الاثنين، مارس 16، 2009

صدفه ....بس حلوه قوى

كل الحاجات الكويسه اللى حصلت اليومين اللى فاتوا كانت كلها صدفه
اكتشفت عمتى للاسف اصابتها بالمرض الخبيث فى منطقه نادره الحدوث طبقا لرأى الدكتور
و كانت خلاص اتفقت على عمليه الاستئصال فى اسيوط و الامور ماشيه عادى جدا
لغايه ما جوزى بالصدفه كان بيزور الدكتورنظرا لشغله فى مجال الدعايه و سأل الدكتور عن حالتها
و عرف اننا قرايبها راح قاله انه لسه كان حيتصل بيهاعشان يقولها على اقتراح حيفيدها قوى و ان
حالتها نادره و التدخل الجراحى العادى حيشوه وشها اضافه لعدم دقته فى منطقه المرض الدقيقه
و هى منطقه الجيوب الانفيه و ان الحل المقترح هو الجراحه الميكروسكوبيه عند طبيب مشهور
فى الاسكندريه او القاهره
طبعا جوزى رجح الاسكندريه لان والدى عايش هناك حاليا من بعد المعاش
ماما من فتره كانت شبه مقاطعه لاهل بابا نظرا لمشاكل قديمه بس فجأه الامور اتغيرت بعد الموضوع
ده و زى ما بيقولوا الدم عمره ما يبقى ميه و لقيت ماما اتبدلت و الدنيا بقت غير الدنيا
و نزلت مع بابا استقبلتها فى المحطه وفضلت معاها ما بين دكتور و تحاليل و بقت كل يوم تتفنن تعمل
لهم اكل ايه و ترحب بيهم ازاى و يوم العمليه امبارح فضلت معاها من الصبح لغايه 9 مساءا
و عماتى الباقيين سافروا لهم عشان العمليه و فضلت عمتى تدعى لماما و تحكى لهم على اللى امى
عملته معاهم و الفسح و الاهتمام بيهم هيا و جوزها
طبعا عماتى بقوا فرحانين قوى ان المشاكل خلصت و الذكريات الوحشه اتنست و بقوا كأنهم
و لا كانوا متخاصمين و لا حاجه
انا فرحانه قوىباللى حاصل دلوقتى صحيح ان فيه مرض ظهر بس كان سبب ان الناس تنسى زعلها
و خصامها و يتلموا مع بعض عشان يقفوا جنب عمتى فى محنتها
صحيح كان نفسى ده يحصل من غير مرض لكنها مشيئه الله و رب ضاره نافعه
انا باشكر جوزى قوى لانه كان سبب غير مباشر فى كل السعاده اللى انا فيها دى و على رأيه
ادينى اديت فرصه لمامتك و باباكى يلموا شوالات ثواب
و عايزه اقوله انهم كلهم بيدعو له بالصحه و الستر
و عايزه كمان اقوله ان من ساعه ما عرفتك كنت سبب دائم للم شمل اسرتى من ساعه
خطوبتنا و لغايه دلوقتى
ربنا يخليك لينا و يكتر صدفك و مفاجآتك الحلوه

هناك 35 تعليقًا:

Mafrousa يقول...

اولا سلامة عمتك الف سلامة و ربنا يتمم شفاها على خير

ثانيا مبروك للم الشمل تاني
و ربنا يباركلك فى جوزك يارب و يسعدكم و يهنيكم و يباركلكم فى اولادكم
تحياتي
اللهم عافنا و اعف عنا
الحمد الله اللذى عافانا مما ابتلى به غيرنا

blue-wave يقول...

ربنا يكرمك ويكرمه ويفضل مجمعكم كدا فى الخير يارب

Zouka's يقول...

كان الله فى عون العبد مادام العبد فى عون اخيه-

موناليزا يقول...

سبحان الله فعلا
وعسى ان تكرهوا شيئا وهو خير لكم"صدق الله العظيم
ربنا يشفيها ويخليلك زوجك ويبارك فى اسرتك جميعا ويسعدك دايما ياحبيبتى

مسدس صغير يقول...

اذا انقع الرجاء
وعجزت الاطباء
وأقروا بأنه لا دواء
وظننت ان الحزن ما له من جلاء
فقل يارب
يا خالق الارض والسماء
اشف انت الشاف
شفاء لا يغادر سقما
اذهب البلاس رب الناس.
امين
اتمنى لكى الخير والسعادة

Empress appy يقول...

حمد لله على سلامتها يا رب
عارفه ان اصعب بعد هو بعد الاهل عن بعض وخاصه الكبار لانه بيتعب الصغيرين جدا وبيعمل فرق فى التعامل بينهم

قلب ينبض بالحب يقول...

ربنا يباركلك في زوجك ويجعله خير عون ليكي ويبارك لكي في صلة رحمك ورب ضارة نافعة ولولا مرض عمتك ما كانت المياه رجعت لمراسيها بلاش الكلمة التانية مش بحبها دمتي بكل الخير وكل سنة وانتي طيبة

فاتيما يقول...

سلامتها ألف سلامة و ربنا يشيفها إن شاء الله
و فرحانة قوى لأن الشمل إتلم
صحيح المحن بتجمع الناس اللى جواها حلو و نضيف
لو كل بس الناس تحاول ترمى الماضى وراها و مش لازم يبقى فيه تهديد عشان يبقوا كويسين مع بعض مكنش فيه حد تعيس ...
المهم إن ربنا وفق القلوب اخيراً
و أنا بدورى بشكر زوجك العزيز على وقفة الرجالة دى و اللى بقت نادرة الأيام دى قوى ...
ربنا يهدى سركم و يحافظ إسرتك
الكبيرة ...و الصغيرة
خالص حبى يا حبيبتى

momken يقول...

ربنا يكرمكم ويتم عليكم رضاه

تحياتى

رئـــــيسـة حزب الأحلام يقول...

الف سلامة لعمتك وربنا يشفى كل مريض
ياااااااااااااارب امين
وربنا يبارك لكى فى زوجك
وربنا يعطيكى ويعطينا الصحة
تحياتى لكى ياقمر

صيدلانيه طالعه نازله يقول...

مفروستى:الله يسلمك و يباركلك فى صحتك و يديكى كل اللى تتمنيه
================================
blue-wave:ربنا يخليك و يبارك فيك و شكرا لمرورك و دامت محبتك
=================================
اشرف: المفروض انت المره دى اللى ترد على التعليقات مش انا
دمت لنا يااااااارب
================================
موناليزا:تصدقى فعلا انا بجد كنت شايله هم موضوع اسكندريه ده طلع الحمد لله فيه الخير كله و قدر يقرب الناس كلها و يكون سبب لنبذ الخلافات
شكرا و دمتى لى دائما صديقه مخلصه
=================================
مسدس صغير:جميل قوى الدعاء
ربنا يبارك فيك و يديم عليك صحتك
=================================
Appy:فعلا و الله اما الكبار بيزعلوا بيفرقوا الصغيرين مهما حصل و بيبقوا بعد كده بعاد حتى لو اتصالحوا
نورتينى
=================================
قلب ينبض بالحياه:ربنا يكرمك و تصدقى فعلا مراسيها احلى من التانيه
شكرا لزيارتك و دمتى صديقه وفيه
==============================
فاتيما:ازيك يا حبيبتى عامله ايه ربنا يكرمك يارب و انشاء الله ربنا يجمع شملك انتى كمان مع يوسف قريب و نيجى نهنى و نبارك يااااااااارب
فعلا يا فاتيما اللى حصل ده كان حلم بعييييييييييد و سبحان الله اتحقق ببساطه شديده خالص
نورتينى
==============================
momken:امييييييييين يارب العالمين
=================================
رئيسه حزب الاحلام:ربنا يخليكى و يكرمك و ياريت كلنا لو فى ايدينا نصالح و نساعد بعد منتأخرش
نورتينى
==================================

Unknown يقول...

طيب الحمد لله ان الشمل اتلم تاني
الف مبروك و ان شاء الله الشيطان ميخشش تاني
و ادعوا بقي بالهداية للي لسه في بينهم مشاكل من قبل مانا اتولد !!!!
ادعوا ربنا يحلها و يجمع شملهم

عاشقه وغلبانه يقول...

الف سلامه علي عمتو وربنا يشفيها


ويجمع شملكم دايما علي خير
الدنيا مش مستاهله فراق ولا زعل

تحياتي

Unknown يقول...

الف سلامة على عمتك
فى الشدائد تظهر المعادن
وتظهر حقاق الانسان ومعدنة الطيبة
ووالدتك معدنها طيب
عشان كدة عفت ما سلف

ربنا يشفى عمتك ويشفى كل مريض يارب العالمين

الضاحكون يقول...

وانا من هنا ومن موقعى هذا اتقدم لزوجك بالشكر ليضا على لم شمل الاسره
والف الف الف سلامه لعمتك
ونداء لكل الناس
الا ننتظر المرض والصعاب لنتكاتف
دعونا نتكاتف فى كل وقت

عبده الرايق

قوس قزح يقول...

ربنا يسعدك بزوجك و يكرمك به كمان و كمان
و الف سلامة على عمتك و يارب تكون العملية نجحت و تقوم بالسلامة ان شاء الله
اما حكاية الخصام ده .ز انا بستغرب ليه دايما اهل الاب بتكون صورتهم خافتة فى حياتنا .. غير اهل الام
عموما الحمدلله على الصلح
و زى ما بيقال ربا ضارة نافعة

مهمتك انتى بقى ان بعد ما تسافر عمتك انك تفضلى على اتصال دائم بها و تحافظى على قربهم ده من بعض

ربنا يخلى كل ايامك صدف حلوة و سعيدة

غير معرف يقول...

الف سلامه علي عمتك يادكتوره
وان شاء الله يتم شفائها علي خير
وربنا يبارك لك في زوجك وووالديكي ياجميل

Asmaa mahaba يقول...

سبحان الله ديما يجعل فى قضاه رحمه والمرض والموت يقربوا الناس من بعضهم ربنا يتم شفاء عمتك على خير واكيد دا حيعود لماما فى صحتها باذن الله
ويكفيكم شر المرض

Mahmoud Ibrahim يقول...

ربنا يشفيها .. ويقيمها بالسلامة

ويخليلك الزوج العزيز ويارب كلنا نكون زيه

Beram ElMasry يقول...

السلام عليكم ورحمة الله وبركاته
عزيزتى الغالية ،انت ام اليوم او غدا ، فكل عام وانت بخير فى عيد الام ، وان كنت تتمنين لطفلك ان يحيا امنا فلقنيه ان الاسرائيلى شر كله ، فلا يامنه برهة ، ولا يسالمه مدى الحياة

يهودى يعنى حنش احسن دوا تقطعوا راسه
كلام نقوله لنسلنا نطبعوا فى كتابه وكراسه
لك تحياتى والسلام عليكم ، ولا سلام مع اليهود
بيرم المصرى

Ophelia - cfd يقول...

ألف سلامه على عمتك

ربنا يتم شفاها على خير

والحمد لله ان الشمل اتلم من تانى

صيدلانيه طالعه نازله يقول...

طعميه سخنه:و الله و مين سمعك كلنا المشاكل عندنا من قبل ما اتولد برضه
ربنا يهدى الناس جميعا و دايما يلم الشمل
نورتنى
==================================
عاشقه و غلبانه:الله يسلمك يا قمر و الدنيا متستاهلش مننا اننا نضيع لحظه فيها فى زعل و خصام
==================================
نهر الحب: شكرا على سؤالك و الانسان فعلا اما بيكون زعلان بيبقى هاين عليه كل حاجه لكن ساعه الشده بينسى الاساءه و يجرى يساعد الناس فورا
================================
الضاحكون بقياده عبده الرايق:ربنا يخليك و يديك الصحه و يبعد عنك المشاكل و الخصام و اقسام البوليس
هههههههههههههههههههههه
==================================
قوس قزح:الحمد لله العمليه نجحت و رجعت اسيوط و بقت كويسه و ربنا يكمل شفاها على خير
و ربنا يديم الحب دايما بين الناس
شكرا على اهتمامك يا قمر
=================================
مياده:الله يسلمك و يبارك فى صحتك يارب
و شكرا للاهتمام
==============================
سومه:ميرسى يا قمر و فعلا رب ضاره نافعه
المهم ربنا يكمل شفاها على خير و الباقى سهل
===========================
Zidan:اللهى يسلمك و شكرا للاهتمام
و ربنا يبارك فيك
==================================
Beram:شكرا للمرور و لو انك ليك رساله تانيه خالص كلنا طبعا نؤيدك فيها بشده و ربنا مع كل الناس اللى ليها رساله فى الحياه انشاء الله
=============================
زهره الامل:شكرا يا قمر و نورتينى
================================

Unknown يقول...

ان شاء الله سيتم اصدار كتاب قصة حب سرية للكاتب عمرو الجندى مع بدايات شهر ابريل ان شاء الله

مع شكر خاص لطاقم العمل

اللينك
http://www.amralgendy.blogspot.com/



http://www.facebook.com/inbox/readmessage.php?t=71789721807&mbox_pos=0#/topic.php?uid=45243591058&topic=7688

متمنين التوفيق للجميع

Foxology يقول...

الف سلامة على العمة وان شاء الله خير

ربنا يديم المحبة والمعروف ويشيل اى مشاكل

تحياتى :)

ahmed_k يقول...

ألف سلامه على عمتك وربنا يرجعها بألف سلامه
وفعلا كما قلتي رب ضارة نافعه
فالمعدن الأصيل بيظهر وقت المحن
والقلوب العامره بالحب هي التي تنسى الخصام وتعود سريعا لحالة الحب والعطاء
ربنا يبارك في والدك ووالدتك ويجازيهم خير الجزاء

وكل سنه وحضرتك طيبه بمناسبة عيد الأم

Unknown يقول...

سلامة عمتك الف سلامة وربنا يشفيها ويعافيها باذن الله

وربنا يباركلك فى جوزك ويسعددكم دايما باذن الله :)

قلب ينبض بالحب يقول...

انا جيت علشان اشوف الجديد مش لقيته يارب يادكتورة بقى يجي الجديد لاني بستمتع جدا بكتابتك وبحس وبصدق وتلقائية في الكلمات

الجواز و سنينه يقول...

حمدلله على سلامه عمتك يا جميل
و ربنا يخليلك دكتور اشرف
و الف مبروك على لم الشمل تانى
سلاموز

حاجات جوايا يقول...

ربنا يخليهولك يارب ويباركلكوا فى حياتكوا

سبحان الله الناس بتبان اوووووى فى وقت الشدة
الكويس بيبان والوحش بيبان
ربنا يبعد عنكوا كل سوء

ألف سلامة على عمتك ربنا يشفيها ويعافيها ويخليهالكوا يارب

غير معرف يقول...

ربنا يشفي عمتك و يسدعكم دايما
تحياتي لك

شفـقــة و إحســــان يقول...

الف مليون سلامة لعمتك ... وبجد حاجة حلوة اوى ان الزعل يتنسى وانكم ترجعوا علاقتكم بقرايبكم شىء جميل بجد صلة الرحم
وربنا يخليلك جوزك وش السعد
تحياتى

Tamer Nabil Moussa يقول...

السلام عليكم

حمد الله على سلامتها

ربنا يتتم شفاها على خير

تحياتى

صيدلانيه طالعه نازله يقول...

باشكر كل الناس اللى عبرتنى و مقدرتش ارد عليهم لانى مش كنت فاضيه
كان عندنا امتحانات الشهر و عقبال عندكم

القمر الساهر يقول...

ربنا يشفيها ويشيل عنها ياارب

ويشفي مرضى المسلمين

ومامتك لانها ست اصول عملت كدا

وعلشان نعرف ان الدنيا بجد مش تسوى

غير معرف يقول...

اولا ربنا يشفي جميع مرضى المسلمين في كل مكان وكل زمان.
ثانيا ادهشني صدقك في كل كلمه قلنيها عن هذا الموضوع،فالجميع دائما يحاول الظهور في اطار جميل دون ان يعلم احد شيئا من عيوبه اوعيوب احبائه المقربين فما بالك بالعائله الكريمه.
تحياتي لصدقك وصراحتك.
وطبعا لأخي العزيز.
اختك نوجه
او
بنت النيل

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .