السبت، أبريل 19، 2008

حاجه تفرس

بصوا بقى يا جماعه انا النهارده و بعد غياب طويل حاحكيلكم حاجه حصلتلى من كام يوم كده و لسه فارسانى لحد النهارده



صاحبتكم بقى سافرت مرتين اليومين اللى فاتوا نظام صد رد كده فى نفس اليوم و اثناء رحلتى المكوكيه هذه شفت كتييييييييييير



بمجرد ما دخلت القطر يا جماعهالمفروض الساعه واحده الفجر يعنى الناس تتهد و تنام لكن انا و لحظى العاثر و قعت قرعتى جنب ناس



سميعه و دماغها عاليه قوى



اول ما القطر مشى الموبايلات اشتغلت اغانى و على اعلى صوت اشى شرين و اشى ايهاب و كله كوم و شعبولا ده كوم تانى



وكل واحد بقى بيورى صاحبه احدث الاغانى اللى عنده و طز فى الناس عنهم ما ناموا و اللى مش عاجبه ينط من القطر



واحد كان نايم فى الكرسى اللى ورايا بصلهم و قال لهم مش شايفيين ان الناس نايمه راحوا اتكسفوا ووطوه بس لمده دقيقه و رجعت



ريما لعادتها القديمه و انا بقى حطق لانى حاموت و انام لان ورايا مشاوير كتير الصبح



طب تعمل ايه ياعبد الرحيم؟تعمل ايه يا عبد الرحيم؟على طريقه كبير الرحيميه قبلى



رحت مطلعه الموبايل من الشنطه و حطيت السماعات فيه و شغلته و قعدت اسمع فيه و ابصلهم بقرف ان حد يفهم او يحس انى بحاول



اوصللهم رساله و لا كأن ماهوا اللى يعمل كده و يبقى بقله الذوق دى صعب يكون عنده مخ يفكر بيه اصلا



واحد تانى بقى كان ربنا هاديه و حاطط السماعات بس اشمعنى هوه يعنى ميقرفش الناس يعنى هووووووووووووووب لقيته شال



السماعه و هات يا اغانى بصوت اقل ما يقال عنه انه مزعج بقيت مش عارفه اضحك و لا ابكى و لا الطم على وشى من الغيظ



بس افتكرت اغنيه عبد الوهاب لا مش انا اللى ابكى و لا انا اللى اشكى لان الشكوى لغير الله مزله



و كله كوم و اللى حاطط قرأن نغمه موبايل بصراحه دى كانت الانزهاله الكبرى يالهوووووووووووووووى حتى القران بكل ماله من قدسيه



وصل لكده و زعلانيين ان الغرب بيشتم فى الرسول و عايزين نثأر منهم طب باماره ايه و احنا بكل هذا الغباء و التخلف



لا و ايه يفضل مستنى الايه لغايه متخلص و بعدين يرد طب افرضوا ان الموبايل رن و صاحبه فى الحمام يعمل ايه



تخيلوا القران فى الحمام!!!!!!!!!!!!!!؟؟؟؟؟؟؟؟؟؟؟مش عارفه اقول ايه



ده طبعا غير الادعيه و الابتهالات



طيب ليه منراعييش ان فى ركاب مسيحيين معانا و ده ممكن يضايقهم و همه مش بيحبوا يتكلموا علشان ميعملوش حساسيات و مشاكل



و للاسف انا بحس ان فى ناس بتشغل الحاجات دى متعمده عشان تضايق غيرها



من امتى و احنا قليلى الذوق كده مع بعض و مش بنراعى بعض و مبنحترمش خصوصيات غيرنا



المفروض اللى عايز يسمع يسمع وحده مش فى جمعيه و يراعى اللى نايم و اللى عيان و الاطفال الصغيره اللى لازم تنام فى هدوء



الحاجات دى عمرها ماكانت موجوده زمان و للاسف التكنولوجيا عندنا بترجعنا لورا مش بتاخدنا للامام



و فى الاخر مقدرش اقول غير



الله يخرب بيت الموبايل و بيت اللى اخترعه!!!!!!!!!!!!!!!!!!؟؟؟؟؟؟؟؟؟؟؟؟؟؟؟


هناك 30 تعليقًا:

بطوط حبوب يقول...

طبعا كل الى هيجى يعلق هيقولك الموقف ده حصل معايا
ومش مره واحده لا مراااااااات
اصلها حاله وماشيه فى البلد
بس انا دايما لما باقى حد عامل كده
ببتسم له ابسامه لزجه واقوله انا مش محتاج الهيدفون دلوقتى ممكن حضرتك تستخدمها لانك بجد عامل ازعاج جامد
غالبا بيقولى انا اسف ومش بياخد السماعه وبيوطى الصوت


حكايه الادعيه والقرءان دى حرام بجد وشيوخ كتير قالت كده القرءان له قدسيته وكمان الناس بتفتح فى نص الايه او فى الادعيه عن جمل مينفعش تتقسم نصين
زى لا اله الا الله
بس ابتسمى انتى فى مصر
يعنى ......... ام الدنيا ( بس بطريقه شتيمه ) :D

Empress appy يقول...

ايه ده هو انا دخلت اذاعه ما يطلبه المستمعون اصبرى بس هههههههههه
معلش بصى كان ممكن بكل ذوق تقولى لهم
لو سمحتوا ركبوا الهبابه فى ودانكم ههههههههههخخخخخخخخ
او تقولى لهم هو انتم محدثين موبيلات
ومن هنا هيبدأ الضرب ههههههه
لا بجد كان ممكن توجهيهم عادى مفيهاش مشكله وبعدين حاجه من الاتنين يا هيقبلوا يا هيبصوا لكى بقرف ويقولى لكى انتى مالك بس ساعتها لو انا هديهم باللى فى ايدى بجد
لان دى سلوكيات واحنا شعب سلوكياته مفوته هههههههههههههه
اما القرآن خالى قالى انه المفروض يعنى منحططوش لان ساعات ممكن حتى لو احنا حريصين ندخل الحمام وننسى وده يبقى حرام
ومتتفرسيش يا اوختشى مرارتك ييا قمر

مدحت محمد يقول...

فى ناس فعلا معندهاش ذوق
انا فى الشغل عندى حاجة تقرف ببقى فقاعد فى المكتب مش عارف اكتب جواب
واتحولت تحقيق بسبب الموضوع ده
اتخانقت مع واحد معايا فى المكتب مشغل اغانى
على موبايله
الواحد بيبقى فى الشغل مش عارف يكتب جواب
بس هتقولى ايه لعالم معندهاش ذوق
ارحمنا يارب

FaceMoon يقول...

كنتى قوليلهم عشان يحسوا على دمهم واكيد كل دة حصل معانا كلنا فعلا الناس بقت مجنونة بالموبيلات وبالنغمات هما اصلا جايبين الموبيل عشان النغمات معرفش اية التخلف دة دة عيب ثقافى فى الشعب بتاعنا مش عارفين يستعملوا التكنولوجيا صح
بوست جميل
تحياتى

غني يابهيه يقول...

اصل الموبيلات دلوقتى بقت اهم مظهر من مظاهر الروشنه والفشخره و كده يعنى
واللى معاه مجسم مش زى اللى معاه صوت
وكاميرا ام 3 مش زى اللى الكاميرا 2
وكلوا ماشى بيكلم موبيله
وفودافون عمل الدقيقه بكام
لا ده اتصالات مجانا بليل

وربنا يهدى
تحيات بهيه

Unknown يقول...

بصى بقى يا ستى انا عمرى ما كنت احب القطورات كنت دايما باخدها ميكروباصات لكن الفترة اللى فاتت ركبت القطر مرتين وتخيلى انتى راكبة الساعة 11 بالليل وهتوصلى الساعة 9 الصبح وعندك شغل لحد الساعة 4 وحصل معاكى الموقف ده هتعملى ايه
انا عن نفسى حصل معايا فى المرتين وفى اولى مكيفة يعنى ارقى درجة فى القطورات بس فى حاجة هما كمان مش بيوروا بعضهم الجديد وبس ده كمان بيتسابقوا ويتراهنوا على اللى صوت موبايله اعلى من التانى وده راجع لسلوكيات اتمسحت من قاموسنا من زمان واخلاقيات مبقالهاش مكان جوانا وضمير مات من زمان ومحدثى نعمة كتير من غير من نعرف دى جايه منين
تحياتى ليكى

Zouka's يقول...

سيدتى هذا طبيعى فى غياب ابسط القيم والمبادئ والضمير والوعى الدينى
كان زمان لو جار عنده جنازه الشارع والشوارع المحيطه تراعيه ويخفضوا صوت الراديو والتلفاز انظرى الان الميتم جنبه DJ سبوع او حنه وبأعلى صوت لغاية الفجر
ياساده هل تروا فى فرض غرامات مثل السجائر واجبه الان ام ان اللى اختشوا ماتوا

وجهة نظري يقول...

عايزة إية من شعب نصة إتربي، قصدي مترباش، في بلد سايبة نايحة سايحة ملهاش منهج غير إهبش وإجري وإقتل 1000 تزود رصيدك في لندن، وإشتري حتة أرض وسقعها، ووقفت ثقافتة عند شعبان عبد الرحيم وميلودي هيتس وروش وطحن ومن الأخر والبت الموزة؟؟

مش حتاخدي منهم أكتر من كدة ولا حيحسوا علي دمهم أبدا، دا شعب عايز يتربي من أول وجديد بعد فاصل الـ 25 سنة من إهانة ثقافتة، بس إنشاء اللة لما يغور إلي في بالي قريب أوي.

في حب مصر يقول...

الموبايلات في ايدين الشباب وحتى البنات مش بس للكلام بالعكس هي للمنظرة اكتر من الكلام، واللي حصل معاكي في قطر بيحصل في اي مكان تاني.
لكني اللي وقفني السوال اللي انتي سألتيه
من امتى و احنا قليلى الذوق كده مع بعض و مش بنراعى بعض و مبنحترمش خصوصيات غيرنا؟

احنا فعلا وصلنا بسلوكنا لأدنى الدرجات من الاستهبال وقلة الذوق، واللي بيحصل في الشوارع والاماكن العامة دلوقت ما كانش حد ممكن يتصوره قبل كدة

بس نعمل ايه ربنا يتولانا

تقبلي مروري الاول

Tamer Nabil Moussa يقول...

كلامك سليم


بس تعملى اية فى ناس خلاص دة عادة عندهم

ومش مهم مين ينام يزعل


المهم راحتة وبس

في حاجات كتير فى المجتمع عايزة تتغير

ربنا يهدى

تحياتى

المـــفـــــــقــــــــوعـــــة مــرارتـهــا يقول...

حمد الله علي السلامة الأول ... عود أحمد
سلامات طيبون
الحالة دي بقت وبا ... ولو انه مفروض
ان الوقت كان متأخر وفيه ناس عاوزة تنام ... بس تقولي أيه بقي الناس دمهم أتصفي ومبقاش عندهم نقطة حمرا يحسوا بيها
ربنا يهدي

فراشة يقول...

طبعا انتى عارفه رائي في الموضوع ده بس انا اللي استاهل برضه ههههههههههه
فهمانى طبعا
ماشي

صيدلانيه طالعه نازله يقول...

بطوط حبوب:انا حاولت افهمه بانى طلعت موبايلى و حطيت السماعات بتاعته و شغلته 10 دقايق كده بس و لا كأن مع انه فضل يبص عشان يشوف موديل الموبايل
بس هو ده اللى جذبه عالم غبا
تحياتى

""""""""""""""""""""""""""""""""""
Appy:لا دى اذاعه الاغانى
و بعدين دول كانوا شله لو كلمت واحد الباقى مش حيبص بقرف لا حيضرب بشرف
اكلمى انتى و سخنينى و بعدين اول الخناقه ما تبدأ تطلعى تجرى
ههههههههههههههههه
"""""""""""""""""""""""""""""""""""
مدحت محمد:هما فعلا معندهمش زوق
بس قولى جواب ايه ده اللى كان معصبك و مش عارف تكتبه من الزحمه
اعترف بدل ما تعترف فى القسم
شكرا لزيارتك
""""""""""""""""""""""""""""""""
Face moon:دلوقتى الواحد اما يجيب الموبايل بيسأل عن الذاكره تستحمل كام اغنيه تحسى الناس مشاكلها كلها اتحلت مفضلش غير الموبايل و الاغانى
ربنا يرحمنا
تحياتى
"""""""""""""""""""""""""""""""""
غنى يابهيه:بس انت مش معايه ان الصوره بتاعه الكاميرا 3 احسن من 2
هههههههههههههههههههههه
ربنا خلق الحاجات دى عشان الناس تتلهى فيها و الا كان زمانهم كلوا بعض
و الغريبه ان الواحد تلاقيه مش لاقى ياكل و جايب كرت 50 جنيه
اقرع و نزهى
شكرا لمرورك
""""""""""""""""""""""""""""""""""
الى هيثم:دى نفس مشكلتى انى رايحه شغل يعنى مفيش نوم غير فى القطر و للاسف كانت امنيه صعبه المنال
و حكايه مين اعلى صوت دى فعلا اللى كنت سامعاه من كلامهم كان نفسى اجيب طوبه و اشتغل اطفال الحجاره فيهم
ههههههههههههههههه
"""""""""""""""""""""""""""""""""
اشرف:لابد فعلا من غرامه على الازعاج فى القطارات
و قله الذوق دى بقت حاجه عاديه و حكايه الجنازه اللى جنب الفرح دى بقى منظر معتاد دلوقتى
"""""""""""""""""""""""""""""""""
وجهه نظرى:انا متفقه معاك فى كل كلامك
بس برضه متوصلش لاننا منقدرش بعض كده مهما كانت ظروفنا
و دلوقت اما تعترض على حاجه زى دى متلاقيش حد يقف جنبك على رغم من اعتراض الجميع على نفس الشيىء
""""""""""""""""""""""""""""""""""
فى حب مصر:فعلا عدم احترام الخصوصيات بقت امر شائع اليومين دول
و للاسف معظم الناس ما بتعترضش خوفا من المشاكل
نورتنى
"""""""""""""""""""""""""""""""""""
تامر نبيل:تحس انهم نظامهم اللى مش عاجبه يرمى نفسه من القطر
ربنا يهدهم يا اخى
"""""""""""""""""""""""""""""""""
الى فوفو المفقوعه:الله يسلمك وحشانى جدا
انا حاسه لو ضربتهم بسكينه حينزلوا عصير قصب لان دول اكيد معندهمش دم
سلمى لى على حماتك
""""""""""""""""""""""""""""""""""

محاولة لكسر الصمت يقول...

أولا حمد الله على السلامة وربنا يسامح الشغل اللي واخدك مننا....وثانيا صدقيني القضية مش قضية مبايلات وتكنولوجيا..القضية ان احنا اتغيرنا وما عدناش نخاف على بعض ولا نحترم بعض...يعني حاجة من الحجات الكتيييييييير اللي اتغيرت فينا..(للأسوأ)

غير معرف يقول...

bossy ana hakolek kelmetein..ehn ba2ena la deen we la akhla2.kedah bekhtesar.alashan kol elnas ehtamet belo2met el3eish we mesh be tarbeyet weladha men 3asharat elsanawat..fa nasha2 geel men aswa2 ma yomken .ama keset elkhososeya fa lam ya3od laha wogood.hatta khososeeyet eltafkeer takhayaly!
ana 3aysha barra fe belad elkofar zay mabeykolo we 3omr ma 3aneit men elhagat de takhayalo koloko.balash ba2a 7ad yekol ehna ahsan nas welkesas deh please

Desert cat يقول...

هو انتى مش من البلد دى ولا ايه يا دكتورة
يا حبيبتى قلة الذوق الامتناهيه دى متوفرة فى جميع الاماكن وفى كل البلادسواء فى قطر او ميكروباص او اى حاجه بقى
تقريبا فيرس ومنتشر
واللى بيغظينى اكتر اللى بيبقى عامل نغمة اسلامية ويخلى ابنه يرد على الموبايل يقوله قول بابا مش موجود بس ناسى الموبايل
لووووووول
تحياتى يل دكتورة

Yuki يقول...

حمد الله على السلامة يا جميل :)

بصي دي بتبقى خساير لابد منها طول ما انتي فى البلد دي

و الموقف دة مش بيحصل للواحد مرة فى اليوم لأ دة بتاع 4 او 5 مرات

ربنا يكون في عونك يا جميل

و يرحمنا من الناس دية

:)

الجواز و سنينه يقول...

و الله يا دكتره انا ليه كتير ما ركبتش قطار
بس اخر مره و كنت راكبه الاسبانى لقيت سورى للى ها قوله
صراصير
مش عايزه اقولك اتفزعت ازاى و اتقرفت جدا
و كنت نعسانه و خفت انام و الله يابنتى حصل كده
بس حكايه الاغانى دى بترجع لكل واحد و تربيته ما تلوميش الناس التانيه لانها ما لقتش اللى يربيها

موناليزا يقول...

كنتى وجهيهم لان المشوار اكيد طويل يعنى مايستحملش انك تصبرى عليهم وحتى لو ماسمعوش كلامك هيفتكروه بعدين

semsem يقول...

ههههههههههههههههههههه
حلوة نهايه الموضوع دي
اولا متزعليش وتضايقى نفسك
انا والله لما بشغله عاده سماعات
متقلقيش بقى
وحصل خير
بس كان ممكن حضرتك تعبري عن استياءك من الموبيل
كان ممكن تقولى لهم لو سمحتوا استخدمو السمعات ...بما انهم مش حاسين على دمهم
ومتزعلش بس يا جميل
واللهى وحشتينى اوى
اسفه ع التاخير ف الرد
ادعيلى
بمر بامتحانات

semsem يقول...

ههههههههههههههههههههه
حلوة نهايه الموضوع دي
اولا متزعليش وتضايقى نفسك
انا والله لما بشغله عاده سماعات
متقلقيش بقى
وحصل خير
بس كان ممكن حضرتك تعبري عن استياءك من الموبيل
كان ممكن تقولى لهم لو سمحتوا استخدمو السمعات ...بما انهم مش حاسين على دمهم
ومتزعلش بس يا جميل
واللهى وحشتينى اوى
اسفه ع التاخير ف الرد
ادعيلى
بمر بامتحانات

غير معرف يقول...

عارفه انتي جيتي علي الجرح
بالنسبه للاغاني في دي
بتحصل كتيرررررررررر
اما الادعيه دي هقولك
حاجه حصلتلي
كنت راكبه السوبر جيت
المهم الموبايل بتاعي رن
انا عملاه اغنيه بس موطيه الصوت
خالص والله يعني اسمعه انا بالعافيه
لقيت واحد راكب في الكرس اللي قدامي
وفضل يديني خطبه في الدين والتدين
وان النغمه دي حرام ومش عارفه ايه
المفروض اعمل ايه قرانيه
المهم فضلت فاتحه بقي وبعدين قلت له انت بتكلمني انا
قال لي اه قلت له طيب لما تفهم الدين
صح ابقي تعالي كلمني وقمت حاطه وشي في
الجرنان

إخوانى حتى النخاع يقول...

والله يا صيدلانية مش عارف اقولك إيه ..


فعلا هيا بتحصل كتير جدااا المواقف دى مع ناااااااااااااس كتير جدااااا


تشكرى على البوست الجميل دا

Mafrousa يقول...

ده بدل ما تشكريهم انهم بيونسوكى فى القطر يعنى ..مالكيش حق

رئـــــيسـة حزب الأحلام يقول...

انا الحمد لله ماعنديش موبايل ومش ناوية اجيب لانى ماحبش المنظرة

Hossam Nasr يقول...

قُلْ بِفَضْلِ اللّهِ وَبِرَحْمَتِهِ فَبِذَلِكَ فَلْيَفْرَحُواْ هُوَ خَيْرٌ مِّمَّا يَجْمَعُونَ [يونس : 58]

بتوفيق من الله وفضل تم تحويل طلب الحملة التي تقودها المدونة بشأن سن قوانين للحد من التجديف على الإسلام خاصة والأديان عامة إلى المسئولين في هولندا
http://kawlansadida.blogspot.com/2008/04/blog-post_28.html

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التاليhttp://kawlansadida.blogspot.com/2008/04/blog-post_21.html
وجزاكم الله عن إسلامكم خيراً"

DayDreaming يقول...

المشكله مش في الموبايل ولا اللي اخترعه المشكله في العباقره اللي بيستخدموه على انه كاست

Tamer Nabil Moussa يقول...

انا جيت ابص زى كل مرة

بس قولت اكتب تعليق ليكى

انتى فين

فى انتظار موضوع جديد

تحياتى

امواج يقول...

لا ياصيدلانيه
هو سوء استخدام التكنولوجيا
بس الناس ال مبتحسش ومعندهاش زوق دى من زمان
من ايام ما كان فى الافراح تلاقيهم شغلو دى جى من الصبح فى الشارع بصوت مزعج والعاوز ينام يولع وال عاوز يزاكر يتفلق

هى طباع ناس لازم تتغير
لازم الناس تراعى ان حريتها وتصرفتها بحدود لازم مضيقش بيها غيرها

زى بالضبط شرب السجائر
المفروض يراعو ان فيه ناس هتتخنق من السجار دى
بره فى جمله مكتوبه فى كل مكان
حريتك تنتهى عندما يبدأ انفى
يااااااااااه سلوكيات كتير لازم يبطلها الناس بجد

ليكوريكا يقول...

محدش كان مشغل الاف ام ؟

واسمه منير وانا والنجوم وهواك كمان :)

عادي عادي

طب انتي بتقولي ناس بتسمع لشيرين وعبد الوهاب وحتي لما انحدر مستواهم وصل لشعبوللا

امال لو حد شغلك

البانجو ده مش بتاعي

او سلامتك يا دماغي ؟

 
Copyright صيدلانيه طالعه نازله 2009. Powered by Blogger.Designed by Ezwpthemes .
Converted To Blogger Template by Anshul .