الأحد، يوليو 05، 2009

اللهم اغفر لها و ارحمها

ربما اكون لا اعرفها معرفه شخصيه و لكن تربطنى بها علاقه انسانيه

فهى مصريه و صيدلانيه يعنى كمان زميله

كلنا عرفنا مروه الشربينى بعد وفاتها نتيجه الحادث العنصرى الهمجى البشع

اللى اتعرضت له فى المانيا على يد متخلف ارهابى المانى مش عربى

زى ما دايما بيقولوا علينا

اللى يزعل ان البنت بعد ما اتقتلت محدش هان عليه من السفاره انه يكلم اهلها

و يديهم خبر باللى حصل لها خصوصا ان جوزها كمان اتصاب باصابه خطيره

لما حاول يدافع عنها و ينقذها و اصابته كانت على يد البوليس الالمانى

اللى ساب المجرم يدخل قاعه المحكمه بسكينه و يطعن البنت 18 طعنه

من غير ان يحرك ساكنا و اتفالح على جوزها اما حاول ينقذها

الموضوع كله مأساوى خصوصا انها سابت طفل عمره 3 سنين

كانت حامل فى 3 شهور يعنى المجرم قتل روحين بدم بارد

اللى حصل ده لازم يكون للحكومه المصريه وقفه حازمه حاسمه معاه

لانها مؤشر خطير لمدى تردى العلاقه بين العرب فى المهجر و بين اهل البلد الاصليين

لازم حد ياخد حق الشهيده دى و لاازم الخارجيه المصريه تتصرف

لان المصريين مش رخاص و دمهم المفروض يكون غالى عند اهل بلدهم

مش نحس ان الموضوع عادى و كأنه لم يكن و انها كلبه و راحت

بجد ده الاحساس اللى بنحسه كلنا كمصريين اما حد بيحصله حاجه فى الغربه

كل بلاد الدنيا بتقوم الدنيا و تقعدها اما حد من عندها يحصله حاجه فى بلد تانى

الا المصريين مش عارفه ليه

و ياريت ميبقاش الاهتمام بالحادث ده نتيجه اهتمام وسائل الاعلام بيه

يعنى يبقى من باب حفظ ماء الوجه

مش عارفه اقول ايه تانى غير ربنا يرحمها و يسكنها روضه من رياض الجنه

و يجعل محشرها مع الشهداء و الصديقين

و ارجو من كل من يقرأ البوست على اختلاف ديانته ان يدعو لها بالمغفره و الرحمه

و ان يلهم اهلها الاصبر و السلوان


هناك 23 تعليقًا:

موناليزا يقول...

حسبى الله ونعم الوكيل
ربنا يرحمها ويغفرلها
اللهم عليك بأعدائك أعداء الدين فانهم لا يعجزونك
يارب انتقم لها ولكل نفس أذهقت روحها بغير وجه حق اللهم امين

Mafrousa يقول...

الله يرحمها و يصبر اهلها و يشفى جوزها يارب
و يعين الاهل على تربية الابن احسن تربية
انا زعلانه جدااا من الحادثة ديه
و مفروسة من حكومتنا اللى مش عرفت لغاية دلوقتى تاخد بتارها و تبرد نارنا احنا اللى قاعدين فى بيوتنا
و الله يا علا ساعات بقول ان الغرب مالوش ذنب فى اللى بيعمله فينا ولا حتى العرب
عارفه ليه لاننا اصلا مالناش قيمة فى بلدنا و بيتعمل فينا البدع
تقدري تقوليلي بأمارة ايه بقا اغرب ولا العرب يحترمونا
ولا زويل ولا نجيب محفوظ يكفوا علشان يحترمنا العالم
اجنا نستاهل اكتر من كده يا ماما مش عارفين نجبر العالم على احترامناو يعملولنا الف حساب

اشمعنا الامريكاني بيتعمله الف حساب فى العالم كله
و الفرنساوي و الكندى و الانجليزي
و غيره و غيره
انا مفرووووووووووووسة جداااااااااااااااااااا
و نفسي يبقى لينا قيمه بقا
و احنا برضه على فكرة ما عملناش اي حاجة علشان الغرب يحترم اسلامنا و يتقبله
اشمعنى بيتقبلو اليهود و البوذيين و الهندوس
احنا يا علا اللى بنتهاون فى حقوقنا و بكرة حيكون فيه مروة تانيه و تالته و ابقى قولى مفروسة قالت

Empress appy يقول...

ربنا يرحمها يا علا حقها عند اللى خلقها

شموسة يقول...

إن لله وإنا إليه راجعون
حسبي الله ونعم الوكيل

بجد مش عارفه اقول غير كده

عاشقه الرومانسيه يقول...

حقها عند ربنا
حسبى الله ونعم الوكيل
الله يرحمها ويشفى زوجها ياااااااارب
):

سمسم/سما يقول...

السلام عليكم
ربنا يرحمها ويرحمنا من
الذل الي احنا فيه
لو كان للمسلمين قوة
مكنش اتعمل فينا ده
لا حول ولاقوة الا بالله

شريكة في المطعم يقول...

انا لله وانا اليه راجعون
الله يرحمها ويغفرلها
ويشفي زوجها ..آمين يارب

Zouka's يقول...

البقاء لله-
ياجماعه نرجو السفاره فى اى بلد بالتواصل واحتضان كل مصرى فى الخارج-
ده حق كل مصرى

وعجبى

Unknown يقول...

الله يرحمها ويصبر ذويها
نسال الله ان يغفر لها ويدخلها فسيح جناتة

Unknown يقول...

علا بصى ادخلى مدونتى هتلاقى على اليمين كلمنى
اضغطى عليها هتدخلى على الميل اكتبى رسالة عرفينى انك انتى لانى مش بدخلة كتير
وعشان اقبل الاضافة

Unknown يقول...

وانتى تأمرى يا قمر

promise is promise يقول...

عارفه ايه اللى يكيد فى الموضوع ده يا دكتوره هو تكتم الخبر وعدم السماح لاهل الشهيده بزياره زوجها لا كمان عدم السماح لهم بأخذ ابنها

واللى يكيد اكتر هو خبر قريته النهارده فى المصرى اليوم وهو اطلاق اسم الشهيده على احد شوارع الاسكندريه
وكأننا بكده خدنا بثارها

حسبنا الله ونعم الوكيل

وربنا يجعلها فى الجنه ان شاء الله

والسلام ختام

أمل حمدي يقول...

ربنا يرحمها ويغفرلها

حسبى الله ونعم الوكيل

عاشقة القمر يقول...

اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار .
اللـهـم عاملة بما انت اهله ولا تعامله بما هو اهله .
اللـهـم اجزه عن الاحسان إحسانا وعن الأساءة عفواً وغفراناً.
اللـهـم إن كان محسناً فزد من حسناته , وإن كان مسيئاً فتجاوز عن سيئاته .
اللـهـم ادخله الجنة من غير مناقشة حساب ولا سابقة عذاب .
اللـهـم اّنسه في وحدته وفي وحشته وفي غربته.
اللـهـم انزله منزلاً مباركا وانت خير المنزلين .
اللـهـم انزله منازل الصديقين والشهداء والصالحين وحسن اولئك رفيقا .
اللـهـم اجعل قبره روضة من رياض الجنة ,ولا تجعله حفرة من حفر النار .
اللـهـم افسح له في قبره مد بصره وافرش قبره من فراش الجنة .
اللـهـم اعذه من عذاب القبر ,وجاف ِالارض عن جنبيها .
اللـهـم املأ قبره بالرضا والنور والفسحة والسرور.

ahmed_k يقول...

رحمها الله رحمة واسعه وأسكنها فسيح جناته مع الشهداء والصديقين والأنبياء
وحسن أولائك رفيقا
يا دكتوره الإجابه على سؤالك بسيطه
لما راحت النخوه من حكامنا وأصبح نظرهم تحت أقدامهم لمصالحهم الشخصيه وفقط هان أمرنا على العالم
ولن نصبح ذو كرامه إلا بالتغيير الفعلي وأظنها هانت إن شاء الله

Hossam يقول...

صديقتى العزيزة
عندما شعرت باننى ماثر فى حقك قررت دخول مدونتك حتى اعبر عن مدى شوقى لها ولكتاباتك
ولكن الموضوع فعلا ماثر فيا بجد ربنا يرحمها ويصبر اهلها ويحافظ على ابنها
تحياتى

micheal يقول...

ربنا يرحمها وأتمني موقف إيجابي من الخارجية المصرية وكل الجهات المعنية
تحياتي

الجواز و سنينه يقول...

ربنا يرحمها يارب
تعرفى انا بحس ان البنت دى اكيد كانت نقيه اوى من جوه علشان الدنيا تتقلب عليها كده
لان فى نفس الوقت شيخ اتحرق فى امريكا و لا حس و لا خبر
مش عارفه يمكن علشان احنا نقدر على المنيا لكن امريكا لاء مثلا
و لا مش نحارب فى جبهتين مره واحده
الله اعلم

mahasen saber يقول...

ربنا يغفرلها ويسكنها فسيح جناته

ويصبر الهلها

ويتولى ابنها برحمته الواسعه

elsha3er يقول...

ربنا يرحمها يارب هى دلوقتى شهيدة عند ربها لمهم من كل دة ازاى ننصرها وناخد حقها


تحياتى


احمد الشاعر

زى الهوا يقول...

إن لله وإن اليه راجعون

ربنا يرحمها

Asmaa mahaba يقول...

مروه ذهبت الى الجنه باذن الله الدور والباقى علينا يا دكتوره محدش عارف حنروح فين بضعفنا وقله حيلتنا وقله موقفنا اللى احنا فيه دا

Sameh Ezzat - (خواطر خاطر) يقول...

انا عارف ان الموضع قديم بس لما قريته رجعت افتكرته وزعلت جدا ..وزعلت اكتر لما الموضوع فات عليه مده وبدأ يتنسي عندنا و كالعادة دمها هيروح هدر زى بقية دم المصريين إللى راح والخارجية مش هتعمل حاجه..
طيب فين إعلام أمريكا وهيجانه
لو واحد مسلم مربي دقنه او حتى نسي يحلقها بقاله يومين فعل نفس الفعل وقتل واحد ألماني أو أمريكي كان كل الإعلام فى الدنيا كلها على مدار الأربع وعشرين ساعة شغال كلام وتصوير والبحث فيما وراء الخبر عن مدى التشابه بين الإرهاب وأبو دقن !!
والله لو الكرامة بتتباع كونا أشترينا

رحم الله القتيلة وغفر لها ، ونجى الله زوجها وصغارهااليتامى

ولا حول ولا قوه الا بالله

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .