الأربعاء، يوليو 16، 2008

اكل العيش مر يا ناااااااااااااااس


يرقد امامكم فى هذه الصوره فرفور افندى الذى سولت له نفسه اقتحام بلكونتنا

و هو لا يعلم ما يخفيه له القدر من انتقامنا و الذى غالبا ما يكون شديد و مكلف

كما ترون فى الصوره.

الحكايه بدأت لما دخلت البلكونه انشر غسيل و لقيت الفقيد بيجرى قدامى

طبعا جوزى مخلوصهوش الاهانه الشديده اللى وجهها لى فرفرو عدم احترامه

ليا و دخوله بلكونتى من غير استأذان.

راح داخل البلكونه و جاب المصيده و راح جايب ذره مشوى

بايت من يومين و نشف و حطه فى المصيده و سابه شويه ونسينا الموضوع

بالليل بقى سمعت خروشه و كركبه فى البلكونه دخلت بسرعه اشوف ايه اللى

بيحصل لقيت العجل طب يا رجااااااااااااااله و لقيت فرفور صغير تانى

واقف جنبه بيواسيه و طبعا جرى اول ما شافنى بس على مييييييين

ليه دور و جاى قريب و كله قسم و نصيب

احنا بقى بعد ما بنصيد الفار مش بنعرف نموته بس بتتجلى ساديه جوزى العزيز

انه بيتبع معاه سياسه التجويع لغايه ما ينتحر وحده و ده اللى حصل

الفار يبدو انه كان جعااااان جدااااا و ده كان السبب انه يلاقى هذا المصير

الاسود انه اول ما شاف الذره اتهبل عليها و ده اللى مخلاهوش ياخد باله من

المكيده و دخل غرفه الاعدام برجليه

و طبعا الصوره اللى فوق دى بعد تنفيذ حكم الاعدام بالتجويع حتى الموت

و لما مات مات و هوا حاضن كوز الذره و هو يعلنها واضحه

دره ....دره حتى الموت

الرساله دى بقدمها لكل من تسول له نفسه دخول بلكونتى حتى لو فى الحلم

و يعرف ان ورانا رجاله و يعرف برضه ان الصعايده ميسبوش حقهم ابدا

و قد ازعر من انذر

هناك 23 تعليقًا:

Empress appy يقول...

حررررررررررام عليكى انام ازاى انا دلوقتى انام ازاى عاااااااااا
انا بقرف وبخاف من شكلهم
بجد انتم جببارة والله انا لو فار دخل عندى بكل ادب هعزل من العمارة بس خلاص

سبهللة يقول...

حصلنا الزعر يا فندم
بس كنتوا شوفتوا طريقة تانية تتخلصوا بيها من الفار
مثلا كان زوجك نزل الشارع وفتح المصيدة وسابه يرحل لحاله
وبعدين دايما حطى فى البلكونة سم فيران ياكلوا ويورحوا يموتوا فى حته تانية بعيد عنكم

غير معرف يقول...

اين الرافه بالحيوان-اين الرحمه ام انها نزعت من القلوب-ارجوا من يعرف اى طريقه رحيمه بالفئران فليقل؟

خمسة فضفضة يقول...

السلام عليكم ورحمة الله ةوبركاته

يعععععععععععععع

وسيبتوه كده كام يوم في البلكونه
طيب كنتي بتدخلي ازاي وهو محطوط كده وقاعد يبصلك من ورا سلك المصيده

عارف احسن حاجه السم اللي بيشتغل بعد كام يوم ده اللي بيعمل سيوله في دم الفيران ياكلوه ويروحوا يموتوا بعيد عننا

سلام

فارس بلا جواد يقول...

السلام عليكم ورحمة الله وبركاته
هههههههههههههههههه
واضح انك مبتحبيش حد ييجى عندك من غير استئذان
والا هكون جزاءه كده
هههههههههههههههه
بوست مميز
تحياتى

غير معرف يقول...

هههههههههههههه
يعععععععععععععع
مره كان عندنا فار في الشقه
وبابا كان مسافر فضلنا واقفين فوق
السراير لحد ماعمي جه تاني يوم الصبح
يدور عليه بس ملقهوش برضه
بس انت جبااااره

Mafrousa يقول...

حراااااااااااااااااام
انا بقرف جداااا
ده انا مره حسين ان فيه حاجه بتخروش فى البلكونه قعدت اسبوع مش اطلعها غير الصبح....و بعدين حطيت اللزق ده مع حتة لانشون
قوم لزق البيه اللي كان بيمشى على الحيطه بتاعة بلكونة الجيران و ينط عندي يلعب و مش يلاقي اكل يقوم راجع تاني

يعععععععععع
بقرف منهم جداااااااااا

رئـــــيسـة حزب الأحلام يقول...

فكرتينى السنه اللى فاتت كان عندنا الاخ وكان منورنا المهم جبنالة البواب وقتلة حصل هجوم شرس من قرايبه واتت زوجته الغاليه للانتقام وقامت بقرقضضه الشيش للانتقام لبعلها الغالى بس كانت مجزرة
وانا بخاف منهم اوى ربنا بستر
تحياتى وربنا مايعيدة تانى

Mahmoud البطراوى يقول...

والله وعملوها الرجاله

بس غريبه اوى انكم تسيبوه لحد ما يموت من الجوع

هههههههههه اوعى تكونوا بخله والفار يموت عندكم من الجوع

هههههههههههههههه

المهم عقبال اخواته وباقى العائله

سارة علي يقول...

هكذا نال عقابة ايوة كدة جدعان واللهى وبعدين يعنى هى ناقصاهم كمان ما كفاية ان مصر داخلة على مجاعة
ههههههههههه انا بحب مدونتك اوى تحياتى

صيدلانيه طالعه نازله يقول...

Appy:لو خايفه تنامى اجى اقعد جنبك لغايه ما تنامى تكفيرا عن ذنبى
و الله مش حكايه جباره بس هو مات بسرعه عشان جوزى كان حاطط اسمنت ابيض على الذره
الحاجه ام الاختراع يا قمر
=================================
سبهلله:و الله كذا مره حطينا سم و مش ينفع لان جنبى مخازن كتيره و ده سبب وجودها بكثره
نورتينى
==================================
غير معرف:انت السبب فى كل التهزىء ده طبعا كلكم عرفتم هوا مييييييييين
=================================
خمسه فضفضه:هو مش فضل كتير جوزى كان حاطط اسمنت ابيض على الذره فمات بسرعه خلال الليل كان مااااااات
و السم بيموت واحد بييجى قرايبه يخدوا الثأر
على اساس انهم صعايده
ههههههههههههههههههههه
==================================
فارس بلا جواد:مش اى حد بنعمل معاه كده الغير مرغوب فيهم بس
و اللى جاى المفروض يخبط و الا حنطخه
هههههههههههههههههههه
==================================
مياده:كلنا اما بنلاقى فار بنعمل تصرفات غرييييييييييبه جدا
و اما بنفتكرها بنفضل نضحك على الهبل اللى احنا فيه
و دى افكار جوزى مش انا
الظلم حراااااااااااااام
===================================
مفرووووووووسه:اخيرا جيتى يعنى كل مره نجيب فار عشان تيجى يعنى
هههههههههههههههه
انا جبت اللزق ده قبل كده و حطيت عليه جبنه رومى خد الجبنه و مشى و اللزق و لا كأنه موجود
==============================
رئيسه حزب الاحلام:نفس المجزره حصلت معايا قبل كده و نفس المجزره تكررت
============================
بطوط:هو مات من طفاسته دا انا حطاله كوز دره طحنه كله بس كان عليه اسمنت مسك فى بطنه و دى اخره اللى ياكل حاجه مش مغسوله
هههههههههه
==============================
ساره:و الله انتى اللى فيهم و الوحيده اللى مظلمتنيش زيهم
هههههههههههههه
====================================

Foxology يقول...

بالرغم من قرفى الشديد من الفيران لكن انا استمتعت جدا بالصورة دى اكونش عندى سادية وانا مش واخد بالى ؟ :))

تحياتى :)

blue-wave يقول...

انا بقرف من الفيران جدا
عارفه
انا ممكن اشوف اسد واقف قدامه
لكن فااااااااااااار
لالالالالالالالالالالالالالالالالالالالالالالالا

semsem يقول...

ههههههههههههههه
هههههههههههههههههههههه
هههههههههههههههههههههه
امور اوى فرفور
بس جالك قلب منين تعملى كل ده!!!
ده حتى شكله عسول

دعاء مواجهات يقول...

ياخبار أبيااااااااض

انا بقى تقوليلى بتخافى من اية يادودو

اقولك الفيران ثم الفيران ثم الفيرااااااان

انا ماشية احسن بييجوا ع السيرة

بييس

صالح سعيد يقول...

فار يا فار يافار
راحو فين حبايب الفار
فين فين
ههههههههههههههههه
صعبان عليا جدا منظره ده بصراحه
هذا الفار الساذج
بس الصوره تجنن
وتخلى الواحد ينونو من الضحك
بفكر اخد الصوره ولينك البوست مدونتى
واعمل عنوان
لا تدخل هذا البوست
البوست به فار قاتل
تحياتى

غير معرف يقول...

لكي عندي واجب ياحبيبتي تعالي واستلميه

غير معرف يقول...

ههههههههههههههههههههه

ايه القوة دى

داانا روكبى بتخبط فى بعضها

بس حرام تسبوه لما يموت من الجوع

انتو اتعديتو من الحكومة ولا ايه


كنتو تغرقوه او اديلو حقنه ولا اى حاجه من الصيدلانيه بتاعتك


اظن ان عقلكم الباطن فيه عدوانيه عاليه اوى


الله يرحمو

تحياتى

غير معرف يقول...

موضوع ان دل على شئ يدل على ان نفسك حللللللللوه وانك تتمنى اخراجه من المصيده الى حله الطبييييييخ

بنوته يقول...

انا عندى فوبيا من الفيران و بيجيلى حالة غريبة مش طبيعية ربنا يكفينا شرهم و يكتر القطط كدة قادر يا كريم

Yahia يقول...

بصي انا اتعرض لتقريبا نفس الموقف ، بس جبنا اللزق بتاع الفران ..... وفعلا الفار جري على اللزق ومعرفش يتحرك ، بس انا اتصرفة ورمته بالكارتونه في الشارع لأي قط معدي

ahmed_k يقول...

ههههههههههه
أنا بعمل مصايد كده للفئران
وبفرح أوي لما واحد يطب فيها
أنا مستناش لما يموت لوحده
بجيب جردل ميه وأغطس المصيده فيها وبداخلها الفأر
لحد ما يصبح جثه هامده
وبعدين أغسل المصيده بميه سخنه علشان ريحة القتيل متنفرش أقاربه
وأحطها تاني
تقريبا فضلت فتره يوميا أصطاد واحد
لحد ما الظاهر نبهوا بعض فمبقاش حد يقرب مني ههههههههه عملتلهم رعب
إعدااااااام علىطووووول لمن تسول له نفسه الإقتراب


سلااااااااااااام يا دكتوره

القناطر الثانوية بنات يقول...

ههههههههههههه
بصراحة الواحد شاف الصورة ودمه ..فار
الأحسن تجيبوا جردل وتحطو المصيدة زي ماهي عشان يغرق في ثانية بدل العذاب ده
تحياتي علي المقاومة الشعبية الفيرانية دي

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .