فالخوف و القلق والرهبه ...مشاعر امتزجت كلها,بعد خروجى من بوابه
المستشفى ..خائف ,و كاننىمولود صغير يحبو فى الطريق..مولود من اول و
جديد"
هذه الكلمات جاءت على لسان صلاح بطل روايه ربع جرام اللى اخيرا انتهيت من قراءتها
الروايه دى بتدور فى عالم مدمنى المخدرات بكل ما يحتويه من سقوط و تسيب و لا مبالاه
صلاح بطل روايتنا شاب عرف طريق الادمان من وهو عنده 7 سنين كان بيشرب وسيكى و يزود القزازه ميه
عشان والده ميعرفش مرورا بالحشيش و الادويه الخدره انتهاءا بالهيروين
حاول يبعد كتير و يبطل ضرب لكن كان ضعيف جدا امام المخدر و كان معتقد انه ممكن لو عايز انه يبطل فى اى
وقت بس لما حاول ما قدرش
الروايه وريتنا مصير معظم المدمنيين سواء بالموت او القبض عليهم او اصابتهم ببعض امراض الدم نتيجه
تلوث السرنجات و ضعف الكبد من المخدرات
اجمل جزء عجبنى اما راح يبارك لبنت عمه على فرحها و لقى الخاتم بتاع الشبكه و سرقه قد ايه كان حقير و قد ايه
الكاتب كان حريص يوضح لنا ازاى الادمان بينزل بصاحبه للحضيض
و عجبنى جدا بعد ما بطل و راح يعتذر لسلمى بنت عمه و يردلها تمن الخاتم
قد ايه رجع انسان تانى و بدأ يحس باللى حواليه
تركيزهم فى احداث الموت لاصحابهم كان كويس قوى لغرض توضيح مصير كل مدمن مصر على ادمانه
الجزء اللى بدأ من اول دخوله المستشفى و توضيح حالته كانت فين و بقت ازاى فى الاخر كان اكتر من رائع
اجتماعات المدمنيين مجهولى الهويه كانت اكتر من رائعه و فيها دعوه لكل مدمن ان فيه امل فى بكره
طالما فيه عزيمه و اراده و نيه و امانه و امتنان
لا اخفيكم سرا انى تعبت قوى و انا بقرأ الروايه دى
ضحكت كتييييييييييييير قوى عليهم فى البدايه و خصوصا فى جزء ماتش الكوره اللى نزلوه و هما محششين
و بكيت اكتر بكتيييييييييييييير من الضحك فى معظم اجزاء الروايه خصوصا فى الجزء الاخير بس كانت دموع
فرح لصلاح بعد مارجعتله روحه و بطل بودره
اتغاظت كتييييييييييييييييييييير قوى مع كل مره كانت بتجيله فرصه انه يخف و ضيعها و كل ما اقول ربنا هداه
الاقيه جرى راح ضارب و رجع
تعاطفت كتير مع مريم حبيبته اللى ضحت عشانه كتير و كانت بتعملله كل اللى هوا عايزهو كان نفسى يكملوا مع
بعض
حبيت قوى دكتوره عاليه اللى كانت طوق النجاه لصلاح و قدرت تنقذه من اللى كان فيه
من الاخر كل اللى جم فى الروايه حبيتهم حتى المدمنين لان وجودهم قرب لنا فداحه الخساره فى عالم الادمان
و ان الداخل مفقود و الخارج مولود
ياريت الروايه دى تنتشر اكتر و اكتر لانها رساله تحذيريه شديده اللهجه لكل انسان بيفكر مجرد التفكير فى
المخدرات و ياريت يحرص القائمين على المصحات العلاجيه للادمان على تواجدها لانها رساله تحذيريه
و الروايه لغتها سهله وواضحه و دارجه يعنى اى حد ممكن يقراها و يحس بيها و يفهمها
و فى الاخر احب ادعى و اقول
يااااااااااااااااارب احمى شبابنا و بناتنا و اهديهم و ابعدهم عن كل اللى
يضرهم
آآآآآآآآآآآآآآآآآآآآمييييييييين يارب العالمين
هناك 21 تعليقًا:
انا متحمس ليها بجد وشايفها من ابدع ما كتب فى الرواية المصرية السنين الاخيرة خاصة انها مكتوبة بلغه عاليه تناسب الوسط بتاع المدمنين اللى بيدور حواليها الرواية كمان عجبنى انه قدم طريق للي عايز يبطل بجد ممتعة
امين يارب
انا هاحاول اقراها
انا عندي الروايه دي من شهر تقريبا
كنت شفت لقاء علي دريم للكاتب واحترمته قوي فحبيت اشوف هو كاتب ايه بس لسه مقرتهاش للاسف بس هبدء وهرجع اعلق تاني
فتحتي نفسي والله يادكتوره
رئيس جمهوريه نفسى:انا برضه متحمسه ليها جدا و لو كانت لغه عربيه كنت طالبت انها تتدرس فى المدارس و لو ان ده مش مهم لانها مفيده فعلا
==================================
blue-wave:حمد الله على السلامه و الروايه دى خير من يخرجك من الاكتئاب بجد
==================================
mayada:اوعى تخلينى استنى لاخر الروايه لاحسن و الله اجى اخطفك
بس حضرى جنبك علبه مناديل جامبو عشان العياط للركب
مستنياكى
=================================
على فكرة انتى جميلة اوى:)
مزيد من القيم مزيد من الاخلاق الرفيعة .
رواية اعتقد انها رائعة بسبب تلخيصك لها فى كليمات بسيطة لكنها معبرة الى مدى بعيد .
اشكرك على السرد المتميز
واشكر لكى نشر مبادئ كثيرة للشباب والتثقيف والتوعية فى مجالات شتى منها الادمان وآثاره السلبية على الانسان فى شتى مناحى حياته.
لكى عظيم الشكر
تحيتى وخالص مودتى
المخدرات زي ماقولتي الداخل مفقود والخارج مولود
دوامه الانسان بيدخل فيها نفسه بنفسه بمنتهي السهوله واراده منكسره
وهو برضو اللي بيخرج نفسه بنفسه بس بصعوبه وباراده قويه
موناليزا:ربنا يخليكى و دامت محبتك
==================================
مسدس صغير:الادمان شيىء بشع و مدمر وواجبنا اننا نحاربه و لو بطريقه غير مباشره عن طريق نشر الافكار المناهضه له
انا الروايه دى ناويه اول ما ابنى يكبر شويه كمان و يبدأ يفهم اخليه يقراها علشان يبقى تحذير شديد اللهجه ومن غير ما انا اقوله حاجه و اسيبه يفهم لوحده
تحياتى لك
=================================
عاشقه و غلبانه:فعلا الاراده و العزيمه و الرغبه فى اصلاح الذات هى الدافع الوحيد للشفاء
================================
واضح انها قصة قوية
هدور عليها و اقراها
بس فعلا اغلب الجرايم البشعة بيكون فاعلها انسان مدمن
ربنا ما يخلى اى حد يمر بالتجربة دى
الرواية جميلة جدا على فكرة وقوية من ناحية الأسلوب والأخراج الفنى :)
من أفضل الروايات المصرية فى الفترة الأخيرة بالتأكيد
وبالرغم من سعرها المرتفع نسبيا الا انها تستحق الحقيقة :)
بوست جميلة .. تحياتى :)
اشكرك على ذوقك الراقى وادعو الى القرأه وشكرا
قوس قزح:بجد حتنبسطى قوى اما تقريها لانها اكيد حتقدم لك تجارب عمرك ما مريتى عليها قبل كده
===================================
Foxology:هى فعلا حلال فيها الفلوس و ياريت مكتبه الاسره تنزلها لان سعرها الغالى حيكون عقبه امام شريحه معينه المفروض انها تقراها
=================================
اشرف:شكرا على زوقك انت يا دوك
السلام عليكم ورحمى الله وبركاته
الاخت الغاليه بنت بلدي اسيوط
هذه الزياره الاولي لي لمدونتك فارجو ان تتقبلي مروري
اول ما شفت اسم المدونه قلت في نفسي
هو فيه صيدليات في الادوار العلي
لكن لما كملت عرفت سر التسميه
واذا عرف السبب
موضوع جميل واجمل منه دعواتك لشباب وفتيات بلدنا
مع خالص تمنياتي لك بالسعاده والصحه الدائمه
محمد فارس:نورتنا فى اول زياره و اتفضل تورته من البوست القديم
لاحسن يقولوا اسايطه بخلاء
التورته اول مره بس بعد كده تنام خفيف احسن
ههههههههههههههه
آمين يا رب العالمين
فعلا الإدمان هو طريق الهلاك
والمدمن يفقد مستقبله ونجاحه
ويفقد أهم ما يملك وهي صحته
قد يبرر البعض منهم أنه أدمن لكي ينسى همومه
ولكنهم ينسون أنهم بإدمانهم لم تحل الهموم والمشكلات بل زادت بمصيبة الإدمان
بوست جميل يا دكتوره
دمتي بكل خير
كفانا الله شر الادمان بانواعه
ويارب يحمى شبابنا لان شاببنا مش ناقص واكيد دة بالتوعية بمخاطر الادمان
تحياتى لكى ياقمر
اللهم آمين
و ان شاء الله ادور عليها و احملها و اقراها
يا رب امين
الادمان بجد يوجع القلب
ربنا يستر عالشباب
ahmed-k:هم من جهه بينسوا فبينسوا فعلا حتى اسمهم و اهاليهم اللى تعبوا معاهم طول عمرهم و ده اللى حصل فعلا فى الروايه
===========================
رئيسه حزب الاحلام:الادمان ده وسيله الدول انها تدمر بيها شباب الدول المنافسه و المعاديه و بيستغلوا الاحباط و المعاناه اللى شبابنا واقع فيه و بيقدروا ينفذوا من خلاله
==============================
bongo:امين يارب العالمين
نصيحتى بعد ما تحمليها اطبعيها لانها كبيره قوى قوى و متهيألى صعب قوى انك
تخلصيها كلها امام الشاشه
انا خايفه على عنيكى و الله
=================================
dodda:الادمان دمار لكيان الاسره كله مش للمدمن بس
ربنا يحمى شبابنا و يبارك فيه
=================================
الرواية دي من اجمل الروايات الي قرائتها
و مستنيها فلم
السلام عليكم.
الموضوع ده جميل قوي وكويس انك اتكلمتي فيه وكمان عملتي ليه تلخيص وذكرت اسم الكتاب علشان الواحد يدور عليه ويقرأ القصه ده.
اعتذر لان لي فتره لم ازور مدونتك لاني ماكنتش فاضيه الفتره الماضيه.
بنت النيل
او
نوجه
إرسال تعليق