفرس يا بنتى.....يعنى مافيش واحد من اللى اتبطحوا ...ياخدوا الطوبة و يعوروا بيها واحد من الصويع دول؟؟؟؟؟؟
والله كانوا خافوا و جريوا
ياشيخة منها لله الكورة.....

mahasen saber يقول...

رد ايه نعلنها خرب يعنى مش كفايه خيبتنا التقيله والعراق وفلسطيين اليى مش عارفيين نعملهم حاجه
نقوم نقطع فى بعض كمان بالمره واسرائيل يله بالمره تاكلنا كلنا هم مم

ايه بس فيه ايه

الجواز و سنينه يقول...

ايه يا علا
ايه الابداع يا بنتى
ايه الرياضه اللى انتى فيها ده
و كمان طلعتى من الثوريين
انتى من الاحرار يا بنتى
موضوعك تحفه
بس هانقول ايه
عجبى

غير معرف يقول...

مهزلة مصرية جزائرية بقلم عبد البارى عطوان

تحتل اربع دول عربية المراتب الاولى على قائمة الدول الأكثر فسادا في العالم، اضافة الى افغانستان، حسب منظمة الشفافية الدولية، ولكن لم يخطر في بالنا مطلقا، ان تستخدم انظمتنا الرياضة من اجل تحويل الانظار عن فسادها ودكتاتوريتها القمعية، وبذر بذور الكراهية بين ابناء الأمة الواحدة، مثلما شاهدنا في الايام العشرة السوداء الاخيرة، التي بدأت وانتهت بمباراتي فريقي مصر والجزائر، في تصفيات نهائي كأس العالم الصيف المقبل في جنوب افريقيا.

نحن امام حرب حقيقية، وعمليات تجييش اعلامي ودبلوماسي لم يسبق لها مثيل، وكل هذا من اجل الفوز في مباراة كرة قدم بين فريقي دولتين وشعبين شقيقين، من المفترض ان الفائز من بينهما سيمثل العرب جميعا في هذه المسابقة الكروية الدولية.

عندما قرأت انباء عقد الرئيس حسني مبارك اجتماعا طارئا لاركان دولته، ابتداء من مجلس الوزراء ومرورا بقائد جهاز المخابرات، وانتهاء برئيس هيئة اركان الجيش المصري، تبادر الى ذهني ان مصر على ابواب مواجهة مصيرية مع اعداء الأمة والعقيدة......

باقى المقال فى صفحة الحوادث بالرابط التالى

www.ouregypt.us

amirelhob يقول...

حلوه اوى البوست بس مستغربيش على اللى حصل الاعلام الجزائرى حظرنا واحنا عملنا ودن من طين وودن من عجين حتى مفكرناش نقول ايه الجو فى السوادان غير بعد المتش وبجد عاجبنى اوى البوست قولتى فيه كلام جوانا كلنا ومن قلبى بتمنلك كل خير وسعاده وصحه وتوفيق وفح روابتسامه تدوم يا رب طول العمر

فاتيما يقول...

خلاص يا علا هيا خلصت على كدا
مفيش موقف رسمى
و اللى فاضل افراغ الشحن العصبى عند الناس و دى مهمة القنوات الفضائية دلوقتى
تخلى الناس تبعبع و تشتم براحتها لحد ما تحس بالراحة و خلاص
اما العلاقات و الدبلوماسيات و القتات و السلاطات ...فخلاص وقفت عند هذه النقطة
ظبط النفس و بتاع
لحد الماتش الجاى او النايبة الجاية
بخصوص موضوع المشجعين بقى
انا معاكى يا علا
و مش معاكى
معاكى إن كان لازم جمهور الدرجة التالتة و روابط المشجعين فى كل الاندية تسافر و ببلاش كمان على حساب الدولة رجال الأعمال أى حاجة ...
بس كمان مرواح الناس التانية مش غلط ..لأن محدش مهما كان توقع كم التجرؤ المهين اللى حصل
الجرى ورا الناس فى الشوراع ؟!!
طبعا انا بتكلم عن الناس العادية و طوائف المشجعين
لكن الدولة المصرية و السفير و الأعلاميين و اتحاد الكورة ..يتحملوا المسئولية كاملاً ....
لأن كان عندهم اخباريات من قبلها بتوتر الحال ..محدش سمعنا صوته غير وائل الإبراشى فى العاشرة مساءا بيقول يا ناس اعملوها بلا جمهور او امنوا الناس ...محدش أنتبه من المسئولين و دى الغلطة لكبرى من جانبنا ....
من جانب الجزاير بقى ..بلاش اتكلم احسن ...و كفاية المهم نشوف اخطائنا و نعالجها دون النظر الى رأى الآخرين و كراهيتهم من عدمها لينا ....
هتقولى الحل إيه؟؟
هقولك اللى ملوش كبير بيشتريله كبير
و احنا معندناش للأسف
يبقى التصرف إيه؟؟
إن الواحد يمشى جنب الحيطة و خلصنا
بدل ما يهين كرامته تانى
سلبية انا عارفة
بس المقاطعة السلمية هيا الحل الوحيد اللى يحافظ على البقية الباقية من كرامتنا إلى أن يقضى الله امرا كان مفعولا
بوسيلى الغزالون يهبلون و سيف
و عيد سعيد عليكى انتى و جوزك و اسرتك الصغيرة
و الكبيرة يا حبيبتى

شفـقــة و إحســــان يقول...

للاسف الناس دى سافرتش وماكنوش واخدين خوانة بجد ربنا على الظالم
وحسبى الله ونعم الوكيل

غير معرف يقول...

السلام عليكم
معلش هو فيه ايه بالظبط
هم يعنى كانوا يروحوا خناقه ولا حرب
دى مباراه كره
طبعا متفق معاكي فى انه المفروض فى حاجه زي ده متبقاش سبوبه الناس تكسب من وراها فلوس

انا معاكي ان اللى حصل ده زياده شويتين من شويه من الجمهور الجزائرى
وحقنا ده ييجي بالقانون والسياسه
انما بصراحه اللى قاعدين يشتموا ويقولوا الفاظ مش كويسه على الجزائر وتاريخها ده مش كويس
لو حد نزل بمستواه مننزلش معاه

لكن انا برضه ليا رأي مختلف شويه
احنا فى المباراه الفاصله لعبنا وضيعنا فرص وانهزمنا وده مش اخر الدنيا
انما احنا غلطانين اصلا اننا اتعادلنا مع زامبيا فى ارضنا فى بدايه التصفيات وده لوحده -باذن الله- كان يخلينا نصعد
ليه كل مره لازم نخش فى حسابات معقده
معلش انا اوقات كتير بيكون ليا اراء يتزعل
لكن الاختلاف فى الراى لا يفسد للكوره قضيه

Mafrousa يقول...

بيقولو الالتراس سافروا مع الحزب الوطني
بس مش سمعنالهم حس يا اوختى
و لا همه شماليل فى بلدنا بس
حاجة توجع البطن
قريبة جوزي كانت هناك مع قناة الحياة
بتقولك اغلب اللى كانو هناك كانو خايفين على وشوشهم تتعور
علشان عمليات الشد و النفخ و السليكونون و البوتاس...قصدى البوتوكس
هههههههههه حاجة تفرس
انا نفسي يعنى اعرف دول لو كانوا لموا شوية ظلط و حد عمل نبلة ينشنها على العيال
و الله كانوا خافو
اسكتى يا شيخة ده انا مفروووووووسة

م/ الحسيني لزومي يقول...

كل عام انتم بخير
تقبل الله منا ومنكم صالح الاعمال

micheal يقول...

ضيفي على كل ده:الفنانين اللي سافروا على نفقة الدولة
مش كفاية مالهمش فيها..كمان يسافروا على قفا الضرايب
!!
أتمنى وجود قرارات رادعة للكل
الموضوع بوخ أوي
تحياتي

micheal يقول...

عيد سعيد قبل ما أنسى
:)

Pink Dreams يقول...

كل سنة وانتى طيبه و يا رب عيد كله سعاده و هنا و طاعة لله تعالى

عيد اضحى سعيد

جلال كمال الجربانى يقول...

السلام عليكم

قبل مانأخد حقنا من الجزائريين
نأخذ حقنا الأول فى بلادنا
ده الغاز المصرى بيروح لأسرائيل تقريباً ببلاش يعنى بندعمهم
وأنا لسه بأدوخ بالأمبوبه
ووزرائنا هنا بيعايرونا بالدعم
ولازم نعرف ليه العرب ككل تقريباً ماعادوش بيحبونا وليه مصر معادش ليها مكان ولا مكانه
وكل عام وأنتِ بخير حال

ودمتِ فى أمان الله وحفظه

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .