الأحد، يونيو 08، 2008

يا اهل الطب ارحمونا ربنا يرحمكم



فاكرين صاحبتى اللى جوزها كانت رجله واجعاه بعد ما خفت شويه رجعت وجعته تاااااااااااااااااانى


راح للدكتور تاااااااانى اللى قرر يكرمه المره دى و يحوله يعمل اشعه من اللى بيتدفع فيها ميااااااااااات


الراجل و الله مكدبش خبر و راح ساحب المودام بتاعته معاه وراح مركز الاوشاعه الكباره اللى عندهم


ودفع يمكن 350 جنيه و جتله واحده سنيوره كده و قالتله بصوت حونين اتفضل اقلع هدومك و البس الروب


وطبعا نفذ كلامها زى الالف و بعد كده دخل عمل الاوشاعه و فضل فى الطاحونه قصدى اوضه الاشعه حوالى 30 دقيقه


بعد كده قالتله الاموره اتفضل بره لغايه الرابورت قصدى التقرير اما يطلع


و بعدشويه جابتله الاوشاعه و مشى


تانى يوم راح للدكتور يوريه الاشعه اللى كان مكتوب فى تقريرها كوارث ملخصها ان الاستاذ خلاص بقى ضهره شرك


و ان الفقرات لبست فى بعض و شويه كوارث مفهموهاش


المهم الدكتور قاله ان التقرير ده لو صح انت تاخده و تطلع على العملياااااااااااااااات عدددددل


بس الدكتور كان مصر ان التقرير ده فيه حاجه غلط لان تشخيصه مش متتطابق مع التقرير


و فضل يقلب فى الظرف قوووووم يلاقى ايه بقى ؟؟؟؟؟؟؟؟؟؟؟؟؟؟؟؟؟؟؟؟؟


ورقه جوه الظرف عليها اسم مريضه تانيه عندها نفس الالم و مطلوب لها اشعه على نفس المكان


نفهم من ده ايييييه؟؟؟؟؟؟؟؟؟؟؟؟؟؟


اللى فهمه الدكتور ان التقارير اتبدلت و ان كل واحد خد تقرير التانى


طبعا جوز صاحبتى رجع المركز و حكى للدكتور الموجود الحكايه اللى خد الموضوع على كرامته قوى


و راح واخد الاشعه معاه و بعدين اختفى شويه و رجع وقاله انت اشعتك طبيعيه بس فيها حاجه بسيطه كده


و سابه و اختفى لمده تيجى 45 دقيقه لما جوز البت قرب يتأسف لهم انه جه اصلا و حاول يفهمهم انه مش جاى


يتخانق معاهم و انه جاى عشان الست اللى خدت التقرير الغلط حرام لان حالتها تعبانه و التقرير بيقول عكس ذلك


و هما و لا كأن


و شويه و طل عليهم الداكتور الكوباره و معاه البشاره و قاله ابسط يااااااااااااااااااااااااااعم مفيكش حاااااااااااااجه


و جابله تقرير جديييييييييد كل حاجه فيه نورمال يعنى كوووووووووووووله تومااااااااااااااااام و مفيش مشاااااااااكل


خاااااااااااااالص و الدنيا حلواااااااااااااااااااااااا و بينكى على الااااااااااااااخر


و قاله ايه بقى انه عشان دكتور قصده على جوز صاحبتى فالمصطلحات قلقته شويه و بذلك يبقى الجهل نعمه


اما المريضه التانيه يااااااااااااااااااااااه انتوا لسه فاكرينها دا انا نسيتها
ربنا يتولاها بقى هى و اللى زيها

هناك 17 تعليقًا:

Tamer Nabil Moussa يقول...

بجد فى ناس كتير مش عندها ضمير ولكن عيروح من ربنا فين

كما تدين تدان

وزنب الغلبانة دى فى رقبتهم

تحياتى

المـــفـــــــقــــــــوعـــــة مــرارتـهــا يقول...

المهم انهم فاكرين نفسهم معصومين من الغلط ومادام الغلط مابينكشفش يبقي في ستين داهية العيانين

Zouka's يقول...

الطب مهنه انسانيه لا يجوز الاتجار بالبشر وصحتهم فيها
والا تحولت الى الوضع الحالى ولا حول ولا قوة الا بالله العلى العظيم

شفـقــة و إحســــان يقول...

عاجبنى البوست جدا...والعنوان اكتر

بيكيا للبيع يقول...

مش اول مرة من اهمال الدكاترة بجد
يعنى بقى صعب فيه دكاترة بيكون غصب عنهم ودكاترة بيبقى اهمال فعلا وبقت عدم مراعاة ضمير
والله الواحد بقى يخاف ياخد حقنه حتى من ايد دكتور لان التفاحه الفسده بتفسد باقى القفص
ربنا يشفى جميع المرضى

Foxology يقول...

عادى جداااااا اللى حصل ايه الجديد ؟؟؟ الأهمال ضربنا فى كل حاجة حتى الحاجات الخاصة اللى المفروض الدقة والألتزام والعبارات الجامدة دى بتتقال عليها

ربنا يرحمنا برحمته

تحياتى

ahmed_k يقول...

من المعلوم ان في قسم يؤديه الطبيب عند تخرجه وبداية عمله في مجال الطب ولكن مفيش حد بيراعي هذا القسم الا من رحم ربي وبالنسبه لهم الموضوع بسيط عالآخر ايه يعني غلطه صغيره زي دي مش عارفين او عارفين وبيستهبلوا ان التقرير ده ممكن ىؤدي الي تشخيص غلط ممكن يودي بحياة انسان ربنا يصلح حالهم كانوا زمان بيقولوا ان مشكلة الطب في مصر هي سوء التمريض لكن دلوقتي المشكله بقت سوء التمريض والأطباء كمان يعني المشكله بتتضاعف مش بتواجه لكي نحلها وربنا يسترها معانا ولكن الحمد لله ان الصيدله في مصر ما زالت بخير ههههههههه , والسلام ختام

ادم المصرى يقول...

السلام عليكم
.......
شكرا على البوست الجميل جدا ده واتاحه النقاش فيه
وعمتا قال الله تعالى وانما يئكلون فى بطونهم نار وسيصلون سعيرا
ونحمد الله ان لسه فى ناس كتير عندهم اخلاق ودين محافظين عليه وندعو لهم ان يغفر الله لهم ويهديهم

اتمنا زياره مدونتى لجميع

rtrcbh يقول...

السلام عليكم ورحمه الله وبركاته

أسلوبك اولا فى الكتابه والتعبير ماشاء الله رائع وخفيف

بخصوص الموضوع اكيد ننحن نتفق ان التعميم خطا اليس كذلك ؟؟
الامر الثانى وهو ان ماحدث واعتقد انه يحدث كثير جدا من احد أسبابه ضعف العمليه التعليميه فى مصر فى مجال الطب

وقله الخدمات والحوافز الماديه التى تقدم للاطباء رغم اننا قد مراها مرتفعه ولكن ليس الكل الحقيقه

نسأل الله ان يصلح احوالنا جميعا واحوال كل المسلمين والمسلمات

والسلام عليكم ورحمه الله وبركاته

rtrcbh يقول...

بيان رقم 3

وبدأت مسيرة الحملة ولن تتوقف بأذن الله حتى نرى ثمارها

(لغتي هويتي)
إلى كل الايجابيين المشاركين معنا ،إلى كل من تعاطف ورحب بحملتنا ولا يعلم ماذا يفعل حان وقت العمل الواجبات العملية 1- أنظر فى مدونتك التي تكتب بها جيدا وحاول ان تجعلها خالية من الألفاظ الأجنبية الغير مطلوبة ولها بدائل عربية جميلة وكذلك المنتديات وتعليقاتك وردودك على المعلقين لديك وأسمك الذى تظهر به المدونة عند التعليق
2- موضوعك القادم بالمدونة أو المنتدى أن شاء الله يكون باللغة العربية قدرالمستطاع فى نفس المجال الذى تكتب به ولمزيد من نشر الحملة يا حبذا لو كان عن اللغة العربية وهذه بعض المواضيع التي اخترناها لك
0 تاريخ اللغة العربية 0 أثر تحول اللغة العربية إلى العامية على الهوية
0 بلاغة اللغة العربية 0 هذه مصطلحات غير عربية يجب الاستغناء عنها
0 مدى تأثير العربية في اللغات الأخرى 0 طرائف ونوادر في اللغة العربية
0 خواطر وأشعار حول اللغة العربية سواء من مكتوبك أو منقولك

3- هذه المواضيع المطروحة ما هي إلا مجرد أفكار لفتح باب التفكير و لك مطلق الحرية في اختيار مواضيع أخرى متعلقة بالأمر نفسه

4- إن قمت بكتابة موضوع بالفعل في الإطار الخاص بالحملة نرجوا إعلامنا به حتى نضع جميعا الرابط الخاص بالموضوع على المدونات ونجمع روابط كل المواضيع المتصلة بالحملة هنا بالمدونة
[Photo] قم بتفعيل الحملة بنشر الرسالة المتفق عليها لدى كل المدونات التي تعرفها وادعوهم للتفاعل معها وأشرح لهم الأسباب والهدف من الحملة
وفقنا الله جميعا وتقبل الله منا ومنكم صالح الأعمال

drpharma يقول...

(حسبنا الله ونعم الوكيل)

غادة يقول...

دا بقى حال الطب والدكاتره فى بلدنا العزيزه اللذيذه و بعدين هيا جت على كده بس دى البلد كلها بقت خرايه
الله المستعان ربنا يعينا بقى و نكمل مشوار حياتنا على خير و لو انى مش شايفه هيجى منين الخير
احلى تحيه وسلام ليكى يا صيدلانيه

غير معرف يقول...

صيدلانيه هي دي مصر ياعبله
واحد اعرفه شاب زي الورد كان في نهائي هندسه
كان بيدوخ وعنيه بتزغلل راح للدكتور
قال له اعمل ليه رنين مغنطيسي لانه
شاكك ان في ورم الولد راح عملها وخدها
المهم الدكتور شافها قال له ده كنصر
علي بقي عاش ايام عنب ومدخلش الامتحان
واتقلب بالعربيه وكله ده من الخضه لما راح المستشفي عادو له التحاليل تاني
فلقوا ان الراجل عادي ومخه نوفي
بس الدوخه دي تقريبا من الجيوب الانفيه
ولما راحوا للدكتور الحمار ده قال
لهم احمدوا ربنا ان هو كويس مش جاين تعتبوني انا بشر ومن حقي اغلط
قولي لجوز صاحبتك يحمد ربنا

صيدلانيه طالعه نازله يقول...

تامر نبيل:الضمير اليومين دول فى اجازه
و عقبال ما يخلص الاجازه نكون احنا خلصنا
تحياتى
==================================
المفقوعه دائما من حماتها:محدش معصوم من الخطأ الا الانبياء و دول بعيييييييد قوى عن الدرجه دى مع انهم بيقولوا ان العلماء ورثه الانبياء
يالا ربنا يرحمنا برحمته
سلامى لحماتك
==================================
د/اشرف:الطب زمان كان مهنه انسانيه دلوقتى بقى مهنه استثماريه
و اكيد انت اكتر واحد عارف كده بحكم وظيفتك
شرفتنى بزيارتك
=================================
شفقه و احسان:شكرا على الزياره و عشان اول مره بس مش حندفعكوا تذاكر
هههههههههههههه
شرفتونى
=================================
بيكيا للبيع:مبروك المدونه الجديده
فى مهن مينفعش اللى يغلط فيها نقول غصب عنه لان تمن الغلطه بيكون حياه انسان
مش كده و لا ايه
نورتينى يا قمر
==================================
فوكسولوجى:الاهمال ده مصيبه فى الطب انا كتير ابقى نفسى اتبرع بالدم و اخاف تكون الابر مش نظيفه و تتنقلى مصيبه زى فيروس سى مثلا
ربنا يسترها علينا
و شكرا على لينك شريط منير
==================================
احمد:الطب مشكلته مش طبيب و ممرضه
الطب مشكلته تراخى فى العمل و انعدام مريض الدكتور يبقى عنده نبطشيه و يروح و يقول لهم لو فيه حاجه كلمونى
فيه حاجات بتبقى الدكتور ضرورى فى لحظتها و الا يبقى قلته احسن
نورتنى
==================================
ادم المصرى:فعلا الدكتور اللى يبقى همه الفلوس و بس و فى مقابل ذلك مش بيقوم باللى عليه اكيد الفلوس دى حتبقى نقمه عليه
شرفتنى
================================
ابو يحيى و ادم:اكيد قله المقابل المادى احد اسباب تدهور مهنه الطب فى بلدنا
بس الضمير فين من ده كله
تحياتى
==================================
د/فارما:و انا معك اقول منهم لله و حسبنا الله و نعم الوكيل
==================================
نور:ليه بس التشاؤم ده ان شاء الله فيه خير جاى و قريب ان شاء الله بعد نقطتين
ممكن يبقوا يومين شهرين سنتين قرنين
قولى انشالله
هههههههههههههههههههههههههههه
==================================
مياده:فعلا يحمدوا ربنا انه لسه عايش ما ماتش من الخضه
و الله اصحابك دول مفتريين مش يحمدوا ربنا ان الدكتور نولهم شرف الغلط معاهم
ههههههههههههههههه
================================

ِِAdem El-Mahdy يقول...

حصلت معايا قبل كده فى الكله

و ربولى الرعب

يبقى انت اكيد فى مصر

كوارث يقول...

لا اله الا الله
الاهمال الطبي وصل للدرجة ده !
سمعنا عن انهم بيسيبوا ناس بتموت !
لكن يغيروا الامراض !
يعني انا رايح عندي صداع أرجع بالم في الركبة !!
بقت زي طوابير العيش ولا ايه ؟
لا حول ولا قوة الا بالله !
تحيا مصر

صيدلانيه طالعه نازله يقول...

Adem el Mahdy:حصلت معاك و لسه حتحصل معاك و مع ناس كتير و بأشكال مختلفه هما بصراحه مبتكرين فى المصايب يعنى بيبحثوا عن الجديد دائما
اول مره عندى و ياريت ما تكونش الاخيره
=================================
كوارث:هو مش لدرجه تحويل الصداع لالم فى الركبه هوا من الم فى الرجل لشلل او لانزلاق غضروفى يعنى حاجات ليها علاقه ببعض
احنا حنألف و لا ايه
نورتنى

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .