كل سنه و احنا قلوبنا على بعض

ساعات قليله قوى تفرق بيننا وبين السنه الجديده

سنه طوييييله قوى كانت 2010 احداثها كتيره اوووى  بالنسبالى انا على الاقل

اتعرفت على ناس كتير جدا ناس كانوا موجودين من الاول بس قربنا اكتر من بعض

و ناس ظهروا لاول مره فى حياتى

سواء دول او دول انا اتعلمت منهم كتييييييييير اوى

استفدت بقى او اتضريت مش مهم المهم فعلا انى اتعلمت

حد من بعييييييييد كده حيضحك نص ضحكه و حيقول و الله انتى عمرك ما حتتعلمى حاجه ابدا

لا بجد بقى اتعلمت كتير من التعامل مع كل البشر

اللى عايزه اقوله بقى لكل الناس اللى عرفتها

الناس اللى معايا ومازالوا يعرفونى عايزه اقولهم انا بحبكم اوووى و ووجودكم فى حياتى منورنى و مفرحنى

الناس اللى زعلوا منى فى اى حاجه انا عملتها عايزه اقولهم سامحونى ماكنش قصدى و حقكم عليا و برضه بحبكم جدا

عايزه اقول لولادى و اسرتى ربنا يخليكم ليا و ربنا يبعد عنا كل شرور الدنيا

كل سنه و احنا طيبين و مبسوطين و فرحانين و قلوبنا على بعض

كل سنه و احنا  مستخدمين ايدينا فى الطبطبه على بعض

مش فى اننا نضرب بعض بيها

كل سنه و احنا عينينا مساعدانا اننا نشوف بيها كل حاجه حلوه 

كل سنه و لساننا بيقول كلمه الحق و قادر يعتذر عن الغلط اللى قاله

كل سنه و كل انسان عرفنى راضى عنى و مبسوط من وجودى فى حياته

كل سنه و انتوا كلكم طيبين و انا معاكم طبعا

اه نسيت اهم حاجه

عايزه اقول لكل انسان زعلان من اى حاجه

افتح قلبك تفرح

:)

دموع

من كام يوم كده كنت مع جوزى فى العربيه و ماشيين لفت نظرى حاجه غريبه اووووى

عدت جنبنا عربيه انا فاكراها كويس كانت ماتركس كحلى و كان راكب فيها راجل شيك جدا

واضح من لبسه و منظر العربيه ان ظروفه كويسه 

ببص تانى كده لقيت الراجل ملامحه هاديه جدا و باين انه مش منفعل و لا حاجه و لا حتى متعصب

بس لقيت دموعه منسابه على وشه بغزاره و مستسلم ليها لدرجه خلته مياخدش باله ان فيه حد مراقبه و شايفه

كمان كان فارد ايده على مسند الكرسى اللى جنبه كأنه حاضن الكرسى و محتويه مع ان الكرسى كان فاضى

ادانى احساس كأنه شايف حد موجود على الكرسى و هو حاضن الشخص  زى ما يكون شايفه تماما

رغم انى شفت الدموع واضحه و صريحه الا انى برضه شكيت انى شفت غلط

بس اتأكدت اما لقيته سحب منديل ينشف بيه دموعه ساعتها بس صدقت

الراجل ده زى ما يكون بيعيط على حد واحشه مفتقده ضاع منه

لانه كان مستسلم تماما  و فى حاله حزن عمييييييييقه اوى

المشهد ده من ساعه ما شفته و انا بفكر و جوايا اسأله كتير اوى مش عارفه اجاوب عليها

ايه اللى يخلى الانسان يبكى كده؟؟؟ايه اللى يوصله للحاله دى من الاستسلام للدموع بالطريقه دى

ليه انا استغربت اما شفته بيعيط؟؟؟عشان راجل يعنى؟؟؟؟و هو مش من حق الراجل انه يعيط 

زيه زى الست بالضبط ؟؟؟

ماهو بنى ادم فى الاول و فى الاخر و عنده نفس المشاعر و الاحاسيس

ياترى ايه اللى حصل معاه خلاه فى الحاله دى؟؟

ياترى مراته وحشته بعد ما سابوا بعض؟؟

حاسس بالحنين لحبيبه ضاعت او اختفت من حياته؟؟

عنده مشكله كبيره و مش لاقيلها حل و مبقاش قدامه غير الدموع عشان ينفس عن اللى جواه

كل دى اسئله جت فى بالى اول اما شفته بالحاله دى

بس اللى اعرفه انا شخصيا و عن تجربه ان الدموع نعمه ربنا اهداها لينا عشان نفرج بيها عن همنا

وحزننا بدل ما نكتم جوانا و تحصل حاجات مش كويسه الطب نفسه اثبتها بالعلم و المنطق

انا شخصيا الدموع بالنسبالى افضل صديق بتريحنى دايما و بحس انها صديقتى فى شدتى و اصعب اوقاتى

و مش بتكسف انى اظهرها قدام اى حد سواء فرحانه او زعلانه

يارب فرج كرب كل مكروب و ريح بال كل مهموم

و خلى دموعنا دايما فى الفرح مش فى الحزن

اللهم امييييييييييين

حاجه تقرف

اما اتعرض فيلم 678 الدنيا قامت ومقعدتش ان الفيلم اوفر و القصه مش عارف ايه

و اللى انتقدوا حسسونا ان اللى بيحصل فيه مش موجود فى واقعنا نهااااااااااااائى

و كاننا فى مجتمع ملائكى مفيهوش غلطه  او هفوه

بس اللى حصل فى المنيا يوم الاتنين بصراحه فاق كل التوقعات و الخيالات

اللى حصل بقى ان شويه شباب سافل و بصراحه ملهومش وصف غير كده

تتبعوا بنت رايحه مدرستهاو تعقبوها حتى دخلت مدرستها

و فضلوا واقفين قدام باب المدرسه و قاموا بتهديدها كمان

البنت اتصلت بوالدها و قالتله اللى حصل و جه و معاه مجموعه من اولياء الامور

و قام باطلاق بعض طلقات من مسدسه فى الهوا فالشباب دول خافوا و طلعوا يجروا

********************************************************

ده كان الخبر اللى اتنشر فى جريده الشروق امبارح و الحادثه كانت يوم الاتنين

الاسئله اللى جت فى دماغى اول ما قريت الخبر ده هيا

1-ازاى الشباب ده وصلت بيه السفاله و الوقاحه و قله الادب انه مش يمشى ورا البنت و بس

لا دول كمان وقفوا وهددوها على بابا المدرسه

2-ازاى مفيش بنى ادم من اللى ماشيين فى الشارع خد باله ان فيه بنت فى خطر

  و ان الاولاد قربوا يدخلوا وراها المدرسه

3-اداره المدرسه فين من كل ده؟؟؟مفيش بواب ؟؟؟؟؟مفيش مدرسين يشرفوا على دخول الطالبات؟؟

انا حسيت انها وكاله من غير بواب و محدش حاسس بحد بدليل ان البنت استنجدت بوالدها اللى فى البيت

مش مدرسين المدرسه

4-لو والد البنت اتأخر شويه و مجاش فى الوقت المناسب كان ايه اللى ممكن يحصل للبنت؟؟؟

انا عارفه ان كل واحد حيقرا الموضوع تساؤلاته حتبقى مختلفه بس دى اسئلتى انا شخصيا

مش لاقيه كلام اكتر من اللى قلته

بس بجد بقت حاجه تقرف

اه نسيت اقولكم اهم حاجه

ان البنت فى تانيه اعدادى و لابسه يونيفورم المدرسه

يعنى تقريبا لسه طفله مش ذات جسم مغرى و لا لابسه لبس خليع

ياريت تكون الصوره وضحت تماما

و لتالت مره 

حاااااااااااااااااااااااااااااااااجه تقرف

الشوارع الخلفيه

لكل منا شيىء يحتفظ به و يكتمه على الاخرين و لا يحب ان يعرفه احد غيره......شيىء ما خاص جدا.....ربما كان سره او حقيقته

و نحن نمضى فى حياتنا حريصين فى الغالب على ان نكون صادقين فلا نخدع على الاطلاق

و نطلب الشيىء نفسه من الذين يتعاملون معنا....

ثم.....حين يخيل الينا اننا اصبحنا واضحين و ان كل ما امامنا مستقيم و مبين و مفهوم

اذ بنا ندرك بغته ان فى الاعماق منا اشياء غامضه عديده :حكايا لم ينفذ اليها شعاع و لم تضىء بعد 

شوارع خلفيه فى نفوسنا هى عالم باسره غريب عنا يعيش فيه حلم صغير جامح لم يتحقق

نزوه ارتكبناها فى وقت ما ...احقاد مبهمه..اطماع...انفعالات مكبوته او اى شيىء آخر لا نتبينه نحن

و لكنه يحكم كثيرا من عواطفنا و تصرفاتنا دون ان ندرى

و الذى يحس صاحبه كأنما هو كتاب مفتوح يكتشف فجأه من خلال كلمه او ضحكه او ربما دمعه ان فى صاحبه اشياء

لا تزال مجهوله تعيش و تنمو خفيه ...و هذا يحدث حتى بين الازواج الذين تختلط منهم العواطف و الانفاس و حبات العرق

لسنوات طوال...

ذلك اننا لا نصنع من نفوسنا فى الواقع غير الشكل الذى نختاره و نحبه و نحرص على ان نظهره

و يطل منا بعد ذلك مالا حيله فيه و لا خيار

و فى حياتنا حتى فى حياه كل يوم تنتشر الظلال لبعض الوقت 

و عندما تسود الظلال فى حياتنا تضطرب الاشياء الثابته و تتميع الحدود ..و لا حدود فى الظلال

اذ ذاك يختلط الابطال بالمزيفين و يتوجس الذين يملكون الكلمه الصادقه قبل ان ينطقوا بها

لان صدى كلمتهم يخلع كثيرا من القلوب....و يرتفع كلام له رنين خادع 

و فى مثل هذه اللحظات تستخفى الحقائق و تشوه البساله و تصبح الفضيله عاجزه بلهاء

تنطمس همهمتها فى الضحكات العابثه و يمحى الخط الفاصل بين الحماقه و الكبرياء

بين الحب و الرغبه بين الشعوذه و الجساره و تتسلل العواطف المحتدمه التناقض لتحجب الطريق امام العيون

و يتخبط كثيرون فى الطريق المجهول و يبقى بعض الناس على الرغم من كل ذلك مدركا لمسئوليه

الكلمه التى يحملها محتفظا بالشجاعه الكافيه لكى يلقى بكلمته فى وجه الخطر نفسه مهما تكن النتيجه

يظل بعض الناس قادرا على التمييز و معرفه الاتجاه وسط الزحام المتموج

فترتفع من بين تراب الانهيار مواقف مضيئه كأنما هيا  المنارات الراسخه تصفع بنورها وجه العواصف و الظلمات 

و تبعث امل الخلاص فى قلوب الذين يكابدون صراع الخفاء

عبد الرحمن الشرقاوى


مقدمه روايه الشوارع الخلفيه

ايه المطلوب من الاخر؟؟؟

هى:يا ساتر يارب على ده راجل داخل مكشر و طالع مزعق 


طب ادخل قول سلامو عليكم الاول و لا اى كلمه حلوه بدل لويه الوش دى




هو:يا باااااااااى على دى ست طول النهار تزعق فى العيال و تتخانق مع دبان وشها


و منكوشه و حالها ملخبط و مفيش ابتسامه على وشها الا اذا كانت عايزه حاجه او طلب


هى:طول ما هو فى البيت مكتوم و ساكت و باصص فى الجرنان او اللاب توب او 


مشغل الهبابه الجزيره


و متنح فى اخبار البورصه تقولش الاسهم و المليارات ماليه الدولاب


و اول امانخرج ونقابل ناس تبقى ضحكته من الودن دى للودن دى


 و ميبطلش كلام و رغى و هزار


ابقى باصاله و متنحه كأنه واحد تانى غير اللى انا متجوزاه




هو:على طول فى المطبخ و اما بتطلع منه تروح تتكوم


 و تنام و لا كأنى راجل موجود معاها و ليه احتياجات و متطلبات


و تزعل اوووى لو عرفت انى بصيت بره 


طب و دينى لاتجوز عليها و اجيبلها ضره تكسر عينها

اييييييييييييييه يا بشر؟؟؟

مش ده كلامنا كلنا مع بعض فى جلسات النميمه سواء الحريمى او الرجالى

اوعوا واحده لمضه و لا واحد مفترى يقول محصلش

كدابيييييييييييين فى اصل وشكوا

اللى عايزه اقوله النهارده بقى بعد كل الخناقات اللى شغاله دى

احنا عايزين ايه من بعض؟؟؟

كل ست عايزه ايه بصراحه و بكل امانه من الراجل اللى معاها

كل راجل يتمنى ايه يكون موجود فى الست اللى بتمثل نصه التانى ايا كان حلو او حادق بقى

انا كواحده ست كل اللى اتمناه من الانسان اللى معايا حبه هدوء و بلاش عصبيه

احتواء شويه اكتر  و تفهم زياده ان انا بتعب زى ماهو بيتعب

بس كل واحد بطريقته و فى مجاله

كلمه حلوه ,ابتسامه جميله مش لازم تكون بسبب و لا تكون قبل طلب حيطلبه

يحاول يخليها ابتسامه لله فى لله

معظم الستات مالهاش طلبات كتير و لو رسيت على البقين الحلوين

 حتى لو كانوا نفاق بتبوس ايديها وش و ضهر  وتقول الحمد لله

كده رضا,كده رضا ,مش عايزه اكتر من كده

ده اللى كان نفسى اقوله 

عايزه كل واحده و كل واحد يفكر كويس و يقول هو نفسه فى ايه

سواء الحبيبه من حبيبها

او الخطيبه من خطيبها

و اخيرا الزوجه من زوجها

بصراااااااااحه تامه و من غير زواق و تلوين فى الكلام

ياريت بسرعه و النبى عشان ورانا اشغال

احساس جديد

صرخات متتاليه انطلقت منك تزف للدنيا انك اتيت

اشعر معها انى اصبحت كيان جديد مختلف تماما عن سابقه

انسانه جديده وجدت و خلقت مع خروجك حبيبى الى نور الحياه

المس كفك الصغير اقبله و ابتسم و اتعجب

ما هذا الكائن الغريب المنتفخ العينين

انه لا يشبهنى و لا يشبه ابيه

تصدر منك اصوات غريبه ضعيفه احاول ان اعرف سببها لا اعرف

انظر الى قدمك المتناهيه الصغر و اضحك

امشى بأصبعى على بطن قدمك فتحرك قدمك مبتعدا عن يدى

فاضحك و اشعر انك انسان حقيقى

احملك بكل خوف و حذر و اضمك الى

كم جميله رائحه البراءه فى جلدك الناعم

اقبلك قبله صغيره فتلتفت بوجهك و فمك ناحيتى

بحركه غريبه لم ارها من قبل و لم افهم معناها

تخبرنى امى معناها انك جائع

اتعجب كيف عرفت فى سويعات قليله ان تعبر عن نفسك و عما ترغب فيه و تريده

و انا و بعد كل هذا العمر مازلت اعجز فى بعض الاحيان عن التعبير عما ارغب فيه و اريده

بعد ان التقينا انا وانت صغيرى فى اولى رضعاتك

اراك امامى نائما كملاك صغير

تداعبه الملائكه فيبتسم ابتسامه ما اروعها و ما اجملها

احساس رائع ان يكون هناك فى الحياه من يحتاجك و تتعلق حياته بحياتك ووجوده بوجودك

كم انا جميله

كم انا رائعه

روعتى وجمالى خلقوا اليوم

يوم ان اصبحت امك صغيرى

خواطر عاشقه

على حافه جزيرتك المنعزله عن عيون كل البشر

اجد راحتى و سكينتى

كائنان نحن نرغب فى التوحد لنصنع انسانا رائعا

يريدان فقط الانصهار ليصبحوا كيانا اجمل

بديهى جدا فالجمال لا يولد و لا ينتج عنه سوى الجمال

هات يديك معى نصنع عالم اكثر حبا و عذوبه و جمال

اريد ان انهل من روحك الجميله فهى تحيينى

تجعلنى امراه جميله

يرغبها الجميع و يهفون اليها

و لكنها لا تريد سواك

بكل بساطه انت مرآتى

و لكن لست ككل المرايا

فهى تجعلنى ست النساء

اثير حفيظتهن و غيرتهن بامتلاكى ما يطمحون اليه

قلبك انت

دائما ما تغير النساء من مالكه ما يفتقدونه

يقللون من شأنها

يعلمون انها الاجمل و الاروع و الاشهى

و مع ذلك يكابرون و يكذبوناعلم جيدا ما بداخلهن

اشفق عليهن

اضحك فى سرى

طالما انت حبيبى ستظل نيرانهن مشتعله

فالتبقى النيران و لتبقى الغيره فما يهمنى فقط 

هو انت

كتاكيتو بنى

*ماما انا عايزه اشترى كتكوت

*نعم يا اختى؟؟؟

* ده بخمسين قرش بس و كل العيال اصحابى اشتروا

*لا مش حنشترى عشان ده ممكن ينقل لنا امراض و كمان دى روح حرام نلعب بيه و فى الاخر يموت

ده كان حوارى مع الهانم الصغيره حول الكتكوت واللى باعه و اللى اشتراه و اللى عايز يشتريه

الموضوع بقى اللى عايزه اتكلم فيه النهارده موضوع عجيب وغريب

مدرسه لغات محترمه جدا من انضف و اشيك بل هى انضف مدرسه فى المحافظه

قصادها مديريه التربيه و التعليم و الاداره التعليميه

يعنى المفروض قصاد الرقابه كلها 

ازاى يقف قدامها واحد بيبيع كتاكيت للاطفال الصغيره و يستغل انبهارهم بالكائنات الصغيره

الكتكوت بخمسين قرش و طبعا الاطفال فى المدرسه كلهم مستوياتهم كويسه الخمسين قرش 

بالنسبالهم كلام فاضى  و الكتاكيت دى مش بيشوفوها غير فى الافلام بس

دى حتى انفلونزا الطيور بقت مرض متوطن فى البلد يعنى اى حد بيتعامل مع الطيور

 ممكن تحصله عدوى

بلاش موضوع العدوى خلينا نقول انهم روح و حرام نسيب الاطفال يلعبوا بيهم لغايه ما يموتوا

كذا حاجه لو فكرنا فيها حنلاقى الموضوع كله  عباره عن اهمال و تسيب و استعباط

مش عارفه ازاى بجد ده حصل و بصراحه متغاظه اووووى 

عشان كده قلت تشاركونى فى الغيظ بتاعى اشمعنى يعنى انا اللى اتغاظ لوحدى

زهايمر

احساس بشع انك تصحى من النوم الصبح تلاقى كل اللى حواليك بيحاولوا يقنعوك انك مريض و من زمان

لا و يفضلوا يقنعوك ان حالتك متاخره و لازم تخضع للعلاج و المراقبه و حاجات تانيه كتير تحد من حريتك

و الابشع بقى انك من كتر ثقتك فيهم تصدقهم و تستسلم لفكره المرض و تتعايش معاها

و بعد ما تبدأ تصدق الكدبه

تلاقى حاجه تحصل تهد ده من اساسه و تكتشف انك واقع تحت رحمه عصابه

بتستغلك و بتسمم جسمك بأدويه  عشان تخليك مريض فعلا و مش اى مرض ده زهايمر

و كل ده عشان الطمع مش اكتر و لا اقل

و اللى يوجع بقى و يحسسك ان حياتك ضاعت هدر و ان اللى زرعته كله مات و مش حيثمر ابدا غير شر

انك تكتشف ان اقرب من ليك و هما ولادك هما اللى بيعملوا فيك كده عشان طمعانين فيك وفى فلوسك

احسااااااااااااااااس فظيع جدا 

مش كده؟؟؟؟

دى كانت قصه فيلم زهايمر لعادل امام و احمد رزق و فتحى عبد الوهاب ونيللى كريم

الفكره بقى اللى عايزه اتكلم فيها 

معقول الطمع يوصل ولادى انهم يعملوا فيا كده مع انى عمرى ما حرمتهم من حاجه

و تعبت و شقيت عشان اوفرلهم حياه كريمه و مستوى اجتماعى لائق

معقول بعد ما ضيعت عمرى عليهم الاقيهم فى الاخر بيدسولى السم فى اكلى و شربى عشان ابقى مريضه و يقدروا يحجروا عليا؟؟؟؟

لمجرد انهم يستولوا على فلوسى اللى هما كده كده لو صبروا شويه حيورثوها منى يعنى هيا رايحالهم رايحالهم

قد كده الدنيا بقت وحشه و غروره لدرجه توصل الابن انه يقتل ابوه و امه

حاسه انى عماله اعيد و ازيد فى نفس الكلام

بس من ساعه ما شفت الفيلم و انا متلخبطه جدا و عماله افكر فى القصه دى و محتاجه رأيكم

يا ترى الراجل ده غلط فى ايه عشان ولاده يطلعوا كده

و ياترى المفروض نعمل ايه عشان ولادنا ميبقوش كده

و نتجنب تكرار المأساه دى معانا